Pinengnengan to Lalakaw no Mitosilay ato Nikaˈorip Rayray no Saˈopo
SAKA 3 FOLAD 7-13 ROMIˈAD
O ODOˈ KO KIMAD NO KAWAS | 1 SAMUIL 12-13
“Misatakaraway a Malitaˈang—Ka Adayayan ko Teloc”
w00-CH 8/1 13 fiedac 17 fatac
Misatakaraway a Malitaˈang Wa Ira ko Ka Adayayan a Teloc
17 Ano nengnengen i, ora demak ni Sawlo hato o matatodongay. Samanen itiya i, ‘tatiih ko pakayraan,’ ‘matalaw’ maemin ko finawlan. (1 Samuil 13:6, 7) Manaokaniw, ano soˈlinay ira ko saali, tangsol a mitatoy to demak a misiˈayaw, cowa ko mararaway. Kawra aka mapawan, mafanaˈay misapinang to falocoˈ no tamdaw ci Yihofa, mateseray ko pinengneng to ikemoday a harateng ita. (1 Samuil 16:7) Mihaenay, maˈaraway Ningra ko maanan a demak ni Sawlo, kawra cowa ka somowal ko Fangcalay Cudad. Tinakoen, mahapinangay ni Yihofa sakamarawraw ci Sawlo i, nao misatakaraway ko falocoˈ ningra. Alatek miharateng ci Sawlo, o hongti no Israil ko niyah, hano mitala tora matoˈasayto a mipairasolay miohot to demak saw, tadancaayto! Ano masamaanayto i, miharateng ci Sawlo aawa sa ci Samuil, kako saan a misaˈosi, hamaan kiharen koya sapalimoˈot iˈayaw na sanay. Samaanayto ko teloc hani? Ci Samuil cowa pakahemek ci Sawloan. Mikapoˈian ningra ci Sawlo: ‘O nika lahongti iso o caay ko mamidaˈoc, samanen caay pidoedo kiso to pafelian a limoˈot ni Yihofa i tisowanan.’ (1 Samuil 13:13, 14) Misawacayay konini, o misatakaraway a malitaˈang, tada kadayayan ko teloc.
w07-CH 6/15 27 fiedac 8 fatac
Misakaretengan Minengneng ci Yihofa to Pidofdof no Miso
8 O maˈoningay i Fangcalay Cudad to pakayniay ci Sawloan a demak paihkalay, midofdof to Kawas tada masakalimlaan. Isalakat o misapoeneray a hongti ci Sawlo, ‘misamimingay a minengneng to niyahan’, kawra ikor pasalatan ningra ko malitaˈangay a harateng ato mararaway a pisaˈosi miolat to ponoˈ ningra. (1 Samuil 10:21, 22; 15:17) Kina cecayay, mamilood ci Sawlo to Filistin tamdaw. Palimoˈotan ni Samuil ci Sawlo talaen cingra ngaˈ pacakat to sapatoˈaya i ci Yihofaan, itiya sato pasowal ci Sawloan to sasamaanen ko demak. Kawra, awaayho minokay ci Samuil to patonekan a tatokian. Maˈaraw ni Sawlo maliwasak ko finawlan i, tona manaonay ci Samuil, saka o niyah saan pacakat to sakarihaday ci Yihofaan a nisakimoodan a sapatoˈaya sanay. Soˈliˈlin pasowalanto ni Samuil ci Sawlo papitala to kapinokay ningra, kawra i pinengneng ni Sawlo, mipacakat to sapatoˈaya ikakaay ko nika masakalimlaan to pidofdof sanay. Sowal sa ci Samuil i cingranan: ‘Tada maapaay kora demak iso. Caay pidoedo kiso to sapalimoˈot ni Yihofa Kawas i tisowanan.’ Tona caay pidofdof ci Sawlo ci Yihofaan saikor malahdawayto ko saaroˈan no hongti ningra.—1 Samuil 10:8; 13:5-13.
Odoˈ no Sinael
w11-CH 7/15 13 fiedac 15 fatac
Mamitengil to Cisidaˈitay a Sakayat ni Yihofa Han?
15 O Israil tamdaw nao miharatengay, o hongti no tamdaw ikakaay to ikakarayanay a Yihofa ko nika soˈlin ato tatiˈeren sanay han? Ano mahaenay i, nao mitoorayto cangra to makaniway a demak! Alatek mitoorayho to romaroma a mikitiniay ci Satanan a makaniway a demak, tada o katalawan konini. Madoloay cangra mikihatiya to hongti no tamdaw a mitaˈong to samiyay. O harateng no tamdaw mitaˈong to maˈaraway dafong, matira o mitoˈtoˈan to kilang ato fakeloh a kawas, ikakaay ko nika soˈlin ato tatiˈeren to caay ka ˈaraw a Misangaˈay Tatapangan ci Yihofa Kawas sanay. Kawra matira o sowal ni Pawlo, o samiyay hananay i, ‘awaay ko maanan sanay.’ (1 Korinto 8:4) O samiyay i, caay pakaˈaraw, caay pakatengil, caay kafanaˈ pasowal, caay tatemik, soˈliˈlin maˈaraway iso, makamaay iso, kawra ano mitaˈong kiso to samiyay i, o mitoorayto to makaniway a demak. O matiniay pantaay makaniway a demak o papaira to padiing.—ˈOlic 115:4-8.
SAKA 3 FOLAD 14-20 ROMIˈAD
O ODOˈ KO KIMAD NO KAWAS | 1 SAMUIL 14-15
“O Midofdofay Ikakaay to Patoˈayaay”
w07-CH 6/15 26 fiedac 4 fatac
Misakaretengay Minengneng ci Yihofa to Pidofdof no Miso
4 Ci Yihofa o Misangaˈay a Tatapangan, o kihcod a kinaira ita o naitiniay i Cingranan. Ano mahaenay i, iraayho ko maanan ita to ngangaˈay pafelien Cingra hani? Iraay, hanaca tada o kalimlaan a dafong konini. O maanan saw? Wa itira kita tora ilaenoay sapalimoˈot a sowal mahela ko caˈof: ‘Wawaaw, kao citanengay kiso, palipahak to falocoˈ Ako, hongaˈay Kako pacaˈof toya milokesay i Takowanan.’ (Taneng 27:11) O nika pidofdof ita Cingranan o sangaˈayay a “sapafeli” ita i Cingranan a dafong. Na misatatiihay a mipakokot ci Satan, cowa ko mamadimadi ko tamdaw itini ilaeno no sapalifet sanay. Kita kahacecay a tamdaw soˈliˈlin cowa ka hahecahecad ko pakayraan ato lalengawan ita, kawra ano midofdof to Kawas, o ngangaˈay kita pacaˈof to pipakokot ningra, patalahkal to kamayanay madimadi itini i sapalifet. Tada o tadamaanay konini!
it-1-CH 437 fiedac 3 fatac
Mihakelong a Midofdof
Awaay ko maamaan a dafongan to ngangaˈay mikotay to midofdofay hananay. O tamdaw ano caka pidofdof to Kawas, cowa ko mamahemek Cingra. Mahaen toya sowal ni Samuil ci Sawloan: ‘Tada maolahay ci Yihofa to misakimoodan mitodoh a sapatoˈaya saw? Coko ikakaay ko kaolah ni Yihofa to pidofdof to sowal Ningra han? O midofdofay mikikakaay to patoˈayaay, mitengil to limoˈot mikikakaay to pacakatay to simal no okangan a siri.’ (1 Samuil 15:22) Ano caka pidofdof ko tamdaw to sapalimoˈot ni Yihofa i, malecaday o misafayaˈay to sowal Ningra, caay pakasoˈlin to sowal Ningra, caay pakasoˈlin to Kawas. Mihaenay haw i, o raraw no caay pidofdof malecaday to raraw no mitaˈongay to samiyay. (1 Samuil 15:23; palalinien to Loma 6:16.) Matomes ko noka pihayi no ngoyos awa aca ko midemakan i, awaay ko kapo; tano sowal saca caay pidemak, patalahkalay to cowa pisakareteng hanca cowa pasoˈlin cingra toya mipalimoˈotay. (Matay 21:28-32) O tamdaw ano pitengil aca, mihayi ko harateng to kimad no Fangcalay Cudad, awa ko soˈlinay a waywayan i, o misamangahay to niyah kora, cowa ko mamicada to sapalemed. (Yakop 1:22-25) Ihekalay pahapinang ko wawa no Kawas, soˈliˈlin hato mingataay to sapalimoˈot no Kawas, kawra ano mararaway kora pakayraan anca cowa ka ngaˈay ko kemod no falocoˈ i, o sasahecien no Kawas a mifalah cingra, cowa ko mamicomod i Hongti Kitakit no Kawas.—Matay 7:15-23.
Odoˈ no Sinael
it-1-CH 931 fiedac
Siniˈadaay
O tamdaw ano matapiˈ no saroero, misafelit to araaw no Kawas, siniˈada to cowa ko sasiniˈadaen a tamdaw i, karetengay ko teloc. O tinakoan ni Sawlo somowalay toninian. Miliyas ko Israil to Icip i, padeteng sanay milood ko Amalik tamdaw cangranan. O pisawkit no Kawas to Amalik tamaw maraodayto, palimoˈotan Ningra ci Sawlo aka siniˈadaen cangra hananay. Kawra matapiˈay no saroero no finawlan ci Sawlo, cowa ka misongilaˈ a milaheci to limoˈot ni Yihofa. Pakayni toninian misawadan no Kawas, caayto palahongtien cingra. (1 Samuil 15:2-24) O tamdaw ano tangongolay ko nika pakasoˈlin to masadafdafay ko demak ni Yihofa i, o sasakaretengen ningra ko nika madimadi to Kawas, eca ka matiya ci Sawloan a mararaw, malahdaw ko hemek no Kawas.
SAKA 3 FOLAD 21-27 ROMIˈAD
O ODOˈ KO KIMAD NO KAWAS | 1 SAMUIL 16-17
“O Ci Yihofa ko Misaˈosiay to Nika Lowid ato Nika Padik no Lalood”
wp16.5-CH 11 fiedac 1-2 fatac
“O Nika Lowid no Lalood ci Yihofa ko Misaˈosiay”
Toha sapisayaraw to falocoˈ ni Sawlo, lomalan ni Tafiti ko iˈayaway a nalifetan ningra mipatay to lokedaw ato tomay. Cowa ko sapipasengiˈaw cingra, samanen cipinangay cingra to misamaanay hano pakapadik cingra to mariˈangay a ˈaˈadopen. Sowal sa ci Tafiti: ‘Na milidongan ni Yihofa kako nai lokedaw ato tomay, o lalidongen ni Yihofa kako nai kamay nonini Filistin tamdaw.’ Ikor caayto ka pilalang ci Sawlo, pasowal sato ci Tafitian: “Hayda, olili! Nanay kapoten ni Yihofa kiso.”—1 Samuil 17:37.
Makalimay kiso hatira ci Tafitian ira ko pakasoˈlinay falocoˈ han? Mafanaˈay kita, o nika pakasoˈlin ni Tafiti cowa ko cecayay aca liyad, iraay ko taˈeneran noka pakasoˈlin ningra. Mikitiniay i ˈayaway a nalifetan mafanaˈ to mitooray to mikiˈokan ci Yihofa, o cisidaˈitay a midipotay Cingra. Ano padadotoc kita mafanaˈ ci Yihofaan i, mamatirato ci Tafitian a matomes ko nika pakasoˈlin. Ano sakadademaken ita ko mananamay a sifanaˈ i, o mamalayap ko adihayay a epoc, padotoc a mapaˈicel ko pasoˈlinay falocoˈ.—Hipray 11:1.
wp16.5-CH 11-12 fiedac
“O Nika Lowid no Lalood ci Yihofa ko Misaˈosiay”
Mikitini i pidemak ni Tafiti mahapinangay ko nika tanoktok no pasoˈlinay falocoˈ ningra. Sanay a pacaˈof ci Tafiti ci Koliyatan: ‘O funus ato ˈidoc ato tatekolen a ˈidoc ko nitatoyan iso a misiˈayaw i takowanan, nikawrira o pakayniay kako i ngangan no kakeridan no ikakarayanay a sufitay ci Yihofa tayni a misiˈayaw tisowanan. O Kawas no sufitay no Israil Cingra, o Cingra kora milokesan iso.’ Pakayni ci Tafitian, ora kaciharatengan ningra cowa ko nika ciˈicel no ˈada, anoca hakowaay ko nika ngaˈay no sapilood a lalosidan. Milokes ci Koliyat ci Yihofaan, mafanaˈay ci Tafiti to tatangsol a midemak, saka pasowal han ningra ci Koliyat: ‘O papatoroden ni Yihofa kiso i kamay no mako.’—1 Samuil 17:45-47.
Mafanaˈay ci Tafiti to nika tataˈang ni Koliyat, kasapaan kora sapilood a lalosidan ningra, kawra cowa ka hatira ci Sawloan ato sufitay no Israil, makokiˈ tora maˈaraway no mata nangra. Ci Tafiti cowa palalinien ko niyah ci Koliyatan, ao palalinian ci Koliyat ci Yihofaan. Soˈliˈlin ano hatiraay o tokos ko kaˈakawang ni Koliyat, 290 kongfen ko kaˈakawang ningra ano han i, sasamaan a pakalalini to satakaraway i polong no dohaw a Tatapangan hani? Itini pinengneng no Kawas, hato o kakonah ci Koliyat, o mamatekopto cingra.
wp16.5-CH 12 fiedac 4 fatac
“O Nika Lowid no Lalood ci Yihofa ko Misaˈosiay”
Mikitini tonini a tinakoan mananamay ita ko maanan hani? Soˈliˈlin cowa ko mamatira kita to Israil tamdaw a mirienang to soˈlinay a lalood, ngaˈayayho minanam ci Tafitian, o tada cecayay a soˈlinay Kawas sanay minengneng cingra, o sasarocoden a mikangodo Cingra. (Matay 26:52) Nolatekay tada taˈangayay ko pasangar, caay pakafilo miremo wa saan kita, kawra ano palalinien to ˈicel no Kawas i, awaayto ko manan nora pasangar. Edeng ano sarocoen ita ko falocoˈ mitiˈer ci Yihofaan i, awaay ko katalawan to kihcod a pasangar, samanen awaay ko manan to mamipadik ci Yihofaan.
Odoˈ no Sinael
w05-CH 3/15 23 fiedac 7 fatac
Kalimlaan no 1 Samuil Cudad
16:14 Onini tatiihay ˈadingo mikalisangaay ci Sawloan sa i, o manan konini tatiihay ˈadingo hani? Itini Fangcalay Cudad, ora ˈadingo hananay, nolatek o kemod no falocoˈ ko mitoroan. Tona naitiniay i ci Yihofaan kora “tatiihay ˈadingo” sa i, ihekalay cowa ko tatiihay coyoh ko mitoroan nora, ao ikemoday no falocoˈ ni Sawlo a tatiihay a harateng, ora micikerohay cingranan midemak to tatiihay a pinangan o sanay. Samanen mipasalatan no Kawas konini “tatiihay ˈadingo” mikotay to fangcalay saocor Ningra, mankora o naitiniay ci Yihofaan a ira sato kora sowal.
SAKA 3 FOLAD 28– 4 FOLAD 3 ROMIˈAD
O ODOˈ KO KIMAD NO KAWAS | 1 SAMUIL 18-19
“Ano Malaˈosi ko Demak i, Pairaen ko Misapoeneray”
w04-CH 4/1 15 fiedac 4 fatac
Tiˈeren ko Saocor no Kawas Misiˈayaw to Nika Falic no Kaˈorip
4 Caho ka halafin matenakayto ko ngangan noya pakaenay to siri a kapah ci Tafiti. O matayalay tapang ni Sawlo pasowal cingranan, ci Tafiti cowa aca ko ‘matanengay a midatokay’, hanaca ‘o ciˈicelay a milooday cingra, malaymayay ko sowal, talingtingay ko tireng.’ Oraanto i, matahidangay ci Tafiti matayal ci Sawloan, midatok patengil to hongti. Ikor, tayra ko Filistin a milood, iraay ko cecay tataˈangay a tamdaw ci Koliyat hananay, tada o mariˈangay cingra, nao cinalifetayto a sufitay caay ka timolo a misiˈayaw cingranan, ˈarawhan mapatayay ni Tafiti cingra. Ikorto i, mapanilnilay ci Tafiti malo ‘kakeridan no sufitay, mipadik to Filistin tamdaw. Maolah ko finawlan ci Tafitian, mipaˈolic a pahemek cingranan.’—1 Samuil 16:18; 17:23, 24, 45-51; 18:5-7.
Mahapinangay ko Kasasiroma no Midokoay to Kawas ato Cowa Pidoko to Kawas a Tamdaw
6 Misamaanay hano malataˈang a misatakaraw ko tamdaw hani? Alatek makapahay ko pising nangra, masowalay ko ngangan nangra, matanengay tono radiw, tanektekay ko tatirengan anca ˈakawangay ko saaroˈan nangra. Iraay ko mahaenay a maemin a kangaˈayan ni Tafiti, ˈarawhan hakelong no ˈorip ningra, mitafoay to misapoeneray. Tiya mapatay ningra ci Koliyat ikor, miharatengay ci Sawlo pakadafo to wawa i cingranan, ˈarawhan sanay ci Tafiti pasowal: “Caay ko masamaanay kako, caay ko masamaanay ko paro no lomaˈ ako itini i Israil, maedeng kako a malakadafo no hongti saw?” (1 Samuil 18:18) Misamaanay hano ngaˈay mitafo ci Tafiti to misapoeneray hani? Samanen mafanaˈay cingra, o mikiriwiˈay a capeling ningra, ˈicel ningra, malifokay a sapalemed sahetoay o naitiniay i Kawas. “Roho sa [ko Kawas] minengneng,” patalahkalay to misapoeneray, ato midimokos ci Tafitian. (ˈOlic 113:5-8) Mahapinangay ni Tafiti, o kihecod a nika ira ningra o naitiniay ci Yihofaan.—Nengnengen ko 1 Korinto 4:7.
7 Anini, tamdaw ni Yihofa matiraay ci Tafitian, misaˈicelay a patalahkal to misapoeneray. O satakaraway i paro no kakarayan ci Yihofa, ˈarawhan patalahkalay Cingra to misapoeneray a mikiriwiˈay a capeling, mafanaˈ kita toninian coko mamasemer ko falocoˈ ita han? (ˈOlic 18:35) O mamisaˈicel kita midoedo to Fangcalay Cudad: “Kao adayayay, kao siniˈadaay, kao misapoeneray, kao damsayay, kao kodaitay ko falocoˈ namo.” (Kolosay 3:12) Mafanaˈay kita, o olah hananay “caay paseneng a misatakaraw ko falocoˈ.” (1 Korinto 13:4) Ano patalahkal kita to misapoeneray capeling i, o mamasolot ko tamdaw a miingid ci Yihofaan. Mahaen o fafahi, caay pasowal to maanan, tona makapahay ko waywayan a masolotto ko faˈinay, o tamdaw no Kawas ano patalahkal to misapoeneray capeling i, o mamasolot ko tao mafanaˈ to Kawas.—1 Pitiro 3:1.
Odoˈ no Sinael
it-2-CH 579 fiedac
Pairasolay Tamdaw
Soˈliˈlin o fangcalay saocor ni Yihofa ko minilnilay to mipairasolay tamdaw, kawra cowa ka aitira saan ko fangcalay saocor i tireng no mipairasolay tamdaw. Ano hacowaay matefad ko fangcalay saocor no Kawas i tireng nangra i, itiyaay cangra milasil to lihaf no Kawas. (Icikil 11:4, 5; Mika 3:8) Ano matefad ko saocor no Kawas i tireng nora mipairasolay i, mapatemeray cangra, timolo a pasadak to sowal no Kawas. (1 Samuil 10:10; Yirimiya 20:9; Amos 3:8) Ano misarocod ko mipairasolay a milaheci to ˈinorong i, ora nidemakan ato nisowalan nangra a sowal ato waywayan nangra i, fahekaan nanay ko tamdaw. O sowal no Fangcalay Cudad ‘matiraay o mipairasolay’ ko demak no nima a tamdaw sanay, oninian ko sapatinako alatek. (1 Samuil 10:6-11; 19:20-24; Yirimiya 29:24-32; palalinien to Dmak 2:4, 12-17; 6:15; 7:55.) O mipairasolay tamdaw tona misarocoday ko falocoˈ, awaay ko talaw, samacay sanay sapilaheciaw to ˈinorong nangra, maˈaraw no tamdaw ko waywayan nangra hato o masingkiay sanay. Kina cecayay, mapaocoray ko mipairasolay minilnil ci Yihuan, oya itiraay a tamdaw nao masingkiay cingra sanay minengneng cingranan. Kawra ta mafanaˈto cangra to o mipairasolay a tamdaw cingra i, misongilaˈayto mitengil to salasil ningra. (2 Hongti 9:1-13; palalinien to Dmak 26:24, 25.) Tiya milepel ci Sawlo ci Tafitian to sapipatayaw cingranan i, kina cecayay ci Sawlo ‘mato o mipairasolay tamdaw ko waywayan’, mihelong to rikoˈ, ‘saromiˈad salafii saan makakawang a matienang,’ hato ngaˈayto milaliw itiya ci Tafiti. (1 Samuil 19:18–20:1) Nikawrira itini i maˈoningay no Fangcalay Cudad, makakawang ko mipairasolay cowa ka rarid a maˈaraw. Itini i tosa a maˈoningay i Fangcalay Cudad, o mipairasolay no Kawas toha sapipahapinangaw tora kalimlaan nora sapairasol, makakawangay cangra. (Isaya 20:2-4; Mika 1:8-11) Pakayni hano pasalaten no Kawas a makakawang a matienang ci Sawlo, o sapatalahkalaw to nika o tamdaw aca ci Sawlo ano mahelong ko rikoˈ no hongti, caay pakacoay to ciˈicelay a Kawas sanay hokira, awaay ko sowal no Fangcalay Cudad.
SAKA 4 FOLAD 4-10 ROMIˈAD
O ODOˈ KO KIMAD NO KAWAS | 1 SAMUIL 20-22
“Sasamaan Mala Ngaˈayay Widang no Tao”
Aniniho Palahad to Soˈlinay Kalawidang
18 Anini, misiˈayaway ko salikaka to masakenaay a pasangaray. O roma salikaka tahapadesay a misemsem, wa ngaˈay cadaen ita cangra tayni i lomaˈ, ngaˈayay padama to sakaˈorip nangra, ngaˈayayho micangacang ci Yihofaan padama to salikaka. Latekay, roma salikaka cowa ka rihaday ko falocoˈ, mafokilaay kita to o maanan ko hasowal, o maanan ko hademak, kawra adihayay ko pakayraan. Tinakoen, palaken ita ko toki kalacafay cangranan, misongilaˈ mitengil to sowal nangra, patado cangranan a miharateng, paladaˈen to kaolahan ita a sinael. (Isaya 50:4) Ano misaali ko widang to papakalaloken i, itini i tihi nangra a kalacafay kita, o sakakaay koni.—ˈOsien ko Taneng 17:17.
w08-CH 2/15 8 fiedac 7 fatac
Doedoen ko Lalan ni Yihofa
7 Halamhamay ko Kawas kitanan mangaˈay tiˈeren madimadi to widang. (Taneng 17:17) Ci Yonatan o wawa no hongti ci Sawlo o ngaˈayay a widang ni Tafiti. Matengil ni Yonatan to pipatay ni Tafiti ci Koliyatan i, ‘mala sangaˈayayto a widang ca Yonatan aci Tafiti, matira o nika olah to niyahan ko olah ni Yonatan ci Tafitian.’ (1 Samuil 18:1, 3) Mafanaˈ ci Yonatan to sapipatayaw ci Sawlo ci Tafitian i, papisinanotan ci Tafiti. Ikor, tiya milaliw ci Tafiti i, masasoˈaraway cangra a matatelek. Tona patadoay ci Yonatan somowal saki ci Tafitian, mangata mapatay ni Sawlo cingra. Soˈliˈlin hatira, kamayanay mararid a masasoˈaraw ci Yonatan aci Tafiti, patanoktok to kalawidang nangra. (1 Samuil 20:24-41) Ya salikor a noka sasoˈaraw nangra i, padamaan ni Yonatan ci Tafiti ‘mitiˈer to Kawas.’—1 Samuil 23:16-18.
w09-CH 10/15 19 fiedac 11 fatac
Itini i Awaay ko Olah a Hekalan Palalitingen ko Soˈlinay Widang
11 Ka madimadi. Sowal no hongti ci Solomon: ‘O soˈlinay widang marariday patalahkal to olah, matira o salikaka o sapipadangaw to pades ko sakasofoc ningra.’ (Taneng 17:17) Ya mitilid ci Solomon tonini a sowal i, alatek maharatengay ningra ko nika lawidang no wama ci Tafiti aci Yonatanan. (1 Samuil 18:1) Makalimay ci Sawlo midotoc to hongti no niyah ko wawa ci Yonatan. Kawra maˈaraw ni Yonatan to nipiliˈan ni Yihofa ci Tafiti, makahiyay cingra micada tora demak. Ci Yonatan caay ka lecad ci Sawloan, caay ka maˈinap cingra ci Tafitian. Mapakahemek ci Tafiti i, cowa ka maketer ci Yonatan, cowa pakasoˈlin to pitongangan ni Sawlo ci Tafitian. (1 Samuil 20:24-34) Hatiraen ita ci Yonatanan, ano macada no widang ko maanan a ˈinorong i, patadoay kita mahemek cingranan han? Ano tahalifa to pades ko widang i, mihinoman ita a midama cingra han? Ano matengil somowal ko tao to tatiihay sowal pakayni i widang i, saolatekay sa pakasoˈlin kita han? Anoca hatira kita ci Yonatanan, madimadi a midama to widang, patado cingranan a pasowal han?
Odoˈ no Sinael
w05-CH 3/15 24 fiedac 5 fatac
Kalimlaan no 1 Samuil Cudad
21:12, 13. Halamhamay ci Yihofa kitanan tano mafanaˈay misimsim a taneng a misiˈayaw to pasangar no kaˈorip. Pafeliay Cingra to kimad Ningra, padama kitanan ira ko sifanaˈ, misinanot, mataneng ko pidemak. (Taneng 1:4) Ngangaˈayho naitini minilnilan no Kawas a malohemay malitengay no Krisciyang a micada to sapadama.
SAKA 4 FOLAD 18-24 ROMIˈAD
O ODOˈ KO KIMAD NO KAWAS | 1 SAMUIL 23-24
“Hadidien a Mitala ci Yihofa”
w04-CH 4/1 16 fiedac 8 fatac
Tiˈeren ko Saocor no Kawas Misiˈayaw to Nika Falic no Kaˈorip
8 Manaˈayay ci Tafiti to sapidokaˈaw ci Sawloan. Mitiˈeray ci Yihofaan cingra, padadotoc a mihadidi, paikenen ko demak i kamay no Kawas. Masadak nai dihif ci Sawlo i, lekal han ni Tafiti cingra: ‘Nanay masadafdaf ko pisawkit ni Yihofa kitaanan tatosa. Nanay patadoen ni Yihofa kako a mitefoc tisowanan, kawra cowa ko papakamay kako mikariˈang tisowanan.’ (1 Samuil 24:12) Mafanaˈay ci Tafiti mararaway ci Sawlo, ˈarawhan cowa pikapoiˈ cingranan anoca mikariˈang a pasowal. Itini i romaroma a demakan, miemetay to keter ci Tafiti, cowa paˈodis, o Kawas ko mitiˈeran a papisawkit tora demak.—1 Samuil 25:32-34; 26:10, 11.
w04-CH 6/1 22-23 fiedac
Tano Pasangaray a Pakayraan Iso a Miˈonting to Niyah Han?
Mananamayto ita to saka tolo a kalimlaan i, hadidien a mitala ci Yihofaan, aka a tano misafelitay to safalod no Fangcalay Cudad a hapakayraan a mifalic to niyah. Sowal no nisawawaan ci Yakop: ‘Paihkalen pasadak ko mihadidiay, ho malaˈosi kamo, tanektek i kihcod a demak, awa ko dangoc.’ (Yakop 1:4) Tahalifa kita to sapalifet i, hadidien tahatolas, hamaan macaloh tano misafelitay to Fangcalay Cudad a pakayraan a misaysay, sakadademaken ko mihadidiay a palaˈosi. Mihaen, ya matanamayto a pakasoˈlinay a falocoˈ, wa mahapinangto ko ˈicel, hongaˈ pakahadidi kita. Paihkalay ci Yosif aci Tafiti to taˈangayay a mihadidiay. Cowa mitanam cangra to cowa ko kahemekan no Kawas a pakayraan a misaysay to pasangaray. Soˈlin a pasangar i, misaˈicelay cangra a midemak to matatodongay. Mihadidiay cangra a mitala ci Yihofaan, ikor milifokay to adihayay a sapalemed! Ci Yihofa misakaretengay a misaka dademak cangranan, papikerid a milidong to finawlan no Kawas.—Satapangan 41:39-41; 45:5; 2 Samuil 5:4, 5.
Ano tahatefong kita i, alatek miharatengay to misafelitay to safalod no Fangcalay Cudad a misaysay. Tinakoen, sapiciraramodaw kiso kawra awaayho makilim to matatodongay a matoled han? Ano mihaenay i, liyasen ko sakayhid, hoeca ka misafelit to sapalimoˈot ni Yihofa: ‘Edengan o ilalomaˈay no pakayraan ko hararamod.’ (1 Korinto 7:39) Iraay ko pasangar no raramod iso han? Hamaan mafiyor noniya hekal, patelas a malalicinowas anca malalikong, ao malacecay ko falocoˈ misaysay to pasangaray. (Malaki 2:16; Ifiso 5:21-33) Cangoˈotay ko payci iso han? Pasangaray midimokos to paro no lomaˈ han? Hadidien mitala ci Yihofaan, aka tano mararaway a pakayraan mietan to payci. (ˈOlic 37:25; Hipray 13:18)
Kita maemin misaˈicel a midemak to matatodongay a demak, saˈicelenho mitengil to sapalimoˈot no Kawas, mihaen palemeden ni Yihofa kita. Nanay sakapahen ko ˈinorong no mita, hadidien a mitala ci Yihofaan, tiˈeren Cingra tano o makapahay a hapakayraan a misaysay.—Mika 7:7.
Odoˈ no Sinael
Hamaan Papiˈafasen ko Kalo Demak to Halifon Iso
11 Palahad kita to olah siniˈadaay a capeling, cato ka haliˈinap to tao. Sowal no Fangcalay Cudad: “O ciolahay a tamdaw i, o kodaitay, o kalasiniˈadaay, caay ka ˈinap.” (1 Korinto 13:4) Saka ecaaw ka cilamit i falocoˈ ko maˈinapay harateng, wa misaˈicel kita tano harateng no Kawas minengneng to demak, masalalomaˈay no tireng ni Kristo ko salikaka han ko pinengneng. Palimoˈotay ko Fangcalay Cudad kitanan: ‘Ano makahemek ko cecay a caˈang [no tireng] i, lipahak a maemin ko caˈang [no tireng].’ (1 Korinto 12:16-18, 26) Mihaen ko demak ita, paihkalay to siniˈadaay i salikaka, palecad to sapalimoˈot no Fangcalay Cudad. Ano maˈaraw ita ko salikaka milifok to sapalemed i, cowa ko mamaˈinap cangranan, pahecad cangranan a mahemek. Tinakoen ko wawa ni Sawlo ci Yonatan, tiya mafanaˈ cingra ci Tafiti ko mamalahongti i, cowa ka ˈinap ci Tafitian, mangalef pakalalokay cingranan. (1 Samuil 23:16-18) Wa ngaˈay kita mitodong ci Yonatanan, paihkal i tamdaw to olah ato siniˈadaay han?
SAKA 4 FOLAD 25– 5 FOLAD 1 ROMIˈAD
O ODOˈ KO KIMAD NO KAWAS | 1 SAMUIL 25-26
“Hinafelot Sanay Kiso a Dademak Han?”
ia-CH 78 fiedac 10-12 fatac
Mihapinangay to Demak, Mataneng ko Pidemak
10 Oya marorayay a dademak a sufitay samaanay a midimokos to siri ni Napal hani? Ano sapicepetaw cangra to cecay tosa a siri mipacok a komaen i, o madoloay a demak nangra, kawra cowa pihaen to demak cangra. Misafelitay, mahecaday o ˈadipel cangra a midipot to siri ato matayalay ni Napal. (ˈOsien ko 1 Samuil 25:15, 16.) Tahasiˈayaway to adihayay katalawan ko siri ato matayalay tamdaw, tinakoen o katalawan a ˈaˈadopen. O roma sa i, tona isalawacay no katimol a pala no Israil, marariday ira ko masakapotay a kokong ato mitakaway tamdaw tayra a miˈafas.
11 Itini i kohkohan, paliliˈ to ˈalomanay a sufitay cowa ko madoloay. Ira ko cecay romiˈad, ocoran ni Tafiti ko mamoetep a tarokos tayra ci Napalan. Itini tonini a tatokian a mihaen to demak ci Tafiti tada o matatodongay. O pisayitan to siri itiya, hinapaladaˈay ko tamdaw itiya, marariday a patahka to salawina ato widang. Tano mangodoay a sowal ci Tafiti a mipangangan ci Napalan, ‘o wawa iso ci Tafiti’ han ko sowal, oha sapipaihkalaw to mikangodoay ko niyah ci Napalan, o makakaay han a minengneng cingra. Matengil ni Napal ko sowal no tarokos i, samaanayto cingra hani?—1 Samuil 25:5-8.
12 Mangolaway ci Napal, ‘milekal a mikapoˈi cangranan’. Maharatengayho iso koya nisowalan a kapah i salakat nonini lalakaw han? Sahecian ningra pasowal ci Apikail. Malopetay ci Napal, maketeray cingra saolatek saan pafeli to tao to epang, nanom ato titi no siri ningra. Cowa pakomaan ci Napal ci Tafitian, milekos cingranan nao milaliway to tawki a kuli cingra. O noka pinengneng ni Napal ci Tafitian, malecaday toya ˈintehay ci Tafitian a Sawloan, awaay ko mahaenay ni Yihofa a noka pinengneng. Tada maolahay ko Kawas ci Tafitian, itini i pinengneng Ningra, ci Tafiti cowa ko misafelitay to tawki a kuli, ao noikoran a hongti no Israil cingra.—1 Samuil 25:10, 11, 14.
ia-CH 80 fiedac 18 fatac
Mihapinangay to Demak, Mataneng ko Pidemak
18 Mahaiyay ci Apikail patado to faˈinay a mitamorong to ciraraway a ˈinorong, mingitangit to pisodod ni Tafiti. Mihaiyay cingra to nika o maapaay ci Napal mahaen o ngangan ningra. O sapipaihkalaw cingra alatek, ano mihaen ci Tafiti mikariˈang ci Napalan, tada mipalakay to tariang ni Tafiti. Paihkalay cingra to nika pakasoˈlin ci Tafitian to taypiyaw ni Yihofa, ‘o milooday ni Yihofa’ cingra sanay. Hanaca mafanaˈay cingra to sakiˈok ni Yihofa, to mamala hongti ci Tafiti. Sowal sa cingra: ‘Ci Yihofa . . . papatireng tisowanan malo kakeridan no Israil tamdaw.’ Oraanto i, saalian ni Apikail ci Tafiti aka pidemak to mirakisay to remes a demak, toha sakaecaw ‘macairaw a cikiyam ko falocoˈ ningra.’ (ˈOsien ko 1 Samuil 25:24-31.) Tada sidaˈitay a misemer to falocoˈ ko sowal ni Apikail!
Odoˈ no Sinael
ia-CH 80 fiedac 16 fatac
Mihapinangay to Demak, Mataneng ko Pidemak
16 Onini a sowal i, mitowakangay ci Apikail to fadangalan no faˈinay, padeteng sa miculi han? Cowa. Masowalay isalakat no lalakaw, mikariˈangay ci Napal to manilnilay ni Yihofa a sikawdan Ningra, alatek mamapatay ko ˈalomanay tamdaw, ano pakihater sa ci Apikail i, oha mamitamorong cingra to raraw. Itini i mahaenay a pakayraan, midofdof ci Apikail to Kawas ikakaay ko nika masakalimlaan to pidofdof to faˈinay.