Pakayni Taˈangayay Padiing Maherekayto Kiso Misaday Han?

1. Maherekayto a misaday pakayni i pades hano o citanengay hani?

ANO maherekto a misaday o ngangaˈay madipot ko ˈorip. Tinakoen mafekad ko pades i, o maherekayto a misaday a tamdaw, iraayto ko hapakayraan a maˈorip, latek iraho ko ˈicel mipadang to tao. O mipadangay to mapadesay a lekakawa i Iwropa sanay ko sowal: “O misongilaˈay a misaday a demak milingatay to sakaˈoripaw.”

2. Hano mamisongilaˈ kita a misaday pakayni i taˈangayay padiing hani? (Matay 24:44)

² Wa fahal sa ira ko ‘taˈangayay padiing.’ (Matay 24:21) Kawra cowa ka lecad to adihayay a pades, ano irato ko taˈangayay padiing i, iraayto ko maherekayto a misaday a tamdaw. Maedeng ˈayaw no 2,000 miheca, patalipaˈelalanto ni Yis ko nisawawaan papisongilaˈ a misaday. (ˈOsien ko Matay 24:44.) Ano masongilaˈto ita a misaday i, o mamadoloto milakowit tora pasangaray a lintad, wa ngaˈayho mipadang to tao.—Luka 21:36.

3. Ano sapisongilaˈaw misaday pakayni i taˈangayay padiing, hano papalahad to mihadidiay, siniˈadaay ato ciolahay falocoˈ hani?

³ Ano sapisongilaˈaw kita a misaday pakayni i taˈangayay padiing i, mamipalahad to tolo capeling. Haratengen hena, ano midofdof kita to sakayat, mamilasil to cecay sapisawkit a lihaf, kawra misafelitay ko tamdaw kitaanan, sasamaanto hani? (Paˈarawan 16:21) Ano sapidofdofaw kita ci Yihofaan, oha mamihadidi, pakasoˈlin Cingranan mamidipot kitaanan. Itiya, ano malahdaw ko dafong no salikaka i, mamisamaanto kita hani? (Hapakuk 3:17, 18) Ano sapitangsolaw mipadang cangranan i, ira ko siniˈadaay falocoˈ. Ano makakapot ko kasakitakit miˈodis kitaanan i, latek oha kakalacafay kita to salikaka milimek to cecay a liyad, itiyato i, mamisamaan kita misiˈayaw to mahaenay a pakayraan hani? (Icikil 38:10-12) Ano sapikalacafayaw kita cangranan milakowit to pasangar i, papairaen ko ciolahay falocoˈ.

4. O maanan a sinael paihkalay to papadadotoc kita palahad to mihadidiay, siniˈadaay ato ciolahay falocoˈ?

⁴ Pakalalokay ko Fangcalay Cudad kitaanan padadotoc palahad to mihadidiay, siniˈadaay ato ciolahay falocoˈ. Luka 21:19 sanay: ‘Ano mihadidi kamo, o mamadipot ko ˈorip.’ Kolosay 3:12 sanay: ‘Caˈedongen ko . . . siniˈadaay falocoˈ.’ Saka 1 Tisalonika 4:9, 10 sanay: ‘Maherekayto ko Kawas pasifanaˈ i tamowanan, ka masasiolah. . . . Kawra salikakaaw, palimoˈot kami tamowanan ka padadotoc mihaen to demak, hanaca masongilaˈ ko pidemak.’ Onini a sinael somowalay toya saka 1 hahekalan, patalahkalayto tonini tolo capeling a Krisciyang, kawra papadadotocho palahad tonini a capeling. Ano kitato i, mamihaen to demak. Dotoc, nengnengen ita ko saka 1 hahekalan a Krisciyang, samaanay cangra patalahkal tonini a capeling, ikorto nengnengen, sasamaan kita mitodong cangranan, ho ngaˈay maherek a misaday pakayni i taˈangayay padiing.

PADADOTOC PALAHAD TO MIHADIDIAY

5. Itini sapalifet o saka 1 hahekalan a Krisciyang samaanay padadotoc mihadidi hani?

⁵ Oha mamihadidi ko saka 1 hahekalan Krisciyang. (Hipray 10:36) Cowa ko mamisiˈayaw aca cangra to pasangar no kalo a tamdaw, pakayniho i pihakelongan tahalifa to romaroma a pasangar. O ˈalomanay Krisciyang tahacadaay to piroero no kakeridan no Yutaya ato sifo no Loma, tahacadaayho cangra to pisafelit no paro no lomaˈ. (Matay 10:21) Latekay, o mamicoˈay cangra to pifiyor no mitowakangay to kimad a tamdaw, samanen itini i kasakopang milosiyangay to mararaway kimad, mikidat to sakaliwasakaw. (Dmak 20:29, 30) Kawra, padadotocay cangra mihadidi. (Paˈarawan 2:3) Samaanay ko pidemak nangra hani? Midotimay cangra to mihadidiay a taˈarawan i Fangcalay Cudad, tinakoen ci Yopu. (Yakop 5:10, 11) Mitolonayho cangra micangacang to Kawas pafeli to ˈicel. (Dmak 4:29-31) Misamacayay cangra to ngaˈayay a teloc noka pihadidi.—Dmak 5:41.

6. Mikitini ci Militaan mananamay iso ko maanan hani?

⁶ O Fangcalay Cudad ato mitepangan a cudad adihayay ko padadotocay mihadidi a tinakoan, ano mararid kita minanam tonini a taˈarawan, hanaca misongilaˈ a midotim, o ngangaˈay padadotoc mihadidi. O fafahiyan salikaka ci Milita itiniay i Alpania ko ˈalo, mahaenay ko pidemak, mansa pakahadidiay to pakidemay pisafelit no paro no lomaˈ. Sanay cingra: “Micekiway kako to pakayniay ci Yopuan a maˈoningay i Fangcalay Cudad, tada masemeray kako. Adihayay ko macadaay ningra a roray, hanaca cowa ka fanaˈ to cima ko pairaay tonini a sapalifet, kawra sanay ko sowal ni Yopu: ‘Tahira i patay cowa ko mamifalah kako to nika madimadi to Kawas!’ (Yopu 27:5) Haratengen ko macadaay ako a sapalifet caay ka pakalalini to macadaay ni Yopu. Roma i, mafanaˈay kako o cima ko miowingay i lalikor.”

7. Soˈliˈlin cowa ka tahalifa kita nohatini to pakidemay a sapalifet, maminanamho samaan ko pidemak hani?

⁷ Sapadadotocaw palahad to mihadidiay, ngaˈay kita micerid pasayra ci Yihofaan mikifalocoˈ a mitolon, pasowalen Cingra to i falocoˈay a cariraw no niyah. (Filipi 4:6; 1 Tisalonika 5:17) Cowa ka tahalifa kiso nohatini to pakidemay a sapalifet alatek, kawra ano marorayan nanay kiso, maohotay anca taˈangayay ko saroero i, pasayraay kiso ci Yihofaan micangacang to sapadama hokira? Ano miceridayto kiso anini micangacang to sapadama ni Yihofa misiˈayaw to pasangar to romiˈamiˈad, ano tahalifa to taˈangayay sapalifet noikor i, cowato ko cacisasa kiso pasayra ci Yihofaan micangacang to sapadama. Itiya o papakasoˈlin kiso, mafanaˈay Cingra ihacowa a tatokian ato tano maanan a pakayraan padama tisowanan o sangaˈayay.—ˈOlic 27:1, 3.

8. Samaanay paihkal ko nalifetan ni Mira, ano malaˈosi kita mihadidi to sapalifet nohatini, wa madoloto padadotoc mihadidi noikor? (Yakop 1:2-4) (Nengnengen ko coka.)

⁸ Ano aniniho minanamto kita mihadidi, noikor mifekad ko taˈangayay padiing i, oha ngangaˈayto padadotoc mihadidi. (Loma 5:3) Hano saan ko sowal hani? Mahapinangay no ˈalomanay salikaka, mitadiˈec cangra to sapadama ni Yihofa mihadidi to cecay sapalifet ikor, mamatongal ko pakasoˈlin to mamidama ko Kawas cangranan, o mahaenay a pakasoˈlin papadama cangranan malaˈosi ko pisiˈayaw to noikoran a sapalifet. (ˈOsien ko Yakop 1:2-4.) Fafahiyan salikaka ci Mira o misakafahay itini Alpania iraay ko mahaenay nalifetan. Latekay awaay ko tao malecaday cingranan adihay ko masiˈayaway a pasangar saan miharateng, kawra tikolen ningra miharateng i mataˈlifayto 20 mihecaan, hakowaay ko sapadama ni Yihofa cingranan, sanayto pasowal to niyah: “Ka tahatolas kiso madimadi. Adihayay a mihecaan, padamaan ni Yihofa kiso pakalowid to adihayay lalooden, aka pakatoled Cingranan, misaloyaˈ to na misadakan Ningra a sadama.” Wa ngaˈayho kiso misongilaˈ miharateng samaanay ci Yihofa padama tisowanan mihadidi to sapalifet. Pasoˈlinen, o kahacecay pihadidi iso to sapalifet maˈaraway Ningra maemin, hanaca o papalifon tisowanan. (Matay 5:10-12) Mihaenay i, ˈayaw no mifekad ko taˈangayay padiing i, maherekayto kiso minanam mihadidi, hanaca mamisetek to falocoˈ padadotoc mihadidi i taˈangayay padiing.

PATALAHKAL TO SINIˈADAAY FALOCOˈ

9. Itiniay Siriya Antiok a kasakopang samaanay patalahkal to siniˈadaay falocoˈ hani?

⁹ Isaka 1 hahekalan, pakidemay ko kedal itini Yutiya. Matengil no itiniay Siriya Antiok a kasakopang konini a demak ikor, maedeng pasangaray ko kaˈorip no Yutiyaay salikaka saan miharateng. Orato, palawaywayan nangra ko siniˈadaay falocoˈ, misaˈosiay ko kahacecay nangra ‘mitoor to ˈicel no niyah pakiyaho to sadama a dafong, pafeli to itiniay i Yutiya a salikaka.’ (Dmak 11:27-30) Soˈlin miraayay to tahapadesay a salikaka, o itiniay i Antiok a Krisciyang kamayan mihadak to sapadama.—1 Yohani 3:17, 18.

10. Sasamaan kita pasayra i tahapadesay a salikaka patalahkal to siniˈadaay falocoˈ? (Nengnengen ko coka.)

¹⁰ Anini, wa ngaˈay kita pasayra i tahapadesay a salikaka patalahkal to siniˈadaay falocoˈ. Oha tatangsol kita a midemak. Samaan ko pidemak hani? Ngaˈayay licayen ko malohemay malitengay ngangaˈay kita mirienang to cecay padamaay to tahapadesay a demak hokira, wa ngaˈayho pakiyaho midama to polong no hekal a tayal, hanaca patado to tahapadesay a salikaka mitolon.b (Taneng 17:17) ˈAlomanay salikaka mirienangay to padamaay to tahapadesay a tayal, tinakoen itini 2020 miheca, samanen matenakay ko 2019 a lifong, polong no hekal patirengay to 950 Padamaay to Tahapadesay a Iingkay midimokos to misaaliay a salikaka. O mikifalocoˈay a siniˈada nangra palilamay to sadama a dafong, hanaca padama to tahapadesay a tamdaw padadotoc midoko ci Yihofaan. Itini roma pakayraan, mitomadaway anca miliyaway patireng to lomaˈ ato pidokoan a kitiraan cangra. Mikifalocoˈay kita miakoˈid tonini a salikaka.—Nengnengen ko 2 Korinto 8:1-4.

11. Palawaywayen ita ko siniˈadaay falocoˈ, sasamaan paˈdil to kakarayan a Wama hani?

¹¹ Ikor no pades, makahi kita kinafalah, patalahkal to siniˈadaay falocoˈ, maˈaraway no papotalay no kasakopang a tamdaw. Tinakoen, 2019 miheca Tolian a faliyos mipalakay to cecay Hongti Kitakit Kasaˈopoan i Pahama. Mirienangay to miliyaway patireng to Kasaˈopoan a salikaka mitahidangay to cecay matayalay a kosi misaˈosi to sapatireng a payci, sanay ko sowal nora tamdaw: “Cowa ko papaycien ko mihadakan ako a lalosidan, cayliyaw ato matayalay tamdaw. Maˈaraw kamo mihaen a micada to widang, tada matemeray ko falocoˈ ako, mansa ciharatengay sapatadoaw to kapot namo a matayal.” ˈAlomanay tamdaw no hekal cowa ka fanaˈ ci Yihofaan, kawra maˈaraway no ˈalomanay tamdaw ko Misawacayay Tamdaw ni Yihofa palawaywayan to siniˈadaay falocoˈ. Mihaen ko demak ita wa padama to tao makalim sapiingidaw to ‘kadofahay ko siniˈada a Kawas,’ tada o taˈangayay a sakaliko konini!—Ifiso 2:4.

12. Palahad kita anini to siniˈadaay falocoˈ, hano ngangaˈay misongilaˈ misaday pakayni i taˈangayay padiing? (Paˈarawan 13:16, 17)

¹² Itini taˈangayay padiing a tatokian hano papatalahkal kita to siniˈadaay falocoˈ hani? Somowalay ko Fangcalay Cudad, ano aninito anca itini taˈangayay padiing a tatokian, o cima ko cowa pidama to sifo no hekal, o tatahalifa to adihayay sapalifet. (ˈOsien ko Paˈarawan 13:16, 17.) Misaaliay to sapadama ko salikaka alatek, ho ira ko sakaˈorip a dafong. Nanay padadotoc kita patalahkal to siniˈadaay falocoˈ, ano ira a misayfang ko Hongti ita ci Yis Kristo i, oha mamihayda kitaanan, padama kitaanan itini Hongti Kitakit ningra maˈorip.—Matay 25:34-40.

PAˈICEL TO CIOLAHAY FALOCOˈ

13. Mikitini Loma 15:7, saka 1 hahekalan a Krisciyang samaanay paˈicel to kasasiolah hani?

¹³ Itini saka 1 hahekelan, mafanaˈay ko ˈalomanay tamdaw to masasiolahay ko Krisciyang. Pakayni cangranan, mihaen to demak madoloay han? Nengnengen ko kasakopang no Loma. Toniya kasakopang iraay ko masakenakenaay a tamdaw, iraay ko kaemangho midofdofay to Rikec ni Mosi a Yutaya tamdaw, iraayho ko cowa ka lecad ko lalengawan kasakitakit a finacadan. O roma tamdaw o koli, o roma o pasalatay tamdaw, iraay ko tawki no koli a tamdaw. Onini a Krisciyang sasamaan a miremo to adihayay kasasiroma, padadotoc paˈicel to ciolahay falocoˈ hani? Palimoˈotan no tarokos ci Pawlo cangra ‘ka masasicada.’ (ˈOsien ko Loma 15:7.) Mihongyakan to ‘micada’ sanay a sowal tatodong i, songilaˈen hinapaladaˈ a micada to tao, tinakoen tahidangen cingra tayni i lomaˈ. Onini a sowal ngaˈayay o misongilaˈ micada to tao, malawidang cingranan. Nengnengen ko tosa tinakoan. Ci Onisimusan o mikitiniay i lomaˈ ni Filimon milaliway a koli, kawra pasowalan ni Pawlo ci Filimon cadaen ci Onisimus, ‘songilaˈen a micada cingra.’ (Filimon 17) Ci Priskila aci Akuila mafanaˈay to cowa ka nanam ci Apolos to kimad no Kristokiyo, kamayanho micada cingranan. Talaˈayaway a mikilim macacawmaˈ cingranan. (Dmak 18:26) Onini a Krisciyang cowa ka papipalaken ko kasasiroma no kalalaˈed to kalacecay nangra, ao misaˈicelay miremo to kasasiromaan, masasicada.

14. Ci Anna ato faˈinay samaanay patalahkal to olah i salikaka hani?

¹⁴ Wa ngaˈay kita pasayra i salikaka paihkal to olah, misaˈicel malawidang cangranan. Ano mihaen ko demak ita, mamapakalalok cangra, patalahkal to olah kitaanan. (2 Korinto 6:11-13) Ci Anna ato faˈinay ningra miocoran cangra itini Kaˈetipan no Afrika malo mikiriwiˈay manilnil a mitosilay, maocor cangra tayra i Kaˈetipan no Afrika roma kitakit caka halafin, mifekaday ko 2019 a lifong, telocto awaayto ko pakayraan nangra soˈlin a masasiˈaraw to kasakopangay a salikaka. Samaanay to cangra patalahkal to olah hani? Itiniay cangra i tingnaw masasiˈaraw to salikaka, pasowal to salikaka makalimay cangra sakafanaˈaw to ˈalomanay. ˈAlomanay salikaka no kasakopang matemeray ko falocoˈ, oranto i, marariday patingwa ato palay cangranan. Ci Anna ato faˈinay ningra hano misaˈicel mafanaˈ to salikaka hani? Sanay ci Anna: “Isalakat ano ngaˈayto anca tatiihto ko pakayraan, o salikaka patalahkalay to olah takowanan ato paro no lomaˈ ako. O taˈarawan nangra caay ka pawan kako, pakalalokay takowanan mamihaen maolah to tao.”

15. Misaˈicelay ci Wanisa maolah to polong a salikaka, mikitini cingranan mananamay iso ko maanan? (Nengnengen ko coka.)

¹⁵ Itini kasakopang ita, cowa ka lecalecad ko pinangan no salikaka, taˈangayay ko kasasiroma no lalengawan nangra. Misinanot kita to makapahay capeling nangra, mamatongal ko olah cangranan. Itiniay i Niwsilan matayal fafahiyan salikaka ci Wanisa pasangaray malacafay to papina salikaka i kasakopang saan ko harateng, samanen o pinangan nangra cowa ka olah cingra. Ikorto misaˈosiay cingra cato ka piliyas cangranan, milimasmasay to adihayay toki malacafay cangranan. Mihaen ko demak ningra ikor, mahapinangay to hano maolah ci Yihofa cangranan. Sanay cingra: “Manilnil ko faˈinay ako malo kasakilac kantok ikor, adihayayto ko toki niyam malacafay to caka lecad ko pinangan a salikaka. Mahapinangay ako, madoloayto ko niyah malacafay cangranan. Harateng ako nohatini, ira ko masakenakenaay a tamdaw i kasakopang tada ngaˈayayto, maedeng o ngaˈayay saan ko harateng ni Yihofa, samanen o Cingra ko misolotay to masakenakenaay a tamdaw a midoko Cingranan.” Mananamay niyam tano pinengneng ni Yihofa a minengneng to salikaka, mamisawacay to maolahay kami cangranan.—2 Korinto 8:24.

16. Itini taˈangayay padiing, masasiolah to salikaka hano tada kalimlaan hani? (Nengnengen ko coka.)

¹⁶ Itini taˈangayay padiing, masasiolah kita to salikaka tada kalimlaan. Toya tatokian, sasamaan kita milifok to sadipot hani? Nengnengen o maanan ko sakayat ni Yihofa to nolitengan a finawlan Ningra. ˈAyaw no demak mirikecanto ni Yihofa ko maholiway tayra i Papilon a Yutaya tamdaw, pasowal cangranan ano micada to saˈodis koniya niyaroˈ sasamaan ko pidemak nangra. Sanay ci Yihofa: ‘Finawlan Ako, ka picomod i lomaˈ namo, ˈedefen ko fawahang. Milimek to cecay liyad, tahira i kafasawan no keter.’ (Isaya 26:20) Ano mifekad ko taˈangayay padiing i, o mamidofdof kita to malecaday a sakayat micomod i ‘lomaˈ,’ o ‘lomaˈ’ o kasakopang no Krisciyang ko mitoroˈan alatek. Itini taˈangayay padiing, ano padadotoc kita makelec malacafay to salikaka, mikiˈokay ci Yihofa o mamidipot kitaanan. Mihaenay, o mamisaˈicel kita maolah to salikaka, cowa ko pihadidi aca cangranan. O milingatay to sakaˈorip ato sakapatay konini.

NOHATINIHO MAHEREKTO MISADAY

17. Ano aniniho maherekto kita misaday, noikor itini taˈangayay padiing wa ngaˈayto samaan ko pidemak?

¹⁷ Ano irato ko ‘romiˈad ni Yihofa’ i, mamisemsem ko tamdamdaw. (Cifaniya 1:14, 15) Ano finawlanto ni Yihofa tatahalifa to pasangaray a laliyadan. Nikawrira, ano aniniho maherekto kita misaday, itiya o papadadotoc a rihaday, ngaˈayho padama to tao. Ano samaanto ko sapalifet noikor, papadadotoc kita mihadidi. Ano misemsem ko salikaka i, mamisaˈicel kita padama cangranan, patalahkal to siniˈadaay falocoˈ cangranan, midimokos to saali nangra. Papatalahkalho kita to olah i salikaka, malecad o midemakan anini. O papalifonen ni Yihofa kita, padama kitanan itini faelohay a hekal milayap to midaˈocay a ˈorip. Itiya, mamalahdawto ko kihcod a roray ato pades.—Isaya 65:17.