O Roma a Demak Cowa ka Cipinang Kita, ka Misapoener a Micada

1. Pafelian ni Yihofa kita to manan a inaneng? Misamaanay?

O MISANGAˈAN ni Yihofa kita o kesemeran! Pairaan Ningra ko inaneng ita a midotim, minanam to faelohay a demak, cipinangho misakadademak to mananamay ita a demak. Hano haenen Ningra misangaˈ kita hani? Samanen makalimay Cingra kitanan ‘mikilim to milingatay to Kawas a sifanaˈ’, halo misakadademak to misimsimay a inaneng midoko Cingranan.—Taneng 2:1-5; Loma 12:1 ato roma pihongyak.

2. (1) Mamihayi kita to citolasay ko ˈicel i masamaanay a demakan hani? (Yopu 37:23, 24) (Nengnengen ko coka.) (2) Misapoener kita mihayi to citolasay ko ˈicel no niyah, hano caciepoc ko niyah hani?

² Iraay ko ˈicel ita minanam to demak, kawra awaay ko hapakayraan ita mafanaˈ to kihcod a demak. (ˈOsien ko Yopu 37:23, 24.) Nengnengen ita ko tinakoan ni Yopu. Licayan ni Yihofa ci Yopu to pinapina a salicay, telocto i, mahapinangay ni Yopu adihayay a demak cowa ka fanaˈ ko niyah. Malifa toniya demak ikor, misapoenerayto ci Yopu, misalofho to harateng no niyah. (Yopu 42:3-6) Mahecaday, awaay ko hapakayraan ita mafanaˈ to kihcod a demak. Ano misapoener kita micada tonini a demak, mamilifok to adihayay a epoc. Wa mangalef ko pitiˈer ita ci Yihofaan, pakasoˈlin to papasifanaˈen Ningra kita to soˈlinay hakafanaˈan no mita a demak, pairaen ita ko citanengay a pisaˈosi.—Taneng 2:6.

3. Oniya lalakaw mamilengo to manan?

³ Oniya lalakaw mamilengo to pina cowa ko kafanaˈan ita a demak, ato ano cowa ka fanaˈ toniya demak, alatek papaira to masamaanay a pasangar. Oniya lalakaw mamilengoho, cowa ka fanaˈ kita to romaroma a demak, hano pairaay to epoc no mita. Oniya lalakaw wa patongal to pakasoˈlinay falocoˈ no mita, pakasoˈlin to o soˈlinay hakafanaˈan ita a demak, ‘mafanaˈay to kihcod’ a Kawas wa fanaˈen Ningra kita.—Yopu 37:16.

COWA KA FANAˈ KITA TO SALIKORAY A ROMIˈAD TO HACOWA AIRA

4. Mikitini i Matay 24:36, cowa ka fanaˈ kita to manan a demak?

⁴ ˈOsien ko Matay 24:36. Cowa ka fanaˈ kita ihacowa ko hererekan noniya lekakawa. Sowal no sinael, ‘ora romiˈad, ora toki,’ i fafekangho no sera ci Yis i, cowa ka fanaˈ cingra.a Edengan ci Yihofa ko miˈemetay to toki a Kawas. ˈAyaw no patikol ci Yis tayra i kakarayan i, na pasowalay to nisawawaan, edengan i kakarayan a Wama ‘ngaˈ ira ko fadangalan a misaˈosi’ to romaroma a demak wa ihacowa a mifekad. (Dmak 1:6, 7) Misaˈosiayto ci Yihofa ihacowa a palaˈafo toniya lekakawa, kawra cowa ka fanaˈ kita to mamifekad a tatokian.

5. Samanen cowa ka fanaˈ to hacowa ira ko salikoray a romiˈad, alatek wa ira ko masamaanay a harateng no mita hani?

⁵ Mikitini i sowal ni Yis mahapinangay ita, ˈayaw no aira ko salikoray a romiˈad, cowa ka fanaˈ kita to hakowa ko halafin a mitala. Telocto i, alatek wa malahdaw ko mihadidiay a falocoˈ ita, masomad matoledto ko falocoˈ. Ano halafinayto ko mihecaan a mitala kita i, alatek mangalefay ko nika toled no mita. Roma i, ano pakayni cowaho ka aira ko salikoray romiˈad a malikaf no tao kita, alatek wa mararom kita, hanaca sapisawadaw sato. (2 Pitiro 3:3, 4) Alatek saan ko harateng ita: “Ano mafanaˈ kako to hacowa ira ko salikoray a romiˈad, mamadolo a padadotoc mihadidi, caka pikihar to pilikaf no tao.”

6. Cowa ka fanaˈ to hahacowa ira ko salikoray a romiˈad, o manan ko epoc i kitanan hani?

⁶ Soˈlinay i, cowa pifanaˈ ci Yihofa kitanan to hacowa ira ko salikoray a romiˈad, pairaen ko toki ita a paihkal, pakayniay i olah ato pakasoˈlinay no mita a midoko Cingranan. Cowa ko pakayniay kita to aira a romiˈad ngaˈ midoko ci Yihofaan, hato citolasay ko romiˈad no pidoko no mita. Aka haharateng sa hacowa ira ko ‘romiˈad ni Yihofa,’ ao haharatengen ko kairaan nora romiˈad toha papalaˈosi ci Yihofa to tadamaanay a demak. Mihaen, wa mangalef ko olah ita Cingranan, pakasoˈlin a mitiˈer Cingranan, mamisarocod kita a midemak to kahemekan Ningra.—2 Pitiro 3:11, 12.

7. O manan ko kafanaˈan ita?

⁷ Ngangaˈay saharateratengen ita ko kafanaˈan no niyah a demak. Tinakoen, oniya hekal itini 1914 miheca tayniay to i salikoray a ˈawaled. Pakayni i Fangcalay Cudad, ci Yihofa cowa ko pairasol aca toniya masakalimlaan a miheca, pairasolayho to ikor no 1914 miheca, o masamaanay ko pakayraan noniya hekal. Mihaenay, pakasoˈlinay kita ‘mangataayto ko romiˈad ni Yihofa’ (Cifaniya 1:14) Roma i, mafanaˈay kita patorodan ni Yihofa to cecay a tayal, oha mamisaˈicel mifanaˈ to ˈalomanay to ‘ngaˈayay lihaf no Hongti Kitakit.’ (Matay 24:14) Oniya ngaˈayay lihaf tano mataˈlifay ko 1,000 a sasowalen, itini maedeng 240 a kitakit ato kilac a milasil. Cowa ko kafanaˈan ita ‘kora romiˈad, kora toki,’ kamayan a fanekfek a mirienang toniya ciepocay a tayal.

COWA KA FANAˈ KITA ALATEK SASAMAAN KO DEMAK NI YIHOFA

8. O “dademaken” no Kawas o manan ko mitoroˈan? (Patnakay 11:5)

⁸ Cowa ka cipinang kita to “dademaken” no Kawas maemin, oya sapalaˈosiaw ko Kawas to araaw no Niyah i, mamisamaan ko demak, anca mihayiay to manan a demak mifekad. (ˈOsien ko Patnakay 11:5.) Cowa ka cipinang kita hano mihayi ci Yihofa kitanan tahalifa to romaroma a demak, cowa ka cipinang sasamaan Cingra padama kitanan. (ˈOlic 37:5) Onini a demak cowa ka cipinang kita, mahecaday to cowa ka cipinang ko kakakosiya to i poyapoyayho a wawa samaanay lomahad i tiyad no wina.

9. Cowa ka fanaˈ to sasamaan ko demak ni Yihofa, alatek wa samaan ko harateng ita hani?

⁹ Samanen cowa ka fanaˈ kita to sasamaan ci Yihofa padama kitanan, mansa ano mamisaˈosi kita i, alatek cisasaay ko falocoˈ, tinakoen mamikinafalah ko niyah a matongal matayal saki ci Yihofaan hokira, anca mamalinah tayra to cisaaliay to mitosilay a kilac. Roma i, samanen cowa ka fanaˈ kita to dademaken ni Yihofa maemin, itini i roma a pakayraan, alatek wa cisasa kita to malahdawayto ko pihayda Ningra to niyah. Oniya pakayraan mahawpay, misaˈicel kita kawra cowa ka malaˈosi itini pidokoan a patosokan, anca misarocod kita mirienang to mitosilay a tayal, kawra awaay ko minaroˈan, anoca fanekfek kita mirienang to tayal no likakawa, ˈarawhan tahalifaay to adihayay pasangar.

10. Cowa ka fanaˈ kita to sasamaan ko demak ni Yihofa, wa madoloto palahad to manan masakalimlaan a capeling hani?

¹⁰ Cowa ka fanaˈ kita to sasamaan ko demak ni Yihofa, wa madoloto palahad to masakalimlaan a capeling, tinakoen misapoener ato misamimingay ko falocoˈ. Mamahapinang ita, o miharatengan ni Yihofa ikakaay tono mita. (Isaya 55:8, 9) Roma i, wa mangalef ko pitiˈer ita ci Yihofaan, pakasoˈlin to patorod to kihcod no niyah i Cingranan o citanengay. Mirienang to mitosilay a tayal anca o roma tayal no likakawa i, ano ira ko makapahay a minaroˈan, wa panokayen ita ko ˈdil ci Yihofaan. (ˈOlic 127:1; 1 Korinto 3:7) Kawra ano cowa ka hecad ko teloc to miharatengan i, haratengen ita, o kihcod a demak itiniay i sakayat ni Yihofa. (Isaya 26:3) Misaˈicel kita to madangaray no niyah a demak, o romato i, patorod hanto ci Yihofa, pakasoˈlin Cingranan to papadadotoc a padama kitanan. Soˈlin cowa ka sano litenganho Cingra a tano kafahkaˈan a mikayat kitanan, kamayan kita a pakasoˈlin to papafelien Ningra kita to sakayat.—Dmak 16:6-10.

11. Mafanaˈay kita to manan kalimlaan a demak hani?

¹¹ Caceriden miharateng ko kafanaˈan ita a demak. Mafanaˈay kita, awaay ko tolas no taneng ni Yihofa, masadafdafay ko pidemak, matomesay ko olah Ningra. Mafanaˈayho kita, misalimlaay ci Yihofa to pakayni Cingranan ato salikaka a midemakan ita a kihcod. Mafanaˈayho kita, papalifonen ni Yihofa ko madimadiay Cingranan a tamdaw.—Hipray 11:6.

COWA KA FANAˈ KITA SASAMAAN NOCILA

12. Mikitini Yakop 4:13, 14, cowa ka fanaˈ kita to manan?

¹² ˈOsien ko Yakop 4:13, 14. Oniya sinael somowalay to taenengan a kimad, oya cowa ka fanaˈ kita to mamifekad ko manan a demak nocila. Itini toniya lekakawa i, tahalifaay kita to manan a demakan, misalalangian to ‘toki ato cowa ko kafanaˈan a demak.’ (Patnakay 9:11) Mansa, cowa ko kafanaˈan ita to mamalaˈosi ko mihalakaan no niyah hokira, hanaca cowa ka fanaˈ kita itira tora tatokian i, maˈoripayho ko niyah hokira.

13. I nokaˈorip o cowa ko kafanaˈan ato noka falic, alatek mamisamaan a pifiyor kitanan hani?

¹³ I nokaˈorip matomesay ko cowa ko kafanaˈan ato noka falic, alatek pairaay to pasangar no mita. Hano haenen ko sowal hani? Alatek calemcemay kita to noikoran a malahdaw ko lipahak. Fahal sanay a noka falic ato pades, alatek pakaroray kitanan. O roma i, hinatalaan a demak cowa ka laˈosi, alatek patoleday kitanan a makesem.—Taneng 13:12.

14. O soˈlinay a lipahak i, o manan ko misalalangian? (Nengnengen ko coka.)

¹⁴ Ano o mananto ko malitemohay ita a sapalifet padadotocen a mihadidi, misawacayay koni midoko kita ci Yihofaan o pakayniay i olah Cingranan, cowa ko pakayniay i notekedan a coos. Paihkalay ko Fangcalay Cudad, cowa palahdaw ko Kawas to kihcod a pasangar i nokaˈorip ita, cowa ka talaˈayaw a milimasmas to kahacecay a demak ita i nokaˈorip. Cipinangay Cingra, soˈlin cowa ka fanaˈ kita to hanoikoran a demak wa ngaˈay lipahak ko nokaˈorip, samanen o soˈlinay a lipahak i, misalalangiay to micangacang kita to sakayat a midofdof Cingranan hokira. (Yirimiya 10:23) Ano hamamisaˈosi kita i, micangacang to sakayat ni Yihofa, hato sanay ko harateng a pasowal: “Ano o harateng ni Yihofa i, oha ngangaˈay kita a maˈorip, ngangaˈayho midemak tonini ato riraan.”—Yakop 4:15.

15. Pakayni hanoikor, o manan ko kafanaˈan ita?

¹⁵ Soˈlin cowa ka fanaˈ kita to nocila mamifekad ko manan a demak, kawra pakayni to noikor, mafanaˈay kita to pina a demak. Halo mikiˈokayto ci Yihofa wa pafelien Ningra to tahadaˈoc a ˈorip, ho ngaˈay kita i kakarayan anca i fafekang no sera tahadaˈoc midoko Cingranan. Mafanaˈayho kita, cowa ko misamangahay ci Yihofa a Kawas, awaay ko maamaan a demak to mamiconged Cingranan a palaˈosi to polong a sakiˈok. (Titus 1:2) Edengan Cingra ko ‘nai satapangan mapaliˈayawto ko pahererekan no demak, naiti:yaho masowalayto ko noikoran a demak.’ Soˈliˈlin adihayayto ko malaˈosiay to sapairasol Ningra, o roma i, wa malaˈosi maemin. (Isaya 46:10) Mafanaˈayho kita, awaay ko manan a demak to mamiconged to olah no Kawas kitanan. (Loma 8:35-39) Ano manan ko mafekaday a pasangar i nokaˈorip, wa hinomen ni Yihofa kita, pafeli kitanan to taneng ato ˈicel, ho ngaˈay kita a mihadidi. Pakasoˈlin kita, wa padamaen ni Yihofa kita a palemed.—Yirimiya 17:7, 8.

COWA KA FANAˈ KITA TO TADA CIPINANGAY CI YIHOFA KITANAN

16. Mikitini i ˈOlic 139:1-6, cowa ka cipinang kita to manan?

¹⁶ ˈOsien ko ˈOlic 139:1-6. O Misangaˈay a Tapang ci Yihofa kitanan, mafanaˈay Cingra to masamaanay a tamdaw kita, mafanaˈayto milifetan a kihcod to samaanay milingat to falocoˈ no mita. Padadotocay ci Yihofa ciharateng kitanan. Mafanaˈay Cingra to o manan ko sowal ita, cipinangayho to soˈlinay a harateng no mita. Mafanaˈayho Cingra to o manan ko midemakan no mita, cipinangayho hano mahaen ko demak no mita. Mahecaday to sowal no Hongti ci Tafiti, i taliyokay ci Yihofa kitanan, tano sidaˈitay a minengneng kitanan, toha sapipadamaaw kitanan. Misangaˈay to maamaan a saˈakawangay a Tatapangan, mihaen a ciharateng to mimingay kita a tamdaw! Sanay ci Tafiti cedaˈah a pasowal: ‘Tangongolay ko kafanaˈ Iso takowanan, pakayni takowanan tada o kasemeranto; o kafanaˈ iso takowanan, awaay ko hapakayraan ako a cipinang.’—ˈOlic 139:6 ato roma pihongyak.

17. Hano pasangaran nanay kita pakasoˈlin to cipinangay ci Yihofa kitanan hani?

¹⁷ O roma tamdaw alatek pakayniay i kalomahadan, serangawan anca pihakelongan, pasangaran nanay minengneng to o ciolahay a Wama ci Yihofa. O roma a tamdaw miharateng pakidemay ko raraw no niyah isalakat sanay, mansa sanay a miharateng: “Cowa ko sakacipinangaw ci Yihofa takowanan, wa miliyas Cingra i ra:ay takowanan.” Ano ci Tafitito i, iraay ko mahaenay a harateng. (ˈOlic 38:18, 21) O roma tamdaw sapidofdofaw to kaolahan ni Yihofa a pakayraan a maˈorip, kawra sapifalicaw i, pasangaran nanay. Alatek wa saan cangra a miharateng: “Ano soˈlinay cipinang ci Yihofa takowanan i, hano pacieciho takowanan a mifalic hani?

18. O kafanaˈan ni Yihofa kitanan ikakaay to niyah, micada kita toniya demak o manan ko epoc hani? (Nengnengen ko coka.)

¹⁸ Pakasoˈlinen ita, o kafanaˈan ni Yihofa kitanan ikakaay to niyah. Manengnengay Ningra ko kangaˈayan ita, mahawpay ko cowa ko kafanaˈan no mita. Manaokaniw, maˈaraway Ningra ko dangoc no mita, kawra mafanaˈay Cingra to sapidemakaw to matatodongay a demak kita, mansa maolahay Cingra kitanan. (Loma 7:15) Misinanotay ci Yihofa to mamadangar ita a demak, mafanaˈ kitanan to malo masamaanay a tamdaw. Pakasoˈlin kita toniya demak i, wa ciˈicelto a madimadi Cingranan, mahemek a mihodop Cingranan.

19. Pakayni ci Yihofaan, o manan ko kafanaˈan ita?

¹⁹ Pakayni ci Yihofaan, o manan ko kafanaˈan ita? Mafanaˈay kita, o olah ci Yihofa. O soˈlinay koni, aka cisasa! (1 Yohani 4:8) Mafanaˈay kita, ano o mananto ko papidemaken ni Yihofa kitanan anca aka pidemak to manan, sahtoay pakayniay i olah kitanan, ato sakaciepocaw no mita a miharateng. Mafanaˈayho kita, makalimay ci Yihofa kitanan tahadaˈoc a maˈorip, samanen pafeliayto Cingra kitanan to sapatefoc ni Yis. Oniya masakalimlaan a sapatelong pakasoˈlinay kita, soˈlin cowa ko malefotay kita, kamayan kita micada to pihayda Ningra. (Loma 7:24, 25) Mafanaˈayho kita, ‘ikakaay ko falocoˈ no Kawas tono mita a mafanaˈto kihcod.’ (1 Yohani 3:19, 20) Cipinangay ci Yihofa to kihcod no mita a demak, pakasoˈlinay Cingra kitanan, to hamamidoedo to kaolahan Ningra a pakayraan midoko Cingranan.

20. Misamaan ko demak ita ngaˈ, eca ka pakidem ko cariraw hani?

²⁰ Oha kafanaˈan ita a demak, pasowalanto ni Yihofa kita. Misapoener kita micada toniya demak, cowato ka cariraw kita to cowa ka dangar no niyah a demak, wa misarocod i masakalimlaan a demak. Mihaen ko demak ita paihkalay to misarocoday pakasoˈlin ko niyah to ‘mafanaˈay to kihcod a Kawas.’ (Yopu 36:4) Soˈlin citolasay ko kafanaˈan ita nohatini, kawra wa ngaˈay kita hinatala to noikoran tahadaˈoc a micada to sapakafanaˈ ni Yihofa, padadotoc a misolap to kasapaan Ningra a demak!—Patnakay 3:11.