Pinengnengan to Lalakaw no Mitosilay ato Nikaˈorip Rayray no Saˈopo
SAKA 11 FOLAD 1-7 ROMIˈAD
O ODOˈ KO KIMAD NO KAWAS | YOSUWA 18-19
“Tano Matanengay a Pakayraan ci Yihofa, Misakilac a Palilam to Sera”
it-1 772 fiedac 1 fatac
Kalanganganan
Ano misakilac to aicowa ko kasangasaw milayap to saparocek a hafay i, tosaay ko sasinanoten a lalangian: O saˈosi no nipiritos, ato kataˈangay no ngasaw. O mamisaˈosi ko nipiritos to maedeng aicowa ko kahacecay ngasaw milayap to saparocek a hafay, patinakoen, i kaˈamis anoca i katimol, i kawali anoca i kaetip, i lilis no riyar anoca i lotolotokan hokira. Tano miritosay a pakayraan ci Yihofa misaˈosi to kalanganganan no kasangasaw, toha saka ecaaw malacongis ato maˈinap cangra. (Taneng 16:33) O roma i, pakaynien no Kawas i piritos a misakilac to sera, o sapahecadaw toya ˈayaw no patay ni Yakop a sapairasol a sowal ningra. Onini a sapairasol a sowal maˈoningay i Satapangan 49:1-33.
it-1 702 fiedac 1 fatac
Saparocek a Hafay
Saparocek a sera. O milayapan no Israil tamdaw a sera o sapafeli ni Yihofa i cangranan, pasowalan Ningra ci Mosi to kalanganganan no sera nangra. (Saˈosi 34:1-12; Yosuwa 1:4) O Kat tamdaw, Riupin tamdaw ato kalitosa a Manasi ngasaw, o ci Mosi ko mipalilamay cangranan. (Saˈosi 32:33; Yosuwa 14:3) O romaroma ngasaw itiniay i sakayat ni Yosuwa aci Iliyacar, miritos a mipalilam. (Yosuwa 14:1, 2) Malecaday to sapairasol a sowal ni Yakop i Satapangan 49:5, 7, ci Simiyon ato Lifi awaay kono niyah tekedan a sera malo saparocek a hafay nangra. O hafay ni Simiyon (mahawpay ko niyaroˈ ato italiyokay a pala) itiniay ilalomaˈ no hafay no Yuta (Yosuwa 19:1-9). O hafay no Lifi i, o mipasadakan a 48 niyaroˈ to naitiniay i polong a Israil tamdaw. Tona mapanilnilay ko Lifi tamdaw matayal to demak no fangcalay kopang, o ci Yihofa ko todong a saparocek hafay cangranan, malayapay nangra ko pacakatan no Israil tamdaw a cecay no moetepay malo lifon ato hafay nangra. (Saˈosi 18:20, 21; 35:6, 7) O kahacecay lalomaˈan aitini i saparocek to ngasaw nangra a hafay mililam to sera. Malenak malenakto ko kahacecay a lalomaˈan i, o malilamay no teloteloc nangra a sera i, palidlid sanayto a miming.
it-1 772 fiedac 2 fatac
Kalanganganan
Maharekto miritos a misaˈosi to kaitiraan no kahacecay ngasaw i, mamisaˈosiho to kataˈangay no sera no kahacecay a ngasaw, ora saka tosa lalangian ko sasinanoten: O kaˈaloman no tamdaw. ‘Mamiritos kamo misakilac to sera, paroceken to hafay ko kasalalomaˈan. Ano ˈaloman ko tamdaw, pafelien to adihayay saparocek a hafay; ano mamang ko tamdaw i, mamangen ko saparocek a hafay. Ano maritos to cima ko papafelien tora sera i, pafelien cingra.’ (Saˈosi 33:54) O masaˈosiay no miritosan i, cowa ko mamafalic, kawra o kataˈangay no sera ngaˈayay falicen. Patinakoen, o sera no Yuta ngasaw tada taˈangayay, mialaan ko pina sera pafeli to Manasi ngasaw.—Yosuwa 19:9.
Odoˈ no Sinael
it-1 772 fiedac 5 fatac
Kalanganganan
Pakayni to ikaetipay no Yortan ˈAlo a misakilacay a demak, o maˈoningay no Fangcalay Cudad o saˈayaway mililamay i, o Yuta ngasaw (Yosuwa 15:1-63), teloc ni Yosif (Ifraim ngasaw) (Yosuwa 16:1-10), atoya itiniay i kaetip no Yortan ˈAlo a maroˈ a kalitosa ngasaw no Manasi. (Yosuwa 17:1-13) Miritosan a misakilac ko kalanganganan ato malayapay a niyaroˈ. Ikorto i, hato misawaday ko Israil tamdaw a misakilac to sera, samanen paihkalay ko sinael to malinahay cangra nai Kilkal tayra i Silo. (Yosuwa 14:6; 18:1) Cowa pasowal ko Fangcalay Cudad to hakowaay ko kahalafin nangra ecaka mipalilam to sera, kawra, ikor mirikecan ni Yosuwa koya papito a ngasaw, somowal to caay ka ngaˈay cangra nanayar sa miˈafas to ˈosaw a sera. (Yosuwa 18:2, 3) Oya papito a ngasaw hano nanayar sa i, o sowal no tamdaw iraay ko pina a lalangian sanay. Tona adihayayto ko maˈafasay no Israil i piloodan a dafong, hanaca ano nengnengen cowa ko kakaliki ko Kanan tamdaw a milood cangranan, onini a pito ngasaw hato cowa ka caloh a miˈafas to ˈosaw a sera. O roma i, caay ka ngalay cangra to sapiloodaw tora ciˈicelay a adaˈ, mihaenay a minayar awa ko demak. (Yosuwa 13:1-7) Alatek caayho ka tada mafanaˈ cangra tora sasakilacen a sera, mansa matalawen cangra a miˈafas.
SAKA 11 FOLAD 8-14 ROMIˈAD
O ODOˈ KO KIMAD NO KAWAS | YOSUWA 20-22
“Mikitini to Nika Raraw a Piharateng no Roma Tamdaw O Maanan ko Mananamay Ita Hani?”
w06 4/15 5 fiedac 3 fatac
Kalimlaan Hapakayraan a Masasowal to Raramod Iso
Mikifalocoˈay a masasowal micongeday to sapikidataw to mararaway a piharateng no tao. Nengnengen ko nalifetan no Israil itiyaho. Itiniay ikawali no Yortan ˈAlo a Riupin, Kat ato Manasi a kalitosa ngasaw mipatirengay to pipatoˈayaan itatihi no Yortan ˈAlo, “taˈakayay takaraway kora pipatoˈayaan.” Romaromato a ngasaw mararaway ko piharateng tora demak nora tosa ira ko kalitosa a ngasaw. Oyato ikaetipay no ˈalo a ngasaw miharateng to misafelitay ko itiraay a salikaka to Kawas sanay, saka mihalakaay to tatayra milood tora “misafelitay” hananay nangra. Nikawrira, ˈayaw no mamilood cangra, paliˈayaway miocor to taypiyaw masasowal to ikawaliay a ngasaw, misapinang to lalangian nangra patireng to pipatoˈayaan. Tada o citanengay konini demak! Masapinangto no ikaetipay a ngasaw, cowa ka pidemak ko ikawaliay a salikaka to misafelitay to Kawas a demak, ora sapatoˈaya cowa ko sapacakataw to misakimoodan mitodoh anoca romaroma a sapatoˈaya. Mihaen a patireng kora tosa ira ko kalitosa a ngasaw, o calemcemay latek ano ikor pasowal ko romaroma ngasaw i cangranan: ‘Awaay ko maamaan kalaliting namo ci Yihofaan,’ wa saan. Ora pipatoˈayaan i, o wacay to o midokoay cangra ci Yihofaan. (Yosuwa 22:10-29) O sapisawacay a pipatoˈayaan hananayto nangra pangangan kora pipatoˈayaan.—Yosuwa 22:34.
w08 11/15 18 fiedac 5 fatac
“Micangacang to Sakararihaday a Demak”
Alatek miharateng kora romaroma Israil tamdaw, mahapinangayto ko wacay, to ciraraway kora tosa ira ko kalitosa a ngasaw; ano talifahal han a milood cangra i, cowa ko ˈaˈaloman ko mapatayay sanay. Kawra, cowa ka pakifohfoh saan cangra a midemak. Miocoran no ikaetipay ngasaw ko taypiyaw tayra malalengo toya tosa ira ko kalitosa a ngasaw pakayra tora demak. Licay sa cangra: ‘Hano caay ka madimadi kamo to Kawas no Israil, patireng kamo anini tono namo a pipatoˈayaan, misafelit ci Yihofaan, misiikor ci Yihofaan?’ ˈArawhan i, oya mipatirengay to pipatoˈayaan a ngasaw cowa ka pisiikor to Kawas. Samaanay pacaˈof cangra tora sapakokot hani? Micoli cangra, caay kakahi masasowal to salikaka han? Damsayay a pacaˈof to sapakokot cangra, misongilaˈay a mitadtad to lalangian nangra mipatireng tora pipatoˈayaan, o mamidoko cangra ci Yihofaan. Ora caˈof nangra matafoay ko kalalaˈed aci Yihofa, awaay ko mapatayay tamdaw. Rihaday a malalengo misapinang to demak, palahedaway to kalacongis.—Yosuwa 22:13-34.
Odoˈ no Sinael
it-1 729 fiedac 4 fatac
Kanan
Soˈlinna cowa ka masaheci a malaplap ko Kanan a tamdaw, kawraan soˈlinayto mapafeli ko ‘niketonan ni Yihofa to papafelien ko tatoˈasan no Israil a sera . . . parihaday cangranan, dipayal ko taliyok,’ hanaca ‘nikiˈokan to papalemeden ko Israil finawlan a sowal, awaay ko cecacecay to malakisaway, malaˈosiay maemin.’ (Yosuwa 21:43-45) Tahinito tonini a romiˈad, cowato ka timolo ko taliyokay a ˈada misamsam to Israil, awaayto ko katalawan nangra. Na somowalay ko Kawas, ‘papalidlid han’ Ningra milaplap ko Kanan a tamdaw, toha saka ecaaw fahal saan malakohkoh ko sera, adihay sato ko ˈaˈadopen, mikalisangaˈ cangranan. (Kasadakan 23:29, 30; Limoˈot 7:22) Ikor ano caay pakalowid ko Israil tamdaw a milood to maanan niyaroˈ i, caay ko nika ikakaay ko kangaˈay no sapilood a lalosidan no Kanan (mahawpay ko cimaraday a sapilood a paliding), cowa haca ko nika caay pakalaheci ci Yihofa to sakiˈok Ningra. (Yosuwa 17:16-18; Kakitaan 4:13) Soˈlinay haw i, mapadik ko Israil i piloodan, samanen cowa ka madimadi cangra to Kawas ko sakahaen.—Saˈosi 14:44, 45; Yosuwa 7:1-12.
SAKA 11 FOLAD 15-21 ROMIˈAD
O ODOˈ KO KIMAD NO KAWAS | YOSUWA 23-24
“O Sapalimoˈot ni Yosuwa to Israil a Tamdaw”
it-1 783-784 fiedac
Pacarcaray a Tamdaw
Ta micomodto ko Israil tamdaw i Kanan onini nikiˈokan a pala i, mafalicayto ko pakayraan. Pasalatanto no Satakaraway a Kawas ko Israil ira ko fadangalan tonini a sera, palaˈosi to nikiˈokan to tatoˈasan nangra. Mikitini a misatapang caayto ko pacarcaray i Kanan ko Israil tamdaw, misahecian ni Yihofa mikeceng cangra a matatelek ato mitaˈongay to roma kawas a finacadan. (Kasadakan 23:31-33; 34:11-16) Edengan o sarikec ato limoˈot no Kawas ko tatooren no Israil, ao cowa ko sarikec noya lalaplapen a roma finacadan. (Lifi 18:3, 4; 20:22-24) Misakaretengan no Kawas cangra parikec to caay ka ngaˈay ciraramod to italiyokay a finacadan. Ano ciraramod cangra to mihakelongay to roma kawas a tamdaw, cowa ka eca minaol to mahaenay mitaˈongay to roma kawas a salawina, mitefing to mararaway pidoyongan ato pinangan nangra, telocto i, wa makayhid cangra miliyas to Kawas, makefeng i satalakal.—Limoˈot 7:2-4; Kasadakan 34:16; Yosuwa 23:12, 13.
w07 11/1 26 fiedac 19-20 fatac
O Sowal ni Yihofa Cowa ka Malahorac
19 Pakaynien i maˈaraway a demak, o ngangaˈay kita mihaen ko sowal: ‘O nikiˈokan ni Yihofa Kawas [ita] a sowal to papalemeden Ningra [kita], awaay ko cecacecay a sowal Ningra to malasawaday, malaˈosiay a maemin saki [kitanan], awaay ko cecacecay to malasawaday.’ (Yosuwa 23:14) Nano liteng tahanini, milidongay ci Yihofa to sikawdan Ningra, midipot cangranan, pafeli to saali nangra. Wa ngaˈay kiso mitoroˈ, itini i misaˈosian a toki ni Yihofa, icowaay a nikiˈokan Ningra to cowa ka laˈosi hani? Awaay ko mamatoroˈ iso. Sarocoden ko falocoˈ mitiˈer tora soˈlinay a sowal no Kawas, mihaen ko demak tada o citanengay.
20 Ano ikor i, samaanato aki? Pasowalay ci Yihofa kitanan, tataˈangay ko kafalic no cikiw, mala kalipahakan no tamdaw a lakoing sanay, ˈalomanay no mita iraay ko hatokel itira a maroˈ, o mimingay tamdaw tatayni i kakarayan ko hatokel, mikapot ci Kristoan a mala hongti. Ano itiniay i kakarayan ko hatokel, anoca itiniay i sera a lakoing a maˈorip, iraay ko matomesay a lalangian ita madimadi tahatolas, matira nolitengan a Yosuwaan. O tokel ita cowa ko aeca mamalaˈosi to cecay a romiˈad. Itiyato i, ano tikolen ita miharateng ko noˈayaway, wa mamikifalocoˈ a pasowal: “O mikiˈokan ni Yihofa a kihcod a sowal, malaˈosiayto maemin saki kitanan!”
Odoˈ no Sinael
w04 12/1 12 fiedac 1 fatac
Kalimlaan no Yosuwa Cudad
24:2—O wama ni Apraham ci Tira (Tirah), mitaˈongay cingra to samiyay han? Isalakat cowa ko midokoay ci Yihofaan Kawas ci Tira (Tirah, Satapangan 11:24, 28). O mitaˈongay to matenakay a kawas no Ur ci Sin a folad a kawas cingra alatek. Pakaynien to kalitengan a sowal no Yutaya, o misasangaˈay to samiyay ci Tira alatek sanay. Nikawrira, ta mitoorto ci Apraham to sapalimoˈot no Kawas a miliyas to Ur i, mihakelongay ci Tira (Tirah) ci Aprahaman miliyas to Haran.—Satapangan 11:31.
SAKA 11 FOLAD 22-28 ROMIˈAD
O ODOˈ KO KIMAD NO KAWAS | KAKITAAN 1-3
“O Timoloay ato Misahalakaay a Maˈoningay”
w04 3/15 31 fiedac 3 fatac
Mipadikan ni Ihut ko Miroeroay ˈAda
Sakalaˈosi ko demak ni Ihut, ora lalangian i, cowa ko nika mataneng a ikaka to roma tamdaw cingra, cowa ko nika tadanca no ˈada. Ano palaˈosi ko Kawas to araaw Ningra cowa ko mamafiyor no tamdaw. O araaw ni Yihofa oha sapilidongaw to finawlan Ningra miliyas to pisakuli no ˈada, o demak ni Ihut patooray to araaw no Kawas, mansa damaen no Kawas cingra, oninian ko sakalaˈosi no demak ni Ihut. ‘Ano ocoren ni Yihofa ko kakitaan a paˈorip cangranan i, mikapotan ni Yihofa ko kakitaan.’ Ci Ihut ko miocoran no Kawas itiya malo kakitaan.—Kakitaan 2:18; 3:15.
w04 3/15 30 fiedac 1-3 fatac
Mipadikan ni Ihut ko Miroeroay ˈAda
O sakacecay a nidemakan ni Ihut i, ‘misangaˈay to cecay matatapalay ko sinang a funus,’ ngaˈayay himeden i laeno no rikoˈ. Mihaen cingra to saka ecaaw ka mahela no mikingsaay. Tohatiniay, o makawananay a tamdaw itinian i kawili no tireng ko funus, hongaˈ kaliki a mihodoc. Ci Ihut o makawiliay tamdaw cingra, mansa ‘falodan ko funus i kawanan a cepiˈ ningra’. Mihaen i, cowa ko mamadolo a mahapinang no milaocay tamdaw. Telocto i, ngaˈayay ko lingad no demak, mapafeli ni Ihut ko ‘sapakaolah dafong ci Iklonan hongti no Moap.’—Kakitaan 3:16, 17.
Cowa pasowal ko Fangcalay Cudad to samaanay micomod ci Ihut i lomaˈ no hongti ci Iklon. Kantangay mifanaˈ ko Fangcalay Cudad: ‘Maharek a pafeli ci Ihut to sapakaolah a dafong i, papipanokayan koya miˈorongay to sapakaolah a tamdaw.’ (Kakitaan 3:18) Maharekto pafeli ci Ihut tora sapakaolah dafong i, keridan ningra koya miˈorongay a tamdaw miliyas to lomaˈ no hongti, tahira i ngata no pitoˈtoˈan a fakeloh i, tomerep i awaay ko katalawan a kitiraan. Itira cingra papipaliyas to kapot, o niyah sa patikol i lomaˈ no hongti. Hano papiliyasen ningra cangra hani? O midipotay ci Ihutan a sufitay cangra han? Anoca o saali no kalalaˈed no kitakit, mikotod ci Ihutan tayra i lomaˈ no hongti han? O miˈorongay aca to dafong cangra han? Ciharatengay ci Ihut to ˈorip nangra, saka papiliyasen cangra to ˈayaw no mamidemak cingra han? Ano o maananto ko lalangian, tada patalahkalay to timoloay ci Ihut, teked sa cecay ko niyah patikol i lomaˈ no hongti.
Itiraay Kilkal i pitoˈtoˈan to fakeloh a patikol ci Ihut i lomaˈ no hongti, pasowal ci Iklonan, ‘Hongtiaw, iraay ko misimedan a sasowalen ako i tisowanan.’ Cowa pasowal ko sinael to samaanay ci Ihut patikol a micomod i lomaˈ no hongti. Alatek cowa ka cisasa ko misimaway a sufitay, miharateng mamisamaan mikariˈang ko cecay a Israil tamdaw to hongti saw. Alatek o ci Ihut ko misahalakaay papiharateng to ˈada to sapipacakayaw cingra to finawlan no niyah, cecay sa cingra a patatikol. Ano o masamaanayto, iraay ko toki ni Ihut misateked a masasoˈaraw ato hongti.—Kakitaan 3:19.
Odoˈ no Sinael
w05 1/15 24 fiedac 7 fatac
Kalimlaan no Kakitaan Cudad
2:10-12. Mararid kita micekiw to Fangcalay Cudad, ‘aka mapawan’ to nidemakan ni Yihofa a kihcod a demak. (ˈOlic 103:2) O wama wina mamalalok a pasifanaˈ i wawa to kimad no Fangcalay Cudad, paifalocoˈen nangra.—Limoˈot 6:6-9.
SAKA 11 FOLAD 29– 12 FOLAD 5 ROMIˈAD
O ODOˈ KO KIMAD NO KAWAS | KAKITAAN 4-5
“Pakaynian ni Yihofa i Tatosa Fafahiyan Milidong to Finawlan Ningra”
w15 8/1 12 fiedac 6 fatac
“Malo Wina no Israil”
Sisira! Matengilho no Israil tamdaw konini a ngangan matalawayto, tirtir sanay to kokiˈ. O pidoyongan no Kanan tamdaw ato serangawan nangra adihayay ko mariˈangay a pinangan, patafangan nangra ko wawa malo sapatoˈaya ato patireng to pacopiyawan i sefi nangra. Oya maroˈay itini i miˈafasan a kilac no sufitay no Kanan a Israil tamdaw, samaanay cangra aki? Kitinien to masowalay i radiw ni Tipora, awaay ko mitaˈlifay i lalan a palafangay, awaay ko tamdamdaw i niyaroˈ sanay! (Kakitaan 5:6, 7) Haratengen hena, itiniay i colicolingan ato lotolotokan a milimek ko tamdaw to nika talaw nangra, caay ka timolo a maroˈ itini i awaay ko adipel a niyaroˈ, matalaw a romakat i taˈangayay a lalan, matalaw to mamaˈodis, macepet ko wawa ato miˈodang to fafahi nangra.
w15 8/1 13 fiedac 1 fatac
“Malo Wina no Israil”
20 miheca ko Israil tamdaw matalaw ko kaˈorip, tahira maˈaraw ni Yihofa ko pipasasiyor nonini maliyangay a finawlan, anoca tahira pipatireng no Kawas “ci Tiporaan malo wina no Israil”, matiya i nitilidan ni Tipora aci Parak a ˈolic. O kafanaˈan ita i, o fafahi ni Lapito ci Tipora, iraay ko wawa ningra hakiya cowa ka fanaˈ kita. Ano masamaanayto, ora nisowalan no sinael o sapatinako kora, tatodong i, o saali ni Yihofa ci Tiporaan mamatiya o wina a misalimla ato midipot to Israil tamdaw. Palimoˈotan cingra papipasowal ci Parakan onini fanekfekay ko pasoˈlin no falocoˈ a kakitaan, tayra miˈodis ci Sisiraan.—Kakitaan 4:3, 6, 7; 5:7.
w15 8/1 15 fiedac 1 fatac
“Malo Wina no Israil”
Mamisakaliki ci Yail misaharateng to sasamaan ko demak. Papipatienangen ningra ci Sisira a pahanhan. Palimoˈoten ni Sisira cingra aka pasowalen ko cimacima to itiniay cingra. Patadoen ni Yail pacawfan ci Sisira. Sapinanomaw ci Sisira, kawra pafelien ni Yail to hacol cingra. Oraanto i, kaliki a maredaˈ ko fotiˈ ni Sisira. Dotocto i, alaen ni Yail ko cecay pacek ato satoktok, o marariday sakadademak a lalosidan no mirarakatay pakaen to siri a fafahiyan konini, to sapatireng nangra to pakopangan konini, takaw sanay a mingata i tatihi ni Sisira. Nohatini mamipakamayto cingra, patado ci Yihofaan mipatay tonini tamdaw! Ano matayotayoho cingra i, katalawan ko teloc. Itiya i, o manan ko miharatengan ningra hani? Miharatengay to pinaayto a miheca konini tamdaw miroero to finawlan no Kawas sanay hakiya? Anoca miharatengay cingra, nanay midemak to miming a demak saki Yihofa, o tadamaanay konini sanay han? Cowa pasowal ko Fangcalay Cudad. Edengan kafanaˈan ita i, malaheciayto ko ˈinorong ningra. Mapatayayto ci Sisira!—Kakitaan 4:18-21; 5:24-27.
Odoˈ no Sinael
w05 1/15 25 fiedac 5 fatac
Kalimlaan no Kakitaan Cudad
5:20—Samaanay nai kakarayan ko fuˈifuˈis a milood saki Parakan hani? Cowa ka somowal ko Fangcalay Cudad, milood ko fuˈifuˈis sa i, o coyoh ko mipadangay a milood, o tatiihay a tahapinangan kora fuˈifuˈis sanay ko matanengay ni Sisira, anoca mararaway ko pisaˈosi nora matanengay ni Sisira hokira. ˈArawhan i, maedengay tano maanan a pakayraan ko Kawas a mikalisanga tora demak.
SAKA 12 FOLAD 6-12 ROMIˈAD
O ODOˈ KO KIMAD NO KAWAS | KAKITAAN 6-7
“Katayra, Tano ˈIcel no Miso”
w02 2/15 6-7 fiedac
Safalod no Kawas Caciepoc i Tisowanan
Nolitengan iraay ko cecay ci Kitiyon hananay kakitaan no Israil, caay pisatakaraw to niyah, caay pisalaeno to niyah. Caay pisahalakaaw to sakala ˈaˈideman no Israil, ˈarawhan ya nilnilen no Kawas cingra malo ˈaˈideman i, misapoeneray to niyah a pasowal: ‘O satadancaay a lalomaˈan no Manasi ngasaw kami, o satadancaay kako i paro no lomaˈ no wama kako.’—Kakitaan 6:12-16.
w05 7/15 16 fiedac 3 fatac
“Funus ni Yihofa ato funus ni Kitiyon!”
To tenok no lafii toemanay, awaay ko adeses, fahal sa matengil ko 300 a maˈariay a ˈatomo ato 300 a laepa, pahecad a pahoni, iraayho ko 300 cicediay a sufitay a milekal, mana eca ka marawraw ko Mitiya tamdaw saw! Mangalefay matengil ko pilekal nangra to ‘Funus ni Yihofa! Funus ni Kitiyon’ saan i, lomowadto cangra a miowawho a makokiˈ. Sasifod sato cangra, awato ko tapinangan cima ko ˈada cima ko niyah a sufitay. Matatapatapato ko ˈada, o ci Yihofa ko papihaenay cangranan, oyato a 300 sufitay tanektek a tomireng. Maliwasakto ko sufitay no Mitiya, comikayto milaliw. Lepelen no Israil tamdaw, miˈateng to lalan no Mitiya tamdaw, mahadefek cangra a maemin. Onini a lalood ko patelepay to koedaway a noka pisamsam no Mitiya to Israil tamdaw.—Kakitaan 7:19-25; 8:10-12, 28.
Odoˈ no Sinael
w05 1/15 26 fiedac 6 fatac
Kalimlaan no Kakitaan Cudad
6:25-27. Matanengay ko demak ni Kitiyon, cowa sapikidataw to keter no tao. Ano mitenak to ngaˈayay lihaf i, mamisinanot kita, aka ˈamelas ko sowal, mipakararaw to tao.
SAKA 12 FOLAD 13-19 ROMIˈAD
O ODOˈ KO KIMAD NO KAWAS | KAKITAAN 8-9
“Ka Pisapoener, Aka Pisatakaraw”
w00 8/15 25 fiedac 3 fatac
Sasamaan Kiso Misalof to Nika Sasiroma Hani?
Milood ci Kitiyon to Mitiya tamdaw i, tahidangan ko Ifraim tamdaw a papipadang. Malahecito ko lalood i, maketer ko Ifraim tamdaw ci Kitiyonan ya misatapang ko lalood i, cowa papirienangen cangra sanay. O sowal no Fangcalay Cudad: ‘Maketer cangra sakacacoliaw cingranan.’ Pacaˈof ci Kitiyon: ‘O nidemakan no mako mafilo kono namo a nidemakan saw? O ˈosaw a nilitodan a fadisosoˈ no Ifraim coko ikakaay to nilitodan ni Acipil a fadisosoˈ ko nika ngaˈay saw? Mapatorod no Kawas i kamay namo ko kakeridan no Mitiya ci Orip aci Ciip, o nidemakan ako pakalecad tono namo saw?’ (Kakitaan 8:1-3) Matenesay ko sowal ni Kitiyon, misayar to Ifraim tamdaw, telocto i, malasawaday ko sakalaloodaw ato salikaka. Soˈliˈlin malitaˈangay ko Ifraim tamdaw, kawra misaˈicelay ci Kitiyon mararihaday i cangranan. Wa ngaˈay kita mitodong ci Kitiyonan han?
w17.01 20 fiedac 15 fatac
Misapoeneray ko Falocoˈ Hano Kamayan o Masaka Limlaan
15 Iraay ko matatodongay noka pinengneng ni Kitiyon to misapoeneray ko falocoˈ, pakayni toninian patirengay to ngaˈayay a taˈarawan. Tiya ocoren ni Yihofa ko coyoh palihaf ci Kitiyonan i, tangsolay pasowal to o tadancaay ko lalengawan no niyah, caay ko papakadangar to sapatorod no Kawas a tayal. (Kakitaan 6:15) Oraanto i, mitiˈeray ci Kitiyon ci Yihofaan a micada tora ˈinorong, kawra to sapihapinangaw to cipinangay ko niyah to maanan ko saali ni Yihofa, mikilimay to sakayat ni Yihofa cingra. (Kakitaan 6:36-40) Soˈliˈlin o matanengay ato timoloay ci Kitiyon, kamayan minaˈonay a misinanot to demak cingra. (Kakitaan 6:11, 27) O toki konini a misaˈakawang to niyahan cowa ka saan a minengneng tora ˈinorong ningra, malaheci kora tayal i, misapoeneray to falocoˈ a minokay.—Kakitaan 8:22, 23, 29.
w08 2/15 9 fiedac 9 fatac
Ka Romakat i Lalan ni Yihofa
9 Ano sapisawidangaw ci Yihofaan i, ‘misapoener ko falocoˈ’ ngaˈ. (1 Pitiro 3:8; ˈOlic 138:6) Asipen ko Kakitaan saka 9 fedengan, mamafanaˈ to nika masaka limlaan no misapoeneray ko falocoˈ. Wawa ni Kitiyon ci Yotam sanay ko sowal: ‘Itiyaho, sapipatirengaw ko kilakilang to cecay hongti a mikowan cangranan.’ Tora sinael o olif a kilang, sokon a kilang ato fadisosoˈ kilang mitaypiyaway to citanengay a tamaw, cowa sapikowanaw to Israil cangra; oyanan sapiromrom aca to namal a ˈodidal a kilang mitaypiyawy toya malitaˈangay a Apimilikan, cingra i, o mipatayay to tamdaw sakala hongtiaw cingra, mikowan to tao. Soˈliˈlin mala hongtiay cingra, kawra ‘toloay aca miheca mikowan to Israil tamdaw’, mapatayto cingra. (Kakitaan 9:8-15, 22, 50-54) ‘Misapoener ko falocoˈ’ coko ikakaay ko nika ngaˈay han?
Odoˈ no Sinael
it-2 186 fiedac 1 fatac
Fangcalay Rikoˈ, Ifot
O falocoˈ ni Kitiyon isalakat o sapisaˈakawangaw to Kawas, papiharateng to pipadang ni Yihofa to Israil a malowid ko pilood, ˈarawhan ‘malo satalakalto ni Kitiyon ato paro no lomaˈ ningra’ konini a fangcalay rikoˈ (roma pihongyak: ifot), samanen ikor mitaˈongan no Israil tamdaw konini fangcalay rikoˈ. (Kakitaan 8:27) Awaay ko sowal no Fangcalay Cudad to mitaˈongay ci Kitiyon tonini a ifot, ya somowal ci Pawlo to “ˈalomanay” madimadiay a misawacayay tamdaw ni Yihofa to ˈayawho no mapatireng ko Kristokiyo i, mapanganganay ci Kitiyon.—Hipray 11:32; 12:1.
SAKA 12 FOLAD 20-26 ROMIˈAD
O ODOˈ KO KIMAD NO KAWAS | KAKITAAN 10-12
“Ci Yifta—O Misarocoday Midoko ci Yihofaan a Tamdaw”
w16.04 7 fiedac 9 fatac
Rahekeran Nanay ko Kawas to Madimadiay
9 Na midotimay ci Yifta to taˈarawan ni Yosif alatek. Soˈliˈlin kariˈangen no kakakaka ci Yosif i, kamayan patalahkal to sidaˈit. (Satapangan 37:4; 45:4, 5) O taˈarawan ni Yosif mikowaday ci Yiftaan midemak to matatodongay a nengnengen ni Yihofa a demak. O safasafa ni Yifta maedeng ˈangongolay ko pidokaˈ cingranan, kawra cowa ka pakayni toninian a caay kakahi malingad a milood. (Kakitaan 11:9) Pakayni ci Iftaan ko sowal, midopo to fangcalay ngangan no Kawas mikikakaay to notekedan a demak. Misetekay to falocoˈ cingra madimadi to Kawas, paira to ngaˈayay teloc saki niyahan ato tao.—Hipray 11:32, 33.
it-2 777 fiedac 4 fatac
Yifta
Ci Yifta o timoloay tawlikay ko demak a tamdaw, tangsolay miocor to tarokos tayra masasoˈaraw to hongti no Amon, pasowal to o Amon ko miˈafasay to sera no Israil. ˈArawhan o Israil tamdaw ko miˈafasay to sera no Amon sa misafelit to sowal cangra. (Kakitaan 11:12, 13) O nika pacaˈof ni Yifta, paihkalay to cowa ko mafokilay a tamdaw cingra; pakayni to likisi no Israil ato nika cacawmaˈ ato Kawas, tangongolay ko kafanaˈ ningra. Mipadikay to sowal no Amon tamdaw, somowal: (1) Na cowa ka pikalisangaˈ ko Israil tamdaw to Amon, Moap ato Iton (Kakitaan 11:14-18; Limoˈot 2:9, 19, 37; 2 Rayray 20:10, 11); (2) Tiya miˈafas ko Israil tamdaw to Kanan i, na cowa kono Amon a sera. Itiniay i kamay no Amori, nao mipatorodan no Kawas i kamay no Israil ko hongti no Amori ci Sihon ato sera ningra; (3) To ˈayaw no 300 a miheca, caay cisasa ko Amon tamdaw to iraay ko fadangalan no Israil maroˈ itini tonini a pala, hano anini sa i, miliyang cangra saw?—Kakitaan 11:19-27.
it-2 777 fiedac 5 fatac
Yifta
Patodicek hanany ni Yifta somowal kora lalengatan, o pakayniay i pidokoan kora kalacongis. Pasowal cingra maharekayto ko Kawas pafeli tonini sera i Israil tamdaw, mihaenay cowa ko mamakahi cangra pafeli to mimimiming aca nonini sera to mitaˈongay to makaniway kawas a tamdaw. Ci Kimos ko “kawas no Amon” sanay ci Yifta, o romaroma tamdaw miharateng mararaway cingra sanay. Nikawrira, o mitaˈongan no Amon tamdaw soˈliˈlin o ci Molikan, o kawas no Moap cingra, kawra onini makakedecay ko kacacawmaˈ a finawlan adihayay ko mitaˈongan nangra a kawas. Ci Solomon to sapakahemekaw to ˈalafang a fafahi ningra, mafolaay cingra mipacomod to nanaman no pitaˈong no Kimos tayni i Israil a kitakit. (Kakitaan 11:24; 1 Hongti 11:1, 7, 8, 33; 2 Hongti 23:13) O roma sa i, o sowal no romaroma mikakingkiway tamdaw, tatodong no “Kimos” hananay i, alatek o “miˈimeray, milowiday” sanay. (Nengnengen ko mitilidan ni Gesenius no Hipray ato Papilon a sowal a citing, mihongyakan ni Tregelles. 1901, 401 fiedac) Saka kidaten ni Yifta ci Kimos, alatek miharateng ko Amon tamdaw o kawas nangra ko “miˈimeray” anoca “milowiday” to romaroma a finacadan, mipafelianto cangra tora sera nasaan cangra.
Odoˈ no Sinael
it-2 776 fiedac
Yifta
Cowa ko focod a wawa ci Yifta. O wina ni Yifta nao tasalamaan a fafahiyan cingra, kawra o nihofocan ci Yifta tiya malo tasalamaanho a fafahiyan ko wina ningra cowa ka saan, cowa ko focod a wawa cingra. ˈAyaw no cacifaˈinay ci Kiliyatan ko wina ningra i, o tasalamaan a fafahiyan cingra, matira ci Rahapan nao tasalamaan a fafahiyan, ikor misawadayto a malo fafahi ni Salmon. (Kakitaan 11:1; Yosuwa 2:1; Matay 1:5) Saka laplapen no padek a salikaka ci Yifta papiliyas to lomaˈ i, sapicongedaw cingranan mililam to hafay no wama ci Kiliyatan, mahapinang itini to cowa ko focod a wawa cingra. (Kakitaan 11:2) O roma sa i, soˈliˈlin o kakeridan no finawlan ko padek a salikaka ni Yifta, kawra ikor mapatirengay no Kiliyat tamdaw cingra malo kakeridan. (Kakitaan 11:11) Na patoˈayaay ci Yifta to Kawas i fangcalay a kopang. (Kakitaan 11:30, 31) Ano o focod a wawa cingra i, cowa ko ngangaˈay a midemak cingra tonini a demak, samanen ihkalay mikeceng ko rikec, sowal sa: ‘O focod a wawa caay ka ngaˈay micomod i kasakopang ni Yihofa; o teloteloc ningra tangasa i sakamoetep a kadadoedo, cowa ko ngangaˈay a micomod i kasakopang ni Yihofa,’ sanay.—Limoˈot 23:2.
SAKA 12 FOLAD 27– 1 FOLAD 2 ROMIˈAD
O ODOˈ KO KIMAD NO KAWAS | KAKITAAN 13-14
“O Wama Wina Mikitini ci Manowaan ato Fafahi Ningra, Mananamay ko Maanan?”
w13 8/15 16 fiedac 3 fatac
Wama Wina–Pahatatanamen ko Wawa Nai Mimingho Cangra
Nengnengen ko cecay nolitengan a tinakoan. Ci Manowa hananay ko ngangan a Israil tamdaw, o Tan ngasaw cingra, itiniay i Cora niyaroˈ a maroˈ cingra, halafinay caay ka ciwawa ko fafahi. Ira ko cecay a romiˈad, pasowalen no coyoh no Kawas ko fafahi ningra to caciwawa to faˈinayan cingra. (Kakitaan 13:2, 3) Ya madimadiay a Manowaan ato fafahi matengil konini ngaˈayay lihaf ikor, mahemekay kawra calemcemay to sasamaanen palahad a pasifanaˈ konini a wawa. Saka, mitolon ci Manowa to Kawas: ‘Yihofaaw, oya niocoran Iso isawni, nanay liyawenho Iso a miocor patayni pasifanaˈ tamiyanan to sasamaanen palahad kora mamahofoc a wawa.’ (Kakitaan 13:8) Mahapinangay itini, ci Manowa ato fafahi misaˈicelay pasifanaˈ to wawa ci Somsonan mafanaˈ to rikec no Kawas. Paihkalay ko wacay, caay ka malahorac ko pisaˈicel nangra, tada malaˈosiay, samanen sowal no Fangcalay Cudad: ‘Fangcalay saocor ni Yihofa misatapangay a mitemer ci Samsonan,’ sanay. Malo kakitaanto no Israil ci Samson, adihayay ko nidemakan a kafahkaˈan a demak.—Kakitaan 13:25; 14:5, 6; 15:14, 15.
w05 3/15 25-26 fiedac
Mapaˈicelay ni Yihofa Pakalowid ci Samson!
Lomahad lomahadto ci Samson i, ‘palemeden ni Yihofa’ cingra. (Kakitaan 13:24) Cecay romiˈad, pasowalen ni Samson ko wama wina: ‘Maˈaraw ako ko cecay kaying no Filistin itira i Timna, tayra kamo miala cingranan malo fafahi ako.’ (Kakitaan 14:2) Haratengen hena, tada taˈangay ko kacekok no wama wina. Caka tayra milidong to finawlan ko wawa, misafelit a saciraramodaw to ˈada! Hanaca, cifafahi to ˈalafang tamdaw micicihay to rikec no Kawas. (Kasadakan 34:11-16) Taˈangay ko pilalang nangra: ‘Itini i salawinawina ita ato finawlan ita, awaay ko cecacecay fafahiyan saw? Hano pacieci sa kiso sakacifafahiyaw to Filistin tamdaw, o cowa ka picada to kerit a finacadan cangra.’ Nikawrira cowa ka yoyang ci Samson: ‘Alaen iso panokay cingra malo fafahi ako, samanen kaolahan ako, matama i falocoˈ ako cingra.’—Kakitaan 14:3.
Odoˈ no Sinael
w05 3/15 26 fiedac 1 fatac
Mapaˈicel ni Yihofa Pakalowid ci Samson!
Onini a Filistin fafahiyan iraay ko maanan mikiriwiˈay han? Hano ‘matama i falocoˈ’ ni Samson cingra saw? O mitilidan ni Maklinto aci Setelan a Hakakciting, sanay ko sowal, ‘saka matama kora fafahiyan, cowa ko nika kapah cingra, ao ngangaˈay a milaheci to maanan a patosokan.’ Milaheci to maanan patosokan hani? Kakitaan 14:4 sanay ko sowal, ci Samson i, ‘mitalaay to kangaˈayan a toki to sapiloodaw to Filistin tamdaw.’ Oninian a lalangian ko sakacifafahiyaw ningra. Lomahad taˈangayto ci Samson i, ‘fangcalay saocor ni Yihofa misatapang mitemer ci Samsonan’, tatodong nora i, mikowadan cingra papidemak. (Kakitaan 13:25) O fangcalay saocor ni Yihofa ko micikerohay a mipaˈicel ci Samsonan, cowa aca ko nika pidama cingranan malo kakitaan no Israil, hanaca micikerohan cingra misaali to sakacifafahiaw. Mihaen i, makilimay ni Samson ko toki han? Nengnengen ita hano mafanaˈ ci Samson to midamaay ci Yihofa i cingranan.