Pinengnengan to Lalakaw no Mitosilay ato Nikaˈorip Rayray no Saˈopo
© 2023 Watch Tower Bible and Tract Society of Pennsylvania
SAKA 9 FOLAD 4-10 ROMIˈAD
O ODOˈ KO KIMAD NO KAWAS | ISTIR 1-2
“Todongen ci Istir a Misapoeneray”
w17.01 25 fiedac 11 fatac
Misapoener ko Falocoˈ Ano Mapalifet
11 Ano matengil ita ko pipahemek no tao i, mamilifet to misapoeneray tamdaw kita hokira. Pakayni toninian, nengnengen ita ko nalifetan ni Istir, samaanay cingra tiya mafekad ko taˈangayay noka falic i kaˈorip. O tada makapahay tamdaw ci Istir, cecayay mihecaan a misoli a misakapah to tireng. To romiˈamiˈad kalacafayay to naitiniay icowacowa pala a kaying no Pirsiya kitakit, orira kaying sapisolotaw aca to pinengneng no hongti. Soˈliˈlin mahaen, cowa ka mafiyor ci Istir, misapoeneray cingra. Ikorto, soˈlinto malafafahito no hongti, cowa ka falic cingra a malitaˈangen.—Istir 2:9, 12, 15, 17.
ia 130 fiedac 15 fatac
Paˈadingay to Finawlan no Kawas Cingra
15 Maraodto ko toki ni Istir masasoˈaraw to hongti, milongoc to hongti misaali to kaolahan ningra a dafong, latek o sakaeres a dafong. Edengan o nisowalan ni Hikay a dafongan, awaayto ko maamaan a saali ningra, itiniay mahapinang to misapoeneray cingra. (Istir 2:15) Latek mafanaˈay cingra, toha sapisolotaw to hongti, cowa ko nika kapah aca. Itini i lomaˈ no hongti no Pirsiya, mikiriwiˈay a masakalimlaan ko misapoeneray. Soˈlinay hatira kora demak han?
w17.01 25 fiedac 12 fatac
Misapoener ko Falocoˈ ano Mapalifet
12 Misapoeneray a tamdaw tanestesay ko caˈedong ato waywayan. Ano sapilifokaw kita to pisakareteng no tao i, o papatalahkal to ‘damsayay a waywayan,’ cowa ko sapahiyoaw to niyahan. (ˈOsien ko 1 Pitiro 3:3, 4; Yirimiya 9:23, 24) Idahiyay ko niyah to tao ano sa ko kemod no falocoˈ i, mamapatalahkal ano hacowaay, tinakoen pasowal to tao iraay ko maanan a mikiriwiˈay a tayal no niyah, mafanaˈay to maanan cowa ko kafanaˈan no tao a demak, anoca somowal to ciwidangay to cima ciˈinorongay a salikaka. O roma i, ono mako natayalan saan to manan a demakan, eca ka pasowal to naˈicelan no roma a salikaka. ˈArawhan, o maminanam kita ko taˈarawan ni Yis, misapoeneray cingra, ano pasowal cingra i, marariday misakadademak to Hipray Fangcalay Cudad, paihkalay to naitini i ci Yihofaan a taneng kora sowal ningra.—Yohani 8:28.
Odoˈ no Sinael
Mafanaˈay Kiso Han?
Mahapinangay no mikingkiway ko cecay Pirsiya tilid a cudad masowalay ko cecay ci Martoka hananay a tamdaw (oniya “Martoka” ato “Mortikay” o malecaday a sowal). Itini Susa a niyaroˈ matayal cingra, o kayki alatek. Mahela konini a cudad i, mikingkiway to likisi no kawali a kitiraan ci Atue Annate sanay ko sowal, o sakinacecay a mahadak i potalay no Fangcalay Cudad a cudad konini a ‘Mortikay’ sanay a ngangan.
Mihadak ci Annate toniya caˈof ikor i, o masacaˈolay masaemangay no Pirsiya a tilid mahongyakayto, ilalomaˈ mahawpay ko mahadakay i Pirsiyapolis tano ditaˈan a sapad. Oniya ditaˈ a sapad itiniay i ngata no lowil cecay mala horacayto a soko mahela, oniya mihecaan maedeng itiniay i pikowan ni Suesis a tatokian. O matiliday i fafekang no ditaˈ a sapad tano Aylan a sowal tiliden, i fafekang iraay ko masowalay no Istir cudad a roma ngangan no tamdaw.
Itini Pirsiyapolis a roma ditaˈ a sapad masowalay ko cecay a ngangan ci Martoka a tamdaw, sowal cingranan itiniay i pikowan ni Suesis a tatokian, itini i lomaˈ no hongti i Susa mitatiliday ko tayal. Iraayho ko cecay ditaˈ a sapad somowalay to o mihongyakay ci Martoka, onini a demak matatodongay to misowalan no Fangcalay Cudad pakayni ci Mortikayan. Itiniay i lomaˈ no Hongti ci Kirkis mala tapang ci Mortikay, maedeng tosaay sasowalen ko kafanaˈan. Itiniay cingra i fawahang no lomaˈ no hongti i Susa a matayal. (Istir 2:19, 21; 3:3) O fawahang no lomaˈ no hongti tada taˈangayay ˈakawangay, o katayalan no tapang a kitiraan.
O masowalay i ditaˈ a sapad a Martoka ato ilalomaˈay no Fangcalay Cudad a Mortikay iraay ko kalecadan. Malecaday ko kaˈoripan nangra a tatokian, kalecadan a kitiraan, malecaday ko kitiraan a matayal. Onini a demak paihkalay, mahapinangay no mikingkiway to nolitengan ci ‘Martoka’ oniya tamdaw o masowalay i Istir cudad a Mortikayan.
SAKA 9 FOLAD 11-17 ROMIˈAD
O ODOˈ KO KIMAD NO KAWAS | ISTIR 3-5
“Padama to Tao Misakadademak to Cowa ko Kafanaˈan a Inaneng”
it-1 1138 fiedac 2 fatac
Mortikay
Caay ka kahi mitaˈong ci Hamanan. Ikor nonini demak, palatapangan no hongti ci Kirkis ci Haman, halo palimoˈot to polong itiniay kaˈayaw no fawahan no lomaˈ no hongti a tamdaw pasayni tora minilnilan a tapang a mitaˈong, misetekay ci Mortikay cowa ko mamihaen to demak, samanen o Yutaya tamdaw cingra. (Istir 3:1-4) Ora lalangian i, tona o mipatafangayto to tireng i Kawas cingra, ano mitaˈong ci Hamanan o mamifiyor to kalalaed ningra aci Yihofaan a Kawas, mafanaˈay ci Mortikay mitaˈong ci Hamanan o mikangodoay to saaroˈan no mikowanay, matira o demak no iˈayaway a Israil tamdaw. (2 Samuil 14:4; 18:28; 1 Hongti 1:16) Kawra iraay ko lalangian ni Mortikay eca ka pitaˈong ci Hamanan, samanen latek o Amalik tamdaw cingra, na somowalay ci Yihofa to ‘lalooden ko kasarayray’ no Amalik tamdaw sanay. (Kasadakan 17:16; nengnengen ko HAMAN.) Mihaen ci Mortikay, eca ka pitaˈong o pakayniay to kamadimadi to Kawas.
it-1 1138 fiedac 4 fatac
Mortikay
Manilnilay Papilidong to Israil Tamdaw. Palimoˈotay ko hongti to papalaˈafoen ko polong Yutaya tamdaw i kitakit. Mafanaˈto ci Mortikay tonini demak pasowalan ci Istir, saka ira ko tadamaanay saaroˈan ningra, o sapilidongaw to ˈorip no Yutaya nohatini. Pasowal ci Mortikay ci Istiran, tada karetengay ko ˈinorong ningra, papingitangit to hongti, padama cangranan. Soˈliˈlin mihaen to demak tada katalawan, kamayan mitoor to sowal ni Mortikay ci Istir a midemak.—Istir 4:7–5:2.
ia 133 fiedac 22-23 fatac
Paˈadingay Cingra to Finawlan no Kawas
22 Matengil ni Istir kora sowal, maedeng makesemay ko falocoˈ. Cowaho ka mahaen a mapalifet ko pakasoˈlinay falocoˈ ningra. Itini i tikami ningra ci Mortikayan, patalahkalay to kokiˈ ningra. Pasowalan ci Mortikay, maharekayto ko hongti patireng to sarikec, ano caka matahidang no hongti tayra sa ko tamdaw miˈaraw to hongti i, o papatayen sanay. Edeng ano milayaˈ to ekim a cokor ko hongti, wa ngaˈ masodod konini tamdaw. Iˈayaw fafai no hongti ci Fasti tona cowa ka pidofdof to limoˈot no hongti, caay kakahi tayra i hongtian, teloc misawadan cingra. Mahapinangay itini, awaay ko lalangian ni Istir mitala to pisodod no hongti. Pasowal ci Istir ci Mortikayan, 30 romiˈad cowa ka matahidang no hongti cingra! Hongti ci Kirkis hinafalicay ko falocoˈ, latek miharateng ci Istir caayto kaolah ko hongti i cingranan.—Istir 4:9-11.
23 Fanekfekay a pacaˈof ci Mortikay ci Istiran, patanektek to falocoˈ ningra. Pasowal ci Mortikay, soˈlin ano caay ka kahi mipadang cingra i, aira ko pakayraan ni Yihofa a milidong to Yutaya tamdaw sanay. Kawra ano pakidem ko pikaˈriang no ˈada i, o mamapatay ci Istir. O sowal ni Mortikay patalahkalay to tanoktokay ko pakasoˈlin ni Mortikay ci Yihofaan. Tada pakasoˈlinay ci Mortikay, cowa ko pakihater han no Kawas ko finawlan Ningra a mapalaˈafo, palakisaw ko araaw Ningra. (Yosuwa 23:14) Oraanto, licayan ningra ci Istir: ‘Cima ko mafanaˈay ita, alatek o saki tonini a demak ko saka malafafahi no hongti kiso saw?’ (Istir 4:12-14) Misarocoday a mitiˈer ci Mortikay ci Yihofaan, tada o ngaˈayay a taˈarawan ita. Iraay ko mahaenay noka pakasoˈlin ita to Kawas han?—Taneng 3:5, 6.
Odoˈ no Sinael
kr 160 fiedac 14 fatac
Misaˈicel a Paˈading to Pasalat no Mita a Midoko
14 Matira to nolitengan a Istir aci Mortikay, o aniniay finawlan ni Yihofa misaˈicelay a paˈading to pasalat itini i pidokoan, hongaˈ matoor ko sapalimoˈot ni Yihofa a midoko Cingranan. (Istir 4:13-16) Sasamaan kiso a misaˈicel hani? Ngaˈayay kiso mararid patado a mitolon toya tahalifaay to saroero a salikaka. Tada ciepocay ko hatiniay a pitolon, padama to mahakokayay a salikaka. (ˈOsien ko Yakop 5:16.) Pacaˈofen ni Yihofa ko satolon ita han? O noka lowid ita itini i hoing, paihkalay to papacaˈofen Ningra!—Hipray 13:18, 19.
SAKA 9 FOLAD 18-24 ROMIˈAD
O ODOˈ KO KIMAD NO KAWAS | ISTIR 6-8
“Tada Mafanaˈay Malasasowal a Taˈarawan”
ia 140 fiedac 15-16 fatac
O Matanengay, Timoloay ato Caay Pisateked Cingra
15 Mihadidiay ci Istir mitala to cecay romiˈad, ngaˈ pasowal to saali i hongtian, teloc midemakto ci Haman to sakatefad no niyah. O roma i, cowa ka fotiˈ ko hongti, latek o ci Yihofa ko midemakay tora. (Taneng 21:1) Mankora pakalalok ko Fangcalay Cudad kitanan palahad to ‘mihadidiay a mitala’ a waywayan. (ˈOsien ko Mika 7:7.) Ano mihadidi kita mitala to Kawas i, latek mamaˈaraw ko sakadademakan no Kawas misaysay to demak a pakayraan, ikakaay ko nika ngaˈay to niharatengan ita.
Timoloay Cingra Pakokot to Tatiihay Tamdaw
16 Itira i sakina tosa a pitahkaan, sahecianto ni Istir pasowal ko hongti, ano caka haenen wa maketer ko hongti alatek. Kawra sasamaan pasowal hokira? Itiya, liyawan no hongti milicay ci Istir. (Istir 7:2) Mahapinangto ni Istir to maraodayto ko ‘toki a pasowal.’
ia 140 fiedac 17 fatac
Timoloay Cingra Pakokot to Tatiihay Tamdaw
17 Alatek isalakatay mitolon to Kawas ci Istir i falocoˈ, ikor ngaˈ pacaˈofay to hongti: ‘Ano mamangaˈay hongti kasiniˈadaenho kako, nanay haydaenho ko pilongoc ako to cecay. Milongoc kako i tisowanan, paˈoripenho ko ˈorip ako ato ˈorip no finacadan ako.’ (Istir 7:3) Sinanoten itini, o sowal ni Istir to hongti ano masamaanto ko pidemak no hongti, sasakaretengen ningra ko saˈosi no hongti sanay. Saˈayaway fafahi no hongti ci Fasti padeteng sanay mipakangodo to faˈinay, tada masasiromaay ci Istir i cingranan! (Istir 1:10-12) O roma sa i, cowa pilikaf ci Istir to nika apa no hongti pakasoˈlin sa ci Hamanan. O pilongoc aca to hongti a midipot to ˈorip ningra.
ia 141 fiedac 18-19 fitac
Timoloay Cingra Pakokot to Tatiihay Tamdaw
18 Maedeng misemeray to falocoˈ no hongti kora sowal ni Istir, tada macekokay cingra. Cima citimoloay sapidokaˈaw to fafahi no hongti saw? Sowal sa ci Istir: ‘Mapacakay i kamay no mariˈangay tamdaw kako ato finacadaan ako, Ano mapacakay kami malakoli i, terep asa kako. Caay ko sasomowal kako tonini a demak a pakalifot to hongti, nikawrira, o mamatekop a malasawad kami, halo talengawanto a malasawad ko nika latiih niyam!’ (Istir 7:4) Sahecian ni Istir pasowal kora demak, pasowal ano cingra ato finacadan aca ko mamapacakay i, wa terep sa kako saan. Kawra ano mapatay ko Yutaya tamdaw i, tataˈangay ko sipon no hongti, mankora cowa ko aeca pasowalen ko hongti.
19 Mikitini ci Istiran, mananamay ita to mamisamaan pasowal to tamdaw. Latek, o papasayra kita i paro no lomaˈ anca o cifadangalay tamdaw somowal to cecay pakidemay a demak. Edeng ano iraay ko mihadidiay, mikifalocoˈ ko sowal, mikangodo ko waywayan, o mamadolo alatek micada ko tamdaw.—Taneng 16:21, 23.
Odoˈ no Sinael
w06 3/1 11 fiedac 1 fatac
Kalimlaan no Istir Cudad
7:4—Ano matekop ko Yutaya tamdaw, sasamaan a ‘masipon ko hongti’ hani? Matanengay ci Istir a pasowal, mamapacakay a malakoli ko Yutaya tamdaw alatek, ano tekopen a mipatay ko Yutaya tamdaw i, mamasipon ko hongti. Soˈliˈlin mihayay ci Haman to papafelien ko hongti to 34 ˈofad kongcin a lingkim, kawra ano mapacakay malakoli ko Yutaya tamdaw i, o macadaay a epoc ni Haman ikakaay to malayapay no hongti, hanaca ano malaˈosi ko misahalakaan ni Haman i, o mamapatay ko kanonoˈan fafahi no hongti.
SAKA 9 FOLAD 25–10 FOLAD 1 ROMIˈAD
O ODOˈ KO KIMAD NO KAWAS | ISTIR 9-10
“Tano Fadangalan ci Mortikay a Midipot Midimokos to Finawlan”
it-1 1138 fiedac 7 fatac
Mortikay
Ci Mortikayto ko malatapang a mikotay ci Hamanan, pafelian no hongti cingra to fati a satopa mirinaˈ to sapalimoˈot no hongti. Pafelien no hongti ci Istir to hafay ni Haman, patoroden ningra ci Mortikay a papisimaw. Oranto i, sakadademakan ni Mortikay ko fadangalan no hongti, palimoˈot to cecay faelohay sarikec, mihayda to Yutaya tamdaw a pacoˈay. Onini sarikec pairaay to hatokel no Yutaya tamdaw, malidong ko ˈorip nangra, tataˈang ko lipahak nangra. ˈAlomanay ko roma kitakit makakapotay to Yutaya tamdaw. O aitini i Atar a Folad saka 13 romiˈad, mipatay to Yutaya tamdaw. Maharekayto mipatala ko Yutaya tamdaw a micoˈay. Tona ˈakawangayto ko saaroˈan ni Mortikay, maka midamaayto ko tapatapang i cingranan. Tangasaay saka tosa romiˈad ko kalalood i Susa. Ilalomaˈ no kitakit no Pirsiya, o mapatayay ˈada 75,000 ko kaˈaloman, mahawpay ko 10 wawa ni Haman. (Istir 8:1–9:18) Palimoˈotan ni Mortikay ko Yutaya tamdaw to mihecahecaan aitini i saka 14 ato saka 15 romiˈad no Atar Folad, misalisin i ‘romiˈad no Purim’, o kaacangan pipatelongan to tamdaw, mipadang to manikaway tamdaw. Mihayiay ko Yutaya tamdaw midofdof tonini saˈosi, halo palimoˈot to teloteloc ato mitooray to Yutaya a pihakelongan a ˈalafang tamdaw misinanot tonini a lisin. O saaroˈan ni Mortikay o saka tosa ko kaˈakawang i kitakit, mikangodoan no Yutaya tamdaw cingra, padadotocay matayal to sakangaˈay no finawlan.—Istir 9:19-22, 27-32; 10:2, 3.
it-1 1267 fiedac 2 fatac
Purim
O Araaw Nora Pisalisinan. O sowal no romaroma mikakingkiway pakayni tonini Purim a lisin, o kaacangan no aniniay Yutaya tamdaw, cowa ko pakayniay ino Kawasan, nolatek kasimelangan ko demak nangra itiya sanay, kawra cowa ka mahaen i saˈayaw. Ci Mortikay aci Istir o midokoay to Kawas ci Yihofaan a tamdaw, o sapaˈdilaw Cingranan konini. O sakalidong no Yutaya itiya o nano ˈicel ni Yihofa, samanen o pakayniay noka madimadi ni Mortikay ci Yihofaan. Ci Haman o Amalik tamdaw alatek, mipaˈkakan ni Yihofa to papalaˈafoen kora kitakit. Misakaretengay ci Mortikay to limoˈot no Kawas, eca ka kahi a mitaˈong ci Hamanan. (Istir 3:2, 5; Kasadakan 17:14-16) Roma i, o nano sowal ni Mortikay ci Istiran (Istir 4:14) Paihkalay to misaaliay cingra to pipadama no Kawas paˈorip to Yutaya tamdaw, ya tatayra miˈaraw ci Istir to hongti mitahidang to sapatahka ningra i, misaliwayay cingra to tolo a romiˈad, mahapinangay to micangacangay to sapadama no Kawas cingra.—Istir 4:16.
cl 101-102 fiedac 12-13 fatac
“Todongen ko Kawas” Misaka Dademak to ˈIcel
12 Minilnilan ni Yihofa ko kantok a mikerid to kasakopang no Krisciyang. (Hipray 13:17) Onini citatodongay a faˈinayan salikaka, mamisaka dademak to sapafeli no Kawas a fadangalan a midama to salikaka, padama cangranan miingid ci Yihofaan. O malohemay malitengay ngangaˈay a misatadimaamaan i kasakopang han? Mana ngaˈay saw! O mamisapoener ko malohemay malitengay, cacipinang to pihalamham ni Yihofa cangranan to sasamaan micada to salikaka. (1 Pitiro 5:2, 3) Palimoˈotay to kantok ko Fangcalay Cudad papipakaen to ‘nano micakayan no remes no Wawa a kasakopang.’ (Dmak 20:28) Mihaenay haw i, o kantok mamisalimla a midipot to kahacecay a siri.
13 Patinakoen ita a somowal. O cecay ngaˈayay widang iso patorodan kiso papisimaw to cecay kalimlaan a dafong. Ano mafanaˈay kiso to matekesay ko sapiˈaca ningra tonini dafong, maedeng mamisakareteng kiso tora dafong a misimaw. Patorodan no Kawas ko malohemay malitengay to tada masakalimlaan a hafay: O kasakopang kora hafay. O siri hananay no Fangcalay Cudad patinako ko salikaka. (Yohani 21:16, 17) Itini pinengneng ni Yihofa, tada o masakalimlaan ko siri Ningra. Toha sapicakayaw cangranan tano remesan no Wawa ningra a micakay, awaay ko maanan to mikikakaay tonini a sapaˈaca. O misapoeneray a malohemay malitengay o haharatengen konini, misongilaˈ a misimaw to siri.
Odoˈ no Sinael
w06 3/1 11 fiedac 4 fatac
Kalimlaan no Istir Cudad
9:10, 15, 16—Soˈliˈlin palimoˈotan no hongti ko Yutaya tamdaw to ngangaˈay miˈafas to dafong no ˈada, hano eca ka kahi a miˈafas cangra hani? Eca ka kahi cangra, samanen o araaw nangra o sapilidongaw to ˈorip, cowa ko pakayniay i sakacihafayaw.
SAKA 10 FOLAD 2-8 ROMIˈAD
O ODOˈ KO KIMAD NO KAWAS | YOPU 1-3
“Padadotoc Tano Waywayan Misawacay to Olah Iso ci Yihofaan”
Todongen ci Nowa, Taniil aci Yopu, Paihekal to Pasoˈlinay Falocoˈ ato Midoedoay
16 O masiˈayaway ni Yopu a sapalifet: Taˈangayay ko kafalic no kaˈorip ni Yopu, na rihadayay cingra, na tahalifaay to madadotocay a pades. ˈAyaw no mifekad ko pades, ci Yopu ‘itini kakawalian a tamdaw . . . O sakakaay cingra.’ (Yopu 1:3) Cihafayay ko lomaˈ ni Yopu, ato cinganganay cingra, hanaca o tada kangodoan no tamdaw cingra. (Yopu 29:7-16) Kawraan, cowa pisatakaraw cingra a misawad to Kawas. Soˈlinay i, panganganan ni Yihofa ci Yopu to ‘sikawdan ako,’ halo pasowal cingranan ‘o moecelay ko demak, mangodoay to Kawas, miliyasay to tatiihay a demak,’ sanay.—Yopu 1:8.
17 Itini kamotoˈay a toki taˈangayay ko kafalic no kaˈorip ni Yopu. Misiˈayaw to pakidemay nikaw ato adada cingra, oniya kihecod oyaan pakokotay a Satan ko palaˈosiay. Makaniway ci Satan a mikokot ci Yopuan, o pakayniay sakangaˈay no niyah ko pidoko ningra to Kawas sanay. (ˈOsien ko Yopu 1:9, 10.) Kawra, mihayian ni Yihofa ci Satan mihadak to sakokot, ho ira ko toki ni Yopu misawacay to kamadimadi no niyah, paihekal to pidoko no niyah o matatodongay a harateng cowa ko misatekeday ko araaw.
Ka Pitafo to Marocekay a Madimadi!
10 O sapakokot ni Satan, samaanay ko pilingat tisowanan hani? Cisasaay ci Satan, cowa ko soˈlinay a maolah ci Yihofa tisowanan, somowalayho cingra, wa mipiliˈ kiso milidong to ˈorip no niyah, eca ka pidoko to Kawas, cowa ko mamadimadi kiso ci Yihofaan sanay! (Yopu 2:4, 5; Paˈarawan 12:10) Mihaen a pakokot ci Satan tisowanan, mamasomad kiso hokira? Haratengen hena: Pakasoˈlinay ci Yihofa tisowanan, mansa mihai papilifet ci Satan tisowanan, ngaˈayay paihkal kiso to marocekay a madimadi, ngaˈay misawacay to mararaway ci Satan. Mikiˈokayho ci Yihofa papadama tisowanan mitafo to madimadi. (Hipray 13:6) O satadamaanay a Tatapangan pakasoˈlin tisowanan, tada o kalikoanto! Nohatini mafanaˈayto kiso hano masakalimlaan ko marocekay a madimadi han? Ano marocekay a madimadi kita to Kawas, wa ngaˈay milowid to saeko ni Satan, ngaˈayho midipot to fangcalay ngangan no Wama, halo midopo to sapikowan Ningra. Ano o kalimlaan ko marocekay a madimadi, sasamaan kita a mitafo hani?
Odoˈ no Sinael
O Sowal ni Yis i ˈAyaw no Mapatay Iraay ko Tatodong
9 O maanan ko sowal ni Yis? ˈAyaw no mapatay ci Yis taˈangayay ko piowaw a somowal: ‘Kawas ako, Kawas ako, hano liyasen Iso kako?’ (Matay 27:46) Cowa pitadtad ko Fangcalay Cudad hano mihaen ko sowal ni Yis, kawra oniya sowal mitadtaday to pina demak. Salakat, mihaen ko sowal ni Yis, matatodongay ko sapairasol no ˈOlic 22:1. Saka tosa, mitadtaday koniya sowal cowa ka ‘pisangaˈ to ˈadipel’ ci Yihofa itiya midipot to Wawa ningra. (Yopu 1:10) Mafanaˈay ci Yis, masongilaˈay no kakarayan Wama paiken i kamay no ˈada cingra, ho masongilaˈ cingra a mapalifet, o hatiniay sapalifet awaayho ko tahalifaay a tamdaw. Roma i, paihkalay ko sowal ni Yis, o awaay ko raraw ningra, cowa ko papatayen.
SAKA 10 FOLAD 9-15 ROMIˈAD
O ODOˈ KO KIMAD NO KAWAS | YOPU 4-5
“Sinanoten ko Mioratay to Tamdaw a Lihaf”
it-2 890 fiedac
Ilifac
2. O cecay a widang ni Yopu cingra. (Yopu 2:11) O Timan a tamdaw, alatek o teloc ni Ilifac (nengnengen ko saka 1), o teloteloc ni Apraham, maraayay a salawina ni Yopu. Ci Ilifac ato teloteloc ningra malikoay to o citanengay a tamdaw. (Yirimiya 49:7) Ilaloma noya tatolo tayraay ‘mihinom’ cingranan a widang, ci Ilifac o saˈakawangay ko saaroˈan, latek makakaay ko mihecaan. Itira tora kinatolo a macacoli,o cingra ko saˈaayaw a pasowal, koedaway ko sowal.
w05 9/15 26 fiedac 2 fatac
Coˈayen ko Mararaway Harateng!
Maharatengay ni Ilifac ko cecay kafahkaˈan a nalifetan, sanay cingra: “Fiyok sa ko fali to pising ako, saka crnoh sa ko safanohan ako. Maˈaraw ako ko faco no maan i kaˈayaw ako, nikawrira, caay ka hapinang ako ano o maan korira. Itiya i, matengil ako ko ngihaˈ nai awaay ko adeses, sowa sa.” (Yopu 4:15.16) O manan noˈadingoan tireng ko mifiyoray ci Ilifacan hani? Ora dotoc a milokesay a sowal ningra, paihkalay cowa ko ngaˈayay coyoh no Kawas kora. (Yopu 4:17, 18) O tatiihay coyoh kora. Mankora, rikecen ni Yihofa ci Ilifac atoya tatosa a widang ningra to misamangahay cangra. (Yopu 42:7) Hayi, mafiyoray no tatiihay coyoh ko piharateng ni Ilifac. O sowal ningra cowa kono Kawas a piharateng.
w10 2/15 19 fiedac 5-6 fatac
Coˈayen ko Sasingting ni Satan
Pakaynian ci Ilifacan, misahalakaay ci Satan misawacay to o tadancaay ko tamdaw. Ci Ilifac ko sakatatolo a widang to tayraay milisoˈ ci Yopuan. Sanay pasowal ci Yopuan pakayni to tamdaw ‘o sera ko paranaan no lomaˈ’ nangra ‘malecaday to fao a maripaˈ mafonalay a tamdaw. Maˈorip ko tamdaw to dafak, dadaya mapatayto, midaˈocay cingra a matekop, awaay ko mikiharay a tamdaw.’—Yopu 4:19, 20.
“O sera a koreng” hananay no Fangcalay Cudad patatinako kita, madoloay a maˈali. (2 Korinto 4:7) O malonayay kita, samanen o ciraraway tamadaw, cowa ka lefot ko falocoˈ ato tireng. (Loma 5:12) Ano kita aca ko tatiˈeren, cowa ko papakacoˈay ci Satanan. Kawra, cowa ko cecayay aca ko Krisciyang. Soˈliˈlin iraay ko dangoc ita, kawra o kalimlaan sanay minengneng ci Yihofa. (Isaya 43:4) Pafelian ni Yihofa to fangcalay saocor koya milongocay i Cingranan a tamdaw. (Luka 11:13) Ano tiˈeren ita ko fangcalay saocor, ngangaˈayto ira ko ‘tadamaanay a ˈicel’, micoˈay to sakayhid ni Satan. (2 Korinto 4:7; Filipi 4:13) Ano seteken ita ko falocoˈ micoˈay ci Akomaan, ‘tanektek ko falocoˈ’ i, papaˈicelen no Kawas kita. (1 Pitiro 5:8-10) Mankora, aka matalaw kita ci Akoma Satanan.
mrt 32 fedengan 13-17 fatac
Sasamaan Pafafidaˈ to Makaniway Lihaf
● Sinanoten ko Lalangian Nora Lihaf ato Lalakaw Nira
Sanay ko sowal no Fangcalay Cudad: ‘Hapinaneng a mipalita ko masamaamaanay.’—1 Tisalonika 5:21.
Soˈlinto matenakay ko maanan a sinfong, aka kahnay a pakasoˈlinen anca paladaˈ to tao, saˈayawen a mihapinang to soˈlinay ha makaniway ha. Sasamaan ko pidemak hani?
Nengnengen to ngaˈayay tiˈeren kora lihaf hokira. O misasinfongay latek pakayniay i sakaciepoaw caka pisasoˈlin a mifanaˈ. Palalinien to roma a misasinfongay to samaanay ko sowal nangra. Latekay o naitiniay i widang kora mararaway a sinfong. Ano mahapinangayto iso o soˈlinay ngaˈ pakasoˈlinen.
Hapinangen kora lalakaw o safaelohay ato matatodongay. Iraay matilid ko romiˈad, ngaˈayay roroden a demak, adihayay ko wacay to ngaˈayay pakasoˈlinen han? Ano kasimaan sanay anca pakidemay ko sowal i, sinanoten a minaˈon.
Odoˈ no Sinael
w03 5/15 22 fiedac 5-6 fatac
Ka Fanekfek, Misaˈicel a Milifok to Sakaˈoripaw
Itiniay i paro no kakarayan a kasacefang a Krisciyang makakedecay a midoko to Kawas cangra, papatanektek to nika pakasoˈlin ita. Itini i lalomaˈ nonini masasiolahay, matenakay i paro no kakarayan a masacefangay a salikaka tada o karahekeran! (1 Pitiro 2:17) Ano kitato ngangaˈay patanektek to pasoˈlinay falocoˈ no tao.
Haratengen hena, oya moecelay tamdaw ci Yopu samaanay padama to tamdaw. Ci Ilifac cowa ka tada maolah ci Yopuan, kawra pakayni to waywayan ni Yopu, mihayay cingra: “O sowal iso ko paˈicelay to sakatoloˈananay a tamdaw, saka, mapakiemel ko rarimaay ko toros a tamdaw.” (Yopu 4:4) Samaanen ita mitodong ci Yopu hani? Kita kahacecay tamdaw iraay ko ˈinorong mipadang to salikaka, mikowad cangranan mitawmec to soˈlinay kimad. Ano kalacafay kita cangranan i, tooren ita ko sapalimoˈot no Fangcalay Cudad: ‘Paˈicelen ko kamay no rarimaay a tamdaw, patanoktoken ko mamirmiray a toros.’ (Isaya 35:3) Patirengen ko patosokan, itini i kahacecay a saˈopo pakalaloken a paˈicel ko cecay tosa a salikaka. (Hipray 10:24, 25) Mikifalocoˈay a sowal pakahemek ato miakoˈid cangranan, to nika padadotoc nangra misaˈicel a pahemek ci Yihofaan, mamikowad cangranan a fanekfek a misaˈicel a milifok to sakaˈoripaw.
SAKA 10 FOLAD 16-22 ROMIˈAD
O ODOˈ KO KIMAD NO KAWAS | YOPU 6-7
“Ano ‘Cowato ko Papakafiro Kako’ sa Kiso i”
w06 3/15 14 fiedac 9 fatac
Kalimlaan no Yopu Cudad
7:1; 14:14—O manan ko tatodong no ‘mala koliay a romiˈad’ sanay hani? Tada pakidemay a marorayen ko ˈorip ni Yopu, mansa miharateng cingra malecaday o mala koliay a marorayen saan. Soˈlinay haw i, nisowalan itini Yopu 10:17 a ‘pades’ sanay, ngaˈayay hongyaken ‘misakoliay’ saan. Roma sa i, mapatay ko tamdaw mahecaday o ‘maledaˈay ko fotiˈ’, hakowa ko kahalafin a ‘maledaˈ ko fotiˈ’ no mapatayay, cowa ko cingra ko mamisaˈosi, mahaen o tawki ko mamisaˈosi to hakowa ko kakoedaw no malakoliay, mankora, patinakoan ni Yopu ko malakoliay a romiˈad ko patay to ‘maledaˈay ko fotiˈ’.
‘Milidongan ni Yihofa ko Matoleday a Tamdaw’
NOLATEKAY, maharateng ita ko ˈorip no niyah kamotoˈay, hanaca “matomesay ko cariraw,” matoleday ko falocoˈ. (Yopu 14:1) Itini nolitengan, o madimadiay sikawdan ni Yihofa iraay ko mahaenay a harateng, o roma tamdaw sakapatayaw sanay. (1 Hongti 19:2-4; Yopu 3:1-3, 11; 7:15, 16) Kawra, oya mitiˈeran nangra a Kawas ci Yihofa saliyaliyaw sanay pakalalok cangranan, padama cangranan tanoktok. O tinakoan nangra matiliday i Fangcalay Cudad, sahto o sapasifanaˈ kitaanan, pafeli kitanan to sahinom.—Loma 15:4.
g 1/12 16-17 fiedac
Ano Sapikanisoˈotaw Kiso
Latek tada pakidemay ko nika roray nokaˈorip ako saan kiso. Kawra aka mapawan, cowa ko kiso aca iraay ko mahaenay a harateng. Ka adayayan i, anini ˈalomanay tamdaw tahasiˈayaway to maanan a pades. Sowal no Fangcalay Cudad: “Tahanini a tomangic a maemin ko masangaˈay a maamaan matiya o maˈatˈatay a misemsem.” (Loma 8:22) Soˈliˈlin hato awaay ko pakayraan a misaysay to pasangar iso, kawra mataˈlifto ko toki i, hato idahiyayto, to miming. Nohatini i, sasamaan kiso a midemak hani?
Pasowalen ko cecay matenesay ngaˈayay tiˈeren a widang. Sowal no Fangcalay Cudad: “Marariday a masasiolaolah ko malawidangay, o mamipadang a miharateng to pades ko salikaka no tireng.” (Taneng 17:17) Masowalay no Fangcalay Cudad ci Yopu o moecelay a tamdaw, tahalifaay cingra to adihayay a pades, miememay a misemsem, kawra makahiay cingra pasayra i tao a mifowah to falocoˈ. Sanay ko sowal ningra, ‘tiya manaˈayen kako to ˈorip ako i, fowahen ako ko cariraw no mako, somowal to roray no falocoˈ’. (Yopu 10:1) Ano fowahen iso ko falocoˈ, latek mamilowan to roray iso, hanaca ira sato ko masasiromaay noka pinengneng iso tora pasangar.
Itini satolon fowahen ko falocoˈ iso i Kawas. O roma tamdaw miharateng to mitolonay hananay, ono falocoˈan aca noka pitiˈer, awaay ko maanan a epoc sanay, kawra cowa ka pihaen ko sowal no Fangcalay Cudad. Tinakoen, ˈOlic 65:2 ‘o mitengilay to satolon a Tapang’ ci Yihofa Kawas sanay, itini i 1 Pitiro 5:7 somowalay to ciharatengay ko Kawas tisowanan sanay. Mitiˈer kita to Kawas tada masakalimlaan, patalahkalay ko adihayay a sinael, ini ko pina ilaeno:
‘Sarocoden ko falocoˈ a mitiˈer ci Yihofaan, aka pitiˈer to fanaˈ no niyah. I masamaamaanay a demak iso i, samacayen a sinanoten ko pinengneng Ningra, pamoecelen Ningra ko lalan iso.’—TANENG 3:5, 6.
‘Palahecien Ningra ko longoc no maolahay a mangodo i Cingranan a tamdaw, tengilen Ningra ko piowaw nangra, paˈoripen Ningra cangra.’—ˈOLIC 145:19.
‘Ano doedoen ita ko araaw no Kawas a milongoc i, ano o maananto, o tatengilen Ningra, oninian ko nika pakasoˈlin no falocoˈ i Cingranan.’—1 YOHANI 5:14.
‘Miraayay ci Yihofa to tatiihay tamdaw, kawra mitengilay to satolon no moecelay tamdaw.’—TANENG 15:29.
Ano pasowalen iso to pasangar iso ko Kawas i, o papadamaen Ningra kiso. Mankora, pakalalokay ko Fangcalay Cudad ‘mararid a mitiˈer Cingranan, itini i kaˈayaw Ningra mifowah to falocoˈ’.—ˈOlic 62:8.
Odoˈ no Sinael
Mitengil, Cipinang, Paihkal to Siniˈadaay Falocoˈ
10 Ngaˈay kita minanam ci Yihofaan, misarocod a cipinang to salikaka. Ngaˈayay malacafay cangraanan mitosil, ˈayaw ato ikor no saˈopo masasowal cangranan, anca tahidangen cangra a mitahka. Mihaen, wa mahapinang iso: Cecay fafahiyan salikaka maomoyay, ˈarawhan o mangodoay; Cecay faˈinayan salikaka maolahay to sinowayay, ˈarawhan makahiay a paladaˈ; Maosoyayto ko cecay lalomaˈan masaˈopo, ˈarawhan misafelitay ko salawina cangraanan. (Yopu 6:29) Manaokaniw, cowa kangaˈay kita ‘hina capid to demak.’ (1 Timoti 5:13) Kawra ano cipinang kita to salikaka ato malifaay nangra, wa matongal ko kasiniˈada cangraanan.
SAKA 10 FOLAD 23-29 ROMIˈAD
O ODOˈ KO KIMAD NO KAWAS | YOPU 8-10
“Madimadiay a Olah no Kawas Pakahapinangay to Tamdaw to Sapilipalaw ni Satan”
w15 7/1 12 fiedac 3 fatac
Ngangaˈay Kita Pakahemek to Kawas Han?
Ci Yopu tatootoor sanay ko pades ningra, mikikakaay ko nika adihay no pades to romaroma tamdaw. Ngaliwngiway cingra, miharateng to cowa ka pikihar ko Kawas to nika moecel ningra, to nika pakasoˈlin ningra. (Yopu 9:20-22) Samacay sanay cingra to sapisawacayaw to nika moecel ningra, itini pinengneng no tao, mikakakaay kako to Kawas a moecel hato sanay.—Yopu 32:1, 2; 35:1, 2.
O Madimadiay a Olah ni Yihofa Pakayni Tisowanan Taˈangayay ko Epoc
14 O madimadiay a olah no Kawas midipotay kitaanan. Sanay ko satolon ni Tafiti ci Yihofaan: ‘O pilimekan ako Kiso, tahapades kako, dadipoten Iso kako. Milekalan Iso ko sakalidong a ngiha i taliyok ako . . . . O mitadiˈecay ci Yihofaan a tamdaw iraay ko madimadiay a olah i taliyok nangra.’ (ˈOlic 32:7, 10) I nolitengan, mitaliyokay to niyaroˈ a lowil midipotay to lalomaˈay no niyaroˈ a finawlan caka madokaˈ no ˈada. Malecaday, o madimadiay a olah ni Yihofa masongilaˈay ko pidipot kitaanan, eca ka mapalak no tamdaw anca o demak ko kalawidang ita Cingranan. Iraay ko madimadiay olah ni Yihofa i kitaanan, mansa misolot Cingra kitaanan, ngaˈay kita materek i tatihi Ningra.—Yirimiya 31:3.
Odoˈ no Sinael
w10-CH 10/15 6-7 fiedac 19-20 fatac
Cima ko Mamafanaˈ to Harateng ni Yihofa?
19 Pakayni to ‘harateng ni Yihofa’ mamananam ita ko maanan a epoc hani? Misaaliay kita to Kimad no Kawas a padama kitanan mafanaˈ to harateng ni Yihofa, cowa tano pantaay a pinengneng no niyah, cowa ka lefot a palinian ato harateng no niyah a misaˈosi ci Yihofaan. Sowal ni Yopu: ‘O Kawas cowa ka matira takowanan o tamdaw, ngaˈayay pacaˈofen Cingra, ngaˈayay saka cacolien Cingra.’ (Yopu 9:32) Ano palidlid sato kita mafanaˈ to harateng ni Yihofa, o mamatira ci Yopuan a masemer ko sowal: “Nikawrira, o samimingay a ˈicel no Kawas konini, caay ka hakowa ko matengilay ita. Cima ko mamaedeng a mitaˈesel a mihapinang to nika tadamaan no ˈicel no Kawas saw?”—Yopu 26:14.
20 Ano maasip ita i Fangcalay Cudad ko cowa ka ihkal a maˈoningay, awaay ko pinang to harateng ni Yihofa. Sasamaan ko demak hani? Ano misinanotayto kiso mikingkiw ikor, caayho ka hela ko caˈof i, o sapalifet konini to hakowaay ko pitiˈer ita ci Yihofaan. Cowa ko mamasaheci ita a mafanaˈ to demak Ningra han misapoener ko falocoˈ. (Patnakay 11:5) Mamihayi kita tonini nano sowal ni Pawlo: Wata, tada tangongol ko sidaˈit, taneng, sifanaˈ no Kawas! Cowa ka mataˈesel ko pisawkit Ningra! Cowa ko mamarorod ko lalan Ningra! Cima ko cipinangay to harateng ni Yihofa saw? Cima ko malo talicayan Ningra saw? Cima ko pacaliway i Cingranan, to papatikoen Ningra saw? Tona o naitiraay Cingranan a ira ko kihcod, pakayraay i Cingranan ko sakaira, materek saki Cingranan. Nanay midaˈoc a minokay i Cingranan ko ˈodingar. Amin.’—Loma 11:33-36.
SAKA 10 FOLAD 30–11 FOLAD 5 ROMIˈAD
O ODOˈ KO KIMAD NO KAWAS | YOPU 11-12
“Saka Citanengaw Ciepoc Iso a Tolo a Pakayraan”
w09 4/15 6 fiedac 17 fatac
Pakahemekay ci Yopu to Ngangan ni Yihofa
17 Misamaanay hano mitawmec ci Yopu to madimadi hani? Mahapinangay ita, ˈayawho no tahapades cingra, iraayto ko makakedecay kalalaˈed ningra aci Yihofa. Awaay ko maamaan a wacayan to mafanaˈay ci Yopu to pisalalicay ni Satan ci Yihofaan. Ano masamaamaanayto, misetekayto ci Yopu to falocoˈ a madimadi to Kawas. Sanay cingra: ‘Taha patay kako cowa ko mamisawad kako a madimadi!’ (Yopu 27:5) Hano mahaen ko kakedec noka lalaed ningra ato Kawas hani? Latek maedeng matengilay ningra nai salawina ci Aprahaman, Isak aci Yakopan to sidaˈitan ni Yihofa cangra a micada. O roma i, mikitiniay i pisolap to masangaˈay a maamaan a mahapinang ko capeling ni Yihofa.—ˈOsien ko Yopu 12:7-9, 13, 16.
Iraay ci Yihofa Itatihi, Caay ko Mamatoˈol Kiso
10 Patireng to kalawidang to madimadiay a salikaka. Malawidang to ngaˈayay nanamen iso a salikaka i kasakopang, soˈlin cowa ka hecad to mihecaan iso ato lalengawan nangra, kamayan ngaˈay kiso malawidang cangranan. Sowal no Fangcalay Cudad, o “matoˈasay a tamdaw” iraay ko taneng. (Yopu 12:12) Roma i, o matoˈasay a tamdaw wa ngaˈay mikitini i madimadiay ci Yihofaan a kaemangay Krisciyang minanam to adihayay. Ikakaay ko mihecaan ni Yonatan ci Tafitian, kawra kamayan mala ngaˈayay a widang cangra. (1 Samuil 18:1) Soˈlin tahalifa cangra to adihayay a pasangaray, kawra madadamaay cangra, malacafay midoko ci Yihofaan. (1 Samuil 23:16-18) Cecayay aca ci Ilina o Misawacayay Tamdaw ni Yihofa i paro no lomaˈ, sanay cingra: “O kasakopangay a tamdaw malecaday o wama wina ato salikaka ita, pakaynian ni Yihofa cangranan a midimokos kitaanan.”
11 Micawmaˈ to faelohay widang cowa ko madoloay no latek, mangalef ano kalingodoay ko pinangan ita. O hinangodoay ko pinangan fafahiyan salikaka ci Latena soˈlin micadaay to pisafelit, kamayanho micada to soˈlinay kimad. Sanay cingra: “Ikor mahapinangay ako ano awaay ko sapadama no salikaka cowa ko mamalaˈosi.” Pasowal to nafalocoˈan no niyah i tawanan cowa ko madoloay, kawra mikifalocoˈ a masasowal o taˈeneran no ngaˈayay kalawidang. Makalimay ko salikaka pakalalok ato padama tisowanan, kawra cacipinang cangra to saali iso ngaˈ ngaˈay cangra padama.
12 Malacafay to salikaka mitosil o ngaˈayay pakayraan patireng to kalawidang. Masowalay i fafekang ci Kaloe sanay: “Malacafayay kako to ˈalomanay salikaka mitosil ato midokoay a demak, telocto malo ngaˈayayto a widang. Toniya pina miheca, padadotocay ci Yihofa pakayni i ngaˈayay widang padama takowanan.” Malacafay to madimadiay a widang tada ciepocay. Pakaynian ni Yihofa i ngaˈayay widang padama tisowanan miremo to mafasaway a harateng, tinakoen o matoˈolay a harateng.—Taneng 17:17.
it-2 1173 fiedac 2 fatac
Taneng
Taneng no Kawas. Edengan ci Yihofa ko sakakaay a citanengay a Kawas sato maan ko Fangcalay Cudad. (Loma 16:27; Paˈarawan 7:12) Tatodong no iraay ko fanaˈ sanay i, o mafanaˈay to kihcod a demak, tona o misangaˈay a Tatapangan ci Yihofa, “o Kawasto Cingra nai ti:yaho tangasa i daˈoc.” (ˈOlic 90:1, 2) Mafanaˈay Cingra to kihcod no dohaw, ato likisi nira tahanini. O micekiwan ato misangaˈan no tamdaw misalalangiay to safalod no serayan, ano awaay ko nisangaˈan no Kawas a kihcod, aawa ko pakayraan no tamdaw, aawa ko pisalalangian no tamdaw a misaangaˈ to maamaan. (Yopu 38:34-38; ˈOlic 104:24; Taneng 3:19; Yirimiya 10:12, 13) Pakayni to sakafanekfekaw, matatodong ko pisaˈosi ato malaˈosi ko nokaˈorip, tada masakalimlaan ko palinian ni Yihofa. (Limoˈot 32:4-6; nengnengen ko YIHOFA [o palinian no waywayan a Kawas].) Awaay ko maamaan to caay ka fana’ ci Yihofa. (Isaya 40:13, 14) Soˈliˈlin latekay pasalatan Ningra ko misafelitay to palinian Ningra a demak, kawra maˈimeray Ningra ko kihcod, lalahecien Ningra ko araaw no Niyah, palaˈosi to nisowalan Ningra.—Isaya 55:8-11; 46:9-11.
Odoˈ no Sinael
w08 8/1 11 fiedac 5 fatac
Sacaciyawen ko Kapah a Wawa to Faˈinayan ato Fafahiyan
▪ ‘Mahapinangay ako ko tatodong nora sowal han?’ Sanay ko Yopu 12:11: ‘Mato pitanam no sema to ˈaredet no kakaenen, mihapinang a mitengil to sowal ko tangila.’ O mahaenay ko mihecaan a wawa mamangalef kiso midohinga to sowal nangra. Latekay pakidemay ko sowal no wawa. Tinakoen, latek wa saan ko wawa pasowal: “Sano o miming:ayho wawa sanay minengneng kiso takowanan”, anoca “co:wa pitengil kiso to sowal ako!” Hamaan pacolien cangra, hapinangen kora sowal no wawa, latek cowa ka hatira ko falocoˈ nangra. Tinakoen, “sano o mimingayho wawa sanay minengneng kiso takowanan”, tatodong nora sowal, “cowa pakasoˈlin kiso i takowanan”; “cowa pitengil kiso to sowal ako,” tatodong nora sowal, “sapipasowalaw kako to harateng ako.” Mihaenay haw i, dohingaen ko tatodong no sowal no wawa.