Salicay no Miˈosiay Tamdaw

Itini 1 Timoti 5:21 ‘o mipiliˈan no Kawas a coyoh’ o cima cangra?

Patikami ko tarokos ci Pawlo to malecaday o malohemay malitengay a Timotian sanay ko sowal: ‘Itini kako i kaˈayaw no Kawas, Yis Kristo, ato mipiliˈan no Kawas a coyoh saan palimoˈot tisowanan, dofdofen konini a sakayat, aka pisakakinih ko pidemak.’—1 Timoti 5:21.

Salakat sowalen ita o cima ko cowa ko ‘mipiliˈan no Kawas a coyoh.’ Mahapinangay, cowa koya 144,000 a tamdaw. Patikami ci Pawlo ci Timotian i, manilnilay no fangcalay saocor a Krisciyang cowaho ka patikol maˈorip tayra i kakarayan, o tarokos ato manilnilay no fangcalay saocor romaroma Krisciyang cowaho ka malo ˈadingo ko tireng. Mihaenay, ‘o mipiliˈan no Kawas a coyoh’ cowa ko cangra ko mitoroˈan.—1 Korinto 15:50-54; 1 Tisalonika 4:13-17; 1 Yohani 3:2.

O roma i, ‘o mipiliˈan no Kawas a coyoh’ cowa koya mitowakangay to Kawas i Lenlen a coyoh. Oya coyoh mipiliˈay mikapot ci Satanan, telocto i, malo tatiihayto a coyoh, malo ˈadaayto ni Yis. (Satapangan 6:2; Luka 8:30, 31; 2 Pitiro 2:4) Ano ikor, wa marofo i awaay ko paraˈ a ofang to 1,000 miheca, ikorto i, wa malacafayho ci Satanan a malaˈafo.—Yuta 6; Paˈarawan 20:1-3, 10.

Misowalan ni Pawlo a ‘mipiliˈan no Kawas a coyoh,’ maedeng oyaan madimadiay to Kawas aci Yis Kristoan a coyoh ko mitoroˈan.

Itini i kakarayan iraay ko masacaˈolay masaemangay madimadiay a coyoh. (Hipray 12:22, 23) Ano nengnengen i, cowa ka palecalecaden ni Yihofa ko tayal no kahacecay a coyoh. (Paˈarawan 14:17, 18) Tinakoen, na miocoran ni Yihofa ko cecay coyoh mipatay to 185,000 a sofitay no Asiriya. (2 Hongti 19:35) O romaroma coyoh miocoran ‘papisaˈopo to patahafikoday ato cowa pidofdof to sarikec no Kawas a tamdaw, paliyas nai Hongti Kitakit ni [Yis].’ (Matay 13:39-41) O romaroma a coyoh ciˈinorongay misaˈopo to ‘mipiliˈan a tamdaw’ tayra i kakarayan. (Matay 24:31) Roma i, palimoˈotanho ni Yihofa ko romaroma a coyoh midipot to finawlan Ningra.—ˈOlic 91:11; Matay 18:10; nengnengen ko Matay 4:11; Luka 22:43.

Oya masowalay i 1 Timoti 5:21 ‘mipiliˈan no Kawas a coyoh,’ ciˈinorongay alatek to pakayniay i demak no finawlan no Kawas. O nonini a sinael ifafekangay ato ilaenoay, mihadakay ci Pawlo o malohemay malitengay iraay ko adihayay a ˈinorong nangra, mansa o mamikangodo ko salikaka cangranan. Hanaca, patalipaˈelalan ni Pawlo ko malohemay malitengay ano dademak i, ‘aka pisakakinih to demak,’ hamaan kasimaan sa misaˈosi to miiingay a demak. O sapidofdofaw no malohemay malitengay toniya sapalimoˈot o masakalimlaan a lalangian i, ‘o Kawas, ci Yis Kristo, ato mipiliˈan no Kawas a coyoh’ ciharatengay to samaanay ko malohemay malitengay midimokos to kasakopang. Mihaenay, ihkalay mahapinang ita, o ˈinorong no romaroma coyoh milingatay to demak no kasakopang, tinakoen midipotay cangra to kasakopang, mikayatay to mitosilay a demak, halo mifanaˈ to mifekaday a demak ci Yihofaan.—Matay 18:10; Paˈarawan 14:6.