Midimokosan ni Yihofa ko Finawlan Ningra

1. Hano micangacang ci Yis ci Yihofaan midipot to nisawawaan ningra hani?

ˈAYAW no mapatay toya dadaya, mikiriwiˈay ci Yis micangacang to kakarayan a Wama midipot to nisawawaan ningra. (Yohani 17:15, 20) Manaokaniw, midimokosay ci Yihofa to finawlan no Niyah, padotocay midimokos ato midipot cangraanan. Kawra, mafanaˈay ci Yis to nisawawaan ningra tatahacada to pakidemay sapalak ni Satan, mansa misaaliay cangra to sapadama ni Yihofa, ngaˈ macoˈay ko mariˈangay a saˈodis ni Satan.

2. Mikitini i ˈOlic 33:18-20, ano misiˈayaw kita to pasangar i, hano cowa ko mamatalaw hani?

² Anini, o hekal ni Satan taˈangayay ko saroero to soˈlinay Krisciyang. Mamalifa ita ko masakenakenaay a pasangar, patoleday to falocoˈ alatek, hanaca pasangar kita madimadi ci Yihofaan saan ko harateng. Kawra, onini a lalakaw papadama kitanan mihapinang, awaay ko manan hakatalawan ita. Wa dimokosen ni Yihofa kita, mafanaˈay Cingra to masiˈayaway ita a kihcod pasangar, padadotocay padama kitanan. Dotoc, wa minanam kita to tosa tinakoan no Fangcalay Cudad a tamdaw, nengnengen sasamaan ci Yihofa ‘midimokos to mangodoay Cingranan a tamdaw.’—ˈOsien ko ˈOlic 33:18-20.

ANO MATOˈOLEN I

3. Ihacowa a tatokian matoˈolay ko harateng ita alatek?

³ Soˈlin itiniay kita i taˈangayay a paro no lomaˈ no Krisciyang, kawra matoˈolayho nolatekay. Tinakoen, kaemangay tamdaw ikaˈayaw no ˈalomanay cafay micudad mitadtad to pihakelongan no niyah i, matoˈolan nanay alatek. Anca malinah tayra i faelohay kasakopang i matoˈolay alatek. Roma i, padadotoc kita milowid to masofaway a nafalocoˈan alatek, anca pakayniay i romaroma a demak masomad, hanaca o hatiniay a roray edengan o niyah sa ko mihadidi. Alatek kita caay ka sapasowalaw i tao to nafalocoˈan no niyah, samanen calemcemay to cowa ko cacipinang ko tao. Nolatekay, wa saan kita miharateng, awaay ko tamdaw soˈlinay a ciharateng kitaanan. Ano o mananto ko sakatoˈol ita a lalangian, o hatiniay a nafalocoˈan pacariraway ato awaay ko padamaay wa saan kita miharateng alatek. Kawra cowa ka olah ci Yihofa ira ko mahaenay a nafalocoˈan no mita, hano mafanaˈ kita tonini hani?

4. Denganto cingra a cecay ko pairasolay i polong no Israil, hano saan ko sowal ni Iliya hani?

⁴ Haratengen ko madimadiay a Iliya. Pakayni sapilaliwaw ningra to pipatay ni Yicipil, mataˈlifay ko 40 a romiˈad padadotocay a milaliw. (1 Hongti 19:1-9) Cecay cingra i dihif no lotok i, taˈangayay ko ngiha pasayra ci Yihofaan tomangic, pasowal denganto cingra a cecay ko pairasolay i polong no Israil. (1 Hongti 19:10) Soˈlinay i, itini Israil iraayho ko romaroma pairasolay, samanen isaˈayaw 100 ko milidongan ni Opatiya a pairasolay paliyas to kapal ni Yicipil. (1 Hongti 18:7, 13) Ano mahaenay, hano kamayanho matoˈolen ci Iliya hani? Sanay cingra alatek o milidongan ni Opatiya a pairasolay nohatini mapatayayto maemin? Roma i, isaˈayaw ci Yihofa itini i Karmil a Lotok malalowid aci Paal i, maherekayto misawacay o soˈlinay a Kawas ko Niyah, kawra o romaroma tamdaw cowaho pikihatiya ci Iliyaan malacafay midoko ci Yihofaan. Pakayniay ci Iliya tonini a lalangian a matoˈolen han? Anca harateng ningra awaay ko tamdaw to mafanaˈay to katalawan ko pakayraan ningra, hanaca awaay ko cima to ciharatengay cingranan han? Cowa pitadtad ko Fangcalay Cudad to nano harateng ni Iliya. Kawra ngaˈayay pakasoˈlinen i, cowa ko kacipinang aca ni Yihofa to nafalocoˈan ni Iliya, ihkalayho a mafanaˈ sasamaan a padama cingranan.

5. Samaanay ci Yihofa pakacipinang ci Iliyaan, cowa ko matoˈolay cingra?

⁵ Tano cowa ka lecad a pakayraan ci Yihofa padama ci Iliyaan. Pakalalokan Ningra ci Iliya somowal to i falocoˈay a sowal, kina tosaay Cingra milicay: ‘Iliya, mimaanay kiso itini hani?’ (1 Hongti 19:9, 13) Ano somowal ci Iliya to naifalocoˈay harateng i, mihadidiay ci Yihofa a mitengil. Patahkalan Ningra ci Iliya to ˈicel no Niyah, matinako ni Iliya to itatihiay ningra ko Niyah. Pasowalan Ningra ci Iliya, iraayho ko ˈalomanay madimadiay a tamdaw i Israil. (1 Hongti 19:11, 12, 18) Mifowahan ni Iliya ko naifalocoˈay, hanaca matengil ko caˈof ni Yihofa ikor, madeng mahepolay ko karetengay a ˈinorong. Ikor, pafelianho ni Yihofa ci Iliya to pina kalimlaan a ˈinorong, mahawpay maminilnil cingra ci Hacail malo hongti no Siriya, malo hongti no Israil ci Yihu, minilnilho ci Ilisaan malo pairasolay. (1 Hongti 19:15, 16) Onini a ˈinorong pafelian ni Yihofa ci Iliya, sapipadamaaw cingranan misamacay to tawlikay a demak. Roma i, pafelianho ni Yihofa ci Iliya to cecay ngaˈayay a widang, ci Ilisa. Ano matoˈolen kiso i, sasamaan milifok to sapadama ni Yihofa hani?

6. Ano matoˈolen i, sasamaan kiso mitolon hani? (ˈOlic 62:8)

⁶ Pakalalokay ci Yihofa tisowanan pasayra Cingraanan a mitolon. Mafanaˈay Cingra misiˈayaway kiso to maanan pasangaray, mikiˈokayho tisowanan, ano hacowato i wa mitengil Cingra to sowal iso. (1 Tisalonika 5:17) Mahemekay Cingra mitengil to satolon no sikawdan Ningra. (Taneng 15:8) Ano matoˈolen kiso i, sasamaan mitolon hani? Mahecad ci Iliyaan, pasayra ci Yihofaan mifowah to nafalocoˈan. (ˈOsien ko ˈOlic 62:8.) O kacalemceman iso a demak, ato nafalocoˈan iso eminen a pasowal ci Yihofa, hanaca micangacang Cingranan padama tisowanan miremo to masofaway a nafalocoˈan. Tinakoen, ano itiniay kiso i picudadan mitadtad to pihakelongan no niyah i wa matoˈolen a matalaw, ngaˈayay cangacangen ci Yihofa pafeli tisowanan to timolo, ho ngaˈayto kiso pasowal. Ngaˈayho kiso micangacang Cingranan pafeli tisowanan to taneng, padama tisowanan damsay ato mikangodo a mitadtad to pihakelongan no niyah. (Luka 21:14, 15) Ano macariraw no masofaway a nafalocoˈan kiso i, ngaˈayay cangacangen ci Yihofa padama tisowanan mikilim to matenesay a Krisciyang masasowal, ngaˈayay cangacangen ci Yihofa padama tora mitengilay to sowal iso a tamdaw cipinang to nafalocoˈan iso. Pasowalen ci Yihofa to kihcod naifalocoˈay iso a demak, nengnengen sasamaan Cingra pacaˈof to satolon iso, hanaca micadaho to sapadama no tao. Mihaen i, caayto ko mamatoˈol kiso.

7. Mikitini tinakoan ni Molisiaw mananam iso ko manan?

⁷ Pafelian ni Yihofa kita o kahacecay tamdaw to ciepocay a tayal. Ngaˈayay pakasoˈlin kiso, mihadakan iso a kihcod itini kasakopang ato pitosilan a tayal, cowa ko pinengneng aca Ningra, tada misalimlaay Cingra. (ˈOlic 110:3) Adihay ko midemakan iso a tayal no Tapang, pakayni piremo to matoˈolay a harateng iraay ko manan sapadama hani? Nengnengen ko cecay tinakoan no kaemangay faˈinayan salikaka, ci Molisiaw cingra.b Caka halafin micada to paputisem ikor, o cecay sangaˈayay a widang ningra palidlid sanay miliyas to soˈlinay kimad. Sanay ci Molisiaw: “Manengneng cingra miraay ci Yihofaan, taˈangayay ko pidokaˈ takowanan, misatapangay kako cisasa to papakatoor ko niyah to niketonan i sapatafang, halo materek itini taˈangayay paro no lomaˈ ni Yihofa. Tada matoˈolay kako, awaay ko tamdaw to cipinangay to nafalocoˈan ako saan miharateng.” Samaanayto a talifak ci Molisiaw hani? Sanay cingra: “Mararid to mitosilay a tayal padamaay takowanan caayto ka pisamacay to niyahan, caayto piharateng to masofaway a demak. Ano malacafay to tao mitosil i, lipahakayto kako, caayto ka matoˈol.” Soˈlin cato ka lalitemoh kita to salikaka, kamayanho ngaˈay i wanglo malacafay tano patingwa ato patikami misawacay, mikitini adihayay ko macadaay a sapakalalok. Midemakayho to maanan ci Molisiaw hani? Sanay cingra: “Itini i lalomaˈ no kasakopang padadotocay kako ˈifowa. Misamacay misaday ato misongilaˈ midemak to kamok i pihatatanaman. Pakayni tonini pihatatanaman a kamok, matinakoay ako misaaretengay ci Yihofa ato salikaka minengneng takowanan.”

ANO MAMAPAEKEL NO PAKIDEMAY SAPALIFET I

8. Pakidem ko sapalifet wa ira ko manan pifiyor kitaanan?

⁸ Itini salikoray a romiˈad, o mamalifa ita ko masakenakenaay a sapalifet. (2 Timoti 3:1) Kawra cowa ko mamaharateng ita alatek, mamifekad i tireng ita ko cecay a sapalifet, caay ka harateng alatek fahal sa mifekad ko sapalifet. Fahal sa alatek malifa ko pakidemay a pasangar no sakaˈorip anca ciadada ko tireng, anca mapatay ko kaolahan a salawina. Toniya tatokian i, madeng macariraway kita. Ano dadotodotoc sa mifekad ko pasangaray, anca mamiremo kita to pina a sapalifet i kahecadan a toki, cato ka tomeseng kita alatek. Kawra haratengen, padadotocay ci Yihofa midimokos kitaanan, mitiˈer to sapadama Ningra, wa ira ko pakasoˈlinay falocoˈ ita milowid to masakenaay a sapalifet.

9. Sowalen ko masiˈayaway ni Yopu a pina sapalifet.

⁹ Nengnengen samanay padama ci Yihofa to madimadiay a Yopuan. I apotoˈay a tatokian, tatootoor sanay ko malifaay ni Yopu a sapalifet. Ilalomaˈ no cecay romiˈad, mafanaˈay to cingra maafasay ko pinaˈorip no niyah, mipatayan ko koli, ano kanonoˈanto a wawa mapatayay maemin. (Yopu 1:13-19) Cowaho ka lahdaw ko somad ningra, madengaay to no katalawan a adada. Onini adada awaayto ko kangaˈayan no tireng ningra, tada pakidemay ko pisemsem. (Yopu 2:7) O kaˈorip ni Yopu tada kaadayayanto, hato cedaˈahay cingra: ‘Mapiliˈay kako to ˈorip ako, caayto ka sakaˈoripaw.’—Yopu 7:16.

10. Pafelian ni Yihofa ci Yopu to maanan a sapadama, ho ngaˈay cingra itini sapalifet padadotoc mihadidi? (Nengnengen ko papotalay coka.)

¹⁰ Padadotocay ci Yihofa midimokos ci Yopuan. Samanen tada maolahay ci Yihofa ci Yopuan, mansa pafeliay to kihcod a misaalian ningra, padama cingranan malaˈosi ko pihadidi to sapalifet. Pasowalan ni Yihofa ci Yopu, somowal cingranan to adihayay kasemeran a pinaˈorip. Patalipaˈelalay konini ci Yopuan, malo Misangaˈay a Tatapangan ci Yihofa awaay ko tolas no taneng, hanaca tada ciharatengay to kihcod a misangaˈan no Niyah. (Yopu 38:1, 2; 39:9, 13, 19, 27; 40:15; 41:1, 2) Roma i, sakadademakan ni Yihofa ko madimadiay a Ilihu pakalalok ato mihinom ci Yopuan. Onini a kaemangay tamdaw padamaay ci Yopuan mihapinang, o papalifonen ni Yihofa ko tahatolasay mihadidi a sikawdan. Kawra, pakaynian ni Yihofa ci Ilihuan tano sidaˈitay a pakayraan pafeli ci Yopuan to pina sapalimoˈot. Patalipaˈelalan ni Ilihu ci Yopu, palalinien to Misangaˈay to dohaw a Tatapangan ci Yihofa, tada kaemingay ko tamdamdaw. Padamaay konini ci Yopuan marocek ko pinengneng to demak, ecato ko niyah aca ko miharatengan. (Yopu 37:14) Pafelianho ni Yihofa ci Yopu to cecay ˈinorong, patado toya tatoloay mararaway widang ningra mitolon. (Yopu 42:8-10) Anini, malifa ita ko pakidemay a sapalifet i, sasamaan ci Yihofa padama kitanan hani?

11. Ano misiˈayaw to sapalifet i, o Fangcalay Cudad pafeliay kitanan to maanan a sahinom?

¹¹ Anini, cowato ko mamahecad o pipasowal ni Yihofa ci Yopuan a pasowal kitanan, kawra o papakayni Cingra i Kimad Ningra Fangcalay Cudad a pasowal kitanan. (Loma 15:4) Itini i Fangcalay Cudad ihkalay Cingra mitadtad, iraay ko hanoikor ita, iraay ko hatokel, padama kitanan ano tahalifa to sapalifet i milifok to sahinom. Nengnengen ko pina tinakoan. Mikiˈokay ci Yihofa kitanan, ano o mananto cowa ko papakaliyas to olah Ningra kitanan, soˈlin pakidem ko sapalifet cowa ko ngangaˈay. (Loma 8:38, 39) Mikiˈokayho ci Yihofa, polong pakayniay i satolon micangacang Cingranan i, o ‘aingiden Ningra cangra.’ (ˈOlic 145:18) Sowal ni Yihofa, ano tiˈeren ita Cingra, o ngangaˈay mihadidi to masakenaay a sapalifet, ano itinito i kapadesan, kakamayan a lipahak. (1 Korinto 10:13; Yakop 1:2, 12) Patalipaˈelalayho ko Fangcalay Cudad kitanan, o sapafeli no Kawas kitanan a sapalifon o midaˈocay, palalinien tonini a sapalifon, o macadaay ita a sapalifet nohatini o cecayay liyad o kahmaway. (2 Korinto 4:16-18) Pafeliay ci Yihofa kitanan to tanektekay a hatokel, padama kitanan mafanaˈ noikor o papalahdawen Ningra ko kihcod lalangian no sapalifet, ci Akoma Satan ato mikotoday cingranan tatiihay ko demak a tamdaw. (ˈOlic 37:10) Maharatengay iso ko pina mihinomay to tamdaw a sinael, padama tisowanan ano tahalifa to sapalifet noikor papadotoc a mihadidi han?

12. Makalimay ci Yihofa kitanan samaan ko pidemak?

¹² Makalimay ci Yihofa kitanan milimasmas to toki micerid miasip to Fangcalay Cudad, hanaca midotim to maasipay a lalakaw. Itini kaˈorip ita sakadademaken ko safalod no Fangcalay Cudad, mamatongal ko ˈicel no pakasoˈlin, o kalalaˈed to kakarayan a Wama mamatongal ko piingid, ano mihaen wa ngaˈayto kita padadotoc mihadidi to sapalifet. Roma i, mitadiˈec kita to sowal ni Yihofa, mamilifok to sapafeli Ningra a fangcalay saocor, wa irato ko ‘mikiriwiˈay a ˈicel’ mihadidi to masakenaay a sapalifet.—2 Korinto 4:7-10.

13. O mihadakan no ‘madimadiay citanengay a koli’ a ‘kakaenen’ samaanay padama kitanan mihadidi to sapalifet hani?

¹³ Itini i pidama ni Yihofa, o ‘madimadiay citanengay a koli’ adihayay ko mitepangan a lalakaw, ika ato radiw, padama kitanan patanektek to pakasoˈlin, padadotoc a talipaˈelal. (Matay 24:45) Onini a lalakaw sahtoay itiniay i matatodongay a tatokian sapafeli ni Yihofa kitanan a ‘kakaenen,’ o mamisarocod kita miselip to haled ilalomaˈ. Cecay fafahiyan salikaka i Padaka tada miakoˈiday to Kawas pafeli tonini a pahaleday to pakasoˈlin a kakaenen, sanay cingra: “Itini katayal ci Yihofaan to 40 miheca, o madimadi ako kinapinaay micada to sapalifet.” O akong ningra masongtolay a mapatay no malasangay a parakatay, o wama ato wina ningra samanen ciadadaay to ekang dadotoc sanay mapatay, ano cingrato kina tosaay milowid to ekang. O manan ko padamaay cingranan itini pakidemay a sapalifet padadotoc a mihadidi hani? Sanay cingra: “Padotocay ci Yihofa midimokos takowanan. Pakaynian Ningra i madimadiay citanengay a koli mihadak to sapahaled to pakasoˈlin a kakaenen, padamaay konini takowanan padadotoc mihadidi. Mihaenay, wa ngaˈay malecad kako ci Yopuan a pasowal: ‘Ano tahinito i patay cowa ko mamifalah kako to madimadi i Kawas.’”—Yopu 27:5.

14. Ano malifa ita ko sapalifet i, samanay ci Yihofa pakayni i salikaka midama kitaanan? (1 Tisalonika 4:9)

¹⁴ Pasifanaˈan ni Yihofa ko finawlan Ningra masasiolah, itini pasangaray a pakayraan masasihinom. (2 Korinto 1:3, 4; ˈosien ko 1 Tisalonika 4:9.) Ano tahalifa kita to pasangaray i, malecaday ci Ilihuan ko salikaka, makalimay padama kitanan mitafo to madimadiay. (Dmak 14:22) Nengnengen ko tinakoan ni Tayanna. Iraay ko cecay liyad pakidemay ko adada no faˈinay ningra, itiya taˈangayay ko sapakalalok no salikaka i kasakopang cingranan, padamaayho cingranan padadotoc tanektek ko pakasoˈlin. Sanay ci Tayanna: “Toya tatokian cowa ko madoloay, kawra padotocay matinako ako ko kaciharateng ni Yihofa takowanan, tano ciˈicelay a fadangalan Ningra midama takowanan. O salikaka i kasakopang tangsolay mihadak to sapadama. Tano tingwaay anca tayniay cangra milisoˈ tamiyanan, mitakecayho tamiyanan, hato ngaˈayay kami padadotoc a tanektek. Samanen cowa kafanaˈ kako parakat to tosiya, mihaenay tayniay ko salikaka micada takowanan malingad masaˈopo ato mitosil.” Ira ko mahaenay matomesay to olah a taˈangayay paro no lomaˈ, tada lipahakayto kita!

AKOˈIDEN KO PIDIMOKOS NI YIHOFA KITANAN

15. Hano pakasoˈlin kita wa ngaˈay ko niyah pakaremo to pasangaray?

¹⁵ Kita o kahacecay tamdaw tatahalifa to masakenaay a sapalifet. Kawra mananamayto ita, tahadaˈocto aka o niyah saan ko misiˈayaw to sapalifet. Ci Yihofa malecaday o matomesay to olah a Wama, miceriday a midimokos kitaanan. Itiniay i tatihi ita Cingra, ano hacowato a tatokian pasayra kita Cingranan micangacang, o mamitengil Cingra, hanaca makahiay a midama kitaanan. (Isaya 43:2) Papakasoˈlin kita o mamalaˈosi ko niyah misiˈayaw to pasangaray, samanen hinapaladaˈay ci Yihofa pafeli to misaalian ita a kihcod, tinakoen mihaiay Cingra kitaanan pasayra Cingranan mitolon, pafeliayho to Fangcalay Cudad, masakenaay pahaleday to pakasoˈlin a kakaenen ato matomesay to olah a salikaka. Onini a kalimlaan a sapatelong padamaay kitaanan ngaˈay padotoc a mihadidi i pasangaray a pakayraan.

16. Sasamaan kita materek i olah ni Yihofa hani?

¹⁶ Sidaˈitay a Wama ci Yihofa padotocay midimokos kitaanan, tada miakoˈiday kita Cingranan, ‘o falocoˈ ita pakayraay Cingranan a lipahak.’ (ˈOlic 33:21) Ano sapaihkalaw kita to miakoˈiday ko harateng no niyah, o mamicada to kihcod a sapadama ni Yihofa, mamisaˈicelho a materek i olah Ningra. Ano padadotoc kita misarocod midofdof ci Yihofaan, hanaca midemak to matatodongay i pinengneng Ningra a demak, o tatahadaˈoc Cingra midimokos kitaanan!—1 Pitiro 3:12.