Pinengnengan to Lalakaw noMitosilay ato Nikaˈorip Rayray no Saˈopo
© 2023 Watch Tower Bible and Tract Society of Pennsylvania
SAKA 11 FOLAD 6-12 ROMIˈAD
O ODOˈ KO KIMAD NO KAWAS | YOPU 13-14
“Mapatay ko Tamdaw i, Wa Patatikol Maˈorip Han?”
w99 10/15 3 fiedac 1-3 fatac
Miharatengay ko Tamdamdaw to Sakatoˈdawaw ko ˈOrip
ORA ifafekangay a sowal na itiniay i ˈayaw no 3,500 mihecaan a tiliden, somowalay to nika ˈapoto no ˈorip no tamdaw. Tahanini, awaay ko miliyangay tonini a sowal. Sahosaho rihaked ko kaˈorip i, malitengayto a mapatay sanay a miharateng ko tamdaw, tada katoledan a demak. Mankora nai litengho tahanini, icowacowaay a tamdaw ˈifowaay a mikilim to sapinayaraw to ˈorip.
Itini i lintad ni Yopu, pakasoˈlinay ko Icip a tamdaw, ano komaen to fotol no ˈaˈadopen i, ngangaˈay patikol a kaemang sanay, ˈarawhan o mangah aca kora. No kalitengan a misaekimay a tamdaw, mikingkiway to sakatoˈdaw no ˈorip a cemel. Ano sangaˈen ko ekim a kaysing, miparo to hemay ato dateng i, maminayar to ˈorip sanay. O mihakelongay to Taociyaw i nolitengan a Congko, pakaynien i pisimsim, saselaˈan, kakaenen ngangaˈayto a misafalic to lalomaˈ no tireng, salikor caayto ko mamapatay sanay.
Itini i Sipanya ci Hoan Ponci Telayang, o milaliwkoay a misolap cingra talacowacowa, cowa ka pisawad a mikilim to sakakaemang a nemnem. Isaka 18 hahekalan, iraay ko cecay ising itira tora mitilidan ningra a cudad Noka Patikol Maˈorip ni Hermipus, somowalay tora ilaenoay a hapakayraan: Itini i kacanglahan, rofoen mipalit ko romaroma limocedan i mimingay a rawang, sopeden miteli i talid ko saselaan nangra, ngaˈayay minayar to ˈorip kora sanay. Manaokaniw, cowa ka laˈosi.
w15 4/15 32 fiedac 1-2 fatac
Ano Maletek ko Kilang, Mamiliyaw a Cicengoˈ Han?
PALALINIEN to takaraway fidengalan kilang no Lipanon, oya makacaˈangay a Olif kilang, cowa ka tadamasamaan. Nikawrira, o Olif kilang itini i tatiihay a kitiraan, kodaˈitay a maˈorip. O masaˈosiay, latekay mitaˈlifay to 1,000 mihecaan ko ˈorip no romaroma Olif a kilang. O lamit no Olif kilang tada adihayay, mikodapolay i lalinik no sera, soˈlinto leteken ko tapangan nira, ngaˈayayho maˈorip. Ano caayho ka ˈicang ko lamit no Olif kilang, ngangaˈay a patikol a marengaw ko cengoˈ nira.
Ci Yopu oya kakitaan, pakasoˈlinay cingra soˈlinto mapatay cingra, ngangaˈayho patikol a maˈorip sanay. (Yopu 14:13-15) Tano kilangan ningra, alatek o Olif a kilang patatinako, somowal to pakasoˈlinay ko niyah to ciˈicelay ko Kawas patikol paˈorip cingranan. Sanay ci Yopu: ‘Ano kilangto soˈlin maletek, ngangaˈayho cicengoˈ a maˈorip.’ Ano maˈoradho i, tapangan no maˈicangayto a Olif kilang, kamayan miliyaw a maˈorip, ‘malengaw ko caˈang, matira o faelohay mipalomaan a kilang.’—Yopu 14:7-9.
w11 3/1 22 fiedac 5 fatac
‘Maˈilolay Kiso to Nisangaˈan no Miso’
Mikitira tora sowal ni Yopu mahapinangay ita, ci Yihofa tada iraay ko siniˈada. Mangalefay maolah to matiraay ci Yopu a tamdaw, patorodan ko niyah i kamay Ningra. Tona makahiay cingra micada to pifikel no Kawas, mangaˈayto cingra malo kalimlaan no Kawas a tamdaw. (Isaya 64:8) Tada misalimlaay ci Yihofa to madimadiay a sikawdan Ningra, soˈlinto mapatay cangra, ‘maˈilolay’ Cingra i cangranan. O cecay mikakingkiway tamdaw sanay ko sowal, ora ‘maˈilolay’ hananay no Hipray sowal, ‘o tada ciˈicelay a sowal, patalahkalay to ˈangongolay a noka ˈilol no falocoˈ.’ Hayi, cowa ka kifalocoˈen aca ni Yihofa, miharateng ko madimadiay a sikawdan Ningra, hinatalaayho halamham to sapatatikolaw a paˈorip cangranan.
Odoˈ no Sinael
it-1 613 fiedac
Alafoh; ˈAfo
Patatinakoan to ˈafo anca alafoh ko awaay ko epoc a demak. Tinakoen, ci Apraham itini i kaˈayaw ni Yihofa o tadancaay a tamdaw kako, sanay a miharateng, sowal sa: ‘O alafoh kako,’ sanay. (Satapangan 18:27; nengnengen ko Isaya 44:20; Yopu 30:19) Roma sa i, patatinakoan ni Yopu to ‘alafoh’ ko sowal noya mangahay a mihinom cingraanan a tamdaw.—Yopu 13:12.
SAKA 11 FOLAD 13-19 ROMIˈAD
O ODOˈ KO KIMAD NO KAWAS | YOPU 15-17
“Hamaan Pahecad ci Ilifacan ‘Mihinom’ to Tamdaw”
w05 9/15 26 fiedac 4-5 fatac
Coˈayen ko Mararaway a Piharateng!
Kina toloay ci Ilifac a pasowal, tada pakidemay ko nika tatiih ni Yihofa hato sanay ko sowal, ano hakowato ko kangaˈay no demak no sikawdan Ningra, cowa pakatoor to palinian Ningra sanay. ‘Cowa pakasoˈlin Cingra to sikawdan Ningra,’ sanay pasowal ci Ilifac ci Yopuan, ‘mipakokotay to coyoh Ningra to mararaway,’ sanay. (Yopu 4:18) Ikor somowalayho ci Ilifac pakayni to Kawasan: ‘Ano o fangcalayto a sikawdan cowa pakasoˈlinen Cingra; o kakarayan haca cowa ka korac sanay minengneng Cingra.’ (Yopu 15:15) Saan a milicay cingra: ‘Mahemekay ko Kawas to nika moecel iso han?’ (Yopu 22:3) Ci Piltat malecaday ko harateng, sanay cingra: ‘Itini i pinengneng Ningra, cowaho ka malikat ko folad, o foˈifoˈis cowaho ka makorac,’ sanay.—Yopu 25:5.
Oha cacoˈayen ita ko mahaenay a pinengneng. O mahaenay a pinengneng tada pakidemay ko saali no Kawas sanay a miharateng, o mamipalak to kalalaˈed ita aci Yihofa. Roma i, ano ira ko mahaenay a pinengneng ita i, ano marikec sato i, sasamaan ko falocoˈ hani? Cowa ito ko mamisapoener kita micada to sarikec, ao ‘miloloh ci Yihofaan’, ˈinteh ko falocoˈ i Cingranan. (Taneng 19:3) Tataˈangay ko nika palak noˈadingoan ita.
w15 2/15 9 fiedac 16 fatac
Todongen ci Yis Misapoener, Matomes ko Siniˈadaay Falocoˈ
16 Siniˈadaay a sowal. Ano siniˈada to tao i, ira ko harateng ita ‘sapihinomaw to matoleday a tamdaw.’ (1 Tisalonika 5:14) O maanan ko hasowal ita a mikowad to mahaenay tamdaw hani? Pasowal kita to pakalalokay a sowal ato kaciharateng i cangranan. Pakahemeken ita to fanekfekay a waywayan ato nika pisaˈicel nangra. Patalipaˈelalen ita o ci Yihofa ko misolotay cangranan pakakilim to kimad, mankora o kalimlaan no Kawas cangra. (Yohani 6:44) Pasowalen cangra to ˈangongolay ko kaciharateng no Kawas to ‘masomaday ko falocoˈ’ anca ‘matoleday ko harateng’ a sikawdan Ningra. (ˈOlic 34:18) O siniˈadaay a sasowalen ita mamiadah to falocoˈ no tamdaw.—Taneng 16:24.
Odoˈ no Sinael
w06 3/15 14 fiedac 10 fatac
Kalimlaan no Yopu Cudad
7:9, 10; 10:21; 16:22—Onini sowal ni Yopu patalahkalay to cowa pakasoˈlin cingra to patikolay maˈorip a tokel han? Somowalay cingra to aaira a noikoran ningra. O manan ko tatodong nora sowal ningra hani? Ano mapatay cingra i, cowato ko mamaˈaraw no selal cingra sanay kora tatodong alatek. Itini i pinengneng nangra, ano caho ka raod ko tatokian no Kawas i, cowa ko maminokay cingra i lomaˈ ningra. Ano mapatayto ko tamdaw i, cowa ko ngangaˈay tano ˈicel no niyah a miliyaw maˈorip. Soˈlinay haw i, ihkalay a somowal ko Yopu 14:13-15, pakasoˈlinay ci Yopu to papatikol maˈorip ko mapatayay a tamdaw ano ikor.
SAKA 11 FOLAD 20-26 ROMIˈAD
O ODOˈ KO KIMAD NO KAWAS | YOPU 18-19
“Aka Piliyas to Salikaka Ita”
Mikitini i Kacilosaˈ ni Yis Mananam Ita ko Manan Hani?
9 Ngaˈay kiso padama to malahdaway ko salawina a tamdaw. Ci Yis cowa ko kalacafay aca ci Martaan aci Mariyaan a tomangic, mihadidiayho a mitengil mihinom cangranan. O ngangaˈay kita mihaen a padama to malahdaway ko salawina a tamdaw. Itini Awtariya o cecay malohemay malitengay ci Taen, sanay cingra: “Ikor no mapatay ko fafahi i, tada misaaliay kako to sapadama no tao. Iraay ko papina mararamoday marariday mipalak to toki malacafay takowanan, ano hacowato a tatokian, makahiay cangra mitengil to sowal ako. Ano tada marawraw ko falocoˈ ako i, ngaˈay itini i kaˈayaw nangra tomangic, cowa ko mamangodo cangra. Pafeliay cangra takowanan to adihayay a sapadama, tinakoen, ano cowato kangaˈay kako misawsaw to tosiya, micakay to dafong anca mitangtang i, padamaay cangra takowanan midemak tonini a demak. O roma i, marariday cangra malacafay takowanan a mitolon. O soˈliˈlinay a widang ako cangra, o ‘malacafay misiˈayaw to pades’ a salikaka.”—Taneng 17:17.
Ano Miliyas ko Paro no Lomaˈ ci Yihofaan, Sasamaan Aki?
16 Ka padadotoc a midama to iraay ko mafalahay paro no lomaˈ a salikaka, mikikakaay ko pisaali nangra nohatini to kaciharateng ato pakalalok ita. (Hipray 10:24, 25) Latekay, miraayay ko kasakopang cangranan sanay ko hatiniay salikaka miharateng, hato malecaday o mafalahay cangra. Caay ka olah kita ira ko mahaenay harateng nangra! Mangalef koya mafalahay ko wama wina a kaemangay tamdaw, kakiriwiˈen ita pakalalok ato pakahemek cangranan. Tiya mafalah ko faˈinay ni Mariya i, miliyasayho to paro no lomaˈ, sanay cingra: “O roma widang tayniay i lomaˈ patado takowanan mitangtang, malacafayayho takowanan pasifanaˈ to wawa to Fangcalay Cudad. Palecaday cangra takowanan a masomad, kalacafay takowanan a tomangic. Ano ira ko miyakayakay to tatiihay sowal i, patadoay cangra takowanan a somowal, tada padamaay cangra takowanan miliyaw a talifak!”—Loma 12:13, 15.
w90 10/1 14 fiedac 20 fatac
Misaˈicelay Kiso Micangacang Han?
20 Mahapinangay no masacefangay a malohemay malitengay, soˈlin o malo kantokay anca padamaay sikawdan isaˈayaw, o niyahan harateng a misawad to ˈinorong no kasakopang. Ano cowa ko mafalahay cingra, maˈaraw no malohemay malitengay ko nika toled ningra, papadamaen nangra i noˈadingoan cingra. (1 Tisalonika 5:14) Papadamaen cingra mafanaˈ to limlaay ko salikaka i cingranan. Soˈliˈlin latek marikecay cingra, ano misapoeneray ato miakoˈiday ko falocoˈ ningra, alatek cowa ko hahalafin patikol a ngaˈay cingra mitamorong to ˈinorong saki kasakopang.
Odoˈ no Sinael
w94 10/1 32 fiedac
ˈIcel no Sidaˈitay a Sowal
Kawrira, tiya tahapades ci Yopu i, ci Ilifac ato widang ningra cowa ka tano sidaˈitay sowal a mihinom cingranan. Milolohay ci Yopuan to nika pades ningra, somowal to maedengay iraay ko maanan masimeday a raraw ni Yopu. (Yopu 4:8) Mitadtaday to Fangcalay Cudad sanay ko sowal: “O nisaalian ni Yopu o siniˈadaay falocoˈ no tamdaw. ˈArawhan ora macadaay ningra nao mipakokotay a sowal aca.” Mirawraway to falocoˈ ni Yopu hato lekal sato cingra pasowal: ‘Hano caayto paselaˈ kamo mipakararom i takowanan, saliyaliyaw sa a mipakaroray i takowanan?’—Yopu 19:2.
Mihaenay haw i, aka pacefaˈ ko sowal ita, milokes to tamdaw, hato papasayrato ko salikaka miowaw to sapadama no Kawas. (Nengnengen ko Limoˈot 24:15) O cecay taneng a sowal no Fangcalay Cudad, sanay palimoˈot kitanan: ‘O sowal iso ngangaˈay mitafo to ˈorip no tamdaw, ngangaˈay mipatay to tamdaw; ano saolatekay sa ko sowal iso i, kiso ko mamicada tora teloc.’—Taneng 18:21.
SAKA 11 FOLAD 27–12 FOLAD 3 ROMIˈAD
O ODOˈ KO KIMAD NO KAWAS | YOPU 20-21
“O Cihafayay Han a Tamdaw, O Cowa ko Moecelay Han?”
w07 8/1 29 fiedac 12 fatac
O Cihafayay Kiso Ikaˈayaw no Kawas Han?
12 Ora sowal ni Yis paihkalay, malo cihafayay ikaˈayaw no Kawas ato mitalingay to hafay no niyah, sanay a demak, masasiromaay konini. Tatodong nora sowal ni Yis i, cowa ko hamami taling kita to hafay, anca micangacang to sakalipahakaw ino dafongan aca. Nawhani sakadademaken ita ko toki, ˈicel ato hafay a patanektek to kalalaˈed ita aci Yihofa. Ano mihaen kita to demak i, o cacihafayto ikaˈayaw no Kawas. Misamaanay hano mahaen hani? Samanen mamalifok ita ko adihayay sapalemed no Kawas. Sanay ko Fangcalay Cudad: ‘O sapafeli ni Yihofa a sakalemed kadofahay, cowa ka pitongal to roray.’—Taneng 10:22.
Odoˈ no Sinael
w95 1/1 9 fiedac 19 fatac
Lowiden ci Satan ato Demak Ningra
19 O sikawdan no Kawas ci Yopu mamisiˈayaw to ‘mikalisangaay a harateng’, pakaynian ni Satan ci Ilifacan aci Cofaran a misadak. (Yopu 4:13-18; 20:2, 3) Mapasemsemay ci Yopu tora ‘mikalisangaay a harateng’, hato ‘pacefa sato ko sowal ningra’ to nika ˈcekok no falocoˈ. (Yopu 6:2-4; 30:15, 16) Telep sanay ci Ilihu a mitengil to sowal ni Yopu, padama cingranan mihapinang to citanengay a noka pinengneng ni Yihofa. Mahaenay anini, o malohemay malitengay cowa ka ciharateng to sapitongalaw to roray no tahapadesay a tamdaw. Malecaday cangra ci Ilihuan, mihadidi a mitengil to sowal nangra, tano kimad no Kawas a mihinom cangranan. (Yopu 33:1-3, 7; Yakop 5:13-15) Mihaenay i, o mafanaˈay miharateng a malohemay malitengay cowa ko mamitongal to ‘roray’ no tahapadesay a tamdaw, ao aitini cangra i kasakopang tahacada to sahinom.—Yopu 7:14; Yakop 4:7.
SAKA 12 FOLAD 4-10 ROMIˈAD
O ODOˈ KO KIMAD NO KAWAS | YOPU 22-24
“Wa Ngaˈay Sakadademaken no Kawas Kako Han?”
w05 9/15 27 fiedac 1-3 fatac
Ka Picoˈay to Mararaway Harateng!
Tada pakidemay ko Kawas mankora cowa pakomaan to tamdaw, sanay ko harateng no roma tamdaw. Tiya sakina tolo a sowal ni Ilifac, sanay milicay: ‘Iraay ko epoc no tamdaw i Kawasan han? O matanengay a tamdaw iraay ko epoc to Kawasan han?’ (Yopu 22:2) Itini pinengneng no Kawas, awaay ko epoc no tamdaw hato sanay ko sowal ni Ilifac. Mahaenay ko sowal ni Piltat: ‘Cima ko moecelay i kaˈayaw no Kawas saw? O kalo a tamdaw kita, mimaan makorac saw?’ (Yopu 25:4) Kitinien tonini a sowal, ci Yopu o kalo a tamdaw nanima moecel i kaˈayaw no Kawas saw?
Anini, romaroma tamdaw pakayni to awaay ko kapo no niyah, sanay a harateng a carirawen. Saka haen nangra latek pakayniay to nika lomahad nangra, maroeroay nokaˈorip, anoca masamsamay no tao. Kawra, ci Satan ato tatiihay coyoh ningra, maolahay a mipatalaw to tamdaw. Mafanaˈay ci Satan, ano iraho ko cowa ko mamatoor ako ko saali no Kawas, sanay a harateng i, madoloay a matoleden ko falocoˈ ningra. Oraanto i, palidlid saanto miliyas to Kawas a maˈalol.—Hipray 2:1; 3:12.
Ano malitengto ko mihecaan, caayto ka tanoktok ko tireng, marariday patoled to falocoˈ ita. Ano palalinien to kaemangho, caayto ka dangar ko adihayay demak. Nikawrira paiharatengen, ci Satan ato tatiihay coyoh ningra, papihaenay kitanan miharateng to awaay ko epoc no niyah i kaˈayaw no Kawas sanay, oha cacoˈayen ita ko matiniay a harateng.
w95 2/15 27 fiedac 6 fatac
Itini Pisalof to Pasangar Minanam to Sapasifanaˈ
Oya tatolo widang ni Yopu cowa paihkal to taneng no Kawas; ono tekedan a harateng nangra, tada patoleday to falocoˈ ni Yopu. ‘Cowa pakasoˈlin ko Kawas to sikawdan Ningra,’ saan ko sowal ni Ilifac, soˈlinto moecel ci Yopu, caay pakomaan ko Kawas sanay cingra. (Yopu 4:18; 22:2, 3) Tada mararaway kora! Mankora ikor, rikecen ni Yihofa ko pilokes ni Ilifac ato widang ningra. Sanay ci Yihofa: ‘Ora sowal namo pakayni i Takowanan, cowa ka tatodong.’ (Yopu 42:7) Kawra tada midokaˈay ci Yopuan a sowal i, caayho pasowal ci Ilifac.
w03 4/15 14-15 fiedac 10-12 fatac
O Kapah Tamdaw, Palipahaken ko Falocoˈ ni Yihofa
10 Paihkalay ko Fangcalay Cudad, cowa ko ci Yopu aca ko misalalicayan ni Satan, ao polongto a tamdaw ko misalalicayan ningra, mahawpay kiso, misalalicayay to nika madimadi iso. Pakayni to tamdaw sanay pasowal ci Satan ci Yihofaan; ‘Cecacecay a tamdaw [cowa ko ci Yopu aca], mamakahi mifalah to ˈorip saki Tisowanan han?’ (Yopu 2:4) Maˈaraway iso to iraay kono miso ˈinorong itini tonini a demak han? Mahaen o sowal i Taneng 27:11, pasowalay tisowanan o sangaˈayay a sapakaolah ci Yihofaan i, ho ngangaˈay pacaˈof Cingra toya milokesay a Satanan. Haratengen hena, mitahidangay koya Saˈakawanay a Tatapangan tisowanan, itini tonini lacongis midama Cingranan, tada o taˈangayay a ˈinorong konini. Ora saali ni Yihofa mamadangar iso han? Madangaray ni Yopu. (Yopu 2:9, 10) Madangaray ni Yis ato romaroma caay ka saˈosi ko kaˈaloman a tamdaw, mahawpay ko kaemangay tamdaw, madangaray nangra. (Filipi 2:8; Paˈarawan 6:9) Ngangaˈay madangar iso. Itini tonini demak, awaay ko misatenokay. Misawacayay ko waywayan iso, midamaay kiso ci Satanan ha, anoca midamaay kiso ci Yihofaan ha. O cima ko dadamaen iso hani?
Ciharatengay ci Yihofa i Tisowanan!
11 Pakayni ci Yihofaan o nipiliˈan iso soˈlinay milingatay Cingranan han? Itini i hekal ˈalomanayto ko tamdaw madimadi ci Yihofaan, maedengayto ci Yihofa pacaˈof toya milokesay Satanan han? O sowal ni Satan, awaay ko tamdaw to mitawmecay to maolahay falocoˈ a midoko to Kawas sanay, mararaway konini sapakokot. Kawra, mahemekay ci Yihofa midama kiso to Saˈakawangay a Pikowan Ningra, samanen ciharatengay Cingra i tisowanan. Sanay ci Yis: ‘O Wama ako i kakarayan cowa ka ciharateng to sakalaˈafoaw no cecacecay nonini samimingay a tamdaw.’—Matay 18:14.
12 Hayi, ciharatengay ci Yihofa to nipiliˈan iso. ˈArawhan mifiyoray i Cingranan konini. Somowalay ko Fangcalay Cudad, ano o ngaˈayay ha o tatiihay ha ko nipiliˈan iso ˈangongolay ko pisemer to falocoˈ ni Yihofa. Tinakoen, tiya kinapinapina misafelit ko Israil tamdaw i, ‘adadaay ko falocoˈ’ Ningra. (ˈOlic 78:40, 41) ˈAyaw no lenlen i lintad ni Nowa, ‘ta ˈaloman ko tatiihay tamdaw i hekal i, adada hananay ko falocoˈ ni Yihofa.’ (Satapangan 6:5, 6) Haratengen ko tatodong nonini sowal: Ano mipiliˈ kiso to tatiihay, wa adada ko falocoˈ ni Yihofa. Malonayay ci Yihofa cowa ka saan konini. ˈArawhan maolahay Cingra tisowanan mansa ciharateng to nipiliˈan iso. Ano matatodong ko nipiliˈan iso i, mahemekay ko falocoˈ ni Yihofa. Mahemek Cingra cowa ko nika ngangaˈay Cingra pacaˈof toya milokesay Cingraanan, hanaca mahemekay Cingra malo Mipalifonay a Kawas i tisowanan. (Hipray 11:6) Tada o maolahay a Kawas iso ci Yihofa!
Odoˈ no Sinael
w04 7/15 21-22 fiedac
Patirengen ko Noˈadingan Patosokan, Paˈodingar to Kawas
Haratengen, samaanay ci Yihofa misangaˈ tonini hekal, palaˈosi to patosokan Ningra pakayni tonini cikiw. Sanay ko Fangcalay Cudad, ‘mataˈlif ko dadaya i, ira ko dafak’, o roma a cecay pisangaˈan a laliyadan konini. (Satapangan 1:5, 8, 13, 19, 23, 31) Misatapang ko kahacecay pisangaˈan a laliyadan i, iraayto ko masaˈosiay a patosokan anca araaw ni Yihofa, ngaˈ misatapangay a misangaˈ, milaheci to araaw Ningra. (Paˈarawan 4:11) Kakitaan ci Yopu sanay ko sowal: ‘O nihalakaan ni Yihofa, milahecian Ningra.’ (Yopu 23:13) Maˈaraw ni Yihofa ko ‘nisangaˈan a kihcod’ masaloay ko falocoˈ, ‘mangaˈayayto’ saan a milasil Cingra!—Satapangan 1:31.
To sapitooraw to patosokan, ira ko fanekfekay a kalim wangaˈ matoor ko patosokan ita. O maanan ko papadama kitanan palahad to mahaenay a kalim hani? Tiya caayho ka masangaˈ konini cikiw i, paliˈayawayto maˈaraw ni Yihofa ko minaroˈan, aira ko cecay makapahay a odoˈ i dohaw, papaˈodingar i Cingranan. Malecaday, o kalim ita a milaheci to patosokan ita, ngangaˈay pakaynien i pisimsim tora noka laˈosi no patosokan a mipalahad. Mahaenay ko nalifetan noya 19 ko mihecaan a Toni. Tiya milisoˈ cingra to fenpo no Kakaetipan no Iwropa i, cowa ka mapawan ningra, marariday miharateng cingra, ano itira a matayal i, sasamaan ko kaˈorip hakiya? Marariday a mitawmec to sakatayraaw matayal a falocoˈ, padadotocay pasayni tonini a patosokan a misaˈicel. Ikor no pina miheca, matahidangayto cingra tayra i fenpo a matayal, tada lipahakay cingra!
SAKA 12 FOLAD 11-17 ROMIˈAD
O ODOˈ KO KIMAD NO KAWAS | YOPU 25-27
“Cowa ka Lefot a Tamdaw, Wa Ngaˈay Midofdof to Palinian no Kawas, Halo Tahacerem a Madimadi”
it-2 1180 fiedac 2 fatac
Madimadi
YOPU. Ci Yopu itiniay i ikor no patay ni Yosif tangasa ci Mosian a maˈorip cingra, ‘o awaay ko patelac ningra, o moecelay ko waywayan, o midokoay to Kawas, miliyasay to mararaway demak.’ (Yopu 1:1) Kinacecayay, malisopsopay ko coyoh i kaˈayaw no Kawas, iraay tayra ci Satan, itiya licayan no Kawas ci Satan pakayni ci Yopuan, itiniay mahapinang o kalacongis no Kawas aci Satan milingatay to kamadimadi no tamdaw. Pakokotay ci Satan to cowa ka ngaˈay ko kemod no falocoˈ ni Yopu, somowal o pidoko ningra to Kawas o sakiniyah aca a epoc; misalalicayay to nika madimadi ni Yopu. Ikor, mihaydaan ci Satan a miˈafas to polong a hafay ningra ato mipatay to polong a wawa ningra, kawra cowa pisawad ci Yopu to madimadi i Kawas. (Yopu 1:6–2:3) Cowa pisawad ci Satan, mipakokotayho to misatekeday ko falocoˈ ni Yopu, ano ngaˈayho ko tireng no niyah, mamaan malahdaw ko hafay ato wawa saw, saan ko sowal ci Yopuan. (Yopu 2:4, 5) Oraanto i, paadadaan to tatiihay adada ci Yopu, taˈangay ko pisemsem ningra, ano fafahito ningra pasowal hamaanto madimadi ka patay ko ngaˈay sanay cingranan. O papina widang padeteng sanay miˈikong to palinian no Kawas, pararaw to araaw no Kawas, miˈodis ato milokes ci Yopuan. (Yopu 2:6-13; 22:1, 5-11) Mitawmecay to madimadi ci Yopu, mankora saan ko sowal ningra: ‘Taha patay kako cowa ko mamisawad a madimadi, mitawmec kako to moecelay, cowa ko mamisawad, awa ko kiyam no falocoˈ ako i hakelong no ˈorip.’ (Yopu 27:5, 6) O nika madimadi ni Yopu, tada misawacayay to makaniway ci Satan.
Ka Pitafo to Marocekay a Madimadi!
3 Pakaynien i mihodopay to Kawas a tamdaw, “marocekay a madimadi”, o misarocoday ko falocoˈ maolah ci Yihofaan, tanektekay a madimadi Cingraanan, ˈayaw no mamisaˈosi salakatho, mamiharateng to araaw ni Yihofa. Hano haenen ko sowal hani? Itini Fangcalay Cudad, o tatodong no “marocekay a madimadi”, awaay ko patelac, awaay ko samoˈ, masongilaˈay, sanay ko tatodong. Tinakoen, saˈosi no Sarikec ni Mosi, patoˈaya ko Israil tamdaw ci Yihofaan i, o awaay ko samoˈ a ˈaˈadopen ko patoˈayaen. (Lifi 22:21, 22) Cowa ka ngaˈay patafang to masamoˈay ato adadaay a ˈaˈadopen. Misaaretengay ci Yihofa to tanoktokay ato masongilaˈay a sapatoˈaya. (Malaki 1:6-9) Misamaanay hani? Ngaˈayay tano tinakoen a mitadtad: Ano micakay kita to dafong i, o losay, o cudad anca lalosidan, cowa ka olah kita to cidangocay, anca cangoˈot ko keskes, oyaan awaay ko dangoc a dafong ko kaolahan ita. Mahecaday ko pinengneng ni Yihofa kitaanan, paihkal to olah ato madimadi ita, wa o marocekay, masongilaˈay.
4 Alatek adihayay ko dangoc no niyah, marariday a mararaw. Mihaenay edengan o malefotay tamdaw ko ngangaˈay mitafo to marocekay a madimadi han? Cowa. Tosaay ko lalangian parihaday to falocoˈ ita. Saka cecay, cowa ko dangoc aca ko minengnengan ni Yihofa. ˈOlic 130:3 sanay: “Ano nitilidan Iso ko raraw niyam i, cima ko mamaedeng a miliyas to pitefoc Iso saw?” Mafanaˈay ci Yihofa to cowa ko malefotay kita, mararaway ko demak, kawra makahiay Cingra misodod kitaanan. (ˈOlic 86:5) Saka tosa, citolasay ko ˈicel ita, cowa pisaali ci Yihofa midemak to mataˈlifay ko ˈicel ita a demak. (ˈOsien ko ˈOlic 103:12-14.) Itini pinengneng ni Yihofa, samaan kita ngaˈ, o marocekay, awaay ko samoˈ, masongilaˈay hani?
5 Ano sapitafoaw to marocekay a madimadi, o olah ko sakakaay. Pakayni i olah ato madimadi to kakarayan Wama, cowa ko cidangocay, o masongilaˈay. Ano misiˈayaw kita to sapalifet i, kamayanay misarocod maolah ci Yihofaan, mahaen wa ngaˈay kita mitafo to marocekay a madimadi. (1 Rayray 28:9; Matay 22:37) Haratengen ko isatapang a tinakoan. Oniya tatoloay salikaka hano mihaen cangra a misaˈosi hani? Coko sakahemekaw koya kaying salikaka i picudadan han? Maolahay koya kapah salikaka itira i fawahan a malikaf no cafay micudad han? Oya tawki no paro no lomaˈ maolahay cingra malahdaw ko tayal han? Cowa ka hatira. Samanen, mafanaˈay cangra to moecelay palinian ni Yihofa, hanaca o harateng nangra sahtoay o, samaanen pakahemek ko kakarayan a Wama. Samanen oya tatoloay salikaka maolahay ci Yihofaan, mansa, ˈayaw no misaˈosi isalakatay miharateng Cingraanan. Mikitini saˈosi nangra, mahapinangay ita, o waywayan nangra sahtoay o marocekay a madimadi.
Odoˈ no Sinael
w16.11 9 fiedac 3 fatac
Midoedoan ko Kimad no Kawas a Likakawaen
3 Maamaan i dohaw misawacayay to matanengay ko Kawas a milikakawa. Sowal no Fangcalay Cudad: ‘Pakaynien ni Yihofa i taneng Ningra ko pisangaˈ to hekal, pakaynien Ningra i fanaˈ Ningra ko pipateli a patireng to kakarayan.’ (Taneng 3:19) ˈArawhan i, o kafanaˈan ita ‘edengan o samimingay a ˈicel no Kawas konini.’ (Yopu 26:14) Soˈliˈlin o kafanaˈan ita pakayni to foˈifoˈis iraay ko tolas, kawra mahapinangato ita ko nika sierod no foˈifoˈis comikay i dohaw. (ˈOlic 8:3, 4) O rayray a foˈifoˈis i, o masawalwalay a foˈis ko palaˈosiay, masieroday a comikay i dohaw. Haratengen hena, o rayray no foˈifoˈis no cidal mitaliyokay to cidal a comikay, hato midoedoay to sarikec a mitaliyok, tada kasapaanto! Onini a kihcod padamaay kitaanan mafanaˈ to tano tanengan ni Yihofa a misangaˈ ko kakarayan ato sera, o papakahemeken ita Cingra, madimadi a midoko Cingranan.—ˈOlic 136:1, 5-9.
SAKA 12 FOLAD 18-24 ROMIˈAD
O ODOˈ KO KIMAD NO KAWAS | YOPU 28-29
“Wa Ngaˈay Kiso Mahecad ci Yopuan, Ira ko Makapahay Ngangan Han?”
w02 5/15 22 fiedac 19 fatac
Paihkalen ko Madimadiay Olah to Misaaliay Tamdaw
19 Mikitini i namicekiwan ita a nalifetan i Fangcalay Cudad, mananamay ita: Paihkalen ko madimdiay a olah to misaaliay a tamdaw, wa ngaˈ masalo ko saali nangra. Ano awa ko pipadama ni Pituil, cowa ko mamalenak ko teloc ni Apraham; ano awa ko pipadama ni Yosif, cowa ko mamatadem i Kanan ci Yakop. Ano awa ko pipadama ni Rucu, cowa ko caciteloc ci Naomi. Mankora ano awa ko pipadama no tao, cowa ko mamasalo ko saali ni Apraham, ni Yakop aci Naomi. Malecaday anini, o papaihkalen ita ko madimadiay olah to misaaliay a tamdaw. (Taneng 19:17) Todongen ita ci Yopu, ‘ano milongoc ko mapadesay a tamdaw i, mipadangan ningra, ano milongoc ko pakoyoc ato pakosiya a tamdaw i, mipadangan ningra’, ciharatengay cingra to ‘mamapatay a tamdaw.’ Ci Yopu i, ‘palipahakay to falocoˈ’ no maponengay fafahiyan, o roma sa i, ‘mala mata no mapohaway a tamdaw ato mala waˈay no mapiˈiway a tamdaw’ cingra.—Yopu 29:12-15.
it-1 443 fiedac 5 fatac
Caˈedong
Adihayay ko tinakoan i Fangcalay Cudad tano rikoˈan a mitaypiyaw to demak. Matira o caˈedong no tamdaw mitaypiwayay to o maanan lekakawa kora tamdaw ato midamaay to maanan a demak. O Fangcalay Cudad tano rikoˈan a patalahkal to maanan ko saaroˈan anca midemakay to maanan a tayal kora tamdaw, ya nisowalan ni Yis a caˈedong no tamdaw i pakaetimay, o cecay a tinakoan. (Matay 22:11, 12; nengengen ko PAHOK, COKAP.) Itini i Paˈarawan 16:14, 15, somowalay to masongilaˈ ko kacirikoˈ sanay, tatodong i, aka mapehel itini noˈadingoan, malahdaw ko saaroˈan a mala madimadiay a misawacayay tamdaw. Mangataayto ira ko Armakiton taˈangayay romiˈad no Kawas, ano mapehel ko tamdaw i, wa kaadayayanto ko teloc.
w09 2/1 15 fiedac 3-4 fatac
O Maanan ko Mitaypiyawan no Ngangan?
Hofoc han ko tamdaw wao manan ko ngangan, cowa ko niyah ko mipiliˈay. Kawra, iraay ko masamaanay ngangan ita itini noka pinengneng no tao o kita ko piˈarawan. (Taneng 20:11) Licayen ko niyah mamaan: Ano iraayho maˈorip ci Yis ato tarokos i, wao maan han nangra pangangan kako hani? O masamaanay a ngangan ko matatodongay to waywayan ako hani?
O sasasimsimen ita konini salicay, misamaanay aki? Ya citanengay a hongti ci Solomon, sanay mitilid: ‘Mipiliˈ to adihayay hafay, kao pipiliˈ to makapahay a ngangan ko ngaˈayay.’ (Taneng 22:1) Itini i kaˈayaw no tamdaw ira ko makapahay ngangan manaokaniw o kalimlaan, kawra ikakaay ko kalimlaan i, ira ko makapahay ngangna i ˈaˈayaw no Kawas, mihaen ngaˈ mamilifok to midaˈocay a odoˈ. Misamaanay hano saan ko sowal hani? Samanen mikiˈokay ko Kawas, o tatiliden Ningra i piharatengan a cudad Ningra ko ngangan no midokoay i Cingranan a tamdaw, papafelien cangra to midaˈocay a tokel.—Malaki 3:16; Paˈarawan 3:5; 20:12-15.
Odoˈ no Sinael
g00 7/8 11 fiedac 3 fatac
Mararid a Matawa—Adihayay ko Epoc!
Matawa soˈlinay kalimlaan han? Ano ira ko tamdaw masedi a matawa i tisowanan i, maharatengay iso alatek ko nika sinoway no falocoˈ iso itiya han? Ano awaawa ko sedi no pising no tamdaw i, marawraway ko falocoˈ iso, anoca hato mapiliˈay tisowanan sanay miharateng kiso han? Hayi, masedi ko pising no tamdaw anca awa ko sedi, taˈangayay ko kasasiroma. Onini taˈangayay ko pifiyor toya masediay tamdaw atoya misedian a tamdaw. Ci Yopu somowalay to ˈada ningra: ‘Yo matoled cangra i, pasayra kako i cangranan a masedi a matawa; cowa paawaen nangra ko tedi no pising ako.’ (Yopu 29:24) Matedi ko pising ni Yopu sa i, samanen lipahakay ko falocoˈ ningra.
SAKA 12 FOLAD 25-31 ROMIˈAD
O ODOˈ KO KIMAD NO KAWAS | YOPU 30-31
“Samaanay ci Yopu Mitafo to Makoracay a Waywayan”
w10 4/15 21 fiedac 8 fatac
Aka Pinengneng to Awaay ko Epoc a Demak!
8 Ano o soˈlinayto Krisciyang mafiyoray no coos no mata ato coos no tireng. Mihaenay haw i, pakayni to maminengneng to maanan, mangalay to maanan, palimoˈotay ko kimad no Kawas papiˈimer to niyahan. (1 Korinto 9:25, 27; ˈosien ko 1 Yohani 2:15-17.) Ya moecelay a Yopuan mafanaˈay, o maanan ko mihalakaan no falocoˈ milingatay to maˈaraway no mata. Sanay ko sowal ningra: ‘Matatelekayto kako to mata ako, mana ngaˈay kako a pamotek a minengneng to limocedan saw?’ (Yopu 31:1) Ci Yopu cowa aca pidemak to ˈamelasay a demak, cowa pakihateren ningra ko niyah mararaw ko piharateng to fafahiyan. Misaˈicelay pasowal ci Yis mamifalah kita to maˈodangay a harateng, sanay cingra: “Ano cima ko ciˈanofay ko falocoˈ a minengneng to fafahiyan i, o maˈodangayto cingra i falocoˈ ningra toya fafahiyan.”—Matay 5:28.
w08 9/1 11 fiedac 4 fatac
Saharateratengen ‘Salikor Masamaanay ko Teloc’
ˈAyaw no raromakat tonini maˈikongay a lalan, licayenho ko niyah: “Patalacowaen nonini lalan kako hani?” Edeng ano tomelepho misaharaterateng “aira ko masamaanay a teloc” i, cowa ito ko raromakat kiso tonini tatiihay a lalan, ikor misemsem to roray. Cowa pisikor to saparikec no Kawas, papaira to tatiihay minaroˈan, mahawpay madenga tono maˈodangay a adada, cowa ka kahi a ciwawa, pasadak mipatay to itiyaday a wawa, mapalak to kararamod, cikiyam ko falocoˈ. Ihkalay pasowal ci Pawlo, maˈodang ko waywayan salikor a teloc i, ‘cowa ko mamicomod i Hongti Kitakit no Kawas.’—1 Korinto 6:9, 10.
w10 11/15 5-6 fiedac 15-16 fatac
Kaemangay Tamdaw—Tooren ko Sakayat no Fangcalay Cudad
15 Pakayni to nika madimadi to Kawas, hacowaay madolo kiso mapalifet hani? Ano kalacafay kiso to tao ha, anoca ano cecay kiso ha? Itini picudadan anoca i katayalan i, tohatiniay talipaˈelalay kiso, misinanot to katalawan i noˈadingoan, eca papipalaken ko maamaan a demak to kalalaed iso ato Kawas. Ano mahoka ko falocoˈ iso, caka talipaˈelal i, madoloay malifa ko sapalifet, maˈodang ko waywayan.
16 Ano cecay kiso i, hano mamidofdofho ci Yihofaan hani? Haratengen: O ngangaˈay kiso pasomad ci Yihofaan, ngangaˈay palipahak to falocoˈ Ningra. (Satapangan 6:5-6; Taneng 27:11) Tangongolay ko falocoˈ ni Yihofa pakayni to waywayan iso, samanen ‘ciharatengay Cingra i tisowanan.’ (1 Pitiro 5:7) Halamhamay tisowanan mitengil to sapasifanaˈ Ningra a milifok to epoc kiso. (Isaya 48:17, 18) Itini nolitengan a Israil, iraay ko romaroma midokoay ci Yihofaan a Israil tamdaw misakahemaway to saparikec Ningra, pakayni toninian masomaday ko falocoˈ Ningra. (ˈOlic 78:40, 41) ˈArawhan cowa ka lecad ci Taniil, o sowal no cecay coyoh ni Yihofa, ‘o tada kalimlaan no Kawas tamdaw’ cingra sanay, mahapinangay itini tada maolahay ko falocoˈ ni Yihofa i cingranan. (Taniil 10:11) Misamaanay hani? Samanen ano itinito ino tekedan ci Taniil, anoca itini i kaˈayaw no tamdaw, kamayan madimadi cingra to Kawas.—ˈOsien ko Taniil 6:10.
Odoˈ no Sinael
w05 11/15 11 fiedac 3 fatac
Tano Maolahay Falocoˈ a Mitengil to Sowal no Tao
Soˈliˈlin maedeng kina moetepay matengil no widang ko kasomowal ni Yopu, kawra cedaˈah a somowal ci Yopu: ‘Nanay ira ko cecay to mitengilay takowanan,’ sanay. (Yopu 31:35) Hano hatira ko sowal ni Yopu hani? Samanen misatengitengilay ko widang ningra, kawra cowa pihinom cingranan, Cowa ka ciharateng ci Yopuan, cowa ka fanaˈ to roray ningra. Cowa pitiˈenec cangra to olah a mitengil to sowal ni Yopu. O sapalimoˈot ni Pitiro i: ‘Kamo kahacecay a tamdaw, pahecaden ko harateng namo, maolah to salikaka, siniˈada ko falocoˈ, misapoener to falocoˈ.’ (1 Pitiro 3:8) Sasamaan kita siniˈad to tamdaw hani? O cecay pakayraan i, ciharateng cangranan, cipinang to falocoˈ nangra. Hinomen ita, pasowal to “maedeng tatiihay ko falocoˈ iso!” “Mararaw ko piharateng no tao tisowanan, madokaˈay ko falocoˈ iso haw?” O roma pakayaan i, liyawen a somowal koya sowal ningra, paihkal to nika fanaˈ iso to tatodong nora sowal ningra. Ano tiˈenecen ko olah a mitengil cangranan, cowa ko pitengil aca to cecacecy a sowal ningra, mafanaˈayho to falocoˈ ningra.