Salicay No Miˈosiay Tamdaw

‘Minaroˈan no fangcalay saocor’ o matiliday aca i Kalatiya 5:22, 23 a capeling han?

Sowal noniya tosa sinael: ‘Minaroˈan no fangcalay saocor iraay ko olah, lipahak, rihaday, siniˈada, ngaˈayay, pakasoˈlinay a falocoˈ, damsayay, miˈimeray.’ Soˈlin misilsilan no sinael ko siwa a capeling, kawra o ngangaˈay ko fangcalay saocor padama kitaanan palahad to adihayay a capeling.

Nengnengen ita ko fafekangay noniya sinael, sanay ko sowal no tarokos ci Pawlo: ‘Midoedoay to raraw a waywayan iraay ko maˈodangay, o cikaditay, o kaacekan waywayan, o mitaˈongay to samiyay, o misakawasay, o misaˈadaay, o maˈinapay, o maketeray, o misatekeday, o palacinowasay, o malasangay, o haliacangay, iraho ko romaroma malecaday a demak.’ (Kalatiya 5:19-21) Sowal ni Pawlo ‘iraho ko romaroma malecaday a demak,’ sakoniya sowal cowa ka hadaken ningra ko polong ‘midoedoay to raraw a waywayan,’ tinakoen o masowalay no Kolosay 3:5 a waywayan. Dotoc, tano malecaday a pakayraan ko pihadak ningra to siwa makapahay a capeling, ikor sanay ko sowal ‘o matiniay a demak i, awaay ko milalangay a rikec.’ Sowal ningra ‘O matiniay demak’ cowa ko ‘oniya pina demak,’ tatodong i cowa ka hadaken ko papadamaen no fangcalay saocor palahad a polong capeling.

Ngaˈayay palalinien ita ko roma sinael, tinakoen o sapatikami ni Pawlo to Ifisoay kasakopang sanay: ‘O minaroˈan no taengaday i o ngaˈayay, moecelay, ato soˈlinay ko demak.’ (Ifiso 5:8, 9) O ‘ngaˈayay’ ato ‘moecelay’ ‘soˈlinay’ malecaday o masalalomaˈay no ‘minaroˈan no ˈodinagaray,’ hanaca masalalomaˈay no ‘minaroˈan no fangcalay saocor.’

Roma i, palimoˈotan ni Pawlo ci Timoti micangacang to ‘moecelay a falocoˈ ato miringiay to Kawas a pinangan ato pakasoˈlinay a faloco’ ato olah ato mihadidiay ato damsayay a falocoˈ oniya enem a capeling. (1 Timoti 6:11) I lalomaˈ o pakasoˈlinay falocoˈ, olah ato damsayay a capeling ‘O minaroˈan no fangcalay saocor.’ Misaaliay ci Timoti to sapadama no fangcalay saocor ngaˈ ngaˈay palahad to tolo a capeling, o moecelay, miringiay to Kawas a pinangan, ato mihadidiay.—Nengnengen ko Kolosay 3:12; 2 Pitiro 1:5-7.

Mihaenay, o minaroˈan no fangcalay saocor cowa ko mahadakay aca i Kalatiya 5:22, 23 a siwa capeling. Soˈlinayto o ngangaˈay ko fangcalay saocor padama kitaanan palahad toniya siwa capeling, kawra mamalo matenesay a Krisciyang, oha papalahadho kita to adihayay makapahay capeling, padadotoc micaˈedong to faelohay capeling, ‘oniya faelohay capeling mitooray to araaw no Kawas a sangaˈen, paihkalay to soˈlinay moecel ato madimadi.’—Ifiso 4:24.