Mamadangar Iso ko Noˈadingoan a Patosokan!

1. Kita ˈalomanay tamdaw tahasiˈayaway to maanan a pasangaray hani?

NA PATIRENGAY kiso to patosokan itini i midokoay a demak, kawra ikor mahapinangay pasangaray malaˈosi han?b Ano mahaenay i, aka matoled ko falocoˈ, malifaay no ˈalomanay tamdaw konini. Tinakoen, ci Filip miharatengay to sakararidaw a mitolon ato sapisalofaw to kangaˈay no pitolon, kawra pasangaran nanay cingra mikilim to toki mitolon. Ci Aylika patirengay to patosokan mitoor to toki mirienang to ˈayaw no mitosilay a saˈopo, kawra manaˈonayto cingra. Ci Tomasem kinapinapinaay sapilahciaw miˈosi to Fangcalay Cudad, kawra sanay cingra: “Kinatoloay kako mitanam, ˈarawhan tahiraay aca i Lifi ko kapiˈosi ako. Cowa ka rihakeden kako a miˈosi to Fangcalay Cudad.”

2. Ano iraay ko cecay patosokan no mita samaamaanen cowa ka madangar i, hano cowa ko mamasawi ko falocoˈ?

² Ano iraay ko cecay patosokan iso samaamaanen cowa ka madangar, aka masawi, o mapadikay kiso cowa ka saan konini. Tohati:niay, ano sapilaˈosiaw to cecay kantangay a patosokan, misaaliay to adihayay a toki ato nika pisaˈicel. ˈArawhan cowa ka pisawad kiso tora patosokan, paihkalay konini to misakaretengay kiso to kalalaˈed aci Yihofa, sapafeliaw Cingranan to sangaˈayay. Misalimlaan ni Yihofa ko mihadakan iso a ˈicel, hanaca cowa pisaali tisowanan midemak to caay ko mamadangar iso a demak. (ˈOlic 103:14; Mika 6:8) Mihaenay i, patatodongen ko patosokan iso, tooren ko mamadangar iso a demak. Ano iraay ko mahaenay a patosokan iso i, sasamaan palaˈosi hani? Dotoc mamilengo kita to pina hapakayraan.

MICIKELOHAY A ˈICEL TADA MASAKALIMLAAN

3. O micikelohay a ˈicel hano tada masakalimlaan?

³ Ano sapalaˈosiaw kita to patosokan itini midokoay a demak i, ira ko micikelohay a ˈicel tada masakalimlaan. O tamdaw ano iraay ko micikelohay a ˈicel taˈangayay ko kalim no falocoˈ, palaˈosi to patosokan no niyah. Ngaˈayay patinakoen ita ko micikelohay a ˈicel to fali, micikelohay ko fali to cifayangay a tamina talaˈayaw. Ano padadotoc a miˈiyof ko fali i, tatahirato i kahiceraan ko cifayangay a tamina. Ano ciˈicelay ko fali miˈiyof i, kalikiay tangasa i kahiceraan ko tamina. Hatiraay, ano iraay ko micikelohay a ˈicel kitaanan i, o mamalaˈosi ko patosokan. Itiniay i Saewato a salikaka ci Tafiti, sanay ko sowal: “Ano iraay ko micikelohay a ˈicel i tisowanan i, mamisaˈicel a palaˈosi kiso to patosokan, cowa ko papicoˈayen ko maamaan a demakan.” Sasamaan kita ngaˈ ira ko micikelohay a ˈicel hani?

4. Ngangaˈay kita mitolon micangacang to maanan a demak hani? (Filipi 2:13) (Nengnengen ko coka.)

⁴ Micangacang mitolon ci Yihofaan patongal to micikelohay a ˈicel tisowanan. Ci Yihofa tatano fangcalay saocor mikowad tisowanan palaˈosi to patosokan. (ˈOsien ko Filipi 2:13.) Nolatekay, patirengay kita to cecay patosokan, samanen oha mamihaehaen aca to demak saan kita alatek, o ngaˈayay konini, kawra cowa pisasoˈlin to sapilahciaw tonini a patosokan kita alatek. Itini Okanta a fafahiyan salikaka ci Nolina iraay ko mahaenay a nalifetan. Na patirengay cingra to patosokan to sapisikayaw to pacekiway to Fangcalay Cudad, kawra awaay ko micikelohay a ˈicel cingranan palaˈosi tonini a patosokan, samanen cowa ka edeng ko ˈicel ako, cowa ko ngaˈayay a singsi kako sanay a miharateng. O maananto ko padamaay cingranan hani? Sanay ko sowal ningra: “Misatapangay kako mitolon ci Yihofaan to romiˈamiˈad, micangacang Cingranan padama takowanan ira ko kalim no falocoˈ misikay to pacekiway. O roma i, pahecadan ako to satolon a midemak, misaˈicel a misalof to pasifanaˈay a inaneng no niyah. Ikor no pina folad, mahapinangay ako matongalayto ko kalim no mako. Tiya mihecaan, iraayto ko tosa a mipacekiwan ako a sito.”

5. Ano sakairaaw no micikelohay a ˈicel i kitaanan, simsimen ko maanan a demak hani?

⁵ Simsimen ko nidemakan ni Yihofa saki tisowanan. (ˈOlic 143:5) Ta maharateng ni Pawlo ko patalahkalan ni Yihofa a sidaˈit cingranan i, makowaday ko falocoˈ, sapisarocodaw a matayal saki Yihofaan. (1 Korinto 15:9, 10; 1 Timoti 1:12-14) Mahecaday, ano rariden a miharateng ko nidemakan ni Yihofa saki tisowanan i, wa irato ko micikelohay a ˈicel malaˈosi ko patosokan. (ˈOlic 116:12) Nengnengen ko cecay fafahiyan salikaka i Hongtolas, samaanay a malaˈosi ko patosokan mala miceriday misakafahay. Sowal sa cingra: “Misimsimay kako to hakowaay ko nika olah ni Yihofa takowanan. Mikeridan Ningra kako mafanaˈ to finawlan Ningra, midimokos Cingra midipot takowanan. O mahaenay noka pisimsim matongalay ko olah ako Cingranan, hato ciharatengayto kako malo miceriday misakafahay.”

6. Sasamaan mitongal to micikelohay a ˈicel i kitaanan?

⁶ Rariden a miharateng ano malaˈosi ko patosokan pairaay to maanan a epoc. Nengnengen ci Aylika samaanay malaˈosi ko mitooray to toki a patosokan ningra. Sowal sa: “Mahapinangay ako, ano maosoy kako to mitosilay a demak i, adihayay ko malawaay ako. Ano kahnay kako tahira i, ngaˈayay mihamham kako to salikaka, caciyaw cangranan. Matengilay ko ciepocay a sapaini, padama takowanan maolah to mitosilay, ato macakat ko inaneng a mitosil.” Raridan ni Aylika miharateng ko epoc no mitooray to toki, taˈangayay ko nika padama cingranan, ikor malaˈosiayto ko patosokan ningra. Ngaˈayay kiso mararid a miharateng, ano malaˈosi ko patosokan iraay ko maanan a epoc i tisowanan? Tinakoen, ano sapisalofaw kiso to nika picekiw anca pacakat to nika ngaˈay no pitolon i, saharateratengen mihaen kiso samaanay a pakedec to kalawidang aci Yihofa. (ˈOlic 145:18, 19) O patosokan iso ano sapalahadaw to maanan a capeling no Krisciyang, haratengen samaanay a misalof konini to kalalaˈed iso ato tao. (Kolosay 3:14) Ngaˈayay tiliden ko lalangian no patosokan iso, ikor rariden a minengneng kora mitilidan iso. Ci Tomasem sanay cingra: “Ano adihayay ko lalangian ako to sapalaˈosiaw to maanan a patosokan i, cowato ko sapisawadaw.”

7. O maanan ko padamaay ci Holiawan ato fafahi ningra malaˈosi ko patosokan?

⁷ Micawmaˈ toya mamikowad tisowanan a tamdaw. (Taneng 13:20) Ci Holiaw ato fafahi ningra sakalinahaw tayra to misaaliay to mitosilay a kilac, nengnengen samaanay palaˈosi cangra to patosokan. Sanay ci Holiaw: “Mipiliˈan niyam ko mamidama tamiyanan a widang, lengoen cangra to patosokan niyam. ˈAlomanay nangra malaˈosiayto ko mahaenay a patosokan, mansa ngaˈayay pafeli tamiyanan to ciepocay a sapaini. Milicayay cangra tamiyanan to samaanayto ko kalingad no limasmas niyam, ano ira ko saali niyam i, padadotocay cangra pakalalok tamiyanan.”

SOˈLINTO AWA KO MICIKELOHAY A ˈICEL, KAMAYAN A MISAˈICEL

8. Irato ko micikelohay a ˈicel ngaˈ malaˈosi ko patosokan ano sa i, aira ko maanan a teloc hani? (Nengnengen ko coka.)

⁸ Soˈlinay haw i, latek awaay ko micikelohay a ˈicel no mita. Ano mahaen i, cowa ito ko mamalaˈosi ko patosokan han? Cowa ka hatira. Patinakoen ita hena, o fali hananay i, o taˈangayay a micikelohay a ˈicel, micikelohay to cifayangay a tamina tangasa i kahiceraan. Kawra cowa ka hecad ko ˈicel no fali to romiˈamiˈad, latekay awaay ko temitemik no fali. Awaayto ko pakayraan no tamina talaˈayaw sanay han? Cowa. O romaroma cifayangay a tamina iraay ko mota, o roma iraay ko sapiˈiwas no tamina. Ngaˈayay sakadademaken ko hatiniay a lalosidan padadotoc a talaˈayaw, saikor tangasato i kahiceraan. O micikelohay a ˈicel mahecaday o fali, latekay ciˈicelay, latekay caay ka ciˈicel, latekay awaay ko temitemik. Ano irato ko micikelohay a ˈicel ngaˈ talaˈayaw kita ano sa i, cowa ito ko tatahira i kahiceraan kira. Ngaˈayay tano romaroma a pakayraan parakat to tamina, kitato i, ano cangoˈotay to micikelohay a ˈicel, ngaˈayayho padadotoc a mitoor to patosokan. Mihaen to demak pairaen ko kodaitay, kawra airato ko minaroˈan iso. ˈAyaw no mamilengo to sasamaan ko demak i, nengnengenho ita latek aira ko maanan a sasa no falocoˈ no roma tamdaw.

9. Ano awato ko micikelohay a ˈicel i, kamayanho a padadotoc palaˈosi to patosokan, o mararaway a demak konini han? Tadtaden.

⁹ Halamhamay ci Yihofa lipahak makalim a midoko kita Cingranan. (ˈOlic 100:2; 2 Korinto 9:7) Ano mahaenay i, awa ko micikelohay a ˈicel ita ngangaˈayho padadotoc a malaˈosi ko patosokan han? Haratengen ko tinakoan ni Pawlo. Sanay ko sowal ningra: ‘Padadotocen ako a misaˈicel mirikec ko tireng no niyah, ho mala mitengilay a koli ko tireng.’ (1 Korinto 9:25-27 ato roma pihongyak.) Nolatekay, soˈlinto awaay ko harateng ni Pawlo to sapidemakaw to demak ni Yihofa, kamayanay pacieci to niyahan a midemak. Mihaen to demak cingra mihaydaan ni Yihofa han? Hayi, manaeca! Pafelian ni Yihofa to taˈangayay a sapalifon cingra.—2 Timoti 4:7, 8.

10. Soˈlinto awaay ko micikelohay a ˈicel kamayan padadotoc palaˈosi to patosokan i, papaira to maanan a epoc hani?

¹⁰ Malecaday, maˈaraw ni Yihofa kita awaawa ko micikelohay a ˈicel padadotocayho a palaˈosi to patosokan i, o lalipahak Cingra. Mafanaˈay Cingra nolatek midemak kita to maanan a demak, cowa ko nika olah ita a midemak tora demak, ao Cingra ko kaolahan ita. Ci Yihofa pakayniay pisaˈicel ita a palemed kitaanan, matira pipalifon Ningra ci Pawloan. (ˈOlic 126:5) Ano matinako ita ko pipalemed ni Yihofa i, latek irato ko micikelohay a ˈicel ita. Itiniay i Polan a fafahiyan salikaka ci Locina sanay ko sowal: “Nolatekay awaay ko harateng ako masadak a mitosil, mangalefay ano malotay kako i, awaayto ko micikelohay a ˈicel. Kawra, maharekto mitosil i, lipahakan nanayto kako. Tada kafahkaˈan a sapakaolah konini.” Dotoc i, lengoen ita ano cangoˈot ko micikelohay a ˈicel i, sasamaan ko demak ita.

11. Sasamaan ci Yihofa padama kitaanan mitongal to miˈimeray to niyah?

¹¹ Mitolon micangacang to sapiˈimeraw to niyah. Miˈimeray to niyah hananay i, o pakaˈemetay to harateng ato waywayan a ˈicel. Onini a tilid maharatengay ita, mamiˈimer ko niyah to sakaecaaw ka pidemak to mararaway a demak. Nikawrira, ano sapidemakaw to matatodongay a demak i, mamiˈimer to niyah, mangalefay ano pasangar ko ˈinorong, anoca awaay ko micikelohay a ˈicel ita i, tada mihaen kita a miˈimer to niyah. Haratengen, o miˈimeray to niyah i, o cecay a minaroˈan no fangcalay saocor. Mankora, cangacangen ci Yihofa pafeli to fangcalay saocor padama tisowanan palahad tonini masakalimlaan a capeling. (Luka 11:13; Kalatiya 5:22, 23) Ci Tafiti miharatengay to sapiceridaw a micekiw to Fangcalay Cudad, somowalay to mitolonay samaanay padama cingranan, sanay: “Micangacangan ako ci Yihofa padama takowanan palahad to miˈimeray to niyah. Itini sapadama Ningra, milimasmasayto kako to ngaˈayay a noka picekiw, hanaca kodaitay a padadotoc.”

12. Sapalaˈosiaw to patosokan, misinanot to safalod no Patnakay 11:4 sasamaan padama tisowanan?

¹² Sadayenho ko kihcod ngaˈ miteka a midemak, aka pihaen. Onini a hekal awaay ko malefotay a pakayraan. Ano tatala han ita ko malefotay a pakayraan i, cowa ito ko mamalaˈosi ko patosokan. (ˈOsien ko Patnakay 11:4.) Sanay ko sowal no salikaka ci Taniil: “Awaay ko malefotay hananay a pakayraan. Sadayenho ko kihcod ngaˈ midemak, aka pihaen, teka hanto a midemak.” Itini Okanta salikaka ci Pawlo somowalay, aka pinayar to demak sanay: “Soˈlinto cowa ka dolo ko pakayraan, satapang hanto ita a midemak, wa irato ko lalangian ni Yihofa palemed kitaanan.”—Malaki 3:10.

13. Mikitini mimingay a patosokan misatapang a midemak hano o ngaˈayay hani?

¹³ Mikitini mimingay a demak misatapang. Ano cangoˈot kita to micikelohay a ˈicel, alatek pasangaray a palaˈosi to patosokan. Ano mahaenay kiso i, ngaˈayay folfolen a misamiming ko patosokan han? Tinakoen, o patosokan iso ano sapalahadaw to maanan a capeling, tanamen itini mimingay a demak patalahkal tonini a capeling. O patosokan iso ano sapilahciaw a miˈosi to Fangcalay Cudad i, saˈayaw tanamen a miˈosi ko miming aca. Ci Tomasem ciharatengay to sapilahciaw miˈosi to Fangcalay Cudad ilalomaˈ no cecay miheca, ˈarawhan pasangaran nanay a palaˈosi tonini a patosokan. Sowal sa cingra: “Tada kalikiay kora misilsilan ako. Oranto minaˈonan ako miliyaw a miˈosi, ora silsil i, cecay romiˈad pinaay aca sinael ko miˈosian, ikor misongilaˈan a midotim. Telocto i, mahemekan nanayto kako a micekiw.” Maolah maolahayto ci Tomasem a micekiw, misatapangayto sapiˈosiaw to adihayay. Oranto, malahciayto miˈosi ko kihcod a Fangcalay Cudad.c

TAHALIFA TO PASANGARAY, AKA A MATOLED

14. Tatahalifa kita to maanan a pasangaray hani?

¹⁴ Ano hakowaayto ko micikelohay a ˈicel ato piˈimer ita, tatahalifaho to pasangaray alatek. Tinakoen, o ‘cowa ka harateng ita a pakayraan’ mamiˈafas to toki ita alatek, miconged kitaanan palaˈosi to patosokan. (Patnakay 9:11) Tatahalifa kita to pasangaray alatek, telocto matoleday ko falocoˈ, awaayto ko ˈicel. (Taneng 24:10) Cowa ko malefotay kita, latekay mararaway ko demak, micongeday kitaanan palaˈosi to patosokan. (Loma 7:23) Anca malotayan nanay ko piharateng ita. (Matay 26:43) Ano mahaenay i, samaan ko pidemak ita ngaˈ padadotoc a talaˈayaw hani?

15. Tahalifa kita to pasangaray o mapadikayto sanay han? Tadtaden. (ˈOlic 145:14)

¹⁵ Haratengen, tahalifa to pasangar o mapadikay cowa ka saan. Sowal no Fangcalay Cudad, wa kinapinapina kita tahalifa to pasangaray alatek. Nikawrira ihkalay ko Fangcalay Cudad a pasowal, itini sapadama ni Yihofa, ngangaˈay kita miliyaw a tomireng. (ˈOsien ko ˈOlic 145:14.) O sowal no salikaka ci Filip: “Ano kinapinato a mapolin, mapadikay kako cowa ka saan miharateng. Ano kinapinato a mapolin miliyaw a tomireng i, o malaˈosiayto kako.” Ci Tafiti sanay ko sowal: “Minengneng kako i, o pasangaray cowa ko sacona, ao sapiliyawaw a toki, misawacay to hakowaay ko nika olah no niyah ci Yihofaan.” Hayi, soˈlinto tahalifa kiso to pasangar padadotoc a talaˈayaw, ngaˈayayto kiso misawacay to ciharatengay to sapahemekaw ci Yihofaan. Maˈaraw ni Yihofa ko nika pisaˈicel iso palaˈosi to patosokan no niyah, maedeng taˈangayay ko hemek Ningra.

16. Mikitini pasangaray mamananam ita ko maanan?

¹⁶ Sapihatatanamaw a toki ko pasangaray han a minengneng. Ngaˈayay haratengen o maanan a lalangian ko sakaira no pasangaray, dotoc licayen ko niyah: “Sasamaan kako miliyas eca ka tahalifa to malecaday a pasangaray hani?” (Taneng 27:12) Latekay, o pasangaray padamaay kitaanan mihapinang, cowa ka tatodong ko patosokan no niyah. Mahaenay ko pakayraan no niyah ano saan kiso miharateng i, liyawen a mihapinang, onini a patosokan kamayan ngaˈay demaken iso hokira.d Ano eca ka laˈosi iso ko cecay mitaˈlifay to ˈicel iso a patosokan i, o mapadikayto kiso cowa ka saan ci Yihofa.—2 Korinto 8:12.

17. Hano mamiharateng kita to malahciayto no niyah a demak?

¹⁷ Haratengen ko malahciayto iso a demak. Sowal no Fangcalay Cudad: ‘O moecelay ko Kawas, cowa ko mamapawan Ningra ko nano demak namo.’ (Hipray 6:10) Mankora, kisoto i, aka mapawan. Haratengen ko malahciayto iso a demak: Latek o nika palahad iso to kalawidang ci Yihofaan, latek pasowalanto iso ko tao pakayniay ci Yihofaan a demak, latek malaˈosiayto ko micadaay to paputisem a patosokan. Toniya mataˈlifay a mihecaan, padadotocay kiso a macakat, matoorayto iso ko pina patosokan itini pidoko to Kawas. Nohatini, ngangaˈay kiso padadotoc a macakat, pasayra to kaˈayaway iso a patosokan talaˈayaw.—Filipi 3:16.

18. Itini kalingad no pipalaˈosi to patosokan i, haharatengen ita ko maanan? (Nengnengen ko coka.)

¹⁸ Ira ko sapadama ni Yihofa, o ngangaˈay malaˈosi iso ko patosokan. Itiya, maedeng o lalipahak kiso, malecad o parakatay to tamina tahira i kahiceraan i, tada lipahakay cangra. Nikawrira aka mapawan, ˈalomanay tamdaw mahemekan nanay to kalingad no tamina. Mihaenay, sinanoten samaanay ci Yihofa padama tisowanan ato palemed tisowanan, ano mihaen i, itini kalingad no pipalaˈosi iso to patosokan, o lalipahak ko harateng. (2 Korinto 4:7) Ano caka pisawad kiso, o papafelien ni Yihofa kiso to adihayay a sapalemed.—Kalatiya 6:9.