Ano Mifekad ko Pades i, Samanen Milayaˈ ko Kamay a Padama

Anini mangalefay ko nika adihay no pades, mifekad ko pades i, saka ciepocaw milikakawa to padamaay a tayal, malohemay malitengay i congpo patirengay i kahacecay a fenpo patirengay to padamaay a kapot.

Padamaay kapot a salikaka mafanaˈho to icowaay ko pades i, mirinnakay to itiraay a malohemay malitengay, cipinang to itiraay salikaka o manan ko saali nangra a padama. Ano pakidem ko pades i, itiraay malohemay malitengay cowa ka saysay i, minilnilan no fenpo ko mapahatatanamay salikaka ciˈinorong to padamaay a demak. Oniya salikaka mikilimay to makalimay a salikaka, misaˈopo to sapadama a dafong miˈacaho to sapalilam to tahapadesay salikaka a dafong.

O milimasmasan no fenpo a padamaay to tahapadesay adihayay ko epoc. Ano tano niyah sa ko salikaka a midemak, alatek masasifod, mapalak ko dafong ato misaliyawliyaw a dademak.

Miocoran no fenpo ko salikaka misaˈosi to hakowa ko mamapalak a kiyaho ato dademakay a tamdaw. Mirinnakho cangra to itiraay a sifo, ho ngaˈay ko lingad no padamaay to tahapadesay a demak. Mihaenay, matahidang no fenpo kiso mirienang to padamaay a demak, anca cowa ka ngaˈay sano niyah sa misaˈopo to kiyaho, miwonpang to dafong anca tayra i tahapadesay a kilac.

Tangongolay ko olah ita to salikaka, mansa tahapades cangra i, ciharatengay kita palayaˈ to kamay a padama. (Hipray 13:16) Samanen ita padama hani? Masakalimlaan i, pakayni ita i satolon to tahapadesay a salikaka ato mirienangay to padamaay. Ngaˈay kita pakayni i demak no paro no kakayaran a pakiyaho, o malohemay malitengay i congpo mikayatay to kasafenpo cipinang to, onini a sapakiyaho o sangaˈayay wa icowaen a sakadademak. Ano ciharatengay kita mirienang to padamaay a tayal i, ngaˈay tiliden ko sapisingsi (DC-50).

NENGNENGEN KO IKA TAˈAKAYAY KO LENLEN I PRACIL, IKOR PACAˈOFEN KO ILAENOAY A SALICAY:

2020 miheca, malenlen ko Pracil i, o padamaay no likakawa to tahapadesay a demak, icowaay ko mitemeray kisowanan hani?