Ngaˈayay Lihaf no Fangcalay Cudad Soˈlinay o Naitiraay i Kawas Han?

1. Cima ko mitiliday to Fangcalay Cudad?

Pasowalay ko Fangcalay Cudad kitanan to: Iraay ko hatokel no tamdaw tahadaˈoc a maˈorip itini i sera. (ˈOlic 37:29) 66 mimingay cacudadan ko palaˈosiay to Fangcalay Cudad, kalasaka dademakan no Kawas ko 40 a tamdaw a papitilid. Saˈayaway a lima a cudad i, ci Mosi ko mitiliday, ora pitilidan a toki itiniay i ˈayaw no kongyen to 3,500 a mihecaan; saikoray a cudad ci Yohani ko mitiliday, o pitilidan a toki itiniay i ˈayaw no 1,900 a mihecaan. O naitiniay i cimaanan ko sowal no Fangcalay Cudad hani? O naitiraay i Kawas. O fangcalay saocor no Kawas ko patemeray to tamdaw a mitilid to Fangcalay Cudad. (2 Samuil 23:2) Ora nitilidan nangra nao sowal no Kawas, cowa kono niyah a harateng. Mankora, mahecaday o Kawas ci Yihofa ko mitiliday to Fangcalay Cudad.​—ˈOsien ko 2 Timoti 3:16; 2 Pitiro 1:20, 21.

Nengnengen ko ika Cima ko Mitiliday to Fangcalay Cudad?

2. Hano pakasoˈlinen ita to soˈlinay o naitiraay i Kawas ko Fangcalay Cudad hani?

O Fangcalay Cudad o naitiraay i Kawas, samanen o sapairasol no Fangcalay Cudad to noikoran, ihkalay ko sowal halo matatodongay. Awaay ko cima to pakatepiˈay a pairasol to noikoran. (Yosuwa 23:14) Edengan o ciˈicelay a Kawas ko mafanaˈay to noikoran no tamdamdaw.​—ˈOsien ko Isaya 42:9; 46:10.

O naitiraay i Kawas a cudad coko mamahaen a mikiriwiˈ saw? Mahaenay ko Fangcalay Cudad. O mahongyakay a Fangcalay Cudad mataˈlifayto ko pina soˈot a kasasiroma no sasowalen, matolicayto ko pinaay a walwalan. Soˈlin nolitenganho ko Fangcalay Cudad, kawra malacecayay to aniniay a kakaku. O mitiliday to Fangcalay Cudad iraay ko 40 a tamdaw, kawra masolsolay kora ilalomaˈay a kimad.a O Fangcalay Cudad patalahkalay to olah no Kawas, paˈicel to tamdaw a mifalic to noka ˈorip. Mankora pakasoˈlinay ko ˈalomanay, soˈlinay o sowal no Kawas ko Fangcalay Cudad.​—ˈOsien ko 1 Tisalonika 2:13.

Nengnengen ko ika Hano Ngaˈay Kita Pakasoˈlin to Fangcalay Cudad Hani?

3. O manan ko nisowalan no Fangcalay Cudad?

O nisowalan no Fangcalay Cudad i, o pakayniay to ngaˈayay lihaf, to maolahay ko Kawas kitanan, milimasmas to makapahay a hanoikor no mita. Pasifanaˈay ko Fangcalay Cudad to misamaanay maliyas no tatoˈasan ita ko lakoing, ato mamisamaan patikol a malakoing koniya cikiw.​—ˈOsien ko Paˈarawan 21:4, 5.

Mitiliday ko Fangcalay Cudad to sarikec, safalod ato sapalimoˈot no Kawas, mitilidayho to samaanay ko picada no Kawas to tamdaw iti:yaho, saka mikitira a mafanaˈ kita to o masamaanay a Kawas Cingra. Mihaenay haw i, padamaay ko Fangcalay Cudad tisowanan mafanaˈ to Kawas, halo pasowal tisowanan to sasamaan a malawidang no Kawas.​—ˈOsien ko ˈOlic 19:7, 11; Yakop 2:23; 4:8.

4. Sasamaan kiso cipinang to Fangcalay Cudad hani?

Oniya cudad kalasaka dademakan ko pakayraan ni Yis a pasifanaˈ to tamdaw, padama tisowanan cipinang to Fangcalay Cudad. Papisinanotay to tamdaw ci Yis to samaanay ko sowal no Fangcalay Cudad, ikor i, misongilaˈay a mitadtad to tatodong no sinael.​—ˈOsien ko Luka 24:27, 45.

Naitiraay i Kawas a ngaˈayay lihaf tada mitemeray to falocoˈ no tamdaw. ˈArawhan, cowa ka olah ko roma tamdaw toniya ngaˈayay lihaf, o roma, tada mapiliˈay. Aka a matoled ko falocoˈ a misawad. Mafanaˈ kiso to Kawas, wangaˈ milifok to tahadaˈocay a ˈorip.​—ˈOsien ko Yohani 17:3.