Pinengnengan to Lalakaw no Mitosilay ato Nikaˈorip Rayray no Saˈopo
SAKA 1 FOLAD 3-9 ROMIˈAD
O ODOˈ KO KIMAD NO KAWAS | KAKITAAN 15-16
“Misafelitay a Demak, O Tadancaay a Waywayan”
w12 4/15 8 fiedac 4 fatac
Misafelitay a Demak—O Tadancaay a Waywayan!
4 Onini a sasowalen i, ci Tilila, o kaolahan fafahiyan ni Samson cingra. Nao mamipadik ci Samson to Filistin a tamdaw, midipot to finawlan no Kawas. Mafanaˈay alatek koya lalima a kakeridan no Filistin tamdaw to cowa ka olah ci Tilila ci Samsonan, cowa ko mamadimadi cingranan, saka hayi saan cangra to papafelien to adihayay payci ci Tilila, papihapinang to naicowaay ko ˈicel ni Samson, to sapipatayaw cingranan. Maˈanofay to payci ci Tilila, hayi sa micada to sapaˈalofo. Sakiemel sa cingra to sakafanaˈaw tora mahimeday a demak ni Samson, kina tolo a pasokiyaw cingra. Saka “to romiˈamiˈad miharara ci Tilila i cingranan, miliclic cingranan, saka ceraˈ sato ci Samson,” sowal hanto ningra ci Tilila, to nika cowaho ka maleceng ko fukes ningra, ano lecengen ko fukes ningra i, mamalahdaw ko ˈicel ningra. Mafanaˈto ci Tilila i, pakafotiˈen ningra i cepiˈ ningra ci Samson, pohay hanto ningra ko tamdaw papileceng to fukus ni Samson, oraanto patoroden i ˈada ci Samson, pakihater han samsamen no ˈada cingra. (Kakitaan 16:4, 5, 15-21) Tada maˈanof to payci ci Tilila, mipacakay to maolahay cingranan a tamdaw, o tadancaay a waywayan konini!
w05 1/15 27 fiedac 3 fatac
Kalimlaan no Kakitaan Cudad
14:16, 17; 16:16. Tatangic sa miharara, miroeroay to tamdaw, mipalakay to kalalaed ato tao.—Taneng 19:13; 21:19.
w12 4/15 11-12 fiedac 15-16 fatac
Misafelitay a Demak—O Tadancaay a Waywayan!
15 O ciraramodayto a tamdaw sasamaan a madimadi to ramod hani? Sowal no Kawas: ‘Karaheker kiso ato kaemangho mialaan iso a fafahi.’ ‘Karihaked kiso maˈorip ato kaolahan iso a fafahi’. Ano o fafahito mamihaen to demak i faˈinay. (Taneng 5:18; Patnakay 9:9) O mararamoday ano matoˈasto i, pakedecen ko kalalaˈed a tatosa, mararid a malacafay, ano o falocoˈ malacecay, masasi ciharateng cangra, makakapot ko kaˈorip, maloka maaingid cangra. Mamisaˈicel ko mararamoday a patanektek to kararamod nangra, mitafo to kalalaˈed nangra aci Yihofa. Toha sakatooraw tonini patosokan, malacafay ko mararamoday micekiw to Fangcalay Cudad, malacafay a mitosil, malacafay a mitolon micangacang to sapalemed ni Yihofa.
MADIMADI CI YIHOFAAN
16 O romaroma tamdaw i kasakopang na midemakay to karetengay a raraw, tahacadaay to karetengay a pirikec, ‘to saka tanektekaw ko pasoˈlinay falocoˈ nangra.’ (Titus 1:13) Mafalahay ko romaroma. Itini i nipirikec a mapalifet cingra, patatikol a masalof i noˈadingoan. (Hipray 12:11) Ano o salawina anca o ngaˈayay widang ita kora mafalahay tamdaw i, o nika madimadi ita mamapalifet—cowa ko nika madimadi ita to salawina, ao nika madimadi ita to Kawas. O hahapinangen ni Yihofa kita, minengneng to midofdofay to limoˈot Ningra hokira, eca ka picawmaˈ to cimacima mafalahay a tamdaw.—ˈOsien ko 1 Korinto 5:11-13.
Odoˈ no Sinael
w05 3/15 27 fiedac 6 fatac
Itini i Sapafeli ˈIcel ni Yihofa Pakalowiday ci Samson!
Samacayay ko falocoˈ ni Samson to sapiˈodisaw to Filistin tamdaw, awaay ko maamaan a tatiihay falocoˈ. Saka tayni cingra i Kaca toya tasalamaan a fafahiyan i, o sapiloodaw aca to ˈada no Kawas. Itini i niyaroˈ no ˈada, ira ko pilafinan wangaˈ, edengan o lomaˈ nora tasalamaan a fafahiyan ko kangacoran, soˈlinay awaay ko maamaan a tatiihay harateng ni Samson. To lafiiˈ, miliyas cingra tora lomaˈ, romakat tayra i fawahan no niyaroˈ repet han ningra koya cacafiˈan nora ˈadawang a mifangad, pakiˈafala han ningra miˈorong patayra i 60 kongli a lotolotokan no Hipron. Edengan o sapaˈicel no Kawas ko sakadangar ningra tonini a demak, paihkalay konini to mihaydaan no Kawas ko demak ni Samson.—Kakitaan 16:1-3.
SAKA 1 FOLAD 10-16 ROMIˈAD
O ODOˈ KO KIMAD NO KAWAS | KAKITAAN 17-19
“Cowa Pidofdof to Sarikec no Kawas, Papaira to Tatiihay a Teloc”
it-1 1089 fiedac
Mika
1. Ifraim. Micicihay to saka falo a Rikec no moetepay Rikec ci Mika (Kasadakan 20:15), mitakawan ningra ko 1,100 rimood a lingkim no wina ningra. Ikor mihaiyay to nika raraw ningra, patikol tora lingkim i winaan. Sowal sa ko wina ningra: ‘Pacakaten ako konini i kamayay lingkim i ci Yihofaan, mitoˈto to cecay samiyay ato marad a samiyay saki tisowanan. Mihaen i, todongto ono miso kora lingkim.’ Alaen no wina ni Mika ko 200 rimood a lingkim pafeli to misaˈkimay tamdaw, ‘mitoˈto to cecay kilang a samiyay ato marad a samiyay, teliˈen i lomaˈ ni Mika. Iraay ko ‘pitaˈongan’ i lomaˈ ni Mika, misangaˈayho to cecay ifot ato samiyay no lalomaˈan, nilnilen ko cecay faˈinayan wawa ningra malo saysi. Mihaen to demak hato o midokoay ci Yihofaan, ˈarawhan o mararaway kora demak, samanen micicihay to aka pitaˈong to samiyay sanay a limoˈot no Kawas (Limoˈot 20:4-6). Hanaca misakahemaway to Fangcalay Kopang ato saysi no Kawas. (Kakitaan 17:1-6; Limoˈot 12:1-14) Oraanto i, pataynian ni Mika ko cecay ci ‘Yonatan’ hananay a kapah no Lifi ngasaw i lomaˈ ningra (o wawa ni Kirson o fufu ni Mosi) pala saysien cingra. (Kakitaan 18:4, 30) Rahekeren ci Mika sowal sa: ‘Imatini mafanaˈ kako to sidaˈitay ci Yihofa i takowanan.’ (Kakitaan 17:7-13) Nikawrira cowa ko lalomaˈan ni Aron ci Yonatan, awaay ko tatodong a mala saysi, mihaenay matongalay ko raraw ni Mika.—Saˈosi 3:10.
it-1 1090 fiedac 1 fatac
Micah
Caho ka halafin, keriden ni Mika ko tamdaw a milepel to Tan a tamdaw. Malepelto ningra i, licayen no Tan tamdaw ci Mika to sapisamaanaw cingra saw, sowal sa ci Mika: ‘ˈAfasen namo a miala ko samiyay ato saysi ako, iraho ko maanan ako saw?’ Kapoˈien no Tan tamdaw cingra, ano tatoor sa cingra i cangranan i, latek mapatay kiso han nangra miculi. Maˈaraw ni Mika ko nika ciˈicel no Tan i, nokay sato cingra. (Kakitaan 18:22-26) Ikorto, looden no Tan tamdaw ko Lais, mitodoh to niyaroˈ, itira a patireng to Tan a niyaroˈ. Ci Yonatan ato fufu ningra malo saysito no Tan a ngasaw. ‘Ya itiraho i Silo ko Fangcalay Kopang no Kawas i, oya nisangaˈan ni Mika a samiyay itiraan i Tan a mipateli.’—Kakitaan 18:27-31.
Odoˈ no Sinael
w15 12/15 10 fiedac 6 fatac
Talifakay a Noka Pihongyak to Sowal no Kawas
6 Adihay adihayay a wacay paihkalay, o ngangan no Kawas o hahongyaken i Fangcalay Cudad, No Padaka a Faelohay Hekal a Mihongyakan 2013 miheca a misalofan, o ngangan no Kawas kina 7,216 a masadak, ikakaay to enem to iˈayaway a mitepangan. Limaay a masadak i 1 Samuil 2:25; 6:3; 10:26; 23:14, 16. Misalalangiay to manan konini hani? Oya misalalangian no Faelohay Hekal a Mihongyakan a Hipray sowal a Masola tilid, o maloloday cudad no Mapatayay Riyar kinaˈayaway to 1,000 a miheca, itini tonini maloloday cudad iraay ko fangcalay ngangan no Kawas. O roma i, misongilaˈ a micekiw tora kalitengan maloloday cudad, itini i Kakitaan 19:18 iraay a mahongyak ko ngangan no Kawas.
SAKA 1 FOLAD ROMIˈAD 17-23
O ODOˈ KO KIMAD NO KAWAS | KAKITAAN 20-21
“Aka Pisawad a Milicay ci Yihofaan”
w11 9/15 32 fiedac 2 fatac
Ano Tahasiˈayaw to Pasangaray Mamatira Kiso ci Finihasan Han?
Itini i Kipiya o niyaroˈ no Pinyamin tamdaw mafekaday ko cecay kaadayayan a demak, o papina faˈinayan no niyaroˈ macaceroceroray a miˈodang to kapi a fafahi no cecay Lifi a tamdaw. Mafanaˈto ko romaroma ngasaw i, sapiloodaw to Pinyamin tamdaw. (Kakitaan 20:1-11) ˈAyaw no pilood nangra milicayay to sapadama ni Yihofa, ˈarawhan kina tosaay a mapadik no Pinyamin cangra, ˈalomanay ko mapatayay. (Kakitaan 20:14-25) Ano mitolonto awaay ko epoc, wa saanto miharateng cangra han? Mihaen cangra a misaysay to tatiihay demak, mahemekay ci Yihofa han?
w11 9/15 32 fiedac 4 fatac
Ano Tahasiˈayaw to Pasangaray Mamatira Kiso ci Finihasan Han?
Mikitini tonini maˈoningay mananamay ita ko manan hani? Ano latek, iraay mafekad ko pasangaray i kasakopang, soˈliˈlin mingitangitan no malohemay malitengay ko sapadama no Kawas, hanaca misaˈicelay cangra a misaysay, kawra kamayan a padadotoc kora pasangar. Ano hatiraay i, o malohemay malitengay paifalocoˈen ko sowal ni Yis: ‘Padadotoc a mingitangit, papafelien kamo; padadotoc a mikilim, mamatama namo; padadotoc a mikongkong, mamafawah ko fawahan saki tamowanan.’ (Luka 11:9) Soˈliˈlin hato manayaray ko pipacaˈof no Kawas, kawra o papasoˈlinen no kantok, o aitini i matatodongay a tatokian pacaˈof ci Yihofa.
Odoˈ no Sinael
w14 5/1 11 fiedac 4-6 fatac
Mafanaˈay Kiso Han?
Samaanay ko sufitay misaka dademak to sapitekol to fakeloh a rafir?
Sapitekol to fakeloh a rafir ko sapipatay ni Tafiti ci Koliyatan. Pinaay miheca a malo mipakaenay to siri ci Tafiti, maedeng itiyaay cingra mihatatanam a mitekol to fakeloh.—1 Samuil 17:40-50.
Itini nolitengan a Icip ato Asiriya a materekay a dafong nangra, iraay maˈaraw ko sapitekol to fakeloh a rafir. Onini sapilood a lalosidan tano rafiran anca kiladom a sangaˈen ko sano ˈalofoay, paketingan ko tosa kaered. Miteliˈan ko cecay rimoroay anca rimadacay a fakeloh i ˈalofo, maedeng 5-8 kongfen ko kataˈangay nora fakeloh, 250 ke ko kareteng nira. Dotoc i, totoyen noya mamitekol a tamdaw kora rafir, milileng i fafaed no fongoh to kina pina, oraanto hawaden no kamay ko cecay a kaered, mifahekol to fakeloh, matama koya tatekolen a dafong anca tamdaw.
O mikakorkoray tono litengan dafong a tamdaw, makorkoray nangra ko mitekolan no rafir a fakeloh i piloodan itini i Congtong, o mafenekay a mitatekolay to fakeloh a sufitay, mafanaˈay tano 160 tangasa 240 kongli ko efer no fakeloh a mitekol. Pakayni to cikay no mitekolan a fakeloh ikakaay to panaˈ hokira, caay ka hahecad ko sowal no mikakingkiway. Nikawrira, o pipatay no matiniay a sapilood a lalosidan maedeng cowa ka isafa no panaˈ.—Kakitaan 20:16.
SAKA 1 FOLAD 24-30 ROMIˈAD
O ODOˈ KO KIMAD NO KAWAS | RUCU 1-2
“Pasoˈlinen ko Madimadiay Olah ni Yihofa”
w16.02 14 fiedac 5 fatac
Todongen ko Ngaˈayay Widang ni Yihofa
5 Na ngaˈay a mihaen ko piharateng ni Rucu, kaemangho ko niyah maponengto, ano minokay i lomaˈ no wina, maedeng mamidipot ko paro no lomaˈ to kaˈorip ningra. Hanaca, o nalacolan ningra ko Moap, o kafanaˈan ningra ko serangawan, sowal ato finawlan no Moap. Ano hakelongen ci Naomi tayra i Piclihim i, masasiromaay ko pakayraan. Ano ci Naomito palimoˈotan ci Rucu papinokay i Moap, samanen mafanaˈay ci Naomi, awaay ko ˈicel no niyah a midipot to kaˈorip ni Rucu, hanaca awaay ko faˈinayan wawa to ngangaˈay malo faˈinay ni Rucu. O roma i, ci Orpa ‘minokayayto i finawlan ningra, mitaˈong to kawas ningra.’ (Rucu 1:9-15) Wa mamisamaan misaˈosi ci Rucu hani? O saˈosi ningra caay ka lecad toni Orpa, caay ka sapinokayaw cingra mitaˈong to makaniway kawas no finawlan ningra.
w16.02 14 fiedac 6 fatac
Todongen ko Ngaˈayay Widang ni Yihofa
6 Ano nengnengen mafanaˈayto ci Rucu ci Yihofaan itiya, alatek o wama wina no faˈinay ko pasifanaˈay cingranan. Mafanaˈay ci Rucu caay ka lecad ko makaniway kawas no Moap ci Yihofaan, hanaca mafanaˈay to kakaolahen ningra ci Yihofa a midoko Cingranan. Kawra o nika fanaˈ aca cowaho ka edeng, matanengay ko pisaˈosi ni Rucu. Saan a pasowal cingra ci Naomian: ‘O finacadan iso o finacadan ako, o Kawas iso o Kawas ako.’ (Rucu 1:16) Tada kasemeran ko olah ni Rucu ci Naomian, kawra ora kalimlaan i, o olah ningra ci Yihofaan. Ikor, pakahemekan ni Powac ci Rucu, pasowal to nika pitiˈer ci Yihofaan ‘materekay cingra ilaeno no sapikpik Ningra.’ (ˈOsien ko Rucu 2:12.) Ora nano sowal ni Powac maharatengay ita, o ciwciw no ˈayam itiniay i saˈading no sapikpik no wama wina a madipot. (ˈOlic 36:7; 91:1-4) Ci Yihofa malecaday o Wama ni Rucu a midipot cingranan, mapalemed cingra to nika pasoˈlin no falocoˈ. Pakayni tora saˈosi no niyah, caay ka pacekos ko falocoˈ ni Rucu.
Odoˈ no Sinael
w05 3/1 27 fiedac 2 fatac
Kalimlaan no Rucu Cudad
1:13, 21—Tona misetiˈan ni Yihofa ci Naomi saka mapades cingra han? Cowa, caay piloloh ci Naomi to Kawas, kawra tahasiˈayaw to mahaenay pasangar, tada masomaday cingra, miharateng alatek o ci Yihofa ko misetiˈay cingranan. Hanaca, o itiyaay a tamdaw minengneng, o sapalemed no Kawas ko wawa, o maˈkakay ko maˈasicay. Hatosa sa a mapatay ko faˈinayan wawa ni Naomi, awa ko fufu, alatek o Kawas ko pakangodoay cingranan sanay miharateng cingra.
SAKA 1 FOLAD 31— 2 FOLAD 6 ROMIˈAD
O ODOˈ KO KIMAD NO KAWAS | RUCU 3-4
“Patirengen ato Dipoten ko Ngaˈayay Ngangan Iso”
w12 10/1 22 fiedac 5 fatac
“O Ngaˈayay Fafahiyan”
Oraanto i, damsayan ni Powac pasowal ci Rucu: ‘Apengaw, nanay palemeden ni Yihofa kiso. O mipaihkalan iso a madimadiay a olah, o ikoray ikakaay to iˈayaway, samanen ano o manikawayto anoca cihafayayto a kapah, cowa ka sapitooraw kiso.’ (Rucu 3:10) Mihaen ko sowal ningra maedeng masayaray ci Rucu. Masowalay ni Powac koya ‘iˈayaway’ a madimadiay a olah ni Rucu, ora noka pihakelong ni Rucu ci Naomian minokay i Israil a midipot cingranan ko mitoroˈan ningra. O ‘ikoray’ a madimadiay a olah ningra, oranan nidemakan ningra nohatini a demak. Mafanaˈay ci Powac, o mahaenay ci Rucuan a kaemangay fafahiyan, mamadolo pakatama to kaemangay a faˈinay, ano cihafayayto anoca manikawayto. Kawra nohatini, kalim sa cingra cifaˈinay to ikakaay ko mihecaan a faˈinay. Mahapinangay ni Powac, tona maolahay ci Rucu to wina atoya mapatayay a wama ko sapihaen ningra to demak. Mangalay cingra sapisofocaw to wawa nangra a ira ko teloc, patireng to ngangan no wama i niyaroˈ. Caay ka ˈidi ci Rucu, mankora masemer ko falocoˈ ni Powac.
w12 10/1 23 fiedac 1 fatac
“O Ngaˈayay Fafahiyan”
Pasowal ci Powac ci Rucuan, polong a tamdaw mafanaˈay to nika o ngaˈayay fafahiyan kiso sanay, ano haratengen ni Rucu konini, maedeng mahemekay ko falocoˈ ningra. Misamaanay hano ira ko mahaenay ngaˈayay ngangan ni Rucu hani? O cecay kalimlaan a lalangian i, samanen ciharatengay cingra to sakafanaˈaw ci Yihofaan, mangalay a midoko Cingranan. O roma i, mafanaˈay ko tao to pidimokos ningra ci Naomian, paihkalay to olah i roma a tamdaw, hanaca makahiyay micada to nanaman no Israil, soˈliˈlin o kafahalan ningra konini. Ano todongen ita ci Rucu, o mamisakareteng to nanaman no tao. Mihaen i, ngangaˈay patireng kita to makapahay ngangan no niyah.
w12 10/1 24 fiedac 3 fatac
“O Ngaˈayay Fafahiyan”
Safafahiento ni Powac ci Rucu, ‘papuyapuyen ni Yihofa ci [Rucu], mihofoc to cecay faˈinayan a wawa.’ Tayrato ko fafahiyan no Piclihim palemed ci Naomian, halo pakahemek ci Rucuan, pasowal ci Naomian ira ci Rucu ikaka ko nika ngaˈay to papito a faˈinayan wawa saan. O maˈoningay no Fangcalay Cudad, o tatoˈasan no hongti no Israil ci Tafiti kora mihofocan ni Rucu. (Rucu 4:11-22) Ci Tafiti i, o tatoˈasan ni Yis Kristo.—Matay 1:1.
Odoˈ no Sinael
w05 3/1 29 fiedac 3 fatac
Kalimlaan no Rucu Cudad
4:6—O citatodongay micakay a tamdaw ano micakay to sera hano ‘mamisipon’ to saparocek a hafay no niyah saan hani? Salakat, o tamdaw ano pacakay to sera no tatoˈasan to nika nikaw ningra i, o citatodongay micakay a tamdaw ngaˈayay saˈosien to hakowaayto ko ˈosaw tahila i Kalipahakan a Miheca, pasadak to ˈaca micakay tora sera. (Lifi 25:25-27) O mamipalak to payci cingra micakay to sera saki salawina, itini nopaycian iraay ko sipon ningra. Ano mahofoc to faˈinayan wawa ci Rucu i, ora mamilayap tora micakayan a sera wao wawa ni Rucu ko milayapay. Cowa kono wawa no niyah anca mingataay a salawina ningra.
SAKA 2 FOLAD 7-13 ROMIˈAD
O ODOˈ KO KIMAD NO KAWAS | 1 SAMUIL 1-2
“Fohaten ko Falocoˈ a Mitolon ci Yihofaan”
ia 55 fiedac 12 fatac
Mifohatay to Falocoˈ Cingra Mitolon to Kawas
12 Pakayni i mitolonay a demak, ci Hana o ngaˈayay taˈarawan no polong midokoay ci Yihofaan a tamdaw. Sidaˈitay ci Yihofa pakalalok to finawlan Ningra mifohat to falocoˈ a mitolon i Cingranan, pasowalen Cingra to kacalemceman no falocoˈ, matira o wawa a mifowah a pasowal to wama, samanen pasoˈlinay ko wawa to wama, mafanaˈay to maolahay ko wama to niyahan. (ˈOsien ko ˈOlic 62:8; 1 Tisalonika 5:17.) Pakayni to pitolon ci Yihofaan, tarokos ci Pitiro mapatemeray no fangcalay saocor mitiliday tora kasayaran a sowal: ‘Hepolen namo i Kawas ko kihcod a cariraw, samanen ciharatengay Cingra i tamowanan.’—1 Pitiro 5:7.
w07 3/15 16 fiedac 4 fatac
Samaanay ci Hana Milifok to Rihaday
Mikitini tonini mamananam ita ko maanan? Ano pasowal kita to rawraw no falocoˈ i Kawas i, fowahen ko falocoˈ ita, mingitangit to sapadama Ningra. Ano awaayto ko ˈicel ita misaysay tora demak i, patorod han i kamay no Kawas, o sangaˈayay a pakayraan konini.—Taneng 3:5, 6.
Odoˈ no Sinael
w05 3/15 21 fiedac 5 fatac
Kalimlaan no 1 Samuil Cudad
2:10—Awaho ko tamdaw mikowan to Israil i, hano misaali ci Hana ci Yihofaan ‘pafelien to ˈicel ko mipatirengan Ningra a hongti’ saan hani? O Rikec ni Mosi paliˈayaway pasowal to aira ko hongti no Israil a mikowan. (Limoˈot 17:14-18) ˈAyaw no patay a sowal ni Yakop: ‘Cokor no hongti [tatodong o fadangalan no hongti] cowa ko mamiliyas to Yuta,’ sanay. (Satapangan 49:10) Itiniay mahapinang, misaaliay ci Hana ci Yihofaan pafeli to ˈicel tora aira a hongti. (Satapangan 17:16) Mansa, misaali ci Hana ci Yihofaan, pafelien to ˈicel ko noikoran a hongti.
SAKA 2 FOLAD 14-20 ROMIˈAD
O ODOˈ KO KIMAD NO KAWAS | 1 SAMUIL 3-5
“Ci Yihofa Ciharatengay ato Siniˈadaay Kitanan”
Ci Yihofa Ciharatengay ato Siniˈadaay Kitanan
3 Kaemangho ci Samuil itiniayto i fangcalay kopang a ‘mihodop ci Yihofaan.’ (1 Samuil 3:1) Cecay dadaya, mafotiˈayto ci Samuil, mifekaday ko cecay kafahkaˈan a demak. (ˈOsien ko 1 Samuil 3:2-10.) Matengilay ni Samuil iraay ko miowaway cingranan, oyaan matoˈasay a Ilian ko miowaway sanay cingra, orato tayraay ci Ilian, pasowal cingranan: “Mitahidangay kiso i takowanan, ini kako.” Sowal sa ci Ili, cowa pitahidang ci Samuilan sanay. O mahecaday a demak kinatosaay aca mifekad, mahapinangay ni Ili to o Kawas ko miowaway ci Samuilan, pasowal ci Samuilan ano miliyaw matengil ko ngiha i, sasamaan a pacaˈof. Ikor, mitooran ni Samuil ko sowal ni Ili a midemak. Itini satapang a miowaw ci Yihofa ci Samuilan i, hano caka itiya pasifanaˈ ci Samuilan to o Cingra ko miowawaay hani? Cowa pifanaˈ ko Fangcalay Cudad to lalangian, kawra mikitini toniya demak mahapinang ita, patadoay ci Yihofa toya kaemangay a Samuil a miharateng. Hano mihaen ko sowal hani?
Malefotay ko ˈIcel a Kawas Patadoay to Tamdaw a Miharateng
4 ˈOsien ko 1 Samuil 3:11-18. ˈOsien ko 1 Samuil 3:11-18. O sarikec ni Yihofa, mikangodo to malitengay ko kaemangay a tamdaw, mikiriwiˈay ko kakeridan no finawlan. (Kasadakan 22:28; Lifi 19:32) Wa ngaˈay haratengen iso pacerem ci Samuil mifanaˈto ci Ilian to pakidemay sasawkit no Kawas han? Soˈlinay i, sowal no Fangcalay Cudad, “matalaw ci Samuil a pasowal ci Ilian.” Kawraan, ci Ili ko misaaliay ci Samuilan a mihadak to lihaf no Kawas, palimoˈot ci Samuilan a somowal: “O maan ko sowal no [Kawas] i tisowanan saw? Aka pikilif i takowanan.” Mitengilay ci Samuil to sowal ni Ili, pasowal to kihcod cingranan.
Odoˈ no Sinael
w05 3/15 21 fiedac 6 fatac
Kalimlaan no 1 Samuil Cudad
3:3—Soˈlinay a itini i Safangcalay Kitiraan mafotiˈ ci Samuil han? Cowa. Ci Samuil i, o Kohat tamdaw cowa ko lalomaˈan no saysi a Lifi ngasaw. (1 Rayray 6:33-38) Mihaenay haw i, ‘caay ka ngaˈay micomod minengneng to fangcalay dafong.’ (Saˈosi 4:17-20) Itiniay aca i putal no Fangcalay Kopang ko picomodan ni Samuil, maedeng itiraay cingra a mafotiˈ. Ano nengnengen itiraay i putal no Fangcalay Kopang ci Ili a mafotiˈ. Itiniay i ‘piteliˈan to Katatelekan Lipa no Kawas’ sa kora sinael maedeng o italiyokay no Fangcalay Kopang ko mitoroˈan.
SAKA 2 FOLAD 21-27 ROMIˈAD
O ODOˈ KO KIMAD NO KAWAS | 1 SAMUIL 6-8
“Cima ko Hongti Namo?”
it-2 136 fiedac 1 fatac
Hongti Kitakit no Kawas
Misaaliay to Tamdaw a Hongti. Mangata 400 miheca na masadak nai Icip ko Israil, to ikor no 800 miheca a matatelek ci Apraham ato Kawas i, misaaliay ko Israil tamdaw patireng to cecay tamdaw mala hongti a mikowan cangranan, hatira o kalo kitakit sanay. Misadak cangra tonini saali, todong manaayay ci Yihofaan, maˈosiay to Kawas a mala hongti nangra. (1 Samuil 8:4-8) Manaokaniw, kitinien i sakiˈok no Kawas ci Aprahaman (masowalay i fafekang), mihalamham ko Israil patireng to cihongtiay a kitakit o matatodongay. Hanaca, o matiniay a pihalamham no Israil iraay ko lalangian: Oya ˈayaw no patay a sapairasol sowal ni Yakop pakayni ci Yutaan (Satapangan 49:8-10); oya nano sowal ni Yihofa to Israil ikor no masadak nai Icip cangra (Kasadakan 19:3-6); oya katatelekan a rikec (Limoˈot 17:14, 15); oya sapasowal no Kawas ci Palanan (Saˈosi 24:2-7, 17). Oya madimadiay a wina ni Samuil ci Hana itini satolon patalahkalay to matiniay a falocoˈ. (1 Samuil 2:7-10) Nikawrira itiya i, cowaho patalahkal ci Yihofa to pakayniay to Hongti Kitakit Ningra a ‘masimeday demak’, ano hacowa mapatireng konini a Hongti Kitakit, samaanay ko lekakawa nira, cima ko papalaˈosi, o ikakarayanay ha anoca iseraay ha. Mankora, nohatiniho misaali ko Israil tamdaw to hongti tada ˈamelasay a demak.
w11 1/1 27 fiedac 1 fatac
Soˈliˈlin Matoled Miememay Cingra
Mitolonay ci Samuil pakayni tonini a demak, sinanoten kora sapacaˈof ni Yihofa cingranan: ‘Ano o maanan ko sowal no finawlan i tisowanan i, tengil han iso, samanen caay ko kiso ko kaˈosian nangra, ao Kako ko kaˈosian nangra, caay kakahi Takowanan a mala hongti nangra.’ Matengil ni Samuil ko sowal no Kawas maedeng masayaray ko falocoˈ. O roma sai, ˈarawhan kaˈosien no Israil tamdaw ko satakaraway a Kawas, tada cowa pisakangodo cangra to Kawas! Palimoˈotan ni Yihofa ci Samuil papirikec to Israil tamdaw, ano patireng cangra to tamdaw a hongti i, o tataˈangay ko tatiihay teloc nangra. Toor hanto ni Samuil a midemak, mitengil ko Israil ikor kamayan mihaen ko sowal: ‘Caay, ira ko hongti a mikowan tamiyanan.’ Oraanto i, miliyaw haca ci Samuil a mitoor to sakayat no Kawas, tayra minilnil to mipiliˈan ni Yihofa a hongti.—1 Samuil 8:7-19.
w10 1/15 30 fiedac 9 fatac
Mapafangcal ko Pikowan ni Yihofa!
9 Patalahkalay ko likisi, oya saparikec ni Yihofa to Israil tamdaw soˈlinayto a mafekad. Patirengto to hongti ko Israil ikor, tatootoor sato mafekad ko pakidemay a demak. O mikowanay cangranan a hongti ano caay ka madimadi to Kawas i, mangalefay adihay ko pasangaray. Ano o Israilto a tamdaw mahaen i, nanima koyanan caay ka fanaˈ to Kawas a tamdaw saw? Nai litengho tahanini, o cowa ka fanaˈ to Kawas a mikowanay caay ka paira to midaˈocay sakaraheker no finawlan, cowa ko kafahkaˈan no mita konini! Manaokaniw, iraay ko pinapina a mikowanay misaˈicelay to sakadipayalaw no finawlan, halo micangacang to Kawas a palemed cangranan. Kawra haratengen hena, caay kakahi cangra midofdof to pikowan no Kawas, sasamaan ko Kawas a palemed cangranan saw?—ˈOlic 2:10-12.
Odoˈ no Sinael
w02 4/1 12 fiedac 13 fatac
Misamaanay Hano Micada to Paputisem Hani?
13 O tamdaw isalakatho a pasasiyor ngaˈ, ngaˈay a micada to paputisem mala Misawacayay Tamdaw ni Yihofa. O pasasiyoray hananay i, ono niyah a falocoˈ, misarocoday ko falocoˈ a mikotod ci Yis Kristoan. Misawadanto nangra ko itiyaay mararaway a pakayraan, misetek to falocoˈ midemak to matatodongay a nengnengen no Kawas a demak. Itini i Fangcalay Cudad, o milingatay to pasasiyoray a Hipray tilid ato Krisiya tilid i, iraay ko patatikolay sanay a tatodong. Paihkalay to miliyasayto to mararaway lalan, minokay pasayra i Kawas. (1 Rayray 8:33, 34) O minokayay i moecelay a tamdaw ‘palecaden ko waywayan tora pasasiyoray a falocoˈ’. (Dmak 26:20) Mihaenay haw i, o tamdaw mamisawad to mararaway a pihakelongan, midofdof to limoˈot no Kawas, misamacay a mikaolah ci Yihofaan. (Limoˈot 30:2, 8-10; 1 Samuil 7:3) Ano patikolto i moecelay ko tamdaw ikor, o harateng, patosokan, o pinangan mamasafaelohto. (Icikil 18:31) Tano faelohay a capeling a mikotay to caay ka ngodo a waywayan, mihaen i, o minokay i moecelay hananay konini.—Dmak 3:19; Ifiso 4:20-24; Kolosay 3:5-14.
SAKA 2 FOLAD 28— 3 FOLAD 6 ROMIˈAD
O ODOˈ KO KIMAD NO KAWAS | 1 SAMUIL 9-11
“Salakat O Misapoeneray ato Misamimingay ko Falocoˈ a Tamdaw ci Sawlo”
Mitafo to Misapoeneray, Misamiming ko Harateng a Kalacafay to Kawas
11 Haratengen ko tinakoan ni Sawlo. Kaemang cingra i misamimingay, mafanaˈay to citolasay ko ˈicel no niyah, cowa ka timolo micada to sapatorod ni Yihofa cingranan a ˈinorong. (1 Samuil 9:21; 10:20-22) Kawra caka halafin ci Sawlo mala hongti misatakarawayto, midemakay to cowa ka ngaˈay demaken no niyah a demak. Kinacecayay, cowa pakasoˈlin cingra to dadipoten ni Yihofa ko finawlan no Niyah, awaayho ci Samuil, haratengay sanay a patoˈaya i Kawas. Telocto, malahdaway ko pihayda no Kawas cingranan, salikor malahdaway ko saaroˈan no hongti. (1 Samuil 13:8-14) Mikitini ci Sawloan mananamay ita ko sapasifanaˈ, aka a pidemak to awaay ko fadangalan no niyah a demak.
w14 3/15 9 fiedac 8 fatac
Sasamaan Mitafo to Kinafalahay to Niyahan a Waywayan
8 Ka pisinanot kita, samanen o misatekeday a waywayan palidlid sanay a lomahad, saikor sao niyahay saan a misatakaraw, o niyah aca ko misikoran. O hongti no Israil ci Sawlo o tinakoan ita. Tiya mala hongti ci Sawlo i, o misapoeneray a tamdaw cingra, misamimingay to niyahan. (1 Samuil 9:21) O romaroma Israil tamdaw cowa ka hemek mala hongti ci Sawlo, padeteng sanay a misalaeno cingranan. Tona o sapafeli no Kawas ko hongti a saaroˈan ni Sawlo, maedeng iraay ko lalangian a mipaˈading to taliˈang no niyah, ˈarawhan cowa ka pisamaan tora milikafay cingranan a tamdaw. (1 Samuil 10:27) Midoedoan ni Sawlo ko sakayat no fangcalay saocor, mikerid to finawlan a mipadik to Amon a tamdaw. Misapoeneray cingra panokay to ˈodingar ci Yihofaan tora noka pakalowid ningra.—1 Samuil 11:6, 11-13.
w95 12/15 10 fiedac 1 fatac
O Amon Tamdaw—Miˈodisay a Patiko to Siniˈada
Miˈodisay a patiko to siniˈada ko Amon a tamdaw. Cowa pakihater sa ci Yihofa tonini mikariˈangay to finawlan Ningra a tamdaw. ‘Ta matengil ni Sawlo konini a sowal [ni Nahas] i, mapaˈicel no fangcalay saocor cingra, ngolaw sato cingra.’ Oraanto i, itini i sakayat no fangcalay saocor, saˈopoen ni Sawlo ko 33 ˈofad a sufitay, sapitekopaw a misaheci to Amon tamdaw, tangasa maliwasakto maemin cangra.—1 Samuil 11:6, 11.
Odoˈ no Sinael
w05 3/15 22 fiedac 8 fatac
Kalimlaan no 1 Samuil Cudad
9:9—‘O mipairasolay a tamdaw hananay anini, o mipaliˈayaway hananay itiyaho.’ O manan ko tatodong nonini a sowal? Onini a sowal alatek paihkalay, o Israil itini i lintad ni Samuil ato nika pikowan no hongti, o saaroˈan no mipairasolay palidlid sanay a ˈakawang, mankora o mipairasolay a tamdaw hananayto ko ‘mipaliˈayaway’. To hati:niay o saˈayaway a mipairasolay hananay no Israil tamdaw a minengneng ci Samuil.—Dmak 3:24.