Wa Ngaˈay Malifok Iso ko Soˈliˈlinay a Lipahak

1. O maanan ko ‘saali no nafalocoˈan’ hani? O hatiniay a saali o manan ko kalaliting to lipahak?

O SOˈLIˈLINAY a lipahak cowa ko lipahakay aca ko harateng, kalikiay ira, kalikiay malahdaw, ao padadotocay i hakelong no kaˈorip. Ci Yis itini ‘Pasifanaˈ i Lotok’ sanay: ‘Makalimay mirenec to saali no nafalocoˈan a tamdaw o lipahakay.’ (Matay 5:3 ato roma pihongyak.) Mafanaˈay ci Yis, hofoc han ko tamdaw iraayto ko kalim, sakafanaˈaw ato midoko to Misangaˈay a Tatapangan nangra Kawas ci Yihofaan. O ‘saali no nafalocoˈan’ ita konini. Samanen ci Yihofa o ‘lipahakay a Kawas,’ mihaenay midokoay Cingranan a tamdaw wa ngaˈay malo lipahakay a tamdaw.—1 Timoti 1:11.

2-3. (1) O sowal ni Yis masamaanay a tamdaw wa ngaˈay lipahak? (2) Onini a lalakaw mamilengo to maanan? Hano misaaliay kita minanam tonini a lalakaw?

² O sasinoway ko kaˈorip ita ngaˈ lipahak han? Cowa. O sowal ni Yis itini pasifanaˈ i lotok fahkaˈay kita alatek. Roma tamdaw pakayni raraw no niyah anca malifaay a roray masomaday ko falocoˈ, sowal ni Yis onini a ‘masomaday ko falocoˈ a tamdaw’ wa ngaˈay lipahak. Sanayho ko sowal ni Yis, o ‘pakayniay i moecelay micada to sapalak,’ anca pakayni pihakelong cingranan ‘pakangodoan no tamdaw’ i, wa ngaˈay lipahak. (Matay 5:4, 10, 11) O tamdaw itini mahaenay a pakayraan, sasamaan milifok to soˈliˈlinay a lipahak hani?

³ O sapasifanaˈ ni Yis pacipinangay kitanan, lipahak kita cowa ko pakayniay kasinoway no kaˈorip, ao pakayniay pirenec ita to saali no nafalocoˈan ato piingid to Kawas ci Yihofaan. (Yakop 4:8) Onini a lalakaw mamilengo, mamidemak kita to maanan tolo a pakayraan, o ngangaˈay milifok to soˈliˈlinay a lipahak.

KOMAEN TO SAPAHALED TO PAKASOˈLIN NO FALOCOˈ A KAKAENEN

4. Milifok to soˈliˈlinay a lipahak o maanan ko saka cecay pakayraan hani? (ˈOlic 1:1-3)

⁴ SAKA 1 PAKAYRAAN: Sapilifokaw to soˈliˈlinay a lipahak, o mamisongilaˈ komaen to sapahaled to pakasoˈlin no falocoˈ a kakaenen. O tamdaw ato pinaˈorip misaaliay to kakaenen ngaˈ ngaˈay maˈorip, kawra edengan ko tamdaw ngaˈayay komaen to sapahaled to pakasoˈlin no falocoˈ a kakaenen, hanaca o kalimlaan a saali no tamdaw konini. Mansa mihaen ko sowal ni Yis: ‘Maˈorip ko tamdaw cowa ko kakaenen aca ko mitiˈeran, o mamitiˈerho to mihadakan ni Yihofa kahacecay a sowal.’ (Matay 4:4) Mihaenay, to romiˈamiˈad o mamiasip kita to kalimlaan a Sowal no Kawas Fangcalay Cudad, komaen to sapahaled to pakasoˈlin no falocoˈ a kakaenen. Mitiliday to ˈOlic sanay, cecay a tamdaw ano ‘maolah to rikec ni Yihofa, to romiˈad to dadaya misongilaˈ miasip midotim,’ o mamalo lipahakay a tamdaw cingra.—ˈOsien ko ˈOlic 1:1-3.

5-6. (1) Mikitini Fangcalay Cudad ngaˈay mananam ita ko maanan hani? (2) Micekiw to Fangcalay Cudad paira to maanan a sapadama kitanan hani?

⁵ Matomesay to olah a Kawas ci Yihofa pakayniay i Fangcalay Cudad pasifanaˈ kitanan to kalimlaan a kimad, padama kitanan mafanaˈ sasamaan raheker lipahak ko kaˈorip. Mananamay ita o maanan ko araaw Ningra kitanan, mananamayho ita sasamaan miingid Cingranan, ato sasamaan ko pidemak ita, ho ngaˈay masodod ko raraw no niyah. Roma i, mananamayho ita mikiˈokay Cingra pafeli kitanan to ˈodingaray a hatokel. (Yirimiya 29:11) Mikitini Fangcalay Cudad mananamay ita koniya soˈlinay kimad tada matomesay ko lipahak no falocoˈ ita.

⁶ Itini Fangcalay Cudad adihayay ko ciepocay a sapalimoˈot, ngaˈay padama kitanan lipahak ko kaˈorip to romiˈamiˈad. Midofdof kita tonini a sapalimoˈot, wa mahela ko soˈliˈlinay a lipahak. O pasangaray no kaˈorip ano patoleday kitanan, tongalen ita ko toki micekiw to Sowal ni Yihofa, hanaca misongilaˈ a midotim. Sowal ni Yis, ‘mitengilay to sowal no Kawas ato midofdofay a tamdaw’ o lalipahak.—Luka 11:28.

7. Sasamaan kiso micekiw ngaˈ ngaˈay milifok to taˈangayay a epoc hani?

⁷ Ano micekiw to Kimad no Kawas i, palaken ko toki misongilaˈ midotim to lalakaw. Patinakoen, ira ko misangaˈay to kaolahan iso a dateng, kawra macalohay kiso, anca miharatengay ko falocoˈ to roma demak, telocto taˈemod hananay iso, cowa pisongilaˈ mikemkem to kakaenen. Maharek komaen ikor, mahapinangay iso kalikiay soˈlin komaen ko niyah, makesemay cowa pisongilaˈ mikemkem ko niyah, mitanam to ˈaredet no kakaenen. Ano micekiw kiso to Fangcalay Cudad i, iraay ko malecaday a pakayraan han? Kalikiay soˈlin ko piˈosi iso alatek, telocto cowa pitemer i falocoˈ ko miasipan a lalakaw. Palaken ko toki misongilaˈ mitinako to kangaˈay no picekiw, haratengen maˈaraway iso ko maanan, matengilay ko maanan, haratengenho mananamay iso ko maanan. Mihaen ko picekiw ngaˈ matongal ko lipahak iso.

8. Samaanay ko ‘madimadiay citanengay a koli’ mitamorong to ˈinorong no niyah hani? (Nengnengen ko ilaenoay safanaˈ.)

⁸ Minilnilan ni Yis ko ‘madimadiay citanengay a koli’ itini matatodongay a tatokian mihadak to sapahaled to pakasoˈlinay falocoˈ a kakaenen, padama kitaanan milifok to sangaˈayay a pidimokos.b (Matay 24:45) Misaday ko madimadiay koli tonini a “kakaenen” i, sakakaay a lalakaw o Fangcalay Cudad. (1 Tisalonika 2:13) Mihaenay, onini a “kakaenen” wa ngaˈay padama kitaanan mikitini i Fangcalay Cudad mihapinang to o manan ko harateng ni Yihofa. Mihaenay tonini, oha mamicekiw kita to Mikecolay, Katalipaˈelal! ato lalakaw no jw.org a wangcan. O mamisongilaˈho kita misaday to tosa saˈopo to lipalipay. Roma i, wa minengnengho kita to pakafoladay a kamok no JW Tilifi. Edeng misongilaˈ kita komaen to sapahaled to pakasoˈlinay falocoˈ a kakaenen, hongaˈ midemak to dotoc a pakayraan, milifok to soˈliˈlinay a lipahak.

MIDOFDOF TO PALINIAN NI YIHOFA

9. Milifok to soˈliˈlinay a lipahak o maanan ko saka tosa pakayraan hani?

⁹ SAKA 2 PAKAYRAAN: Sapilifokaw to soˈliˈlinay a lipahak, o mamidofdof to palinian ni Yihofa. Sowal no mitiliday to ˈOlic: ‘Mangodoay ci Yihofaan, romakatay to lalan Ningra a tamdaw, tada lipahakay!’ (ˈOlic 128:1 ato roma pihongyak.) Tatodong no mangodoay ci Yihofaan i, tada mikangodoay kita Cingranan, caay ka ciharateng midemak to kapiliˈan Ningra a demak. (Taneng 16:6) Mihaenay, papadadotoc kita misaˈicel, mitoor to patirengan ni Yihofa i Fangcalay Cudad a ngaˈayay tatiihay a palinian a maˈorip. (2 Korinto 7:1) Ano midemak kita to kaolahan ni Yihofa a demak, misawad to kapiliˈan Ningra a demak, o lalipahak.—ˈOlic 37:27; 97:10; Loma 12:9.

10. Mikitini Loma 12:2, iraay ko ˈinorong ita samaan ko pidemak hani?

¹⁰ ˈOsien ko Loma 12:2. Cecay tamdaw mafanaˈay to iraay ko fadangalan ni Yihofa patireng to ngaˈayay tatiihay palinian alatek, kawra cangoˈotayho konini, o mamitoor cingra tonini a palinian midemak. Patinakoen, cecay a tamdaw mafanaˈay to iraay ko fadangalan no sifo patireng to hakowa ko cikay no paliding i lalan, kawra cowa kakahi cingra mitoor midemak alatek, telocto mataˈlifay ko cikay no paliding ningra. Wa tano waywayan kita paihkal to soˈlinay pakasoˈlin ko niyah, midofdof to palinian ni Yihofa o sangaˈayay a pakayraan maˈorip. (Taneng 12:28) Iraay ko mahaenay a harateng ni Tafiti, sanay ko sowal ningra ci Yihofaan: ‘Pasifanaˈen Iso kako to sakaˈorip a lalan. Itini kaˈayaw Iso, iraay ko kadofahay a lipahak; itini kawanan Iso, iraay ko midaˈocay a sakaraheker.’—ˈOlic 16:11.

11-12. (1) Ano maˈisang ko falocoˈ anca matoled i, ka pinaˈon kita to maanan hani? (2) Ano mipiliˈ to lawla i, sowal no Filipi 4:8 pakayni kitanan iraay ko maanan a sapadama?

¹¹ Ano maˈisang ko falocoˈ anca matoled kita i, sapidemakaw to pina a demak mifalic to harateng alatek, ho eca ka haharateng sa to pasangaray no niyah. Kawra o maminaˈon kita miliyas to sakayhid, eca ka pidemak to kaˈintehan ni Yihofa a demak.—Ifiso 5:10-12, 15-17.

¹² Itini Filipi a cudad, palimoˈotay ko tarokos ci Pawlo to Krisciyang padadotoc misimsim to “moecelay” “makoracay” “mikidat to ciolahay falocoˈ” “mitinako a paihkal to makapahay capeling” a demak. (ˈOsien ko Filipi 4:8.) Soˈlin cowa ka ihkal ko pisowal ni Pawlo to lawla a demak, kawra wa mikitini kita mihadakan ningra a safalod mipiliˈ to lawla. Itini i sinael a “demak” falicen ita malo “radiw” “ika” “cudad” “tasalamaan no tingnaw” sanay a tilid, wa ngaˈay mahapinang o masamaanay a lawla o mihaydaan ato micadaan no Kawas, o maanan ko tatiihay. Makalimay kita o pakayraan no niyah maˈorip mitooray to ˈakawangay palinian ni Yihofa. (ˈOlic 119:1-3) Mihaen, wa ngaˈayto ira ko awaay ko dangoc a makapahay falocoˈ no mita, midemak to dotoc a pakayraan.—Dmak 23:1.

PAISALAKATEN KO PIDOKO CI YIHOFAAN

13. Milifok to soˈliˈlinay a lipahak o maanan ko saka tolo pakayraan hani? (Yohani 4:23, 24)

¹³ SAKA 3 PAKAYRAAN: Papaisalakaten ko pidoko ci Yihofaan. O Misangaˈay a Tatapangan ita ci Yihofa, midoko kita Cingranan o matatodongay. (Paˈarawan 4:11; 14:6, 7) Mihaenay, itini kaˈorip ita, sakakaay kalimlaan i tano mihaydaan ni Yihofa a pakayraan midoko Cingranan, sakoniya sowal ‘itini sakayat no fangcalay saocor, mitoor to soˈlinay kimad midoko Cingranan.’ (ˈOsien ko Yohani 4:23, 24.) Misaˈicel kita micangacang to sakayat no fangcalay saocor, ngaˈayto mitoor to soˈlinay kimad no Fangcalay Cudad midoko to Kawas. Soˈlin itini kilac ita makecengay anca macongeday ko mitosilay tayal, papaisalakaten ita ko pidoko ci Yihofaan. Nohatini, mataˈlifay ko 100 a salikaka mapalitay, o kapalit nangra samanen o Misawacayay Tamdaw ni Yihofa cangra.c Soˈlin itiniay i pasangaray a pakayraan cangra, kamayan misarocod mimamet to toki a mitolon, micekiw to Fangcalay Cudad, ato pasowal to tao to pakayniay i Kawas ato Hongti Kitakit Ningra a kimad, mansa padadotocay cangra a lipahak. Ano pakangodoen anca micada to sapalak kita i, mafanaˈ kita to mikapotay ci Yihofa kitaanan, hanaca papalifon kitaanan, o lalipahakto ko falocoˈ ita.—Yakop 1:12; 1 Pitiro 4:14.

O NGAˈAYAY A TAˈARAWAN ANINI A LINTAD

14. O cecay kapah a salikaka itini Tacikestan tahalifaay to maanan? Misamaanay?

¹⁴ O nalifetan no ˈalomanay salikaka ngaˈayay misawacay, ano samaanto ko pakayraan ita, sakadademaken ko milengoan nonini a lalakaw tolo a pakayraan, wa ngaˈayto milifok kita to soˈliˈlinay a lipahak. 19 ko mihecaan ci Ciyawitong Popociyawnofo itiniay i Tacikestan ko kitiraan, manaˈayay cingra mala sofitay, telocto itini 2019 miheca 10 folad 4 romiˈad paciecian no tamdaw mikitini i lomaˈ pasadak. Ikor mapalitay to pina folad, pahecad hananay to mararaway tamdaw ko picada. O malifaay ningra mahadakay i sinpong. O safanaˈ, iraay ko mipekpekay cingranan, pacieci cingranan miketon to sowal madimadi to sofitay ato micaˈedong to rikoˈ no sofitay. Ikor misawkitan to ciraraway cingra, patayraan i katayalan a kapalitan, tahira pilifok to sasodod no tapang ngaˈ matedalay. Itini toniya pasangaray tatokian, ci Ciyawitong padotocay madimadi to Kawas, padotocay a lipahak. Samaanay ko piremo ningra hani? Misaˈicelay cingra mirenec to saali no nafalocoˈan no niyah.

15. Itini kapalitan i, samaanay misarocod ci Ciyawitong komaen to sapahaled to pakasoˈlinay falocoˈ a kakaenen hani?

¹⁵ Itini kapalitan i, awaay ko Fangcalay Cudad ni Ciyawitong, awaay ko roma cudad, kawra misarocoday cingra komaen to sapahaled to pakasoˈlinay falocoˈ a kakaenen. Samanay cingra miremo hani? O itiraay a salikaka pafeliay to kakaenen cingranan mitiliday to pakaromiˈaday a sinael i lofok no kakaenen, mihaen ngaˈayayto cingra miasip to sinael to romiˈamiˈad, hanaca misongilaˈ a midotim. Matedal ci Ciyawitong ikor, pasowalay to cowaho ka tahalifa to pakidemay sapalifet a tamdaw: “Sarocoden misaka dademak ko iraay a pasalat iso nohatini, misongilaˈ micekiw to Fangcalay Cudad ato mitepangan a cudad, mitongal to kafanaˈ ci Yihofaan, tada kalimlaan konini.”

16. Misamacayay ci Ciyawitong to maanan hani?

¹⁶ Ci Ciyawitong midofdofay to palinian ni Yihofa. Cowa piharateng anca midemak cingra to mararaway a demak, ao misamacayay ko harateng i tireng ni Yihofa, misimsimayho to misaaretengan ni Yihofa a demak. Marariday ci Ciyawitong miharateng to kihcod kasapaan a misangaˈan no Kawas a dafong. To papacem talipaˈelal cingra mitengilay to radiw no ˈayam, to dadaya micaˈengaway cingra to folad ato foˈis. Sanay cingra: “Onini sahtoay o sapatelong ni Yihofa takowanan, padama takowanan miliyaw a talifak.” Adihayay ko sapatelong ni Yihofa kitaanan mirenec to saali no falocoˈ ato tireng ita. Ano miakoˈid kita Cingranan, o mamatomes ko lipahak no falocoˈ, o hatiniay a lipahak o papafeli to ˈicel kitaanan mihadidi to pasangaray.

17. Ano malecad ko pakayraan ita ci Ciyawitongan, mitafo kita to mihadidiay wa ira ko maanan ngaˈayay minaroˈan? (1 Pitiro 1:6, 7)

¹⁷ Ci Ciyawitong paisalakatan ko pidoko ci Yihofaan. Mafanaˈay cingra madimadi ci Yihofaan tada kalimlaan. Sowal ni Yis: ‘Ka pidoko to Kawas iso ci Yihofaan, edengan Cingra ko dadokoen.’ (Luka 4:8) Soˈlin o tapang no sofitay ato kalo sofitay papisawaday ci Ciyawitongan to pihakelongan no niyah, kawra ci Ciyawitong ano romiˈadto anca dadaya, mikifalocoˈay pasayra ci Yihofaan a mitolon, micangacang Cingranan padama to niyah mitafo to madimadiay, eca pisawad to pihakelongan. Soˈlin caka sadafdaf ko macadaay, kamayan padotoc a madimadi ci Ciyawitong to Kawas. Nohatini, tada lipahakay cingra, samanen malifokay ningra ko matekesay a odoˈ, oya mapalifetayto a pakasoˈlin no falocoˈ, onini na awaayho itini ˈayaw no malepel cingra, mapekpek ato mapalit.—ˈOsien ko 1 Pitiro 1:6, 7.

18. Samaan ko pidemak ita wa ngaˈay padotoc a lipahak?

¹⁸ Mafanaˈay ci Yihofa sasamaan ko demak ita ngaˈ malifok ko soˈliˈlinay a lipahak. Ano misiˈayaw to pasangaray i, ano tooren iso ko masowalay nonini lalakaw a tolo pakayraan midemak, o ngangaˈay padotoc a lipahak. Mihaen, wa ngaˈay kiso mikifalocoˈ a somowal: ‘Ira ci Yihofa malo Kawas a tamdaw tada lipahakayto!’—ˈOlic 144:15 ato roma pihongyak.