Tatosa Faelohay Salikaka a Malohemay Malitengay i Congpo

2024 MIHECA 10 folad 5 romiˈad i pakamihecaay a saˈopo iraay ko mikiriwiˈay a salasil: Faˈinayan salikaka ci Ciyawti Yitele aci Yakop Rumfo, manilnilay malo Malohemay Malitengay i Congpo no Misawacayay Tamdaw ni Yihofa. Halafinayto cangra madimadi midoko ci Yihofaan

Ci Ciyawti Yitele faˈinayan salikaka i Padaka a Misuli hofocen, o wama wina sahto o Misawacayay Tamdaw ni Yihofa. Ingata no lomaˈ nangra iraay ko cowa ka macerid mitosil a kilac, cilaˈed to cecay liyad, iraay ko romaroma mitosilay naicowacowaay a pala tayni a mitosil. Telocto i, mafanaˈay ci Ciyawti to ˈalomanay fanekfekay a salikaka, o olah nangra ato makakedecay tada pakalalokay cingranan. I 1983 miheca 10 folad 15 romiˈad mipaputisemay cingra. Maolahay cingra mitosil, mansa micudiyap i kawcong ikor, i 1989 miheca 9 folad misatapangay cingra malo miceriday misakafahay.

Mimingho ci Ciyawti, mikeridan no wama wina cingra ato fafahiyan safa tayra i Pitil a minengneng, padamaay cangranan patireng to patosokan tayra i Pitil a matayal, ikor malaˈosiayto ko patosokan nangra. I 1990 miheca 9 folad tayra i Wakil a Pitil ci Ciyawti, isalakat i Micingkiyatay a Kapot cingra matayal, ikor i Sapadama to Ising a Kapot matayal.

Ingata no Pitil iraay ko roma Sipanya sowal kasakopang ngaˈayay ko nika cakat, misaaliay to faˈinayan salikaka padama. Oranto i, mirienang ci Ciyawti to cecay a kasakopang, halo minanam to sowal no Sipanya. Caka halafin i, mafanaˈay cingra ci Tamaris. O misakafahay ci Tamaris, mahecaday ko kasakilac nangra. Ikor mararamoday cangra, misatapangayto ci Tamaris itini Pitil a matayal.

Sapidipotaw to matoˈasayto a wama wina, 2005 miheca miliyasay cangra to Pitil, miliyaway malo miceriday misakafahay. Itiya i, ci Ciyawti malo sapahatatanamay to misakafahay a singsi, itiniayho i HLC ato RBC a matayal.

2013 miheca, Ci Ciyawti ato fafahi matahidangay patikol i Pitil, mirienang to patirengay i Worwik. Ikor, itiniayho cangra i Patterson ato Wakil a matayal. O roma i, ci Ciyawti na mirienangay to Lihaf no Pipaisingan ato LDC a tayal. 2023 miheca 3 folad, manilnilay cingra malo dama no Mitosilay Kasakapot a Iing. Pakayni toniya pina miheca a tayal i, sanay cingra: “Macada ko faelohay a sanilnil i, alatek marawraway kita, calemcemto cowa ko mamadangar no niyah. Ano mahaen i, haratengen mitiˈer ci Yihofaan, samanen o palaˈosiay Cingra, wa padamaen Ningra kita palaˈosi to demak.”

O salikaka ci Yakop itiniay i Padaka a hofocen. Kaemangho cingra i, soˈlin cowato ka pitosil ko wina ningra, kawra kamayan a pakafanaˈ to soˈlinay kimad cingranan. Roma i, o fofo ningra madimadiay midoko to Kawas to halafinayto a miheca. Mihecahecaan milisoˈ cingra to fofo ningra i, misaˈicelay pakalalok ko niyah no fofo to sakahemekaw ningra to soˈlinay kimad. Mansa 13 mihecaan ningra i, talaˈayaway cingra sapinanamaw to Fangcalay Cudad. Ikor i 1992 miheca 9 folad 27 romiˈad mipaputisemayto cingra. Masakahemekan i, o wina ningra miliyaway mirienang to midokoay a demak, o wama, faˈinayan fafahiyan a safa padadotocay a macakat, hanaca micadaay to paputisem.

Kaemangay a Yakop maˈaraw ningra ko misakafahay sahtoay o mahemekay, oranto i, iraayto ko patosokan ningra mirienang to mieminay to toki a tayal. 1995 miheca 9 folad, micudiyap cingra i kawcong ikor misatapangayto malo misakafahay. 2000 miheca, malinahay cingra tayra i Ekuwato, samanen misaaliay to mitosilay ko itiraay. Itira mafanaˈay cingra ci Inka. Nai Kanataay ci Inka, o misakafahay cingra. Mararamod cangra ikor, itiraay i Ekuwato a niyaroˈ a misakafah. Itiya o mimingayho a kapot, tahanini i, oniya mimingay a kapot macakat macakatayto.

Ikor, manilnilay cangra malo mikiriwiˈay misakafahay, misatapangayho cangra milisoˈ to kasakilac. 2011 miheca, matahidangay cangra mirienang to rayray no 132 a Kiliyat Picudadan. Micudiyap ikor, manilnilay cangra tayra i masasiromaay a kitakit, mirienang to masakenakenaay a tayal. Tinakoen, malo mikiriwiˈay manilnil a mitosilay, matayal i Pitil ato milisoˈ to kasakilac. Roma i, ci Yakop mala singsiayho no SKE.

Samanen ira ko lifon, patikolay cangra tayra i Padaka. Ikor, matahidangay cangra tayra i Pitil no Wakil a matayal. Ci Yakop itiraay i Mitosilay Kasakapot a matayal. Ikor manilnilay cangra patikol tayra i fenpo no Ekuwato, ci Yakop o Iing no Fenpo itira a matayal. 2023 miheca, maocoray cangra patikol i Worwik. 2024 miheca 1 folad, manilnilay ci Yakop malo dama no Mitosilay Kasakapot a Iing. Tikolen miharateng ko nalifetan i cowa ka hecad a kitiraan a matayal, sanay ci Yakop: “Mikiriwiˈ ko katayalan, cowa ko icowaay a matayal, ao cima ko cafay a matayal.”

Tada masemeray kita toniya tasosa a malalokay matayal a faˈinayan salikaka, wa ‘padadotoc a misalimla toniya a tamdaw.’—Filipi 2:29.