‘Mitoor to Soˈlinay Kimad a Maˈorip’

1. Milengo kita to samaanay ko niyah mafanaˈ to “soˈlinay kimad,” iraay ko maanan a epoc?

“SAMAANAY kiso mafanaˈ to soˈlinay kimad hani?” Maedeng kinapinaayto kiso pacaˈof tonini a salicay. Mafanaˈ kita to cecay faˈinayan anca fafahiyan salikaka i, marariday milicay tonini a salicay. Maolahay kita mitengil to samaanay ko salikaka mafanaˈ ato misatapang maolah ci Yihofaan, maolahayho pasowal to tao hano maolah kita to soˈlinay kimad. (Loma 1:11) Ano malengo ita ko mahaenay a demak, miliyaway mitikol a miharateng tada kalimlaan ko soˈlinay kimad, matongalay ko pisetek to falocoˈ ‘mitoor to soˈlinay kimad a maˈorip,’ itini kaˈorip misaka dademak to soˈlinay kimad, misaˈicel milifok to sapalemed ato pihayda ni Yihofa.—3 Yohani 4.

2. Onini a lalakaw mamilengo to maanan?

² Onini a lalakaw mamitikol miharateng to pina lalangian ita maolah to soˈlinay kimad, milengoho sasamaan kita padadotoc paihkal to maolahay ko niyah tonini kalimlaan a sapatelong. Ci Yihofa pakayni sapisolotaw kitaanan mafanaˈ to soˈlinay kimad, adihayay ko misadakan. Tikolen ita miharateng ko lalangian no niyah maolah to soˈlinay kimad, o mamatongal ko piakoˈid Cingranan. (Yohani 6:44) Onini papadama kitaanan matongal ko kalim paladaˈ to soˈlinay kimad i tamdaw.

HANO MAOLAH KITA TO “SOˈLINAY KIMAD”

3. Maolah kita to soˈlinay kimad sakakaay kalimlaan a lalangian o manan?

³ Adihayay ko lalangian ita maolah to soˈlinay kimad, sakakaay kalimlaan i, maolahay kita to Pipowaran no soˈlinay kimad Kawas ci Yihofa. Pakaynian Ningra i Kimad Ningra padama kitaanan cipinang, cowa ko Misangaˈay aca a Tatapangan Cingra, o sidaˈitayho a Wama i kakarayan. Tada ciharatengay Cingra kitaanan. (1 Pitiro 5:7) Ci Yihofa o ‘siniˈadaay to tamdaw, patadoay to tamdaw miharateng a Kawas, cowa ka ranikay maketer, iraay ko madimadiay a olah, soˈliˈlinay ngaˈay tiˈeren.’ (Kasadakan 34:6) Maolahay Cingra to masadafdafay. (Isaya 61:8) Maˈaraw kita misemsem, adadaay ko falocoˈ Ningra. Makalimay Cingra sapalahdawaw to kihcod a pades, hanaca maharekayto Cingra misaˈosi to toki mihaen to demak. (Yirimiya 29:11) O sapafeli ni Yihofa kitaanan a hatokel tada makapahayto! Tada maolahay kita Cingranan!

4-5. Tarokos ci Pawlo hano patinakoen ko tokel ita to ˈenor no tamina?

⁴ O roma lalangian ita maolah to soˈlinay kimad i, pairaay ko soˈlinay kimad to adihayay haepoc no mita. Tinakoen, o soˈlinay kimad no Fangcalay Cudad mahawpay ko hatokel ita no ikor. Misaka dademakan no tarokos ci Pawlo ko cecay sapatinako mitadtad tonini a hatokel tada kalimlaan, sanay cingra: ‘Onini a hatokel ita, malecaday o ˈenor no ˈorip, soˈliˈlinay ngaˈay tiˈeren.’ (Hipray 6:19) Malecad o ˈenor no tamina patanektekay to tamina, o mikitiniay i Fangcalay Cudad a tokel wa ngaˈay padama kitaanan ano tahalifa to sapalifet padadotoc a rihaday ko falocoˈ, tanektek eca ka ngiyangi.

⁵ Mikitini fafekangay ato laenoay lalakaw minengneng, o milengoan ni Pawlo itini a hatokel, mitoroˈan i o hatokel no manilnilay no fangcalay saocor tatayra i kakarayan a Krisciyang. Kawra pakayni citokelay i fafekang no sera a lakoing tahadaˈoc maˈorip a Krisciyang, malecaday ira ko epoc nonini a sowal ni Pawlo. (Yohani 3:16) Mafanaˈay kita iraay ko hatokel no niyah tahadaˈoc a maˈorip, matongalay ko kaciepoc no ˈorip.

6-7. Mananam ni Infena ko pakayniay hanoikor a soˈlinay kimad, milifokay to manan a epoc?

⁶ Nengnengen ko nalifetan no fafahiyan salikaka ci Infena. Kaemangho matalaway cingra mapatay, itiya cowaho kafanaˈ cingra to soˈlinay kimad. Itini i cudad na maˈaraway ningra ko cecay sowal: “Wa ira ko cecay romiˈad, cowato ko mamaˈaraw iso ko nocila romiˈad.” Sanay ci Infena: “Onini a sowal malinaˈay i ponoˈ ako, caay ka fotiˈ to dadaya, padotoc a miharateng to hanoikor no niyah. Haharateng sanay kako: ‘Hano maˈorip kako? Mapatay ko tamdaw awaayto ko maanan han?’ Caay ka ciharateng kako mahaen a mapatay!”

⁷ Moetep ira ko pina ko mihecaan i, misatapangay ci Infena malacafay to Misawacayay Tamdaw ni Yihofa minanam to Fangcalay Cudad. Sanay cingra: “Misatapangay kako pakasoˈlin, iraay ko hatokel no niyah itini fafekang no sera a Lakoing tahadaˈoc a maˈorip.” Mananam ningra konini a soˈlinay kimad ikor, milifokay to maanan a epoc hani? Sanay cingra: “Nohatini, cowato pakayni kacalemcem to hanoikor anca matalaw mapatay eca ka ala ko fafotiˈen.” Tada misalimlaay ci Infena to soˈlinay kimad no Fangcalay Cudad, maolahayho paladaˈ i tamdaw to ngaˈayay hatokel no ikor, hanaca mikitini milifok to taˈangayay a karenec.—1 Timoti 4:16.

8-9. (1) Itini sapatinako ni Yis a tamdaw hakowaay ko pisaareteng to mahelaay ningra a odoˈ hani? (2) Pakayni tisowanan, hakowaay ko kalimlaan no soˈlinay kimad?

⁸ O soˈlinay kimad no Fangcalay Cudad mahawpay ko ngaˈayay lihaf no Hongti Kitakit no Kawas. Patinakoan ni Yis ko pakayniay Hongti Kitakit a soˈlinay kimad to mahimeday a odoˈ. Itini Matay 13:44, sanay ci Yis: ‘O kakarayan a Hongti Kitakit malecaday o mahimeday i omah a odoˈ, mahelaay no tamdaw, mihimedan ningra. Tada mahemekay cingra, pacakayan ko polong a dafong, micakay toya omah.’ Sinanoten, onini a tamdaw cowa ka padeteng a mikilim to odoˈ, kawra tiya mahela ningra, hai sanay mihadak to sapiˈaca milifok tonini a odoˈ. Soˈlinay i, pacakayan ningra ko polong a dafong no niyah. Misamanay hani? Samanen mafanaˈay cingra tada matekesay konini a odoˈ, ikakaay ko epoc to kinafalahan ningra a kihcod.

⁹ Pakayni i soˈlinay kimad iraay ko mahaenay harateng iso han? Maedeng iraay. Midoko kita ci Yihofaan, aniniho lipahakayto, noikor wa ngaˈayho itini pikowan no Hongti Kitakit no Kawas tahadaˈoc a maˈorip. Palalinien, o mihadakan no hekal sapafeli kitaanan a kihcod awaay ko kapo. Roma i, ngaˈayho kita malo ngaˈayay a widang ni Yihofa, pakayni tonini a kalimlaan a sapalemed, ano o mananto ko fafalahen ita iraay ko epoc. Ngaˈay i “kihcod a demakan pakahemek Cingranan” o kalipahakan ita a demak konini.—Kolosay 1:10.

10-11. Ci Maykee hano makahi mafalic i nokaˈorip?

¹⁰ ˈAlomanay salikaka sapilifokaw to pihayda ni Yihofa, taˈangayay ko kinafalah. Roma tamdaw misawaday to ngaˈayay katayalan, roma tamdaw cowato picangacang to pakadafongay a hafay, iraho ko roma tamdaw ikor no mafanaˈ ci Yihofaan, misongilaˈay mifalic to kaˈorip no niyah. Ci Maykee o cecay a tinakoan. Cowa ka itini soˈlinay kimad a lomahad cingra. Kaemangho, minanamay to mikontaway cingra. Sanay ci Maykee: “Samanen marariday a mionto, talifakay ko tireng ako, hanaca malikoan tonini. Latekay, awaay ko pakafiloay to niyah saan kako miharateng.” Kawra ikor no minanam cingra to Fangcalay Cudad i, mafanaˈay to pinengneng ni Yihofa to mariˈangay a demak. (ˈOlic 11:5) Masowal ni Maykee koya pasifanaˈay cingranan to Fangcalay Cudad a mararamoday i, sanay: “Cowa ka pasowal cangra takowanan misawad to mikontaway, edeng mihadidiay a padadotoc pasifanaˈ takowanan to kimad no Fangcalay Cudad.”

¹¹ Matongal ko kafanaˈ ni Maykee ci Yihofaan i, matongalay ko kaolah Cingranan. Mananamay to tada siniˈadaay ci Yihofa to midokoay Cingranan a tamdaw, mikiriwiˈay a mitemer to falocoˈ ni Maykee. Ikor, mahapinangay ni Maykee tataˈangay ko pifalic to kaˈorip no niyah. Sanay cingra: “Mafanaˈay kako, misawad to mikontaway o sapasangaray remoen a demak. Kawra, mafanaˈay kako mihaen to demak o papakahemek ci Yihofaan, hanaca pakasoˈlinay kako, pakayni sapidokoaw ci Yihofaan, o kihcod a kinafalah sahtoay o ciepocay.” Mahapinangay ni Maykee ko epoc no soˈlinay kimad, mansa makahiay taˈangay ko kafalic i nokaˈorip.—Yakop 1:25.

12-13. O soˈlinay kimad no Fangcalay Cudad samanay padama ci Maylian pakaˈaraw to ˈodingar hani?

¹² Itini i Fangcalay Cudad, o soˈlinay kimad patinakoan to tinghoy i toˈemanay, onini a sapatinako ngaˈay padama kitanan cipinang to tada kalimlaan ko soˈlinay kimad. (ˈOlic 119:105; Ifiso 5:8) Tada matinakoay ni Mayli konini, samanen o Kimad no Kawas paˈaraway cingranan to ˈodingar. Na itiniay cingra i Aspayciyan, o wama ato wina ningra cowa ka lecad ko pihakelongan, o wama o Iselankiyo ko pihakelongan, o wina o Yutayakiyo. Sanay ci Mayli: “Soˈlin cowa ka cisasa kako to iraay materek ko Kawas, kawra pakayni i Kawas, iraay ko pina kacisasaan ako, tinakoen: ‘Hano misangaˈ ko Kawas to tamdaw? Paˈoripen Ningra ko tamdaw hano pairaen ko semsem, ikor no mapatay tayraho i cikok a misemsem hani?’ Sowal no tamdamdaw polong a demak sahtoay o araaw no Kawas, mansa mihaen ko harateng ako: ‘Maolahay ko Kawas mionting to tamdaw, minengneng to pisemsem no tamdaw han?’”

¹³ Cowa pisawad ci Mayli mikilim to caˈof nonini a salicay. Ikor, misatapangay cingra minanam to Fangcalay Cudad hanaca micadaay to soˈlinay kimad. Sanay ci Mayli: “Matatodongay ko pitadtad no Fangcalay Cudad to demak, cowa ko patongal aca to tawlikay ako minengneng to kaˈorip, pairaayho to rihadayay falocoˈ ako.” Malecad ci Maylian, mikifalocoˈay kita a pakahemek ci Yihofaan, samanen mitahidangay Cingra kitaanan ‘mikitini toˈemanay a masadak, micomod i kasapaan a ˈodingar Ningra.’—1 Pitiro 2:9.

14. Sasamaan kita mitongal to olah no niyah to soˈlinay kimad? (Nengnengen ko sapatongal lalakaw “Romaroma a Sapatinako.”)

¹⁴ I fafekangay pina tinakoan mitadtaday to hano tada ciepocay ko soˈlinay kimad, pakasoˈlinay kiso aadihayho ko maharatengay iso a lalangian. Ngaˈay mitanam kiso misatapang mihalaka to picekiw, misamacay mikingkiw iraayho ko maanan a lalangian ita maolah to soˈlinay kimad. Ano matongal ko olah ita to soˈlinay kimad, mamatongal ko kalim a patalahkal tonini a olah.

SAMAAN PAIHKAL TO MAOLAHAY KITA TO SOˈLINAY KIMAD

15. Paihkal kita to maolahay ko niyah to soˈlinay kimad o cecay pakayraan o maanan hani?

¹⁵ Ano maolahay kita to soˈlinay kimad, o mamicerid micekiw to Fangcalay Cudad ato mitepangan a cudad. Soˈlin halafinayto mafanaˈ to soˈlinay kimad, adihayayho ko nananamen ita a demak. O satapangan nonini a casi sanay: “O soˈlinay kimad itini kaˈorip ita, malecaday o kaemingay a hana lomahaday itini kohkoh, mangatato mapaekel no mararaway kimad i taliyok. Sapikilimaw kiso tonini a kaemingay hana o papadotoc a mikilim. . . . Saka iraaw tonini a hana o mamoloho kiso a mipitin. Aka pakayni ka ira no cecay a hana no soˈlinay kimad marenecento. . . . Ka padadotoc a mipitin, padadotoc a mikilim.” Micekiw o mamihadak to ˈicel, kawra mihaen to demak tada iraay ko epoc.

16. Miharateng kiso tano maanan a pakayraan micekiw to Fangcalay Cudad mamalifok ko taˈangayay a epoc hani? (Taneng 2:4-6)

¹⁶ Cowa ka sahto sa maolah ko tamdaw miasip ato minanam, kawra pakalalokay ci Yihofa kitaanan ka ‘padotoc mikilim’ ‘padotoc misolap,’ ho matongal ko kacipinang to soˈlinay kimad. (ˈOsien ko Taneng 2:4-6.) Mihadak kita to ˈicel mihaen to demak, oha mamilifok to epoc. Nengnengen samaanay ko demak no salikaka ci Keli. Ano miasip cingra to Fangcalay Cudad i kinacecay cecayay ko sinael micalepan a micekiw, sanay cingra: “Micekiwan ako ko kahacecay sapatongal a lalakaw ato roma taˈarawan a sinael, mikilimayho to adihayay lalakaw. . . . Tano mahaenay pakayraan minengneng to Fangcalay Cudad adihayay ko malifokay ako a minaroˈan.” Ano mahaenay ko pakayraan anca o roma pakayraan, mihadak kita to toki ato ˈicel micekiw to Fangcalay Cudad, paihkalay to maolahay ko niyah to soˈlinay kimad.—ˈOlic 1:1-3.

17. Mitoor to soˈlinay kimad maˈorip o maanan ko tatodong hani? (Yakop 1:25)

¹⁷ Manaokaniw mafanaˈay kita, o pinanam aca to Fangcalay Cudad cangoˈotayho. Sapilifokaw to taˈangayay a epoc, o tatooren ita ko soˈlinay kimad a maˈorip, itini kaˈorip sakadademaken ko mananamay a soˈlinay kimad. Edengan mihaen ko demak, papaira to soˈliˈlinay a lipahak ita ko soˈlinay kimad. (ˈOsien ko Yakop 1:25.) Sasamaan kita mihapinang to mitooray ko niyah to soˈlinay kimad a maˈorip hani? Malecad o sowal no cecay faˈinayan salikaka, wa ngaˈay kita misongilaˈ mikinsa to niyah, minengneng o maanan ko ngaˈayay a demak no niyah, itini maanan a pakayraan papadotocho a macakat. Malecad o misowalan no tarokos ci Pawlo, sanay cingra: ‘Ano tahacowaay ko kacakat ita i, tooren a midoedo ko malecaday a lalan, masierod a padadotoc talaˈayaw.’—Filipi 3:16.

18. Hano misarocod kita ‘mitoor to soˈlinay kimad a maˈorip’ hani?

¹⁸ Haratengen hena, misarocod kita ‘mitoor to soˈlinay kimad a maˈorip,’ hakowaay ko malifokay a epoc! Cowa ko pisalof aca to kaˈorip no niyah, pakahemekayho ci Yihofaan ato salikaka. (Taneng 27:11; 3 Yohani 4) Onini ko kalimlaan a lalangian ita maolah to soˈlinay kimad ato mitoor to soˈlinay kimad a maˈorip!