Hamaan Papiˈafasen ko Kalo Demak to Halifon Iso

1, 2. (1) O sikawdan no Kawas mitalaay to manan a lifon? (2) Samaan ko demak ita ngaˈ misarocod to patosokan a halifon? (Nengnengen ko satapangan coka.)

MAPASIMALAY Krisciyang anini mahecaday to tarokos ci Pawloan, iraay ko sano odoˈay a tokel, matahidang no Kawas tayra i kakarayan. (Filipi 3:14) Mitalaay ko mapasimalay Krisciyang malacafay ci Yis Kristoan i kakarayan a Hongti Kitakit a matayal, padama to tamdaw malo malefotay. (Paˈarawan 20:6) Pakayni i, mapasimalay Krisciyang o makapahay koniya tokel! Cowa ka hecad ko tokel no roma lopayˈay siri, itini ifafekang no sera cangra milifok to tahadaˈocay ˈorip, tada makapahay koniya tokel!​—2 Pitiro 3:13.

² Sapadamaaw ci Pawlo to romaroma mapasimalay Krisciyang, ngaˈay mitafo to madimadi a milifok to halifon, palimoˈot cangranan: “Kao no ikakarayanay ko sasarocoden namo a miharateng.” (Kolosay 3:2) O haharatengen nangra ko tokel no niyah ikakarayanay a hafay. (Kolosay 1:4, 5) O sikawdan no Kawas, ano saki kakarayan anca ifafekang no sera tahadaˈoc ko ˈorip, wa misimsim to sapafeli ni Yihofa cangranan a tokel, mihaen misarocod to patosokan a halifon.​—1 Korinto 9:24.

3. Patalipaˈelalay ci Pawlo to Krisciyang, wa sinanoten ko manan a demak?

³ Patalipaˈelalay ci Pawlo to Krisciyang, hamaan papicongeden ko kalo demak cangranan, milifok to lifon. Itini tikami ningra to Kolosay kasakopang, masowalay ningra o harateng no roma Krisciyang, ano sapilifokaw to hahemek no Kawas, hamaan pasoˈlin ci Kristoan, pidofdof aca to sarikec ngaˈayto, sanay. (Kolosay 2:16-18) O roma, mihadakan ni Pawlo a sapalimoˈot matatodongay i aniniay Krisciyang. Masowalay ningra to sasamaan miconged to mararaway a coos, samaan misaysay to lacongis no Krisciyang, samaan misaysay to pasangaray no paro no lomaˈ. Tahaniniay ko epoc no sapalimoˈot ni Pawlo. Dotocto, wa nengnengen ita ko sidaˈitay a salimoˈot ni Pawlo to Kolosay a kasakopang.

PATAYEN KO MARARAWAY A COOS

4. Misamaanay hano mamiˈafas ko mararaway a coos to halifon ita hani?

⁴ Patalipaˈelalay ci Pawlo to Krisciyang, iraay ko makapahay a tokel, sowal ningra: “Orasaka, patayen ko nohekalan a tatiihay a demak no tireng oya maˈodangay, kaacekan a demak, kasimelangan a demak, o imah ato masamaamaanay a ˈanof.” (Kolosay 3:5) Taˈangayay ko pifiyor no mararaway a coos, wa miˈafas to halifon no mita. O cecay faˈinayan salikaka na madefongay i mararaway coos, ikor miliyaw cadaen no kasakopang, sanay cingra: “Taˈangayay ko pifiyor no mararaway a coos, sapatatikolaw kako cowato ka kiyamaw.”

5. Samaan kita miliyas to sakarefongaw i sakayhid?

⁵ Ano itini kita i cecay pakayraan wa misafelit to palinian ni Yihifa ko niyah alatek, kakiriwiˈen misinanot. Tinakoen, ano inaneng ko demak no faˈinayan fafahiyan, satapang makakaolah saˈosien ko ihekalay safalod, ano makakiting, mahahangot, awa ko roma tamdaw samanen koha demak. (Taneng 22:3) Tayra i raay a matayal ko Krisciyang, anca cicafay to faˈinayan anca fafahiyan matayal wa ira ko sakayhid. (Taneng 2:10-12, 16) Ano misiˈayaw kiso to hatiniay a demak, pasifanaˈen cangra o Misawacayay ni Yihofa kiso, satamdawen ko sasowalen ato waywayan, haratengen ko tatihay minaroˈan, ano makakalona to faˈinayan fafahiyan. Ano matoled anca malonay ko falocoˈ, hamaan marefong i sakayhid. Tahalifa to hatiniay demak, sapilifokaw to pikihar no tao, pakidemay ko katoled mansa sapicadaaw to sahinom no tao. Ano mahaenay ko malifaay iso, cangacangen ko sadama ni Yihofa ato salikaka, hamaan malahedaw ko halifon no niyah.​—ˈOsien ko ˈOlic 34:18; Taneng 13:20.

6. Pakayni pipiliˈ to salama, sasinanoten ita ko manan?

⁶ Patayen ita ko mararaway a coos, congeden ko coka satamdaw a salama. O paihekalan no salama a harateng anini, mahecaday to iti:yaayho a Sotom ato Komora. (Yuta 7) Tamdaw no hekal miowingay to mararaway a waywayan, ngaˈayay patelas sa madadiˈi, cowa ko papaira to kasomadan a minaroˈan, sanay. Padotoc kita a talipaˈelal, hamaan patelas micada to lihaf no pisalamaan. Sinanoten ko mipiliˈan no niyah a salama, hamaan papicongeden ko mararaway salama to misarocodan ita a patosokan a halifon.​—Taneng 4:23.

CAˈEDONGEN KO OLAH ATO SINIˈADAAY

7. Itini i kasakopang, mamasiˈayaw ita ko manan a pasangar?

⁷ Mahemekay kita masalalomaˈ no kasakopang koniyah. Madadama kita to salikaka, malacafay i kasaˈopoan minanam to Fangcalay Cudad, padamaay kitanan padotoc a misarocod to halifon. Kawrira, malacafay ko salikaka mifekaday ko tatihay hato marawraway ko kalalaˈed, ano caka songilaˈen ita misaysay ko hatiniay a demak, wa makakaˈinteh alatek. Mihaenay, sasamanen ita a misaysay ko hatiniay a demak hani?​—ˈOsien ko 1 Pitiro 3:8, 9.

8, 9. (1) Paihekal kita to manan a capeling ngaˈ milifok to halifon? (2) Ano pakararaw ko salikaka kitanan, samaan ko demak ngaˈ matafo ko rihadayay?

⁸ Samaan kita miliyas pakayni kaˈinteh to tamdaw a malahedaw ko halifon no niyah hani? Palimoˈotay ci Pawlo to Kolosay kasakopang: “O nipiliˈanto no Kawas kamo. O kaolahan Ningra a finawlan kamo. Saka, kao adayayay, kao siniˈadaay, kao misapoeneray, kao damsayay, kao kodaitay ko falocoˈ namo. Kasasisolol kamo. Ano iraira ko katatiihan no falocoˈ no nima namo i cimaanan i, kasasihepol. Haenen o nipihepol [ni Yihofa] to raraw namo ko nika sasihepol namo to raraw. Itini tonini a demak a maemin i, pahapinangen ko olah. Nawhani o olah ko misongilaˈay a mipalacecay to falocoˈ no tamdamdaw.”​—Kolosay 3:12-14.

⁹ Caˈedongen ita ko olah ato siniˈadaay wa ngaˈay masasodod. Ano madokaˈ no sasowalen ato demak no salikaka kita, haratengen ko niyah itini sasowalen ato demak na midokaˈay to tao, makahiay ko tao a misodod tisowanan, cowa pilongoc to raraw iso, coko mamiakoˈid kiso to paihekalan no salikaka a olah ato siniˈada han? (ˈOsien ko Patnakay 7:21, 22.) Coko aikaka ko pikoˈid ita ci Kristoan paihekal to siniˈada, palacecay to midokoay to Kawas a tamdaw han? (Kolosay 3:15) Kita ato salikaka mahecaday ko kaolahan a Kawas, milasil to mahecaday a ratoh, mahecaday ko masiˈayaway a sapalifet. Paihekal kita to olah, siniˈada a masasodod, wa ngaˈay micowat to kalacecay no Krisciyang, malacafay a misarocod to tahadaˈocay ˈorip a halifon.

10, 11. (1) Misamaanay hano caka ngaˈay maˈinap to tao? (2) Sasamaan kita miliyas pakayni kaˈinap to tamdaw a malahedaw ko halifon?

¹⁰ Patalipaˈelalay ko sapalimoˈot no Fangcalay Cudad kitanan, maˈinap kita to tao wa malahedaw ko halifon. Pakayni kaˈinap patayen ni Kain ci Apil. Pakayni kaˈinap Ci Kora, Tatan aci Apiram micoliay ci Mosian. O roma i, maˈinapay ci Sawlo to kalaˈosi ni Tafiti sapipatayaw cingranan. Mansa pasowal ko Fangcalay Cudad: “Nawhani ano ira ko maˈinapay ato misatekeday a falocoˈ i, ira ko rawraw ato masamaamaanay a tatiihay a demak.”​—Yakop 3:16.

¹¹ Palahad kita to olah siniˈadaay a capeling, cato ka haliˈinap to tao. Sowal no Fangcalay Cudad: “O ciolahay a tamdaw i, o kodaitay, o kalasiniˈadaay, caay ka ˈinap.” (1 Korinto 13:4) Saka ecaaw ka cilamit i falocoˈ ko maˈinapay harateng, wa misaˈicel kita tano harateng no Kawas minengneng to demak, masalalomaˈay no tireng ni Kristo ko salikaka han ko pinengneng. Palimoˈotay ko Fangcalay Cudad kitanan: “Ano makahemek ko cecay a caˈang [no tireng] i, lipahak a maemin ko caˈang [no tireng].” (1 Korinto 12:16-18, 26) Mihaen ko demak ita, paihekalay to siniˈadaay i salikaka, palecad to sapalimoˈot no Fangcalay Cudad. Ano maˈaraw ita ko salikaka milifok to sapalemed i, cowa ko mamaˈinap cangranan, pahecad cangranan a mahemek. Tinakoen ko wawa ni Sawlo ci Yonatan, tiya mafanaˈ cingra ci Tafiti ko mamidotoc malahongti i, cowa ka ˈinap ci Tafitian, pakalalokay cingranan. (1 Samuil 23:16-18) Wa ngaˈay kita mitodong ci Yonatanan, paihekal i tamdaw to olah ato siniˈadaay han?

MALACAFAY TO PARO NO LOMAˈ MILIFOK TO HALIFON

12. Ano sapadamaaw to paro no lomaˈ, milifok to halifon, tengilen ita ko maanan sapalimoˈot hani?

¹² Saka dademaken no paro no lomaˈ ko safalod no Fangcalay Cudad, ngaˈay micowat to rihaday ato lipahak, wa ngaˈay malacafay milifok to halifon. Toniya demak, o manan ko sapalimoˈot ni Pawlo to Kolosay a Krisciyang hani? Sanay: “Kamo o fafahi i, pihakelong to faˈinay namo. O dadoedoedoen aca no misa Kristoay konini. Kamo o faˈinay i, kaolahen ko fafahi namo. Aka pakarorayen ko falocoˈ nangra. Kamo o wawa i, ano o maanto a demakan, pitengil to sowal no mama ato ina, o kalipahakan no Tapang konini. Kamo o mama ato ina i, aka pakasemeren ko wawa iso to sakaecaaw ka toled no falocoˈ nangra.” (Kolosay 3:18-21) Ano faˈinayto, fafahi anca wawa, misaka dademak to limoˈot ni Pawlo wa ira ko epoc.

13. O fafahiyan Krisciyang misamaan ngaˈ malifok ko falocoˈ no faˈinay hani?

¹³ Ano cowa ko Krisciyang ko faˈinay iso, hanaca mariˈangay tisowanan, samaanto hani? Malacongis kiso to faˈinay wa masalof ko demak han? Soˈlin tooren no faˈinay ko sowal iso, wa malifok iso ko falocoˈ ningra, makahi micada to soˈlinay kimad han? Ecato halatek. Kawra, ano kangodoen iso ko fadangalan no faˈinay, wa micowat to rihaday no lomaˈ. Mihaen kiso wa pakahemek ci Yihofaan, malifokho ko falocoˈ no faˈinay malo midokoay to Kawas a tamdaw, mihaen wa ngaˈay kamo mararamod milifok to halifon.​—ˈOsien ko 1 Pitiro 3:1, 2.

14. O faˈinayan Krisciyang misamaan ngaˈ malifok ko pikangodo no fafahi hani?

¹⁴ O roma, cowa ko Krisciyang ko fafahi iso, cowa kangodo tisowanan, samaanto hani? Ano celiˈ han iso ko fafahi, wa malifok ko pikangodo ningra han? Cato! Tokel no Kawas todongen iso ko taˈarawan ni Yis, tano sidaˈitay a pakayraan mikayat to paro no lomaˈ. (Ifiso 5:23) Iraay ko olah ato mihadidiay ni Yis a mikayat to kasakopang no Krisciyang. (Luka 9:46-48) Mihaenay, todongen no faˈinay ko taˈarawan ni Yis, wa ngaˈay malifok ko falocoˈ no fafahi, ngaˈayto cingra malo Krisciyang.

15. Ano maolahay ko faˈinay to fafahi wa misamaan to demak?

¹⁵ O limoˈot no Fangcalay Cudad to faˈinay, sanay: “Kamo o faˈinay i, kaolahen ko fafahi namo. Aka pakarorayen ko falocoˈ nangra.” (Kolosay 3:19) O sidaitay a faˈinay ano mangodo to fafahi, wa mitengil to sowal ningra, wa mahapinang no fafahi to misalimelaan cingra. (1 Pitiro 3:7) Soˈliˈlin cowa ko tatooren no faˈinay ko kihecod a sowal no fafahi midemak, kawra ano malalengo ko faˈinay ato fafahi wa ira ko matatodongay a misaˈosian. (Taneng 15:22) O sidaitay a faˈinay wa misaˈicel milifok to kangodo no fafahi, cowa ko papaciˈci to fafahi. Tano sidaˈitay a pakayraan ko picada no faˈinay to fafahi ato wawa, wa ngaˈay lipahak ko paro no lomaˈ mihodop to Kawas, malacafay milifok to tahadaˈocay a halifon.

KAPAH TAMDAW​—HAMAAN PAPIˈAFASEN KO KALO A DEMAK TO HALIFON ISO!

16, 17. Kapah tamdaw, samanay ko pinengneng iso to pirikec no wama ato wina?

¹⁶ Kapah tamdaw, cowa ka cipinang hanaca pakidemay ko saali no wama wina sanay kiso han? Wa matoled kiso halatek, cacisasa to cowa ko sangaˈayay a kaˈorip ko mihodopay ci Yihofaan. Kawraan, ano pakayniay katoled iso a sawad saan mihodop ci Yihofaan, wa kahenay mahapinang iso, edengan o salikaka i kasakopang ato Krisciyang a wama wina iso ko soˈlinay a maolah tisowanan.

¹⁷ Kapah tamdaw sa harateratengen, ano caay pirikec ko wama wina tisowanan, ano mihaen soˈlinay a maolah ko wama wina tisowanan han? (Hipray 12:8) Maketeray kiso to pakayraan no wama wina a mirikec tisowanan halatek, ano mahaenay, tanamen a cipinang to lalangian no wama wina a mirikec tisowanan, hamaan ngaliwngiw a maketer. Mihaenay, ano marikec kiso i, terep han aka pacoli. Sowal no Fangcalay Cudad: “Wawaaw, pitengil to sowal no mama iso, pakifalocoˈen ko sowal no ina iso.” (Taneng 17:27) O kapah patireng to patosokan no niyah malo malohemay a Krisciyang, ano samaanto ko sarikec hayi han a micada, mikitini minanam to sapasifanaˈ. (Taneng 1:8) Ano maolahay ci Yihofaan ko wama wina iso, o sapatelong ni Yihofa tisowanan cangra han ko pinengneng, samanen ciharatengay cangra padama tisowanan milifok to tahadaˈocay a halifon.

18. Misamaanay miketon kiso to falocoˈ a misarocod to halifon?

¹⁸ O tokel no Krisciyang ano tayra to kakarayan, anca i fafekang no sera micada to tahadaˈocay ˈorip, hinatalaay to makapahay hatokel, samanen o sapafeli no misangaˈay a Tatapangan a hatokel konini. Pakayni i lakoing sanay ko Kawas: “Nika tenak no fanaˈ no tamdamdaw to pakayniay [ci Yihofaan] itini i polong no hekal.” (Isaya 11:9) Noikor i, itiniay i fafekang no sera maˈoripay a tamdaw, wa micada to sapasifanaˈ no Kawas. O tahadaˈocay a sapalifon sasaˈicelen ita micangacang. Mihaenay paifalocoˈen ita ko sakiˈok ni Yihofa, hamaan papiˈafasen ko kalo demak to halifon iso!