Kapah Salikaka—Ka Pisaˈicel Malo o Matenesay a Krisciyang

1. O faˈinayan salikaka ano sakatanektekaw, malo soˈlinay faˈinayan, sasamaan ko pidemak?

PASIFANAˈAN no Hongti ci Tafiti ci Solomon saan ko sowal: ‘Ka tanektek kiso, safaˈinaˈinayen ko falocoˈ.’ (1 Hongti 2:1-3) Anini, polong a faˈinayan salikaka o mamidofdof tonini a sapalimoˈot. Sapihaenaw to demak, o maminanam cangra midofdof to sarikec no Kawas, hanaca itini kahirahira no kaˈorip sakadademaken ko safalod no Fangcalay Cudad. (Luka 2:52) Kapah salikaka hano mamisaˈicel malo o matenesay a Krisciyang hani?

2-3. O kapah salikaka hano mamisaˈicel malo o matenesay a Krisciyang hani?

² O faˈinayan salikaka itini paro no lomaˈ ato kasakopang adihayay ko kalimlaan a ˈinorong. Kapah salikaka maemin, maedeng na miharatengay kiso ano ikor wa mitamorong to maanan a ˈinorong. Alatek iraay ko patosokan namo mirienang to mieminay to toki a matayal saki Kawas, malo dama sikawdan, ikorto malo malohemay malitengay no kasakopang, ciharatengay kamo alatek saka ciraramodaw ato saka iraaw ko wawa. (Ifiso 6:4; 1 Timoti 3:1) Sakalaˈosiaw nonini a patosokan, hanaca madangar ko masakenakenaay a ˈinorong, o mamalo o matenesay a Krisciyang kamo ngaˈ ngaˈay.b

³ Ano ciharatengay kiso malo o matenesay a Krisciyang, o papalahad to pina kalimlaan a inaneng. Ano hatiraay, sasamaan kiso misaday nohatini, padama to niyah malaˈosi ko pitamorong toniya ˈinorong noikor hani?

PASAYRA I MATENESAY A MACAKAT

4. Aicowa kiso mikilim to ngaˈayay todongen a taˈarawan? (Nengnengen ko coka.)

⁴ Piliˈen ko tatodongen iso a ngaˈayay taˈarawan. Itini lalomaˈ no Fangcalay Cudad adihayay ko ngaˈayay taˈarawan nananamen no kapah salikaka. Onini a nolitengan madimadiay sikawdan maolahay to Kawas, hanaca pakayni sapidimokosaw to finawlan no Kawas mitamorongay to masakenakenaay a ˈinorong. Itini paro no lomaˈ ato kasakopang wa ngaˈay mahela iso ko nananamen a ngaˈayay taˈarawan. (Hipray 13:7) Roma i, patirengay ci Yis to malefotay taˈarawan ngangaˈay sinanoten iso. (1 Pitiro 2:21) Itini pinengneng iso to ngaˈayay taˈarawan nangra i, songilaˈen miharateng ko makapahay capeling nangra. (Hipray 12:1, 2) Ikor, haharatengen iso sasamaan a mitodong cangranan.

5. Sasamaan kiso palahad to inaneng a misimsim? Hatiniay a inaneng hano masakalimlaan hani? (ˈOlic 119:9)

⁵ Palahad ato ‘dipoten ko . . . inaneng a misimsim.’ (Taneng 3:21) Iraay ko inaneng a misimsim a tamdaw misaharateratengay a dademak. Hano mamisaˈicel a palahad to hatiniay a inaneng hani? Samanen ˈalomanay a kapah anini maolahay sao niyahan saan ko demak, toor sanay to harateng a dademak. (Taneng 7:7; 29:11) Roma i, taˈangayay ko pifiyor no wanglo tisowanan. Ano hatiraay i, sasamaan kiso milifok to inaneng a misimsim hani? Sarocoden minanam ko safalod no Fangcalay Cudad, hanaca songilaˈen a miharateng onini a safalod iraay ko maanan epoc tisowanan, dotoc sakadademaken ko safalod no Fangcalay Cudad citaneng ko misaˈosian, pakahemek ci Yihofaan. (ˈOsien ko ˈOlic 119:9.) Ano palahadayto kiso to inaneng a misimsim i, itini sakatenesaw a lalan taˈangayayto ko kacakat iso. (Taneng 2:11, 12; Hipray 5:14) Dotoc, nengnengen ko inaneng a misimsim sasamaan itini tosa pakayraan padama tisowanan: (1) itini pikalacafay to fafahiyan salikaka (2) o pilafa to caˈedong.

6. Kapah salikaka ano ira ko inaneng a misimsim i, sasamaan tano mikangodoay a pakayraan micada to fafahiyan salikaka?

⁶ Ira ko inaneng iso a misimsim, o mamafanaˈ mikangodo to fafahiyan. O cecay kapah salikaka ano maolahay to cecay fafahiyan salikaka, sapitongalaw to kafanaˈ cingranan, o matatodongay konini, cowa ko mararaway. Nikawrira, pakaynien i iraay ko inaneng a misimsim a faˈinayan salikaka, ano cowa ka sakaciraramodaw cingra, cowato ko sasomowal to maanan sowalan anca midemak to maanan a demakan miorat to falocoˈ no fafahiyan salikaka. (1 Timoti 5:1, 2) Ano makakaolahayto i, o iraay ko inaneng a misimsim a faˈinayan salikaka mamisaˈicel a midipot to ngaˈayay ngangan no fafahiyan salikaka, ano awaay ko romaroma tamdaw i, cowa ko mamisateked cingra malacafay to fafahiyan salikaka.​—1 Korinto 6:18.

7. Kapah salikaka ano ira ko inaneng a misimsim, itini pilafa to caˈedong sasamaan ko pidemak?

⁷ Iraay ko matatodongay inaneng a misimsim a kapah salikaka itini pilafa to caˈedong citanengay ko mipiliˈan. ˈAlomanay misafacoay to faelohay a rikoˈ, talaˈayaw a mikayat to hekal no tamdaw cowa ka mikangodo ci Yihofaan, anca malafoay ko kaˈorip. O misafacoan nangra a caˈedong no faˈinayan kincoay a makedec, anca hato no fafahiyan a rikoˈ. Mihaenay, itini pipiliˈ to rikoˈ i, o misaˈicelay macakat malo o matenesay a kapah salikaka mamisaka dademak to safalod no Fangcalay Cudad, mitodong to ngaˈayay taˈarawan i kasakopang. Ngaˈayay cingra misaharaterateng: “O mipiliˈan ako paihkalay to matatodongay ko harateng, misikoray to nafalocoˈan no tao han? O caˈedong ako madoloay mahapinang no tao to o soˈliˈlinay midokoay to Kawas a tamdaw kako han?” (1 Korinto 10:31-​33; Titus 2:6) Iraay ko inaneng a misimsim a kapah salikaka, cowa ko pilifok aca to pikangodo no salikaka, mamilifokho to pikangodo no kakarayan Wama ci Yihofa.

8. Kapah salikaka sasamaan minanam malo ngaˈayay pakasoˈlinen a tamdaw?

⁸ Malo ngaˈayay pakasoˈlinen a tamdaw. O ngaˈayay pakasoˈlinen a kapah salikaka misarocoday dademak to kihcod a ˈinorong no niyah. (Luka 16:10) Nengnengen ko patirengan ni Yis malefotay a taˈarawan. Dademak cingra cowa ka kasimaan sa, anca eca ka ciharateng to ˈinorong. Soˈlin cowa ko madoloay, kamayan cingra misaˈicel milahci to patorodan ni Yihofa cingranan a kihcod a tayal. Ciharatengay maolah cingra to tao, mangalef o nisawawaan no niyah, hanaca hayi sanay kinafalah to ˈorip no niyah saki cangranan. (Yohani 13:1) Todongen ci Yis, sarocoden a milahci ko paikenan tisowanan a kahacecay tayal. Ano cowa ka cipinang kiso to sasamaan ko pidemak, ka pisapoener to falocoˈ milicay to matenesay a faˈinayan salikaka. Aka a matoka, pateras sa dademak. (Loma 12:11) Matayal kiso to tayal no kasakopang i, tahiraen i lahci ko pidemak, ‘pakayni ci Yihofaan ko pidemak, cowa ko pakayniay i tamdaw a midemak.’ (Kolosay 3:23) Manaokaniw, cowa ko malefotay kiso, nolatekay mararaway ko demak, mihaenay paihkalen ko misamimingay a waywayan, makahi mihayi to raraw.​—Taneng 11:2.

MINANAM TO CIEPOCAY A INANENG

9. Kapah salikaka hano maminanam to ciepocay a inaneng?

⁹ Mamalo o matenesay a Krisciyang, papalahad kiso to pina ciepocay a inaneng. Papadama konini tisowanan mitamorong to ˈinorong no kasakopang, mahela ko katayalan paririˈ to niyah ato paro no lomaˈ, padamaho tisowanan ngaˈay ko kalalaˈed to tao. Dotoc nengnengen ita ngaˈay kiso palahad to maanan a inaneng.

10-11. O kapah salikaka ano iraay ko inaneng miˈosi mitilid, sasamaan paira to epoc no niyah ato kasakopang? (ˈOlic 1:1-3) (Nengnengen ko coka.)

¹⁰ Palahad to ngaˈayay inaneng miˈosi mitilid. Sowal no Fangcalay Cudad mikingkiw ko tamdaw to romiˈamiˈad to Kimad no Kawas, hanaca misongilaˈ midotim, wa malaˈosi ko kaˈorip a lipahak. (ˈOsien ko ˈOlic 1:​1-3.) To romiˈamiˈad mikingkiw to Fangcalay Cudad, o cacipinang cingra to pakayraan ni Yihofa misimsim, palahad to ihkalay a inaneng a misimsim, mafanaˈ samaan misaka dademak to safalod no Fangcalay Cudad. (Taneng 1:3, 4) Tada misaaliay ko kasakopang to mahaenay a faˈinayan salikaka, misamaanay hani?

¹¹ Misaaliay ko salikaka to sapadama no matenesay a faˈinayan salikaka, mitahidang cangranan mikitini Fangcalay Cudad mihadak to matatodongay a sakayat ato sapaini. (Titus 1:9) Ano iraay ko ngaˈayay a inaneng iso miˈosi ato mitilid, misadayan iso a kimad ato sapacaˈof mamatongal ko kaciepoc, paˈicel to pakasoˈlin no tao. Wa ngaˈayho kiso itini i pikingkiw, kasaˈopoan ato pitaykayan mitengil to kimad ngaˈay ko pitilid to kalimlaan. Oniya mitilidan a kalimlaan wa patanektek to pakasoˈlin no niyah, wa ngaˈay paladaˈen ko tao to mitilidan iso a kalimlaan, ho mapakalalok cangra.

12. Sasamaan kiso palahad to inaneng a masasowal ato tao?

¹² Palahad to ngaˈayay a inaneng masasowal ato tao. O faˈinayan salikaka o maminanam ngaˈay ko kasasowal to tao. O mafanaˈay masasowal a tamdaw misamacayay a mitengil, hanaca misarocod cipinang to harateng ato nafalocoˈan no tao. (Taneng 20:5) O ngangaˈay cingra mikitini i ngihaˈ, papisingan ato kawing no tao cipinang to harateng ningra. Nikawrira, ano caka pipalak kiso to toki malacafay to tao i, caayto ka ngaˈay palahad to mahaenay a inaneng. Ano marariday kiso tano soci, pingpan tingnaw masasowal to tao i, o inaneng iso masasiˈayaw to tamdaw masasowal o mamalingad ko katatiih. Mihaenay, adihayen ko toki masasiˈayaw to tamdaw masasowal.​—2 Yohani 12.

13. O kapah salikaka maminanamho to maanan? (1 Timoti 5:8) (Nengnengen ko coka.)

¹³ Mafanaˈ midimokos to niyah. O matenesay a faˈinayan salikaka o hamamafanaˈ paririˈ to niyah ato paro no lomaˈ. (ˈOsien ko 1 Timoti 5:8.) Itini roma kitakit, o kapah salikaka mikitiniay wama ato salawina minanam to sakaˈorip a inaneng. Itini roma pala, o kapah salikaka itiniay i kawcong minanam to inaneng a matayal. Ano samanayto ko pakayraan iso, mafanaˈ to cecay inaneng papadama tisowanan mahela ko matatodongay a tayal. (Dmak 18:2, 3; 20:34; Ifiso 4:28) Ano dademak kiso kalalok misarocod, tahira i lahci ko pidemak, ano mihaen kiso mamalifok ko ngaˈayay a ngangan, mamadoloto mahela ko katayalan hanaca padadotoc matayal. Kapah salikaka ano palahaden ko milengoan no lalakaw a capeling ato inaneng, ngangaˈayto mitamorong to adihayay a ˈinorong noikor. Dotoc, lengoen ita ko pina a ˈinorong.

MISADAY TO HANOIKORAN

14. O kapah salikaka sasamaan misongilaˈ misaday mirienang to mieminay to toki matayal saki Kawas?

¹⁴ Mirienang to mieminay to toki a matayal saki Kawas. ˈAlomanay matenesay faˈinayan salikaka kaemangho misatapangayto mirienang to mieminay to toki a tayal no Kawas. Misakafah ko kapah salikaka ikor, mafanaˈay to sasamaan ngaˈay ko kalacafay to masakenakenaay a tamdaw, mafanaˈayho sasamaan misaˈosi to matatodongay a sakaˈorip ato miˈimer to mamapalak a payci. (Filipi 4:11-​13) Salakat ngaˈay kiso malo padamaay misakafahay to cecay liyad, papadama koni tisowanan ngaˈay ko pisaday, misatapang malo miceriday misakafahay. ˈAlomanay faˈinayan salikaka mahaenay ko pidemak. Micerid misakafah kiso ikor, wa ira ko toki mirienang to roma mieminay to toki a tayal no Kawas alatek, tinakoen malo patirengay a sikawdan ato matayal itini i Pitil.

15-16. O kapah salikaka sasamaan citatodong malo dama sikawdan anca malohemay malitengay?

¹⁵ Malo dama sikawdan anca malohemay malitengay. Polong faˈinayan salikaka o mamisarocod ira ko tatodong malo malohemay malitengay no kasakopang, matayal saki salikaka. Sowal no Fangcalay Cudad misaˈicel ko faˈinayan salikaka micangacang to mahaenay a patosokan, o ‘masemeray to makapahay a tayal.’ (1 Timoti 3:1) Cecay faˈinayan salikaka ˈayaw no malo malohemay malitengay o sasalakatho ira ko tatodong malo dama sikawdan. O dama sikawdan itini adihayay demakan midamaay to malohemay malitengay. Ano malohemay malitengayto anca o dama sikawdan, o papatalahkal to misapoeneray a waywayan matayal saki salikaka, hanaca fanekfek ko falocoˈ mirienang to mitosilay a tayal. Kapah salikaka soˈlin cowaho ka 20 ko mihecaan, ano ira ko tatodong wa ngaˈay malo dama sikawdan. Cecay dama sikawdan soˈlin taˈlif sanayho to 20 ko mihecaan, ano iraay ko tatodong wa ngaˈayho malo malohemay malitengay.

¹⁶ Sasamaan kiso ira ko hatatodong malo dama sikawdan anoca malohemay malitengay hani? Onini a hatatodong masilsilayto i Fangcalay Cudad. Kawra, ano maolahay kiso ci Yihofaan, maolah to paro no lomaˈ iso, maolahho to salikaka i kasakopang, oha mamisaˈicel a mitoor to masilsilayto i Fangcalay Cudad a hatatodong. (1 Timoti 3:1-​13; Titus 1:6-9; 1 Pitiro 5:2, 3) Saˈicelen a cipinang to maanan ko misahcian a saali no kahacecay a hatatodong, hanaca tolonen ci Yihofa padama tisowanan pakatoor tonini a hatatodong.c

17. O kapah salikaka sasamaan misongilaˈ misaday, malo ngaˈayay faˈinay ato ngaˈayay tawki no lomaˈ noikoran? (Nengnengen ko coka.)

¹⁷ O malo faˈinay ato tawki no lomaˈ. Matira to sowal ni Yis, roma matenesay a faˈinayan salikaka mipiliˈay caka ciramod. (Matay 19:12) Kawra, ano mipiliˈ kiso ciraramod, wa mitamorong kiso to faelohay a ˈinorong, malo faˈinay ato tawki no lomaˈ. (1 Korinto 11:3) Halamhamay ci Yihofa to faˈinay maolah to fafahi, itini notirengan, nofalocoˈan, ato noˈadingoan midimokos to saali no fafahi. (Ifiso 5:28, 29) Ano misaˈicel kiso mipalahad to milengoan noniya lalakaw a capeling ato inaneng, tinakoen palahad to inaneng a misimsim, mafanaˈ mikangodo to fafahiyan, malo ngaˈayay pakasoˈlinen a tamdaw, maherekayto kiso a misaday, malo ngaˈayay a faˈinay ato ngaˈayay a tawki no lomaˈ noikor.

18. O kapah salikaka sasamaan misongilaˈ misaday, malo ngaˈayay a wama noikoran?

¹⁸ Malo wama. Ikor no ciraramod kiso wa ira ko wawa alatek. Pakayni malo ngaˈayay wama, mikitini ci Yihofaan wa adihay ko mamananam iso. (Ifiso 6:4) Patodicek sanay ci Yihofa pasowal ci Yisan to tada maolahay ko Niyah cingranan, tada mihaydaay cingranan. (Matay 3:17) Ano malo wama kiso noikor, ka picerid pasowal to wawa tada maolahay kiso cangranan. Ano ngaˈay ko demak nangra i, pakahemeken cangra. O malo wamaay, ano mitodong to ngaˈayay taˈarawan ni Yihofa, o papadama to wawa malo o matenesay a Krisciyang. Mihaenay, sasamaan ko pisaday iso anini hani? Wa ngaˈay kiso minanam maolah to paro no lomaˈ ato salikaka i kasakopang, hanaca mararid pasowal cangranan to maolahay kiso cangranan, masemeray cangranan. (Yohani 15:9) Mihaen ko demak iso o mamalo ngaˈayayto a faˈinay, ngaˈayay a wama noikor. Cowa konini aca, itini pinengneng ni Yihofa, paro no lomaˈ ato salikaka o masakalimlaan kiso.

SASAMAAN KO DEMAK ISO NOHATINI?

19-20. O maanan ko papadama to kapah salikaka malo o matenesay a Krisciyang? (Nengnengen ko papotalay coka.)

¹⁹ O kapah salikaka, cowa ko fafahal sa malo o matenesayto a Krisciyang kamo. Mamisaˈicel kamo mipiliˈ a mitodong to ngaˈayay taˈarawan, palahad to inaneng a misimsim, malo ngaˈayay pakasoˈlinen a tamdaw, minanam to ciepocay a inaneng ato misaday to noikoran.

²⁰ Ano maharateng adihayay ko hadademaken no niyah, latek tataˈangay ko piroero tisowanan. Kawra aka calemcem, o mamadangar iso. Aka mapawan, ciharatengay ci Yihofa to sapadamaaw tisowanan. (Isaya 41:10, 13) Roma i, o salikaka i kasakopang mamipadama tisowanan. Malo o matenesayto a faˈinayan salikaka kiso ikor, tada kasemeranto ko hakelong no kaˈorip iso, mamarenecen ko falocoˈ iso. O kapah salikaka, tada maolahay kami tamowanan! Misaˈicel kamo a malo o matenesay a Krisciyang, maedeng mamilifok to kadofahay a sapalifon ni Yihofa.​—Taneng 22:4.