Todongen ci Yihofa Makahi Micaˈi

1. O Krisciyang itini maanan a pakayraan papalecad to kilang hani? (Nengnengen ko coka.)

“KOMAYINGAY a kilang cowa ka petek no fali.” O matenakay a sowal no cecay pala konini. Tatodong i, o roma kilang ngaˈay tanektek a lomahad, samanen komayingay camira, ngaˈayay ˈikongen. Malecaday, sapadadotocaw ko Krisciyang lipahak a midoko ci Yihofaan, o mamakahi a mifalic, makahi misalof. Misamaanay hani? Samanen ano makahi kita mifalic, makahi micaˈi, o ngangaˈayto a misiˈayaw to kafalic no pakayraan no niyah, hanaca mikangodo to harateng ato misaˈosian no romaroma tamdaw.

2. (1) Palahad to maanan a capeling ngaˈay padama kitanan misiˈayaw to kafalic? (2) Onini a lalakaw mamilengo to maanan?

² O sikawdan ni Yihofa kita, makalimay makahiay micaˈi ko niyah, makalimayho o misapoeneray, iraay ko siniˈada a tamdaw. Oniya lalakaw mamilengo o hatiniay a capeling sasamaan padama to romaroma Krisciyang misiˈayaw to kafalic, mamilengoho onini a capeling sasamaan padama kitanan. Salakat, nengnengen ita ci Yihofa aci Yis itini makahiay micaˈi a pakayraan patirengay to maanan malefotay a taˈarawan.

CI YIHOFA ACI YIS O MAKAHIAY MICAˈI

3. Samaanay a mahapinang ita o makahiay micaˈi ci Yihofa?

³ Sowal no Fangcalay Cudad o ‘ˈOngcoy’ ci Yihofa, samanen tanektekay ko saaroˈan Ningra, cowa ka ngiyangi. (Limoˈot 32:4) Nikawrira, makahiay micaˈi ci Yihofa. Sapalaˈosiaw Cingra to araaw no niyah, mitooray to kalingad no demak padadotoc a misalof. Paringian Ningra kita i Cingranan a misangaˈ, mansa iraay ko inaneng ita misiˈayaw to kafalic no pakayraan. Roma i, pafeliayho ci Yihofa kitanan to ngaˈayay tadiˈecen a safalod no Fangcalay Cudad, padama kitanan misiˈayaw to masakenakenaay a pasangar i, ngangaˈayho citaneng ko misaˈosian. Mikitini taˈarawan ni Yihofa ato sapafeli kitanan a safalod ngangaˈay mahapinang ita, o tanektekay a ‘ˈOngcoy’ Cingra, makahiay micaˈi.

4. Tinakoen mitadtad, samaanay ci Yihofa patalahkal to makahiay micaˈi a capeling. (Lifi 5:7, 11)

⁴ O malefotay ko pakayraan ni Yihofa dademak, hanaca matatodongay ko saali. Cowa ka pakidem ko saali eca ka kahi mifalic. Nengnengen samaanay ci Yihofa makahi micaˈi micada to Israil tamdaw. Cowa pisaali Cingra to polong a tamdaw, ano manikawayto cihafayayto malecad ko sapatoˈaya. Itini roma pakayraan, mihayiay Cingra to kahacecay tamdaw mitoor to ˈicel no niyah patafang to masasiromaay a sapatoˈaya.—ˈOsien ko Lifi 5:7, 11.

5. Tinakoen mitadtad, tada misapoeneray ci Yihofa, iraay ko siniˈada.

⁵ Tada misapoeneray ci Yihofa, iraay ko siniˈada, makahiay Cingra micaˈi to tamdaw. Tinakoen, tiya papalaˈafoen ni Yihofa ko tatiihay Sotom a tamdaw i, salakatayho pakayni i coyoh mirikec toya moecelay a Lotoan, papiˈorong cingranan to paro no lomaˈ milaliw tayra i lotok. Matalaway ci Loto itiya, oranto cangacangay ci Yihofaan mihayi cingranan miˈorong to paro no lomaˈ milaliw tayra i Coar, onini a kaemingay a niyaroˈ nao papalaˈafoen ni Yihofa. Na ngangaˈay ci Yihofa misaali ci Lotoan mitoor to limoˈot Ningra a midemak, kawra mihayian Ningra ko picangacang ni Loto, cowa ka palaˈafo to Coar. Mikitini toniya maˈoningay mahapinangay ita tada misapoeneray ci Yihofa. (Satapangan 19:18-22) Ikor no adihayay mihecaan, pasayraay ci Yihofa i Ninifi a tamdaw patalahkal to siniˈadaay falocoˈ. Miocoran Ningra ko pairasolay ci Yona mihadak to salasil, somowal to papalaˈafoen ko Ninifi ato tatiihay tamdaw itira. Kawra ikor no pasasiyor ko Ninifi a tamdaw, siniˈadaayto ci Yihofa cangranan, cowato palaˈafo to Ninifi.—Yona 3:1, 10; 4:10, 11.

6. Tinakoen mitadtad, mitodongay ci Yis ci Yihofaan makahi micaˈi to tamdaw.

⁶ Mitodongay ci Yis ci Yihofaan, makahi micaˈi to tamdaw. Tayni ci Yis i fafekang no sera, ‘mamitosil to moraraway a siri finawlan no Israil,’ kawra midemak cingra toniya ˈinorong makahiay mifalic. Kinacecayay, o cecay ˈalafang fafahiyan micangacangay ci Yisan miadah to fafahiyan wawa ningra, samanen mipasemseman no tatiihay coyoh ko wawa ningra. Siniˈadaay ci Yis cingraanan, hayi sanay to saali ningra, miadah to wawa ningra. (Matay 15:21-28) Nengnengen ko roma tinakoan. Na somowalay ci Yis: ‘O cima ko cowa pihayda takowanan i kaˈayaw no tamdaw i, ano kakoto . . . , cowa ko mamihayda cingranan.’ (Matay 10:33) Kawra ikorto, kinatoloay ci Pitiro caka pihayda ci Yisan, kawra kamayan mihayda ci Yis ci Pitiroan. Misamaanay hani? Mafanaˈay ci Yis soˈliˈlinayto pasasiyor ci Pitiro, hanaca iraay ko pakasoˈlinay falocoˈ. Patikol ci Yis maˈorip patalahkalay ci Pitiroan, mifanaˈayho ci Pitiroan, maherekayto ko niyah misodod cingranan, kamayan maolah cingranan.—Luka 24:33, 34.

7. Mikitini Filipi 4:5, makalimay kita itini pinengneng no tao malo samaanay a tamdaw?

⁷ Ci Yihofa aci Yis itini makahiay micaˈi a pakayraan patirengay to malefotay a taˈarawan. Makalimay ci Yihofa kitanan makahi micaˈi. (ˈOsien ko Filipi 4:5.) Ngaˈayay licayen ita ko niyah: “Minengneng ko tao takowanan o makahiay micaˈi, makahiay misodod han? Anca o pakidemay ko saali, misatekeday to harateng no niyah hokira? Pacieciay kako to tao mitoor to pakayraan ako midemak han? Anca mitengilay kako to harateng no tao, ano ngangaˈay i, makahi micaˈi han?” Hakowaay ko nika kahi ita micaˈi, patalahkal to malecaday kita ci Yihofaan aci Yisan. Dotoc mamilengo, ano mafalic ko kaˈorip ita i, anca o harateng ato misaˈosian no tao cowa ka lecad kitanan i, sasamaan patalahkal to makahiay micaˈi a capeling.

MISIˈAYAW TO KAFALIC

8. Ano mafalicay ko demak i, misaka dademak kita to maanan a pakayraan wa ngaˈay makahi mifalic? (Nengnengen ko ilaenoay safanaˈ.)

⁸ Ano mafalic ko pakayraan i, makahi kita micaˈi o mamakahi mifalic. O noka falic papairato caay ka harateng a pasangar alatek. O tireng ita fahal sa ira ko pakidemay adada alatek. Anca itini kitiraan ita a pala, o pakapayciay a demak ato mirikecay fahal sa mafalic alatek, hato sasifod sanay ko kaˈorip no mita. (Patnakay 9:11; 1 Korinto 7:31) Roma i, o tayal ita itini likakawa no Kawas ano fahal sa mafalic, pasangaray kita misiˈayaw alatek. Ano o mananto a demak, ano tooren ita ko ilaenoay sepat a pakayraan, mamalaˈosito misiˈayaw to kafalic. Onini a pakayraan: (1) cadaen ko mifekaday a demak, (2) pasiˈayaw minengneng, (3) misamacay to tawlikay a demak, (4) padama to tao.b Dotoc nengnengen ita ko papina salikaka misaka dademak toniya pakayraan ikor, milifokay to maanan a epoc.

9. O cecay manilnilay mikiriwiˈay a mitosilay a mararamoday, samaanay miremo to fahal sanay ira a sapalifet?

⁹ Cadaen ko mifekaday a demak. Ci Aymanoaylay aci Folansiska maocoray tayra i roma kitakit malo manilnilay mikiriwiˈay a mitosilay. Satapang sanayho minanam cangra to sowal no itiraay, mafanaˈ to salikaka i kasakopang, mifekadayto ko 2019 lifong, telocto cato ka ngaˈay cangra malalitemoh to romaroma tamdaw. Ikor caka halafin, fahal sanay mapatay ko wina ni Folansiska. Ciharatengay cingra sakalacafayaw to paro no lomaˈ, kawra pakayni i lifong awaay ko pakayraan ningra minokay. O manan ko padamaay cingranan miremo to pasangar hani? Salakat, malacafayay cangra mararamod mitolon, micangacang ci Yihofaan pafeli to taneng cangranan, padama cangranan misamacay misiˈayaw to kahacecay romiˈad, eca ka pakidem ko cariraw. Pacaˈofan ni Yihofa ko satolon nangra, pakaynian i likakawa Ningra tangsol padama cangranan. Tinakoen, itini ika maˈaraway nangra ko pilicay to cecay faˈinayan salikaka ikor, mapakalalokay cangra. Sanay ko sowal noya salikaka: “Ano kaliki kita micada to mifekaday a demak, o pidoko ci Yihofaan konini han a minengneng ato papadama to tao, mihaen i, kakalikito kita miliyaw a lipahak.”c Saka tosa, misetekay cangra to falocoˈ pacakat to inaneng no niyah tano tingwa misawacay. Ikorto, misatapangay cangra to cecay pakingkiwan. Saka tolo, iraay ko miakoˈiday falocoˈ nangra micada to kaciharateng ato pipadama no itiraay salikaka. Cecay fafahiyan salikaka tada sidaˈitay, lalomaˈ no cecay miheca, to romiˈamiˈad paladaˈay cangranan to kamotoˈay a lihaf i soci ato cecay sinael. Ano micada kita to mifekaday a demak, wa misamacayto to madangaray no niyah a demak a marenecen ko falocoˈ.

10. O cecay fafahiyan salikaka samaanay misiˈayaw to taˈangayay a kafalic no kaˈorip?

¹⁰ Pasiˈayaw minengneng, misamacay to tawlikay a demak. O fafahiyan salikaka ci Keristina o Romaniya tamdaw, itiniay i Dipong. Malasawad ko mirienangan ningra sano Padakaay ko sowal a kasakopang i, soˈlin matoleday cingra, kawra cowa ka haharateng sa to mataˈlifayto a demak, ao misetekay to falocoˈ tano Dipong a sowal mitosil, misaˈicel itini no Dipong ko sowal a kasakopang a matayal. Mitahidangan ningra ko cafay matayal isalakat tano Fangcalay Cudad ato Layapen ko Midaˈocay ˈOrip! Sapitanam a Minanam padama cingranan pacakat to inaneng no Dipong a sowal, mihayiay ko cafay matayal. Telocto, ngaˈayayto kono Dipong a sowal ni Keristina, hanaca oya cafay matayal misatapangay maolah to Fangcalay Cudad. Ano pasiˈayaw kita minengneng, mitawmec to tawlikay a waywayan, o fahal sanay a kafalic o papaira to caay ka harateng a sapalemed.

11. O cecay mararamoday samaanay misiˈayaw to pasangar no sakaˈorip?

¹¹ Padama to tao. Cecay mararamoday itiniay makecengay ko mitosilay a tayal a kitakit. Tiya mapelal ko kicay no kitakit i, malahdaway ko katayalan nangra. Samaanay cangra misiˈayaw to mahaenay pakayraan hani? Salakat, mihalakaay cangra milowan to mapalakay payci. Ikor, misaˈosiay cangra ˈifowa to mitosilay tayal, padama to tamdaw mafanaˈ to soˈlinay kimad, eca ka haharateng sa to pasangaray no niyah. (Dmak 20:35) Sanay ko salikaka: “ˈIfowaay kami mitosil, matongalayto ko toki misamacay midemak to kaolahan no Kawas a demak, awaayto ko toki miharateng to masofaway a demak.” Ano mafalic ko pakayraan i, haratengen ita, padadotoc padama to tao o kalimlaan konini, mangalef mitongal a mirienang to mitosilay tayal, padama to tao mafanaˈ to soˈlinay kimad.

12. Sasamaan kita mitodong to tarokos ci Pawloan itini i pitosilan makahi a misalof?

¹² Mitosil i, o mamakahi kita mifalic. Malitemohay ita ko masakenakenaay a tamdaw, masasiromaay ko lalengawan, pihakelongan ato pinengneng nangra to demak. Itini makahiay mifalic a pakayraan, o ngaˈayay a taˈarawan ita ko tarokos ci Pawlo. Minilnilan ni Yis ci Pawlo malo tarokos, ‘matayal saki kalo a kitakit.’ (Loma 11:13) O mitosilan ni Pawlo mahawpay ko Yutaya tamdaw, Krisiya a tamdaw, adihayay ko sifanaˈ a tamdaw, cowa ka picudad a maomahay, o cihafayay tamdaw ato hongti. Sapitemeraw to masakenakenaay a tamdaw, ano masamaanayto a tamdaw ko misiˈayawan samatiyaen ni Pawlo cangranan. (1 Korinto 9:19-23) Misinanotay cingra to serangawan, lalengawan ato pihakelongan no tamdaw, patatodong a misalof to sapitosil cangranan. Malecaday, ano makahi kita mifalic, patatodong to saali no tamdaw misalof to hapakayraan a mitosil, o mitosilay a tayal ita wa taˈangayto ko epoc.

MIKANGODO TO PINENGNENG NO TAO

13. Mikitini 1 Korinto 8:9, mikangodo kita to pinengneng no tao, ngangaˈay maliyas ko maanan a pasangar?

¹³ Makahi micaˈi kita, o mamikangodo to pinengneng no tao. Tinakoen, roma fafahiyan salikaka maolahay micipoh, o roma i, cowa ka olah micipoh. O romaroma Krisciyang maolahay miˈenip to epah, o romaroma misaˈosiay caka pitefing to epah. Makalimay kita maemin tanektek ko tireng no niyah, kawra o mipiliˈan sapiadah a pakayraan cowa ka lecalecad. Edengan o mipiliˈan no niyah ko sangaˈayay, ano saan kita miharateng, palimoˈotho to salikaka malecad ko mipiliˈan, mihaen o papakapolin to tao alatek, mikidat to sakaliwasak no kasakopang. Caay ka ciharateng kita mihaen to demak. (ˈOsien ko 1 Korinto 8:9; 10:23, 24) Dotoc tano tosa tinakoan kita mitadtad, misaka dademak to safalod no Fangcalay Cudad, sasamaan padama kitanan ira ko matatodongay a waywayan, hanaca itini kasakopang micowat to dipayalay.

14. Itini pilafa to caˈedong, haharatengen ita ko maanan safalod no Fangcalay Cudad?

¹⁴ O pilafa to caˈedong. Itini pilafa to caˈedong cowa ka patireng ci Yihofa to pakidemay a saˈosi, kawra mihadakay Cingra to pina safalod mikayat kitanan. Malo sikawdan no Kawas, o sasanengseng ko pilafa ita to caˈedong, ‘patalahkal to matatodongay a harateng,’ mihaen ngaˈ mapaˈdil ko Kawas. (1 Timoti 2:9, 10; 1 Pitiro 3:3) Mihaenay, caay ka ciharateng kita pakidem ko tao minengneng to caˈedong no mita. Ano tooren no malohemay malitengay ko safalod no Fangcalay Cudad i, cowato ko papacieci misaˈosi to caˈedong ato fokes. Tinakoen, itini cecay kasakopang, o romaroma kapah salikaka mitodongay to matenakay pikalatim to fokes. Soˈlin kamotoˈay ko fokes nangra, kawra sasifod sanay. Ciharatengay ko malohemay malitengay padama to mahaenay a kapah, kawra ano caka patireng to saˈosi mamadangar konini a demak han? Painiay ko kasakilac kantok to malohemay malitengay ngaˈay mihaen to sowal: “Ano tomireng kiso i pikimadan, o mitengilay a tamdaw ano orira pilafa iso to caˈedong ko misinanotan, eca ko misowalan iso, paihkalay konini to iraay ko pasangar no pilafa iso to caˈedong.” Kantangay konini a sowal, tangsolay mafanaˈ ko kapah salikaka sasamaan ko pidemak, o malohemay malitengay cowato ko papatireng to saˈosi.d

15. Ano mipiliˈ to sapiadah a hapakayraan i, mamidofdof kita to maanan a saˈosi, mamisinanot to maanan a safalod hani? (Loma 14:5)

¹⁵ Sapiadah a hapakayraan. Pakayni to sasamaan midimokos to sakatanoktok no tireng, o kahacecay a Krisciyang ko mamisaˈosi. (Kalatiya 6:5) Pakayni toninian, pinaay aca ko ihkalay a saˈosi no Fangcalay Cudad to dadofdofen ita, tinakoen oha mamikeceng a miliyas kita to remes ato pakayniay i misakawasay a demak. (Dmak 15:20; Kalatiya 5:19, 20) Ano cowa ka pisafelit to saˈosi i, oha mamipiliˈ ko Krisciyang to niyah a hapakayraan a sapiadah. Romaroma salikaka tayraay i taˈangayay a paisingan, kawra iraayho ko roma a hapapiliˈen. Pakayni to o maanan ko papiliˈen a sapiadah alatek iraay ko no niyah a harateng, sasakaretengen ko mipiliˈan no salikaka, pasalaten cangra mipiliˈ. Itini tonini a demak, haratengen ko ilaenoay a sepat kalimlaan: (1) Edengan o Hongti Kitakit no Kawas ko papalahdaw to adada, tahadaˈocto a tanoktok ko tireng. (Isaya 33:24) (2) O kahacecay Krisciyang ko mamipiliˈ, ‘pakasoˈlin’ to sangaˈayay ko mipiliˈan no niyah. (ˈOsien ko Loma 14:5.) (3) Aka pilikaf kita to tao, aka pidemak to pakapolinay to cimacimaan a tamdaw. (Loma 14:13) (4) O Krisciyang maolahay to salikaka, cowa ko papaikakaen ko pasalat no niyah a mipiliˈ, to nika kedec no kasakopang. (Loma 14:15, 19, 20) Ano haratengen ita konini sepat kalimlaan i, o ngangaˈayto a makakedec ko kalawidang no salikaka, micowat to dipayal no kasakopang.

16. O makahiay micaˈi a malohemay malitengay sasamaan micada to roma malohemay malitengay? (Nengnengen ko coka.)

¹⁶ O malohemay malitengay papatireng to ngaˈayay taˈarawan i makahiay micaˈi a pakayraan. (1 Timoti 3:2, 3) Tinakoen, o cecay malohemay malitengay tona matoˈasay kako, oha mamitengil ko kaemangay a malohemay malitengay tono mako, aka ka saan a miharateng. O cacipinang cingra, o fangcalay saocor no Kawas micikelohay to kahacecay malohemay malitengay mihadak to matatodongay sapaini, padama to masacefangay a malohemay malitengay mataneng ko pisaˈosi. O pisaˈosi no ˈalomanay malohemay malitengay ano cowa pisafelit to safalod no Fangcalay Cudad i, o mamidama ko makahiay micaˈi a malohemay malitengay, cowa ko mamisamacay to harateng no niyah.

MAKAHIAY A MICAˈI PAIRAAY TO HAEPOC

17. Ano makahi a micaˈi ko Krisciyang, mamilifok to maanan a sapalemed?

¹⁷ O Krisciyang ano makahiay micaˈi pairaay to adihayay a haepoc. O mamatongal ko nika ngaˈay no kalalaˈed ato salikaka, makedec a dipayal ko polong a kasakopang. Masemeray kita to masasiromaay a pinangan ato serangawan no caay ka hecahecad a salikaka, lipahak a makakapot cangranan midoko ci Yihofaan. Tada kalimlaan i, mafanaˈay kita to mitodongay ko niyah toya makahiay micaˈi a Yihofaan, mamarenecen ko falocoˈ.