Malecad ci Samsonan Mitadiˈec ci Yihofaan

1-2. Hano maminanam kita to nalifetan ni Samson?

MATENGIL iso ko Samson sanay a ngangan maharatengay ko maanan hani? O maharatengay iso oyaan taˈangayay ko ˈicel a faˈinayan alatek. Soˈlinay mahaen ci Samson, kawra na midemakay cingra to cecay mararaway a pisaˈosi, pairaay to kaadayayan no niyah a teloc. Soˈlin mahaen, o misinanotan ni Yihofa o kihcod na midemakan ni Samson Cingranan. Miˈoninganho Ningra i Fangcalay Cudad ko nano demak ni Samson, ngaˈayay nanamen ita.

² Sapilidongaw to Israil tamdaw finawlan no Niyah, misaka dademakan ni Yihofa ci Samson palaˈosi to adihayay demak. Ikor no mapatay ci Samson to 1,000 miheca, itini sakayat ni Yihofa mitiliday ko tarokos ci Pawlo to ngangan no ˈalomanay tamdaw, oniya tamdaw sahtoay o taˈarawan no pakasoˈlinay falocoˈ, masalalomaˈay ci Samson. (Hipray 11:32-34) Soˈlin pasangar ko pakayraan kamayan mitadiˈec ci Samson ci Yihofaan, patirengay to ngaˈayay taˈarawan ita. Oniya lalakaw mamilengo, mikitini cingranan mamananam ita ko manan kalimlaan a kimad, ato taˈarawan ningra sasamaan pakalalok kitanan.

MITADIˈECAY CI SAMSON CI YIHOFAAN

3. Micadaay ci Samson to maanan a ˈinorong?

³ Hofocen ci Samson i, makowanay ato maroeroay no Filistin tamdaw ko Israil tamdaw. (Kakitaan 13:1) O kariˈang no Filistin tamdaw pakarorayay to Israil tamdaw, misaka dademakan ni Yihofa ci Samson ‘talaˈayaw milidong to Israil tamdaw paliyas to saroero no Filistin tamdaw.’ (Kakitaan 13:5) Tada pasangaray konini a ˈinorong. Sapilahciaw tonini a ˈinorong, o mamitadiˈec ci Samson ci Yihofaan.

4. Samaanay ci Yihofa padama ci Samsonan milaliw nai kamay no Filistin tamdaw? (Kakitaan 15:14-16)

⁴ Nengnengen samaanay ci Samson mitadiˈec ci Yihofaan, mitiˈer to sapafeli Ningra a ˈicel milahci to ˈinorong. Kinacecayay, o sofitay no Filistin tayraay i Lihi mirepet ci Samsonan, o Lihi itiniay i Yuta a pala. Matalaway ko finawlan no Yuta, misaˈosiay pafeli to ˈada ci Samsonan. Tano faelohay a sasoˈot cangra mifedfed ci Samsonan, miˈorong cingranan tayra i Filistin tamdaw. (Kakitaan 15:9-13) Kawra, ‘o fangcalay saocor ni Yihofa paˈicelay ci Samsonan,’ mihepolan ningra koya sasoˈot. Dotoc, ‘maˈaraway ningra ko cecay cowaho ka ˈicang a calaˈ noya mapatayay lofa,’ podpodan ningra, tanonini a calaˈ mipatay ko 1,000 Filistin tamdaw!—ˈOsien ko Kakitaan 15:14-16.

5. Samaanay mahapinang ita tada mitadiˈecay ci Samson ci Yihofaan?

⁵ Hano sakadademaken ni Samson ko calaˈ no lofa mipatay to ˈada hani? Cowa ko sapilood a lalosidan konini i! Awaay ko hasasa, mafanaˈay ci Samson sapakalowidaw mamitadiˈec ci Yihofaan, cowa ko sapilood a lalosidan. Sapilahciaw to patorodan ni Yihofa a ˈinorong, o manan ko mahelaay ningra oriraan ko misaka dademakan. Samanen mitadiˈecay ci Samson ci Yihofaan, palemedan ni Yihofa cingra, hato pakalowiday cingra.

6. Mikitini tinakoan ni Samson mamananam ita ko manan?

⁶ Soˈlin pasangaray ko ˈinorong ita a nengnengen, wa ngaˈay kita pakayni pitadiˈec to sapafeli ni Yihofa a ˈicel milahci to ˈinorong, o pakayraan ni Yihofa padama kitanan fahkaˈay kita alatek. Pafelian ni Yihofa ci Samson to ˈicel, o papafeli to ˈicel tisowanan. Edeng mitadiˈec kiso Cingranan, o papadamaen Ningra kiso.—Taneng 16:3.

7. Micangacang to sakayat ni Yihofa hanaca makahi misalof tada kalimlaan, hadaken ko tinakoan mitadtad.

⁷ ˈAlomanay mirienangay to patirengay a tayal no likakawa no Kawas a salikaka, patalahkalay to pakasoˈlin ci Yihofaan. Isalakat, adihayay Hongti Kitakit Kasaˈopoan ato romaroma pidokoan a kitiraan o kita sanay ko misafacoay ato patirengay. Kawra palidlid sa macowat ko likakawa no Kawas, misaaliay kita to sapifalicaw. O mikeriday a salikaka micangacangay to sakayat ni Yihofa, mitanamay to pina faelohay a pakayraan, tinakoen micakay to mapatirengayto a lomaˈ, dotoc mitomadawan. Salikaka ci Lopoten tayraay i icowacowaay a pala mirienang to mipatirengay a tayal, sanay cingra: “Onini a faelohay a pakayraan cowa ka lecad to salakatay a pakayraan a dademak. Satapang aca, cowa ka nanam ko romaroma salikaka, kawra misaˈicelay ko ˈalomanay minanam to kafalic. Misawacayay ko demak, o pisalof niyam milifokay to sapalemed ni Yihofa.” Mikayatan ni Yihofa ko finawlan Ningra anini milahci to tayal Ningra, o masowalay i fafekang o cecayay a tinakoan konini. O hamamicerid kita milicay to niyah: “Itini katayal ci Yihofaan, padadotocay kako micangacang to sakayat ni Yihofa, hanaca makahi a mifalic hokira?”

MITADIˈECAY CI SAMSON TO SAPADAMA NI YIHOFA

8. Kinacecayay tada masoˈaway ci Samson samaanay ko pidemak hani?

⁸ Maharatengayho iso ko na midemakan ni Samson romaroma a demak alatek, tinakoen na cecayay cingra mipatay to cecay layong, ikor itini i Askilon 30 ko mipatayan Filistin tamdaw. (Kakitaan 14:5, 6, 19) Cipinangay ci Samson, ano awaay ko sapadama ni Yihofa, cowa ko mamadangar ningra konini a demak. Nengnengen ko roma tinakoan. Patayen ni Samson ko 1,000 Filistin tamdaw ikor, tada masoˈaway, samaanay ko demak ningra hani? Cowa pitadiˈec cingra to niyah misaysay to pasangaray, ao pasayraay ci Yihofaan micangacang.—Kakitaan 15:18.

9. Samanay ko pipacaˈof ni Yihofa to satolon ni Samson? (Kakitaan 15:19)

⁹ Pacaˈofan ni Yihofa ko satolon ni Samson, midemak to kafahkaˈan pasadak to nanom. Maharek ci Samson minanom, ‘talifakayto, patikolayto ciˈicel.’ (ˈOsien ko Kakitaan 15:19.) Ikor no adihayay mihecaan, itini i sakayat no Kawas mitiliday ko pairasolay ci Samuil to Kakitaan cudad, itiya iraayho koya nemnem. O pakaˈaraway toniya nemnem a Israil tamdaw sanay miharateng alatek, ano tahalifa to pasangaray ko madimadiay midokoay ci Yihofaan a tamdaw i, o papadamaen ni Yihofa cangra.

10. Sapilifokaw kita to sadama ni Yihofa, mamisamaan ko pidemak hani? (Nengnengen ko coka.)

¹⁰ Ano irato ko maanan a inaneng anca ˈicel ita, itini katayal ci Yihofaan ano iraay ko maanan malaˈosiay ita, mamisaali kita to sadama ni Yihofa. O mamisamiming ko falocoˈ ita, mihayi edeng mitadiˈec ci Yihofaan ngaˈ milifok to soˈlinay a kalaˈosi. Maharek ci Samson minanom to sapafeli ni Yihofa a nanom patikolayto ciˈicel cingra. Malecaday, sakadademaken ita ko sapafeli ni Yihofa a kihcod, o mamilifok to ˈicel, padadotoc madimadi Cingranan.—Matay 11:28.

11. Sasamaan kita misaka dademak to sapafeli ni Yihofa a kihcod? Hadaken ko tinakoan mitadtad.

¹¹ Nengnengen ko nalifetan no faˈinayan salikaka i Rowasiya, ci Alikes ko ngangan ningra, tahalifaay nohatini to pakidemay a sapalak. O manan ko padamaay cingranan itini pakidemay sapalifet padadotoc tanektek ko pakasoˈlin hani? Cingra ato fafahi iraay ko ngaˈayay nanaman midoko, sanay cingra: “Miˈosiay kako to Fangcalay Cudad to romiˈamiˈad, micalepayho micekiw to lalomaˈay a lalakaw. To romiˈamiˈad papacem, malacafayay kako to fafahi malalengo to pakaromiˈaday a sinael, malacafayho mitolon.” Mikitini cingranan mananam ita ko maanan hani? Aka pitadiˈec to niyah, ao ci Yihofa ko tadiˈecen. Samaan ko pidemak hani? Ka kiemel micekiw to Fangcalay Cudad ato mirienang to romaroma midokoay a demak, mikitini ko pipaˈicel to pakasoˈlin no niyah ci Yihofaan. Mihaen, o papalemeden ni Yihofa kita, padama kitanan padadotoc midoko Cingranan. Na pafelian ni Yihofa ci Samson to ˈicel, o papafeli to ˈicel kitaanan.

CAAY PISAWAD CI SAMSON

12. Mipiliˈ ci Samson kalacafay ci Tililaan onini a saˈosi, iraay ko maanan cowa ka lecad to isaˈayaway hani?

¹² Ci Samson malecaday kitanan cowa ko malefotay a tamdaw, na midemakay cingra to cowa ka citaneng a saˈosi, o cecay pairaay to kaadayayan a teloc. Malo kakitaan ci Samson to cecay liyad ikor, ‘itini i Sorik a Dafdaf maolahay to cecay ci Tilila a fafahiyan.’ (Kakitaan 16:4) O pakayraan anini cowa ka lecad to saˈayaway. Saˈayaw, na mikotiyaay ci Samson to cecay Filistin a fafahiyan, o ‘harateng ni Yihofa konini,’ samanen ‘milimasmasay to toki’ ci Yihofa miˈodis to Filistin tamdaw. Kinacecayay, milafinay i lomaˈ no pacopiyaway ci Samson itini i Kaca, itiya pafelian ni Yihofa ci Samson to ˈicel, tamorong hananay ni Samson ko cacafiˈan no ˈadawang, malahdawayto ko sapidipot a ˈicel nonini a niyaroˈ. (Kakitaan 14:1-4; 16:1-3) Nikawrira, misaˈosi ci Samson malacafay ci Tililaan, cowa ko papaira to toki miˈodis to Filistin tamdaw, samanen o Israil tamdaw ci Tilila alatek, cowa ko Filistin tamdaw.

13. Samaanay ci Tilila mikariˈang ci Samsonan hani?

¹³ O Filistin tamdaw tano adihayay a payci paˈalofo ci Tililaan, misaali cingranan pacakay ci Samsonan. Oranto i, saliyaliyaw sanay ci Tilila miafad ci Samsonan, miliclic a milicay to hano taˈangay ko ˈicel ningra. Maapohayto no olah ko mata ni Samson alatek, caay pakahapinang to nafalocoˈan ni Tilila. Salikor, pasowal hananayto ni Samson to mahimeday a demak cingra. Pakayni tonini a raraw, malahdaway ni Samson ko pihayda ni Yihofa. Telocto, itini halafinay a tatokian, cowato ka lecad ci Samson to isaˈayaway a ciˈicel.—Kakitaan 16:16-20.

14. Mararaway ko pipakasoˈlin ni Samson ci Tililaan, samaanay ko teloc hani?

¹⁴ Mararaway ko pipakasoˈlin ni Samson ci Tililaan, cowa pitadiˈec ci Yihofaan, telocto kaadayayan ko malifaay a demak. Mirepetan no Filistin tamdaw cingra, mipohaw to mata ningra, miˈorongan tayra i Kaca. Isaˈayaw na mitastasan ni Samson ko cacafiˈan no ˈadawang no Kaca, mipakangodoay to itiraay a finawlan, nohatini sa mirofoan cingra i kapalitan nonini a niyaroˈ, mapacieciay micikeloh to tailangan. Mataˈlif ko cecay liyad, pakangodoan aca no Filistin tamdaw i kaˈayaw no ˈalomanay tamdaw. Itiya, misalisinay ko Filistin tamdaw, patoˈaya to makaniway a kawas nangra ci Takonan, samanen onini a kawas ko padamaay cangranan mirepet ci Samsonan sanay miharateng. Pahadakan nangra ci Samson nai kapalitan, pasowal cingranan ‘pakahemek’ to ˈalomanay tamdaw.—Kakitaan 16:21-25.

15. Samaanay ci Samson miliyaw a mitadiˈec ci Yihofaan? (Kakitaan 16:28-30) (Nengnengen ko papotalay coka.)

¹⁵ Soˈlin pakidemay ko raraw ni Samson, kawra cowa ka pisawad cingra. Makalimay cingra sapilahciaw to patorodan no Kawas cingranan a ˈinorong, hato mikilimay to toki miˈodis to Filistin tamdaw. (ˈOsien ko Kakitaan 16:28-30.) Micangacangay ci Samson ci Yihofaan padama cingranan miˈodis, pacaˈofan ni Yihofa ko satolon ningra, patikol to taˈangayay ˈicel ningra. Telocto, o mipatayan ni Samson a Filistin tamdaw ikakaay to isaˈayaway ko kaˈaloman.

16. Mikitini kararaw no demak ni Samson mananam ita ko maanan?

¹⁶ Soˈliˈlin pakayniay ci Samson i raraw no niyah mitamorong to karorayan a teloc, kawra cowa pisawad cingra midemak to sapafeli ni Yihofa cingranan a ˈinorong. Soˈlin pakayni kita i kaciraraw micada to sasalof anca malahdaw ko katayalan, aka a pisawad kita. Haratengen, cowa ko mamisawad ci Yihofa kitanan. (ˈOlic 103:8-10) Soˈlin na mararaway kita, ngaˈayayho sakadademaken ni Yihofa, malecad ci Samsonan.

17-18. Mikitini nalifetan ni Mayke mananamay iso ko manan? (Nengnengen ko coka.)

¹⁷ Ci Mayke o kapah a salikaka, nao dama sikawdan ato miceriday misakafah cingra, tawlikay matayal saki Yihofaan. Kaadayayan i, mararaway cingra, telocto malahdaway ko tayal i kasakopang. Sanay cingra: “Itini pidoko ci Yihofaan kalikiay kako talaˈayaw, kawra fahal sanay hato masongtolay ako ko mocoˈ caayto ka ngaˈay midemak to maanan. Na cowa ka piharateng kako to mamifalah ci Yihofa takowanan, kawra na calemcemay kako to ngangaˈay malecad o saˈayaway ko kalalaˈed no niyah Cingranan hokira, calemcemayho itini kasakopang wa ngaˈayho malecad to saˈayaway ko adihay no midemakan hokira.”

¹⁸ Kasemeran i, cowa pisawad ci Mayke. Sanay cingra: “Marariday kako micekiw ato midotim, itini satolon mifohat to falocoˈ ci Yihofaan. Mihaen, wa ngaˈayto kako misamacay misalof to kalalaˈed no niyah i Cingranan.” Ikorto, miliyaway milifok ci Mayke to tayal i kasakopang, nohatini o malohemay malitengay cingra, o miceridayho misakafah. Sanay cingra: “Adihayay ko malifokay ako a sadama, mangalef mikitini i malohemay malitengay milifok to taˈangayay sapakalalok, padamaay konini takowanan mihapinang to kamayan maolah ci Yihofa takowanan. Nohatini, miliyaway ira ko makoracay a makapahay falocoˈ ako matayal i kasakopang. Mahatatanamay ako, misododay ci Yihofa to mikifalocoˈay pasasiyor a tamdaw.” Ngaˈay kita pakasoˈlin, soˈlin na mararaway, ano misaˈicel kita misalof to raraw hanaca padadotoc mitadiˈec ci Yihofaan, o sasakadademaken ato papalemeden ni Yihofa kita.—ˈOlic 86:5; Taneng 28:13.

19. O taˈarawan ni Samson samaanay pakalalok tisowanan?

¹⁹ O hakelong no kaˈorip ni Samson tada kasemeran, onini lalakaw milengoay to mifekaday ningra a pina demak. O cowa ka lefot a tamdaw cingra, kawra misaˈicelay cingra matayal saki Yihofaan. Soˈlin na taˈangayay ko raraw ningra, cowa ka pisawad midoko ci Yihofaan. Ano ci Yihofato cowa pisawad cingranan, miliyaway misaka dademak cingranan palaˈosi to taˈangayay demak. Itini pinengneng ni Yihofa, kamayan o matomesay to pakasoˈlin ci Samson, mansa itini Hipray saka 11 fedengan mihadak ci Yihofa to ˈalomanay taˈarawan no pakasoˈlinay falocoˈ i, masowalay ko ngangan ningra. O matomesay to olah sidaˈitay a Wama ci Yihofa, itini kalonayan ita i, mikiriwiˈay Cingra midama kitanan. Mafanaˈ tonini, tada masayaray ko falocoˈ ita. Mihaenay, palecaden ita ci Samson micangacang ci Yihofaan saan ko sowal: ‘Nanay aka mapawan takowanan, Kawasaw, nanay pafelien Iso kako to ˈicel.’—Kakitaan 16:28.