Samaanen Ngaˈ Ira ko Rahekeray a Paro no Lomaˈ?—Saka 1

Mihalamhaman no kahacecay a faelohay mararamoday, ikor no kaˈorip wa mahecad toya kararamodan a romiˈad a lipahak. Soˈlin mahaen han? Mahaento! O roma halafinayto ko raramod a Krisciyang, misaˈicelay a midofdof to saali no Fangcalay Cudad a midemak, lipahakay raheker ko kaˈorip no raramod nangra.

1. Samaanay ko saali no Fangcalay Cudad to faˈinay?

O faˈinay, pafelian ni Yihofa malo tawki no lomaˈ a ˈinorong. (ˈOsien ko Ifiso 5:23.) O Harateng ni Yihofa to faˈinay i, ano misaˈosi i, o saka ciepoc ko paro no lomaˈ. Saali no Fangcalay Cudad to faˈinay, ‘ka padadotoc maolah to fafahi.’ (Ifiso 5:25) Tatodong i, o ngaˈayay a faˈinay ano itini i kaˈayaw anca cowa ka ˈaraw no tamdaw i, kamayan a sidaˈit to fafahi. Wa misaˈicel cingra midipot pakahemek to fafahi, misalo to saali no fafahi. (1 Timoti 5:8) O masakalimlaan i, wa padama cingra to fafahi patanoktok to kalalaˈed ci Yihofaan. (Matay 4:4) Tinakoen, o faˈinay malacafay to fafahi a mitolon, miˈosi to Fangcalay Cudad. Ano salimlaen no faˈinay ko fafahi, wa ngaˈay mitafo to kalalaˈed ci Yihofaan no niyah.​—ˈOsien ko 1 Pitiro 3:7.

2. Samaanay ko saali no Fangcalay Cudad to fafahi?

Sanay ko sowal no Fangcalay Cudad, o fafahi ‘tangongolen a mikangodo ko faˈinay.’ (Ifiso 5:33) Samaanen ko demak hani? Ceriden no fafahi a miharateng ko kangaˈayan no faˈinay, samaanay cingra a maroray paririˈ to paro no lomaˈ. O fafahi saˈicelen a midama ko pisaˈosi no faˈinay. I kaˈayaw no faˈinay, lopayˈen a masasowal; i kaˈayaw no tao, ano milengo to faˈinay i, paihkalen ko mangodoay. Soˈlin, ano cowa ka pidoko to Kawas cingra, kamayan salimlaen ko faˈinay.

3. Mararamoday sasamaan patanoktok to raramod?

Sanay ko sowal no Fangcalay Cudad, o mararamoday ‘o cecayay ko tireng.’ (Matay 19:5) Tatodong i, wa malacafay cangra micoˈay to mipalakay to raramod a demak, ho eca ka palak ko kalalaˈed no raramod. Pairaen ko toki micerid a malacafay, damsayen lopayˈen a masasowal to naifalocoˈay a harateng no niyah. O sakakaay misakaretengan no mararamoday i, cowa ko ci Yihofa aca, iraayho ko ramod no niyah, romaroma a demak ato tao cowa ko masakalimlaan. Sasinanoten no ciraramoday a tamdaw i, aka a makedec ko kacicafay to paputal no raramod a tamdaw.

CALEPEN MIKADKAD

4. O faˈinay i, kaolahen ko fafahi, midipot to fafahi

IKA: O Faˈinay i, Kaolahen ko Fafahi Mahecad Maolah to Niyah (9:53)

• O faˈinay, sasamaan kiso maolah midimokos to fafahi hani?

ˈOsien ko Kolosay 3:12, ikor lengoen ko ilaenoay a salicay:

• Itini kaˈorip no raramod i, misamaan ko faˈinay paihkal toniya makapahay a capeling hani?

5. O fafahi kaolahen kangodoen ko faˈinay

Ano midokoay ko faˈinay anca cowa pidoko ci Yihofaan i, pakalalokay ko Fangcalay Cudad to fafahi, kangodoen ko faˈinay. ˈOsien ko 1 Pitiro 3:1, 2, ikor lengoen ko ilaenoay a salicay:

• Ano cowa ko Krisciyang ko faˈinay iso i, mihalamhamay kiso malacafay cingra tisowanan a mihodop to Kawas. Sapitemeraw kiso to faˈinay i, saliyaliyawen a mitosil cingra han? Anoca paihkal to ngaˈayay capeling a mikangodo cingraanan? Misamaanay hani?

Ano misaˈosi to demak i, sangaˈayay pahecaden ko harateng no mararamoday. Kawra, nolatekay cowa ka pihayi ko fafahi to saˈosi no faˈinay. Ano mihaen i, o fafahi ngaˈayay lopayˈen mikangodo a pasowal to harateng no niyah. Kawra, sasinanoten no fafahi, pafelian ni Yihofa ko faˈinay to ˈinorong, ho misaˈosi to o manan ko sangaˈayay no paro no lomaˈ. O fafahi, ano misaˈicel a midama to faˈinay, mihakelong to saˈosi ningra, mihaen i, mamatongal ko rihaday no paro no lomaˈ. ˈOsien ko 1 Pitiro 3:3-5, ikor lengoen ko ilaenoay a salicay:

• Ano mikangodo ko fafahi to faˈinay i, samaanay ko harateng ni Yihofa hani?

6. Wa miremo kiso to pasangaray no raramod

IKA: Makedecayto ko Kalalaˈed no Raramod Niyam! (5:44)

• O kalalaˈed noniya mararamoday, hano palidlid sa a mafasaw?

• Ikor samaanan nangra ko demak wa patanoktok to raramod hani?

ˈOsien ko 1 Korinto 10:24 ato Kolosay 3:13. Maherek miˈosi to kahacecay a sinael, ikor lengoen ko ilaenoay a salicay:

• Misamaan misakadademak toniya safalod a tanoktok ko raramod hani?

Sowal no Fangcalay Cudad, ngangaˈay kita masasi ngodongodo, siniˈada ciharateng to tao. ˈOsien ko Loma 12:10, ikor lengoen ko ilaenoay a salicay:

• O mararamoday hano talaˈayaw mikangodo to raramod cowa ka tala sa to cafay mikangodo? Misamaanay?

KALIMLAAN

Ano makakaolah makakangodo ko mararamoday, ato misaka dademak to safalod no Fangcalay Cudad, wa lipahak a rahker ko kaˈorip

Lomalen

• O faˈinay misamaan micowat to rahker no paro no lomaˈ?

• O fafahi misamaan micowat to rahker no paro no lomaˈ?

• Ano ciraramoday kiso i, o manan a safalod no Fangcalay Cudad wa padama tisowanan patanoktok to raramod hani?

MALALITINGAY A LALAKAW

Nengnengen ko pina ciepocay a sapaini, wa padama tisowanan lipahak ko kaˈorip no paro no lomaˈ.

Sasamaan Lipahak ko Paro no Lomaˈ (kihpicay cudad)

Mararamoday ano misaka dademak to safalod no Fangcalay Cudad, wa milifok to maanan a sapalemed? Nengnengen koniya radiw a ika.

Tahadaˈoc Maolah Tisowanan (4:26)

Dofdofen ko mikeriday a fadangalan no faˈinay, o manan ko tatodong hani?

“O Fafahiyan Ka Pidofdof to Mikeriday a Fadangalan, Misamaanay Hani?” (Mikecolay, 5/15, 2010)

Mamalikong ko cecay raramod, o manan ko padamaay cangranan?

Padamaay ci Yihofa to Raramod Niyam (5:14)