Pinengnengan to Lalakaw no Mitosilay ato Nikaˈorip Rayray no Saˈopo
SAKA 1 FOLAD 4-10 ROMIˈAD
O ODOˈ KO KIMAD NO KAWAS | LIFI 18-19
“Roceken Makorac ko Waywayan”
Dofdofen ci Yihofa, Miliyas to Talakal ni Satan!
Pasowalan ni Yihofa ko Israil tamdaw to tatiihay a waywayan no taliyokay a finacadan. Palimoˈoten cangra: ‘Oya kakeriden Ako tamowanan a Kanan pala, aka a pidemak kamo to demak no itiraay tamdaw, . . cowa ka korac ko sera nangra. O sasawkiten Ako ko raraw nora sera.’ O pinengneng no makoracay a Kawas, tada manaholay ko kaˈorip no Kanan tamdaw, mansa o cikaditay ko kitiraan nangra saan ko Kawas.—Lifi 18:3, 25.
w17.02 20 fiedac 13 fatac
Mikayatay ci Yihofa to Finawlan Ningra
13 O madimadiay a hongti no Israil tada taˈangayay ko kasasiroma to ˈaˈideman no roma finacadan a kitakit! Cangra i, tano pakatamdaway a harateng a mikowan to finawlan, ˈapotoay ko kapinengneng nangra to demak. Patinakoen, o hongti no Kanan ato kalo tamdaw namidemakay to kaˈacekan a demak, miˈodang to salawina, maˈaˈodang ko faˈinayan to faˈinayanto, maˈaˈodang ko fafahiyan to fafahiyanto, milamo ko tamdaw to ˈaˈadopen, mitaˈong to samiyay, patafang to wawa malo sapatoˈaya to makaniway kawas. (Lifi 18:6, 21-25) Ano o ˈaˈidemanto no Papilon ato Icip caay ka hatira ci Yihofaan, pafeli to matooray kono aniniay kakaku a palinian i makoracay a demak. (Saˈosi 19:13) Maˈaraw nolitengan finawlan no Kawas ko minilnilan Ningra a madimadiay a sikawdan to samaanay padama cangranan itini noˈadingoan, waywayan ato tatirengan mitafo to makoracay i, mahapinangay nangra o ci Yihofa ko ˈaˈideman nangra.
w14 7/1 7 fiedac 2 fatac
Sasamaanen no Kawas ko Midemakay to Tatiihay a Tamdaw
Oya mariyangay caay kakahi mifalic to waywayan, dademak sanay to tatiihay a tamdaw, sasamaanen no Kawas cangra hani? Ihekalay somowal ko Fangcalay Cudad: “O moecelay soˈlinay ko falocoˈ a tamdaw i, o mamapakamaroˈ tonini a sera. Nikawrira, o wawaniken no Kawas ko tatiihay a tamdaw naitini tonini a sera a matiya o pifangad to talod ko pipalasawad Ningra to ciraraway a tamdaw.” (Taneng 2:21, 22) Ano malahdawto ko tatiihay tamdaw maemin i, o rarihadayto ko polong no hekal, o midofdofay a tamdaw papalidlid sato malahdaw ko mirocokan a raraw, malo malefotayto ko ˈorip.—Loma 6:17, 18; 8:21.
Odoˈ no Sinael
w06 6/15 22 fiedac 11 fatac
Tada Maolah Kako to Rikec Iso!
11 O cecay saˈosi no Rikec ni Mosi patalahkalay to nika ciharateng no Kawas to finawlan Ningra. Pakayniay to mipodpoday to masidsiday a panay. Palimoˈotan ni Yihofa ko maomahay tamdaw, ano mipanay cangra i, pairaen ko papodpoden no manikaway tamdaw a masidsiday a panay. Aka haemin han miritrit ko tadimocokan no omah, aka eminen a miala ko heci no fadisosoˈ i omah, aka podpoden ko matefaday a heci no olif. Aka pitikol a miala to mapawanay a lolong no emi i omah. O matiniay a limasmas patahkalay to ciharatengay ko Kawas to manikaway tamdaw, pacarcaray tamdaw, o pakoyoc ato maponengay fafahiyan. Manaokanaiw tada marorayay ko miloficay a demak, kawra mihaen cangra ngaˈ ira ko kakaenen nangra.—Lifi 19:9, 10; Limoˈot 24:19-22; ˈOlic 37:25.
SAKA 1 FOLAD 11-17 ROMIˈAD
O ODOˈ KO KIMAD NO KAWAS | LIFI 20-21
“Pasiekeden ni Yihofa ko Finawlan Ningra ato Romaroma Finacadan”
w04 10/15 11 fiedac 12 fatac
O Hano Namo a Lakoing
12 ˈArawhan, iraay ko cecay demak to cowa ko sasakahemawen nangra. Pasowalan no Kawas ko Israil tamdaw: “Pidoedo kamo to nisowalan Ako i tamowanan anini a limoˈot a maemin. Hongaˈ tanoktok kamo, micomod a miˈafas tora sera.” (Limoˈot 11:8) O matiliday i Lifi 20:22, 24, somowalay ko Kawas tonini a sera: “O dadoedoen namo a maˈimer ko rikec ato limoˈot Ako a maemin, ta ano keriden Ako kamo a pacomod toya Kanan a pala i, caay ka laplap kamo. Maharekto Kako a miketon to sowal i tamowanan to sapafeliaw tora cihacolay ciwanengay no ˈodal a mamatangay a sera to malo omah namo.” Masapinangay ita itini, mamaala no Israil tamdaw kora sera hokira, milingatay to nika ngaˈay no kalalaˈed nangra aci Yihofa ko piˈarawan. Mankora, saka malowid no Papilon ko Israil tamdaw, samanen caay ka madimadi cangra.
it-1 701 fiedac
Saparocek a Hafay
Iraay ko tatodong a mirocek to hafay no tatoˈasan anca hafay no mapatayay tamdaw. O na·chalʹ hananay no Hipray sowal, mitoroˈan i, micadaay anca milayapan a saparocek sanay. (Saˈosi 26:55; Icikil 46:18) Nolatekay ya·rashʹ hananay mihongyak, mitoroˈan i, “o saparocek to mamilayap a tamdaw”, kawra marariday o “miˈafasan” sanay ko tatodong. (Satapangan 15:3; Lifi 20:24) Onini a tilid iraay ko “miˈafasan, milaplapan” o sanay a tatodong, matiraay o “miloodan” a miˈafas. (Limoˈot 2:12; 31:3) O saparocek a hafay sanay a Krisiya a sowal i, o kleʹros hananay, saˈayaw o “miritosan” sanay ko tatodong, ikor a tatodong “malacafay a milayap”, saikoikorto i, “micadaay to hafay” sanay ko tatodong.—Matay 27:35; Dmak 1:17; 26:18.
it-1 1212 fiedac 6 fatac
ˈAyam
Masaˈsaˈto ko Lenlen ikor, pacakatan ni Nowa ko “makoracay ˈayam” pahakelong to ˈaˈadopen malo sapatoˈaya i Kawas. (Satapangan 8:18-20) Ikor i, mihaydaan no Kawas ko tamdaw a komaen to ˈayam, edeng caay ka ngaˈay komaen to remes nira. (Satapangan 9:1-4; palalinien to Lifi 7:26; 17:13.) Na somowalay ko sinael to “makoracay” a ˈayam, mitoroˈan nonini milayapan no Kawas ko matiraay a ˈayam malo sapatoˈaya; pakayni to mamalo kakaenen a ˈayam, o matiliday i Fangcalay Cudad i, ˈayaw no Rikec ni Mosi, awaay ko maanan a ˈayam to “kaacekan” to caay ko ngangaˈay a kaenen. (Lifi 11:13-19, 46, 47; 20:25; Limoˈot 14:11-20) Cowa ka pitadtad ko Fangcalay Cudad to o masamaanay a ˈayam ko “makoracay” to ngangaˈay malo sapatoˈaya. Soˈliˈlin o kaacekan a ˈayam hananay i, sahtoay o taˈangayay a ˈayam anca o komaenay to maponiˈayto a ˈayam, kawra cowa ka sahto saan a hatira. (Nengnengen ko HOOPOE.)Tiya paˈarawen no Kawas ci Pitiro i mapulusi i, o mahaenay a pikeceng malasawadayto itiya mapatireng ko faelohay katatelekan.—Dmak 10:9-15.
Odoˈ no Sinael
it-2 1212 fiedac
Mikonis a Midokaˈ to Tireng
Misaheciay a misaˈosi ko Rikec no Kawas, to caay ka ngaˈay mikonis a midokaˈ to tireng pakayni i mapatayay tamdaw. (Lifi 19:28; 21:5; Limoˈot 14:1) Samanen o fangcalay finawlan ni Yihofa ko Israil tamdaw, hanaca o mikiriwiˈay a hafay Ningra. (Limoˈot 14:2) O mamiliyas ko Israil tamdaw to kihcod mitaˈongay to samiyay a demak, mahawpay ko mikonisay a midokaˈ to tierng a demak. Masongilaˈay mafanaˈ ko Israil tamdaw to samaanay ko mapatayay a tamdaw, hanaca mafanaˈay to patikolay maˈorip a hatokel, mihaenay haw i, mikonisay a midokaˈ to tireng a demak a paihkal to pakidemay a noka rarom, cowa ko matatodongay. (Taniil 12:13; Hipray 11:19) O romasa i, saka mikeceng ko Rikec to mikonisay a midokaˈ to tireng o sapatalipaˈelalaw to Israil tamdaw, o mamisakareteng cangra to nisangaˈan no Kawas a tireng nangra.
SAKA 1 FOLAD 18-24 ROMIˈAD
O ODOˈ KO KIMAD NO KAWAS | LIFI 22-23
“O Lisin Nolitengan Iraay ko Manan Tatodong i Titaanan”
it-1 457-458 fiedac
Kaecaan Patamod to Epang a Lisin
Saka cecay romiˈad no Kaecaan Patamod to Epang a Lisin o mamisikay to fangcalay saˈopo, paselaˈan a romiˈad. Saka tosa a romiˈad (Nisan folad 16 romiˈad) alaen ko cecay rorong no saˈayaway niketosan a emi pafelien ko saysi. ˈAyaw nonini a lisin, aka komaen to faelohay a emi; ano o midohdohan a faelohay emi anca misangaˈan epang no faelohay emi, aka kaenen. O aitini i kaˈayaw ni Yihofa miwatawat ko saysi a pacakat tora saˈayaway a miketosan a emi, patoˈaya ci Yihofaan. Itiya toya romiˈad i, o aalaen no saysi ko cecayayho ko mihecaan awaay ko samoˈay a okangan a tofor a siri malo misakimoodan a mitodoh, halo pahakelongen to cicamolay to simal a aped no emi, ato epah a pacakat. (Lifi 23:6-14) Itiya i, caay palimoˈoten ko saysi to tatodohen kora miketosan ato aped no emi, ˈarawhan o lalikolikoray a saysi mihaenay to demak. Itini toni Kaecaan Patamod to Epang a Lisin, o papatadoen no saysi ko finawlan pacakat tora saˈayaway a niketosan a emi, o kahacecay a paro no lomaˈ ato Israil tamdaw oha papacakat to sapiakoˈid a sapatoˈaya.—Kasadakan 23:19; Limoˈot 26:1, 2; nengnengen ko SAˈAYAWAY A NIKETOSAN.
Kalimlaan a Tatodong. Komaen to caay patamoden a epang ko Israil tamdaw itini tonini a lisin, malecaday toya sapalimoˈot ni Yihofa ci Mosian. Matiliday kora limoˈot i Kasadakan 12:14-20, saka 19 sinael sowal sa: “Itini tonini a pito a romiˈad i, caay ka ngaˈay a ira ko tamod no epang i lomaˈ namo.” Itini i Limoˈot 16:3, o ‘kapadesan a epang’ hananay kora caay patamoden a epang. Komaen ko Yutaya tamdaw tonini epang to mihecahecaan o sapatalipaˈelalaw cangranan, kataringafoh sanay a miliyas to Icip ko tatoˈasan nangra (awaay ko toki mipafoak to emi itiya [nengnengen ko Kasadakan 12:34]). Mihaen i, maharateng nangra ko pilidong no Kawas i cangranan miliyas to kalakuli a mapades i Icip, mahaen o sowal ni Yihofa, ‘hongaˈ caay ko mamapawan namo koya romiˈad to nika sadak nai Icip.’ Masapinangayto no Israil tamdaw o mapasalatayto a kitakit cangra nohatini. Mihayay to o ci Yihofa ko milidongay i cangranan, orasaka lipahak a misalisin toniya saka cecay a noka pisalisin to mihecahecaan.—Limoˈot 16:16.
it-2 459 fiedac 6 fatac
Saka Lima Poloˈ a Romiˈad
Masasiromaay ko nika pisaday to emi ato taˈangayay a emi. Alaen ko tolo kongcin a safangcalay aped no emi, patamoden a midohdoh ko tosa a epang. Alaen nai i lomaˈ namo sa kora sowal, tatodong o nikaenan nangra to kalo a romiˈad a epang, ao cowa koya papacakaten a sapatoˈaya o sanay. (Lifi 23:17) O romasa i, papacakaten ko misakimoodan mitodoh ato sapihepol to raraw a sapatoˈaya, ato tosa okangan lalifanohen a tofor a siri malo sakarihaday a sapatoˈaya. Aitini i kaˈayaw ni Yihofa ko saysi a miwatawat tora epang atora lalifanohen a tofor a siri, patahkalay konini to pacakatay a mipatoˈaya ci Yihofaan. Maharekto a pacakat tora epang atora tofor a siri ikor, papafelien ko saysi, malo sakarihaday a sapatoˈaya a kaenen nangra.—Lifi 23:18-20.
w14 5/15 29 fiedac 11 fatac
Mitooray Kiso to Likakawa ni Yihofa a Talaˈayaw Han?
11 Pakayni to sakaciepocaw no mita, pakalalokay ko likakawa ni Yihofa kitanan mitengil to sowal ni Pawlo: “Ka sasipaˈicel, masasiolah a makakakowad, o sakangaˈayaw no demak ita. Aka a pisawad a masaˈopo, matiya o nanaman no romaroma a tamdaw, masasipaˈicel ko ngaˈay. Tona mahapinangto namo ko nika ngatato noya romiˈad, tongalen tongalen ita ko nika pihaen to demak.” (Hipray 10:24, 25) Itini i nolitengan, to mihecahecaan misalisinay ko Israil tamdaw, miceriday a malisopsop a midoko to Kawas, mankora mapaˈicel ko pasoˈlinay falocoˈ nangra, tada malipahak cangra. Patinakoen o maˈoningay i Fangcalay Cudad, itini i lintad ni Nihimiya, lipahakay ko Israil tamdaw misalisin to Taloˈan a Lisin. (Kasadakan 23:15, 16; Nihimiya 8:9-18) Anini i, mirienang kita to saˈopo ato taykay, o papaˈicel to pasoˈlinay falocoˈ, taˈangay ko kalipahak. Mihaenay haw i, saˈicelen ita mirienang konini a demak.—Titus 2:2.
Odoˈ no Sinael
Ka Madimadi!
3 Ano pakaynien to midokoay to Kawas tamdaw ko sowal, “madimadi” hananay i, aeminen ko falocoˈ a maolah ci Yihofaan, misarocod a madimadi i Cingranan o sanay, ˈayaw no mamisaˈosi to demak isalakaten a miharateng ko araaw ni Yihofa. Misamaanay hano saan ko sowal hani? Itini i Fangcalay Cudad, madimadi sanay i, misarocoday, tanektekay, masaheciay o sanay ko tatodong. Patinakoen, ano patoˈaya ko Israil ci Yihofaan i, saˈosi no Rikec ni Mosi, o awaay ko samoˈ a pinaˈorip ko papacakaten sanay. (Lifi 22:21, 22) Caay ka ngaˈay pacakat to masamoˈay anca ciadadaay a pinaˈorip. Pakayni ci Yihofaan ko sowal, o tanektekay caay ka samoˈ ko tatirengan a sapatoˈaya tada masaka limlaan. (Malaki 1:6-9) Misamaanay hano kaciharatengan ni Yihofa ko tanektekay caay ka samoˈ a sapatoˈaya hani? Tano tinakoen ita a mitadtad: Ano micakay kita to dafong, ano losayha, cudadha, anca lalosidan, cowa ka olah kita to cidangocay anca cangoˈotay ko manan lalomaˈay dafong, maolahay kita to malefotay a dafong. Minengneng ci Yihofa to olah ato madimadi ita mahaenay ko piharateng, o olah ato madimadi ita misarocoday, awaay ko cangoˈot wangaˈ.
SAKA 1 FOLAD 25-31 ROMIˈAD
O ODOˈ KO KIMAD NO KAWAS | LIFI 24-25
“Kalipahakan a Mihecaan ato Aaira no Ikoran a Pasalat”
it-2 1212-1213 fiedac
Pasalat
Pasalat no Kawas. O pasalatay a Kawas ci Yihofa. Milidongan Ningra ko Israil tamdaw paliyas to nika kuli i Icip, milifok to pasalat. Pasowalan Ningra ko Israil, ano midofdof cangra to limoˈot Ningra i, caayto ko cacangoˈot cangra to pasalat. (Limoˈot 15:4, 5) Somowalay ci Tafiti to iraay ko rihaday ato pasalat no i Yirusalimay a niyaroˈ, ‘awaay ko cariraw.’ (ˈOlic 122:6, 7) Kawriraan, o sowal no Rikec ano manikaw ko Hipray tamdaw, ngaˈayay pacakay to tireng malo kuli, paliliˈ to paro no lomaˈ ato sakaˈorip no niyah. Kawra o saˈosi no Rikec i, mala kuli to enem a miheca ikor, saka pito a miheca ngaˈayay a mapasalat a miliyas sanay. (Kasadakan 21:2) Tangasa Kalipahakan a Mihecaan (kalimaan a poloˈ a miheca), lalasilen ko pasalat no polong i lalomaˈay no niyaroˈ a tamdaw, polong a mala kuliay a Hipray tamdaw mamilifok to pasalat, maka minokay ko kahacecay tamdaw i niyahan a sera.—Lifi 25:10-19.
it-1 702 fiedac 2 fatac
Saparocek a Hafay
O sera i, o saparocek to kasarayray no lalomaˈan, mansa caay ka ngaˈay keton han a mipacakay ko sera. O malaliˈacaay to sera mahecaday o mipacaliwan, o tatodong no ˈaca no sera i, saˈosien tangasa i ikoray a Kalipahakan a Mihecaan hahakowaho a mamihecaan ko mamapanay. Tangasa i Kalipahakan a Mihecaan, o pacakayan a sera ano caayho patikolen a micakay i, o papatikoen ko ciseraay tamdaw. (Lifi 25:13, 15, 23, 24) O lomaˈ i, ano awaay ko ˈadipel i taliyok, o omah i palapalaan han kora, o sarikec no Kalipahakan a Mihecaan ngaˈayay kalasaka dademaken itira; ano itiniay i lalomaˈ no ˈadipel, mapacakayto kora lomaˈ, lalomaˈ no cecay a miheca iraay ko tatodong no cilomaˈay patikol a miˈaca, kawra ano ilalomaˈ no cecay a miheca caayho ka patikolen a miˈaca i, o mamalo noyato a micakayay ato teloteloc ningra a tahadaˈoc koya lomaˈ. Nikawrira, o Lifi a tamdaw i, mangaˈayto a patikol a micakay to ilalomaˈay no niyaroˈ a lomaˈ nangra, samanen caay pilayap cangra to sera malo midaˈocay a hafay nangra.—Lifi 25:29-34.
it-2 569-570 fiedac
Kalipahakan a Mihecaan
Ano tooren no Israil tamdaw ko saˈosi no Kalipahakan a Mihecaan, o kitakit i, cowa ko mamahaen to aniniay adihayay a kakitakitan ira ko kadayayan a pakayraan: O cihafayay a tamdaw matongal matongalay ko hafay, o romasai, manikaw manikaway ko manikaway a tamdaw. Ano ciepoc ko finawlan i, o tatanektek ko kitakit, samanen awaay ko mamacefit a masamsam no tao, caay ka ira ko awaay ko katayalan a tamdaw, nawhani o kahacecacecay tamdaw mangaˈay a kalasaka dademak to taneng a matayal saki kitakit. Pakayniay noka mapalemed ni Yihofa, kadofah ko kinaira no sera, tahacadaay ko Israil tamdaw to fangcalay noka pacudad no Kawas, ano misarocod cangra midofdof i, mamilifok to kadofahay ato makowan no malefotay a mirikecay, o edengan pikowan no Kawas ko papalaˈosi tonini a demak.—Isaya 33:22.
Odoˈ no Sinael
w09 9/1 22 fiedac 4 fatac
Ano Mapakararaw no Tao Kiso
Itini i Israil, ano iraay ko mipohaway to mata no tao, o Rikec no Kawas pairaay to masadafdafay a pisawkit tora ciraraway a tamdaw. Nikawrira, ngaˈayay sao niyahan sa a mitefoc tora tamdaw anca o paro no lomaˈ ningra cowa ka saan. Ora madokaˈay tamdaw o papataynien ningra i citatodongay misawkit a tamdaw, oya mapanilnilay a hangkang ko mamisalof. O matiniay a Rikec pasifanaˈay to Israil tamdaw, ano ciraraw ko tamdaw a mikariˈang to tao i, o macadaay ningra a satefoc o paparoyaroyen to noka kareteng nora raraw. Kawraan, o mahawpay nonini a Rikec cowa ko kapitefoc aca.
SAKA 2 FOLAD 1-7 ROMIˈAD
O ODOˈ KO KIMAD NO KAWAS | LIFI 26-27
“Sasamaan a Milayap to Sapalemed ni Yihofa”
w08 4/15 4 fiedac 8 fatac
Samaanen a Miconged ko “Awaay ko Epoc a Demak”
8 “O hafay” mamisamaan malo kawas hani? Nolitengan a Israil, o fakeloh ano sapipatireng to lomaˈ ato ˈadipel i, o ciepocay; kawra ano sapisangaˈ to “tataˈongen a ˈotoc a fakeloh” ato “samiyay” i, o sakapolin no finawlan ni Yihofa. (Lifi 26:1) Malecaday, o payci iraay ko epoc. Misaaliay kita to payci toha sakaˈorip ita, o payci ngaˈayay sakadademaken i pidoko ci Yihofaan a demak. (Patnakay 7:12; Luka 16:9) Kawrira, ano samacay sa kita mietan to payci, talalikorento ko demak no Krisciyang i, o mamalo kawasto ita ko payci. (ˈOsien ko 1 Timoti 6:9, 10.) O ˈalomanay a hekal tamdaw halipayciay, cowa ka pahanhan a milepel to hafay. Itini to matiniay a hekal, kita i, o mamitafo to matatodongay a noka pinengneng to payci.—1 Timoti 6:17-19.
it-1 808 fiedac 4 fatac
Mikangodoay
Misakaretengan ni Yihofa kalasaka dademak ci Mosi, itini i kaˈayaw no finawlan no Kawas, midemakay to adihayay a tadamaanay a demak cingra (Hipray sowal moh·raʼʹ hananay). (Limoˈot 34:10, 12; Kasadakan 19:9) O pakasoˈlinay ko falocoˈ a tamdaw pakayniay tora fadangalan ni Mosi a mikangodo cingranan, mahapinangay nangra to kalasaka dademakan no Kawas ci Mosi malo taypiyaw Ningra. O roma i, palimoˈotan ni Yihofa ko Israil tamdaw papikangdo to fangcalay kaitiraan Ningra. (Lifi 19:30; 26:2) Tano mikangodoay a waywayan a minengneng to fangcalay kaitiraan, midoedo to limoˈot ni Yihofa a midoko Cingranan, itini i kihcod a demakan tooren ko sapalimoˈot Ningra.
w91 4/1 18 fiedac 10 fatac
Papidipoten to Falocoˈ Iso Koya “Rihadayay a Kawas”
10 Pasowalan ni Yihofa konini finacadan, sowal sa: “Ano maˈimer namo a midoedo to rikec Ako a milaheci to limoˈot Ako i, paˈoraden Ako kamo i kafafalifalic no folad, ta malengaw ko pinaloma i sera, ciheci ko losay namo. O paparihadayen Ako kamo i sera namo, o ngangaˈay ko fotiˈ namo. O lalaplapen Ako ko mariˈangay a ˈaˈadopen, caayto ko aira ko kalalood i kitakit namo. O mamikapot Kako i tamowanan a mala Kawas namo, o mamala finawlan Ako kamo.” (Lifi 26:3, 4, 6, 12) O rarihaday ko Israil, cowa ko makalisangaˈ no ˈada, kakadofa ko kakaenen, ira ko makakedecay a kalalaˈed aci Yihofa. Kawra ano maˈimer cangra a midofdof to limoˈot ni Yihofa wangaˈ.—ˈOlic 119:165.
Odoˈ no Sinael
it-2 445-443 fiedac
Lifong
O Pitefoc to Nika Pisawad to Rikec no Kawas. Ano micicih cangra to katatelekan nangra ato Kawas i, ‘o tatefaden Ningra ko lifong i cangranan.’ (Lifi 26:14-16, 23-25; Limoˈot 28:15, 21, 22) Misaheciay somowal ko Fangcalay Cudad, sakatanoktok no tireng o sapalemed no Kawas sanay, ano itini i tatirengan anoca i noˈadingoan mahaenay (Limoˈot 7:12, 15; ˈOlic 103:1-3; Taneng 3:1, 2, 7, 8; 4:21, 22; Paˈarawan 21:1-4), o adada i, naitiniay i raraw ato caay ka lefot a ˈorip. (Kasadakan 15:26; Limoˈot 28:58-61; Isaya 53:4, 5; Matay 9:2-6, 12; Yohani 5:14) Mihaenay haw i, soˈliˈlin na tangsolay patodicek a misetiˈ ci Yihofa to cimaan tamdaw, paadada cangranan, patinakoen paadadaan to malonoˈay adada ci Miriya, ci Uciya, aci Kihaci (Saˈosi 12:10; 2 Rayray 26:16-21; 2 Hongti 5:25-27), kawra itini i adihayay pakayraan, paadadaen ko cima anca palifongen ko kitakit, samanen o nika adihay ko nidemakan nangra tatiihay. O nangra a raraw kora. Ano o manan ko nipalomaan no tamdaw i, orira ko lalitoden ningra; ano o nipidoedo to ˈanof no tireng ko nipalomaan no tamdaw i, nai ˈanof no tireng a miala koya tamdaw to sakapatay ningra. (Kalatiya 6:7, 8) Somowalay ci Pawlo toya ˈamelasay ko waywayan a tamdaw, “pakonira hanto no Kawas cangra i kaˈanofan no falocoˈ nangra a kaacekan a demak. Saka, masasipakangodo cangra to tireng . . . saka, matefoc ko tireng nangra to tatodong no moraraway a demak nangra.”—Loma 1:24-27.
SAKA 2 FOLAD 8-14 ROMIˈAD
O ODOˈ KO KIMAD NO KAWAS | SAˈOSI 1-2
“Milikakawaan ni Yihofa ko Finawlan Ningra”
w94 12/1 9 fiedac 4 fatac
Sakaretengen i Nokaˈorip ko Pidoko ci Yihofaan
4 Ano naitini i fafaed kiso pasilaeno a minengneng to pisataloˈan no Israil i kohkohan i, o manan ko mamaˈaraw iso hani? O mamaˈaraw iso ko pinaay ˈofad a masieloday a marayaray a misataloˈan a kaitiraan, maedeng 300 a ˈofad ko kaˈaloman alatek, makatatolo a kasangasaw malo cecay a komi, sakilacen pasikawali, kaetip, katimol ato kaˈamis. Ano ngataen iso minengneng i, iraayho ko sepat mimingay pakopangan i satenok, o kitiraan no Lifi ngasaw. Itatenokan i, iraay ko cecay mikiriwiˈay a patirengan, tano kiladoman miˈadipel pafafidaˈ to italiyokay. Onini i, o mipatirengan no “citanengay ko falocoˈ” a Israil tamdaw, midoedo to sapalimoˈot ni Yihofa a mipatirengan a “Fangcalay Kopang.”—Saˈosi 1:52, 53; 2:3, 10, 17, 18, 25; Kasadakan 35:10.
it-1 981 fiedac 2 fatac
Pataloˈan
Tada kakahaday ko pataloˈan no Israil. O matingkiay a sufitay komoden 603,550 ko tamdaw, roma i, o kaemangay, fafahiyan, matoˈasay, masamoˈay, 22,000 Lifi tamdaw, ato “roma finacadan a tamdaw,” eminen a mikomod latek mataˈlifay ko 300 a ˈofad. (Kasadakan 12:38, 44; Saˈosi 3:21-34, 39) Hakowaay ko kataˈangay nora pataloˈan, awaay ko pinang, taˈangayay ko kasasiroma no pisaˈosi no tamdaw. Tiya itini i salawac no Yortan ˈalo a pataloˈan ko Israil i, o sowal no Fangcalay Cudad, naitini i “Pit Yisimot tangasa i Apirstim,” sanay.—Saˈosi 33:49.
Odoˈ no Sinael
it-2 51 fiedac
Mitingki a Misaˈosi
Mitingki to ngangan ato kasarayaray no lalomaˈan, tohatiniay midoedoan ko kasangasaw ato lalomaˈan a misilsil, cowa ko pitingki aca anca pisaˈosi aca to tatamdawan. O nisowalan no Fangcalay Cudad a pitingki, cowa ka lecalecad ko araaw, o pakayniay i pasataay, hano sufitay, ato misilsil to tayal no Lifi i fangcalay kaitiraan ko sapihaen to demak.
SAKA 2 FOLAD 15-21 ROMIˈAD
O ODOˈ KO KIMAD NO KAWAS | SAˈOSI 3-4
“Tatayalen no Lifi a Ngangasawan”
it-1 695 fiedac 2 fatac
Saysi
Limasmas no Katatelekan a Rikec. Ya itini i Icip mala kuli ko Israil tamdaw i, tefadan ni Yihofa ko moetep a pades, misetiˈ to polong fisac wawa no Icip, halo pafangcal to fisac wawa no Israil, malo no Kawas a maemin. (Kasadakan 12:29; Saˈosi 3:13) Hatiraay haw i, oranan fisac a wawa o mamalo ni Yihofa, mamatayal to mikiriwiˈay tayal saki Cingranan. O Lifi ngasaw aca ko mipiliˈan to mamalo saysi ko tayal, ao cowa ko polong a fisac wawa no Israil a midimokos to itiniay i fangcalay kaitiraan a demak. Mihaenay haw i, mihaydaan Ningra ko faˈinayan no Lifi a ngasaw mitisod to faˈinayan wawa no romaroma 12 ngasaw a Israil tamdaw (O teloc no wawa ni Yosif ci Ifraim, Manasi o tosaay a ngasaw). Komoden a misaˈosi ikor, o masofocay to cecay folad a wawa no romaroma ngasaw, mikikakaay to 273 ko kaˈaloman to faˈinayan no Lifi, mankora papipateliˈan no Kawas ko Israil tamdaw to todong to sapaˈaca tora tamdaw, kahacecay tamdaw lima rimood a lingkim, pafelien ci Aron ato wawa ningra. (Saˈosi 3:11-16, 40-51) ˈAyaw nonini i, maharekayto ci Yihofa mipiliˈ to Lifi ngasaw oni Aron a lalaomaˈan malo saysi no Israil.—Saˈosi 1:1; 3:6-10.
it-1 920-921 fiedac
Lifi Tamdaw
Tayal. O Lifi tamdaw toloay ko taˈangayay lalomaˈan, naitiniay i tatolo wawa ni Lifi a masadak, ci Kirson, Kohat, Mirari. (Satapangan 46:11; 1 Rayray 6:1, 16) Ya itini i kohkohan a pataloˈan cangra i, o kahacecay no lalomaˈan itini i ngata no Fangcalay Kopang iraayto ko misakilacan a kitiraan. Kasangasaw no Lifi a lalomaˈan no Kohat itiniay i sakawali no Fangcalay Kopang a pataloˈan, romaroma a Kohat tamdaw itiniay i katimol, i sakaetip ko Kirson, i sakaˈamis ko Mirari. (Saˈosi 3:23, 29, 35, 38) O ˈinorong no Lifi tamdaw i, mipatirengay, mitastasay ato micoroˈay. Ano mamalinah cangra i, ci Aron ato faˈinayan wawa ningra tatefaden nangra koya sapalalaˈed to fangcalay kaitiraan ato safangcalay kaitiraan a kiradom, songilaˈen mitahepo ko Katatelekan a Lipa, pitatoˈayaan ato romaroma fangcalay a lalosidan, ikor o Kohat tamdaw ko mamicoroˈ; o Kirson tamdaw ko citatodongay a midimokos to sapaˈading a kopang, satahaf, sapaˈading i sacomod no fangcalay kaitiraan, ato sapiˈadipel a kopang i paputal, kaered (kaered no Fangcalay Kopang); o Mirari tamdaw citodongay a midimokos to sapad ato falat ato hecek ato paranaan ato tektek ato kaered (kaered no taliyok) no Fangcalay Kopang.—Saˈosi 1:50, 51; 3:25, 26, 30, 31, 36, 37; 4:4-33; 7:5-9.
it-1 920-921 fiedac
Lifi Tamdaw
Itini i lintad ni Mosi, o Lifi tamdaw 30 ko mihecaan misatapang a matayal cangra, mahawpay mitastas ato micoroˈ to Fangcalay Kopang ato lalosidan nira. (Saˈosi 4:46-49) O roma i, 25 ko mihecaan ngaˈayayto matayal, kawra cowa ka papicoroˈen. (Saˈosi 8:24) Tangasato i lintad ni Tafiti i, lowanan i 20 ko mihecaan misatapang a matayal, o lalangian i, o Fangcalay Kopang (mikotayanto no Fangcalay Sefi) cowa ito ko cacoroˈen a milinah. Tangsa i 50 ko mihecaan i, cowato ko mamatayal ko Lifi tamdaw. (Saˈosi 8:25, 26; 1 Rayray 23:24-26; nengnengen ko MIHECAAN.) O Lifi a tamdaw o mamisongilaˈ a mafanaˈ to Rikec, samanen mamararid cangra itini i kaˈayaw no ˈalomanay miasip to Rikec ato pasifanaˈ to finawlan mafanaˈ to Rikec.—1 Rayray 15:27; 2 Rayray 5:12; 17:7-9; Nihimiya 8:7-9.
Odoˈ no Sinael
w06 8/1 23 fiedac 13 fatac
Ka Taneng—Kangodoen ko Kawas!
13 Ano tahapades ci Tafiti tahacadaayto to sapadang no Kawas, tada paˈicelay to pasoˈlinay falocoˈ ningra koninian, mangalef ko nika ngodo to Kawas. (ˈOlic 31:22-24) Nikawrira, toloay ko tinakoan i Fangcalay Cudad, to paihkalay to caay pikangodo ci Tafiti to Kawas, tada pakidemay ko teloc. Saka cecay a demak i, itiyaay toya limasmasen ni Tafiti papicoroˈ to Katatelekan Lipa tayra i Yirusalim. Itiya i, cowa ka tooren ni Tafiti ko sapalimoˈot no Rikec no Kawas, ao tamdaw ko mamiˈorong tora Lipa, arawhan tano faelohay paliding a micoroˈ. Ci Uca ko mikayatay tora faelohay paliding, i fatad no lalan mangata mafelih ko paliding, layaˈ han ni Uca ko kamay a mikama tora Lipa, tona “caay ka ngodo” kora demak, tangsolay mapatay ci Uca i tatihi nora Lipa. Soˈlinay mararaway ci Uca, kawra o ci Tafiti kora caay ka pisakareteng to Rikec no Kawas, hato mafekad ko masaka adayayan a demak. Mikitini tonini a demak mananamay ita: O tamdaw ano mangodo to Kawas, oha tatooren ko limoˈot no Kawas a midemak.—2 Samuil 6:2-9; Saˈosi 4:15; 7:9.
SAKA 2 FOLAD 22-28 ROMIˈAD
O ODOˈ KO KIMAD NO KAWAS | SAˈOSI 5-6
“Misamaan Kiso Minanam to Micidekay to Hekal a Tamdaw?”
it-1 897 fiedac
Micidekay to Hekal a Tamdaw
O micidekay to hekal a tamdaw o mamicada to tolo a mikecengan demak: (1) Pisawad a komaen to fadisosoˈ a epah ato ciˈicelay a epah. Aka ka komaen cingra to nihetecan to fadisosoˈ a nananomen, aka ka komaen to fadisosoˈ ato niˈicangan a fadisosoˈ. (2) Aka piˈisˈis cingra to fukes pakonira han a palahad ko fukes. (3) Aka piraod cingra to mapatayay. Ano o wamato ningra ato ina ato salikaka to faˈinayan ato fafafiyan ko mapatayay i, aka piraod cingra.—Saˈosi 6:1-7.
Miketon to Falocoˈ. O tamdaw ano mangalayay miketon to falocoˈ malo micidekay to hekal a tamdaw, o araaw a mihaen i, o “sapicidekaw to hekal [patafang to tireng] malo ni Yihofa,” cowa ko miparorayay to tireng a mipasengi to tao. Itini i “picidekan a tatokian, o fangcalay hananay ni Yihofa minengneng cingra.”—Saˈosi 6:2, 8; palalinien to Satapangan 49:26, ato ilaenoay safanaˈ.
Misahatiraay haw i, o micidekay to hekal a tamdaw mamidoedo to saˈosi, itini i pidoko ci Yihofaan a demak iraay ko mikiriwiˈay a tatodong. O micidekay to hekal a tamdaw matiraay o sakakaay saysi citatodonay to fangcalay tayal, mankora caay ka ngaˈay mitefing to mapatayay tamdaw, soˈlinto o salawina kora mapatayay. O sakakaay saysi ato romaroma saysi karetengay ko ˈinorong nangra, mansa ano itini i kaˈayaw ni Yihofa a matayal to fangcalay demak i, cowa ko ngangaˈay komaen to epah.—Lifi 10:8-11; 21:10, 11.
O roma i, micidekay to hekal a tamdaw (Hipray sowal o na·zirʹ hananay), o mamikorac, pakonira a palahad to fukes; o tahapinangan nangra i fongoh konini, maˈaraw no tao i, tangsol mahapinang to micidekay to hekal cingra, o makoracay. (Saˈosi 6:5) Itini i Fangcalay Cudad, o na·zirʹ hananay i, ngaˈayay mitoroˈ toya itiniay i laliyadan no paselaˈan a romiˈad ato Kalipahakan a Mihecaan a “cowa ka dimokosen” a fadisosoˈ. (Lifi 25:5, 11) O sapengec to fongoh no sakakaay saysi, iraay matilid ko “tayni ci Yihofaan minokay ko fangcalay” sanay a paya, todong to “patafangay to tireng [no Hipray sowal neʹzer sanay], miringiay tora na·zirʹ sanay a tilid. (2 Samuil 1:10; 2 Hongti 11:12; nengnengen ko TAMOHONG; PATAFANG TO TIRENG.) O sowal ni Pawlo, itini i kasakopang no Krisciyang, o fukes no fafahiyan o sapafeli no Kawas malo tapodo ningra sanay. O sapatalipaˈelal to fafahiyan, cawa ka lecad ko saaroˈan nangra ato faˈinayan o sanay, oha tatooren nangra ko limasmas no Kawas pakayni to pidofdof to fadangalan. Mihaenay haw i, o dadadoedoen no micidekay to hekal a tamdaw ko kihcod a saˈosi i cangranan, mahawpay to papakomira han ko fukes a koedaw (mahaenay demak pasangaran i faˈinayan tamdaw), mikeceng to epah, mitafo to makoracay aka mapakaacek, onini i, sapatalipaˈelal cangranan, o aˈimeren ko niyah ato mihaemin a midofdofd to araaw ni Yihofa, o masaka limlaan konini.—1 Korinto 11:2-16; nengnengen ko FUKES; SATAHEPO TO FONGOH; CAPELING.
Odoˈ no Sinael
w05 1/15 30 fiedac 2 fatac
Salicay no Miˈosiay Tamdaw
Nikawrira, o micidekay to hekal a saaroˈan ni Samson o mikiriwiˈay. Caho ka hofocen ci Samson i, pasowalanto no coyoh ko wina ni Samson: “O mamahofoc kiso to cecay faˈinayan wawa, aka lecengen ko fukes ningra, samanen hofoc han konini wawa i, o mamalo micidekay to hekal a tamdaw. O mamikerid cingra paˈorip to Israil tamdaw miliyas to kamay no Filistin.” (Kakitaan 13:5) Mahapinangay itini, ora nokala micidekay to hekal a miketonan a sowal cowa ko nomira a miharatengan. O minilnilan no Kawas cingra a mala micidekay to hekal a tamdaw, tahatolasay no ˈorip ningra kora saaroˈan. Mihaenay haw i, pakayni to caay ka ngaˈay mitefing to mapatayay a saˈosi, cowa ka tatodong i cingranan. Ano hatiraay i, ano fahal saan a matefing ningra ko mapatayay, sasamanen a misaˈosi kora nai hofoc hanho misatapangayto, hanaca papadadotoc i hakelong no ˈorip ningra a demak hani? Mankora, o saˈosi no pakayniay i tahatolas no ˈorip a malo micidekay to hekal a tamdaw, cowa ka lecad to kifalocoˈan no niyah a micidekay to hekal a tamdaw.