Kedecen Mitafo ko Sapafeli no Kawas a Hatokel

1. Pafeliay ci Yihofa kitanan to maanan a hatokel hani?

PAIRAAN ni Yihofa ko hatokel ita tahadaˈoc maˈorip, onini a hatokel tada makapahay! O roma tamdaw iraay ko hatokel tatayra i kakarayan malo cowa ka patay a ˈadingo. (1 Korinto 15:50, 53) Kawra o hatokel ita ˈalomanay tamdaw wa itini fafekang no sera tahadaˈoc tanektek ko tireng lipahak a maˈorip. (Paˈarawan 21:3, 4) O hatokel ita ano tatayra i kakarayan anca itini fafekang no sera maˈorip, o hatokel ita sahtoay o kalimlaan.

2. O hatokel ita misalalangiay to maanan? Hano ngaˈay kita pakasoˈlin tonini hani?

² Itini Fangcalay Cudad, o mitoroˈan toniya “hatokel” a sowal o “halamhamay mifekad ko makapahay a demak.” O mamalaˈosi ko hatokel ita noikor, samanen oniya hatokel o sapafeli ni Yihofa. (Loma 15:13) Mafanaˈay kita na mikiˈokay ci Yihofa to maanan, mafanaˈayho tatooren Ningra ko mihadakan a sowal a midemak. Pakasoˈlinay kita, makalimay ci Yihofa hanaca iraay ko ˈicel palaˈosi to kihcod mikiˈokan no Niyah. (Saˈosi 23:19) Mihaenay, o hatokel ita cowa ko maharatengay aca no niyah, ao pakayniay i soˈlinay a demak ato mifekaday a wacay.

3. Oniya lalakaw mamilengo to maanan? (ˈOlic 71:5)

³ Tada maolahay ko kakarayan Wama kitanan, makalimayho kitanan mitadiˈec Cingranan. (ˈOsien ko ˈOlic 71:5.) Ano ira ko tanektekay a pakasoˈlin no falocoˈ ita ci Yihofaan, pakasoˈlin to sapafeli Ningra kitanan a hatokel mamalaˈosi, wa ngaˈayto miemem to sapalifet, ngaˈayho ira ko lipahak ato timolo misiˈayaw to hanoikor. Toniya lalakaw mamilengo to hatokel ita sasamaan midipot kitanan. Salakat, wa mifolfol kita, o hatokel hano malecad o ˈenor no tamina, malecadho to kafong. Dotoc mamilengo, samaan ko pidemak ita wa matongal ko pakasoˈlin to mamalaˈosi ko hatokel ita.

O HATOKEL ITA MALECADAY O ˈENOR NO TAMINA

4. O hatokel hano malecaday o ˈenor no tamina? (Hipray 6:19)

⁴ Itini Hipray, patinakoan no tarokos ci Pawlo ko hatokel ita to ˈenor no tamina. (ˈOsien ko Hipray 6:19.) Miceriday cingra mikalic to tamina, mansa mafanaˈay cingra to ˈenor no tamina ngaˈay patanektek to tamina, ecato ka maˈalol no nanom. Kinacecayay, tahalifa cingra to taˈangayay faliyos i riyar. Itiya, maˈaraway ningra ko matayalay i tamina a tamdaw mifahkolay to ˈenor no tamina i riyar, ho caka songtol no tamina ko fakeloh. (Dmak 27:29, 39-41) Malecaday o ˈenor no tamina, o hatokel ita ngaˈay padama kitanan tanektek caka ngiyangi. Mihaenay, ano tahalifa kita to faliyos no kaˈorip i cowa ko mamiliyas ci Yihofaan. Matomesay ko hatokel ita i falocoˈ, wa ngaˈay itini sano faliyosay a sapalifet padadotoc a mihadidi, samanen pakasoˈlinay kita i kaˈayaw wa awato ko faliyos. Haratengen, patalipaˈelalay ci Yis sanay, mamicada kita to sapalak. (Yohani 15:20) Mansa, midotim to mikiˈokan ni Yihofa sapafeli kitanan a sapalemed noikor ngaˈay padama kitanan tanektek caka ngiyangi, padadotoc madimadi midoko Cingranan.

5. O hatokel ni Yis samaanay padama cingranan misiˈayaw to saroero no patay?

⁵ Haratengen hena, soˈlin mafanaˈay ci Yis to niyah mamicada to pisemsem a mapatay, kawra samanen ira ko hatokel ningra, mansa ngaˈay tanektek caka ngiyangi, padadotoc madimadi to Kawas. Itini Kongyen saka 33 miheca Kocinsic, o tarokos ci Pitiro sakadademakay to sapairasol no ˈOlic, onini a sapairasol somowalay itini misiˈayaw ci Yis to patay i tanektekay a pakasoˈlin ko falocoˈ: ‘O rarihaday kako maroˈ, matomes ko hatokel, nawhani caay ko fafalahen Iso kako i kaitiraan no mapatayay, caay ko mamihayda Kiso to nika patay no madimadiay sikawdan. . . . Palipahak Kiso takowanan i kaˈayaw Iso.’ (Dmak 2:25-28; ˈOlic 16:8-11) Soˈlin mafanaˈay ci Yis mamapatay ko niyah, kawra cowa ka lahdaw ko hatokel ningra. Pakasoˈlinay cingra wa patikolen no Kawas paˈorip cingra, cingra saan papatikol tayra i kakarayan malacafay to Wama.—Hipray 12:2, 3.

6. Pakayni i hatokel, samanay ko sowal no cecay faˈinayan salikaka?

⁶ O sapafeli no Kawas a hatokel padamaay to ˈalomanay salikaka padotoc mihadidi. Nengnengen ko tinakoan ni Lonate Cin. O madimadiay a faˈinayan salikaka cingra, itiniay i Ikok maˈorip. Itini Saka Cecay Lalood no Hekal a tatokian, samanen minaˈayay cingra mala sofitay hato mapalitay i kapalitan. Iraay ko tosa folad a toki, cecayay cingra a paliten, ikor mapacieciay cingra midemak to marorayay a tayal to cecay liyad. Ikor sanay ci Lonate: “O nalifetan ako ihkalay mahapinang ako, tada kalimlaan ko hatokel, pafeliay kitanan to ˈicel mihadidi. Kita i iraay ko ngaˈayay a taˈarawan ni Yis, tarokos ato pairasolay, iraayho ko sapafeli no Fangcalay Cudad a kalimlaan a sakiˈok. Padamaay konini kitanan ira ko hatokel noikor, pairaayho to ˈicel ngaˈay mihadidi.” Pakayni ci Lonatean, o hatokel malecaday o ˈenor no tamina. Pakayni kitanan, ngaˈayay mahaen ko hatokel.

7. Tahalifa kita to sapalifet ikor, o hatokel hano mamatongal ko ka tanektek? (Loma 5:3-5; Yakop 1:12)

⁷ Padotoc kita mihadidi i sapalifet, hanaca mitinako to sapadama ato pihayda ni Yihofa ikor, o hatokel ita wa matongal tanektek. (ˈOsien ko Loma 5:3-5; Yakop 1:12.) Mihaenay, palalinien to misatapang minanam to soˈlinay kimad i, nohatini matongalay ko pakasoˈlin ita to mamalaˈosi ko hatokel no niyah. Ciharatengay ci Satan tano pasangar ato sapalifet mitapiˈ kitanan, kawra mitadiˈec to sadama ni Yihofa, wa ngaˈay malaˈosi ko pisiˈayaw no mita.

O HATOKEL ITA MALECADAY O KAFONG

8. O hatokel malecaday o kafong hano saan ko sowal hani? (1 Tisalonika 5:8)

⁸ Patinakoan no Fangcalay Cudad ko hatokel ita to kafong. (ˈOsien ko 1 Tisalonika 5:8.) Cikafong ko sofitay sapidipotaw to fongoh caka madokaˈ no ˈada. Malalood ci Satanan i, mamidipot kita to ponoˈ no niyah, samanen ci Satan wa tano masakenakenaay a sakayhid ato mararaway a sasowalen miwarak to harateng no mita. Malecaday o kafong ngaˈayay midipot to fongoh no sofitay, o hatokel ita wa ngaˈay midipot to ponoˈ ita, ano mihaen wa ngaˈayto kita madimadi ci Yihofaan.

9. Samanay ko kaˈorip no awaay ko hatokel a tamdaw?

⁹ O midaˈocay a ˈorip a hatokel ngaˈay padama kitanan citaneng ko misaˈosian. Kawra, ano ecato pisaareteng kita minengneng to sapafeli no Kawas a hatokel, patomesenho ko misatekeday a coos i ponoˈ no niyah, cowato ko mamisamacay micangacang to midaˈocay a ˈorip a sapalifon. Haratengen ko roma pakayraan nolitengan no Korinto a Krisciyang, soˈlin mikiˈokay ko Kawas to mapatay a tamdaw iraay ko hatokel patikol maˈorip, kawra cowa to pakasoˈlin cangra tonini kalimlaan a sakiˈok no Kawas. (1 Korinto 15:12) Sanay ci Pawlo, awaay ko hatokel a tamdaw o aniniay aca a lipahak ko micangacangan. (1 Korinto 15:32) Anini, ˈalomanay tamdaw cowa to pakasoˈlin to sakiˈok no Kawas, edengan o lawla anini ko misaaretengan. Kawra pakasoˈlinay kita, papafeli ci Yihofa kitanan to ˈodingaray a hatokel. Mitafo kita tonini a hatokel, malecaday o misakafongay to kafong, wa ngaˈayto madipot ko harateng no niyah. Mihaenay, cowato ko mamalafo ko kaˈorip ita, mipalak to kalalaˈed no niyah aci Yihofaan.—1 Korinto 15:33, 34.

10. O hatokel sasamaan midipot kitanan ecato ka mafiyor no mararaway a harateng?

¹⁰ O hatokel ngaˈayay midipot kitanan miliyas to mararaway a harateng, miharateng to niyah ano tahadaˈocto cowa ko papakahemek ci Yihofaan. Tinakoen, o roma tamdaw sanay miharateng alatek: “O roma tamdaw ngaˈay midaˈoc a maˈorip alatek, kawra cowa ka ngaˈay kako. Tada tatiihay kako, tahadaˈocto cowa ko papakatoor kako to palinian ni Yihofa.” O makaniway a widang ni Yopu ci Ilifa na pasowalay to malecaday a sowal ci Yopuan. Sanay ci Ilifa: ‘O maan ko tamdaw, hano ngaˈay makorac ko falocoˈ hani?’ Sanayho cingra: ‘Halo coyoh no Niyah caay pakasoˈlin ko Kawas. O caay ka korac a nengnengen Ningra cangra a maemin.’ (Yopu 15:14, 15) Tada o misamangahay konini! Haratengen, onini a mangah sahtoay mikitiniay ci Satanan. Mafanaˈay cingra ano padotocay kiso ira ko mararaway a harateng, cowa to papadotoc mitafo to hatokel no niyah. Mihaenay, aka pakasoˈlin to mangah ningra, ao mitongal miharateng to sakiˈok ni Yihofa. Makalimay ci Yihofa tahadaˈoc maˈorip kiso, papadama Cingra tisowanan malaˈosi konini a patosokan. Aka a cisasa Cingranan!—1 Timoti 2:3, 4.

KEDECEN MITAFO KO HATOKEL

11. Hano mamihadidi kita mitala ci Yihofaan hani?

¹¹ Sapikedecaw a mitafo to hatokel cowa ko madoloay. Itini pitala ita ci Yihofaan a tatokian, mamaˈisang alatek. Kawra haratengen, o midaˈocay ci Yihofa, o pinengneng Ningra to toki cowa ka lecad kitanan. (2 Pitiro 3:8, 9) Cowa ka itini i pitalaan ita a tatokian midemak Cingra alatek, kawra wa misaka dademak Cingra to sangaˈayay a pakayraan palaˈosi to araaw no Niyah. Itini pihadidi mitala ci Yihofaan palaˈosi to araaw no Niyah i, o maanan ko ngangaˈay padama kitanan mikedec mitafo to hatokel hani?—Yakop 5:7, 8.

12. O Hipray 11:1, 6 samanay palaliting to hatokel ato pakasoˈlinay falocoˈ?

¹² O hatokel ita o sapafeli ni Yihofa, hanaca papalaˈosien Ningra ko hatokel ita, mansa padadotoc kita patanektek to kalawidang ita Cingranan, wa ngaˈayto mikedec mitafo to hatokel no niyah. Soˈlinay i, palalitingan no Fangcalay Cudad ko hatokel ato pakasoˈlinay falocoˈ, sowal sa papakasoˈlin kita to iraay ci Yihofa materek, pakasoˈlinho to ‘papalifonen Ningra ko micangacangay Cingranan a tamdaw.’ (ˈOsien ko Hipray 11:1, 6.) Matongal ko pakasoˈlin ita to soˈlinay materek ci Yihofa, wa matongal ko pakasoˈlin to papalaˈosien Ningra ko polong a sakiˈok no Niyah. Dotoc nengnengen ita ko pina ngaˈayay a pakayraan, onini a pakayraan ngaˈay padama kitanan tangongol ko kalawidang ci Yihofaan, ngaˈay padama kitanan mikedec mitafo to hatokel no niyah.

13. Samaan ko pidemak ita wa ngaˈay miingid ci Yihofaan?

¹³ Ka pasayra ci Yihofaan mitolon, micekiwho to Kimad Ningra. Soˈlin cowa ka ˈaraw ita ci Yihofa, kawra ngangaˈay miingid Cingranan. Itini satolon ngaˈay kita pasayra Cingranan mihadak to nafalocoˈan, pakasoˈlin Cingranan mamitengil to sowal ita. (Yirimiya 29:11, 12) Ngaˈayho kita mitengil to sowal ni Yihofa, o pakayraan i micekiw to Kimad Ningra, hanaca misongilaˈ midotim. Maˈosi ita to samanay ci Yihofa midimokos to nolitengan madimadiay a sikawdan Ningra, wa matongal ko pakasoˈlin to mamalaˈosi ko hatokel no niyah. Sowal no Fangcalay Cudad ‘sahtoay o sapasifanaˈ kitanan a tiliden, ho ngaˈay kita pakayni pihadidi, ato sahinom no Fangcalay Cudad, ngaˈay ira ko hatokel.’—Loma 15:4.

14. Hano haharatengen ko nano demak ni Yihofa i roma tamdaw?

¹⁴ Midotim to na samaanay ci Yihofa palaˈosi to sakiˈok no Niyah. Haratengen ko nano demak ni Yihofa ci Aprahaman aci Saraan. Tada matoˈasayto cangra, cowato ka ngaˈay ciwawa, kawra mikiˈokay ko Kawas cangranan to mamahofoc to cecay faˈinayan wawa. (Satapangan 18:10) Samaanay ko harateng ni Apraham? Sanay ko Fangcalay Cudad, ‘pakasoˈlinay to mala wama no ˈalomanay kitakit ko niyah’ cingra. (Loma 4:18) Soˈlin itini pinengneng no tamdaw cowa ko mamalaˈosi koniya demak, kawra pakasoˈlinay ci Apraham to papalaˈosien ni Yihofa ko sakiˈok no Niyah. Soˈlinay cowa ka toled ko madimadiay a Apraham. (Loma 4:19-21) Midotim toniya maˈoningay padama kitanan pakasoˈlin, itini pinengneng no tamdaw o misowalan ni Yihofa a sowal cowa ko mamalaˈosi, mamitoor ci Yihofa to misowalan a midemak.

15. Hano mamidotim to midemakan ni Yihofa to pakayniay kitanan a demak hani?

¹⁵ Haratengen ko midemakan ni Yihofa pakayni tisowanan a demak. Itini Fangcalay Cudad adihayay ko sakiˈok ni Yihofa kitanan, haratengen ko niyah samaanay kiso mitinako toniya mapalaˈosiayto Ningra a sakiˈok. Haratengen hena, mikiˈokay ci Yis to mamidimokos ko kakarayan Wama to saali no kaˈorip iso. (Matay 6:32, 33) Mikiˈokayho ci Yis, micangacang kiso ci Yihofaan, papafelien ni Yihofa to fangcalay saocor kiso. (Luka 11:13) Oniya sakiˈok maharekayto ni Yihofa midemak. Maharatengayho iso to roma pakayni tisowanan a sakiˈok mapalaˈosiayto ni Yihofa alatek, tinakoen mikiˈokay Cingra mamisodod tisowanan, mihinom tisowanan ato mirenec to nofalocoˈan a saali iso. (Matay 6:14; 24:45; 2 Korinto 1:3) Miharateng kiso to na midemakan ni Yihofa to pakayniay tisowanan a demak, mamatongal ko pakasoˈlin to papalaˈosien Ningra ko hatokel iso noikor.

KA PAKAYNI I HATOKEL A LIPAHAK

16. O hatokel hano o tada kalimlaan a sapatelong hani?

¹⁶ O midaˈocay ˈorip a hatokel o sapafeli ni Yihofa kitanan a kalimlaan a sapatelong. Fanekfekay kita hinatala toniya makapahay a hatokel malaˈosi a romiˈad, hanaca pakasoˈlinay kita to aira konini a romiˈad. O hatokel hato o ˈenor no tamina, ngaˈay patanektek kitanan, ira ko ˈicel miemem to sapalifet, sapalak, anca o saroero no patay. O hatokel malecaday o kafong, ngaˈayay midipot to harateng no mita, padama kitanan mifalah to mararaway a demak, padadotoc midemak to matatodongay a demak. O sapafeli no Kawas a hatokel padamaay kitanan miingid Cingranan, pakahapinangho kitanan tangongolay ko olah Ningra kitanan. Mikedec kita mitafo to hatokel no niyah, hanaca ihkal ko pinengneng tonini a hatokel, mamalifok ko taˈangayay a epoc.

17. Hano ngaˈay kita pakayni i hatokel a lipahak?

¹⁷ Itini i Loma pakalalokay ko tarokos ci Pawlo kitanan: ‘Ka pakayni hatokel a lipahak.’ (Loma 12:12) Ngaˈay ci Pawlo a lipahak, samanen pakasoˈlinay cingra ano mitafo to madimadi ko niyah, wa ngaˈay tayra i kakarayan milayap to midaˈocay a ˈorip. Ano kitato wa ngaˈay pakayni hatokel a lipahak, samanen pakasoˈlinay kita papalaˈosien ni Yihofa ko sakiˈok Ningra, malecad ko sowal no mitiliday to ˈOlic a tamdaw sanay: ‘O cima . . . halamhamay to Kawas ningra ci Yihofaan i, o lipahakay! O Kawas . . . o soˈliˈlinay ngaˈayay tadiˈecen.’—ˈOlic 146:5, 6 ato roma pihongyak.