“Ka Tanektek a Tomireng, Aka ka Ngiyangi”

1-2. O Krisciyang atoya ˈakawangay a mipatirengan a lomaˈ iraay ko maanan kalalecadan? (1 Korinto 15:58)

ISAKA 1978 miheca, cecay 60 tingloh ko ˈakawang a mipatirengan a lomaˈ i Tokyo no Dipong. Miharatengay ko ˈalomanay tamdaw, o mahaenay mipatirengan itini i marariday maˈatoray a niyaroˈ, sasamaan eca ka matelep hokira. Samaanay ko pakayraan no sayho a patireng hani? Tada mipatanektekan nangra misangaˈ, hanaca ngaˈay a mangiyangi to miming, cato ka matelep no ˈatoray. O Krisciyang i, mahaenay tonini a ˈakawangay mipatirengan a lomaˈ, hano saan ko sowal hani?

² O Krisciyang ka tanektek a tomireng, eca ka ngiyangi, makahi a mifalic. O mamisetek cingra midopo to sarikec ato palinian ni Yihofa. (ˈOsien ko 1 Korinto 15:58.) ‘Makahi midofdof’ cingra to Kawas, co:wa ko mamisafelit to sapalimoˈot no Kawas. O roma sa i, ano hangangaˈay anca ira ko saali i, o ‘mamakahi cingra pacaˈi,’ mamakahi a mifalic. (Yakop 3:17) Ano ira ko mahaenay matatodongay a waywayan no Krisciyang, cowa ko papakinali, cowa ko papakidem, kawra cowa ka pikasimaan. Oniya lalakaw mamilengo to sasamaan kita tanektek a tomireng, mamilengoho tano maanan ni Satan a lima pakayraan milonay to pisetek ita to falocoˈ, ato sasamaan kita mipadik to mihalakaan ningra.

SASAMAAN TANEKTEK A TOMIRENG HANI?

3. Mikitini Dmak 15:28, 29, Saˈakawangay a Mipatirengay to Rikec a Yihofa misaˈosiay to maanan a sarikec?

³ O Saˈakawangay a Mipatirengay to Rikec ci Yihofa, ihkalay Cingra pasowal to finawlan mamidofdof to maanan a sarikec. (Isaya 33:22) Tinakoen, saka 1 hahekalan a mikayatay malohemay malitengay somowalay, o Krisciyang itini tolo a pakayraan tanektek ko saaroˈan: (1) aka pitaˈong to samiyay, edengan ci Yihofa ko dadokoen, (2) fangcalay ko remes han a minengneng, (3) mitawmec to ˈakawangay a palinian no Fangcalay Cudad i waywayan. (ˈOsien ko Dmak 15:28, 29.) Anini, o Krisciyang sasamaan itini tonini tolo pakayraan a tanektek ko saaroˈan hani?

4. Sasamaan ko demak ita ngaˈ misarocod a maolah ci Yihofaan hani? (Paˈarawan 4:11)

⁴ Aka pitaˈong to samiyay, edengan ci Yihofa ko dadokoen. Palimoˈotay ci Yihofa to Israil tamdaw misarocod a maolah Cingranan. (Limoˈot 5:6-10) Mapalifet ni Akoma ci Yis i, ihkalay pasowal cingra to edengan ci Yihofa ko dadokoen no mita. (Matay 4:8-10) Mihaenay caay pitaˈong to samiyay ato tamdaw kita. Ano mirikecayto anca ˈaˈideman no pihakelongan, hayyo no miontoay anca hayyo no miraradiway, cowa ko kakala kawas han no mita mitaˈong cangra. Tatanektek kita midopo ci Yihofaan, misarocod a midoko Cingranan, samanen o Cingra ko ‘misangaˈay to kihcod.’—ˈOsien ko Paˈarawan 4:11.

5. Dadofdofen ita ko rikec ni Yihofa, o fangcalay ko remes ato ˈorip hano han a minengneng hani?

⁵ Dofdofen ita ko sarikec ni Yihofa, fangcalay ko remes ato ˈorip han a minengneng. Misamaanay hani? Samanen mitaypiyaway to ˈorip ko remes sanay ci Yihofa, o sapakaolah Ningra ko ˈorip. (Lifi 17:14) Isaˈayaw tiya haydaen ni Yihofa ko tamdaw komaen to titi i, aka komaen to remes sanay Cingra. (Satapangan 9:4) Tiya palimoˈot Cingra to Rikec ni Mosi to Israil tamdaw i, miliyaway somowal tonini limoˈot. (Lifi 17:10) Tahinito i saka 1 hahekalan i, pakaynian Ningra i mikayatay malohemay malitengay palimoˈot ko polong a Krisciyang ‘papikeceng to remes.’ (Dmak 15:28, 29) Anini, itini pisaˈosi to mamicada to maanan a sapaising i, o mamisetek kita a midofdof tonini sapalimoˈot.b

6. To sapitawmecaw to ˈakawangay palinian ni Yihofa i waywayan i, mamisaˈicel kita samaan ko pidemak hani?

⁶ Mamikedec a mitawmec kita to ˈakawangay palinian ni Yihofa i waywayan. (Hipray 13:4) Somowalay ci Pawlo kitanan ‘patayen’ ko no seraay a tireng sanay, tatodong i, tanekteken ko pidemak, falahen ko mararaway a coos no harateng. Ano o mananto, oha mamikidat to madadiˈiyay a waywayan i, cowa ko maminengneng, cowa ko mamidemak kita. (Kolosay 3:5; Yopu 31:1) Ano makayhid i, tangsol miemet to tireng no niyah, aka piharateng, aka pidemak to maanan mamipalak to kalawidang ita ato Kawas a demak.

7. Mamisetek kita to falocoˈ samaan ko pidemak hani? Misamaanay?

⁷ Halamhamay ci Yihofa kitanan ‘mikifalocoˈ a midofdof’ to sakayat Ningra. (Loma 6:17) Cowa ko mamipiliˈ a midofdof to pinapina a sarikec, haratengen, o sakayat Ningra sahtoay o sakaciepoc ita. (Isaya 48:17, 18; 1 Korinto 6:9, 10) O mamikiemel kita pahemek ci Yihofaan, pairaan ko malecaday to mitiliday to ˈOlic a waywayan. Sowal ningra: ‘Seteken ako ko falocoˈ midofdof to sarikec Iso, tahatolas a midoedo, cowa ko mamafalic.’ (ˈOlic 119:112) Nikawrira, misahalakaay ci Satan a milonay to pisetek no falocoˈ ita. Tano maanan a pakayraan mihaen cingra hani?

CI SATAN SAMAANAY MIHALAKA MILONAY TO PISETEK NO FALOCOˈ ITA?

8. Sapilonayaw to pisetek no falocoˈ ita, samaanay ci Satan miroero kitanan hani?

⁸ Sapalak. Sapilonayaw to pisetek no falocoˈ ita, miˈodisay ci Akoma, itini i tireng ato harateng midokaˈ kitanan. Sowal no Fangcalay Cudad, misamacayay cingra ‘sapitaˈemodaw’ kitanan, tatodong i, misahalakaay cingra sapipalakaw to kalalaˈed ita ci Yihofaan. (1 Pitiro 5:8) Saka 1 hahekalan a Krisciyang tona mitawmecay to saaroˈan, mansa mapatalaw no tamdaw, masetiˈ, anca mipatayan. (Dmak 5:27, 28, 40; 7:54-60) Anini, padadotocay ci Satan miroero to finawlan no Kawas. Tinakoen, itini i Rowasiya ato roma kitakit, makariˈangay no sifo ko salikaka. Roma i, ˈalomanay salikaka tahalifaay to romaroma a pisafelit.

9. Tinakoen mitadtad, hano mamicoˈay kita to cowa ka hapinang a saroero.

⁹ Cowa ka hapinang a saroero. Misiˈayaway a miˈodis ci Satan kitanan, roma i, tano ‘misaˈfitay a pakayraan’ a milonay to pisetek no falocoˈ ita. (Ifiso 6:11) Nengnengen ko tinakoan no faˈinayan salikaka ci Pawpo. Samanen mamicada cingra to taˈangayay a pitokad, miniwingay cingra, pasowalan ningra ko ising, ano masamaanto cowa ko papacomod to remes. Misakaretengan no ising ko pisaˈosi ningra. Kawra, ˈayaw no cecay dadaya to mamitokad i, tiya miliyasto ko paro no lomaˈ ni Pawpo i, pasowalay ko ising, o mamisaday cangra to remes, ano masamaanto i, ira ko mipatalaan a remes. Alatek awato ko paro no lomaˈ i tatihi, wa mafalic ko falocoˈ ni Pawpo sanay ko ising a miharateng. Kawra cowa ka ngiyangi ci Pawpo, tanektekay cingra pasowal, ano masamaanto i, cowa ko papacomod to remes.

10. Kitinien i pinengneng no tamdaw ko pinengneng to demak hano katalawan hani? (1 Korinto 3:19, 20)

¹⁰ Pakatamdaway a harateng. Ano kitinien ita i pinengneng no tamdaw ko pinengneng to demak i, wa misakahmaw ci Yihofaan ato palinian Ningra alatek. (ˈOsien ko 1 Korinto 3:19, 20.) ‘O taneng nonini hekal’ mikidatay to mararaway a coos ita. Itini nolitengan a Pirkamum ato Tiyatira, o mitaˈongay to samiyay ato malafoay madadiˈiyay a waywayan tada matenakay, itiraay a Krisciyang mafiyoray no mahaenay a pinangan. Oniya tosa kasakopang pakihateray to madadiˈiyay a waywayan, telocto mirikecan ni Yis. (Paˈarawan 2:14, 20) Anini, micadaay kita to saroero sapicadaaw to mararaway a harateng. O paro no lomaˈ ato kafanaˈan a tamdaw mamisawi, papisawad kitanan to saaroˈan no Krisciyang. Wa saan ko sowal nangra, mitoor to coos no niyah cowa ko mararaway, matelangayto ko palinian no Fangcalay Cudad sanay.

11. Soˈliˈlin tatanekteken ita ko saaroˈan, kawra mamiliyasho to maanan?

¹¹ Nolatekay, o sapafeli ni Yihofa a sakayat cangoˈotay saan kita miharateng alatek, ‘sapitaˈlifaw to sowal no Fangcalay Cudad.’ (1 Korinto 4:6) Itini i lintad ni Yis, mahaenay ko raraw no ˈaˈideman no pihakelongan. Itini Rikec patongalan nangra ko adihayay a saˈosi, telocto misakaretengay to ˈinorong no finawlan. (Matay 23:4) Anini, pakaynian ni Yihofa i Fangcalay Cudad ato likakawa Ningra pafeli to ihkalay a sakayat kitaanan, awaay ko halalangian ita mitongal to maanan a saˈosi. (Taneng 3:5-7) Mihaenay, aka pitaˈlif kita to sowal no Fangcalay Cudad, aka itini i notekedan a sasaˈosien patado to salikaka misaˈosi.

12. Samaanay ci Satan mitenak to ‘mahoracay misaˈfitay a sowal’ hani?

¹² Misaˈfitay a sowal. Misaka dademakay ci Satan to ‘mahoracay misaˈfitay a sowal’ ato ‘pantaay a harateng no hekal,’ miolat a paliwasak to hekal. (Kolosay 2:8) Itini saka 1 hahekalan, midopoay ko ˈalomanay to pakatamdaway a harateng, pasifanaˈay ko singsi no Yutaya to cowa pisalalangi to Fangcalay Cudad a kimad, dadadofdofen no Krisciyang ko Rikec ni Mosi sanay. O misaˈfitay a sowal konini, paliyasay to tamdaw toya Pipowaran no taneng a Yihofaan. Anini, pakaynian ni Satan i wanglo ato sakacacawmaˈ a wangcan milasil to misaˈfitay a sowal. Tinakoen, miowingay ko romaroma a mirikecay to ‘misafakofakoay a sowal,’ anca milasil to makaniway a lihaf. Itini pifekad no 2019 lifong a tatokian, adihayay ko mahaenay a demak.c Pakasoˈlinay ko ˈalomanay to mahaenay a mangah, telocto tada macariraway. Kawra Misawacayay Tamdaw ni Yihofa pakayni pitengil to sakayat no likakawa no Kawas, rihadayay ko falocoˈ.—Matay 24:45.

13. Hano mamicoˈay kita to mikalisangaay to falocoˈ a demak hani?

¹³ Mikalisangaay to falocoˈ a demak. Mamisamacay kita to ‘ikakaay ko nika kalimlaan a demak.’ (Filipi 1:9, 10) Mikalisangaay to falocoˈ a demak miˈafasay to adihayay a toki ato ˈicel, wa awato ko hapakayraan ita misamacay to cacangacangen ciepocay a patosokan. O maanan a demakan ko mikalisangaay hani? Tinakoen, alatek papaisalakaten ita i nokaˈorip ko kakomaen ato lawla ato tayal. (Luka 21:34, 35) Roma i, pakayni no hekalan ato mirikecay masasiromaromaay a safanaˈ no sinfon, adihayay ko matengilay to romiˈamiˈad. Ano pakidem ko piharateng ita to mahaenay a lacongis, mamakalisanga ko falocoˈ ita, alatek itini i falocoˈ sapidamaaw to cecay. Ci Satan tatano hatiniay a pakayraan milonay to pisetek no falocoˈ, micona to pidemak ita to matatodongay a demak. Dotoc mamilengo sasamaan kita micoˈay ci Satanan, tanektek ko saaroˈan.

SAKATANEKTEKAW A TOMIRENG, SASAMAAN KO PIDEMAK?

14. Sakatanektekaw a tomireng i tatihi ni Yihofa, sasamaan ko pidemak iso?

¹⁴ Haratengen ko lalangian iso patafang to tireng micada to paputisem. Patafang kiso to tireng micada to paputisem, samanen makalimay kiso tomireng i tatihi ni Yihofa. Tikolen miharateng, samaanay kiso pakasoˈlin to mahelaay a soˈlinay kimad. Minanamay kiso to pakayniay ci Yihofaan a sifanaˈ, mansa matongalay ko pikangodo ato kaolah Cingranan, o kakarayan a Wama saan ko pinengneng Cingranan. Palahaday kiso to pakasoˈlinay falocoˈ, makesem to nano demak i salakat, oranto ecato pidemak to kaˈintehan ni Yihofa a demak, mitoor to araaw ni Yihofa a maˈorip. Mafanaˈay kiso maherekayto ci Yihofa misodod tisowanan, rihadayayto ko falocoˈ. (ˈOlic 32:1, 2) Mirienangay kiso to saˈopo no Krisciyang, pasowal i tao to mananamay a kimad. Nohatini o patafangayto micadaayto to paputisem a Krisciyang kiso, romakatay to sakatayra midaˈocay ˈorip a lalan, misetek to falocoˈ padadotoc a romakat.—Matay 7:13, 14.

15. Micekiw ato midotim hano sakaciepoc no mita hani?

¹⁵ Micekiw to Fangcalay Cudad misongilaˈ a midotim. O lamit no kilang ano padadotoc a midapdap i taliyok, pasilaeno ˈangongol ko pipalamit, wa tanektek a tomireng. Malecaday, ano misongilaˈ kita micekiw midotim, wa mapalamit ko pakasoˈlinay falocoˈ i Kimad no Kawas, mamatongal ko pakasoˈlin no mita, midoedo to pakayraan no Kawas dademak o sangaˈayay wa saan. (Kolosay 2:6, 7) Songilaˈen ita a miharateng, nolitengan madimadiay a sikawdan no Kawas samaanay mikitini i sakayat no Kawas ato sadipot milifok to sapadama. Tinakoen, maˈaraway ni Icikil i mapolosi ko cecay coyoh misongilaˈay a milalat to fangcalay sefi, misarocoday cingra a mitengil minengneng, mapaˈicelay ko pakasoˈlinay falocoˈ. Ano misongilaˈ kita micekiw ato midotim to Kimad no Kawas, misarocod minengneng to ˈangongolay a kimad, mamalifok ita ko taˈangayay a epoc. Tinakoen, midotim tonini mapolosi ni Icikil ngaˈay pakafanaˈ kitanan, samaan tanektek mitawmec to patirengan ni Yihofa a matatodongay a palinian a midoko.d—Icikil 40:1-4; 43:10-12.

16. Tanektekay ko falocoˈ ni Pawpo, mansa ngaˈay samaan ko pidemak? (ˈOlic 112:7)

¹⁶ Tanekteken ko falocoˈ. Misetekay ci Tafiti to falocoˈ hakelong no kaˈorip maolah ci Yihofaan, sanay cingra: ‘Kawasaw, tanektekay ko falocoˈ ako.’ (ˈOlic 57:7) Ano kitato ngangaˈay tanektek ko falocoˈ, misarocod a mitadiˈec ci Yihofaan. (ˈOsien ko ˈOlic 112:7.) Masowalay i fafekang no fatac salikaka ci Pawpo, tiya mafanaˈ to papatado ko ising cingranan misaday to remes i, tangsolay a paihkal, ano pacomoden no ising ko remes cingranan, tatangsol cingra minokay. Ikor sanay ci Pawpo: “Itiya awaay ko mimimiming aca a sasa ato cariraw ako.”

17. Mikitini nalifetan ni Pawpo mananam ita ko maanan hani? (Nengnengen ko coka.)

¹⁷ Ngaˈay tanektek ci Pawpo, samanen ˈayaw no tatayra i ising, maherekayto misetek tatanektek ko saaroˈan. Hano ira ko mahaenay a pisetek ningra hani? Saka cecay, makalimay cingra pakahemek ci Yihofaan. Saka tosa, misongilaˈay cingra micekiw to Fangcalay Cudad ato mitepangan a cudad, micalep a cipinang to pinengneng no Kawas pakayni remes ato ˈorip. Saka tolo, pakasoˈlinay cingra mitoor to sakayat ni Yihofa, o papaira to midaˈocay a haepoc. Ano minanam kita ci Pawpoan, tanektek ko falocoˈ, tahalifa to maamaan a sapalifet i, cowa ko mamangiyangi.

18. O tinakoan ni Parak samaanay pakalalok kitanan misarocod mitadiˈec ci Yihofaan? (Nengnengen ko papotalay coka.)

¹⁸ Mitadiˈec ci Yihofaan. Kakitaan ci Parak midofdofay to sakayat ni Yihofa, telocto pakalowiday milood. Itiya, awaay ko kotang ato sapatada no Israil tamdaw, o mikeridan ni Sisira a sofitay no Kanan marocekay ko lalosidan. Nikawrira, palimoˈotan ni Yihofa ci Parak mikerid to Israil tamdaw malingad milood. (Kakitaan 5:8) Palimoˈotan ni Tipora ci Parak malingad milood ci Sisiraan ato 900 sapilood a paliding. Soˈliˈlin mafanaˈay ci Parak o sapilood a paliding no ˈada itini dafdaf taˈangayay ko ˈicel, kamayan mitoor a midemak. Tiya comikay ko sofitay no Israil malikelon i Lotok no Tapor i, mitefadan ni Yihofa ko taˈangayay ˈorad, telocto marefongay ko sapilood a paliding ni Sisira i ditaˈditaˈan. Salikor, padamaan ni Yihofa ci Parak pakalowid tonini a lalood. (Kakitaan 4:1-7, 10, 13-16) Malecaday, ano o mananto a sapalifet ko malifaay, ano mitadiˈec kita ci Yihofaan, midofdof to sakayat no likakawa Ningra, papadamaen ni Yihofa kita pakalowid.—Limoˈot 31:6.

SETEKEN KO FALOCOˈ A TANEKTEK A TOMIRENG, AKA KA NGIYANGI

19. Hano misetek kiso to falocoˈ tanektek a tomireng, eca ka ngiyangi?

¹⁹ Ano maˈoripho kita tonini tatiihay hekal, pakayni sakatanektekaw a tomireng, papadadotoc a misaˈicel. (1 Timoti 6:11, 12; 2 Pitiro 3:17) O sapalak, cowa ka hapinang a saroero, pakatamdaway a harateng, misaˈfitay a sowal, mikalisangaay to falocoˈ a demak, sahtoay o mamilonay to pisetek ita to falocoˈ alatek, aka mangiyangi kita. (Ifiso 4:14) Tanekteken ita eca ka ngiyangi, misarocod maolah ci Yihofaan, misetek to falocoˈ midofdof to limoˈot Ningra. Mihaenay haw i, o mamakahi a micaˈi kita. Dotoc a lalakaw mamilengo, itini makahiay micaˈi a pakayraan ci Yihofa aci Yis patirengay to maanan malefotay a taˈarawan.