Itini ka Hererekan no Romiˈad Pakasoˈlin to Lalidongen ni Yihofa Kita

Citolasay ko pihadidi ni Yihofa toniya hekal, wa kaliki Cingra mihererek toniya likakawa, wa malaˈafoto ko makaniway a pihakelongan, kalo a kitakit wa makakadep miˈodis to finawlan no Kawas. Ikor, itini i Armakiton palaˈafoen ni Yihofa ko mariˈangay tamdaw. Hinatalaay ko Krisciyang toniya taˈangayay a demak.

Cowa ka fanaˈ kita pakayni taˈangayay padiing a emin a demak. Tinakoen, cowa ka fanaˈ kita no hacowa a mifekad. Cowa ka fanaˈ kita kalo a kitakit wa tano o manan a lalangian nangra, miˈodis to makaniway a pihakelongan. Cowa ka fanaˈ kita hakowa ko halafin no kalo a kitakit miˈodis to finawlan no Kawas, anca sasamaanen nangra kita. Cowa ka fanaˈ kita itini Armakiton sasamanen ni Yihofa palaˈafo ko mariˈangay tamdaw.

Kawra, pafelianto no Fangcalay Cudad kita to saali ita a safanaˈ, ho ira ko pakasoˈlinay a falocoˈ ato timolo, misiˈayaw to hanoikor. Tinakoen, mafanaˈay kita itiniayto i ‘sarikoray a ˈawaled’ a maˈorip; wa saˈapotoanto ni Yihofa ko toki to sapiˈodisaw no kalo a kitakit to pihakelongan, mihean soˈlinay a pihakelongan cowato ko mamalaˈafo; roma i, wa lidongen ni Yihofa ko finawlan Ningra. Samanen miocoran ni Yihofa ko moecelay ciˈicelay a Yis, palaˈafo to mariˈangay tamdaw, mikayat to taˈangayay ˈopo a tamdaw milakowit to Armakiton.—2 Timoti 3:1; Matay 24:22; 2 Pitiro 2:9; Paˈarawan 19:11, 15, 16.

Mamifekad a demak noikor wa ‘ciˈangi mahalileng’ ko tamdamdaw. Kawra, pakayni piˈosi ato pidotim to itiyaayho a pilidong ni Yihofa a demak ato sapairasol Ningra to noikoran, wa ngaˈay kita ‘timolo a mitapal’ pakasoˈlinen, ingataayto ko sakalidongaw no mita.—Luka 21:26, 28.