Pinengnengan to Lalakaw no Mitosilay ato Nikaˈorip Rayray no Saˈopo
SAKA 11 FOLAD 7-13 ROMIˈAD
O ODOˈ KO KIMAD NO KAWAS | 2 HONGTI 5-6
“Kalacafayay Kitanan Ikakaay ko ˈAloman Cangranan”
it-2-CH 895 fiedac 6 fatac
Ilisa
Malidongay ko Israil nai kamay no Siriya. Ya mala hongti no Israil ci Yoram i, sapilipalawaw ko Siriya milood to Israil. O misahalakaan no hongti ci Pinhatat kinapinapinaay a mapadik ni Ilisa, samanen mifanaˈan ni Ilisa ko hongti ci Yoram to kihcod a demak no Siriya. Salakat iraay ko sepay i lalomaˈ nangra saan miharateng ci Pinhatat, ikor mafanaˈ to cima ko misafelitay cingranan i, ocor hananay ko sofitay tayra i Totan, tano sapilood a paliding ato sapilood a efa miˈalikot to niyaroˈ, sapicepetaw ci Ilisaan. (Nengnengen ko sakacecay lolod 950 fiedac a coka) O matayalay ni Ilisa tada makokiˈay, mitolon ci Ilisa to Kawas papifohat to mata no matalayay ningra, “maˈaraw ningra ko piedef no namal a paliding ato namal a efa i lotok a mitaliyok ci Ilisaan.” Mangata a miraod ko sofitay no Siriya i, mitolon to Kawas ci Ilisa to roma a kafahkaˈan a demak, sowal sa: “Nanay pohawen Iso ko mata nonini a sofitay.” “Mapohawto ko mata” no Siriya tamdaw i, pasowalen ni Ilisa cangra: “Tooren namo kako” han ningra, cowa ka kitingen ko kamay no Siriya tamdaw a romakat, mahapinangay itini cowa ka soˈlin a mapohaw ko mata nangra, apa sanay aca cangra. Caloh sanay sapicepetaw ci Ilisaan, cowa pakahapinang ci Ilisaan, cowa ka fanaˈ to papatayraen icowa cangra.—2 Hongti 6:8-19.
w13-CH 8/15 30 fiedac 2 fatac
Maˈaraway ni Ilisa ko “Namal a Efa, Namal a Paliding”, Kiso i?
Itini i Totan, soˈlin maˈalikotay no ˈada ci Ilisa, kawra cowa ka talaw cingra, hano mahaen cingra hani? Samanen tanoktokay ko pasoˈlinay falocoˈ ningra. Kita misaaliay to mahaenay a falocoˈ. Mankora, tolonen ita ko Kawas pafeli to fangcalay saocor, palahad to romaroma capeling no fangcalay saocor.—Luka 11:13; Kalatiya 5:22, 23.
it-1-CH 1061 fiedac 1 fatac
Pohaw, Mapohaw ko Mata
Cangacangen ni Ilisa ci Yihofa papipohaw to sofitay no Siriya, ono falocoˈ a pohaw konini. Ano soˈlinay o mata no polong a sofitay ko mapohaway i, coko makakiting cangra romakat saw. Kawra o sowal no Fangcalay Cudad, pasowalan ni Ilisa: ‘Cowa konini a lalan, cowa korira niyaroˈ, tayni tooren kako’ hananay ningra. Ci Wiliyam itini nitilidan ningra a cudad Ono falocoˈan a Sifanaˈ (1981, saka 1 lolod, 59 fiedac) somowalay to pohaw no falocoˈ: “Ono falocoˈ a pohaw hananay i, o adada no ponoˈ. O mahaenay a pohaw cowa ko caay pakaˈaraw ko mata, ao caay ka cipinang ko ponoˈ. Awaay ko pinang no ponoˈ a miharateng, maketonay ko kalalitin no mata ato ponoˈ, mansa o pohaw no falocoˈ han.” Tahirato i Samariya ko sofitay no Siriya i, palahedawanto ni Yihofa kora pohaw no falocoˈ nangra, pakahapinangto cangra. (2 Hongti 6:18-20) Oya itiniay i Sotom a faˈinayan mahaenay cangra mapohaw ko falocoˈ, sowal no Fangcalay Cudad cowa ka masomaden cangra to nika pohaw no mata, padadotocay a mikilim to fawahan no lomaˈ ni Loto sanay.—Satapangan 19:11.
Odoˈ no Sinael
w05-CH 8/1 9 fiedac 2 fatac
Kalimlaan no 2 Hongti Cudad
5:15, 16—Hano minaay ci Ilisa to sapakaolah ni Naaman hani? Samanen mafanaˈay ci Ilisa, ano caay ci Yihofa ko midemakay to kafahkaˈan i, awaay ko ˈicel ningra miadah to malonoˈay adada ni Naaman. Caay kakahi ci Ilisa sakadademak to fadangalan a mietan to sakangaˈay no niyah. Kita anini, o midokoay ci Yihofaan a tamdaw, caay ka ngaˈay mikitini i tayal ni Yihofa a mietan tono tekedan a epoc. Pakifalocoˈan nangra ko limoˈot ni Yis: ‘O nitadoan namo a iraay i, haenen namo a mipafeli ko tao.’—Matay 10:8.
SAKA 11 FOLAD 14-20 ROMIˈAD
O ODOˈ KO KIMAD NO KAWAS | 2 HONGTI 7-8
“Ci Yihofa Tano Cowa ka Haraterateng a Pakayraan Palaˈosi to Demak”
it-2-CH 896 fiedac
Ilisa
Ikor, mikeridan ni Pinhatat ko ˈalomanay sofitay miˈalikot to Samariya, kawra cowa ka mahaen iˈayaway latelatekay tayra miˈafas to dafong. Padadotocay a maˈalikot to Samariya, tada tatiihay ko pakayraan no niyaroˈ. Kina cecayay ira ko mifanaˈay to hongti, iraay ko fafahiyan komaenay to niyah wawa sanay. O fofo ni Ahap ci Yoram, o ‘wawa no mipatayay tamdaw’ cingra, miketonay to sowal to papatayen ci Ilisa, kawra cowa ka lahecien konini pacefa sanay a miketonan a sowal, ˈarawhan mikeriday to tapang no sofitay tayra i lomaˈ ni Ilisa, pasowal to caayto pipadama ci Yihofa cingranan. Pasowalen ni Ilisa ko hongti, dafak tonini tatokian, kakadofah ko kakaenen han ningra, matawa koya kakeridan a tapang tonini a sowal, oraanto pasowalen ni Ilisa cingra: ‘Mamaˈaraw no mata iso konini demak, kawra cowa ko kakomaen kiso.’ Patengilen ni Yihofa ko Siriya tamdaw to taˈangayay a ngihaˈ, nao iraay ko ˈalomanay a sofitay milood cangranan saan, tangsol a milaliw to kopang no sofitay ato misiday to adihayay kakaenen, matalaw a milaliw. Mafanaˈto ko hongti no Israil to pilaliw no Siriya i, ocoren ko tapang no sofitay papiˈateng to fawahan no niyaroˈ no Samariya, kawra kakiˈayaˈayaw sato ko finawlan masadak i niyaroˈ, sapiˈafasaw to kopang no sofitay, malipaˈto koya kakeridan no sofitay. Soˈlinay maˈaraway ningra ko kakaenen, kawra awaay ko makaeneay ningra.—2 Hongti 6:24–7:20.
Odoˈ no Sinael
it-1-CH 349 fiedac 7 fatac
Lakelaw
Rayray no hongti ni Tafiti. Mapatirengto ni Yihofa ci Tafiti malo hongti no Israil i, itini sakayat no Kawas malo citanengay a sinsi ato kakeridan cingra, mankora o ‘lakelaw no Israil’ han cingra. (2 Samuil 21:17) Tiya patireng ci Yihofa aci Tafiti to katatelekan no Hongti Kitakit i, sanay a mikiˈok cingranan: ‘O kamaroˈan no hongti iso o mamidaˈoc a tanektek.’ (2 Samuil 7:11-16) Mihaenay haw i, mipatirengan ni Tafiti halo mipafelian to wawa ci Solomonan ato fofofofo ningra a rayray no hongti, malecaday o ‘lakelaw’ no Israil.—1 Hongti 11:36; 15:4; 2 Hongti 8:19; 2 Rayray 21:7.
SAKA 11 FOLAD 21-27 ROMIˈAD
O ODOˈ KO KIMAD NO KAWAS | 2 HONGTI 9-10
“Timoloay Cingra Cowa Cisasa, Fanekfekay a Taˈarawan”
w11-CH 11/15 3 fiedac 2 fatac
Ci Yihu Midopoay to Soˈlinay Pidoyongan
Tiya micada ci Yihu to sapaˈinorong i, tada tatiihay ko noˈadingoan a pakayraan no Israil. Fafahi ni Ahap, wina no hongti ni Yoram ci Yicipil miˈowingay to misakawasay a demak, telocto i, tada tatiihay ko pifiyor to kitakit. Miˈowingay ci Yicipil to finawlan a mitaˈong ci Paalan, cowa ko ci Yihofa. Mipatayan ningra ko pairasolay no Kawas, pakidemay ko kaˈodang, mararid midemak to miˈdaway, romakat to mararaway lalan ko polong a finawlan. (2 Hongti 9:22; 1 Hongti 18:4, 13) Palimoˈoten ni Yihofa to papalaˈafoen ko polong lalomaˈan ni Ahap, mahawpay ci Yoram aci Yicipil. Oci Yihu ko mikeriday a milaheci tonini a ˈinorong.
w11-CH 11/15 4 fiedac 2-3 fatac
Ci Yihu Midopoay to Soˈlinay Pidoyongan
Ocoran ni Yoram ko tatosa tarokos tayra miˈaraw ci Yihuan, kawra cowa pasowal ci Yihu to araaw ningra a tayra. Oraanto i, hongti ci Yoram ato hongti no Yutaya ci Ahaciya maka midakaway to sapilood a paliding. Licay sa ci Yoram: ‘Yihu, dipayalayho han?’ Micoli ci Yihu a pasowal: ‘O wina iso ci Yicipil maˈodangay ko waywayan, mararid midemak to miˈdaway, nanima ira ko dipayal saw?’ Maˈaraw ni Yoram to tatiihay kora demak i, palaliyoc sa cingra, tangsol a milaliw, kawra kalikiay ci Yihu i cingranan! Kinacecay ci Yihu a mipanaˈ, mapanaˈ ko falocoˈ ningra, polin sato i paliding ci Yoram a mapatay. Itiya milaliwto ci Ahaciya, ikor lepelen ni Yihu a mipatay cingra.—2 Hongti 9:22-24, 27.
O lalomaˈan ni Ahap, ikor a papatayen i, oya mariˈangay a fafahi no hongti ci Yicipil. Oya ‘ˈaekaken a fafahiyan’ hananay ni Yihu cingra tada matatodongay. Tahira i Yicriil ci Yihu i, maˈaraw ci Yicipil nai sasingalan pasilaeno a minengneng, tangsol palimoˈot to tapang no hongti papifahekol ci Yicipilan. Pacikay han ni Yihu ko sapilood a paliding ningra a misaksak i tireng nonini mipadesay to kitakit a fafahiyan. Mapatayto ci Yicipil i, patayento ni Yihu koya mamoetep a wawa ni Ahap.—2 Hongti 9:30-34; 10:1-14.
w11-CH 11/15 5 fiedac 4-5 fatac
Ci Yihu Midopoay to Soˈlinay Pidoyongan
Soˈlin ˈalomanay ko mipatayan ni Yihu, o maˈoningay i Fangcalay Cudad, o timoloay a tamdaw ci Yihu sanay, milidongan ningra ko Israil nai mariˈangay a pikowan no lalomaˈan ni Yicipil. Ano cimato a ˈaˈideman no Israil, sapifalikowataw to mariˈangay pikowan i, ira ko timolo, misetek ko falocoˈ, ira ko faedetay a falocoˈ wangaˈ. O cecay citing no Fangcalay Cudad sanay ko sowal: “Onini a demak tada pasangaray a dangaren, kakalamkam ko demak a mifaenot to lamit. Ano talotatodho ko falocoˈ, caayto ko papakafaenot to pitaˈong ci Paalan.”
Maedeng mamahapinang iso, o Krisciyang anini, aira ko matiraay ni Yihuan a makapahay capeling, wangaˈ pakaremo to pakidemay a pakayraan. Tinakoen, ano makayhid kita sapidemakaw to mirikecan ni Yihofa a demak, wa misamaan hani? O tatimolo kita tangsol a micoˈay, cowa ko tatalalikor. Milingatay to midokoay a demak konini, caay ko mamapadik kita, o mamisetek kita micoˈay to mitowakangay ci Yihofaan a maamaan a demakan.
Odoˈ no Sinael
w11-CH 11/15 5 fiedac 7-8 fatac
Ci Yihu Midopoay to Soˈlinay Pidoyongan
Ano sapisiwatikaw ko Israil kitakit nai Yuta kitakit i, itini pidoyongan masasiroma to Yuta kitakit wangaˈ, sanay a miharateng ci Yihu alatek. To sapitooraw tonini a patosokan, mitodongay cingra to iˈayaway a hongti, pasalaten ko Israil tamdaw padadotoc a mitaˈong to ekim a kolong. Mahapinangay itini to nika cangoˈot to pasoˈlinay falocoˈ toya mipatirengay cingranan a Yihofaaan.
Mahemekay ci Yihofa ci Yihuan, samanen milahecian ningra midemak ko matatodongay demak hananay ni Yihofa. Nikawrira ‘cowa pisarocod ko falocoˈ a midofdof to sarikec ni Yihofa.’ (2 Hongti 10:30, 31) Ano haratengen ko nano nidemakan ni Yihu, kalimlaan wasaan kiso a fahekaen alatek. Kawra ngaˈayay kita mikitini i cingranan a minanam to cecay a sapasifanaˈ: Ngaˈayay a kalalaed ako aci Yihofa papadadotoc mangaˈay, aka ka saan a miharateng. Tahatolasen ko kamadimadi to Kawas, miasip to kimad no Kawas to romiˈamiˈad, misimsim to tatodong no sinael, kifalocoˈ mitolon to Wama i kakarayan wangaˈ. Nanay kita maemin kiemel a midofdof to sarikec ni Yihofa.—1 Korinto 10:12.
SAKA 11 FOLAD 28– 12 FOLAD 4 ROMIˈAD
O ODOˈ KO KIMAD NO KAWAS| 2 HONGTI 11-12
“Misayfangan ni Yihofa ko Cecay Maˈanofay Mariˈangay a Fafahiyan”
it-2-CH 734 fiedac
Ataliya
O pakayraan ni Ataliya tada malecaday to winaan ci Yicipil. Itini i kala hongtian ni Yoram a 8 mamihecaan, miowingay to faˈinay a midemak to tatiihay hananay ni Yihofa a demak. (1 Hongti 21:25; 2 Rayray 21:4-6) Ci Ataliya malecaday to wina a mipatay to awaay ko raraw a tamdaw. Oya mariˈangay a wawa ningra ci Ahaciya cecay miheca mala hongti mapatayato. Mipatayan ni Ataliya ko polong a lalomaˈan no hongti no Yuta, edeng oya engaengaho wawa ci Yoas ko maˈoripay, samanen mihimedan noya sakakaay a saysi ci Yihoyata ato fafahi ningra (o fayi ni Yoas) cingra. Oraanto i, ci Ataliya patireng hananay ko niyah a mala hongti, 6 miheca mikowan to Yuta, nai ˈayaw no kongyen 905 tangasa 899 miheca. (2 Rayray 22:11, 12) O wawato ningra miˈafasan ko fangcalay dafong no sefi ni Yihofa, patafang to Paal a kawas.—2 Rayray 24:7.
it-2-CH 734 fiedac
Ataliya
Ya pitoho ko mihecaan ni Yoas i, sakakaay saysi ci Yihoyata mialaan nai pihimedan cingranan a pasadak, patireng cingranan a mala hongti. Matengil ni Ataliya ko alawaw no tamdaw, tangsol micomod i fangcalay sefi, maˈaraw kora mafekaday demak i, milekal a pasowal: ‘Misafelitay! Misafelitay!’ Saan. Palimoˈoten ni Yihoyata ko tamdaw papipasadak ci Ataliyaan talapotal no fangcalay sefi, patayen cingra i sacomod no paefaan no hongti. O salikoray a lalomaˈan noya mariˈangay a Ahapan cingra alatek. (2 Hongti 11:1-20; 2 Rayray 22:1–23:21) Soˈlinay ‘oya sapaliˈayaw a sowal no Kawas to lalomaˈan ni Ahap, malaˈosiay ko cecacecay a sowal!’—2 Hongti 10:10, 11; 1 Hongti 21:20-24.
Odoˈ no Sinael
it-2-CH 1041-1042 fiedac
Yoas
Ya maˈoripho koya sakakaay saysi ci Yihoyata, pakafanaˈan ningra koya kaemangayho a hongti ci Yoas, mangaˈay ko waywayan ningra. 21 ko mihecaan ni Yoas cifafahiyay cingra, tatosaay ko fafahi (o cecay ci Yihoatin), ci wawa cangra to papina wawa ni Yoas, o kadadoˈdo no rayray ni Tafiti hato manayalayto tangsa ci Misiyaan. Na caay ka ˈaloman ko tamdaw to kadadoˈdo no rayray ni Tafiti to cecay a liyad, kawra iikor ni Yoas malenakayto ko tamdaw.—2 Hongti 12:1-3; 2 Rayray 24:1-3; 25:1.
SAKA 12 FOLAD 5-11 ROMIˈAD
O ODOˈ KO KIMAD NO KAWAS | 2 HONGTI 13-15
“Misarocod to Falocoˈ ato Harateng Pairaay to Kadofahay a Sapalemed”
w10-CH 4/15 26 fiedac 11 fatac
Misarocoday Kiso Mikotod ci Kristoan Han?
11 Nengnengen ko nalifetan no hongti no Israil ci Yoas, mamafanaˈ ano faedet ko falocoˈ midoko to Kawas tada masakalimlaan. Miharateng ci Yoas maedeng matapiˈ no Siriya tamdaw ko Israil na saan, calemcemay pakayni toninian, saka tayra miˈaraw ci Ilisaan, tangic sa cingra. Fohaten ko sasingaran han ni Ilisa, pasayra i Siriya a mipanaˈ han ningra, tatodong i, o papatadoen ni Yihofa ko Israil mipadik to Siriya. Macada ni Yoas konini sakiˈok, maedeng makowaday ko falocoˈ ningra. Dotoc, tano panaˈen a misetiˈ ko sera han ni Ilisa, kawra kina tolaay aca misetiˈ. Keter han ni Ilisa cingra, ano kina lima a misetiˈ cingra i, o ngangaˈay a ‘mapadik ko Siriya tamdaw, mitekop cangranan.’ Nohatini wa kina tolo aca mapadik ko Siriya. Tona cowa ka faedet ko falocoˈ ningra misetiˈ to sera, cowa ko mamasaheci a mapadik ko ˈada. (2 Hongti 13:14-19) Mikitini tonini maˈoningay mamananam ita ko manan hani? Edeng ano misarocod ko falocoˈ ita, matomes ko faedetay falocoˈ a matayal to demak ni Yihofa, wangaˈ mapalemed Ningra.
w13-CH 11/1 11 fiedac 5-6 fatac
“O Papalifonen Ningra ko Milongocay i Cingranan a tamdaw”
O masamaanay tamdaw ko mamalifok to sapalifon ni Yihofa hani? Sowal ni Pawlo, ‘oya milongocay Cingranan a tamdaw’ sanay. O cecay tanengnengan cudad no Fangcalay Cudad sanay ko sowal, ora ‘milongocay’ hananay a Kirisiya sowal, tatodong i, cowa ko “mamasadak a mikilim” sanay, ao “pakayniay i noka pidoko” a tayni i kaˈayaw no Kawas. O roma pinengnengan a cudad, tatodong nonini sowal o misamacayay ko tamdaw, misaˈicel a midoko to Kawas o sanay. Mahapinangay itini, o papalifonen ni Yihofa koya kifalocoˈay a maolah, faedetay ko falocoˈ a midoko Cingranan a tamdaw.—Matay 22:37.
Ci Yihofa samaanay palifon to madimadiay midoko Cingranan a tamdaw hani? Pafelian Ningra to hatokel cangra, midaˈoc maˈorip itini iseraay a Lakoing. Paihkalay konini to nika hinapaladaˈ Ningra to tamdaw, taˈangayay ko olah. (Paˈarawan 21:3, 4) Anini, milongocay to Kawas a tamdaw malifokayto nangra ko adihayay a sapalemed. Pakayni i sapadama no fangcalay saocor ato taneng no Fangcalay Cudad, ngaˈayayto cangra marenec ko kaˈorip.—ˈOlic 144:15; Matay 5:3.
Odoˈ no Sinael
w05-CH 8/1 11 fiedac 3 fatac
Kalimlaan no 2 Hongti Cudad
13:20, 21—Onini a kafahkaˈan a demak paihkalay to matodongay ko mitaˈongay to dafong no pidoyongan sanay han? Cowa. Awaay ko sowal no Fangcalay Cudad to mitaˈongan no tamdaw ko ˈokak ni Ilisa. Pakayniay to ˈicel ni Yihofa, saka patikol a maˈorip ko mapatayay tamdaw. Ya maˈoripho ci Ilisa i, o ˈicel ni Yihofa ko saka ngaˈay ningra midemak to kafahkaˈan a demak.
SAKA 12 FOLAD 12-18 ROMIˈAD
O ODOˈ KO KIMAD NO KAWAS | 2 HONGTI 16-17
“Citolasay ko Pihadidi ci Yihofa”
it-2-CH 89 fiedac 1 fatac
Salmanisi
Mikowanay to Israil. Tiya kala hongtian ni Hosiya to Israil (maedeng ˈayaw no kongyen 758 tangasa 740 miheca) Milooday to Israil ci Salmanisir, pacieci ci Hosiyaan a mihodop i cingranan, to mihecahecaan mipasata i cingranan. (2 Hongti 17:1-3) Ikor caayto pipasata ci Hosiya, mahapinang no hongti no Siriya to makakapotay ato Icip cingra to sapisafelitaw. Palit hananayto ni Salmanisir ci Hosiya, halo milood to Samariya, ˈ3 miheca a miˈalikot to niyaroˈ. Salikor mapelengto konini fanekfekay a niyaroˈ, cepetento a mihawikid ko Israil tayra i roma a pala.—2 Hongti 17:4-6; 18:9-12; palalinien to Hosiya 7:11; Icikil 23:4-10.
it-1-CH 414-415 fiedac
Macepet a Malaholiw
Kakaˈamisan a ngasaw a Israil kitakit ato kakatimolan ngasaw a Yuta kitakit, saka macepet a malaholiw tayra i roma a pala, malecaday ko lalangian: Makamiliyasay cangra to matatodongay a pidoyongan, caayto pihodop ci Yihofaan, mitaˈong to makaniway a kawas. (Limoˈot 28:15, 62-68; 2 Hongti 17:7-18; 21:10-15) Padadotocay ci Yihofa miocor to pairasolay tamdaw palimoˈot cangranan, kawra cowa ka falic ko falocoˈ nangra. (2 Hongti 17:13) Oya 10 ngasaw a Israil awaay ko cecacecay hongti to misawaday toya nipatirengan noya saka cecay hongti ci Yiropoam a mararaway a pidoko. Kakatimol a Yuta kitakit misakahemaway to saparikec ni Yihofa, cowa pinanam to sapasifanaˈ to nika macepet no Israil tayra i roma a pala. (Yirimiya 3:6-10) O finawlan nonini tosa kitakit salikor macepetay a malaholiw tayra i roma a pala, cowa ka cecay aca a pala a malaholiw cangra.
Odoˈ no Sinael
it-2-CH 85 fiedac
Samariya Tamdaw
ˈAyaw no kongyen saka 740 miheca, oya 10 ngangasawan a Samariya kitakit mapelengayto, ikor tano “Samariya tamdaw” hananay no Fangcalay Cudad mitoroˈ toya ˈayaw no mapeleng ko kakaˈamisan a kitakit a finawlan, toha sapafafidaaw toya patayraan no Asiriya kitakit a milinah a roma finacadan a tamdaw. (2 Hongti 17:29) O maˈoningay i 2 Rayray 34:6-9 (nengnengen ko 2 Hongti 23:19, 20) somowalay, tiya mala hongti ci Yosiya i, o romaroma a Israil tamdaw kamayan maroˈayho i lalomaˈ no Samariya, cowa ka mahaemin a malaholiw ko polong a Israil tamdaw. Ikorto, “o Samariya tamdaw” sanay a sowal mitoroˈay toya materekayho a teloc no Samariya tamdaw, atoya milinahan no Asiriya patayra i Samariya a tamdaw. Mihaenay haw i, o romaroma a “Samariya tamdaw” maedeng o aynoko a wawa. Salikorlikorto i, onini a sowal malahedawayto kono ˈairangan anoca nomirikecay a tatodong, iraayto kono pidoyongan a tatodong, mahaenayto oya matenakay i nolitengan a Sikim ato Samariya a pidoyongan, o mihakelongay tonini pidoyongan mitooray to taˈangayay ko kasasiroma to Yutayakiw a sarikec.—Yohani 4:9.
SAKA 12 FOLAD 19-25 ROMIˈAD
O ODOˈ KO KIMAD NO KAWAS | 2 HONGTI 18-19
“Misafelitay a Tamdaw Tano Manan a Pakayraan Mifasaw to Pakasoˈlinay a Falocoˈ Ita”
w05-CH 8/1 11 fiedac 5 fatac
Kalimlaan no 2 Hongti Cudad
18:19-21, 25—Ci Hitikiya matatelekay ato Icip han? Cowa. Mipakokotay ko tapang no sofitay ci Hitikiyaan to mitiˈeray to Icip, misamangahay cingra. Somowal cingra to sakapiloood ningra to Yirusalim i, ‘o sapatorod ni Yihofa a fadangalan’ sanay, o pacefaay a sowal konini. Misarocoday mitiˈer ci Hitikiya ci Yihofaan, madimadi Cingranan.
w10-CH 7/15 13 fiedac 3 fatac
“Aka ka Talaw. Papadamaen no Mako Kiso”
Tada misafakofakoay a misaˈefit koya tapang no sofitay, somowal to mangah a sowal, tohasaka cisasaaw no falocoˈ no Yutaya tamdaw. Sowal sa cingra: ‘Ci Hitikiya coko mipalasawdanto ningra ko pipatoˈayaan to Kawas han? . . . Na pasowalay ci Yihofa i takowanan: “Ka tayra kiso mitekop tora niyaroˈ” sanay.’ (2 Hongti 18:22, 25) Sowal no tapang no sofitay tona maketeray ci Yihofa to finawlan Ningra, mansa cowa ko papatado cangranan a milood sanay. ˈArawhan masafafelitay kora demak. Mahemekay ci Yihofa ci Hitikiyaan, mahemekay toya pasasiyoray midoko to matatodongay pidoyongan a Yutaya tamdaw.—2 Hongti 18:3-7.
w13-CH 11/15 19 fiedac 14 fatac
Papito a Pakaenay to Siri, Fafalo a Kakeridan—O Manan ko Tatodong Kitanan Anini
14 Hongti no Asiriya itiniay i kakaˈtipan no katimol a Lakis patireng to taloˈan, ocoren ko tatolo tarokos tayra papipakosag to Yutaya tamdaw, oya saˈayaway i, tapang no sofitay. Tosapisawiaw to finawlan no Yirusalim, tano pinapinaay a pakayranan misawi to tamdaw. Oraanto i, tano Hipray sowal a milekal cingra, miowing to niyaroˈay tamdaw misafelit to hongti no Yuta, midofdof to Asiriya tamdaw. Misaˈefit to finawlan, ano mikosang cangra i, o ngangaˈay a malinah tayra i roma pala maroˈ a mangaˈay ko kaˈorip. (ˈOsien ko 2 Hongti 18:31, 32.) Pasowal ko tapang no sofitay, ano caay pakadipot ko kalo a kawas to mihakelongay a tamdaw, nanima ko Yutaya tamdaw mitala ci Yihofaan saw, cowa ko papalaliw cangra to kapal no Asiriya sanay. Matanengay ko finawlan, mafanaˈay to pilikaf no tapang no sofitay, sahtoay o mangah, mansa caay ka pacaˈofen nangra. Anini o sikawdan ni Yihofa marariday mitodong to taˈarawan nangra.—ˈOsien ko 2 Hongti 18:35, 36.
yb74-E 177 fiedac 1 fatac
Saka 2—Towic
O dimeng no Towic (SS), marariday sakadademak to misaˈfitay a pakayraan a papitilid to tamdaw to ngangan nangra, ikor mifelih a miˈodis cangranan a miroero. Mahaenay ko sowal ni Karl Kirs: “Itini i tapalitan edengan o Misawacayay Tamdaw ni Yihofa ko mihaenan a misaˈfit. Pacieci cangranan mitilid to ngangan to sapisawadaw to pihakelongan. Kinapinapinay papihaen tamiyanan. Iraay ko papina to mitiliday to ngangan, kawra cecayayho miheca ko pitala nangra to sakasadakaw. Itini tonini tatokian marariday lokesen no dimeng cangra ikaˈayaw no ˈalomanay, to o makaniway cangra misao salikaka ko niyah.”
Odoˈ no Sinael
it-1-CH 847 fiedac 3 fatac
Mikakorkoray Tono Litengan a Dafong
O maˈoningay no Fangcalay Cudad, hongti no Siriya ci Sinakirip o tatosa a wawa ningra ci Atramilik aci Salicir ko mipatayay cingranan sanay, o midotocay cingranan a mala hongti i, o roma a wawa ci Isarhaton sanay. (2 Hongti 19:36, 37) Kawra o cecay matiliday likisi no Papilon, sanay ko sowal, itini i Tipit folad saka 20 romiˈad, ci Sinakirip itiniay i mitowakangay a lalood mapatay no wawa no niyah sanay. ˈAyaw no kongyen saka 3 hahekalan saysi no Papilon ci Perous, ato ˈayaw no kongyen saka 6 hahekalan hongti no Papilon ci Naponito, malalecaday ko sowal to likisi, mipatayan no cecay wawa no niyah ci Sinakirp sanay. Kawrira, o mahelaay no tamdaw a pinapeceh no ˈotoc ni Isarhaton (midotocay ci Sinakiripan a mala hongti). O sowal ni Isarhaton, o salikakakaka ningra ko mitowakangay, mipatay to wama a hongti, ikor milaliway cangra sanay. Pakayni tonini demak, o mitilidan ni Filip. Pipefil a “Likisi no Yutaya” somowalay: “O likisi no Papilon, ci Naponito, ci Perous mararaway cangra sanay, o wacay paihkalay edengan o maˈoningay no Fangcalay Cudad ko soˈlinay sanay. Ano o mimimimingay a maˈoningay no Fangcalay Cudad a demak, matepiˈay to ˈotoc ni Isarhaton. Ihekalay mahapiang, o maˈoningay no Fangcalay Cudad pakayni to likisi no Papilon ato Siriya, ikakaay ko nika soˈlin to matiliday likisi no Papilon. Pakayni to likisi no hekal ano masafafelitay to maˈoningay no Fangcalay Cudad i, o masakalimlaan a wacay konini.”
SAKA 12 FOLAD 26– 1 FOLAD 1 ROMIˈAD
O ODOˈ KO KIMAD NO KAWAS | 2 HONGTI 20-21
“Cangacangen ci Yihofa Papicapid to Demak”
ip-1-CH 394 fiedac 23 fatac
Mapalemeday ko Nika Pakasoˈlin no Cecay Hongti
23 Ya sakina cecay milood ci Sinakirip to Yata kitakit i, taˈangayay ko adada ni Hitikiya itiya. Pasowalan ni Isaya cingra, to mamapatayto cingra. (Isaya 38:1) 39 ko mihecaan a Hitikiya tada taˈangayay ko kacekok. Ora kaciharatengan ningra cowa ko ˈorip aca no niyah, calemcemayho to finawlan. O Yirusalim ato Yuta kitakit tahasiˈayaway to pilood no Siriya. Ano mapatay sa ci Hitikiya i, cima ko mamikerid to finawlan hani? Itiya awaayho ko wawa ni Hitikiya to mamidotoc cingranan a mala hongti, oraanto i, misarocoday cingra mingitangit to siniˈada ni Yihofaan.—Isaya 38:2, 3.
w17.03-CH 21 fiedac 16 fatac
Sarocoden ko Falocoˈ a Mihodop ci Yihofaan!
16 Mamapatayto ci Hitikiya i, mingitangitay ci Yihofaan miharateng to nika dademak ningra. (ˈOsien ko 2 Hongti 20:1-3.) Mananamay ita nai Fangcalay Cudad, nohatini caayto pidemak ci Yihofa to kafahkaˈan a demak miadah to adada ita anoca minayar to ˈorip ita. Kawra ngaˈayay minanam kita ci Hitikiyaan, itini i satolon pasowal ci Yihofaan, tohati:niay ‘mitienecay to soˈlinay ato misarocoday falocoˈ’ kita a dademak. Soˈlinto adada kiso, pakasoˈlinay to iraay ko ˈicel ni Yihofa hanaca makahiyay midama tisowanan han?—ˈOlic 41:3.
g01-CH 7/22 13 fiedac 4 fatac
Sasamaan Kako Mikitini i Pitolon a Milifok to Epoc Hani?
Itini i lalintadan no Fangcalay Cudad, na tangsolay pacaˈof ko Kawas to satolon no madimadiay sikawdan Ningra, nolatekay pakaynian i pidemak to kafahkaˈan a pacaˈof. Tinakoen, ci Hitikiya tiya mafanaˈ to ciadadaay to mamapatay a adada ko niyah i, mingitangitay to sapadama no Kawas. Pacaˈof ko Kawas: ‘Matengilayto Ako ko pitolon iso, maˈarawayto ko losaˈ iso. Nengnengen, o aadahen no Mako kiso.’ (2 Hongti 20:1-6) Mahaenay, namidemakay ko Kawas, mipadang to midokoay i Cingranan a tamdaw.—1 Samuil 1:1-20; Taniil 10:2-12; Dmak 4:24-31; 10:1-7.
Odoˈ no Sinael
it-2-CH 313 fiedac 3 fatac
Soyhi
O soyhi hananay i, o sakadademakan itini pipatanektek to mipatirengan a lomaˈ. Pairasolay ci Yihofa, pakayni to mitowakangay a Yirusalim ‘o lalayaˈen Ningra ko sapilalat a kaered to Samariya, tatelien Ningra ko sapilalat a soyhi to lalomaˈan ni Ahap.’ Ta lalaten no Kawas ko Samariya ato lalomaˈan ni Ahap i, mahapinangay ko nika manahor no waywayan nangra, mafaewicay caay ka masadafdaf, o papalaˈafoento. Mahecaday, o sasawkiten no Kawas ko Yirusalim ato mikowanay nangra, mipatalahekal to tatiihay a waywayan nangra, halo palaˈafo tonini a niyaroˈ. ˈAyaw no kongyen 607 miheca, soˈlinay mapalaˈafo konini a niyaroˈ. (2 Hongti 21:10-13; 10:11) Pakaynian ni Yihofa ci Isayaan misadak to saparikec, paliˈayaw pasowal o mikowanay to Yirusalim ato malitaˈangay a tatiihay tamdaw o mamisiˈayaw to padiing, sowal sa: ‘Tatano masadafdafay a kaered Kako, tatano moecelay a soyhi milalat Kako.’ Kitinien to masadafdafay ato moecelay palinian no Kawas, mamahapinang to cima ko soˈlinay madimadiay a sikawdan no Kawas, cima ko cowa, mihaen a misaˈosi to dadipoten ko ˈorip no nima, cima ko papalaˈafoen.—Isaya 28:14-19.