Paˈicelen ko Pakasoˈlinay Falocoˈ, Aka Cisasa to Mikiˈokan ni Yihofa a Faelohay Hekal

1-2. Itini kapitala to kaira no faelohay hekal i, sasamaan ko demak ita hani?

MIKIˈOKAY ci Yihofa to papalaˈafo toniya tatiihay hekal, paira to moecelay faelohay hekal. Hinatalaay kita toniya mikiˈokan, wa kaliki a malaˈosi. (2 Pitiro 3:13) Soˈlin cowa ka fanaˈ kita hahacowa a malaˈosi, kawra paihkalay ko wacay itiniayto i kaˈayaw ko faelohay hekal.—Matay 24:32-34, 36; Dmak 1:7.

² Ano hakowaayto ko kahalafin itini kimad, kita kahacecay tamdaw mamipaˈicel to nika pakasoˈlin tonini a sakiˈok. Misamaanay hani? Samanen o tanoktokay a pakasoˈlinay falocoˈ mamalonay alatek. ‘O madoloay mifedfed kitanan a raraw’ ko cangoˈotay to pakasoˈlinay falocoˈ, hananay ni Pawlo. (Hipray 12:1) Saka ecaaw kalonay ko pakasoˈlinay falocoˈ no niyah, mamicerid kita a miharateng, iraay ko maanan a wacay, paihkal to kakalikito ira ko faelohay hekal.—Hipray 11:1.

3. Oniya lalakaw mamilengo to maanan hani?

³ Sapadamaaw kitanan, fanekfek ko nika pakasoˈlin to mikiˈokan ni Yihofa a faelohay hekal, oniya lalakaw mamilengo to tolo a pakayraan, paˈicel to pakasoˈlinay falocoˈ: (1) Ceriden miharateng ko milingatay to sapatefoc a demak. (2) Dotimen hakowaay ko kataˈangay no ˈicel ni Yihofa. (3) Limasmasen ko toki micerid mirienang to midokoay a demak. Mamilengoho konini lalakaw, o sapafeli ni Yihofa ci Hapakukan a lihaf, sasamaan paˈicel to pakasoˈlinay falocoˈ ita. Salakat nengnengen ita, itini maanan a pakayraan, o papairaen ita ko fanekfekay a pakasoˈlin to pakayniay i faelohay hekal a sakiˈok ni Yihofa.

PAIRAEN ITA KO FANEKFEKAY A PAKASOˈLINAY FALOCOˈ

4. O manan a sasaˈosien ko misaaliay to fanekfekay pakasoˈlinay falocoˈ hani?

⁴ To romiˈamiˈad pairaen ko fanekfekay a pakasoˈlinay a falocoˈ, hongaˈ citaneng ko saˈosi to demak. Oniya saˈosi milingatay to katayalan, salama, picudadan, raramod, wawa ato micawmaˈan a tamdaw. Licayen ko niyah: “O saˈosi ako paihkalay to, pakasoˈlinay kako toniya hekal cowato ko hahalafin, kakalikito kotayen no faelohay hekal no Kawas han? O harateng no roma a tamdaw, mapatayho ko tamdaw awaayto ko maanan, mafiyoray no mahaenay a harateng ko pisaˈosi ako han?” (Matay 6:19, 20; Luka 12:16-21) Ano fanekfekay pakasoˈlin kita to mangataayto ko faelohay hekal i, wa cacitanengto ko misaˈosian ita.

5-6. Tahalifa to sapalifet i, hano pairaen ita ko fanekfekay a noka pakasoˈlin hani? Tano tinakoen a mitadtad.

⁵ Misiˈayaw kita to sapalifet i, misaaliay to fanekfekay a pakasoˈlinay falocoˈ. Hakokay, halafinay a adada ato romaroma a pasangar, patoleday kitaanan alatek. Satapangho misetekay kita to falocoˈ a miemem to sapalifet, kawra tocerid halafinay ko sapalifet, mansa misaaliay kita to fanekfekay pakasoˈlinay a falocoˈ, hongaˈ padadotoc a mihadidi, lipahak a mihodop ci Yihofaan.—Loma 12:12; 1 Pitiro 1:6, 7.

⁶ Ano tahalifa kita to sapalifet i, alatek o faelohay hekal ni Yihofa cowato ko aaira, wa saan ko harateng, sakoniya sowal o malonayayto ko pakasoˈlin falocoˈ ita han? Awaay ko pinang. Tinakoen, ano pakidemto ko kasienawan, hato co:wato ko aaira ko kaciherangan wa saanto kita, ˈarawhan iraayto ko kaciherangan. Mahecaday, ano matoleday ko falocoˈ ita, alatek cowato ko aaira ko faelohay hekal, saan ko harateng. Kawra ano fanekfekay ko pakasoˈlin ita i, mamafanaˈ ko falocoˈ to papalaˈosien no Kawas ko mikiˈokan. (ˈOlic 94:3, 14, 15; Hipray 6:17-19) Ira ko mahaenay a pakasoˈlinay falocoˈ, wa ngaˈayto kita padadotoc paisalakat to midokoay ci Yihofaan a demak i nokaˈorip.

7. Aka mafiyor no masamaanay a harateng kita hani?

⁷ Mitosil kita i, pairaen ko fanekfekay a noka pakasoˈlin. Pakatengil ko ˈalomanay to ‘ngaˈayay lihaf no Hongti Kitakit’ i, tada makapahayto ko mikiˈokan no Kawas a faelohay hekal, kawra cowa ko mamalaˈosi sanay ko ˈalomanay. (Matay 24:14; Icikil 33:32) Aka papifiyoren ko hatiniay cisasaay a harateng to niyah! Padadotocen ita paˈicel ko pakasoˈlinay falocoˈ no niyah, dotoc nengnengen ita ko tolo a hapakayraan.

DOTIMEN KO MILINGATAY TO SAPATEFOC A DEMAK

8-9. Midotim to milingatay to sapatefoc a demak, sasamaan paˈicel to pakasoˈlinay falocoˈ ita hani?

⁸ O cecay sapaˈicel to pakasoˈlinay falocoˈ a pakayraan i, dotimen ko milingatay to sapatefoc a demak. Pakaynian no Kawas i sapatefoc a limasmas mikiˈok kitanan, o mamalaˈosi ko sakiˈok Ningra. Songilaˈen ita misimsim hano limasmasen no Kawas ko sapatefoc, ato o maanan ko kinafalahan Ningra, mihaen i, wa matongal ko pakasoˈlin ita to mikiˈokan Ningra, pakasoˈlin to mamilayap kita to midaˈocay a ˈorip itini faelohay a hekal. Hano mahaen ko sowal hani?

⁹ Sapalaˈosiaw to sapatefoc, o maanan ko kinafalahan ni Yihofa hani? Ocoran Ningra ko kaolahan a foseniˈan a Wawa, oya kanonoˈan a cafay Ningra, naitini i kakarayan tayni i fafekang no sera, mala o malefotay ko ˈorip a tamdaw. I fafekangho no sera ci Yis i, miememay to masakenakenaay a roray ato sapalifet, salikor mapasemsemay a mapatay. Tada taˈakayay ko kinafalah ni Yihofa! Haratengen hena, ano sapasinowayaw ko Kawas kitanan i kapotoˈay miheca ko kaˈorip, hano hayi sa Cingra pasemsem a mapatay ko kanonoˈan a Wawa Ningra hani? (Yohani 3:16; 1 Pitiro 1:18, 19) Ano maherekayto ci Yihofa milimasmas toniya matekesay a sapatefoc i, wa palaˈosien Ningra to mamicada kita to midaˈocay a ˈorip itini i faelohay a hekal.

DOTIMEN TO HAKOWAAY KO KATAˈANGAY NO ˈICEL NO KAWAS

10. Mikitini i Ifiso 3:20, iraay ko ˈicel ni Yihofa misamaan ko demak hani?

¹⁰ Sapaˈicelaw to pakasoˈlinay falocoˈ a saka tosa hapakayraan i, dotimen to hakowaay ko kataˈangay no ˈicel ni Yihofa. Iraay ko ˈicel Ningra palaˈosi to kahacecay mikiˈokan no Niyah. Soˈliˈlin miharateng ko ˈalomanay tamdaw, midaˈoc a maˈorip i faelohay hekal, cowa ko mamalaˈosi a mitiihan sanay, kawra aka a mapawan, o mikiˈokan ni Yihofa adihayay a demak, cowa ko mamadangar no tamdaw. Samanen o Malefotay ko ˈIcel a Kawas Cingra! (Yopu 42:2; Marko 10:27) Saka mikiˈok Cingra mamidemak to kasapaan a demak, coko mamadolo a demaken Ningra han?—ˈOsien ko Ifiso 3:20.

11. Na mikiˈokay ko Kawas to pina kafahkaˈan a sakiˈok, hadaken ko cecay tinakoan hena. (Nengnengen ko sapatongal lalakaw, “O Pina Kafahkaˈan a Sakiˈok Malaˈosiayto.”)

¹¹ I nolitengan, o sakiˈok ni Yihofa to finawlan Ningra itini pinengneng no tamdaw, cowa ko mamalaˈosi. Mikiˈokan Ningra koya matoˈasayto a Apraham aci Sara, o mamahofoc cangra to cecay a faˈinayan wawa. (Satapangan 17:15-17) Pasowalayho Cingra, aitini i Kanan a pala ko teloteloc ni Apraham. Nikawrira, halafinay mala koli ko Israil tamdaw i Icip. Itiya i, o sakiˈok no Kawas hato cowa ka laˈosi, ˈarawhan malaˈosiayto kona mikiˈokan ni Yihofa a demak. Ikor no pi:na miheca, milasilay ci Yihofa toya matoˈasayto ci Ilisapic, mamahofoc to cecay faˈinayan wawa. Hananayho ni Yihofa pasowal ko limocedan ci Mariya, cacipoyapoy cingra a mahofoc to Wawa no Kawas. Na hofocento konini Wawa i, oya mikiˈokan ni Yihofa i ˈayaw no pina caˈol a miheca i Itin, malaˈosiayto!—Satapangan 3:15.

12. Pakayni to ˈicel ni Yihofa, mikitini i Yosuwa 23:14 ato Isaya 55:10, 11, malifokay ita ko maanan a sakiˈok?

¹² Mitooran ni Yihofa ko sowal, palaˈosi to sakiˈok no Niyah. Ano rariden ita midotim koniya demak papaˈicel to nika pakasoˈlin, iraay ko ˈicel Ningra paira to faelohay a hekal. (ˈOsien ko Yosuwa 23:14; Isaya 55:10, 11.) Mihaen i, wa ngaˈayto kita padama to tao a pakahapinang, o mikiˈokan ni Yihofa a faelohay kakarayan ato faelohay sera, cowa ko mitiihan a sowal. Pakayni toniya sakiˈok, mikiˈokay Cingra: ‘Sahtoay o soˈlinay, o ngaˈayay tiˈeren.’—Paˈarawan 21:1, 5.

TAWLIKEN MIRIENANG KO MIDOKOAY A DEMAK

13. O saˈopo no kasakopang, samaanay patanoktok to pakasoˈlinay falocoˈ no mita hani? Tadtaden hena.

¹³ Paˈicel to pakasoˈlinay falocoˈ a saka tolo pakayraan, limasmasen ko toki micerid mirienang to midokoay a demak. Haratengen pakayni i saˈopo no kasakopang, o maanan ko macadaay ita a epoc. Fafahiyan salikaka ci Anna, pinaayto a poloˈ miheca, miemin to toki a mirienang to masasiromaay a tayal no likakawa, sanay cingra: “Patanoktokay to pakasoˈlinay falocoˈ ako ko saˈopo. Nolatekay cowa ka samaan ko sapakafanaˈ no mikimaday, anca matelangayto ko misowalan, maceriday ira ko mikidatay to harateng ako, padama takowanan matongal ko kacipinang to kimad no Fangcalay Cudad, paˈicel to pakasoˈlinay falocoˈ ako.”b O roma i, matengil ita ko sapacaˈof no salikaka i saˈopo, patanoktokay to pakasoˈlinay falocoˈ.—Loma 1:11, 12; 10:17.

14. O mitosilay tayal samaanay paˈicel to pakasoˈlinay falocoˈ ita?

¹⁴ Mirienang kita to mitosilay tayal mamitongal to pakasoˈlinay falocoˈ no niyah. (Hipray 10:23) Fafahiyan salikaka ci Papara, mataˈlifayto ko 70 mihecaan midoko ci Yihofaan, sanay cingra: “Mitosilay a tayal tada paˈicelay to pakasoˈlinay falocoˈ ako. Ano mararid kako malalengo to tamdaw to makapahay sakiˈok ni Yihofa, malingaday ko katanoktok no pakasoˈlinay falocoˈ ako.”

15. O notekedan a pikingkiw samaanay a paˈicel to pakasoˈlinay falocoˈ no mita hani? (Nengnengnen ko coka.)

¹⁵ O roma paˈicelay to pakasoˈlinay falocoˈ ita a midokoay a demak: o notekedan a pikingkiw. O harateng no fafahiyan salikaka ci Susan, saˈosien ko toki a mikingkiw, iraay ko epoc sanay, sowal ningra: “Itini i pilipayan, misadayay kako to anocila lipay a cacekiwen lalakaw no Mikecolay. Picecayan ato Pitosaan, wa misaday kako to lalakaw no Mitosilay ato Nikaˈorip a Saˈopo. I kalo a romiˈad i, misimsiman ako ko kaolahan a lalakaw a mikingkiw.” Mitooran ni Susan ko masaˈosiay a toki a mikingkiw, mansa matongal matongalayto ko pakasoˈlinay falocoˈ ningra. Fafahiyan salikaka ci Alin, pinaayto poloˈ a miheca matayal itini congpo, o harateng ningra, mikingkiw to sapairasol no Fangcalay Cudad, tada paˈicelay to pakasoˈlinay falocoˈ. Sowal ningra: “O mimingay a demak no sapairasol ni Yihofa, matatodongay a maemin, onini tada paˈicelay to pakasoˈlinay falocoˈ ako.”c

‘WA MALAˈOSI’ MAEMIN KO MIKIˈOKAN NO KAWAS!

16. O sakiˈok ni Yihofa cowa ko ci Hapakuk aca ko pafelian, mahawpay kita maemin. Hano mafanaˈ kita hani? (Hipray 10:36, 37)

¹⁶ ˈAlomanay midokoay to Kawas a tamdaw, halafinayto ko tatokian a mitala to kalahcian noniya lekakawa. I pinengneng no tamdaw, hato manayaray ko Kawas palaˈosi to mikiˈokan no Niyah. Kawra, cipinangay ci Yihofa to nafalocoˈan no finawlan Ningra. Na mikiˈokan Ningra ko pairasolay ci Hapakuk: ‘Wa i matatodongay a tatokian malaˈosi ko mapolosi a pasayra i tolas, cowa ko makaniway. Soˈlin hato manayarayto i, halamhamenho a mitala! Samanen wa malaˈosi maemin, cowa ko mamanayar ko romiˈad!’ (Hapakuk 2:3) Itini sakayat no Kawas, misaka dademakan no tarokos ci Pawlo konini a sowal, pakalalok to halamhamay a mitala to faelohay hekal a Krisciyang. (ˈOsien ko Hipray 10:36, 37.) Oniya sapairasol cowa ko pipasowal aca ci Hapakukan, mikiˈokayho ko Kawas kitanan maemin. Mansa pakasoˈlinay kita to mamilidong ko Kawas kitanan, ano hato manayaray nengnengen, wa ‘malaˈosi maemin, cowa ko mamanayar ko romiˈad!’

17. Cecay fafahiyan salikaka samaanay cingra midoedo to sapalimoˈot ni Yihofa ci Hapakukan?

¹⁷ Pinaayto a poloˈ mihecaan, ˈalomanay tamdaw kamayan a midoedo to sapalimoˈot ni Yihofa, ‘halamhamay a mitala’ toha kalaˈosian no mikiˈokan ni Yihofa a romiˈad. Mikitini i 1939 miheca, fafahiyan salikaka ci Luis satapangayto mihodop ci Yihofaan, sowal ningra: “Itiya, itini ˈayaw no micudiyap i kawcong wa irato ko Armakiton, sanay ko harateng ako, ˈarawhan awaayho. Mahapinangay ako, ˈalomanay sikawdan i Fangcalay Cudad, halafinay a mitala ngaˈ macadaay ko sapalifon ni Yihofa, mahawpay ci Nowa, Apraham aci Yosif. Miˈosi to nalifetan nangra taˈangayay ko sapadama takowanan. Misarocod a mitala to sapalaˈosiaw ni Yihofa to sakiˈok, ngaˈayto kako ato romaroma tamdaw padadotoc a misamacay, cowato ka ciharateng to mara:ayayho ko faelohay hekal.” ˈAlomanay madimadiay a mihodop ci Yihofaan a tamdaw, mahecaday ko harateng nangra.

18. Minengneng to masangaˈay a kihcod, hano mamatongal ko pakasoˈlin ita, o aira ko faelohay a hekal?

¹⁸ Soˈlin caho ka ira ko faelohay hekal, kawra nengnengen hena ko foˈifoˈis, kilang, pinaˈorip ato i tatihiay a tamdaw. Na awaayho koniya kihcod, nohatini soˈlinayto a ira, samanen sahtoay o misangaˈan ni Yihofa konini. (Satapangan 1:1, 26, 27) Misaˈosiay ko Kawas ita patireng to faelohay hekal, wa palaˈosien Ningra koniya araaw. I faelohay a hekal, wa malefotto ko tireng ita, milayap to midaˈocay a ˈorip. Itini misaˈosian no Kawas a tatokian, wa malaˈosito ko faelohay hekal, mahecad o maˈaraway ita nohatini a kasapaan a dohaw.—Isaya 65:17; Paˈarawan 21:3, 4.

19. Sasamaan kiso paˈicel to pakasoˈlinay falocoˈ no niyah hani?

¹⁹ Itini pitalaan a tatokian, sakadademaken ko toki a paˈicel to pakasoˈlinay falocoˈ no niyah. Rariden a miharateng ko milingatay to sapatefoc a demak, pakayni ko piakoˈid ci Yihofaan. Dotimen to hakowaay ko taˈangay no ˈicel ni Yihofa, tawliken a mirienang ko midokoay a demak. Mihaen i, wa ngaˈayto kiso ‘pakayni i pakasoˈlinay falocoˈ ato mihadidiay, malo milifokay to sakiˈok a tamdaw.’—Hipray 6:11, 12; Loma 5:5.