Mafanaˈay Kiso Han?

Isaka 1 hahekalan, o saysi no fangcalay sefi samaanay micingkiyat to remes no sapatoˈaya?

I NOLITENGAN no Israil, mihecahecaan o saysi itiraay i fangcalay sefi patafangay to adihayay sapatoˈaya i cadada. Misalalangiay to mikakingkiway to likisi no Yutaya ci Yosifos a miˈoningan, itini Pitaˈlifan a Lising a romiˈad, mataˈlifay ko 25 efan ko tofor a siri mitokadan, patafang malo misakimoodan a mitodoh a sapatoˈaya, mihaenay oha mamicingkiyat to adihayay a remes. (Lifi 1:10, 11; Saˈosi 28:16, 19) Samaan ko demak no saysi hani?

Mikakingkiway to nolitengan a tamdaw i patirengan ni Hiroti a fangcalay sefi, makilimay ko taˈangayay pifalahan to nanom a kali, oniya pifalahan to nanom a kali padadotocay a misakadademak tahira i Kongyen 70 miheca mapalaˈafo no fangcalay sefi. O remes no sapatoˈaya pakayniay toniya pifalahan to nanom a kali a masadak i fangcalay sefi.

Nengnengen ita koniya pifalahan to nanom a kali a tosaay ko mikiriwiˈay:

• Ilaenoay i cadada a ofang: Masowalay no Misinaha ko pifalahan to nanom a kali no cadada. Sanay ko sowal noniya cudad: “Ilaeno no kaetip ato katimol no cadada iraay ko tosa a ofang, mitaktakan i kaetip ato katimol a remes i cadada wa maˈalol tora tosa a ofang, makakadepay toniya kali, ikor maˈalolay tayra i Kitron ˈAlo.”

  Oniya maˈoningay no Misinah mahecaday to mikakingkiway to nolitengan. O Cienciyaw Likisi no Yutayakiyo pasowalay, i ngata no fangcalay sefi mahapinangay ko tamdaw to “taˈangayay a pifalahan to nanom a kali.” Sanay koniya cudad: “Mikitini Lotok no Fangcalay Sefi maˈalolay a remes no sapatoˈaya makakadep to nanom ikor, pakayniay toniya pifalahan to nanom a kali a masadak.”

• Kadofohay to nanom: Sapisawsawaw to cadada ato pifalahan to nanom a kali, misaaliay ko saysi to adihayay a nanom. Mihaenay, oniya adihayay a nanom naicowaay hani? O Yirusalim a niyaroˈ adihayay ko pidoedoan no nanom ato pihopedan to nanom a fanaw, ngaˈayay padadotoc pafelien ko saysi to nanom. Mikakingkiway to nolitengan ci Yosif Paterike sanay: “I fangcalay sefi, o pafeli to nanom, micingkiyatay, ato pifalahan to nanom a kali tada masasifoday, kasemeran ko misafaco, i nolitengan a lintad awaay ko pakafiloay.”