Ka Padadotoc a ‘Masasipakalalok’

1. Mikitini 1 Tisalonika 5:11, mirienangay kita o kahacecay tamdaw to maanan a tayal?

O KASAKOPANG iso iraay ko mipatirengay anca mitomadaway to Hongti Kitakit Kasaˈopoan han? Ano iraay, maedeng maharatengayho iso tiya mahererek ko tayal sakinacecay tayra i Kasaˈopoan masaˈopo a pakayraan. Itiya, matomesay ko miakoˈiday a falocoˈ iso ci Yihofaan. Satapang romadiw i, tada matemeray ko falocoˈ iso alatek, mansa sakatomangicaw saan awa ko ngiha mahadak a romadiw. Misamacay kita mipatireng to Kasaˈopoan wa ngaˈay pakahemek ci Yihofaan, kawra ano mirienang kita to roma mipatirengay a tayal i, ngangaˈay pairato taˈangayay a sapakahemek ci Yihofaan. O hatiniay mipatirengay a tayal ikakaay ko epoc to masakenaay a tayal, mitoroˈan nonini papakalalok kita to tayniay i Kasaˈopoan midoko ci Yihofaan a salikaka, padama cangranan patireng to tanektekay a pakasoˈlinay falocoˈ. Tarokos ci Pawlo mitilid to lalangian a sinael nonini a lalakaw 1 Tisalonika 5:11 i, makalimay mirienang ko Krisciyang to hatiniay a ‘mipatirengay a tayal,’ samanen mihongyakan toniya sinael o ‘pakalalok’ a Kirisiya sowal, iraay ko ‘mipatireng’ a tatodong.—ˈOsien.

2. Onini a lalakaw mamilengo to maanan?

² O tarokos ci Pawlo o ngaˈayay a taˈarawan ita, iraay ko siniˈadaay a falocoˈ ningra to salikaka, mafanaˈay pakalalok cangranan. Onini a lalakaw mamilengo to samaanay ci Pawlo padama to salikaka (1) mihadidi to sapalifet, (2) rihaday a malacafay, (3) mitongal a paˈicel to pakasoˈlin ci Yihofaan. Wa minengnengho kita anini sasamaan kita pasayra ci Pawloan a minanam, pakalalok to salikaka.—1 Korinto 11:1.

PADAMAAY CI PAWLO TO SALIKAKA MIHADIDI TO SAPALIFET

3. Iraay ko maanan matatodongay a pinengneng ni Pawlo?

³ Tada maolahay ci Pawlo to salikaka. Adihayay ko malifaay ningra a pasangaray, mansa ano tahalifa to sapalifet ko salikaka i, siniˈadaay cingra cangranan, cipinang to nafalocoˈan nangra. Kinacecayay, awaay ko payci ni Pawlo, mamikilim to tayal midama to sakaˈorip no niyah ato cafay. (Dmak 20:34) O tayal ningra o misangaˈay to kopang, mansa tiya tahira cingra i Korinto i, malacafay ci Priskilaan aci Akuilaan midemak tonini a tayal, kawra ‘maraod ko Paselaˈan a Romiˈad,’ mitosilay cingra to Yutaya a tamdaw ato Kirisiya a tamdaw. Ikorto, tayraayto i Korinto ci Silas aci Timoti, ‘tano polong a ˈicel patenak to kimad no Kawas’ ci Pawlo. (Dmak 18:2-5) Cowa ka mapawan ci Pawlo o midokoay ci Yihofaan o masakalimlaan a demak i nokaˈorip ningra. Malalokay a matayal ato fanekfekay a mitosil ci Pawlo, o ngaˈayay a taˈarawan, mihaenay ngaˈay pakalalok to salikaka cingra. Patalipaˈelalay cingra to cangranan, aka pakayni i saroero no kaˈorip ato paririˈ to lomaˈ a ˈinorong misakahmaw to ‘masakalimlaan’ a demak, o masakenakenaay milingatay to pidoko ci Yihofaan a demak.—Filipi 1:10.

4. Samaanay ci Pawlo aci Timoti padama to salikaka miremo to sapalak?

⁴ Caho ka halafin a tomireng ko kasakopang no Tisalonika i, o itiraay a salikaka micadaay to pakidemay a sapalak. Cowa kahela no mariˈangay tamdaw ci Pawlo aci Silas, ‘kidkid han nangra ko salikaka patayra i kakitaan no niyaroˈ,’ sanay: ‘Oniya tamdaw misafelitay to rikec ni Kaysa.’ (Dmak 17:6, 7) Haratengen hena, oniya faelohay malo Krisciyang a salikaka maˈaraw ko tamdaw no niyaroˈ fahal sa misatapang miˈodis cangranan, madeng matalaway. Cowato ko fafanekfek cangra midoko ci Yihofaan alatek. Kawra cowa kaciharateng ci Pawlo mifekad ko mahaenay a demak. Soˈlin mapacieciay cingra aci Silas miliyas itira, kawra pakasoˈlinay cangra onini a faelohay tomireng a kasakopang papadadotoc milifok to ngaˈayay a pidimokos. Pasowalan ni Pawlo ko Tisalonika a Krisciyang: ‘Saˈayawen niyam miocor ci Timoti tayra tamowanan. O salikaka niyam cingra . . . , ocoren niyam cingra tayra, o papatanektek to pakasoˈlin namo, mihinom tamowanan, patanektek tamowanan, ho eca pakayni tonini a pades ira ko malonayay a tamdaw.’ (1 Tisalonika 3:2, 3) Tahalifaay ci Timoti to sapalak i niyaroˈ ningra i Listra alatek. Maˈaraway ningra ci Pawlo samaanay pakalalok to salikaka i Listra, maˈarawayho samaanay ci Yihofa midama tonini a salikaka, mihaenay ngaˈayho pakalalok ci Timoti to faelohay Krisciyang i Tisalonika, padama cangranan pakasoˈlin o salikoray no demak wa ira ko sangaˈayay a minaroˈan.—Dmak 14:8, 19-22; Hipray 12:2.

5. O salikaka ci Polayente mikitini sapadama no cecay malohemay malitengay milifokay to maanan a epoc hani?

⁵ Iraayho ko maanan a pakayraan ni Pawlo pakalalok to salikaka hani? Tiya minokay ci Pawlo aci Parnapas i Listra, Ikonium ato Antiok i, ‘itiniay i kasakopang minilnil to malohemay malitengay.’ (Dmak 14:21-23) Onini manilnilay a tamdaw madeng taˈangayay ko sahinom to salikaka i kasakopang, aniniay a malohemay malitengay malecaday. Nengnengen ko nalifetan no faˈinayan salikaka ci Polayente. Sanay cingra: “15 ko mihecaan ako i, miliyasay ko wama tamiyanan, mifalahan no kasakopang ko wina. Tada masomaday kako, mifalahan ko niyah sanay ko harateng.” O manan ko padamaay ci Polayentean milakowit tonini a pasangaray a tatokian hani? Sanay cingra: “Cecay ci Toni a malohemay malitengay itini ˈayaw ato ikor no saˈopo ato roma toki masasowalay takowanan. Pasowalay cingra takowanan to adihayay madimadiay sikawdan samaanay itini pisiˈayaw to sapalifet kamayan padotoc a lipahak. Paladaˈay cingra takowanan to sinael no ˈOlic 27:10, miceridayho tano taˈarawan ni Hicikiya pakalalok takowanan, samanen o wama ni Hicikiya soˈlin cowa ko ngaˈayay taˈarawan, kawra padotocay ci Hicikiya madimadi midoko ci Yihofaan.” O sapadama ni Toni ci Polayentean samaanay ko pifiyor hani? Sanay ci Polayente: “Itini sapakalalok ni Toni, mirienangay kako to mieminay to toki misakafah, hanaca tada lipahakay ko pidemak.” Malohemay malitengay, itini tatihi namo iraay ko roma salikaka malecaday ci Polayentean misaaliay ‘pakatengil to ngaˈayay sowal.’ (Taneng 12:25) Ka pisinanot to saali nangra, micerid a pakalalok cangranan.

6. Samaanay ci Pawlo tano nalifetan nolitengan madimadiay a sikawdan a pakalalok to salikaka?

⁶ Papisinanotan ni Pawlo ko salikaka, iraay ko ‘taˈangayay a ˈopo malecaday o toˈem a misawacayay tamdaw,’ pakayni pitiˈer to ˈicel no Kawas malaˈosiay a mihadidi to masakenakenaay a pasangaray. (Hipray 12:1) Mafanaˈay ci Pawlo o nalifetan nonini madimadiay sikawdan wa padama to salikaka ira ko timolo, padadotoc misamacay to harateng ‘i niyaroˈ no soˈlinay Kawas.’ (Hipray 12:22) Malecaday anini, maasip ita to samaanay ci Yihofa padama ci Kitiyonan, ci Parak, ci Tafiti, ci Samuil ato romaroma madimadiay sikawdan i, macadaay ko taˈangayay a sapakalalok. (Hipray 11:32-35) Anini a lintad ˈalomanay ko pakasoˈlinay ko falocoˈ a taˈarawan ngaˈay pakalalok kitaanan. Itini i congpo, marariday macada niyam ko tikami no salikaka, sowal sa maasip nangra ko nalifetan no madimadiay a salikaka ikor, matongalay ko tanektek no pakasoˈlin.

PADAMAAN NI PAWLO KO SALIKAKA MINANAM RIHADAY A MALACAFAY

7. Mikitini mihadakan ni Pawlo i Loma 14:19-21 a sapalimoˈot mananam iso ko maanan?

⁷ Itini kasakopang talaˈayaw kita micowat to rihaday, mamalifok no salikaka ko sapakalalok. Cowa ko papakayni kita ka eca ka lecad no harateng cato kalangaˈay to salikaka, itini cowa pisafelit to safalod no Fangcalay Cudad a demakan, cowa ko mamisaareteng to fadangalan no niyah. Nengnengen ko cecay tinakoan. Itini saka 1 hahekalan kasakopang no Loma iraay ko Yutaya ato ˈAlafang a Krisciyang, itiya palasawadanto ko Rikec ni Mosi, mihaenay o midokoay ci Yihofaan a tamdaw cowato ko mamidofdof to pakayniay kakaenen a saˈosi no rikec. (Marko 7:19) O romaroma Yutaya a Krisciyang ano maananto a kakaenen ngaˈayay kaenen sanay, kawra o romaroma Yutaya Krisciyang cowa ka picada to mahaenay a demak, mihaenay maliwasakay ko kasakopang. Orato, mitadtaday ci Pawlo kalimlaan ko mitafoay to rihaday, pasowal cangranan: ‘Ano papakapolin to salikaka iso, ano komaento to titi, komaen to epah, anca romaroma a demak, aka a pidemak ko ngaˈay.’ (ˈOsien ko Loma 14:19-21.) Padamaan ni Pawlo ko salikaka mihapinang, o hatiniay a lacongis pakayni tekedan a tamdaw anca polong no kasakopang taˈangayay ko pipalak. Roma i, pakayni saka ecaaw pakapolin to tao, makahiay ci Pawlo mifalic to harateng no niyah. (1 Korinto 9:19-22) Malecaday, itini kita kaolahan no tekedan a demak eca ka pisaareteng to harateng no niyah, wa ngaˈay to mararihaday to salikaka a malacafay, ho micada cangra to sapakalalok.

8. Ano pakayni i cecay taˈangayay a lacongis a maliwasak ko kasakopang i, samaanay ko pidemak ni Pawlo?

⁸ Itini pina kalimlaan a demakan, soˈlin caka lecad ko harateng ita to tao, o mamitafo to rihadayay. Itini tonini a pakayraan patirengay ci Pawlo to ngaˈayay taˈarawan. Tinakoen, itini lalomaˈ no kasakopang sowal no roma tamdaw mamicada to kerit ko ˈalafang a Krisciyang sanay, misaaretengay cangra to mahaenay a sasowalen, sapiliyasaw to pilikaf no papotalay no kasakopang a Yutaya tamdaw sanay ko harateng alatek. (Kalatiya 6:12) Cowa pihayda ci Pawlo to mahaenay a harateng, kawra cowa pacieci cingra to tao micada to harateng ningra, ao misapoeneray ko falocoˈ patorod tonini a demak to itiniay Yirusalim a tarokos ato malohemay malitengay misaysay. (Dmak 15:1, 2) Mihaen ko demak ningra cowa ko pitafo aca to rihaday no kasakopang, padamaayho to salikaka ngaˈay padadotoc lipahak a matayal saki Yihofaan.—Dmak 15:30, 31.

9. Sasamaan kita pasayra ci Pawloan minanam?

⁹ Ano ira ko pakidemay lacongis mifekad i, ngaˈayay kita pasayra i misaka dademakan ni Yihofa midimokos to kasakopang a tamdaw micangacang to mikitiniay i Fangcalay Cudad a sakayat, o hatiniay a sakayat tocerid ngaˈayay itini mitepangan no likakawa a cudad ato sakayat a mahela. Tooren ita konini a sakayat midemak, eca ko harateng no niyah, o ngangaˈay patongal to rihaday no kasakopang.

10. Sapicowataw to rihaday no kasakopang, midemakayho ci Pawlo to manan hani?

¹⁰ Marariday ci Pawlo somowal to ngaˈayay no salikaka cowa ko dangoc, micowatay konini to rihaday no kasakopang. Tinakoen, itini salikoray no sapatikami to kasakopang no Loma, masowalay ni Pawlo ko ngangan no ˈalomanay salikaka. Pakayni ˈalomanay tamdaw ilalomaˈ, mitongalan ningra ko pina sapakahemek a sowal anca pina a midemakan. Wa ngaˈay kita malecad ci Pawloan mararid somowal to ngaˈayay no salikaka, mihaen ko demak cowa ko pitongal aca to kalawidang, wa ngaˈayho padama to kasakopang matomes ko olah.

11. Sasamaan kita palahdaw to cowa ka lecad a harateng, micowat to rihaday?

¹¹ Latekay, i kalalaˈed no matenesay a Krisciyang cowa ka lecad ko harateng, mangalefay iraay ko lacongis. Ci Pawlo ato ngaˈayay widang ningra ci Parnapas na mifekaday ko mahaenay a pasangaray. Pakayni aˈorongen ci Marko malacafay cangranan mirienang miliwko a mitosil, cowa ka lecad ko harateng nangra tatosa, ‘pakidemay ko kalacongis,’ telocto malalicinowasay cangra. (Dmak 15:37-39) Kawra ci Pawlo, ci Parnapas aci Marko ikor masalofay ko kalalaˈed nangra, paihkalay konini tada misaaretengay cangra to rihaday ato kakelec no kasakopang. Ikor ci Pawlo tora tikami ningra masowalay ci Parnapas aci Marko, mikitira tora sowal ningra ngaˈay mahapinang ita ngaˈayayto ko kalalaˈed nangra. (1 Korinto 9:6; Kolosay 4:10) O kalalaˈed ita to salikaka ano ira ko tatiihay demak, saˈicelen misaysay ko pasangaray, hanaca padadotoc misinanot to ngaˈayay nangra. Mihaen, wa ngaˈayto micowat to rihadayay, mitafo to makelecay.—Ifiso 4:3.

PADAMAAN NI PAWLO KO SALIKAKA PAˈICEL TO PAKASOˈLINAY FALOCOˈ

12. Misiˈayaway ko salikaka to maanan a pasangaray?

¹² Padama kita to salikaka paˈicel to pakasoˈlin ci Yihofaan malecaday o pakalalokay cangranan. O romaroma salikaka micadaay to salikaf no paro no lomaˈ, cafay matayal anca cafay micudad, roma mamiremo to pakidemay a adada no tireng anca madokaˈay ko nafalocoˈan, iraayho ko roma salikaka halafinayto mitala to kaira no faelohay hekal. O hatiniay a pakayraan palifetay to pakasoˈlin no mita. O saka 1 hahekalan a Krisciyang iraay ko malecaday a pasangaray, sapadamaaw to salikaka tanektek ko pakasoˈlin, midemakay ci Pawlo to maanan hani?

13. O roma Yutaya Krisciyang pakayni pihakelongan micadaay to salikaf no tao, samanay ci Pawlo padama cangranan hani?

¹³ Sakadademakan ni Pawlo ko sinael paˈicel to pakasoˈlin no salikaka. Tinakoen, o Yutaya a Krisciyang malikafay no paro no lomaˈ alatek, cowa pakalini ko Kristokiyo to Yutayakiyo sanay ko sowal. Tahasiˈayaw to mahaenay salikaf i, cowa kafanaˈ cangra to sasamaan pacaˈof alatek. O mitilidan ni Pawlo a Hipray cudad maedeng taˈangayay ko sapakalalok toniya salikaka. (Hipray 1:5, 6; 2:2, 3; 9:24, 25) O pitadtad ni Pawlo tada ciˈicelay, wa ngaˈay sakadademaken no salikaka pacaˈof to malikafay cangranan a tamdaw. Anini, o roma salikaka misiˈayaway to salikaf no tao, wa ngaˈay kita misaka dademak to mitepangan a cudad padama cangranan mitadtad to lalangian no pihakelongan no niyah. Tinakoen, Namisangaˈan ko ˈOrip Han? ato Pipowaran no ˈOrip—Sasimsimen a Lima Salicay o ngaˈayay a lalosidan, ano pakasoˈlinay ko kaemangay to iraay ko Misangaˈay a Tatapangan materek hato malikafay no tamdaw, wa ngaˈay padama kita cangranan mikitini tonini a tosa cudad makilim ko matatodongay a lalakaw mitadtad to pihakelongan no niyah.

14. Soˈlin ˈifowaay ci Pawlo to mitosilay pakafanaˈ to tamdaw a tayal, kawra midemakayho cingra to maanan pakalalok to salikaka hani?

¹⁴ Pakalalokay ci Pawlo to salikaka malecad cingranan pakayni ‘ngaˈayay demak’ patalahkal to olah. (Hipray 10:24) Ci Pawlo cowa ka somowal aca to sapakalalok to salikaka a sowal, soˈliˈlinay a midemak padama cangranan. Tinakoen, tahalifa ko i Yutiyaay a salikaka to kedal i, padamaay ci Pawlo patayra to sakaˈorip nangra. (Dmak 11:27-30) Soˈlin ˈifowaay ci Pawlo to mitosilay pakafanaˈ to tamdaw a tayal, kawra mihadakay to toki padama to manikaway a salikaka. (Kalatiya 2:10) Mihaen cingra to demak ho pakasoˈlin ko salikaka to dadimokosen ni Yihofa cangra. Anini, makahiay kita misadak to toki, ˈicel ato inaneng mirienang to padamaay to tahapadesay a tayal, ngaˈay paˈicel to pakasoˈlin no salikaka. Roma i, ngaˈayay kita mararid pakiyaho midama to tayal i paro no kakarayan. Pakayni tonini a pakayraan anca roma pakayraan, ngaˈayto kita padama to salikaka a pakasoˈlin, cowa ko mamiliyas ci Yihofa cangranan.

15-16. Sasamaan kita micada to malonayay ko pakasoˈlin a salikaka?

¹⁵ Ci Pawlo cowa pisawad to malonayay ko pakasoˈlin a salikaka. Siniˈadaay cingra cangranan, tano damsayay ato tawlikay a pakayraan masasowal cangranan. (Hipray 6:9; 10:39) Tinakoen, itini lalomaˈ no Hipray cudad, marariday cingra misaka dademak to ‘kita’ sanay a sowal, paihkalay konini ano cingrato mamisaka dademak to mihadakan no niyah a sapalimoˈot. (Hipray 2:1, 3) Malecad ci Pawloan, cowa ko mamisawad kita to malonayay ko pakasoˈlin a salikaka. Masafelitay, o mamikifalocoˈ kita a ciharateng cangranan, ho micada cangra to sapakalalok. Ano mihaen, o mamatinako nangra ko olah ita. Haratengen, kalimlaan ko misowalan ita, kawra tano damsayay madaˈmaˈay a ngiha somowal, mamangalef ko pitemer to falocoˈ nangra.

¹⁶ Padamaan ni Pawlo ko salikaka pakasoˈlin, mafanaˈay ci Yihofa to na mihadakan nangra a kihcod. (Hipray 10:32-34) Wa ngaˈay kita mihaen to demak. Itini pipadama to malonayay ko pakasoˈlin a salikaka i, ngaˈayay papiharatengen ita cangra alatek, salakat samaanay cingra mafanaˈ to soˈlinay kimad, anca na icowaay a pakayraan matinako ko pidama ni Yihofa cingranan. Ikor ngaˈayay kita paˈicel cingranan, cowa ko mamapawan ci Yihofa to na mipaihkalan ningra a olah, ano ikorto cowa ko mamisawad aeca pisikor cingranan. (Hipray 6:10; 13:5, 6) O mahaenay a kasasowal alatek wa pakalalok to kaolahan ita a salikaka, makalim miliyaw a matayal saki Yihofaan.

“PADADOTOC MASASIPAKALALOK”

17. Itini maanan pakayraan papadadotoc kita a macakat?

¹⁷ O cecay patirengay to lomaˈ a maomahay wa ngaˈay padadotoc pacakat to inaneng matayal, malecaday, itini pipadama to tao patireng to tanektekay a pakasoˈlin a demakan wa ngaˈay kita padotoc macakat. Malacafay kita to salikaka milengo to samaanay mitafo to mihadidiay ko roma madimadiay sikawdan no Kawas, wa ngaˈay padama to salikaka matongal ko ˈicel mihadidi to sapalifet. Wa mararid kita mihadak to kangaˈayan no salikaka, aka papipalaken ko kihcod a demak to kalalaˈed ita ato cangranan, misarocodho palahdaw to cowa ka lecad a harateng, ano mihaen wa ngaˈay micowat to rihaday. Ngaˈayho kita masasowal to salikaka to kalimlaan a kimad no Fangcalay Cudad, hanaca pafelien cangra to ciepocay a sapadama. Ano malonay ko pakasoˈlin nangra, aka pisawad kita cangranan. Mihaen, ngaˈayto kita padadotoc pakalalok to salikaka, ho matongal ko tanektek no pakasoˈlin nangra.

18. Seteken iso ko falocoˈ samaan ko pidemak?

¹⁸ Mirienangay to patirengay a tayal no likakawa a salikaka lipahakay a marenec. Ano mirienangay kita to roma ‘patirengay a tayal,’ o padamaay to salikaka patireng to tanektekay pakasoˈlin, o lalipahak ato marenec. O roma soˈlinay a patirengan a lomaˈ salikor o mamapalak maemin, kawra mirienangan ita a patirengay a demak o pairaan a minaroˈan tatahadaˈoc a materek. Nanay seteken ita ko falocoˈ ‘padadotoc masasipaˈicel, masasipakalalok.’—1 Tisalonika 5:11 ato roma pihongyak.