Hano Mirienang Kita to Piharatengan to Kinafalah ni Yis a Saˈopo?

1-2. (1) Ihacowa tatokian kita mikiriwiˈay miharateng to mapatayay a salawina? (2) ˈAyaw no mapatay ci Yis a dadaya patirengay to maanan a limasmas?

ANO HAKOWATO ko halafin a mapatay ko kaolahan ita paro no lomaˈ ato widang, maharatengay ita cangra. Mangalef itini kapatay nangra a romiˈad to mihecahecaan, mikiriwiˈay ko kaciharateng ita cangranan.

² To mihecahecaan, itini kapatayan no kaolahan ita a Yis Kristo a romiˈad, malisopsopay kita to masacaˈolay masaemangay a tamdaw i paro no kakarayan miharateng cingranan, samanen pakayniay cingra kitanan kinafalah to ˈorip malo sapatefoc, milidong kitanan mihepol to pipalit no raraw ato patay. (Matay 20:28; 1 Pitiro 1:8) Soˈlinay i, makalimay ci Yis to mihakelongay cingranan a tamdaw miharateng to kapatay ningra. Itini iˈayaw no kinafalah a dadaya, patirengay cingra to Lafi no Tapang, hanaca palimoˈot to nisawawaan sanay: ‘Ka padadotoc kamo mihaen to demak a miharateng takowanan.’—Luka 22:19.

3. Onini a lalakaw mamilengo to maanan a salicay?

³ O mirienangay tonini Piharatengan a Saˈopo a tamdaw, cowa ka ˈaloman ko tatayra i kakarayan, ˈalomanay tamdaw itiniay i fafekang no sera ko tokel micada to midaˈocay a ˈorip. Onini lalakaw mamilengo oniya tosa ˈopo a tamdaw hano makalim mirienang tonini Piharatengan a Saˈopo, milengoho o mirienangay a tamdaw mikitini mamilifok to maanan a epoc. Salakat minengneng kita, o manilnilay no fangcalay saocor a Krisciyang hano mirienang tonini a saˈopo.

O MANILNILAY NO FANGCALAY SAOCOR A KRISCIYANG HANO MIRIENANG

4. O manilnilay no fangcalay saocor a Krisciyang itini Piharatengan a Saˈopo hano komaen to epang ato epah?

⁴ To mihecahecaan, o manilnilay no fangcalay saocor a Krisciyang itini Piharatengan a Saˈopo komaenay to epang minanomay to epah. Hano mihaen ko demak nangra hani? Sapacaˈofaw tonini salicay, haratengen ita ko mifekaday a demak i salikoray a dadaya i fafekang no sera ci Yis. Maharek komaen to Lafi no Pitaˈlifan a Lisin, patirengay ci Yis to Lafi no Tapang a Lisin. Palayapan ningra to epang ato epah i 11 madimadiay a tarokos komaen ato minanom. Somowalay cingra to tosa sakiˈok i cangranan, oya faelohay a sakiˈok ato Hongti Kitakit a sakiˈok.b (Luka 22:19, 20, 28-30) Onini tosa a sakiˈok pairaay to hatoki no 11 madimadiay a tarokos ato mimingay ˈopo a Krisciyang tayra i kakarayan malo hongti ato malo saysi. (Paˈarawan 5:10; 14:1) O manilnilay no fangcalay saocor hanaca maˈoripayho toniya hekal a Krisciyang o masalalomaˈay nonini tosa a sakiˈok a tamdaw, mansa dengan cangra ko ngangaˈay komaen to epang minanom to epah itini Piharatengan a Saˈopo.

5. Manilnilay no fangcalay saocor a Krisciyang mafanaˈay to iraay ko masamaanay a hatokel no niyah?

⁵ Makalim sapirienangaw to Piharatengan a Saˈopo ko manilnilay no fangcalay saocor a Krisciyang o roma a lalangian i, pairaayto toki nangra misongilaˈ miharateng to hatokel no niyah. Kasapaan ko sapafeli ni Yihofa cangranan a hatokel, wa itini cangra i kakarayan milifok to coka patay coka horac a ˈorip, malacafay ci Yis Kristoan ato romaroma patikolay maˈorip tayra i kakarayan a Krisciyang mikowan. Masakalimlaan i, o mamaˈaraw nangra ko Kawas ci Yihofa! (1 Korinto 15:51-53; 1 Yohani 3:2) Manilnilay no fangcalay saocor a Krisciyang mafanaˈay to matahidangay ko niyah tayra i kakarayan, kawra sapilifokaw to sapalemed i kakarayan, o tatahira i patay a madimadi cangra. (2 Timoti 4:7, 8) Miharateng to hatokel noikor palipahakay tonini a Krisciyang. (Titus 2:13) Mihaenay ‘o roma lopayˈay a siri’ samaan aki? (Yohani 10:16) Hano mirienang cangra to Piharatengan a Saˈopo hani?

O ROMA LOPAYˈAY SIRI HANO MIRIENANG

6. O roma lopayˈay a siri to mihecahecaan hano mirienang to Piharatengan a Saˈopo?

⁶ Soˈliˈlin o roma lopayˈay siri itini Piharatengan a Saˈopo cowa ko kakomaen to epang ato minanom to epah, kawra mahemekay cangra mirienang tonini a saˈopo. 1938 miheca, itiniay i fafekang no sera i lakoing midaˈoc ko ˈorip a tamdaw sakinacecay mikiriwiˈ matahidang mirienang tonini a saˈopo. Mikecolay 1938 miheca 3 folad 1 romiˈad (no Padaka) sanay: “Mirienang ato minengneng tonini a saˈopo ko ‘roma lopayˈay a siri’ tada matatodongay, mihaen ko demak palipahakay cangranan.” Micadaay to satahidang mirienang ato minengneng to pakaetimay ko lafang, tada lipahakay ko harateng. Malecaday ko roma lopayˈay a siri, mahemekay cangra mirienang to Piharatengan a Saˈopo.

7. O roma lopayˈay siri hano halamhamay sapitengilaw to kimad i Piharatengan a Saˈopo hani?

⁷ O roma lopayˈay siri iraay ko toki misongilaˈ miharateng to hatokel no niyah. O roma lopayˈay siri tada halamhamay mitengil to Piharatengan a Saˈopo a kimad, samanen onini a kimad mitadtaday to pikowan to comaˈol miheca, mamalaˈosi a demak ni Kristo ato kalacafayay cingranan mikowan a 144,000 tamdaw. Palo lakoingen nangra konini a cikiw, padamaho to madimadiay a tamdaw malo malefotay. Isaya 35:5, 6; 65:21-23; ato Paˈarawan 21:3, 4 a sapairasol no Fangcalay Cudad mitadtaday to makapahay kaˈorip noikor, o masacaˈolay masaemangay mirienangay to Piharatengan a Saˈopo a tamdaw miharatengay ano matatodong ko sapairasol i, o niyah ato kaolahan a paro no lomaˈ malacafay lipahak a maˈorip, maacangay a mahemek. Mihaen ko demak nangra, o papaˈicel to hatokel noikor, misetek to falocoˈ eca ka piliyas ci Yihofaan.—Matay 24:13; Kalatiya 6:9.

8. O roma lopayˈay siri mirienang to Piharatengan a Saˈopo o roma lalangian o maanan?

⁸ O roma a lalangian no roma lopayˈay siri sapirienangaw to Piharatengan a Saˈopo i, makalimay cangra paihkal to olah ato pidama i manilnilay no fangcalay saocor a Krisciyang. Paˈayaway ko Fangcalay Cudad onini tosa ˈopo a tamdaw iraay ko tada makelecay a kalalaˈed, nengnengen ita ko pina tinakoan.

9. Mikitini sapairasol no Cikariya 8:23 ngaˈay mahapinang ita, samanay ko roma lopayˈay siri minengneng to manilnilay no fangcalay saocor a Krisciyang?

⁹ ˈOsien ko Cikariya 8:23. Onini a sapairasol malecaday o kasemeran a coka, pasifanaˈ kitaanan to samanay ko roma lopayˈay siri minengneng to manilnilay no fangcalay saocor a Krisciyang. Itini i sinael ‘o cecay Yutaya tamdaw’ ato ‘kamo’ o mitoroˈan sahtoay o maˈoripayho tonini a hekal manilnilay no fangcalay saocor a Krisciyang. (Loma 2:28, 29) ‘I lalomaˈ no cowa ka lecad ko sowal a kitakit’ a ‘moetepay tamdaw’ o roma lopayˈay siri ko mitoroˈan. ‘Mikelecay mikoramet to rikoˈ no cecay Yutaya tamdaw’ cangra, sakonini a sowal i, o mamadimadi cangra midama to manilnilay no fangcalay saocor a Krisciyang, malacafay tonini ˈopo a tamdaw midoko ci Yihofaan. Mihaenay, o mamalacafay ko roma lopayˈay siri to manilnilay no fangcalay saocor a Krisciyang mirienang to Piharatengan a Saˈopo.

10. Samaanan ni Yihofa palaˈosi ko sapairasol no Icikil 37:15-19, 24, 25?

¹⁰ ˈOsien ko Icikil 37:15-19, 24, 25. Palaˈosianto ni Yihofa konini a sapairasol, mikelec a palacafay to manilnilay no fangcalay saocor a Krisciyang ato roma lopaˈay siri. Itini sapairasol masowalay ko tosa cokor, ‘no Yuta a cokor’ mitaypiyaway to manilnilay no fangcalay saocor a Krisciyang (O hongti no Israil mikitiniay i ngasaw no Yutaya masadak), o ‘ no Ifraim a cokor’ mitaypiyaway to roma lopayˈay siri.c Palacafayan ni Yihofa a miteli konini a tosa cokor malo ‘cecayay a cokor,’ tatodong i, o papalacecayen Ningra a mikelec ko manilnilay no fangcalay saocor a Krisciyang ato roma lopayˈay siri, malacafay a matayal saki cecay Hongti ci Yis Kristoan. To mihecahecaan, onini tosa ˈopo a tamdaw cowa ko mamisieked a mirienang, ao mamalacafay mirienang to Piharatengan a Saˈopo, samanen ‘malo cecayay ˈopo, cecayay ko pakaenay’ nangra.—Yohani 10:16.

11. O masowalay i Matay 25:31-36, 40 a ‘lopayˈay siri’ tano maanan a pakayraan midama to salikaka ni Kristo?

¹¹ ˈOsien ko Matay 25:31-36, 40. Masowalay no sinael ‘lopayˈay siri’ o moecelay a tamdaw i salikoray romiˈad ko mitoroˈan. O roma lopayˈay siri cangra, iraay ko tokel itini fafekang no sera a lakoing midaˈoc ko ˈorip. Madimadiay cangra midama to itiniayho i fafekang no sera a salikaka ni Kristo, padama to manilnilay no fangcalay saocor a Krisciyang milahci to cecay kalimlaan a tayal, o milasilay to ngaˈayay lihaf i paro no kakarayan, padama to tamdaw malo nisawawaan ni Kristo.—Matay 24:14; 28:19, 20.

12-13. O roma lopayˈay siri pakayniayho i maanan pakayraan a midama to salikaka ni Kristo?

¹² To mihecahecaan ˈayaw no Piharatengan a Saˈopo pina lipay, o roma lopayˈay siri misarocoday itini cowacowa pala mitahidang to maolahay to soˈlinay kimad a tamdaw mirienang to Piharatengan a Saˈopo. (Nengnengen ko sapatongal lalakaw “Maharek ko Pisaday, Itini ˈAyaw ato Ikor no Piharatengan a Saˈopo Misarocod Midama to Salikaka ni Kristo”) Misarocodayho cangra ngaˈay ko pilimasmas, ho rihaday ko kalingad nonini a saˈopo. Soˈlin awaay ko komaenay to epang ato minanom to epah i kasakopang nangra, kamayan mihaen ko demak nangra. Ngaˈay tano mahaenay a pakayraan midama to salikaka ni Kristo, tada lipahakay ko roma lopayˈay siri. Mafanaˈay cangra, o nano demak nangra to salikaka ni Kristo malecaday o matayalay saki Kristoan.—Matay 25:37-40.

¹³ Ano o maananto ko hatokel ita, iraay ko malecaday a lalangian ita oha mamirienang to Piharatengan a Saˈopo. Nengnengen ita iraay ko maanan a lalangian.

O POLONG A TAMDAW HANO O MAMIRIENANG

14. Hano mafanaˈ kita to tada maolahay ci Yihofa aci Yis kitaanan?

¹⁴ Tada miakoˈiday kita ci Yihofaan aci Yisan, samanen tada maolahay cangra kitaanan. Ci Yihofa tano adihayay a pakayraan paihkal to cowa pisateked a olah kitaanan, o sakakaay i, miocor to kaolahan Ningra a wawa pakayni kitaanan a misemsem hanaca kinafalah to ˈorip. (Yohani 3:16) Ano ci Yisto makahiay ko niyah mihaen to demak, paihkalay konini tada maolahay cingra kitaanan. (Yohani 15:13) Tada adihayay ko mihadakan Nangra saki kitaanan, awaay ko pakayraan ita pacoˈay, kawra wa ngaˈay kita pakayni sasowalen ato waywayan to romiˈamiˈad patahkal to miakoˈiday a falocoˈ. (Kolosay 3:15) Roma i, mirienang kita to Piharatengan a Saˈopo to mihecahecaan, mihaen wa misongilaˈ kita miharateng to mihadakan ni Yihofa aci Yis a olah kitaanan, hanaca paihkal kita to olah cangranan.

15. O manilnilay no fangcalay saocor a Krisciyang ato roma lopayˈay siri hano misaareteng a minengneng to sapatefoc a sapatelong?

¹⁵ Tada misaaretengay kita to sapatefoc a sapatelong. (Matay 20:28) O manilnilay no fangcalay saocor a Krisciyang misalimlaay minengneng to sapatefoc, samanen ira ko sapatefoc, ngaˈ iraay ko tokel nangra tayra i kakarayan micada to midaˈocay a ˈorip. Pakasoˈlinay cangra to sapatefoc ni Kristo, mansa o moecelay a tamdaw sanay ko pinengneng ni Yihofa cangranan, micada cangranan malo wawa no Niyah. (Loma 5:1; 8:15-17, 23) O roma lopayˈay siri misalimlaay minengneng to sapatefoc. Pakasoˈlinay cangra to malakisay a ˈirang ni Kristo, mansa ira ko awaay ko dangoc a makapahay falocoˈ nangra a midoko to Kawas, ira ko hatokel milakowit to ‘taˈangayay padiing.’ (Paˈarawan 7:13-15) Ano manilnilay no fangcalay saocor a Krisciyang, anca roma lopayˈay siri, mirienang kita to Piharatengan a Saˈopo to mihecahecaan, o paihkalay to misaaretengay a minengneng to sapatefoc.

16. O roma lalangian ita mirienang to Piharatengan a Saˈopo o maanan?

¹⁶ O roma lalangian ita mirienang to Piharatengan a Saˈopo i, sapidofdofaw kita ci Yisan. Tiya patireng ci Yis tonini a Piharatengan a Saˈopo a dadaya, sanay: ‘Ka padadotoc kamo mihaen to demak miharateng takowanan.’ (1 Korinto 11:23, 24) Mihaenay, ano o maananto ko hatokel ita, makalimay kita sapidoedoaw tonini a limoˈot a midemak.

O POLONG MIRIENANGAY TO PIHARATENGAN A SAˈOPO A TAMDAW O MAMILIFOK TO EPOC

17. Mirienang to Piharatengan a Saˈopo hano papatongal to piingid ita ci Yihofaan?

¹⁷ O mamatongal ko piingid ita ci Yihofaan. (Yakop 4:8) Masowalay i fafekang, mirienang to Piharatengan a Saˈopo o papiharatengay kitaanan to sapafeli ni Yihofa kitaanan a hatokel, ato paihkalan Ningra kitaanan a kasapaan a olah. (Yirimiya 29:11; 1 Yohani 4:8-10) Midotim to tanektekay a tokel noikor ato midaˈocay cowa ka falic a olah ni Yihofa, o mamatongal ko olah i Cingranan, matongal ko tanektek no kalawidang Cingranan.—Loma 8:38, 39.

18. Misongilaˈ kita a midotim to taˈarawan ni Yis o mamakalim samaan ko pidemak?

¹⁸ Mapakalalokay kita, sapitodongaw to taˈarawan ni Yis. (1 Pitiro 2:21) Itini ˈayaw no Piharatengan a Saˈopo, misongilaˈay kita miasip to malifaay ni Yis i saikoray cecay lipay a demak, ato pakayni maˈoningay to kapatay ningra ato patikol maˈorip. I Piharatengan a Saˈopo a dadaya, mamisongilaˈ kita mitengil to kimad, miharateng to patalahkalan ni Yis a olah kitaanan. (Ifiso 5:2; 1 Yohani 3:16) Miasip ato midotim kita to ngaˈayay taˈarawan ni Yis, miharateng to samaanay cingra paihkal to kinafalahay a harateng, o mamapakalalok, makalim malecad cingranan ko waywayan a maˈorip.—1 Yohani 2:6.

19. Sasamaan kita ngaˈ materek i olah no Kawas?

¹⁹ Mamatongal ko pisetek ita to falocoˈ materek i olah no Kawas. (Yuta 20, 21) Makalim kita materek i olah no Kawas, o mamidofdof Cingranan, misaˈicel paˈdil to fangcalay ngangan Ningra, misaˈicelho pakahemek to falocoˈ Ningra. (Taneng 27:11; Matay 6:9; 1 Yohani 5:3) Mirienang kita to Piharatengan to Kinafalah ni Yis a Saˈopo, mamatongal ko pisetek to falocoˈ to romiˈamiˈad tano waywayan paihkal ci Yihofaan: ‘Makalimay kita tahadaˈoc materek i olah Iso!’

20. Iraay ko maanan a lalangian ita mirienang to Piharatengan to Kinafalah ni Yis a Saˈopo?

²⁰ O tokel ita ano tatayra i kakarayan anca itini fafekang no sera micada to midaˈocay a ˈorip, adihayay ko lalangian ita mirienang to Piharatengan to Kinafalah ni Yis a Saˈopo. To mihecahecaan mihaen ko demak ita miharateng to kinafalah ni Yis pakayni kitaanan. Kalimlaan i, o mamiharateng kita to miocoran ni Yihofa ko wawa Ningra pakayni kitaanan mihadak to sapatefoc, paihkal to kasapaan a olah kitaanan. Itini 2022 miheca, onini a saˈopo wa itini 4 Folad 15 Romiˈad Pilimaan micerem ko cidal a misikay. Tangongolay ko olah ita ci Yihofaan aci Yisan, mansa itini kapatayan ningra a romiˈad, cowa ko papicaraen ita ko maanan a demakan to sapirienangaw tonini a Piharatengan a Saˈopo.