Pinengnengan to Lalakaw no Mitosilay ato Nikaˈorip Rayray no Saˈopo
SAKA 5 FOLAD 3-9 ROMIˈAD
O ODOˈ KO KIMAD NO KAWAS | SAˈOSI 27-29
“Todongen ci Yihofa Aka a Misakakinih to Tamdaw”
w13 6/15 10 fiedac 14 fatac
Salimlaen ko Capeling ni Yihofa
14 Oya lalimaay a fafahiyan wawa ni Cilofihat mingitangit ci Mosian, sowal sa: “Tona awaay ko wawa no wama niyam to faˈinayan saka, padeng hanto ko ngangan ningra i lalomaˈ no Israil haw? Nanay papililamen kami to omah i salikaka no wama niyam.” Samaanay ko piharateng ni Mosi hani? ‘O saˈosi no rikec konini, caay ka ngaˈay’, cowa ka saan pasowal ci Mosi. ˈArawhan patayraan ni Mosi i ˈaˈayaw ni Yihofa milicay tonini a demak. (Saˈosi 27:2-5) Samaanay pacaˈof ci Yihofa hani? Sanay pasowal ci Mosian: “Matamaay ko pilongoc noya fafahiyan a wawa ni Cilofihat. Papililamen cangra to omah i salikaka no wama nangra, ta mirocok cangra to omah no wama nangra.” Oraanto i, pacomodan ni Yihofa konini a saˈosi ilalomaˈ no rikec. Patorod ci Mosian: “Ano awaay ko faˈinayan a wawa, mapatayto cingra i, mangaˈayto a mirocok ko fafahiyan a wawa ningra to omah ningra.” (Saˈosi 27:6-8; Yosuwa 17:1-6) Mikitira a misatapang, ano iraho ko malecaday pakayraan a fafahiyan no Israil i, o ngangaˈay pakayni tonini a saˈosi a milifok to sadipot.
w13 6/15 11 fiedac 15 fatac
Salimlaen ko Capeling ni Yihofa
15 O matiniay a saˈosi tada o cisidaˈitay, o masadafdafay! Ya lalima fafahiyan wawa ni Cilofihat ano palalinien to romaroma Israil tamdaw, o pakoyoc cangra madoloay masamsam no tao, kawra sadafdafan ni Yihofa micada cangra, patariang cangranan. (ˈOlic 68:5) Itini i Fangcalay Cudad adihayay ko hatiraay a tinakoan, somowal to mahaenay a kasemeran no falocoˈ a demak: Ci Yihofa o misadafdafay a minengneng to polong a sikawdan.—1 Samuil 16:1-13; Dmak 10:30-35, 44-48.
w13 6/15 11 fiedac 16 fatac
Salimlaen ko Capeling ni Yihofa
16 Wa misamaan kita mitodong ci Yihofaan, caay ka pisakakinih to tamdaw hani? Aka mapawan, o caay pisakakinih hananay i, tosaay kora demak. Saka cecay ira ko caay pisakakinih a harateng, saka tosa sadafdafen a micada ko polong a tamdaw. Madoloay ko tamdaw miharateng to caay pisakakinih ko niyah. Kawra matatodong ko pilalat to falocoˈ no niyah sa i, latekay cowa ka dolo. Hay, sasamaan kita mihapinang to awaay ko misakakinihay a harateng no niyah hani? Ci Yis sakafanaˈaw to samaanay ko pinengneng no tao i cingranan, licayan ningra ko tadawidang ningra: “Pakocima ko tamdamdaw i takowanan saw?” (Matay 16:13, 14) Lecaden ita ci Yis, licayen ita ko makahiyay pasowal to soˈlinay a widang: “O harateng iso takowanan caay pisakakinih to tamdaw han? Samaanay ko pinengneng no tao i takowanan hani?” Iraay ko miming a misakakinihay iso to roma a finacadan, manikaway a tamdaw ano saan ko widang kitanan i, sasamaanto hani? ˈIfowaen ko falocoˈ a mitolon ci Yihofa, mingitangit Cingranan padama kitanan mifalic to harateng ita, hongaˈ mangaˈay ko pitodong i Cingranan, masadafdaf ko pinengneng to polong a tamdaw.—Matay 7:7; Kolosay 3:10, 11.
Odoˈ no Sinael
it-1 693 fiedac 5 fatac
Sapatoˈaya
Epah a Sapatoˈaya. Ta maroˈto i Nikiˈokan a Pala ko Israil tamdaw ikor, ano pacakat to sapatoˈaya i, pahakelongan to epah a mipacakat. (Saˈosi 15:2, 5, 8-10) O epah a sapatoˈaya i, o tataktaken noya pacakatay tamdaw i pipatoˈayaan. (Saˈosi 28:7, 14; palalinien to Kasadakan 30:9; Saˈosi 15:10.) Tarokos ci Pawlo tiya patikami to Filipiay a Krisciyang i, sanay ko sowal: ‘Ano malecalecad kako nohatini to epah a sapatoˈaya, micefos to mikitiniay i falocoˈ namo a mipacakatan a sapatoˈaya ato nika tayal namo saki tamdamdaw i, lipahakay kako.’ (Filipi 2:17) Ci Pawlo tano epah a sapatoˈaya a patinako to kalim ningra pacakat to niyahan to saki romaroma a mihakelongay. ˈAyaw no mamapatay cingra patikamiay ci Timotian: “Maraodto ko romiˈad to pikinafalahan ako to ˈorip ako a malasapacakat. Maraodto ko romiˈad to piliyasan ako tonini a hekal.”—2 Timoti 4:6.
SAKA 5 FOLAD 10-16 ROMIˈAD
O ODOˈ KO KIMAD NO KAWAS | SAˈOSI 30-31
“Lahecien ko Niketonan no Falocoˈ a Sowal Iso”
it-2 268-269 fiedac
Niketonan no Falocoˈ a Sowal
O Naifalocoˈay, Kawra o Lalahecien. O tamdaw ano miketon to falocoˈ, o naitiniay i kalim no falocoˈ no niyah. Kawra o saˈosi no rikec i, o tamdaw ano miketon to falocoˈ i, o lalahecien ningra kora, caay ka ngaˈay pacekos ko falocoˈ. Naifalocoˈay a miketon to sowal hato tano ˈorip no niyah a milaheci, cowa ko misamangah. (Saˈosi 30:2; nengnengen ko Loma 1:31, 32.) Mihaenay i, miketon to falocoˈ o masaka limlaan a demak, hano patalipaˈelalay ko Fangcalay Cudad kita songilaˈen a misimsim ikor ngaˈ miketon to falocoˈ, samanen oniya demak milingatay to haˈinorong no niyah. Mansa iraay ko sowal no rikec ni Mosi: “O niketonan namo a sowal i Tapang a Kawas namo i . . . o cacoracoren no Tapang kamo a papilaheci to niketonan namo a sowal, ano caay pilaheci kamo to niketonan namo a sowal i, ciraraw kamo.”—Limoˈot 23:21, 22.
it-2 268-269 fiedac
Niketonan no Falocoˈ a Sowal
Pasayniay i Kawas a misakareteng a mihayi, paihkal to misaˈosiay to falocoˈ to sapidemakaw to maanan demak, sapacakataw to maanan a sapaamid, anoca miˈmet to cowa pidemak to nika caay ko mararaway a demak. Miketon to sowal o naifalocoˈay. Miketon to falocoˈ o karetengay a demak, o ciˈicelay. (Saˈosi 30:2; Matay 5:33) “Miketon to falocoˈ” hananay i, o paihkalay to nofalocoˈan a saˈosi; “miketon to sowal” hananay i, paihkalay to pasayniay i mikikakaay to niyahan a miketon to falocoˈ, pahapinang a misawacay tora sowal ningra o soˈlinay, o ciˈicelay. O matatelekay a tatosa tano riraan a niketonan a sowal a pahapinang.—Satapangan 26:28; 31:44, 53.
w04 8/1 27 fiedac 4 fatac
Kalimlaan no Saˈosi a Cudad
30:6-8—O faˈinay a tamdaw ngangaˈay a palasawad to niketonan no falocoˈ no fafahi han? Misinanotay ci Yihofa to niketonan a sowal no kahacecay midokoay Cingranan a tamdaw. Patinakoen, o tamdaw ano pasayni i Kawas a miketon to falocoˈ a mipatafang i Cingranan i, ono tekedan a saˈosi kora. (Kalatiya 6:5) O faˈinay caay ka ngaˈay a palasawad to mahaenay a niketonan no fafahi a sowal. Nikawrira, o niketonan no falocoˈ a sowal no fafahi, cowa ko ngangaˈay a misafelit to kimad no Kawas, anoca masafafelit to ˈinorong ningra to faˈinay.
Odoˈ no Sinael
it-2 778 fiedac 2 fatac
Yifta
O ngangaˈay ko tamdaw itini i fangcalay kitiraan misamacay a midoko ci Yihofaan. O wama wina iraay ko fadangalan a mipatafang to wawa matayal saki Yihofa. O cecay tinakoan ci Samuil. Caho ka hofocen ci Samuil i, wina ningra ci Hana miketonay to falocoˈ, mihaydaay to pakatayalen ko wawa i Fangcalay Kopang midoko to Kawas. Mihayian no faˈinay ci Ilkana ko niketonan a sowal ni Hana. Misawadto micoco ci Samuil i, patayraanto ni Hana cingra i fangcalay kitiraan, halo miala to pinaˈorip a mipatoˈaya. (1 Samuil 1:11, 22-28; 2:11) Ci Samson o roma a cecay tinakoan to mikiriwiˈan a patafang i Kawas a wawa, malo “micidekay to hekal a tamdaw” cingra matayal saki Kawas to hakelong no ˈorip ningra.—Kakitaan 13:2-5, 11-14; pakayni to fadangalan no wama to fafahiyan wawa, nengnengen ko Saˈosi 30:3-5, 16.
SAKA 5 FOLAD 17-23 ROMIˈAD
O ODOˈ KO KIMAD NO KAWAS | SAˈOSI 32-33
Laplapen ko Itiraay a Polong a Finawlan
w10 8/1 23 fiedac
Mafanaˈay Kiso Han?
Itini i Hipray tilid a Fangcalay Cudad marariday somowal to “pisalisinan”, o manan kora hani?
Tiya mamicomod ko Israil tamdaw i mikiˈokan a pala i, palimoˈotan ni Yihofa cangra papiwanik to pitaˈongan to kawas no Kanan. Sanay ko limoˈot no Kawas: ‘O aeminen namo . . . palaˈafoen ko kihcod a faco no fakeloh ato samiyay, pelpelen ko kihcod a pisalisinan nangra.’ (Saˈosi 33:52) O Kanan a tamdaw itiniay i paputal, patinakoen i taparoporoan a mitaˈong to makaniway a kawas, itini i kalaeno no kilang, i niyaroˈ a mipatireng to pisalisinan a mitaˈong to kawas nangra. (1 Hongti 14:23; 2 Hongti 17:29; Icikil 6:3) Itira tora pitaˈongan alatek iraay ko pipatoˈayaan, mitaˈongan a hecek ato tektek, samiyay, paexiwan ato romaroma lalosidan.
w08 2/15 27 fiedac 5-6 fatac
Minanam Nai Mararaway a Demak no Israil
Anini, adihayay a masiˈayaway ita a sapalifet mahecaday to itiya:ay a Israil. Aniniay a hekal matomesay ko masakenakenaay a samiyay, patinakoen o payci, o hayo no ika, o hayo no miaontoay, o mirikecay tamdaw, o kakeridan no pidoyongan, anoca o paro no lomaˈ. Onini a tamdaw anoca demak alatek mamalo satenokan no kaˈorip ita. Ano makedec ko kacacawamaˈ to cowa ka olah ci Yihofaan a tamdaw i, o mamirepat to kalalaˈed ita ato Kawas.
O maˈodangay a demak ato pitaˈong to Paal a kawas tada makedecay ko nika laliting, misolotay to ˈalomanay a Israil tamdaw, maˈodang ko demak. Anini, o romaroma sikawdan no Kawas marefongay to matiniay a satalakaw. Patinakoen, ano cecay ko tamdaw i lomaˈ i, tona caay ka pisaharaterateng, mikeniˈ i tingnaw, mapalakto ko tingalaway a falocoˈ ningra. O Krisciyang ano makayhid a minengneng to makakalonaay a wangcan i, tada kaadayayan ko teloc!
it-1 731 fiedac 2 fatac
Kanan
Pakayni to sapitekopaw to Kanan a tamdaw, “nipalimoˈotan no Tapang [ci Yihofa] ci Mosian a kahacecacecay a demak i, doedoan ni Yosuwa ko kahacecacecay nonini a midemak.” (Yosuwa 11:15) ˈArawhan i, cowa pitodong ko Israil tamdaw ci Yosuwaan, caay sahecien nangra mifaenot kora mipakaditay tora sera a warak. Tangongolay ko nika pifiyor no Kanan tamdaw to Israil, telocto i, pakayniay noka raraw, maˈodang ato mitaˈong to samiyay ato romaroma a lalangian a ˈaloman ko mapatayay. Isalakat ano sahecien no Israil ko limoˈot no Kawas, haeminen a mitekop ko Kanan a tamdaw i, o macapiday a tamdaw maedeng o mamalowan. (Saˈosi 33:55, 56; Kakitaan 2:1-3, 11-23; ˈOlic 106:34-43) Patalipaˈelalan ni Yihofa ko Israil tamdaw, caay pisakakinih a Kawas Cingra. Ano matatelek ko Israil ato Kanan a tamdaw, mararamod cangranan, midoko to roma kawas, mitoor to tatiihay pinangan no pidoyong nangra ato kaacekan a waywayan nangra i, o mamatira cangra to Kanan a mapalaˈafo, ˈotaen no itiraay a sera.—Kasadakan 23:32, 33; 34:12-17; Lifi 18:26-30; Limoˈot 7:2-5, 25, 26.
Odoˈ no Sinael
it-1 772 fiedac 2 fatac
Kalanganganan no Sera
Maharekto miritos to kaitiraan no kasangasaw ikor, o mamisaˈosito to kataˈangay no sera, sakatosa a sasasinanoten i: O kaˈaloman no tatamdawan. Pakaynien namo i piritos a mipakilac to sera, ta malayap no kasalalomaˈan ko saparocek a hafay. ‘ˈAlomanay ko tamdaw i, pafelien to adihayay a saparocek a hafay; caay ka ˈaloman ko tamdaw i, pafelien to mimingay a saparocek a hafay. Ano aicowa ko saparocek a hafay, o raritosen a misaˈosi. Pakaynien i kasangasaw a mipakilac to hafay.’ (Saˈosi 33:54) Ora miritosan a kaitiraan no sera cowa ko mamafalic, kawra o kataˈangay no sera ngaˈayay a falicen. Patinakoen, o sera no Yuta ngasaw tada taˈangayay, sakilac hananay ko pina sera pafeli to Simiyon a ngasaw.—Yosuwa 19:9.
SAKA 5 FOLAD 24-30 ROMIˈAD
O ODOˈ KO KIMAD NO KAWAS | SAˈOSI 34-36
“Tayra ci Yihofaan a Milimek”
Mitiˈeray Kiso ci Yihofaan a Milimek Han?
4 Samaanan no Israil misaysay ko coko padetengay a mipatayay hani? Soˈlin o coko padetengay a mipatayay to tamdaw, kawra milakis to remes o raraw kora. (Satapangan 9:5) Nikawrira, coko padetengay a mipatayay a tamdaw o sasidaˈiten, milaliw to miˈodisay a tamdaw, tayra i cecay noya 6 a pilimekan a niyaroˈ. O mamadipot cangra i lalomaˈ no niyaroˈ, kawra o mamaterek cingra i pilimekan a niyaroˈ tangasa mapatay ko sakakaay a saysi.—Saˈosi 35:15, 28.
Mitiˈeray Kiso ci Yihofaan a Milimek Han?
6 Ano malipalaw a mipatay to tamdaw i, kalikien ningra milaliw tayra i pilimekan a niyaroˈ, tayra i fawahan no niyaroˈ, “pasowalen ko matoˈasay no niyaroˈ to nano demak.” O sasangaˈayen a micada cingra. (Yosuwa 20:4) Ikor no cecay liyad, patayraen no matoˈasay cingra toya pipatayan ningra a niyaroˈ, o sasawkiten no itiraay matoˈasay cingra. (ˈOsien ko Saˈosi 35:24, 25.) Ano sawkitento no matoˈasay to malipalaway a mipatay cingra ngaˈ, patikoren cingra i pilimekan a niyaroˈ.
Mitiˈeray Kiso ci Yihofaan a Milimek Han?
13 Ano tayraay milaliw i pilimekan a niyaroˈ ko coko padetengay a mipatay tamdaw, o mamadipot cingra itira. Somowalay ci Yihofa toni niyaroˈ, sowal sa: “Patoneken ko cecay a niyaroˈ to malo pilimekan a niyaroˈ.” (Yosuwa 20:2, 3) Cowa pisaali ci Yihofa papiliyaw a misawkit to coko padetengay a mipatayay, cowa pihayda to miˈodisay tamdaw micomod i pilimekan niyaroˈ a mipatay toya tamdaw. Mansa i, hamaan matalaw to aira ko miˈodisay tamdaw, samanen dadipoten ni Yihofa ko materekay i pilimekan a niyaroˈ. Cowa ko pirofoan to tamdaw koni, ngangaˈay cangra matayal i niyaroˈ, mipadang to tao, itira i rihadayay kitiraan a midoko ci Yihofaan, mahemek a marenec ko ˈorip nangra!
Odoˈ no Sinael
w91 3/15 13 fiedac 13 fatac
Sapatefoc ni Yis to Polong a Tamdaw
13 Nikawrira, ci Atam anoca ci Ifa, cowa ko mamilifok to epoc nonini sapatefoc. O Rikec ni Mosi iraay ko matiniay a safalod: ‘O mipatayay to tamdaw i, aka tano payso ko sapatefoc to ˈorip ningra, samanen o papatayen cingra.’ (Saˈosi 35:31) Ci Atam cowa ka masaˈfit, o mipadetengan ko nika raraw ningra. (1 Timoti 2:14) Mahecaday to mipadetengay mipatay to teloteloc no niyah, samanen anini mirocokay cangra to caay ka lefot a ˈorip ni Atam, o mamapatay cangra. Ci Atam i, o mamapatapatay aca cingra, samanen nao malefotay tamdaw cingra, ˈarawhan padeteng sanay misafelit to sarikec no Kawas. Ano kalasaka dademaken ni Yihofa ko sapatefoc ni Yis i tireng ni Atam i, o micicihay Cingra to moecelay a safalod Ningra. Kawra, oya sapatefoc to nika raraw ni Atam a epoc soˈlinay palahedaway to patay no teloteloc ni Atam! (Loma 5:16) Ano pakaynien i noholic ko sowal, awaayto ko ˈicel no raraw a mipatay to tamdaw. Oya pasadakay to sapatefoc “mapatay to saki polong no tamdaw” cingra, mitamorong to raraw no wawa ni Atam a maemin.—Hipray 2:9; 2 Korinto 5:21; 1 Pitiro 2:24.
SAKA 5 FOLAD 31– 6 FOLAD 6 ROMIˈAD
O ODOˈ KO KIMAD NO KAWAS | LIMOˈOT 1-2
Ci Yihofa ko Misawkitay
w96 3/15 23 fiedac 1 fatac
Ci Yihofa—Maolahay to Moecelay ato Masadafdafay
O manilnilay no kasakopang a malohemay malitengay iraay ko ˈinorong misawkit to karetengay a mararaway a demak. (1 Korinto 5:12, 13) Ano misawkit cangra i, paifalocoˈen nangra ko masadafdafay a saali no Kawas oha papaihkalay to sidaˈit cangra. Kawra ano awaay ko lalangian no malohemay malitengay a paihkal to sidaˈit, patinakoen ano caka pasasiyor kora mararaway i, cowa ko sasidaˈiten nangra. Cowa ko ngangaˈay cangra to sapiˈodisaw tora mararaway tamdaw, falah han cingra nai kasakopang. O nonoˈ nangra o mifalahay a limasmas papatalipaˈelal to falocoˈ no mararaway tamdaw. (Nengnengen ko Icikil 18:23.) Itini i laeno no sakayat ni Kristo, masadafdaf ko pidemak no malohemay malitengay; mamisaˈicel malo “pikiˈadingan to faliyos” cangra. (Isaya 32:1, 2) Ano sapihaenaw i, caay ko mamisakakinih cangra, mafanaˈ a pacaiˈ ko pidemak.—Limoˈot 1:16, 17.
w02 8/1 10 fiedac 4 fatac
Ka Madimadi to Kawas ato Fadangalan Ningra
4 Itini noka pisawkit to finawlan, ka fanaˈ aca to Rikec caayho ka edeng. Tona caay ko malefotay ko malohemay malitengay, mamisinanot cangra miˈimer to misatekeday, misakakinihay, maˈanofay a tatiihay pinangan no niyah, toha sakaecaaw mararaw ko pisawkit. Pasowal ci Mosi cangranan: ‘Ano misawkit i, aka a pisakakinih. Ano o tadancaay tamdaw anoca o tadamaanay tamdaw, tengilenho ko pilomal nangra. Aka a matalaw to cimacimaan, samanen o Kawas ko misawkitay.’ O hangkang no Israil o patadoay to Kawas a misawkit. Tadamaanay a fadangalan konini, o sasakaretengen nangra ko pidemak!—Limoˈot 1:16, 17.
Odoˈ no Sinael
w13 9/15 9 fiedac 9 fatac
Aˈimeren ko sapatalipaˈelal ni Yihofa
9 O Israil tamdaw itiniay i ‘katalawan a kakahaday a kohkohanˈ misarakarakat to 40 mihecaan. ˈAyaw no mamalingad cangra i, cowa pasowal ci Yihofa tatano maanan a pakayraan a mikayat to Israil, midipot ato midimokos cangranan. Kawra kinapinapinaay paihkal ci Yihofa, to ngaˈayay tiˈeren Cingra, aˈimeren ko sapalimoˈot Ningra. To dadaya o miciroˈay a namal, to romiˈad o miciroˈay a toˈem patalipaˈelal ci Yihofa to Israil tamdaw, padadotocay Cingra a midama cangranan, mikerid cangranan mitaˈlif tonini kohkohan. (Limoˈot 1:19; Kasadakan 40:36-38) Pafelianho ni Yihofa cangra to sakaˈorip nangra. “Caay ka cicih ko rikoˈ, caay ka lifawa ko waˈay nangra,” awaay ko manan kacangoˈotan nangra.”—Nihimiya 9:19-21.
SAKA 6 FOLAD 7-13 ROMIˈAD
O ODOˈ KO KIMAD NO KAWAS | LIMOˈOT 3-4
Sarikec ni Yihofa o Masadafdafay ato Citanengay
it-2 463 fiedac 6 fatac
O Nika Cipinang
O tamdaw ano misaˈicel a minanam halo kalasaka dademaken ko sowal ato limoˈot no Kawas i, ikaka no singsi ko nika cipinang, ikaka no matoˈasay ko nika citaneng ningra. (ˈOlic 119:99, 100, 130; palalinien to Luka 2:46, 47.) Samanen o taneng ato pinang macacamolayto i makoracay a sarikec no Kawas. Ano madimadi ko Israil tamdaw a midofdof to limoˈot no Kawas i, o mamaˈaraw no italiyokay a kasakitakit to soˈlinay “o citanengay, o mafanaˈay cangra” wa saan. (Limoˈot 4:5-8; ˈOlic 111:7, 8, 10; palalinien to 1 Hongti 2:3.) O mafanaˈay a tamdaw mamihayi to caay ko sasafeliten ko kimad no Kawas, manonoˈay to sapidoedoaw to kimad no Kawas a minengneng to waywayan no niyah, halo mingitangit to Kawas a padama cingranan a mihaen to demak. (ˈOlic 119:169) Palamiten ningra ko kimad no Kawas i falocoˈ no niyah (Matay 13:19-23), toˈtoˈen ningra i falocoˈ no niyah (Taneng 3:3-6; 7:1-4), halo “miˈintel to tatiihay a demak” (ˈOlic 119:104). Wawa no Kawas tiya i seraho paihkalay to hatiniay a noka cipinang. Caay ka kahi ci Yis miliyas to nika patay i pisemseman a tektek, samanen ano hasapa laˈosiaw to sapairasol no Fangcalay Cudad, oha mamihaen a mapatay cingra.—Matay 26:51-54.
w99 11/1 20 fiedac 6-7 fatac
Ano Adihay ko Pipaladaˈ
Fafahiyan a hongti no Sipa pakayni to maˈaraway matengilay ningra tada fahkaˈan nanay, lopayˈay cingra a pacaˈof ci Solomonan: ‘Tada lipahak ko matayalay iso, tona mararid cangra itini i kaˈayaw no miso mitengil to taneng iso.’ (1 Hongti 10:4-8) Soˈliˈlin kadofahay ko kaˈorip no matayalay ni Solomon, kawraan o nika kadofa no kaˈorip o lalangian no lipahak nangra cowa ka saan ci Sipa a hongti. ˈArawhan o nika rarid a mitengil to citanengay a sowal ni Solomon, o sataˈangayay a sakalemed sanay cingra. Anini o finawlan ni Yihofa adihayay ko toki micerid a milayap to citanengay a sowal ni Yihofa ato Wawa Ningra ci Yis Kristo, o pinengneng no hongti ci Sipa tada ngaˈayay a taˈarawan no mita!
Dotoc a sowal ni Sipa ci Solomonan sasinanoten ita: ‘Ci Yihofa Kawas iso o papahemeken Cingra!’ Sanay. (1 Hongti 10:9) Masapinangay ningra o taneng ato noka kadofa ni Solomon, o nano sapafeli ni Yihofa i cingranan. Mahaen o iˈayaway a sakiˈok ni Yihofa to Israil tamdaw. Sowal sa Cingra: ‘O sarikec ato limoˈot Ako, . . . ˈimeren a midoedo, samanen itini noka pinengneng no kasakitakit, oninian ko sakacitaneng ato sakacifanaˈ namo; matengil nangra konini kihcod a sarikec i, “tada o citanengay, cipinangay konini taˈangayay a kitakit.” Wa saan cangra.’—Limoˈot 4:5-7.
w07 8/1 29 fiedac 13 fatac
Kadofahay Kiso i ˈAˈayaw no Kawas Han?
13 Ano palemeden ni Yihofa ko finawlan Ningra i, sahtoay o sangaˈayay ko sapafeli Ningra i cangranan. (Yakop 1:17) Patinakoen ko sowal, toha sakarihadayaw no Israil a maˈorip, pafelian cangra to “cihacolay, ciwanengay no ˈodal mamatangay a sera”. Iraay ko sowal pakayni to Icip “o cihacolay ci wanengay no ˈodal” a pala sanay, kawrira ano palalinien ko Icip ato nipafelian ni Yihofa to Israil a sera i, iraay ko cecay taˈangayay a kasasiromaan. Pasowalan ni Mosi ko Israil, ‘o midimokosan no Kawas iso ci Yihofa kora seraˈ sanay. Ano falicen ko sowal i, edengan o midimokosan ni Yihofa i, wa ngaˈay a tanoktok ko kitakit. Ano madimadi ko Israil ci Yihofaan i, o papalemeden cangra. Ano palalinien to italiyokay a finacadan, masapinangay to ikakaay ko nika ngaˈay no kaˈorip nangra. Soˈlinay, edeng o mapalemeday ni Yihofa ngaˈ ‘kadofahay ko tamdaw’!—Saˈosi 16:13; Limoˈot 4:5-8; 11:8-15.
Odoˈ no Sinael
w04 9/15 25 fiedac 3 fatac
Kalimlaan no Limoˈot a Cudad
4:15-20, 23, 24—Hay ano mikecengay ko Rikec a mitoˈtoˈ to samiyay, ano todongen ko faco no maamaan malo sakaeres a lalosidan, o mararaway kora han? Cowa. Onini pina a sinael mikecengay aca to pisangaˈ to “tataˈongen” a faco, malo samiyay. Cowa ka piconged ko Fangcalay Cudad a mitoˈtoˈ, micoka to maamaan a faco malo sakaeres a lalosidan.—1 Hongti 7:18, 25.
SAKA 6 FOLAD 14-20 ROMIˈAD
O ODOˈ KO KIMAD NO KAWAS | LIMOˈOT 5-6
Pasifanaˈen ko Wawa Maolah ci Yihofaan
w05 6/15 20 fiedac 11 fatac
Wama Winaaw, Renecen ko Saali no Paro no Lomaˈ Iso
11 Pakayni toninian, o Limoˈot 6:5-7 marariday a saka dademaken no tamdaw a sinael. Fohaten ko Fangcalay Cudad ˈosien konini sinael. O sasasinanoten i, o wama wina a tamdaw isalakatho mipatanektek to kalalaˈed no niyah ato ci Yihofaan, tangongolen ko nika olah Cingranan, pakifalocoˈen ko sowal Ningra. Ano falicen a somowal, o wama wina oha kakiˈemel a mikinkiw ato midotim to kimad no Kawas, rariden a mihaen, hongaˈ macalep ko kacipinang halo tangongol ko nika olah to pakayraan ni Yihofa, safalod ato sarikec Ningra. O falocoˈ ato ponoˈ iso, ano matomes ko mikowaday a kimad no Fangcalay Cudad i, o mamangalef ko nika olah ato nika kangodo iso ci Yihofaan, lipahaken i Cingranan, ano mahaen i, nimaan a ecaka adihay ko sasowalen iso ato wawa saw.—Luka 6:45.
w07 5/15 15-16 fiedac
Samaanen Ako Padama ko Wawa Mapasifanaˈ Cangra Hani?
Mikitini i sasowalan iso, mamafanaˈ ko tao to manan ko kalim no falocoˈ, tokel no harateng, pinengneng to demak ato kahemekan iso, mikitini to midemakan iso, malecaday mamahapinang no tao koranan. (Loma 2:21, 22) Mikitini i engaengaho ko wawa, mitekaay cangra minengneng to sowal to demak no wama wina a minanam. Maˈaraw no wawa to maanan ko misakaretengan no wama wina, o mamisakareteng cangra toranan. Ano tangongolay ko kaolah iso ci Yihofaan, mahapinangay no wawa. Patinakoen, maˈaraway nangra to misakaretengay kiso to picekiw to Fangcalay Cudad. O mamahapinang nangra to isalakatan iso ko Hongti Kitakit i nokaˈorip iso. (Matay 6:33) Ano mararid kiso a mirienang to saˈopo, mitosil to Hongti Kitakit, mamahapinang no wawa, to misalimlaan iso ko midokoay ci Yihofaan a demak.—Matay 28:19, 20; Hipray 10:24, 25.
w05 6/15 21 fiedac 14 fatac
Wama Winaaw, Renecen ko Saali no Paro no Lomaˈ Iso
14 Itini i Limoˈot 6:7 a sinael somowalay, o kalalaˈed ato wawa adihayay ko toki a milengo to noˈadingoan a demak. Ano romakat i lalan, matayal i lomaˈ, anoca misalama i, ngaˈayay ˈameten no wama wina ko toki, midimokos to noˈadingoan a saali no wawa. Manaokaniw, “papasifanaˈ sa kiso”, caka tomerep a somowal to Fangcalay Cudad cowa ka saan, ao ngangaˈay kiso somowal to ciepocay a sasowalan, padama to wawa mikitini i no Kawas a minengneng to demak. Patinakoen, itini i Katalipaˈelal! Adihayay ko masakenakenaay a lalakaw, mahawpay ko maamaan a kahemekan a lalakaw. Ngaˈayay kiso misalalangian tonini a lalakaw, somowal to nisangaˈan ni Yihofa a fao, futing, ˈayam ato ˈaˈadopen, makapahay a serayan, ato masasi romaromaay a nanaman no icowacowaay a pala. Alatek makidat to kakalim no kaemangay, sapinengnengaw to mitepangan cudad no madimadiay kuli.—Matay 24:45-47.
Odoˈ no Sinael
Olah ato Masadafdafay Itini Nolitengan a Israil
11 O manan ko mananamay ita hani? Cowa aca ko waywayan ita ko minengnengan ni Yihofa, misakaretengay to kemod no falocoˈ ita, ora soˈlinay a ikemoday a tamdaw ita. (1 Samuil 16:7) Pakayni to harateng ita, falocoˈ ita ato waywayan ita ihekalay a mafanaˈ ci Yihofa. Mikilimay Cingra to kangaˈayan ita halo mipadama kitanan midemak to ngaˈayay a demak, kawra manonoˈay Cingra a pakahapinang kita to mararaway a harateng no niyah, misaˈicel a miwanik to tatiihay a harateng, toha saka ecaaw ka masiwar ko waywayan.—2 Rayray 16:9; Matay 5:27-30.
SAKA 6 FOLAD 21-27 ROMIˈAD
O ODOˈ KO KIMAD NO KAWAS | LIMOˈOT 7-8
Aka Mararamod Kamo ato Cangra
w12 7/1 29 fiedac 2 fatac
Misamaanay Hano Mihalamham ko Kawas to Midokoay Cingranan a Tamdaw Ciraramod to Mihakelongay a Tamdaw Hani?
Samanen mifiyoray to polong a finacadan konini. Mafanaˈay ci Yihofa to mihalakaay ci Satan to Israil tamdaw a mitaˈong to makaniway a kawas, mihaen a minahol cangranan. Mankora, paliˈayaway ko Kawas a parikec to Israil tamdaw, ano mararamod cangra ato roma finacadan a tamdaw i, ora caay pidoko to Kawas a tamdaw, mamikayhid to wawa no Israil mitaˈong to roma kawas. Papaira to manan karetengay a minaroˈan hani? Ano midoko to roma a kawas ko Israil i, caayto ko cacadaen no Kawas a madipot cangra. Ano caka madipot no Kawas i, mamadolo cangra malaˈafo no ˈada. Ano hatira i, sasamaan a masadak ci Misiya naitini i Israil hani? Ihkalay mahapinang konini, o halaka ni Satan a mikayhid to Israil a mararamod ato roma finacadan.
w15 3/15 30-31 fiedac
Ciraramod to “Edeng o Mitooray to Tapang a Tamdaw”—Kamayan o Matatodongay Han?
Hayi, palimoˈotay ci Yihofa kitanan ciraramod to mitooray to Tapang a tamdaw, misamaanay hani? Samanen mafanaˈay ko Kawas to o manan ko ngaˈayay to finawlan Ningra. Manonoˈay ko Kawas sapidipotaw to sikawdan Ningra, caay ka ciharateng to sapicadaaw to roray to nika mararaw no demak nangra. O romasa i, manonoˈay ko Kawas to sakalipahakaw no ˈorip nangra. Itini i lintad ni Nihimiya, ˈalomanay Yutaya tamdaw ciraramoday to caay pidoko ci Yihofaan a roma finacadan a fafahiyan, alaan ni Nihimiya ko tinakoan ni Solomon a parikec to Israil tamdaw. Somowalay cingra, soˈliˈlin ‘maolah ko Kawas cingranan . . . ˈarawhan ano cingrato makayhid no roma finacadan a fafahi ningra a mararaw.’ (Nihimiya 13:23-26) Mihaenay haw i, miharatengay ko Kawas to sakaciepocaw no sikawdan, palimoˈot kitanan edeng o soˈlinay mihakelongay Cingranan ko hararamod. (ˈOlic 19:7-10; Isaya 48:17, 18) Miakoˈiday ko Krisciyang to nika ciharateng no Kawas, mitiˈer to sakayat Ningra. Midofdofay cangra to sakowan no Kawas, mihayi to saˈakawangay a noka pikowan Ningra.—Taneng 1:5.
w15 8/15 26 fiedac 12 fatac
Itini i Salikoray a ˈAwaled Sapinangen ko Micawmaˈan Iso
12 Miharatengay to saka ciraramodaw a Krisciyang oha maminaˈon a mipiliˈ to hararamod. Parikecay ko kimad no Kawas kitanan: ‘Kamo ato cowa pihakelong a tamdaw caay maroyaroy, aka a makakapot cangranan. O moecelay ato tatiihay mahahecaday saw? O likat ato toˈeman mahahecaday saw?’ (2 Korinto 6:14) O sowal no Fangcalay Cudad to sikawdan no Kawas edeng o ‘mihakelongay to Tapang a tamdawˈ ko hararamod sanay, tatodong nora sowal edengan o micadaayto to paputisem, hanaca midoedoay to palinian ni Yihofa a tamdaw ko ngaˈayay sanay. (1 Korinto 7:39) Ano hararamoden iso ko maolahay ci Yihofaan a tamdaw i, ngangaˈay kamo madadamadama, malacafay a madimadi a midoko ci Yihofaan.
Odoˈ no Sinael
w04 2/1 13 fiedac 4 fatac
Pafeliay ci Yihofa to Kaloromiˈad a Kakaenen Ita
4 Mitolon pakayni to kaloromiˈad a kakaenen, maharatengay ita misaaliay kita to noˈadingoan a kakaenen to romiˈamiˈad. Kina cecayay, tona misaliwayay ci Yis to halafinay romiˈad a macahiwen, kawra micoˈayay to sakayhid ni Satan, caay kakahi mifalic to fakeloh malo kakaenen. Sowal sa cingra: “Caay ko kakaenen a cecay ko sakaˈorip no tamdaw. O sowal no Kawas to tahacecacecay ko sakaˈorip no tamdaw, saan ko sowal a matilid i Fangcalay Cudad.” (Matay 4:4) Mialaan ni Yis ko nano sowal ni Mosi to Israil tamdaw: “Misapoeneran [ni Yihofa] kiso, pacahiw tisowanan, pafeli to caayho ka ˈaraw iso ato tatoˈasan iso a mana malo kakaenen iso, toha sakafanaˈaw iso, caay ko kakaenen aca cecay ko sakaˈorip no tamdaw, oha mamitiˈerho to cecacecay a nisowalan ni Yihofa a sowal.” (Limoˈot 8:3) Pafelien ni Yihofa to mana ko Israil, malo kakaenen nangra, mihaen Cingra oha papasifanaˈaw cangranan itini noˈadingoan. Mamananam nangra ko cecay a demak, ‘mipodpod ko cecacecay tamdaw to malo kakaenen nangra toya romiˈad’, ano adihay ko mipodpodan i, tahacila wa cicacupito a ˈantol. (Kasadakan 16:4, 20) Kawra saka enem a romiˈad, mamipodpod tono tosaay romiˈad a kakaenen, tereken tahacila to Pipaseˈraan Romiˈad a kakaenen, ˈarawhan cowa ka ˈantol kora mana. (Kasadakan 16:5, 23, 24) Mihaenay haw i, onini a sapafeli a mana sapatalipaˈelalaw to Israil tamdaw, o mamidofdof cangra to Kawas, hanaca o ˈorip nangra cowa ko pakayniay aca i kakaenen, oha mamitiˈerho to ‘cecacecay a nisowalan ni Yihofa a sowal.’
SAKA 6 FOLAD 28– 7 FOLAD 4 ROMIˈAD
O ODOˈ KO KIMAD NO KAWAS | LIMOˈOT 9-10
Iraay ko Manan a Saali ni Yihofa Tisowanan?
w09 10/1 10 fiedac 3-4 fatac
Iraay ko Manan a Saali ni Yihofa Tisowanan?
Misamaanay hano tada makalim kita a midofdof to Kawas hani? Somowalay ci Mosi to cecay lalangian: “Edeng pikangodo iso ci Yihofaan Kawas iso.” (saka 12 sinael) Tangongolay ko pikangodo ita to Kawas, caay ka ciharateng to sapidemakaw to kaketeran Ningra a demak.
Kawra, o sakakaay lalangian ita midofdof to Kawas o manan saw? Sowal sa ci Mosi: ‘Kaolahen Cingra [ci Yihofa], sarocoden ko falocoˈ ato ˈicel iso a midoko ci Yihofaan Kawas iso.’ (saka 12 sinael) Maolah to Kawas hananay cowa ko harateng aca, mahaen o sowal no cecay pitiriˈan a cudad: “Itini no Hipray sowal, mitoroˈan i, ora makidatay no harateng a noka pidemak.” Tatodong no maolahay to Kawas hananay i, “tano demaken a paihkal to nika olah to Kawas” sanay kora cudad. Ano falicen ko sowal i, ano soˈlinay maolah kita to Kawas, o mamidemak to kahemkan Ningra a demak o sanay.—Taneng 27:11.
w09 10/1 10 fiedac 6 fatac
Iraay ko Manan a Saali ni Yihofa Tisowanan?
Ano makalim kita midofdof to Kawas, wa mapalemed Ningra kita. Sowal sa ci Mosi: ‘Dofdofen ko sapalimoˈot ato sarikec Ningra . . . onini a nisowalan ako anini i tamowanan, ta malayap namo ko sakaciepocaw.’ (saka 13 sinael) Hay, polong a sapalimoˈot ni Yihofa, kihcod a saali Ningra kitanan, o sakaciepocaw ita. Sowal no Fangcalay Cudad ‘o olah ko Kawasˈ sanay. (1 Yohani 4:8) Mihaenay haw i, sapalimoˈot no Kawas papaira to midaˈocay a epoc ita. (Isaya 48:17) Tengilen ita ko saali ni Yihofa kitanan i, mamaliyas ko adihayay a cariraw, ano ikor i, itini i sakowan no Hongti Kitakit no Kawas a milifok to midaˈocay a hemek.
cl-CH 16 fiedac 2 fatac
Ngangaˈay Kita Miraod to Kawas Han?
2 Nolitengan a Aprahaman o cecay a tinakoan cingra. “O widang Ako cingra,” sanay ci Yihofa tonini a madimadiay a tamdaw. (Isaya 41:8) Hayi, tada widang Ako hananay ni Yihofa ci Apraham. ‘Mitiˈer ci Yihofaanˈ ci Apraham, mankora malifok ningra konini a kalimlaan a widang. (Yakop 2:23) Anini, mikiˈayaway ci Yihofa ‘miraodayˈ to polong maolahay a midoko Cingranan a tamdaw. (Limoˈot 10:15) Pakalalokay ko Fangcalay Cudad kitanan: “Piraod kamo to Kawas. Ta miraod ko Kawas i tamowanan.” (Yakop 4:8) O sapakalalok a sowal konini, kawra o sakiˈok konini.
Odoˈ no Sinael
it-2 717 fiedac
Anak a Tamdaw
Oya tataˈangayay takaraway a tamdaw, itiniay i lotolotok no Kanan ato lilis no riyar, mangalefay i katimolan a lilis no riyar ko aroˈ nangra. To cecay a liyad, iraay ko tatolo a kakeridan no Anak tamdaw, itiniay i Hipron a maroˈ cangra, ci Ahiman ato Sisay ato Talmay cangra. (Saˈosi 13:22) Oya 12 a misolapay a Hipray tamdaw itiniay i Hipron sakina cecay a pakaˈaraw to Anak a tamdaw. Patelong to tatiihay lihaf koya mamoetep a misolapay, misetek to sowal nao teloc noya tataˈangayay tamdaw i ˈayaw no lenlen sanay, halo pasowal ano palalinien i cangranan, hato o “ririˈ” ko nika miming nangra sanay. (Saˈosi 13:28-33; Limoˈot 1:28) Tona takaraway ko Anak a tamdaw, ano somowal ko tamdaw to Imim ato Rifaim a tamdaw i, mialaan ko Anak a tamdaw a palalini. Ciˈicelay ko Anak a tamdaw, saka ira sato ko mahaenay a sowal: ‘Cima ko mamaedeng a pakacoay to Anak a tamdaw saw?’ Sato maan.—Limoˈot 2:10, 11, 20, 21; 9:1-3.