O Finawlan ni Yihofa Maolahay to Moecelay

1. Misiˈayaway ci Yosif to maanan a sapalifet? Samaanay ko harateng ningra?

O WAWA ni Yakop ci Yosif misiˈayaway to cecay pasangaray a sapalifet: Iraay ko cecay fafahiyan mikayhiday cingranan sanay: ‘Malacafay takowanan mafotiˈ.’ Onini a fafahiyan o fafahi no tawki ningra ci Potifar. Tanektekay ko pinaˈay ni Yosif to sakayhid. O roma tamdaw cowa ka cipinang hano minaˈay ci Yosif. Itiya awaay ci Potifar i lomaˈ sanay miharateng alatek, hanaca o koli no lomaˈ ci Yosif, minaˈay to fafahi no tawki cowato ko ngangaˈay ko kaˈorip noikor. Kinapinaay mikayhid ko fafahi no tawki ci Yosifan, cowa ka ngiyangi ko harateng ni Yosif. Misamaanay hani? Sanay cingra: ‘Mana ngaˈay kako midemak to hatiniay tatiihay a demak, pakararaw to Kawas hani?’—Satapangan 39:7-12.

2. Hano mafanaˈ ci Yosif itini pinengneng no Kawas to maˈaˈodangay o tatiihay a demak?

² O saˈosi no Rikec ni Mosi to tamdaw ‘aka maˈaˈodang,’ kawra oniya Rikec itiniay ikor no mafekad koniya demak to 200 miheca ngaˈ malasilay. (Kasadakan 20:14) Mihaenay, hano mafanaˈ ci Yosif to tatiihay ko maˈaˈodangay a demak saan ko Kawas minengneng hani? Tada cipinangay ci Yosif ci Yihofaan, mansa mafanaˈ to pinengneng no Kawas to maˈaˈodangay a demak. Tinakoen, madeng mafanaˈay ci Yosif to pipatireng ni Yihofa to raramod i salakat o cecayay ko faˈinayan ato cecayay ko fafahiyan. Mafanaˈayho cingra, na kinatosaay ci Yihofa midipot to fofo ningra ci Saraan, ho eca ka ˈodangen no roma faˈinayan cingra. Malecaday, na midipotayho to fafahi ni Isak ci Ripika ko Kawas. (Satapangan 2:24; 12:14-20; 20:2-7; 26:6-11) Misimsim ci Yosif toniya demak, mahapinangay itini pinengneng ni Yihofa o manan ko matatodongay, o manan ko mararaway. Samanen maolahay cingra ci Yihofaan, maolahayho to moecelay palinian ni Yihofa, mansa misetek to falocoˈ mitoor toniya palinian maˈorip.

3. Onini a lalakaw mamilengo to maanan?

³ Maolahay kiso to moecelay han? Madeng hatiraay. Kawra o cowa ka lefot a tamdaw kita, hanaca ano eca ka pinaˈon, pakayni pinengneng ita to moecelay wa madolo mafiyor no hekal. (Isaya 5:20; Loma 12:2) Mihaenay, oniya lalakaw mamilengo to o maanan ko moecelay, ato maolah kita to moecelay mamilifok to maanan a epoc. Mamilengoho koniya lalakaw, midemak kita to maanan tolo a demak, mamatongal ko olah to palinian ni Yihofa.

O MAANAN KO MOECELAY?

4. Pakayni “moecelay” o roma tamdaw iraay ko maanan masofaway a harateng?

⁴ Pakayni “moecelay” o roma tamdaw iraay ko masofaway a harateng, pakayni “moecelay a tamdaw” tada misatakaraway, maolahay milikaf, misao moecelay saan ko harateng. Soˈlinay i, cowa ka olah ko Kawas to mahaenay a “moecelay.” Itini i fafekang no sera ci Yis i, misaˈicelay a mirikec to itiyaay a ˈaˈideman no pihakelongan, samanen patirengay cangra to niyah a moecelay a palinian. (Patnakay 7:16; Luka 16:15) Sao moecelay ko niyah saan, caay ko soˈliˈlinay a moecelay.

5. Mikitini Fangcalay Cudad, o maanan ko moecelay? Patinakoen.

⁵ O moecelay o cecay makapahay a capeling. Kantangen ko sowal, o moecelay o midemakay to matatodongay a demak i pinengneng no Kawas ci Yihofa. Itini Fangcalay Cudad, tatodong no “moecelay” a sowal ngaˈayay o mitooray to ˈakawangay a palinian ni Yihofa a maˈorip. Tinakoen, misaaliay ci Yihofa to misasingdiay a tamdaw ‘tano matatodongay ko sapitingting, aka milipalaw.’ (Limoˈot 25:15) Itini Fangcalay Cudad, mihongyakan ‘aka milipalaw’ a Hipray sowal ngaˈay hongyaken to ‘ka moecel.’ Mansa, o cecay Krisciyang ano makalimay itini pinengneng no Kawas malo moecelay a tamdaw, itini misasingdiay a demak wa soˈliˈlin ko falocoˈ, aka milipalaw. O cecay moecelay a tamdaw maolahayho to masadafdafay, cowa ka olah maˈaraw ko tao micada to cowa ka sadafdaf a demak. Roma i, sapahemekaw ci Yihofaan i kihcod a demak, o moecelay a tamdaw wa isalakatho miharateng to pinengneng ni Yihofa, ikorto ngaˈ misaˈosi.—Kolosay 1:10.

6. Hano ngaˈay kita mitadiˈec to ngaˈayay ato tatiihay palinian ni Yihofa hani? (Isaya 55:8, 9)

⁶ Sowal no Fangcalay Cudad, o ‘Pipowaran no moecelay’ ci Yihofa. (Yirimiya 50:7) Malo Misangaˈay a Tatapangan, o citatodongay ci Yihofa patireng to ngaˈayay ato tatiihay a palinian. O malefotay Cingra, ihkalay mafanaˈ to maanan ko matatodongay, maanan ko mararaway, o ngaˈayay ato tatiihay a palinian Ningra o soˈliˈlinay a matatodong. Kawra, o cowa ka lefot kita pasangaray mihapinang to ngaˈayay ato tatiihay. (Taneng 14:12; ˈosien ko Isaya 55:8, 9.) Kawra, palecadan kita to tireng no Kawas a sangaˈen, mansa ngaˈay mitoor to moecelay a palinian Ningra a maˈorip. (Satapangan 1:27) Maolahayho kita to kakarayan Wama, makahiay misarocod mitodong Cingranan, malo moecelay a tamdaw.—Ifiso 5:1.

7. Hano misaaliay kita to ngaˈayay tiˈeren a palinian? Patinakoen.

⁷ Dofdofen ko ngaˈayay ato tatiihay palinian ni Yihofa pakayni kitaanan iraay ko epoc. Misamanay? Haratengen hena, ano kahacecay a kingko mitooray to palinian no niyah misaˈosi to epoc no payci, anca kahacecay patirengay to lomaˈ a kosi mitooray to palinian no niyah mifakeciw misangaˈ to lomaˈ, awaay ko ngaˈayay hateloc. Ano o ising ato kangkofo caay pitoor to palinian no sarikec midimokos to adadaay a tamdaw, mamapatay ko roma adadaay a tamdaw alatek. Mahapinangay, itini kaˈorip a pakayraan, o ngaˈayay tiˈeren a palinian ngaˈay midipot kitaanan. Malecaday, itini mihapinang to matatodongay mararaway a pakayraan, o palinian ni Yihofa wa ngaˈay midipot kitaanan.

8. Maolahay to moecelay a tamdaw mamilifok to maanan a sapalemed?

⁸ Palemeday ci Yihofa to mitooray to palinian Ningra maˈorip a tamdaw. Mikiˈokay Cingra: ‘O moecelay ko falocoˈ a tamdaw mamilayap tonini a sera, rihaday ko ˈorip a tahadaˈoc.’ (ˈOlic 37:29) Tora romiˈad, o tamdamdaw mamitoor to palinian ni Yihofa a maˈorip. Ngaˈay maharateng iso ko itiyaay a tamdamdaw wa hakowa ko kakelec a rihaday, raheker lipahak hani? Makalimay ci Yihofa tisowanan marenec to hatiniay a kaˈorip. Soˈlin, kita kahacecay tamdaw iraay ko adihayay a lalangian maolah to moecelay. Sasamaan ko pidemak ita mamatongal ko olah toniya makapahay capeling hani? Nengnengen ita ko tolo a pakayraan.

SASAMAAN KO PIDEMAK WA MATONGAL KO KAOLAH TO PALINIAN NI YIHOFA?

9. Samaan ko pidemak ita mamatongal ko kaolah to moecelay?

⁹ Saka 1 pakayraan: Maolah to patirengay to palinian a Yihofa. O ngaˈayay ato tatiihay a palinian ci Yihofa ko patirengay, mitongal kita to olah i Cingranan, mamatongal ko olah to moecelay. Matongal ko kaolah ita ci Yihofaan, mamatongal ko kalim mitoor to moecelay palinian Ningra maˈorip. Haratengen ko tinakoan ni Atam aci Ifa. Ano maolahay cangra ci Yihofaan, cowa ko mamisafelit to moecelay a sarikec Ningra.—Satapangan 3:1-6, 16-19.

10. Samaanay ko pidemak ni Apraham, matongalayto ko kafanaˈ ci Yihofaan?

¹⁰ Cowa ka ciharateng kita mararaw to mahaenay ni Atam aci Ifaan a raraw. Ano padotoc kita mitongal to kafanaˈ ci Yihofaan, mamatongal ko kasemer to capeling Ningra, hanaca misaˈicel cipinang to harateng Ningra, mamatongal ko olah i Cingranan. Mihaen, cowato ko mamitoor kita to pasaripaˈan ni Atam aci Ifa. Haratengen ko tinakoan ni Apraham. Soˈliˈlinay cingra maolah ci Yihofaan, ano pasangaray cingra cipinang to saˈosi ni Yihofa saan ko harateng i, cowa ka pitowakang cingra, misaˈicelay mitongal to kafanaˈ ci Yihofaan. Tinakoen, mafanaˈ cingra to papalaˈafoen ni Yihofa ko Sotom ato Komora i, calemcemay to papatayen ni Yihofa ko moecelay a tamdaw ato tatiihay a tamdaw. Kawra o ‘Misawkitay to polong no hekal a Tatapangan’ cowa ko mamihaen to demak saan ko harateng ningra, orato mikangodoay a milicay ci Yihofaan to pina salicay. Mihadidiay ci Yihofa pacaˈof cingranan. Telocto, mahapinangay ni Apraham mikinsaay ci Yihofa to falocoˈ no kahacecay tamdaw, caay ko mamipatay to awaay ko raraw a tamdaw malecad o pipatay to mararaway a tamdaw.—Satapangan 18:20-32.

11. Samaanay ci Apraham paihkal to maolahay ko niyah ato mitadiˈecay ci Yihofaan hani?

¹¹ Masasowal ci Yihofaan a tatokian tangongolay ko pifiyor ci Aprahaman. Ikor i, madeng ikakaay to isaˈayaway ko kaolah ato pikangodo ningra to kakarayan Wama. Ikor no adihayay a mihecaan, o pakasoˈlin ni Apraham ci Yihofaan micadaay to taˈangayay a sapalifet, samanen saaliay ci Yihofa cingranan patafang to kanonoˈan a wawa no niyah ci Isak malo sapatoˈaya. Kawra nohatini matongalayto ko kafanaˈ ni Apraham to Kawas, mansa cowa ka pihadak cingra to roma salicay, tangsolay mitoor to limoˈot ni Yihofa midemak. Ngaˈay kiso miharateng to itini pisaday ni Apraham patafang ci Isakan a pakayraan, hakowaay ko ka adada no falocoˈ han? Kawra misongilaˈay cingra miharateng, o kafanaˈan ningra a Yihofa caay ko mamidemak to mariˈangay anca cowa ka moecel a demak. Roma i, na mikiˈokay ci Yihofa, ci Isak mamalo lalitengan no cecay finacadan, kawra tiya papatafang ci Apraham ci Isakan a tatokian i, awaayho ko teloteloc ni Isak. Mikitini misowalan no tarokos ci Pawlo, sanay ko harateng ni Apraham, soˈlin mapatay ci Isak, wa ngaˈayho ci Yihofa patikol cingranan paˈorip. (Hipray 11:17-19) Tada maolahay ci Apraham ci Yihofaan, tanektekay ko pakasoˈlin to moecelay ko demak no kakarayan Wama, mihaenay tada pasangaray konini a ˈinorong, pakayni pakasoˈlin no falocoˈ kamayan ci Apraham midofdof ci Yihofaan.—Satapangan 22:1-12.

12. Sasamaan kita pasayra ci Aprahaman minanam hani? (ˈOlic 73:28)

¹² Sasamaan kita pasayra ci Aprahaman minanam hani? Mamalecad kita cingranan padadotoc mitongal to kafanaˈ ci Yihofaan. Mihaen, wa matongal ko piingid ita ci Yihofaan, matongal ko kaolah Cingranan. (ˈOsien ko ˈOlic 73:28.) Wa mapahatatanamho ita ko makapahay falocoˈ no niyah, ngaˈay midemak to malecaday to pinengneng ni Yihofa a saˈosi. (Hipray 5:14) Mihaenay i, ano ira ko tamdaw mikayhid kitanan midemak to mararaway a demak, wa tangsol kita minaˈay. Cowa ka ciharateng kita sapidemakaw to pakasomaday to kakarayanay a Wama a demak, mipalak to kalalaˈed ita Cingranan. Ngaˈayho kita midemak to manan a demakan, patongal to kaolah no niyah to moecelay hani?

13. Sasamaan kita micangacang to moecelay? (Taneng 15:9)

¹³ Saka 2 pakayraan: To romiˈamiˈad paˈicelen ko olah to moecelay. Paˈicel to olah to moecelay palinian ni Yihofa malecad o miontoay to fatil, misaaliay to padadotocay misadak to ˈicel. Onini a demak ngangaˈay demaken to romiˈamiˈad. O saali ni Yihofa kitanan o matatodongay, cowa pilongoc Cingra kitanan midemak to cowa ko mamadangar a demak. (ˈOlic 103:14) Mikiˈokay Cingra kitanan, ‘micangacangay to moecelay a tamdaw’ o kaolahan Ningra. (ˈOsien ko Taneng 15:9.) Ano micangacang kita to roma patosokan o papadadotoc misadak to ˈicel, micangacang to moecelay o mahecaday. Wa mihadidi ci Yihofa padama kitanan padadotoc macakat itini toniya pakayraan.—ˈOlic 84:5, 7.

14. Itini sapafeli no Kawas sapilood a rikoˈ, o sapatada to falohang mitaypiyaway to maanan? Hano o cacaˈedongen ita i tireng hani?

¹⁴ Pakayniay i ciolahay falocoˈ ci Yihofa patalipaˈelal kitanan, midemak to moecelay a demak cowa ko karetengay a ˈinorong. (1 Yohani 5:3) Masafelitay, mihaen to demak mamidipot kitanan to romiˈamiˈad. Haratengen ko misowalan no tarokos ci Pawlo a sapafeli no Kawas sapilood a rikoˈ. (Ifiso 6:14-18) Onini a sapatada to falohang a sapilood a rikoˈ mitaypiyaway to maanan hani? O moecelay a palinian ni Yihofa. ​Mahecad o sapatada to falohang ngaˈay midipot to falocoˈ no sofitay, o moecelay palinian ni Yihofa ngaˈayay midipot to falocoˈ ita, mahawpay ko kalim ita, nafalocoˈan ato harateng. Mihaenay, ano micaˈedong to sapafeli no Kawas a sapilood a rikoˈ i, aka a mapawan micaˈedong to moecelay malo sapatada to falohang!—Taneng 4:23.

15. Sasamaan kiso micaˈedong to moecelay malo sapatada no falohang hani?

¹⁵ Ihkalen ko sowal, sasamaan kiso micaˈedong to moecelay malo sapatada no falohang hani? Wa ngaˈay kiso ano mamipiliˈ to romiˈamiˈad misimsim to palinian no Kawas. Ano mamipiliˈ kiso milengo to maanan, mitengil to maanan a radiw, minengneng to maanan a kamok no tilifi, anca miasip to maanan a cudad, aisalakatho miharateng: “O mipiliˈan ako sasamaan mifiyor to falocoˈ ako hani? Onini a lalakaw matatodongay i palinian ni Yihofa han? Anca onini a lalakaw miowingay to malafoay waywayan, mariˈangay, maˈanofay ato misatekeday harateng o cowa ko moecelay a demak saan ci Yihofa han?” (Filipi 4:8) O misaˈosian iso ano malecaday to harateng ni Yihofa, o moecelay a palinian ni Yihofa wa midipot to falocoˈ iso.

16-17. O Isaya 48:18 hano ngaˈay padama kitanan pakasoˈlin, wa ngaˈay kita tahadaˈoc mitoor to palinian ni Yihofa a maˈorip?

¹⁶ Maharateng to romiˈamiˈad, to mihecahecaan mitoor to moecelay a palinian ni Yihofa maˈorip, cacalemcem kiso eca ka pakaremo ko niyah han? Haratengen ko sapatinako ni Yihofa itini Isaya 48:18. (ˈOsien.) Mikiˈokay ci Yihofa, o moecelay ita ‘mamalecad o tapelik no riyar.’ Haratengen hena, itini kaˈayaw iso o kakahaday a riyar, cecay kiso awa ko adeses a minengneng dadotodotoc sa ko tapelik pasayra i lawac no riyar a talaˈayaw. Toniya tatokian, cacalemcem kiso itini cecay romiˈad fahal sa malahdaw ko tapelik han? Cowa ko mamahaen, samanen mafanaˈay kiso pinaay to caˈol a miheca, padotocay ko tapelik pasayra i lawac no riyar a miraod, mahaenay anini, wa kamayan mahaen no ikor.

¹⁷ Sasamaan ko demak iso ho ngaˈay padama to moecelay no niyah malecad o tapelik no riyar hani? Ano mamisaˈosi i, salakatenho miharateng makalimay ci Yihofa samaan ko demak iso, dotoc tooren a midemak. Ano samaanto ko pasangar a midemak, o ciolahay a Wama i kakarayan papadotoc midama tisowanan, padama tisowanan to romiˈamiˈad mitoor to moecelay palinian Ningra a maˈorip.—Isaya 40:29-31.

18. Hano cowa ka ngaˈay kita tano palinian no niyah a misawkit to tao?

¹⁸ Saka 3 pakayraan: O matatodongay anca mararaway ko tao, paiken han ci Yihofa a misawkit. O mamisaˈicel kita mitoor to moecelay a palinian ni Yihofa maˈorip, kawra aka a sao moecelay ko niyah saan miharateng, patelas sa malikaf to tao. Aka misakahmaw kita to tao, ciharateng to iraay ko fadangalan no niyah mitoor to palinian no niyah misawkit to tao. Masafelitay, o haharatengen ita, dengan ci Yihofa ko ‘Misawkitay to hekal a Tatapangan.’ (Satapangan 18:25) Cowa ka pafeli Cingra to sapisawkit a fadangalan kitaanan. Patalipaˈelalay ci Yis to nisawawaan: ‘Aka patelas kamo misawkit to tamdaw, ho eca ka masawkit kamo.’—Matay 7:1.b

19. Samaanay ci Yosif paihkal to mitadiˈecay ko niyah to sasawkit ni Yihofa?

¹⁹ Haratengen ko tinakoan ni Yosif. O moecelay a tamdaw cingra, soˈlin micada to pikariˈang no tao, kawra cowa ka pisawkit to tao. O kakakaka ningra mihalakaay mipalak cingranan, pacakay cingranan malo koli, milipalawho to wama pasowal to mapatayay cingra. Ikor no halafinay mihecaan, malalitemoh ci Yosif to paro no lomaˈ. Itiya taˈangayay ko fadangalan ningra, na ngangaˈay miˈodis to kakakaka, pakidem ko pisawkit cangranan. Soˈlin mikifalocoˈayto cangra pasasiyor, kawra matalawayho mihaen ko demak ni Yosif. Mihinoman ni Yosif a pasowal cangra: ‘Aka matalaw. Mana ngaˈay kako mikotay to Kawas hani?’ (Satapangan 37:18-20, 27, 28, 31-35; 50:15-21) Tada misapoeneray ko falocoˈ ni Yosif, mafanaˈay cingra dengan ci Yihofa iraay ko fadangalan misawkit to kakakaka ningra.

20-21. Sasamaan kita a midemak, ecato ka sao moecelay ko niyah saan miharateng?

²⁰ Malecad ci Yosifan, aka pisawkit kita to tao, ao papisawkiten ci Yihofa. Tinakoen, cowa ka ngaˈay kita misaˈosi to mafanaˈay ko niyah to nafalocoˈan no salikaka. Cowa ka ngaˈay kita pafesel ko pinengneng to falocoˈ no tamdaw, dengan ci Yihofa ngaˈayay ‘mitiyawca to nafalocoˈan no tamdaw.’ (Taneng 16:2) Maolahay Cingra to masakenakenaay a tamdaw, ano samaanayto ko lalengawan no tamdaw, manan ko serangawan, awaay ko mikiriwiˈay. Pakalalokay ci Yihofa kitanan ‘mifohat to falocoˈ.’ (2 Korinto 6:13) Mihaenay, mamisaˈicel kita maolah to polong a salikaka, cowa ko papatelas a misawkit cangranan.

²¹ Cowa ko ngangaˈay kita misawkit to papotalay no kasakopang a tamdaw. (1 Timoti 2:3, 4) O cecay salawina ano cowa ka lecad ko pihakelongan tono miso, itini falocoˈ iso saan a misawkit “onini a tamdaw ano tahadaˈocto cowa ko mamicada to soˈlinay kimad”? Cowa, samanen mihaen ko demak mitaˈlifay to fadangalan, sao moecelay ko niyah saan. Nohatini, kamayan paira ci Yihofa to toki no ‘tamdamdaw’ a pasasiyor. (Dmak 17:30) Aka mapawan, sao moecelay ko niyah sanay i, o cowa ko moecelay.

22. Hano misetek kiso to falocoˈ paˈicel to kaolah to moecelay hani?

²² Padadotoc kita mitongal a maolah to moecelay palinian ni Yihofa, mamatongal ko kalipahak. Maˈaraw no tao ko ngaˈayay taˈarawan ita, o mamatongal ko olah kitanan, matongalho ko olah to Kawas. Nanay padadotoc kita mitafo to ‘milongocay to moecelay’ a waywayan. (Matay 5:6) Karihaday ko falocoˈ, maˈaraway ni Yihofa ko mihadakan iso, madeng o papakayni i kacakat iso a masemer. Ano malingad ko ka eca ka moecel nonini a hekal i, aka matalaw! Haratengen ‘maolahay ci Yihofa to moecelay a tamdaw.’—ˈOlic 146:8.