Itini Saˈopo no Kasakopang Masasipakalalok

1. Itini saˈopo hano papacaˈof kita to salicay?

HANO mirienang kita to saˈopo no kasakopang hani? Sakakaay lalangian i, papakahemek ci Yihofaan. (ˈOlic 26:12; 111:1) Roma i, itini tonini a pasangaray a lintad, mirienang kita to saˈopo wa ngaˈay masasipakalalok. (1 Tisalonika 5:11) Itini saˈopo pakamay kita pacaˈof to salicay, mamalaˈosi koniya tosa patosokan.

2. Iraay ko maanan a toki ita itini i saˈopo mihadak to sapacaˈof?

² To lipalipay, iraay ko toki ita itini saˈopo pacaˈof. Tinakoen, itini pilipayan i, ngaˈayay kita itini no Micekiway to Mikecolay mihaen to demak. Itini tenok no lipay Mitosilay ato Nikaˈorip Rayray no Saˈopo i, ngaˈayay kita itini ˈOdo no Sinael, Kasakopang a Pilengo ato romaroma milicayay a kamok pacaˈof to salicay.

3. (1) O tatahalifa kita to maanan a pasangar hani? (2) Hipray 10:24, 25 sasamaan padama kitaanan?

³ Miharatengay kita pakayni pipacaˈof pakahemek ci Yihofaan ato pakalalok to salikaka, kawra tatahasiˈayaw kita to tosa pasangaray, o cecay i, maharatengho to papacaˈof marawrawayto ko falocoˈ, o roma i, sapipacaˈofaw to adihayay a salicay, kawra cowa ka rarid a matoroˈ a matahidang kita. Sasamaan kita miremo tonini tosa pasangaray hani? ˈOsien ko mitilidan ni Pawlo a Hipray cudad, mamahela ita ko caˈof. Hakowaay ko nika masakalimlaan no saˈopo sa i, saan ko sowal ningra, samacayen ita itini ‘masasipakalalokay’ a demakan sanay. (ˈOsien ko Hipray 10:24, 25.) Haratengen ita, ano soˈlinto kantang ko sowal, patalahkal to nika pakasoˈlin o papakalalok to tao, cowa ito ko mamarawraw ko falocoˈ. O roma i, ano caka rarid a matahidang no misikayay a tamdaw kita i, o mamahemekho kita, samanen ngangaˈayto ko roma tamdaw a pakamay pacaˈof.—1 Pitiro 3:8.

4. Onini a lalakaw mamilengo to maanan tolo a kalimlaan?

⁴ Oniya lalakaw salakat mamilengo, ano cowa ka ˈaloman ko tamdaw no kasakopang, o pacaˈofay to salicay a tamdaw cowa ka ˈaloman, ngaˈayay kita misamaan masasipakalalok. Roma i, ano ˈaloman ko tamdaw no kasakopang, ˈaloman ko pakamayay a tamdaw, o sasamaan ko demak ita. Salikor mamananam ita, o maanan ko hasowal i pipacaˈof, onini ko soˈlinay pakalalok to tamdaw.

ITINI COWA KA ˈALOMAN KO TAMDAW A KASAKOPANG MASASIPAKALALOK

5. Ano cowa ka ˈaloman ko tamdaw masaˈopo i, ngangaˈay samaan masasipakalalok kita hani?

⁵ Itini mimingay a kapot anoca cowa ka ˈaloman ko tamdaw a kasakopang, o pacaˈofay a tamdaw cowa ka ˈaloman. Nolatek i, o misikayay a tamdaw halafinay a mitala ngaˈ iraay ko pakamayay. Mihaen i, hato matayoay ko kalingad no saˈopo, pasangaray a makowad ko tamdaw. Samaan ko pidemak iso hani? Mararid a pakamay a pacaˈof, mihaen kiso i, ngaˈayto pakalalok to roma tamdaw a pakamay.

6-7. Iraay ko maanan a pakayraan padama kitaanan maˈesal ko marawraway a falocoˈ hani?

⁶ Ano haharateng han iso to papacaˈof i, marawrawto ko falocoˈ, sasamaanto hani? Soˈlinay haw i, ˈalomanay tamdaw iraay ko mahaenay a falocoˈ. Kawrira, pakayni sapakalalokaw to salikaka, ngaˈayay kilimen iso ko hapakayraan miˈesal to marawraway a falocoˈ han? Wa icowa mikilim hani?

⁷ Ngaˈayay lomalen iso ko iˈayaway a lalakaw no Mikecolay, papadama tisowanan ko ilalomaˈay a sapaini.b Tinakoen, songilaˈen a misaday. (Taneng 21:5) Ano macalep iso cipinang to lalakaw no saˈopo i, ano pacaˈof to salicay cowa ito ko mamarawraw. O roma i, apotoˈen ko sapacaˈof. (Taneng 15:23; 17:27) Ano pakinacecay sa kiso adihay ko sowal, adihay ko kalimlaan, latek matalawto kiso, awa ko pinang no salikaka mitengil to sowal iso. Ano palalinien i, ano cecay tosa aca ko sowal, cowa ito ko mamarawraw kiso, madoloto a cipinang ko salikaka a mitengil. Apotoˈen tano niyahen a sowal pacaˈof to salicay, paihkalay konini to ngaˈayay ko pisaday iso, macalepay a cipinang to lalakaw.

8. Ano misaˈicel kita i, wa samaan ko harateng ni Yihofa hani?

⁸ Ano mitanamanto iso ko pina pakayraan ikor, marawrawho ko falocoˈ alatek, cecay tosa aca ko mapacaˈofay, sasamaanto aki? Hamaan tatiih ko falocoˈ, ano misaˈicelto kiso, mamahemekto ci Yihofa. (Luka 21:1-4) Aka mapawan, o saali ni Yihofa o pisaˈicel aca iso, ao cowa ka papidemak tisowanan to mitaˈlifay to ˈicel no niyah a demak. (Filipi 4:5) Saharateratengen, o maanan ko mamadangar iso, ikor patireng to cecay patosokan, hanaca cangacangen ci Yihofa padama tisowanan eca ka marawraw ko falocoˈ. Satapang i, o patosokan iso ngaˈayay kinacecay aca pacaˈof to apotoˈay a sapacaˈof.

ITINI ˈALOMANAY KO TAMDAW A KASAKOPANG MASASIPAKALALOK

9. Itini ˈalomanay ko tamdaw a kasakopang mamalifa ko masamaanay a pasangar alatek?

⁹ Ano ˈalomanay ko tamdaw i kasakopang iso, latek mamalifa ko roma a pasangaray. ˈAlomanay ko salikaka to sapipacaˈofaw, telocto i, mararid kiso pakamay cowa ka matahidang. Fafahiyan salikaka ci Taniaye malifaay ko mahaenay a pasangar.c Tohati:niay maolahay cingra pacaˈof i saˈopo, o kalimlaan a noka pidoko konini sanay cingra miharateng, cowa aca pakalalok to romaroma tamdaw, papadamaho cingranan mirinaˈ i falocoˈ to kimad no Fangcalay Cudad. Ikor i, malinahay tayra i ˈalomanay ko tamdaw a kasakopang cingra, caayto ka mararid pacaˈof to salicay, nolatek malahcito ko saˈopo i, cowa ka matahidang cingra. Sanay cingra: “Matoleday kako, hato malahdaway ako ko masakalimlaan a sapalemed. Ano kinapinapinaay a mafekad ko mahaenay a demak i, wa saan kiso miharateng, ‘mipadetengay ko misikayay a tamdaw hokira?’”

10. Samaan ko pidemak ita, ngaˈayto adihay ko pipacaˈof alatek?

¹⁰ Mahecaday kiso ci Taniayean han? Ano mahaenay i, caayto ka sapipakamayaw alatek, tengil sato to pipacaˈof no tao ko ngaˈay. Kawra aka pisawad a pacaˈof. Samaan ko pidemak iso hani? Alatek ngaˈayay adihayen iso ko misadayan a sapacaˈof. Ano mihaen, soˈlinto misatapang a malalengo caayho matahidang kiso i, ikor wa irato ko hatoki iso pacaˈof. Ano misaday to Cacekiwen a Lalakaw no Mikecolay i, saharateratengen ko kahacecay fatac samaanay milingat to lalangian. Mihaen i, itini i lalomaˈ no saˈopo, wa irato ko sapaladaˈ iso a pina kalimlaan. O roma i, ano pasangaray ko pina fatac, cowa ka dolo a tadtaden, ngaˈay kiso misaday pacaˈof tonini a fatac, samanen milengo tonini a fatac i, o pakamayay a tamdaw cowa ka papina alatek. (1 Korinto 2:10) Ano sakadademaken iso konini a pakayraan ikor, mataˈlifto ko kinapinapina a saˈopo, caayho ka pacaˈof i, sasamaanto hani? ˈAyaw no saˈopo, ngaˈayay kiso saˈayawen pasowal ko misikayay tamdaw to icowaay ko papacaˈofen iso a salicay.

11. Filipi 2:4 palimoˈotay kitaanan misamaan ko demak hani?

¹¹ ˈOsien ko Filipi 2:4. Itini sakayat no Kawas o tarokos ci Pawlo, palimoˈotay to Krisciyang a misikol to tao. Itini saˈopo i, sasamaan kita mihakelong tonini sapalimoˈot hani? Haratengen, o tao malecaday kitaanan makalim a pacaˈof.

12. Ano sapakalalokaw kita to salikaka i saˈopo, o maanan ko ngaˈayay a pakayraan hani? (Nengnengen ko coka.)

¹² Haratengen hena, ano masasowal to widang cowa ka tomerep kiso, awato ko hapakayraan no tao a caciyaw han? Cato awih. Maedeng makalimay kiso malacafay misacaciyaw. Malecadayto, itini saˈopo makalimay kita ˈaloman ko pacaˈofay. Soˈlinay haw i, pairaen ita ko hatoki no salikaka patalahkal to pakasoˈlin no falocoˈ, o ngaˈayay a pakayraan pakalalok cangranan konini. (1 Korinto 10:24) Nengnengen ita samaan ngaˈ masongilaˈ ko pidemak.

13. Misamaan ko demak ita, ho ngangaˈay ˈaloman ko pacaˈofay to salicay hani?

¹³ Salakat, apotoˈen ita ko sowal. Ano mihaen i, o misikayay a tamdaw ngangaˈay mitoroˈ to ˈalomanay tamdaw pacaˈof to salicay. Pakayni toninian, o malohemay malitengay ato romaroma halafinayto i kimad a salikaka ngaˈayay a patireng to taˈarawan. O roma sa i, soˈlinto apotoˈ ko sowal iso, aka somowal to adihayay a masakalimlaan. Ano pakinacecay han iso milahci ko cecay fatac i, wa awato ko hasowal no romaroma tamdaw. Itini tonini fatac mananamay ita ko tosa sapaini, apotoˈen ko sowal, ato hamaan a saadihay han ko kalimlaan. Ano kiso ko saka cecay pacaˈofay a tamdaw i, wa ngaˈay cecayen aca ko misowalan a kalimlaan han?

14. Sasamaan kita mihapinang hahakowa ko kararid a pacaˈof to salicay? (Nengnengen ko coka.)

¹⁴ Hahakowa ko kararid a pacaˈof to salicay, mamisongilaˈ kita mihapinang. Ano papakamay saan kita, wa irato ko saroero no misikayay papipacaˈof kitaanan. Telocto, awaayto ko toki no romaroma tamdaw a pacaˈof, kita saan kinapinapinaayto a pacaˈof. O papatoled to tao konini, hawad sato a pakamay alatek.—Patnakay 3:7.

15. (1) Ano pakamay kita eca ka toroˈen i, aka miharateng kita to maanan? (2) Sasamaan ko pidemak no misikayay paihkalay to ciharatengay cingra to kahacecay tamdaw? (Nengnengen ko sapatongal lalakaw “O Misikayay Salikaka Mamisinanot to Maanan?”)

¹⁵ Ano ˈalomanay ko tamdaw pakamay i, cowa kao kiso saan ko mitoroˈan no misikayay, nolatekay lalomaˈ no saˈopo cowa ka matoroˈ kiso. Mamatoled kiso alatek, kawra aka piharateng to padetengay ko misikayay a salikaka.—Patnakay 7:9.

16. Ano awaayho ko toki ita pacaˈof to salicay, ngangaˈayho misamaan pakalalok to tao hani?

¹⁶ Ano pakamay kiso cowa ka matoroˈ i, ngaˈayay sinanoten mitengil ko caˈof no tao, malahci ko saˈopo pakahemeken cangra. Papakalalok to salikaka ko sapakahemek iso, malecad o sapacaˈof iso pakalalokay cangranan. (Taneng 10:21) Mikifalocoˈay a pakahemek o ngaˈayay a pakayraan masasipakalalok.

NGANGAˈAYHO SAMAAN MASASIPAKALALOK

17. (1) Sasamaan ko wama wina padama to wawa misaday to matatodongay a sapacaˈof? (2) Mikitini i ika, misaday to sapacaˈof iraay ko maanan sepat a pakayraan? (Nengnengen ko ilaenoay safanaˈ.)

¹⁷ Ngaˈayho kita samaan itini saˈopo masasipakalalok hani? Ano iraay ko wawa iso, ngaˈayay mitoor to mihecaan nangra, padama cangranan misaday to matatodongay a sapacaˈof. (Matay 21:16) Nolatekay, itini saˈopo milengoay to mararamoday, ato no waywayan a lalangian, kawra iraay ko cecay anca tosa a fatac a salicay ngaˈayay ko wawa pacaˈof alatek. Roma i, padamaen ko wawa cipinang, o kahacecay a pakamay hano cowa ko mamatoroˈ. Mihaenay, ano caay ka matoroˈ ko wawa i, cowato ko mamatoled cingra.—1 Timoti 6:18.d

18. Ano pacaˈof kita, sasamaan caka samacayen i tireng no niyah ko sowal? (Taneng 27:2)

¹⁸ Kita kahacecay tamdaw ngangaˈay misongilaˈ a misaday, ho pakahemek ci Yihofaan ko sapacaˈof ita, ato pakalalok to salikaka. (Taneng 25:11) Latekay mikitohay kita to nalifetan no niyah, kawra aka kao niyah sa a demak ko sasowalen i pipacaˈof. (ˈOsien ko Taneng 27:2; 2 Korinto 10:18) O mipacaˈofan ita a demak samacayen i ci Yihofaan, i Fangcalay Cudad ato finawlan Ningra. (Paˈarawan 4:11) Manaokaniw, ano salicay no fatac misaaliay to sasowalen ko nafalocoˈan no niyah, ngangaˈay a mihaen to demak. Ilaenoay a fatac o tinakoan kora.

19. (1) Ano ciharatengay kita to polong mirienangay to saˈopo a tamdaw i, pairaay to maanan a minaroˈan? (Loma 1:11, 12) (2) Hano maolahay kiso pacaˈof i saˈopo?

¹⁹ Pakayni sasamaan pacaˈof to salicay, aka toor han ko pakidemay a saˈosi, kawra wa ngaˈay kita misarocod pakayni i sapacaˈof a masasipakalalok. O tatodong i, mararid kita pakamay alatek. Soˈlinto caay ka mararid a pacaˈof, marenecento kita, samanen airato ko toki no romaroma tamdaw a pacaˈof a mahemeken. Caciharateng kita to tao itini saˈopo, ‘masasipakalalok to polong a tamdaw.’—ˈOsien ko Loma 1:11, 12.