Micada to Paputisem—O Ciepocay a Patosokan Iso!

Sowal ni Yis, makalimay malo Krisciyang a tamdaw o mamicada to paputisem sanay. (ˈOsien ko Matay 28:​19, 20.) Nikawrira, o maanan ko tatodong no micadaay to paputisem hani? Sasamaan ko demak ngaˈ matoor konini a patosokan hani?

1. O maanan ko tatodong no micadaay to paputisem hani?

“Micada to paputisem” sanay a sowal o naitiniay i Krisiya a tilid, o tatodong i, “patoleman” sanay. Itini ci Yis i Yortan ˈalo a micada to paputisem i, patoleman i nanom ko tireng ningra, ikorto ‘macakat nai nanom’ cingra. (Marko 1:​9, 10) Mahecaday, ano micada ko soˈlinay Krisciyang to paputisem i, patoleman i nanom ko tireng.

2. Micada to paputisem paihkalay to maanan?

Micada to paputisem o paihkalay i tamdaw, maharekayto kiso patafang to tireng i Kawas ci Yihofaan. Patafang to tireng o maanan ko tatodong hani? ˈAyaw no micada to paputisem ko tamdaw itini no tekedan a mitolon ci Yihofaan, pasowal to makalimay ko niyah tahadaˈoc midoko Cingranan. O patafangay to tireng a tamdaw miketonay to falocoˈ edengan ci Yihofa ko dadokoen, hanaca misaareteng minengneng to patorodan ni Yihofa cingranan a demak. Cingra i, ‘caayto kono niyah ko tireng’ . . . ‘padadotoc a mikotod’ ci Yisan, mitoor to sapasifanaˈ ato taˈarawan ni Yis a midemak. (Matay 16:24) O tamdaw ano patafang to tireng micada to paputisem, o ngangaˈayto ira ko tangongolay kalawidang ci Yihofaan ato salikaka.

3. Samaan ko demak ngaˈ malaˈosi ko patosokan micada to paputisem?

Minanam kiso to pakayniay ci Yihofaan a sifanaˈ, palahad to nika pakasoˈlin Cingranan, mihaen a misaday to sapicadaaw to paputisem. (ˈOsien ko Hipray 11:6.) Ano adihayto ko mananamay iso a sifanaˈ, tatanoktok ko pakasoˈlin no falocoˈ, mamatongalho ko olah ci Yihofaan. Mihaen kiso mamakalim a pasowal i tamdaw to pakayniay ci Yihofaan a demak, halo midoedo to palinian Ningra a maˈorip. (2 Timoti 4:2; 1 Yohani 5:3) O waywayan iso maˈorip ano ‘matatodong i falocoˈ ni Yihofa, maamaan a demakan palipahak Cingranan,’ itiyato i, ngaˈayto kiso miharateng patafang to tireng i Kawas halo micada to paputisem.​—Kolosay 1:​9, 10.a

CALEPEN MIKADKAD

4. O cacipinang kiso to pakayniay picada ni Yis to paputisem a demak

ˈOsien ko Matay 3:​13-​17, matongal ko kacipinang to pakayniay picada ni Yis to paputisem a demak, ikor lengoen ko ilaenoay a salicay:

• Micada ci Yis to paputisem i, o ˈengaengaho a wawa han?

• Micada ci Yis to paputisem i, o pilosoˈ aca no tamdaw to nanom i fongoh ningra han? Samaanay ko picada ningra to paputisem?

Miocoran no Kawas ci Yis tayni i fafekang no sera, midemak to cecay mikiriwiˈay a ˈinorong. Ikor no micada ci Yis to paputisem i, misatapangayto midemak tonini a tayal. ˈOsien ko Luka 3:21-23 ato Yohani 6:38, ikor lengoen ko ilaenoay a salicay:

• Ikor no micada ci Yis to paputisem paisalakatan ningra ko maanan a tayal i nokaˈorip?

5. O ngangaˈay kiso pakatoor to patosokan no paputisem

Matengil ko patafangay to tireng a micada to paputisem, tada pasangaray a matoor konini patosokan wa saan kiso miharateng alatek. Nikawrira o ngangaˈay kiso padadotoc a macakat. Saikorto i, wa irato ko fanekfek no falocoˈ iso mihawang tonini kalimlaan a rarakaten. Tengilen to samaanay ko sowal no tamdaw. Nengnengen ko IKA.

IKA: Palahaden ko Kalawidang ci Yihofaan (1:11)

ˈOsien ko Yohani 17:3 ato Yakop 1:5, ikor lengoen ko ilaenoay a salicay:

• Sakalaˈosiaw no patosokan a micada to paputisem, wa ngaˈay kiso midemak to maanan?

1. Itini satolon pasowal ci Yihofaan iraay ko kalim iso midaˈoc midoko Cingranan, mihaen o mipatafangayto to tireng i Cingranan

2. Micada kita to paputisem o paihkalay to maharekayto patafang to tireng i Kawas

6. Maharek micada to paputisem i, o masalalomaˈayto no taˈangayay paro no lomaˈ ni Yihofa

Maharek kiso micada to paputisem i, masalalomaˈayto no taˈangayay paro no lomaˈ ni Yihofa. Soˈliˈlin naitiniay i cowa ka lecad a pala, cowa ka lecad a lalengawan, kawra malecaday ko pakasoˈlinan, midoedoay to malecaday a palinian no waywayan a maˈorip kita. ˈOsien ko ˈOlic 25:14 ato 1 Pitiro 2:17, ikor lengoen ko ilaenoay a salicay:

• Ikor no micada to paputisem i, samaanay ko kalalaˈed iso aci Yihofa? Samaanay ko kalalaˈed ato romaroma micadaayto to paputisem a tamdaw?

KALIMLAAN

Sowal ni Yis, sakala Krisciyangaw a tamdaw mamicada to paputisem. Ano sakalaˈosiaw konini a patosokan, paˈicelen ko nika pakasoˈlin ci Yihofaan, midoedo to palinian Ningra a maˈorip, halo patafang to tireng Cingranan.

Lomalen

• O maanan ko tatodong no mipaputisemay? Hano masakalimlaan hani?

• O maanan ko kalaliting no patafangay to tireng ato paputisem?

• O maanan ko papadama tisowanan matoor ko patosokan patafang to tireng ato mipaputisem?

MALALITINGAY A LALAKAW

Nengnengen samaanay ko mipaputisemay, ato samaanay ko nika raraw no kacipinang no tamdaw to mipaputisemay a demak.

“O Maanan ko Mipaputisemay hananay?” (Lalakaw no wangcan)

Nengnengen o maanan a pakayraan ko papadama tisowanan malaˈosi ko patosokan micada to paputisem.

“O Kaolah ci Yihofaan Micorohay to Tamdaw Micada to Paputisem” (Mikecolay, Saka 3 Folad 2020)

Nengnengen ko cecay faˈinayan samaanay a mataneng ko pisaˈosi a micada to paputisem.

“Pakalalokay Cangra Takowanan o Niyah ko Mikilim to Samaanay ko Sowal no Fangcalay Cudad” (Mikecolay, 2013/2/1)

Micada to paputisem hano o ciepocay a patosokan? Sasamaan kiso ngaˈ malaˈosi konini a patosokan?

“O Mamicada Kako to Paputisem Han?” (Salicay no Kapah​—Iraay ko Ciepocay a Caˈof, Saka 2, saka 37 fedengan)