SAKA 58 FEDENGAN
Tahadaˈocen a Madimadi ci Yihofa
O soˈlinay a Krisciyang cowa papiconged ko tamdaw ato demak, micoˈay to niyah midoko ci Yihofaan, mahaenay ko harateng iso. Manonoˈay ci Yihofa tisowanan misarocod a maolah madimadi i Cingraanan. (ˈOsien ko 1 Rayray 28:9.) Itini masamaanay a pakayraan iso, cowa ka dolo a madimadi ci Yihofaan hani? Sasamaan kiso ngaˈ padadotoc madimadi ci Yihofaan hani?
1. Alatek wa samaan ko roma tamdaw mifiyor tisowanan, ecato ka madimadi ci Yihofaan?
O cima ko tano tatiihay a harateng micoˈay kitaanan midoko ci Yihofaan hani? O cecay i, oya misafelitay to kimad a tamdaw. Cowa ko piliyas aca nangra to kimad, mipakaditayho to likakawa no Kawas, sapipalakaw to pakasoˈlinay falocoˈ ita. O roma i, oya kakeridan no pidoyongan palosiyangay to makaniway a lihaf, pakadit to likakawa ita, ho papiliyas kitanan to soˈlinay a kimad. Ano sapicoliaw kita cangraanan a minengnengho to lalakaw, cudad, wangcan ato ika nangra i, wa madolo a makefon i katalawan. Misaˈicelay cangra sapicongedaw to tamdaw midoko ci Yihofaan. Mahaenay a tamdaw, sowal ni Yis: ‘Pakiyadi han cangra. O mapohaway a mikeriday cangra. Ano mapohaway mikerid to mapohaway, wa matefad i kefong tatosa.’—Matay 15:14.
2. Ano madimadi kita ci Yihofaan i, wa misamaan ko saˈosi?
Ano maolah kita ci Yihofaan i, wa miliyas to milingatay to mararaway a pidoyongan a demak. Itini i katayalan, i kaˈorip a demak ato mirienang to masakapotay no tamdaw, cowa ka ngaˈay micapid to mararaway a pidoyongan. Mirikecan ni Yihofa kita: ‘Finawlan Ako . . . kasadak nai lalomaˈ [no Taˈangayay Papilon]!’—Paˈarawan 18:2, 4.
CALEPEN MIKADKAD
Dotoc mamananam iso: Samaan ko demak iso o madimadiay ci Yihofaan, ho eca ka mapalak no tao ko saˈosi iso hani? Sasamaan kiso masadak nai Taˈangayay Papilon, paihkal to madimadiay ko niyah ci Yihofaan hani?
3. Sinanoten ko makaniway a singsi
Ano matengil ita ko milikafay to likakawa ni Yihofa a sowal i, wa samaan ko harateng no mita hani? ˈOsien ko Taneng 14:15, ikor lengoen ko ilaenoay a salicay:
Misamaanay hano mamisinanot kita, aka pakasoˈlin han ko sowal a maemin?
ˈOsien ko 2 Yohani 9-11, ikor lengoen ko ilaenoay a salicay:
Sasamaan kita a minengneng to misafelitay to kimad a tamdaw?
Soˈliˈlin cowa ka malacafay macacawmaˈ kita to misafelitay to kimad a tamdaw, kawra ano cowa ka misinanot, itini i samaanay a pakayraan wa macapid ko mararaway harateng nangra hani?
Ano mararid kita a miˈosi to mipalakay to likakawa no Kawas a sasowalen i, haratengen hena, wa samaan ko pinengneng no Kawas hani?
4. Ka madimadi ci Yihofaan, aka pihimed to mararaway a tamdaw
Ano mafanaˈ kita to pakidemay ko raraw no cecay salikaka, samaanto aki? Mikitini i sapafeli no Kawas to nolitengan Israil a rikec, mamananam ita ko maanan. ˈOsien ko Lifi 5:1.
Mahecad tonini a sinael, ano mafanaˈay kita to pakidemay ko raraw no tamdaw i, fanaˈen ko malohemay malitengay to kafanaˈan iso. Kawra, ˈayaw noni, fanaˈenho cingra papikilimen to malohemay malitengay, pasowal to raraw no niyah. Onini o ciolahay a pakayraan. Ano caka picada cingra i, madimadien ita ci Yihofa, pasowalen ko malohemay malitengay to kafanaˈan ita. Mihaen ko demak ita, misamaanay paihkalay to madimadiay a olah to . . .
Kawas ci Yihofaan?
mararaway a tamdaw?
romaroma tamdaw no kasakopang?
Ano mafanaˈay to mararaway ko salikaka, padamaen cangra!
5. Kasadak nai Taˈangayay a Papilon
ˈOsien ko Luka 4:8 ato Paˈarawan 18:4, 5, ikor lengoen ko ilaenoay a salicay:
Ono mararawayho a pidoyongan a tamdaw kako han?
O masalalomaˈay no kalo a pidoyongan kako han?
O katayalan ako midamaay to mararaway a pidoyongan han?
Itini i kaˈorip pafafidaˈan no mako ato mararaway pidoyongan han?
I fafekangay a salicay, ano “hayi” sanay ko caˈof ako i, wa misamaan kako a misalof hani?
Itini i kalo a pakayraan, tano tingalaway a falocoˈ a misaˈosi, misawacay to madimadiay ci Yihofaan ko niyah.
Ano milikiyaho ko likakawa no roma pidoyongan i, samaanento iso ko demak hani?
ANO IRA KO SOMOWALAY: “Sakacipinangaw kako to misafelitay to kimad a tamdaw, samaanay ko sowal nangra to Misawacayay Tamdaw ni Yihofa, ano mihaen i, wa irato ko hasapacaˈof ako cangranan a midama to soˈlinay kimad,” sanay.
Matatodongay han? Misamaanay hani?
KALIMLAAN
Saka madimadiaw ci Yihofaan, laliyasen ita ko sapiorataw kitanan a tamdaw.
Lomalen
Hano cowa ka ngaˈay mitengil to sasowalen no misafelitay to kimad a tamdaw?
Ano mafanaˈayto kita to cecay salikaka midemakay to pakidemay a raraw i, samaanen ita ko demak hani?
Sasamaan ko demak ita, o mitengilayto to sapatalipaˈelal no Kawas, miliyas to mararaway a pidoyongan hani?
MALALITINGAY A LALAKAW
Ano palosiyangen no tao ko pakayniay i Misawacayay Tamdaw ni Yihofa a mararaway a lihaf, samaanen ita ko demak hani?
“Mafanaˈay Kiso Samaanay ko Soˈlinay Demak Han?” (Mikecolay, Saka 8 Folad 2018)
Samanen iso mihapinang to icowaay a likakawa anca demak o midamaay to Taˈangayay a Papilon hani?
“Itini Salikoray ˈAwaled Padadotoc a Misaˈicel!” (Mikecolay, Saka 10 Folad 2019, 16-18 fatac)
Misafelitay to kimad a tamdaw samaanay sapifasawaw to pakasoˈlinay falocoˈ ita to Kawas?
O cecay kakeridan no Sintokiyo a tamdaw hano miliyas a miketon to kalalaˈed no mararaway pidoyongan? Nengnengen ko “Kaemangho Kako Mikilimayto to Soˈlinay Kawas.”
“Minanam to Fangcalay Cudad a Mafalic ko Nokaˈorip” (Mikecolay, 2011/7/1)