Damsayay a Tamdaw o Ciˈicelay

1. O cafacafay picudadan ato katayalan mamilicay kitanan to maanan a salicay alatek?

O CAFACAFAY picudadan anoca katayalan milicayay tisowanan pakayni to pihakelongan a demak, sasamaan ko falocoˈ iso hani? Marawraw ko falocoˈ iso han? Mahaenay marawraw ko ˈalomanay tamdaw. Kawra misalalicay ko tamdaw patalahkalay alatek to piharateng ningra ato maanan ko pakasoˈlinan ningra, hato madoloayto kita mipaladaˈ to ngaˈayay lihaf i cingranan. Kawraan, milokesay kora pilicay nangra alatek. Aka fahkaˈen kita, samanen mararaway a pakasoˈlin cangra to pakayniay pihakelongan ita a sowal. (Dmak 28:22) O roma i, itiniay i ‘salikoray a ˈawaled’ kita, ˈalomanay tamdaw ‘manaˈayay malakangaˈay,’ latekay tada ‘mariˈangay.’—2 Timoti 3:1, 3.

2. Palahad to damsayay hano masakalimlaan?

² Alatek saan kiso miharateng: “Ano misalalicay ko tao to pihakelongan ako i, sasamaan kako rihaday ko sowal a pacaˈof cingranan hani?” Damsayen a pacaˈof. O damsayay tamdaw ano malikaf anoca caka fanaˈ to sasamaan pacaˈof i, ˈimeren ko niyah, rihadayen ko falocoˈ. (Taneng 16:32) Kawra madoloay a sowalen pasangaray a demaken saan kiso alatek. Sasamaan kiso palahad to damsayay a capeling hani? Sasamaan damsay a pacaˈof to pisalalicay no tao hani? Ano iraay ko wawa iso, sasamaan padama cingranan damsay a paˈading to pihakelongan no niyah hani? Onini a lalakaw papacaˈof tonini a salicay.

SASAMAAN PALAHAD TO DAMSAYAY

3. O damsayay a tamdaw hano cowa ko malonayay, ao tada ciˈicelay? (2 Timoti 2:24, 25)

³ O damsayay a tamdaw hananay i, cowa ko malonayay, ao tada ciˈicelay. O tamdaw ano tahasiˈayaw to pasangaray pakayraan i, ira ko ikemoday a ˈicel wangaˈ rihadayen ko falocoˈ. O damsayay i, o ‘minaroˈan no fangcalay saocor.’ (Kalatiya 5:22, 23) Mihongyakan tono Krisiya sowal, onini “damsayay” hananay, somowalay to mapahatatanamayto malafelay a efa. Haratengen hena, o malafelay a efa soˈlin mapahatatanamayto, kawra kamayan a ciˈicelay cimira. Kita i, sasamaan malo damsayay a ciˈicel hani? Cowa ko niyah aca ko tatiˈeren, tolonen ita ci Yihofa pafeli kitanan to fangcalay saocor, padama kitanan palahad tonini makapahay capeling. Madangarayto no ˈalomanay salikaka konini, ano tahasiˈayaw cangra to pilikaf anoca pisalalicay no tao i, kamayan a damsay cangra pacaˈof, oranto i, masemerayto ko tamdaw. (ˈOsien ko 2 Timoti 2:24, 25.) Sasamaan kiso palahad to mahaenay damsayay a capeling hani?

4. Pakayni i damsayay, mikitini taˈarawan ni Isak mananamay ita ko maanan?

⁴ Ilalomaˈ no Fangcalay Cudad adihayay ko maˈoningay, paihkalay to tada ciepocay ko damsayay. Nengnengen ko tinakoan ni Isak. Tayrato i Filistin a kilac i, itiniay i Kirar maroˈ, kawra maˈinapay ko Filistin cingranan, miselenan nangra ko mikorkoran no wama a tefon. Kawra, cowa ka sakalacongisaw ci Isak cangranan, ao malinahay tayra i roma pala, misafaeloh a mikorkor to tefon. (Satapangan 26:12-18) Kawra o niyam haca a nanom kora sanay a micoli ko Filistin. Soˈlin hatira, kamayanay ci Isak damsay a misiˈayaw cangranan. (Satapangan 26:19-25) Sapikidataw to lacongis ko Filistin a tamdaw, misamaanay hano kamayan ci Isak padadotoc a damsay hani? O wama ni Isak ci Apraham mihaenay a dipayal malacafay to tao, o wina ningra ci Sara iraay ko ‘rihadayay damsayay a falocoˈ,’ mansa mikitiniay cingra i wama wina minanam to adihayay a taˈarawan.—1 Pitiro 3:4-6; Satapangan 21:22-34.

5. O Krisciyang a wama wina sasamaan padama to wawa pakahapinang to epoc no damsayay? Sadaken ko tinakoan.

⁵ O Krisciyang a wama wina, pakasoˈlinen ngaˈay kamo padama to wawa pakahapinang to epoc no damsayay. Nengnengen ko tinakoan ni Makesan 17 ko mihecaan ningra, itini picudadan ato pitosilan i, mamisiˈayaw cingra to mariˈangay a tamdaw. Wama ato wina mihadidiay padama cingranan palahad to damsayay, sowal sa cangra: “Palidlid sanayto cipinang ci Makesan, ano makidat no tao ko sakalacongisaw i, madoloay ko tamdaw a maketer anca sapicoˈayaw, kawra o soˈlinay ciˈicelay a tamdaw pakaˈimeray to niyah, miemet to keter.” Tada mahemekay cangra palahadayto ci Makesan to mahaenay damsayay a capeling.

6. O satolon sasamaan padama kitanan matongal ko damsayay hani?

⁶ Itini i romaroma a pakayraan, padadotoc a damsay tada cowa ka dolo. Tinakoen, matengil ko tao mipakadit to fangcalay ngangan no Kawas anca misakahmaw to epoc no Fangcalay Cudad i, maketeran nanay kita alatek. Itiya i, samaan ko pidemak ita hani? Cangacangen ita ci Yihofa pafeli to fangcalay saocor ato taneng, padama kitanan tano damsayay a waywayan misiˈayaw. Ikor ano mahapinangay cowa ka ngaˈay ko pisiˈayaw no niyah i, samaanto hani? Miliyaw haca a mitolon, halo miharateng ano ikor i, samaan ko pidemak ngaˈ ngaˈay. Mihaen i, papafeliento ni Yihofa kita to fangcalay saocor, pakaˈimer to keter, padadotoc a damsay.

7. Paifalocoˈen ko pinapina sinael sasamaan padama kitanan misiˈayaw to caay ka dolo a pakayraan? (Taneng 15:1, 18)

⁷ Paifalocoˈen ko pinapina sinael, ano tahasiˈayaw to caay ka dolo a pakayraan i, ngangaˈayto pakaˈimer to sema no niyah, o fangcalay saocor papadama kitanan pakaharateng tonini a sinael. (Yohani 14:26) Tinakoen, itini Taneng a cudad adihayay ko safalod papadama kitanan a damsay. (ˈOsien ko Taneng 15:1, 18.) Paihkalay ko adihayay sinael i Taneng, ano marawraw i, padadotoc a miˈimer papaira to adihayay a epoc.—Taneng 10:19; 17:27; 21:23; 25:15.

MICALEP A CIPINANG TO DEMAK MAMADOLO A DAMSAY

8. Hano sasalakaten ita cipinang to soˈlinay lalangian no pisalalicay no tao hani?

⁸ Micalep a cipinang kita to demak mamadolo a damsay. (Taneng 19:11) Ano misalalicay ko tao to pihakelongan ita i, micalepay cipinang a tamdaw papakaˈimer to niyahan, caay ka caloh sa a pacaˈof. Tinakoen, ano maˈaraw ko soeda a lotok, o mimingay aca ko maˈaraway, o kakahaday nonini soeda a lotok matolemay ilaeno no nanom. Hatiraayto, milicay ko tao to maanan a salicay i, cowa pasowal to maanan ko araaw ningra ato maanan ko sasa no falocoˈ ningra a milicay. Mankora, ˈayaw no sapacaˈofaw haratengen ita, cowa ka cipinang kita to lalangian ningra a misalalicayan.—Taneng 16:23.

9. Misalalicay ko Ifraim tamdaw itiya i, samaanay ci Kitiyon pacaˈof hani?

⁹ Nengnengen ci Kitiyon samaanay pacaˈof to Ifraim a tamdaw. Tada mangolaway ko Ifraim tamdaw, misalalicayan ci Kitiyonan, hano caka pitahidang cangranan milood to ˈada. O maanan ko lalangian nangra maketer hani? Tada misakahmaway cangranan sanay miharateng cangra han? Micalepay ko nika cipinang ni Kitiyon to demak, misikolay cingra to nafalocoˈan nangra, damsayay a pacaˈof cangranan, telocto i, mafasawayto ko keter nangra.—Kakitaan 8:1-3.

10. Ano misalalicay ko tao to pihakelongan no mita i, samaan ko pidemak ita wa ngaˈay ko pipacaˈof cangranan hani? (1 Pitiro 3:15)

¹⁰ O cafay matayal anca picudadan ano misalalicay kitanan to samaanay ko pinengneng ita to maanan a waywayan i, sasaˈicelen ita paˈading ko pihakelongan no niyah, kangodoen ko pinengneng no tao. (ˈOsien ko 1 Pitiro 3:15.) Ngaˈayay kita pakayni to pilicay ningra cipinang to o maanan ko kaciharatengan ningra, aka o miˈodisay anca milikafay kitanan han a miharateng. Mihaen ko demak marariday paira to ngaˈayay minaroˈan. Ano o mananto ko lalangian no tao a misalalicay i, o mamisaˈicel kita damsay a pacaˈof. Mihaen, mamasemer cingra alatek, makahito misaharaterateng to matatodongay anca mararaway ko pinengneng no niyah hokira. Soˈlinto cowa pisakangodo ko tao, milokes kitanan, o papadadotoc kita damsay ko waywayan, ngaˈay ko kasasowal cingranan.—Loma 12:17.

11-12. (1) ˈAyaw no papacaˈof to pisalalicay no tao, salakaten a miharateng ko maanan? (Nengnengen ko coka.) (2) Sadaken ko tinakoan mitadtad, sasamaan kita pacaˈof to salicay no tao, ngaˈ padadotoc lipahak ko kasasowal.

¹¹ Ano milicay ko cafay matayal kitanan hano caka pisalisin kamo to kahofocan romiˈad sa i, haratengen ita: “Cowa ka ngaˈay mahemek ko kaˈorip ita sanay cingra miharateng pakayni kitanan han? Cowa ka pirienang kita to misalisinay a demak, o mamipalak to kakelec no kosi sanay miharateng cingra han?” Pakahemeken cingra to nika ciharateng to cafacafay, ikor pasowalen cingra, maolahay kami lipahak a malacafay tamowanan i katayalan. Alatek mamalahdaw ko sasa no falocoˈ ningra, hanaca ngaˈay kita lipahak a masasowal to pakayniay kahofocan a kimad no Fangcalay Cudad.

¹² Ano misadak ko tamdaw to kalacongisan a lalangian i, haenen ita ko pakayraan a pacaˈof cangranan. O cecay cafay micudad latek somowal, o Misawacayay ni Yihofa oha mamifalic to kapinengneng to tongsinlien. Sakapihaen ko sowal ningra, latek mararaway ko pinengneng nangra to Misawacayay ni Yihofa hokira? O widang ningra anca salawina o tongsinlienay a tamdaw han? Awaay ko olah ita to tongsinlienay a tamdaw sanay cingra han? Ngaˈay pasowalen cingra, iraay ko fadangalan no kahacecay tamdaw mipiliˈ to niyah a kaˈorip sanay kami, ano masamaanayto ko mipiliˈan no tamdaw, mikangodoan niyam, ciharatengay cangranan.b (1 Pitiro 2:17) Latek ngangaˈay kita pasowal cingranan, midofdof to palinian no Fangcalay Cudad pakayni to waywayan iraay ko maanan a epocan.

13. Ano milokes ko tao to pihakelongan iso i, sasamaan ko pidemak iso hani?

¹³ Soˈlinto misafelit ko tao to pinengneng no mita, aka sakaliki sa to o mafanaˈay kita to maanan ko pakasoˈlinan ningra. (Titus 3:2) O cafay micudad ano milikaf to o Kawas ko misangaˈay to kihcod i, o caciharatengto kiso to tada cipinangay cingra a pakasoˈlin to sinkalon han? ˈArawhan, cowa ka tada cipinang cingra to sinkalon alatek. Mansa, ano tangsol sa pasowal cingranan to mararaway ko sinkalon, kao pafelienho cingra to lalakaw anca hadaken ko cecay salicay, papisimsimen cingra. Latek panengnengen iso to jw.org wangcan to pakayniay pisangaˈ a lalakaw, mihaen mamakahito cingra masasowal tisowanan to ika ato lalakaw i wangcan alatek. Mikangodo kita cingranan, mamitengilto cingra alatek to samaanay ko sowal no Fangcalay Cudad.

14. Samaanay ci Niali sakadademak to wangcan no mita, palahdaw to nika cisasa no cafay micudad to Misawacayay Tamdaw ni Yihofa hani?

¹⁴ Kapah ci Niali sakadademakay to wangcan no mita palahdaw to nika cisasa no tao to Misawacayay Tamdaw ni Yihofa. Sanay cingra: “Iraay ko cecay cafay micudad marariday pasowal to cowa ka pakasoˈlin kako to kakaku sanay cingra, mahapinangay ko wacay, mankora pakasoˈlinay kako to mitilidan no tamdaw a cudad.” Cowa pitengil cingra to pitadtad ni Niali, oranto papinengnengan ni Niali to wangcan pakayni “O Fangcalay Cudad ato Kakaku” sanay a rayray no lalakaw. Ikor mahapinangay ni Niali, hato maharekayto minengneng cingra tora lalakaw, makahiayto malalengo ci Nialian to pipowaran no ˈorip. Ano haenen iso ko pidemak, latek irato ko ngaˈayay a minaroˈan.

MALACAFAY KO PARO NO LOMAˈ A MISADAY

15. O wama wina sasamaan padama to wawa damsay a pacaˈof to pisalalicay no cafacafay?

¹⁵ O wama wina sakadademaken ko ciepocay a hapakayraan, pasifanaˈ to wawa damsay a pacaˈof to pisalalicay no tao. (Yakop 3:13) O romaroma wama wina itiniay pakalomaˈay a pidoko, malacafay to wawa mihatatanam. Isalakatan nangra misaharaterateng, nolatek mamilicay ko singsi anca cafacafay to maanan a salicay. Dotocto i, malalengoay to wawa, patiriˈen cangra sasamaan a pacaˈof, ngaˈ mahatatanam no wawa to sasamaan a damsayen ko pipacaˈof to tao. (Nengnengen ko sapatongal lalakaw “O Mihatatanamay Tada Ciepocay!”)

16-17. O mihatatanamay sasamaan padama to kapah hani?

¹⁶ O mihatatanamay cowa ko papadama aca to kapah mafanaˈ tano matatodongay a pakayraan mitadtad to pihakelongan i tao, papadamaho cangranan pakasoˈlin to pihakelongan no niyah to iraay ko wacay. Itini jw.org wangcan iraay ko “Salicay no Kapah” sanay madadoedoay a lalakaw, ato pakayniay i kapah a misafacoan a pihatatanaman, paˈicel to pakasoˈlin nangra, hanaca mafanaˈ tano niyah a sowal pacaˈof to salicay no tao. O paro no lomaˈ ano malacafay minanam tonini a lalakaw, mamafanaˈto cangra sasamaan tano madoloay cadaen no tao a pakayraan damsay a miˈading to pihakelongan.

¹⁷ O cecay ci Masiw hananay a kapah, o pahatatanamay demak tada padamaay cingranan sanay ko sowal. Ci Masiw ato wama wina marariday itini pakalomaˈay a pidoko, mikilim to lalalengoen i picudadan milingatay a lalakaw. Sanay cingra: “Isalakatan niyam miharateng latek mamalifa ko masamaanay a pakayraan, ikor mikitini to mahelaay a lalakaw mihatatanam a pacaˈof to tao. Mahapinangay ako to maanan ko misalalangian no pihakelongan no mako, hato fanekfekay ko falocoˈ, madoloayto tano damsayay pakayraan a pacaˈof to tao.”

18. Mikitini Kolosay 4:6, sasamaan ko kacaciyaw ita hani?

¹⁸ Manaokaniw, soˈlin matatodongayto ko mihadakan ita a wacay, cowa ka sahto sa micada ko kahacecay tamdaw. Kawra tano damsayay a pakayraan pacaˈof to tao, wa ira ko sapadama. (ˈOsien ko Kolosay 4:6.) Ano malalengo to tao to pihakelongan no mita i, malecad to malacafayay to tao mitekol to mali a salama, ngaˈayay samadahen a mitekol ko mali, ngaˈayay saˈicel han a mitekol. Ano samadahen ita a mitekol ko mali i, mamadolo a cadaen no tao, padadotoc ko pisalama. Malecaday, ano damsayen ita ko pakayraan pacaˈof to tao i, mamakahito a mitengil ko tao, padadotocto ko kasasowal. Manaokaniw, ano sakalacongisaw anca milokes to pihakelongan no mita i, hamaanto padotocen ko kalalengo i cingranan. (Taneng 26:4) Kawra o mahaenay tamdaw cowa ka ˈaloman, soˈlinay haw i, ˈalomanay ko makahiay mitengil a tamdaw.

19. Ano paˈading to pihakelongan no niyah i, haharatengen ita ko maanan wa madoloto mitawmec to damsayay hani?

¹⁹ Patirengen iso ko patosokan palahad to damsayay a capeling, tada o ciepocay. Cangacangen ci Yihofa pafeli tisowanan to ˈicel, padama tisowanan ano salalicayen anca likafen no tao i, mamitawmec to damsayay. Haratengen, ano mitawmec kiso to damsayay, cowa ito pasalaten ko nika sasiroma no pinengneng a malacongis to tao. Ano misakangodoay ko waywayan iso, damsay ko sowal, alatek mamafalic ko pinengneng no romaroma tamdaw to Misawacayay ni Yihofa ato Kimad no Fangcalay Cudad. Sadayen a mipatala paˈading to pihakelongan, hanaca ‘damsay ko waywayan, misakangodo’ to tao. (1 Pitiro 3:15) O damsayay a tamdaw o ciˈicelay, seteken ko falocoˈ malo damsayay a tamdaw!