Mafanaˈay Kiso Han?

Itiyaho a Israil tamdaw hakowaay ko kaareteng noka pinengneng to radiw hani?

O RADIW pakayra to nolitengan a Israil o masakalimlaan tahapinangan i kaˈorip nangra. Kinapinapinaay ko Fangcalay Cudad somowal to Israil tamdaw i kasasiroma a pakayraan a moradiw ato midatok a mitingtang. O Fangcalay Cudad a lalakaw ano moetep i o cecayay ko radiw, ilalomaˈ mahawpay ko ˈOlic, Radiw ni Solomon, Radiw no Mararomay. O Radiw ato i Lintad no Fangcalay Cudad Nokaˈorip (Padaka) sanay ko sowal, mikitini i Fangcalay Cudad ihkalay a mahapinang, o kaˈorip no Israil ato radiw tada makakedecay kora.

O radiw ato nokaˈorip. Pakaynian no Israil tamdaw ko radiw paihkal to nafalocoˈan no harateng. (Isaya 30:29) Mala hongti ko hongti i, pisalisinan ato pakalowid a mifolaw i, o fafahiyan mahemekay cangra a mikongkong makero a misalisin. (Kakitaan 11:34; 1 Samuil 18:6, 7; 1 Hongti 1:39, 40) O Israil tamdaw moradiway to mararomay a radiw a paihkal to kararoman nangra a falocoˈ. (2 Rayray 35:25) Mahecad ci Maykelintok aci Seterang malacafay mitilid a Hakacudad a sowal, o Hipray tamdaw ihkalay o “maolahay to radiw a ngangasaw.”

O radiw ato i lomaˈ no hongti a nokaˈorip. O hongti no Israil sahto maolahay to radiw. Hongti ci Sawlo na mitahidangay ci Tafitian a miˈicaˈic. (1 Samuil 16:18, 23) Mala hongti ci Tafiti ikor, misafacoay a misangaˈ to faelohay a lalosidan, mitilidho to ngaˈayay a radiw. Mikadepayho to mitingtangay, ikor oniya misaˈopoan itini fangcalay sefi ni Yihofa a mitingtang. (2 Rayray 7:6; Amos 6:5) Roma i, saˈopoan ni Solomon ko miraradiway a faˈinayan fafahiyan i lomaˈ no hongti a moradiw.—Patnakay 2:8.

O radiw ato midokoay a demak. O masakalimlaan i, misakadademakan no Israil ko radiw itini i pidokoan ci Yihofaan. Soˈlinay, i fangcalay sefi no Yirusalim, o mitingtangayho maedeng 4,000 ko tamdaw. (1 Rayray 23:5) Ilalomaˈ nangra mahawpay ko misimparay, miˈicaˈicay, midatokay, milaepaay. (2 Rayray 5:12) Cowa konini aca a tamdaw, o romaroma tamdaw mahecad itini i pidokoan a moradiw cangra. Tinakoen, ˈalomanay Israil tamdaw mihecahecaan tayra i Yirusalim misalisin i, moradiw to mikodapor to niyaroˈ a radiw. (ˈOlic 120-134) O roma i, misalalangian to miˈoningan no Yutaya, i lafi no Pilakowitan a Lisin moradiway ko Israil tamdaw to “Pakahemekay ˈOlic” a radiw.a

Anini, pakayni to finawlan no Kawas, kamayan masakalimlaan ko radiw. (Yakop 5:13) Midoko kita to Kawas i, moradiway kita a pakahemek Cingranan. (Ifiso 5:19) O radiw pakakedecay kitanan to roma a Krisciyang. (Kolosay 3:16) Tahalifa kita to pasangar i, paˈicelay ko radiw kitanan tahacelem. (Dmak 16:25) Kasemeranto ko radiw, ho ngaˈay kita paihkal to olah ato pakasoˈlinay falocoˈ ci Yihofaan.