Pinengnengan to Lalakaw no Mitosilay ato Nikaˈorip Rayray no Saˈopo
© 2022 Watch Tower Bible and Tract Society of Pennsylvania
SAKA 3 FOLAD 6-12 ROMIˈAD
O ODOˈ KO KIMAD NO KAWAS | 1 RAYRAY 23-26
“O Midokoay a Demak i Fangcalay Sefi Malosimetay”
it-1-CH 697-698 fiedac
Saysi
Misaˈopoan no kakeridan ko saysi matayal i fangcalay sefi. Miritos cangra to matayal. Tosaay poloˈ ira ko sepat kapot cangra makakotay matayal to cecay a lipay, cecay miheca kina tosaay. I kalahecian patireng to fangcalay sefi cangra, o finawlan patafangay to masacaˈolay masaefanay a sapatoˈaya, o saysiho wa mirienang maemin a matayal i fangcalay sefi. (1 Rayray 24:1-18, 31; 2 Rayray 5:11; palalinien ko 2 Rayray 29:31-35; 30:23-25; 35:10-19.) Ano cowa ka piafad to matayalay a saysi, oya paselaˈay a saysi ngaˈayay matayal. Masowalay no Lapi, i fafekangho no sera ci Yis i, ˈalomanay ko saysi, o cecay a lipay a tatayalen, o lalomaˈan a masilsil, ano pinaay ko lalomaˈan i, masilsilayto mamatayal to cecay anca pina romiˈad cangra.
it-1-CH 902 fiedac
Lifi
Milikakawaan ni Tafiti ko Lifa tamdaw, pafafidaˈ a misilsil to hatayal, manilnilayho ko kantok, ˈaˈideman, mirikecay, mihimaway to fawahan ato soko a tamdaw, maocorayho ko ˈalomanay i fangcalay sefi, i potal, i kakomaenan padama to saysi, milimasmas to patoˈayaay, mikoracay a lisin, malalatay to sapatafang a maamaan ato mihimaway to safangcalay a kaitiraan a tayal. Misilsilan ni Tafiti ko miongkakay mala tosa poloˈ septay kapot mahecad o saysi, miritosho a makakotay matayal. Mihimaway to fawahan a tamdaw miritosayho to aicowa a mamihimaw.—1 Rayray 23, 25, 26 fedengan; 2 Rayray 35:3-5, 10.
it-2-CH 968-970 fiedac
Radiw
I pilimasmas ni Tafiti to hasapatireng to fangcalay sefi ni Yihofa, misaˈopoan ningra ko 4,000 a Lifi tamdaw matayal i romadiway a kapot. (1 Rayray 23:4, 5) I lalomaˈ nangra ira ko 288 tamdaw, ‘micadaay to sapahatatanam a pahemek ci Yihofaan, tada mafanaˈay tono radiw.’ (1 Rayray 25:7) Ira ko toloay tada mafanaˈay a singsi mala kantokay, ci Asaf, Himan aci Yitutun (ci Itan). Oniya tolo a kantok, o teloc ni Kirson, Kohat aci Mirari, o wawa ni Lifi. Mihaenay, tatolo a ngasaw no Lifi, iraay ko mitaypiyaway nangra i romadiway a kapot. (1 Rayray 6:16, 31-33, 39-44; 25:1-6) I lalomaˈ noya 288 tada mafanaˈay tono radiw a tamdaw, 24 ko wawa ni Asaf, Himan aci Yitutun. Kahacecay wawa no kantok, mikayatan nangra ko 11 a ‘mafanaˈay romadiw” a tamdaw, mahawpay ko wawa nangra. Oniya 288 a tamdaw ([1 + 11] × 24 = 288) masasaylam a mala 24 a komi (mahecad to limasmas no saysi). Ano masasaylam ko roma 3,712 kalo a tamdaw, o cecay komi maedeng iraay ko 155 kalo a tamdaw, o kahacecay a mafanaˈay to romadiw a tamdaw, wa pakafanaˈ to maedeng 13 kalo a tamdaw. (1 Rayray 25:1-31) I lalomaˈ no 4,000 a romadiway, awaay ko miongkakay, samanen oniya tayal o saysi ko ciˈinorongay.—2 Rayray 5:12; palalinien ko Saˈosi 10:8.
it-2-CH 276-277 fiedac
Mikacaway a Tamdaw; Milaocay
Mihimaway to fawahan no fangcalay sefi a tamdaw. ˈAyaw no patay ni Tafiti, misaˈopoan ningra ko Lifi tamdaw ato mihimaway to fangcalay sefi a tamdaw, mahawpay ko mikacaway maemin. Itiya 4,000 ko mihimaway to fawahan, misilsilan ni Tafiti mala o kapot cangra. O cecay kapot cecay a lipay, matayal i fangcalay sefi, mihimaw to safangcalay a kaitiraan ni Yihofa, i matatodongay a toki, mifawah ato miˈedef to fawahan. (1 Rayray 9:23-37; 23:1-6) Cowa ko pilaoc aca nangra, wa mihimawho cangra to sapakiyaho no finawlan to fangcalay sefi. (2 Hongti 12:9; 22:4) Mapasimal ni Yihoyata ci Yoas mala hongti i, misakaretengan ningra a milimasmas ko milaocay, papidipot to kaemangayho a hongti ci Yoas, eca ka madokaˈ noya na miˈafasay to saaroˈan no hongti a fofo ningra ci Ataliya. (2 Hongti 11:4-8) Palaˈafoan ni Yosiya ko samiyay i, oya ilalomaˈ no fangcaly sefi a sapitaˈong ci Paalan a lalosidan, padamaay ko milaocay micoroh patayra i papotal no niyaroˈ a mitodoh.—2 Hongti 23:4.
Odoˈ no Sinael
O Matatodongay a Pidoko Papatongal to Lipahak Iso
10 Malacafay to salikaka romadiw to sapahemek to Kawas a radiw o midokoay ci Yihofaan. (ˈOlic 28:7) O romadiway to sapahemek to Kawas a radiw o kalimlaan i pidoko a demak sanay ko nolitengan a Israil tamdaw miharateng, hongti ci Tafiti miocoray to 288 Lifi a tamdaw misamacay itini fangcalay sefi a romadiw. (1 Rayray 25:1, 6-8) Anini wa ngaˈay kita pakayni romadiw to sapahemek to Kawas a radiw paihkal to olah ita to Kawas. Haratengen, ngaˈay anca cowa kangaˈay tengilen ko radiw cowa ko sakakaay kalimlaan. Haratengen hena, ano somowal kita i, ‘kinapinaay a mararaw,’ kawra cowa ka sawad sato kita somowal itini i saˈopo ato pitosilan. (Yakop 3:2) Mihaenay, soˈlin cowa kangaˈay tengilen ko radiw no niyah saan kita miharateng, o raromadiwho a pakahemek ci Yihofaan.
SAKA 3 FOLAD 13-19 ROMIˈAD
O ODOˈ KO KIMAD NO KAWAS | 1 RAYRAY 27-29
“O Sarikec no Wama to Wawa”
w05-CH 2/15 19 fiedac 9 fatac
Nisawawaan ni Kristo—Salimlaen ko ˈInorong Iso
9 Hapinangen no niyah ko soˈlinay kimad no Fangcalay Cudad. Midoko kita ci Yihofaan, ano cowa kono niyah a kacipinang to soˈlinay taneng no Fangcalay Cudad, alatek cowa ka pisakareteng tono Krisciyang a ˈinorong no niyah. (Filipi 1:9, 10) Kahacecay Krisciyang, ano o malitengay kaemangay, licayen ko niyah, mananamay ita a kimad, o soˈlinay a kimad no Fangcalay Cudad han? Pakalalokan ni Pawlo ko Krisciyang: ‘O mananto a demakan, hapinangen; o fangcalay a demak, tafoen.’ (1 Tisalonika 5:21) Kaemangay Krisciyang, ano mikangodo to Kawas ko wama wina iso i, pakasoˈlinay cangra to Kawas, papakasoˈlin kako to Kawas wa saan, cowa ka hatira. Pasowalay ci Tafiti ci Solomonan: ‘Kafanaˈ kiso to Kawas no wama, sarocoden ko falocoˈ, lipahakay a midoko Cingranan.’ (1 Rayray 28:9) Kaemangay ci Solomon cowa ko itatihiay aca a minengneng to wama ningra a midoko ci Yihofaan, ao talaˈayaw cingra a mafanaˈ ci Yihofaan. Mitengilan ni Solomon ko sowal no wama ningra a micangacang ci Yihofaan: ‘Pafelien kako to taneng ato sifanaˈ, ho ngaˈay keriden ako ko finawlan’, sanay.—2 Rayray 1:10.
w12-CH 4/15 16 fiedac 13 fatac
Sarocoden a Midoko ci Yihofa
13 Mananamay ita ko manan? Ihkalay ko caˈof: Macerid mirienang to saˈopo ato mitosil, o ngaˈayay. Kawra misarocod midoko ci Yihofaan, cowa konini aca ko dademaken. (2 Rayray 25:1, 2, 27) Ano ‘pasilalikor ko Krisciyang a minengneng’, i falocoˈ ningra tangoˈol to kaˈorip noniya hekal, alatek wa palidlid sato a miliyas to Kawas. (Luka 17:32) ˈIntehen ita ko tatiihay, koracen ko waywayan, ngaˈ ‘citatodong micomod to Kitakit no Kawas.’ (Loma 12:9; Luka 9:62) Mihaenay, o mihadakan noniya hekal ni Satan a dafong, hakowato ko kaolahan no tamdaw i, hamaan a papiconaan to sakadademakaw ita to Kitakit no Kawas a falocoˈ.—2 Korinto 11:14; ˈosien ko Filipi 3:13, 14.
“Safaˈinaˈinayan Saˈicelen ko Falocoˈ, Pisatapangto Kiso Imatini a Matayal”
20 Hongti ci Tafiti patalipaˈelalay ci Solomonan, o kakapoten ni Yihofa cingra, tangasa kalahecian no pisangaˈ to fangcalay sefi. (1 Rayray 28:20) Paifalocoˈan ni Solomon ko sowal no wama, cowa ka noka kaemangho awa ko nalifetan, matalaw a dademak. Patalahkalay ci Solomon to taˈangayay timolo, itini sapadama ni Yihofa, pitoay ira ko kalitosa miheca milaheci a patireng to tadamaanay a fangcalay sefi.
21 Padamaan ni Yihofa ci Solomon, o papadama tisowanan itini i kihcod a nokaˈorip patalahkal to timolo, misiˈayaw to masakenakenaay a pakayraan. (Isaya 41:10, 13) Ano timolo kita midoko ci Yihofaan, o papakasoˈlin to papadotoc a palemed kitanan. Mankora, ‘safaˈinaˈinayan saˈicelen ko falocoˈ . . . a matayal.’
Odoˈ no Sinael
w17.03-CH 29 fiedac 6-7 fatac
Mamapalak ko Kalawidang i, Soˈlinen Malo O Ngaˈayay Widang
Iraay ko madimadiay widang ni Tafiti, kalacafay misiˈayaw to pasangar, mahecad ci Husayan. O ‘widang ni Tafiti’ sanay ko sowal no Fangcalay Cudad. (2 Samuil 16:16; 1 Rayray 27:33) Ci Husay o ngaˈayay a dama ni Tafiti a milaheci to pasangaray a ˈinorong.
Wawa ni Tafiti ci Apsalom sapiˈafasaw to saaroˈan no hongti, ˈalomanay Israil pasayraay mitiˈer ci Apsaloman. Edengan ci Husay midamaay ci Tafitian, na milaliw ci Tafiti i, mikilimay cingraan. Wawa ni Tafiti ato widang ningra misafelitay ci Tafitian, mararomay cingra. ˈArawhan, ci Husay cowa ka talaw to sakapatayaw, mipalak to pihalaka no misafelitay. Cowa ka tano pidemak aca ningra ko sacorcor, hanaca tano waywayan ningra a misawacay to ka madimadi ningra ci Tafitian.—2 Samuil 15:13-17, 32-37; 16:15–17:16.
SAKA 3 FOLAD 20-26 ROMIˈAD
O ODOˈ KO KIMAD NO KAWAS | 2 RAYRAY 1-4
“Cowa ka Citaneng ko Pisaˈosi ni Solomon”
it-1-CH 829 fiedac 3 fatac
Sofitay
Malahongti ci Solomon ikor i, misafaelohay ko sofitay no Israil. Pikowan ningra to Israil, ikakaay to lintad ni Tafiti ko dipayal, mitongalay misaadihay cingra to efa ato sapilood a paliding. (Nengnengen ko SAPILOOD A PALIDING.) Oniya efa naitiniay i Icip a ˈacaen, patirengay ci Solomon icowacowa to sapihopedaw to dafong no sofitay. (1 Hongti 4:26; 9:19; 10:26, 29; 2 Rayray 1:14-17) Kawra, oniya halaka ni Solomon cowa ka pilifok to sakahemek ato sapalemed ni Yihofa. Mapatayto ikor cingra i, mafafidaˈayto ko kitakit ningra, mangalefay ko tatiih no sofitay. Ikor mitiliday ci Isaya: ‘Ora tayra i Icip micangacang to sapadama a tamdaw, cipadiingayto! Mitiˈeray cangra to efa ato sapilood a paliding, cowa ka pitiˈer to tadamaanay Tapang no Israil, cowa ka picangacang ci Yihofaan.’—Isaya 31:1.
it-2-CH 1114 fiedac
Sapilood a Paliding
Tahira to i lintad ni Solomon, satapang sanayho ko Israil, ira ko adihayay a sapilood paliding. Samanen, na patalipaˈelalay ci Yihofa to hongti no Israil, aka a pitongal to efa, ho eca ka mitiˈer cangra to sapilood a paliding ato efa, midipot to kitakit. Samanen matengteng noya efa ko paliding, mihaenay, oniya sarikec wa milowan to hakowaay ko sapilood a paliding. (Kasadakan 17:16) Mirikecan ni Samuil ko ˈalomanay, o hongti wa misakareteng to ˈinorong nangra, wa ‘pacoracoren ningra ko wawa namo a pala sofitay, miparakat to sapilood a paliding.’ (1 Samuil 8:11) Ci Apsalom aci Atoniya sapicefisaw to fadangalan no hongti, misangaˈay to paliding no niyah, miocorayho to 50 a tamdaw a palalan, paihkal to tadamaanay no niyah. (2 Samuil 15:1; 1 Hongti 1:5) Mapadik ni Tafiti ko hongti ci Copa ikor, simoˈotay efa aca ko miterekan ningra.—2 Samuil 8:3, 4; 10:18.
Mitongal ci Solomon to sofitay no Israil i, 1,400 a sapilood a paliding ko mitongalay. (1 Hongti 10:26, 29; 2 Rayray 1:14, 17) Cowa ka itini aca i Yirusalim, patirengayho ci Solomon to mikiriwiˈay a sapilood a niyaroˈ, sapisimaw to sapilood a lalosidan.—1 Hongti 9:19, 22; 2 Rayray 8:6, 9; 9:25.
Odoˈ no Sinael
w05-CH 12/1 19 fiedac 6 fatac
Kalimlaan no Saka 2 Rayray
1:11, 12. Mikitini i satolon ni Solomon, mahapinangay ita, o sataˈangayay no falocoˈan a saali i, o sapilifokaw to taneng ato sifanaˈ. Mihaenay ano mitolon kita to Kawas i, o paihkalen ita ko kaciharateng no niyah a demak, misinanot to nafalocoˈan a satolon no niyah, tada o citanengay koni.
SAKA 3 FOLAD 27– 4 FOLAD 2 ROMIˈAD
O ODOˈ KO KIMAD NO KAWAS | 2 RAYRAY 5-7
“Maceriday Itira ko Falocoˈ Ako”
w02-CH 11/15 5 fiedac 1 fatac
Aka a Pisawad a Mirienang to Saˈopo
Ikor malahongtiay ci Tafiti i Yirusalim i, sapatirengaw cingra to midaˈocay a fangcalay sefi, paˈdil to ngangan ni Yihofa. Samanen, o nano sofitay ci Tafiti, hananay ni Yihofa cingra a pasowal: ‘Cowa ka ngaˈay kiso pakayni i ngangan Ako, patireng to fangcalay sefi.’ O wawa ni Tafiti ci Solomon ko mipiliˈan ni Yihofa a patireng to fangcalay sefi. (1 Rayray 22:6-10) Pitoay miheca kalitosa, malaheciayto patireng to fangcalay sefi. I ˈayaw no kongyen 1026 miheca, patafangan ni Solomon ko faelohay a fangcalay sefi i Kawas. Mahemekay ci Yihofa toniya fangcalay sefi, sanay ko sowal: ‘Mapalafangcalayto Ako a mikorac konini a nipatirengan iso a fangcalay sefi to fangcalay sefi i Takowanan a tahadaˈoc, o mata, falocoˈ Ako wa macerid itira.’ (1 Hongti 9:3) Wa padadotoc ci Yihofa mahemek toniya fangcalay sefi, ano miliyas cangra to moecelay lalan i, cowato ko papalemeden ni Yihofa, ‘wa mala horac koniya fangcalay sefi.’—1 Hongti 9:4-9; 2 Rayray 7:16, 19, 20.
it-2-CH 179 fiedac
Fangcalay Sefi
Tahalifaan a padiing. Misangaˈan ni Solomon a fangcalay sefi tahiraay aca i ˈayaw no kongyen 607 miheca a materek, mapalaˈafoay no sofitay ni Nipukatnicar. (2 Hongti 25:9; 2 Rayray 36:19; Yirimiya 52:13) Samanen cowa ka madimadi ko Israil tamdaw to Kawas, midokoayho to makaniway kawas, mansa mihaiyan no Kawas ko roma kitakit, milood to Yuta ato Yirusalim, maˈafasay ko odoˈ no fangcalay sefi, awaayto ko milosimetay a misafaeloh to fangcalay sefi, palak sanayto. Na maharek masangaˈ ko fangcalay sefi maedeng 33 mihecaan (ˈayaw no kongyen 993 miheca), milooday ko hongti no Icip ci Sisak to Yirusalim, miˈafasan ningra ko odoˈ no fangcalay sefi, itiya mala hongti ko wawa ni Solomon ci Rihopoam. (1 Hongti 14:25, 26; 2 Rayray 12:9) Itini ˈayaw no kongyen 977-937 miheca, misakaretengay ci Asa to fangcalay sefi ni Yihofa, ˈarawhan tano adihayay hafay no fangcalay sefi a miˈaca ko sadipot no Siriyaay hongti ci Pinhatat to Yirusalim, papifalah to kataterekan no Siriya ato Israil hongti ci Paasa.—1 Hongti 15:18, 19; 2 Rayray 15:17, 18; 16:2, 3.
Odoˈ no Sinael
w10-CH 12/1 11 fiedac 7 fatac
Mafanaˈay ko Kawas to Falocoˈ no Kalo a Tamdaw
Satolon ni Solomon pakalalokay kitanan, alatek cowa ka cipinang ko tamdaw to cariraw ato roray no falocoˈ ita, kawra cipinangay ci Yihofa to falocoˈ ita, hanaca tangongolay ko olah Ningra kitanan. (Taneng 14:10) Ano mikifalocoˈ kita a mihadak to roray i Kawas, mamiadah Cingra to roray no falocoˈ ita, aira ko ˈicel a miemem. Sowal no Fangcalay Cudad: ‘O kihcod a cariraw namo patorod han ko Kawas, samanen ciharatengay Cingra tamowanan.’—1 Pitiro 5:7.
SAKA 4 FOLAD 10-16 ROMIˈAD
O ODOˈ KO KIMAD NO KAWAS | 2 RAYRAY 8-9
“Misaaretengay Cingra to Taneng”
w99-CH 11/1 20 fiedac 4 fatac
Kadohafay a Mipaladaˈ
Milisoˈ ko fafahiyan hongti no Sipa ci Solomonan, wa adihayay ko mapapalak a toki ato ˈicel. O Sipa hananay a kitakit i katimolayho no Arapiyaay. Tano lakota cangra a morakat to 1,600 kongli ngaˈ tahiraay i Yirusalim. Mahecad masowalay ni Yis, ‘nai maraayay a pala cingra a tayni,’ sanay. Hano makahi cingra nai maraayay a tayni i Yirusalim hani? Sakakaay lalangian i, ‘sapitengilaw cingra to taneng ni Solomon.’—Luka 11:31.
w99-CH 7/1 30 fiedac 4-5 fatac
Ciepocay a Noka Pilisoˈ
ˈAlomanay ko mihakelongay to fafahiyan hongti tayni i Yirusalim, adihayay ko maˈorongay no lakota sapafangsis a pinaloma, adihayay a ekim ato odoˈ. (1 Hongti 10:2a) Oniya ˈalomanay mihekalongay mahawpay ko mamidipot to fafahiyan hongti a sofitay, halo pidipot to maˈorongay nangra a adihayay a hafay.
O kalimlaan i, oniya fafahiyan a hongti nano o ‘ngangan ni Yihofa’ a pakatengil to ngangan ni Solomon. Mansa, nai raayay cingra a tayra i Yirusalim, cowa ko pilisoˈ aca, sapitengilaw to taneng ni Solomon ko araaw ningra, hanaca sakafanaˈaw to Kawas ni Solomon ci Yihofaan. Alatek oniya fafahiyan hongti, o teloc ni Sim aci Ham, o midokoay cangra ci Yihofaan, alatek sakafanaˈaw ko fafahiyan hongti to midokoan no litengan ningra a Kawas.
w99-CH 7/1 30-31 fiedac
Ciepocay a Noka Pilisoˈ
Maˈaraw no fafahiyan hongti no Sipa ko nika tadamaan ni Solomon, ciˈicel ko kitakit, ‘safahkaˈ sa cingra, awaayto ko sasowasowalen ningra.’ (1 Hongti 10:4, 5) O roma a mihongyakay tonini a sowal i, “macahcahay ko saselaˈan ningra” sanay, o cecay mitatiliday “mapasetaˈayto” ko nika fahkaˈ nora fafahayan hongti sanay! Ano masamaanayto, fahkaˈan nanay koya fafahiyan hongti to maˈaraway, somowal to malemeday ko matayalay ni Solomon saan, samanen ngaˈayay cangra pakatengil to citanengay a sowal no hongti. Pakahemekayho ci Yihofaan koya fafahiyan hongti, samanen o Cingra ko mipatirengay ci Solomonan a palahongti sanay. Oraanto i, pafeliay to adihayay a kalimlaan a sapakaolah ci Solomonan. Ano doedoen ko aniniay a payso, oya ekim maedeng 4,000 a ˈofad kono Padaka a payso. Pafeliay ci Solomon a patiko to adihayay a sapakaolah toya fafahiyan a hongti, ‘o kihcod nisaalian ningra, pafelian ni Solomon cingra.’—1 Hongti 10:6-13.
it-2-CH 352 fiedac
Solomon
Maˈaraw no fafahiyan hongti no Sipa ko kakapah no fangcalay sefi ato pikilomaˈan ni Solomon, kadofahay a tangidaf i taheka, kaadihay no epah ato caˈedong no koli, atoya maceriday patafang a nisakimoodan a mitodoh a sapatoˈaya i fangcalay sefi, ‘fahkaˈay a macekid sakasekaˈaw’ cingra a pasowal: ‘Katayni ako pakaˈaraw nohatini, o safanaˈ no tao, kalitosaayho to maˈaraway no mako. O taneng iso ato hafay, mataˈlifay to matengilay no mako a sowal.’ Dotoc, sanay cingra a pasowal, o sikawdan ni Solomon tada malemeday, samanen mala dademakay noniya hongti, o malikoan. Nai falocoˈay cingra a pakahemek to Kawas ci Yihofa sanay, maolahay ci Yihofa to Israil, patirengan Ningra pala hongti ci Solomon, mala o mirikecay, misayfangay, moecel ko demak.—1 Hongti 10:4-9; 2 Rayray 9:3-8.
Odoˈ no Sinael
it-1-CH 100 fiedac
Kamaroˈan no Hongti
O misangaˈan ni Solomon a kamaroˈan no hongti, edengan o masowalay no Fangcalay Cudad a kamaroˈan no Israil hongti. (1 Hongti 10:18-20; 2 Rayray 9:17-19) Oniya kamaroˈan itiniay i hangaro no kamaroˈan no hongti, mapatirengay i Moriya lotok no Yirusalim. (1 Hongti 7:7) Tano wadis no eco a misangaˈ, ‘midopilan to ekim’, i kalikor kafekang iraay ko fadahong, i kawanan kawili iraay ko pakamayan. Oniya kamaroˈan alatek tano wadisan no eco a misangaˈ, ano tooren ko noka pihalaka misangaˈ to fangcalay sefi i, oniya kamaroˈan o kilang ko sapisangaˈ, midopilan to ekim anca wadis no eco, nengneng han, hato kihcod o wadis no eco anca o ekim a masangaˈ. Enemay ko kacakatan, i kawanan kawili no kamaroˈan, iraay ko faco no layong. I kaˈayaw no kamaroˈan, moetepay ira ko tosa ko faco no layong. (2 Rayray 9:17-19) Matatodongay paihkal to fadangalan ko layong. (Satapang 49:9, 10; Paˈarawan 5:5) Oniya 12 a layong matatodongay mitaypiyaw to 12 ngasaw no Israil, paihkal to mamidofdof midama cangra to saaroˈan no hongti. I kaˈayaw no kamaroˈan no hongti, iraayho ko ekim a pataripaˈan a ˈaxnan. Oniya tano wadisan no eco ato ekim masangaˈ a kamaroˈan i kafeka:ngay, i kaˈayaw iraay ko faco no layong, i kalikor iraay ko fadahong, ikakaay tono kalo a kitakit a kamaroˈan no hongti. Mikadkadan no mikakingkiway ko matoˈtoˈay i fakeloh anca i ˈotoc a tilid paihkalay, awaay ko pakafiloay to kamaroˈan no hongti ni Solomon. O sowal no saka 2 Rayray, matatodongayto: ‘Awaay ko romaroma kitakit pakasangaˈay to hatiniay a kamaroˈan no hongti.’—2 Rayray 9:19.
SAKA 4 FOLAD 17-23 ROMIˈAD
O ODOˈ KO KIMAD NO KAWAS | 2 RAYRAY 10-12
“Tengilen ko Sapalimoˈot”
Na Ngangaˈay Cingra Milifok to Olah no Kawas
Maedeng pasangaray ci Rihopoam a misaˈosi! Ano hayien ningra ko saali no finawlan, o paro no lomaˈ ningra ato sikawdan, cowato ko kakadofah ko kaˈorip nangra. Kawraan ano naˈayen ningra wa misafelit ko finawlan alatek. Oniya faelohay a hongti, wa samaan ko demak hani? Salakatay cingra milicay to harateng no malohemay malitengay, ikor mikilimay cingra to sakalecad no mihecaan a tamdaw, milicay to sapaini nangra. Salikor misaka dademakan ningra ko sapaini no kaemangay tamdaw, cowa ko mamisangaˈay to finawlan, sanay ko sowal ningra: ‘Ikaka haca ko kareteng no sapaˈorong ako i tamowanan. O kalosastiˈ ko sapistiˈ ningra i tamowanan, nikawrira, o rafirto ko sapistiˈ ako i tamowanan.’—2 Rayray 10:6-14.
w01-CH 9/1 28-29 fiedac
Citanengay a Misaˈosi
Pakaynian ni Yihofa i matenesay a Krisciyang no kasakopang a mikayat, ngaˈayay kilimen ita cangra a milengo. (Ifiso 4:11, 12) Kawra, o roma tamdaw saliyaliyaw sanay milicay to tao, sapitengilaw to kaolahan ningra a sowal ngaˈ, tooran ningra a midemak. Hamaan todongen ko mahaenay a tamdaw. Mahecad to nalifetan ni Rihopoam. Masiˈayaway ni Rihopoam ko kalimlaan a demak, licay han ningra ko na matayalay i wama ningra a malitengay. O sapacaˈof no malitengay cingranan sahto o citanengay, kawra cowa ka tengilen ni Rihopoam, kiliman ningra ko hecad a molahad a cafacafay milicay. Ikor micadaan ningra kono kaemangay a harateng, tada cowa ka citaneng ko saˈosi ningra, telocto, makalitosaayto ko kitakit nangra a mafafidaˈ.—1 Hongti 12:1-17.
Mihaenay, mikilim to adihayay ko nalifetan, mafanaˈayto Fangcalay Cudad, moecelay tamdaw a milicay, o citanengay koni. (Taneng 1:5; 11:14; 13:20) Ano ngaˈay i, palaken ko toki a midotim to safalod no Fangcalay Cudad, hapinangen ko maˈosiay makilimay iso a lalakaw. Masiˈayaway iso ko pasangar i, itini i sakayat no kimad ni Yihofa, wa mahapinang iso ko saˈosi iso to matatodongay.—Filipi 4:6, 7.
it-1-CH 1006 fiedac 7 fatac
Rihopoam
Misaˈakawangay mariˈangay a pinangan ni Rihopoam, kapiliˈan no finawlan, mansa awaayto ko tamdaw mipadama cingranan. Edenganto o Yuta, Pinyamin tatosa ngangasawan ko midamaay to lalomaˈan ni Tafiti, ato saysi, Lifi a tamdaw, atoya ilalomaˈ no mamoetep ngangasawan a mimingay tamdaw ko midamaay cingranan.—1 Hongti 12:16, 17; 2 Rayray 10:16, 17; 11:13, 14, 16.
Odoˈ no Sinael
it-2-CH 117-119 fiedac
Misafacoay a Lotok a Siri
Maˈoningay i Yosuwa 24:14 paihkalay, na pacarcaray i Icip a Israil tamdaw, mafiyoray no mararaway pidokoan. Sowal ni Icikil, ikor no pina riyad, ilalomaˈ no Israil, iraayho ko mararaway noka pidoko. (Icikil 23:8, 21) O roma mikakingkiway masowalay ko romaroma sinael, micongedan no Kawas ko Israil tamdaw, ‘mipatafang to faco no lotok a siri i kohkohan’ (Lifi 17:1-7), ci Yiripoam ‘patirengay to patoˈayaan, faco no siri, faco no kolong, hanaca tano niyah sanay a mipiliˈ to saysi’ (2 Rayray 11:15), onini paihkalay ilalomaˈ no Israil, oyananto ko faco no lotok siri a pidoyongan, mahecad to pihakelongan no Icip. O mitilidan ni Hirotot sanay, o mahaenay a pihakelongan no Icip i, mifalican no Krisiya tamdaw malo “Pan” anca “Sati” (kaˈacekan a colicolingan kawas) sanay a pihakelongan. O mahaenay a kawas, ira ko waˈa no fongoh nira, iraayho ko sano wikoray ato teker no lotok a siri. Sanay ko roma mikakingkiway, itini i nolitengan a Iwropa, o mihakelongay to “Kristokiyo” a tamdaw, micoka ci Satanan i, ira ko wikor, waˈa, teker no siri, oniya sano tamdaway sano ˈaˈadopen a faco, sahto o naitiniay i mararaway a pidoyongan.
Kawra, o manan ko ‘adihayay ko fanoh’ (seʽi·rimʹ) a dafong, awaay ko pitadtad nonini sinael. Pakasoˈlinay ko roma tamdaw, o soˈlinay a siri, anca o misafacoay a lotok siri, kawra o tatodong no sinael cowa ka hatini, awaay ko pitadtad no roma sinael. Alatek, o tatodong no Fangcalay Cudad paihkalay, o pinengneng no midoko to makaniway kawas a tamdaw, o kawas nangra hato lotok a siri anca adihayay ko fanoh. O roma tatodong no sinael i, oniya ‘faco no lotok siri’, paihkalay to kihcod mararaway a pihakelongan. Tinakoen, adihayay sinael tano “tayiˈ” hananay mitoroˈ ko samiyay, kawra cowa ko tayiˈ sa pisangaˈ toniya samiyay.—Lifi 26:30; Limoˈot 29:17.
SAKA 4 FOLAD 24-30 ROMIˈAD
O ODOˈ KO KIMAD NO KAWAS | 2 RAYRAY 13-16
“Ano Icowato a Tatokian, Tiˈeren ci Yihofa”
Kapah a Salikaka, Sasamaan Kiso Milifok to Pasoˈlin no Tao Hani?
12 Kaemangho ko Hongti ci Asa misapoeneray timoloay. Tinakoen midotoc cingra to wama ci Apiyaan a mala hongti i, palahdaway to samiyay i kitakit no Yutaya, ‘palimoˈotayho to Yutaya tamdaw midoko ci Yihofaan, midofdof to Rikec ato limoˈot Ningra.’ (2 Rayray 14:1-7) Tiya mikerid to 100 efan a sofitay ko Iciyopiya tamdaw ci Cira milood to Yutaya i, citanengay ci Asa, micangacang to sadama ni Yihofa, sanay: ‘Yihofaaw, ano hakowato ko ˈaloman no tamdaw, anca cangoˈot ko ˈicel, wa ngaˈay Kiso a milidong. Yihofaaw Kawas niyam, nanay padamaen kami, samanen mitiˈeray kami Tisowanan.’ Oniya sowal paihkalay, pakasoˈlinay ci Asa iraay ko ˈicel ni Yihofa a milidong cingranan ato finawlan ningra. Mitadiˈecay ci Asa to kakarayan Wama, mansa patadoan ni Yihofa cingra a milowid to Iciyopiya tamdaw.—2 Rayray 14:8-12.
Kapah a Salikaka, Sasamaan Kiso Milifok to Pasoˈlin no Tao Hani?
13 Misiˈayaw to 100 efan a sofitay, katalawanto. Kawra mitadiˈecay ci Asa ci Yihofaan, salikor mapadikay ko ˈada. Kaadayayan i, ikorto misiˈayaw to cowa ka ciˈicel a ˈada, cowa pitiˈer ci Yihofaan. Tiya milood koya tatiihay Hongti no Israil ci Paasa cingranan i, pasayraay i hongti no Siriya misaali to sadama. Oniya mararaway pisaˈosi mikayatay to tatiihay a teloc. Miocoran ni Yihofa ko pairasolay ci Hanani pasowal ci Asaan: ‘Samanen mitiˈeray kiso to hongti no Siriya, cowa pitadiˈec ci Yihofaan, o sofitay no hongti no Siriya wa mikitini kamay iso a milaliw.’ Ikorto, marariday tahalifa ci Asa to lalood. (2 Rayray 16:7, 9; 1 Hongti 15:32) Mikitini mananam ita ko maanan hani?
Kapah a Salikaka, Sasamaan Kiso Milifok to Pasoˈlin no Tao Hani?
14 Ka padotoc a misapoener, padadotoc a mitadiˈec ci Yihofaan. Patafang kiso to tireng micada to paputisem i paihkalay to pakasoˈlinay ko niyah ci Yihofaan, mitadiˈec Cingranan. Mansa mahemek ci Yihofa, pacomod tisowanan i paro no lomaˈ Ningra. O hademak iso nohatini, padadotoc a mitadiˈec Cingranan. Ano misaˈosi kita to kalimlaan a demak i, mitadiˈecay kita ci Yihofaan. Kawra itini kalo a toki i? Soˈlinay, ano o mananto ko misaˈosian iso, mipiliˈ to lawla anca tayal, ato patosokan no kaˈorip, o mamitadiˈec ci Yihofaan, aka mitiˈer to inaneng no niyah, kalimlaan mihaen to demak. Kilimen ko milingatay a safalod no Fangcalay Cudad, tooren koniya sakayat a midemak. (Taneng 3:5, 6) Mihaen, o papakahemek kiso ci Yihofaan, wa milifokho to pikangodo no salikaka.—ˈOsien ko 1 Timoti 4:12.
Odoˈ no Sinael
w17.03-CH 19 fiedac 7 fatac
Sarocoden a Midoko ci Yihofa!
7 Kita kahacecay a tamdaw, nengnengen ko niyah, soˈlinay misarocod a maolah to Kawas han? Haenenho milicay ko niyah: “Misatekay kako to falocoˈ midofdof ci Yihofaan, midama to matatodongay pidoko ato makoracay no kasakopang han?” Saharateratengen hena, o hakowa ko katimolo ni Asa ngaˈ, mifalah to saaroˈan no fofo ningra ci Maaka? Alatek, i kafanaˈan iso a tamdaw, awaay ko matiya sa ni Maakaay a mariˈang, kawra i roma a pakayraan, wa ira ko timolo iso mahecad ci Asaan halatek. Tinakoen, ano i paro no lomaˈ iso, anca o widang iso, mararaw to pakidemay a raraw, cowa ka kahi a pasasiyor, ikor mafalahay no kasakopang, wa samaan ko saˈosi iso hani? Wa padadotoc kiso a micawmaˈ cingranan han? Itini i falocoˈ iso wa samaan ko hasaˈosi iso hani?