Pinengnengan to Lalakaw no Mitosilay ato Nikaˈorip Rayray no Saˈopo
© 2024 Watch Tower Bible and Tract Society of Pennsylvania
SAKA 1 FOLAD 6-12 ROMIˈAD
O ODOˈ KO KIMAD NO KAWAS ˈOLIC 127-134
Songilaˈen a Midipot ko Sapatorod ni Yihofa Tisowanan a Sapatelong
Malo Paro no Lomaˈ ni Yihofa o Kalimlaan a Sapalemed!
9 Pafelian ni Yihofa ko tamdaw to sakahofoc a inaneng, ato pasifanaˈ to wawa maolah ato midoko Cingranan. Malo wama winaay, pakayniay kiso a miakoˈid to Kawas han? Soˈlin adihayay ko sapalemed ni Yihofa to coyoh, kawra cowa pafeli cangranan to sakahofoc a inaneng, edengan o tamdaw ko pafelian Ningra. O wama wina haharatengen konini, misalimla toniya mikiriwiˈay a sapatelong. Paikenan ni Yihofa i wama ato wina ko wawa, o wama ato wina wa ‘mitoor to araaw ni Yihofa a mirikec a palimoˈot cangranan, palahad cangranan’ o kalimlaan a ˈinorong konini. (Ifiso 6:4; Limoˈot 6:5-7; ˈOlic 127:3) Sapadamaaw to wama wina, o likakawa no Kawas adihayay ko misadayan mikitiniay i Fangcalay Cudad a lalosidan, tinakoen mitepangan cudad, ika, radiw ato wangcan no mita. Mahapinangay, ci Yihofa aci Yis maolahay to wawa. (Luka 18:15-17) Ano tooren no wama wina ko sakayat ni Yihofa ato misarocod a midimokos to wawa, o mamahemek ci Yihofa. Mihaen ko demak no wama wina, pairaay to toki no wawa malo paro no lomaˈ ni Yihofa, tahadaˈoc materek i paro no lomaˈ Ningra!
O Wama Wina—Pasifanaˈen ko Wawa Maolah ci Yihofaan
20 Ka cipinang to wawa. Patinakoan no ˈOlic 127 fedengan ko wawa to panaˈ. (ˈOsien ko ˈOlic 127:4.) Matiya o panaˈ cowa ka lecalecad, o kahacecay a wawa iraay ko mikiriwiˈay a pinangan. Mihaenay, haharatengen no wama wina ko sapasifanaˈ a lalakaw. Itiniay i Israil kitakit, cecay mararamoday padamaay to tatosa a wawa malo maolahay to Kawas a tamdaw, pakayni to pakayraan a pasifanaˈ i, sanay ko sowal nangra: “Pasasiekedan niyam ko wawa a milengo to Fangcalay Cudad.” Manaokaniw cowa ka lecalecad ko pakayraan no kahacecay paro no lomaˈ, o tawki no lomaˈ ko mamisaˈosi to sasamaan malalengo to wawa to Fangcalay Cudad.
Odoˈ no Sinael
it-1-CH 543 fiedac
O Masowalay i Fangcalay Cudad a Pinaloma
I ˈOlic no Fangcalay Cudad somowalay to mikiriwiˈay a tahapinangan no olif a kilang. Pasayraay toya mangodoay ci Yihofaan a tamdaw paliˈayaw a pasowal: ‘O wawa iso mitaliyokay to cokowi, matiya o faelohay a coˈong no olif a kilang.’ (ˈOlic 128:1-3) Ano kalatimen ko caˈang no olif a kilang paconeken i sera a mipaloma i, o marariday a pakayraan konini a mipaloma to kilang. Roma i, o malitengayto a olif a kilang ngangaˈay mikitini i lamit a malengaw ko faelohay a coˈong, cowa ka pitolas a malengaw. Matira o coˈong no olif mitaliyok to tapang nora kilang, o wawa mitaliyokay to wama, lipahak ko paro no lomaˈ.
SAKA 1 FOLAD 13-19 ROMIˈAD
O ODOˈ KO KIMAD NO KAWAS ˈOLIC 135-137
‘O Tapang Ita Mikikakaay ko Nika Tadamaan to Romaroma Kawas’
it-1-CH 902 fiedac 5-6 fatac
ˈIcel, Inaneng, Kafahkaˈan a ˈIcel
Tano mikiriwiˈay a pakayraan ko Kawas mionting to ˈicel no serayan. Sapisawacayaw to soˈlinay a Kawas ko Niyah, tano mikiriwiˈay a pakayraan a patalahkal to ngaˈayay Cingra mionting to masakenakenaay a ˈicel no serayan, pakayni a patalahkal to fangcalay ngangan no Niyah. (ˈOlic 135:5, 6) O cidal o folad o foˈis iraay ko masaˈosiay a lalan a romakat, o roma i, tona maontingay no safalod no serayan ko faliyos ˈorad, tona masaferengay a maefer ko ririˈ, ato iraay ko masaˈosiay a lalan no ˈayam a malinah, onini sahtoay o marariday mifekad a demak, mankora ano oninian aca cangoˈotayho pafangcal to ngangan no Kawas ato mipacekok to misaˈadaay ato mararaway pidoyongan.
Mihaenay haw i, misaˈosiay ko Kawas ci Yihofa tano mikiriwiˈay a pakayraan misaka dademak to ˈicel no serayan, itini i misaˈosian a tatokian pasadak to ˈicel no serayan, palaˈosi to misaˈosian a araaw, pakayni ko pisawacay to soˈlinay a Kawas Cingra. Hanaca, matira o kedal, faliyos ˈorad, soˈlin o kalo a demak koni, kawrira ano matepiˈay i mipaliˈayawan ni Yihofa a tatokian mifekad i, o mikiriwiˈayto a demak konini. (Nengnengen ko 1Hongti 17:1; 18:1, 2, 41-45.) Manaokaniw, itini adihayay tinakoan, o mipalaˈosian no Kawas a demak sahtoay o mikiriwiˈay, nolatekay o kataˈangay ato kaciˈicel na co:waho ka pifekad isaˈayaw (Kasadakan 9:24), latekay itiniay mikiwiˈay a tatokian anca tano co:waho ka tahatengil a pakayraan mifekad.—Kasadakan 34:10; 1Samuil 12:16-18.
O Madimadiay a Olah ni Yihofa Pakayni Tisowanan Taˈangayay ko Epoc
16 Ira ci Yihofa malo pilimekan, rihadayay ko harateng no mita. Kawra latekay matoleday ko falocoˈ ita, malecaday o mapolinay pasangarto a lomowad. Toniya tatokian sasamaan ci Yihofa padama kitaanan hani? (ˈOsien ko ˈOlic 136:23.) Tatano kamay Cingra damsay a palowad kitaanan, ngaˈay kita miliyaw tanektek tomireng. (ˈOlic 28:9; 94:18) Malifokay ita a epoc: Ngangaˈay kita tahadaˈoc mitiˈer ci Yihofaan, mansa ira ko tosa sapalemed: (1) Ano icowato kita iraay ko rihadayay a pilimekan. (2) Milifok to tangongolay kaciharateng no kakarayan Wama.
Odoˈ no Sinael
it-2-CH 799 fiedac
Misaapotoˈan ko Ngangan ni Yihofa
Misaapotoˈan a ngangan ni “Yihofa” itini no Hipray a Fangcalay Cudad, cecayay aca ko ngihaˈ, tohatiniay itini pipahemek, piˈolic, pitolon, pingitangit, o mahaenay naifalocoˈay a sowal, o lalangian milingatay to pakalowid ato malidong o mahaenay a kalipahakan, anoca romadiway to ˈicel to inaneng no Kawas a sapaˈolic. O mahaenay a mikiriwiˈay a pakayraan a tinakoan marariday a masadak. ‘Ka pahemek kamo ci Yihofaan!’ (Haliluya) sanay a sowal marariday masadak i ˈOlic mipakahemekay ci Yihofaan a sowal, sakinacecay masadak itiniay i ˈOlic 104:35. Itini romaroma ˈolic, o mahaenay a sowal latekay itiniay aca pisatapangan no ˈolic (ˈOlic 111, 112), latekay itiniay i satenokan no sowal a masadak (135:3), latekay itiniay i salikoray no sowal a masadak (ˈOlic 104, 105, 115-117), kawra marariday masadak i satapangan ato salikoray no sowal (ˈOlic 106, 113, 135, 146-150). Itini i Paˈarawan cudad, ano pakahemek ko ikakarayanay a coyoh ci Yihofaan i, kinapinapinaay a masadak ko ‘ka pahemek kamo ci Yihofaan!’ sanay a sowal.—Paˈarawan 19:1-6.
Iraay ko misaapotoˈan a ngangan ni Yihofa a sinael, sahtoay milingatay to pakahemek ci Yihofaan ato mingitangit Cingranan. O ˈolic ni Mosi to piakoˈid to pilidong ni Yihofa o tinakoan koni. (Kasadakan 15:2) Itini miˈoningan ni Isaya a ˈolic, misaka dademakan ningra ko misaapotoˈan ato mihaeminan a somowal to ngangan ni “Yihofa,” misaˈicel to kalimlaan nora sowal. (Isaya 12:2; 26:4) Pakidem ko adada ni Hicikiya i, midemakay ci Yihofa to kafahkaˈan miadah cingranan; ikor lipahakay ci Hicikiya miˈolic pakahemek ci Yihofaan, misaliyaliyaway misaka dademak to misaapotoˈan a ngangan ni Yihofa, patalahkal to piakoˈid. (Isaya 38:9, 11) O romaroma mitiliday to ˈOlic a tamdaw palalinian ko caayto ka ngaˈay pakahemek to Kawas a mapatayay tamdaw, ato padotocay madimadi to Kawas a tamdaw, misaka dademakan ko misaapotoˈan a ngangan ni “Yihofa.” (ˈOlic 115:17, 18; 118:17-19) O romaroma mitiliday to ˈOlic a tamdaw itini pitolon paihkal to miakoˈiday a falocoˈ, mia koˈid to Kawas milidong cangranan, midipot ato misalof i, misaka dademakan ko misaapotoˈan a ngangan ni “Yihofa.”—ˈOlic 94:12; 118:5, 14.
SAKA 1 FOLAD 20-26 ROMIˈAD
O ODOˈ KO KIMAD NO KAWAS ˈOLIC 138-139
Ka Timolo Aka Marawraw a Pasowal
Itini i Kasakopang Pahemek ci Yihofaan
10 Ano maharateng iso pakamay a pacaˈof sakahadakaw sanay ko falocoˈ han? Hatiraayto, ano pacaˈof ko ˈalomanay tamdaw i, marawraway ko falocoˈ. Sapiremoaw to hatiniay a falocoˈ, kilimen iso ko lalangian to hano marawraw. Calemcemay to mamapawan to o maanan ko hasowal han? Anca calemcem mararaw ko sowal? Anca eca pakalini to tao ko sapacaˈof no niyah han? Soˈlinay i, mihaen a calemcem kiso paihkalay to iraay ko misapoeneray a capeling iso, minengneng to tao mikikakaay ko kangaˈay to niyah, o hatiniay a capeling o kaolahan ni Yihofa. (ˈOlic 138:6; Filipi 2:3) Mitokelay ci Yihofa tisowanan pakahemek Cingraanan, hanaca itini kasaˈopoan pakalalok to salikaka. (1 Tisalonika 5:11) Maolahay ci Yihofa tisowanan, papadamaen Ningra kiso timolo a pacaˈof.
Itini Saˈopo no Kasakopang Masasipakalalok
7 Ngaˈayay lomalen iso ko iˈayaway a lalakaw no Mikecolay, papadama tisowanan ko ilalomaˈay a sapaini. Tinakoen, songilaˈen a misaday. (Taneng 21:5) Ano macalep iso cipinang to lalakaw no saˈopo i, ano pacaˈof to salicay cowa ito ko mamarawraw. O roma i, apotoˈen ko sapacaˈof. (Taneng 15:23; 17:27) Ano pakinacecay sa kiso adihay ko sowal, adihay ko kalimlaan, latek matalawto kiso, awa ko pinang no salikaka mitengil to sowal iso. Ano palalinien i, ano cecay tosa aca ko sowal, cowa ito ko mamarawraw kiso, madoloto a cipinang ko salikaka a mitengil. Apotoˈen tano niyahen a sowal pacaˈof to salicay, paihkalay konini to ngaˈayay ko pisaday iso, macalepay a cipinang to lalakaw.
Odoˈ no Sinael
it-1-CH 862 fiedac 9 fatac
Misodod
Ano kinapinapinaayto mapakararaw no tao ko Krisciyang i, o mamakahi a misodod to tao, oha dadangaren no Krisciyang konini. (Luka 17:3, 4; Ifiso 4:32; Kolosay 3:13) Cima ano cowa ka kahi a misodod to tao i, cowa ko mamasodod no Kawas cingra. (Matay 6:14, 15) Soˈlin ano pakidemay ko raraw, mamapadeng ko ngangan nai kasakopang, ano patalahkalay cingra to sasoˈlinay a pasasiyor ko falocoˈ i, ikor mamalifok ko pisodod no Kawas alatek. (1Korinto 5:13; 2Korinto 2:6-11) Kawra, ano marariday a pakidem ko raraw, awa ko pasasiyoray a falocoˈ i, cowa ko papakihateren no Krisciyang cingra. O mahaenay a tamdaw malo ˈadaayto no Kawas.—Hipray 10:26-31; ˈOlic 139:21, 22.
SAKA 1 FOLAD 27–2 FOLAD 2 ROMIˈAD
O ODOˈ KO KIMAD NO KAWAS ˈOLIC 140-143
Ikor no Pitolon Saˈicelen a Midemak
Ka ‘Pisongilaˈ Mitengil to Sowal no Citanengay a Tamdaw’
13 O sapalimoˈot o wacay to maolahay ci Yihofa kitaanan han ko pinengneng. Sahtoay o saka ngaˈay no mita ko miharatengan ni Yihofa. (Taneng 4:20-22) Samanen tada maolahay Cingra kitaanan, mansa pakaynian i Fangcalay Cudad, mitepangan a cudad anca matenesay a Krisciyang pafeli to sapalimoˈot kitaanan. Hipray 12:9, 10 sanay, mihaen ko demak Ningra ‘sahtoay o saka ciepoc no mita.’
14 Sinanoten ko matengilay a sowal, cowa ko pakayraan a paihkal. Latekay, cowa ka ngaˈay ko pakayraan no tao mihadak to sapalimoˈot saan kita miharateng. Manaokaniw, o mihadakay to sapalimoˈot a tamdaw o mamisaˈicel tano kaolahan no tao micada a pakayraan mihadak to sapaini. (Kalatiya 6:1) Kawra ano o micadaay to sapalimoˈot kita i, sasamaan ko pidemak hani? O mamisamacay kita to matengilay a sowal, cowa ko pakayraan mihadak to sapalimoˈot. Ngaˈayay licayen ko niyah: “Soˈlin cowa ka olah kita to pakayraan no tao mihadak to sapalimoˈot, kawra ora sowal ningra iraay ko matatodongay han? Wa ngaˈay kako misamacay miharateng sasamaan ko niyah mikitini tonini a sapalimoˈot milifok to epoc, eca ko pisinanot to dangoc no tao han?” Ano iraay ko taneng ita, o kahacecay a sapalimoˈot o saka cakat no niyah han ko pinengneng.—Taneng 15:31.
w10-CH 3/15 32 fiedac 4 fatac
Itini Mikiriwiˈay a Laliyadan Padadotoc a Makorac ko Falocoˈ
O romaroma sikawdan no Kawas pakayni i picada to pisafelit, cangoˈot ko sakaˈorip a payci, pakidem ko adada taˈangay ko saroero, cowato ka tomesengen. Latekay, matoledan nanay cangra. Hongti ci Tafiti na iraay ko mahaenay nalifetan, sanay cingra: ‘O falocoˈ ako mapehelay, matimelay ilalomaˈ.’ (ˈOlic 143:4) Samaanay cingra miremo to matoleday a falocoˈ hani? Mitikolan ni Tafiti miharateng ko nano demak ni Yihofa i sikawdan Ningra, miharatengayho to samaanay ci Yihofa milidong cingranan nai pasangaray. Midotimay cingra to midemakan no Kawas pakayni i ngangan no Niyah, midotim to na midemakan no Kawas. (ˈOlic 143:5) Malecaday, midotim kita to mikiriwiˈay a capeling no Misangaˈay a Tatapangan, misimsim to nano demak Ningra kitaanan, o hademak Ningra anini ato noikoran i kitaanan, o mamilifokto to ˈicel mihadidi to sapalifet.
w15-CH 3/15 32 fiedac 2 fatac
O ‘Ilalomaˈay Aca no Tapang a Tamdaw’ ko Hararamod—O Matatodongay Han?
Nolatekay, mahecaday ko harateng iso toya mitiliday to ˈOlic a Tafitian alatek. Sowal sa cingra: ‘Yihofaaw, kalikien a pacaˈof takowanan. Maeminayto ko ˈicel no falocoˈ ako. Aka a tahepoen ko pising a misilikor takowanan.’ (ˈOlic 143:5-7, 10) Nohatini i, pairaen ko mihadidiay a falocoˈ a mitala to kakarayanay a Wama. Oha pakafanaˈ tisowanan to hamamisamaan ko hademak iso. Ngaˈayay kiso micerid mikingkiw to Fangcalay Cudad, dotimen koya maˈosiay iso a lalakaw. Ano mahaen i, matongal ko kacipinang iso to sarikec no Kawas, oha cacipinangto kiso samaanay ko demak ni Yihofa toya finawlan Ningra i nolitengan. Sinanoten a mitengil ko sowal no Kawas, mahapinangto iso ano dofdofen iso ko sapalimoˈot ni Yihofa tada o citanengay.
Odoˈ no Sinael
it-1-CH 374 fiedac
Sawarak
Sapatinako a Sowal. O tatiihay tamdaw mitonganganay to tao, pakidem ko pipalak to ngangan no tao. O mahaenay a mangah a sowal nangra malecaday to sawarak no ˈoner. (ˈOlic 58:3, 4) Pakayni to mahaenay mitonganganay a tamdaw, sanay ko sowal no Fangcalay Cudad: ‘O ngoyos nangra iraay ko sawarak no ˈoner.’ (ˈOlic 140:3; Loma 3:13) O sawarak no ˈoner itiniay i lalomaˈ no ngoyos, i kananger no wadis nira. Ano misaolatekay a misaka dademak to sema, mitongangan i lalikor no tao, somowal to mararaway a kimad anoca tatiihay a sasowalen i, o ‘matomesay to sapipatay to tamdaw a sawarak.’—Yakop 3:8.
SAKA 2 FOLAD 3-9 ROMIˈAD
O ODOˈ KO KIMAD NO KAWAS ˈOLIC 144-146
‘O ci Yihofa ko Kawas a Tamdaw Tada Malemeday!’
Salicay no Miˈosiay Tamdaw
2. Ora misalofan a pihongyak maroyaroyay to romaroma sinael i ˈOlic saka 144 fedengan. Masalofto mihongyak tora asier ikor, ora nisowalan a sapalemed i saka 12 tangasa 14 sinael, oyaanto moecelay tamdaw ko mitoroˈan, cangra mingitangitay to pilidong no Kawas, mitokel to sapiliyasaw to pikariˈang no tatiihay tamdaw (saka 11 sinael). Mihaen a misalof, to nika cipinang ita to saka 15 sinael a “malemeday” a tamdaw, ihkalayto ko kapinengneng, ora misowalan toni sinael a tosa “malemeday” tamdaw, o malecaday a tamdaw—oya “mangodoay [ci Yihofaan] a pala Kawas a finawlan” ko mitoroˈan. O roma haharatengen ita i, o Hipray sinael awaay ko ‘piyaw-tin-fo-haw’ (no Kowaping), mansa o mihongyakay tamdaw o mamafanaˈ a mihapinang ngaˈ matatodong ko pihongyak, hanaca mamisinanot to lalekoan no Hipray a ˈolic, ato fafekang ato ilaenoay a milingatay a sinael.
3. O romaroma sinael i Fangcalay Cudad, somowalay to papalemeden no Kawas ko midokoay i Cingranan a tamdaw, ya masalofay a pihongyak maroyaroyay toninian. Masalofto ikor, ihkalayto mahapinang ita ko nitokelan ni Tafiti, paˈoripen no Kawas ko Israil tamdaw miliyas to ˈada ikor, o mamalifok nangra ko sapalemed ato kadofahay a sapahafay. (Lifi 26:9, 10; Limoˈot 7:13; ˈOlic 128:1-6) Mahaen o sowal i Limoˈot 28:4 sanay: “O papalemeden no Tapang kamo, ta ˈaloman ko wawa ato teloc namo, kadofah kamo to panay, malenak ko kolong ato siri namo.” Tiya pikowan no wawa ni Tafiti ci Solomon, rihakeday ko Israil to na cowaho ka lifok iti:yaho a rihaday ato kadofah, paliˈayaway pasowal to pikowan ni Misiya toni cikiw to mamasamaan ko pakayraan.—1 Hongti 4:20, 21; ˈOlic 72:1-20.
Kedecen Mitafo ko Sapafeli no Kawas a Hatokel
16 O midaˈocay ˈorip a hatokel o sapafeli ni Yihofa kitanan a kalimlaan a sapatelong. Fanekfekay kita hinatala toniya makapahay a hatokel malaˈosi a romiˈad, hanaca pakasoˈlinay kita to aira konini a romiˈad. O hatokel hato o ˈenor no tamina, ngaˈay patanektek kitanan, ira ko ˈicel miemem to sapalifet, sapalak, anca o saroero no patay. O hatokel malecaday o kafong, ngaˈayay midipot to harateng no mita, padama kitanan mifalah to mararaway a demak, padadotoc midemak to matatodongay a demak. O sapafeli no Kawas a hatokel padamaay kitanan miingid Cingranan, pakahapinangho kitanan tangongolay ko olah Ningra kitanan. Mikedec kita mitafo to hatokel no niyah, hanaca ihkal ko pinengneng tonini a hatokel, mamalifok ko taˈangayay a epoc.
17 Itini i Loma cudad pakalalokay ko tarokos ci Pawlo kitanan: ‘Ka pakayni hatokel a lipahak.’ (Loma 12:12) Ngaˈay ci Pawlo a lipahak, samanen pakasoˈlinay cingra ano mitafo to madimadi ko niyah, wa ngaˈay tayra i kakarayan milayap to midaˈocay a ˈorip. Ano kitato wa ngaˈay pakayni hatokel a lipahak, samanen pakasoˈlinay kita papalaˈosien ni Yihofa ko sakiˈok Ningra, malecad ko sowal no mitiliday to ˈOlic a tamdaw sanay: ‘O cima . . . halamhamay to Kawas ningra ci Yihofaan i, o lipahakay! O Kawas . . . o soˈliˈlinay ngaˈayay tadiˈecen.’—ˈOlic 146:5, 6 ato roma pihongyak.
Masamaanay a Olah Papaira to Soˈlinay Lipahak?
19 6,000 miheca misemsem ko tamdamdaw, kawra oni hekal ni Satan, mamalahdawto. Nohatini toniya hekal matomesay ko misatekeday a maolahay to niyah, maolah to payso, maolah to lawla a tamdaw, o coos aca no niyah ko miharatengan nangra, ono niyah aca sakangaˈay ko mikiharan, o mahaenay tamdaw cowa ka hemek cangra. Sowal no mitiliday to ˈOlic: “O mapadamaay no Kawas ni Yakop a tamdaw i, tada o malemeday, o mitiˈeray a tamdaw to Tapang a Kawas ningra i, tada o malemeday.”—ˈOlic 146:5.
20 O olah no tamdaw ni Yihofa i Cingranan, padadotocay a macakat, to mihecaheca ˈaloman ˈalomanay ko midokoay to Kawas. Paihkalay koni to mangataayto mikowan ko Hongti Kitakit no Kawas, kakalikito mapalemed koni cikiw. Midofdof to araaw no Kawas ngaˈ, paira to soˈlinay a lipahak ita, samanen mafanaˈay kita mihaen to demak pahemekay to Kawas, o maolahay ci Yihofaan a tamdaw, tatahadaˈoc a mapalemed. Ilaenoay lalakaw mamilengo kita, o misatekeday a olah, pairaay to maanan tatiihay a waywayan, misamaanay masasiroma to mikiriwiˈay capeling no tamdaw ni Yihofa.
Odoˈ no Sinael
it-1-CH 372 fiedac 7 fatac
Pinaˈorip
Misaliyaliyaway ko Fangcalay Cudad misaˈicel a somowal, sasadafdafen no tamdaw a micada, siniˈada to pinaˈorip. Pasowalay ci Yihofa to tamdaw, sidaˈitay Cingra midipot to pinaˈorip, ho ngaˈay ko kaˈorip namira. (Taneng 12:10; ˈOlic 145:15, 16) Saˈosi no Rikec ni Mosi songilaˈen midimokos ko pinaˈorip no lomaˈ sanay. Ano maˈaraw ko mahidayay a pinaˈorip, songilaˈen a patikol i pakaenay a tamdaw. Ano mapaekel no karetengay a dafong ko pinaˈorip, patadoen a mihepol kora mipaekelay a dafong. (Kasadakan 23:4, 5) Ano matayal ko pinaˈorip sasiniˈadaen a micada camira. (Limoˈot 22:10; 25:4) Itini i Pipaselaˈan a Romiˈad, saˈosi no Rikec palecaden to tamdaw ko pinaˈorip paselaˈ a matayal, rihaday ko pipahanhan. (Kasadakan 20:10; 23:12; Limoˈot 5:14) Masakatalawan a pinaˈorip sasimawen a mirofo, anca patayen. (Satapangan 9:5; Kasadakan 21:28, 29) Mikecengay ko Rikec cowa ka ngaˈay palalamoen ko cowa ka lecad a pinaˈorip.—Lifi 19:19.
SAKA 2 FOLAD 10-16 ROMIˈAD
O ODOˈ KO KIMAD NO KAWAS ˈOLIC 147-150
Adihayay ko Lalangian Ita Pakahemek ci Yihofaan
Karomadiw a Pahemek ci Yihofaan!—Misamaanay Hani?
5 Cowa aca ko polong no kitakit ko mihinoman ni Yihofa, ano o kahacecay a tamdaw mihinoman Ningra. Mahecaday anini. Sanay ko sowal no ˈOlic: “O mihinomay Cingra to mararomay a tamdaw, o mitafoay Cingra to dokaˈ nangra.” (ˈOlic 147:3) Hay, mihinoman ni Yihofa ko adadaay anca mararomay ko falocoˈ a tamdaw. Anini, makalimay ci Yihofa mihinom to somad no falocoˈ ita, paˈicel kitanan. (ˈOlic 34:18; Isaya 57:15) Pafelian ni Yihofa kita to taneng ato ˈicel, padama kitanan miremo to pasangar.—Yakop 1:5.
6 Dotoc somowalay ko ˈOlic to ikakarayanay a foˈifoˈis, sowal sa: “O nisaˈosian [ni Yihofa] ko adihay no foˈis, mahacecay Ningra a mipangangan ko foˈis.” (ˈOlic 147:4) Soˈlin maˈaraway no mata nora mitiliday to ˈOlic ko foˈis, kawra cowa ka fanaˈ to hakowaay ko nika adihay. Anini, ngaˈayay tano paˈesolay a dadingoan (foingkyo) a maˈaraw ko adi:hayay a foˈis. O sowal no tamdaw, itini i kakarayan, masawalwalay masacawcaway ko kaadihay no foˈis sanay! Cowa ko mamasaˈosi ko nika adihay no foˈis. ˈArawhan panganganan no misangaˈay a Tatapangan ko kahacecay no foˈis, mikiriwiˈan ni Yihofa minengneng ko cecacecay. (1 Korinto 15:41) Hay ano mafanaˈay ko Kawas to cecacecay foˈis i, coko mamihaen a mafanaˈ kitanan kahacecay a tamdaw, mafanaˈ to falocoˈ ato saali no mita a nimaan!
Karomadiw a Pahemek ci Yihofaan!—Misamaanay Hani?
7 Cowa ko nika ciharateng aca ni Yihofa kitanan, hanaca mafanaˈayho to tatirengan no mita, iraay ko ˈicel padama kitanan miremo to pasangar. (ˈOsien ko ˈOlic 147:5.) Nolatek tada pakidemay ko pasangar, cato pakafilo kako a mitamorong wa saan kiso alatek. Mafanaˈay ko Kawas to tolas no ˈicel iso, samanen “maharateng Ningra ko nika o nano sera kita.” (ˈOlic 103:14) Cowa ko malefotay kita, marariday mararaw to malecaday a raraw, marariday mararaw ko sowal, maˈinap to tao anca ira ko tatiihay ˈanof, ikor pacekos ko falocoˈ. O tada malefotay ci Yihofa, awaay ko maamaan a dangoc, ˈarawhan macalepay ko kafanaˈ to harateng ato falocoˈ ita.—Isaya 40:28.
Karomadiw a Pahemek ci Yihofaan!—Misamaanay Hani?
18 Ya mitiliday to ˈOlic a tamdaw mafanaˈay to tada maolahay ko Kawas to finawlan Ningra. Itini nolitenganho, edengan o finawlan Ningra ko mipafelian to “sifanaˈ ato rikec Ningra.” (ˈOsien ko ˈOlic 147:19, 20.) Anini, kita aca ko malo ilaenoay no ngangan no Kawas a tamdaw, tada o taˈangayay a fadangalan koni! Tada miakoˈiday kita mafanaˈ ci Yihofaan, makayat no Kimad Ningra, ngaˈayho mala widang Ningra. Malecaday toya mitiliday to ˈOlic a tamdaw kita, adihayay ko lalangian milekal “pahemek ci Yihofaan” halo pakalalok to romaroma tamdaw pakahemek i Cingranan!
Odoˈ no Sinael
it-1-CH 1212 fiedac
ˈAyam
O mitiliday to ˈOlic mitahidangay to ‘maeferay a ˈayam’ pakahemek ci Yihofaan. (ˈOlic 148:1, 10) Kasapaan ko pisafaco to tireng no maeferay a ˈayam, pakahemekay ci Yihofaan. O cecay maeferay a ˈayam maedeng 1,000 tangasa 2 ˈofad ko kaadihay no opih. O kahacecay a opih iraay ko itenokay a ˈokak, makofatiˈiyan nonini a ˈokak iraayho ko pina soˈot a opih, o kahacecay a opih mahawpay ko pinaay soˈot kaemingay a opih, o kahacecay no kaemingay a opih iraay ko pinaay soˈot a fanoh, masasifalatay malecad to salil. Cecay a opih maedeng 18 kongfen ko koˈedaw, saˈosien i, pinaay poloˈ ˈofad a opih ato pinaay soˈot ˈofad a fanoh masasifalafalatay. O sapikpik no ˈayam ato tireng nira kasapaan ko pisafaco, tadamaanay ko epoc, sakadademakay to ˈicel no fali a maefer, palalinien i, misangaˈan no tamdaw maeferay a lalosidan caay ka pakatoor. O ˈokak no ˈayam mafedohay, mansa kahmaway. Ano macelak ko tosa sapikpik no ˈayam tosaay kongce ko kakayaˈ, o kareteng i, maedeng 110 ke. Itini sapikpik no ˈakawangay ko kaefer a ˈayam, ora mafedohay a ˈokak iraay ko midamaay, malecad to sapikpik no hikoki.
SAKA 2 FOLAD 17-23 ROMIˈAD
O ODOˈ KO KIMAD NO KAWAS TANENG 1
Kaemangay a Tamdaw—O Nima a Sowal ko Tatengilen Iso?
Hamaan Papiˈafasen ko Kalo Demak to Halifon Iso
16 Kapah tamdaw, cowa ka cipinang hanaca pakidemay ko saali no wama wina sanay kiso han? Wa matoled kiso halatek, cacisasa to cowa ko sangaˈayay a kaˈorip ko mihodopay ci Yihofaan. Kawraan, ano pakayniay katoled iso a sawad saan mihodop ci Yihofaan, wa kahenay mahapinang iso, edengan o salikaka i kasakopang ato Krisciyang a wama wina iso ko soˈlinay a maolah tisowanan.
17 Kapah tamdaw sa harateratengen, ano caay pirikec ko wama wina tisowanan, ano mihaen soˈlinay a maolah ko wama wina tisowanan han? (Hipray 12:8) Maketeray kiso to pakayraan no wama wina a mirikec tisowanan halatek, ano mahaenay, tanamen a cipinang to lalangian no wama wina a mirikec tisowanan, hamaan ngaliwngiw a maketer. Mihaenay, ano marikec kiso i, terep han aka pacoli. Sowal no Fangcalay Cudad: ‘Iraay ko sifanaˈ a tamdaw miˈimeray to sasowalen, mafanaˈay pafafidaˈ to demak a tamdaw rihadayay ko falocoˈ.’ (Taneng 17:27) O kapah patireng to patosokan no niyah malo malohemay a Krisciyang, ano samaanto ko sarikec hayi han a micada, mikitini minanam to sapasifanaˈ. (Taneng 1:8) Ano maolahay ci Yihofaan ko wama wina iso, o sapatelong ni Yihofa tisowanan cangra han ko pinengneng, samanen ciharatengay cangra padama tisowanan milifok to tahadaˈocay a halifon.
w05-CH 2/15 19-20 fiedac 11-12 fatac
Salimlaen Iso Kono Krisciyang a Saaroˈan
11 Aka pisaali to sakahemekaw no tao, ka pisaali to sakahemekaw no Kawas. Miharatengay ko tamdaw to sapitekoaw to kapot, to sapilifokaw to sapihaydaaw no tao to saaroˈan ita. Ano mafanaˈ to micadaan no tao kita i, rihadayan nanay ko falocoˈ. Kahacecay tamdaw misaaliay to widang. Ano kaemangayto malitengayto maka micadaay to taˈangayay a saroero no cefacefang, to sapilecadaw cangranan, sakahemekaw nangra. Kawra, o widang anoca cefacefang alatek cowa ka pikihar to sakangaˈay no mita. O roma tatiihay widang sapikilimaw aca to cefang a midemak to mararaway. (Taneng 1:11-19) Ano patoor ko Krisciyang to saroero no cefacefang i, mamisaˈicelto mihimed tono Krisciyang a saaroˈan no niyah. (ˈOlic 26:4) Mirikecay ko tarokos ci Pawlo kitaanan: ‘Aka pakihateren ko hekal a midenga tisowanan.’ (Loma 12:2) Papaˈicelen ni Yihofa ko falocoˈ no mita, ho ngaˈay pakacoˈay to saroero no hekal, eca ka madenga no hekal a tamdaw.—Hipray 13:6.
12 Ano miroero ko tao, papidemak kitaanan to palahdaway to saaroˈan no Krisciyang a demak i, haratengen no mita: Madimadi to Kawas, ikakaay ko nika masakalimlaan to sapatooraw to harateng no ˈalomanay ato sakahemekaw nangra. Tengilen ko safalod no Kasadakan 23:2, cowa ito ko mamararaw: ‘Aka pikihatiya to ˈalomanay midemak to mararaway.’ Tonini a demakan, ci Kalip o ngaˈayay a taˈarawan. Soˈliˈlin o ˈalomanay Israil tamdaw cisasaay to ˈicel ni Yihofa papalaˈosi to mikiˈokan Ningra, tanektekay cingra cowa ka ngiyangi, cowa ka fiyor no ˈalomanay tamdaw. Tona pakasoˈlinay to sakiˈok no Kawas to ngangaˈay tiˈeren, salikor milifokay ci Kalip to kadofahay a sapalifon. (Saˈosi 13:30; Yosuwa 14:6-11) Ano malitemoh ko malecaday a pakayraan i, cowa ko mamisikor kiso to sowal no ˈalomanay tamdaw, misaˈicel miˈading to kalalaˈed iso to Kawas han?
Odoˈ no Sinael
it-2-CH 1013 fiedac
Maapaay a Tamdaw
I Fangcalay Cudad, o “maapaay” hananay cowa ko mafokilay ko falocoˈ, ao cowa ka ngaˈay sakasasowal, mafolaay ko waywayan, misafelitay to moecelay palinian no Kawas. Adihayay kono Hipray a sowal to “maapaay a tamdaw” hananay, kesilʹ (“mafokilay a tamdaw”; Taneng 1:22), ʼewilʹ (“maapaay a tamdaw”; Taneng 12:15), na·valʹ (“maapaay a tamdaw”; Taneng 17:7), ato lets (“malataˈangayay a tamdaw”; Taneng 13:1). Ono Krisiya a sowal i, aʹphron mitoroˈan ko “maapaay a tamdaw” (Luka 12:20), a·noʹe·tos mitoroˈan ko “maapaay a tamdaw” (Kalatiya 3:1), ato mo·rosʹ “maapaay a tamdaw” anca “mafolaay a tamdaw” (Matay 23:17; 25:2).
SAKA 2 FOLAD 24–3 FOLAD 2 ROMIˈAD
O ODOˈ KO KIMAD NO KAWAS TANENG 2
Hano Mamisarocod ko Falocoˈ a Mikingkiw?
‘Mitoor to Soˈlinay Kimad a Maˈorip’
16 Cowa ka sahto sa maolah ko tamdaw miasip ato minanam, kawra pakalalokay ci Yihofa kitaanan ka ‘padotoc mikilim’ ‘padotoc misolap,’ ho matongal ko kacipinang to soˈlinay kimad. (ˈOsien ko Taneng 2:4-6.) Mihadak kita to ˈicel mihaen to demak, oha mamilifok to epoc. Nengnengen samaanay ko demak no salikaka ci Keli. Ano miasip cingra to Fangcalay Cudad i kinacecay cecayay ko sinael micalepan a micekiw, sanay cingra: “Micekiwan ako ko kahacecay sapatongal a lalakaw ato roma taˈarawan a sinael, mikilimayho to adihayay lalakaw. . . . Tano mahaenay pakayraan minengneng to Fangcalay Cudad adihayay ko malifokay ako a minaroˈan.” Ano mahaenay ko pakayraan anca o roma pakayraan, mihadak kita to toki ato ˈicel micekiw to Fangcalay Cudad, paihkalay to maolahay ko niyah to soˈlinay kimad.—ˈOlic 1:1-3.
Milekalay ko Soˈliˈlinay a Taneng
3 O taneng o sapisakadademak to sifanaˈ misaˈosi a inaneng, kawra o soˈliˈlinay a taneng adihayayho ko macapiday. Sowal no Fangcalay Cudad: ‘O mangodoay ci Yihofaan i, o satapangan no taneng, mafanaˈ to Safangcalay a Kawas iraay ko taneng.’ (Taneng 9:10) Mihaenay, o mamisaˈicel kita ‘mafanaˈ to Safangcalay a Kawas,’ cipinang to harateng ni Yihofa, hanaca mitoor to harateng Ningra a misaˈosi. Sapiremoaw tonini, o mamicekiw kita to Fangcalay Cudad ato mitepangan a cudad. Mihaen, wa irato ko soˈliˈlinay a taneng ita.—Taneng 2:5-7.
4 Edengan ci Yihofa ko ngangaˈay pafeli kitaanan to soˈliˈlinay a taneng. (Loma 16:27) O Pipowaran no taneng Cingra, misamanay hani? Saka 1, o Misangaˈay a Tatapangan Cingra, ihkalay ko kafanaˈ Ningra to misangaˈan Ningra a maamaan. (ˈOlic 104:24) Saka 2, o kihcod a demak ni Yihofa patalahkalay to taneng. (Loma 11:33) Saka 3, o limoˈot ni Yihofa matomesay to taneng, pairaay to haepoc no mitengilay a tamdaw. (Taneng 2:10-12) Ano sapilifokaw kita to soˈliˈlinay a taneng, o mamicada tonini a taˈeneran a kimad, hanaca papikayat to soˈlinay kimad to pisaˈosi ato pidemak no mita.
w16.09-CH 23 fiedac 2-3 fatac
Kapah a Tamdaw, Paˈicelen ko Pakasoˈlinay Falocoˈ Iso
2 Kiso i, o midokoayto to Kawas anoca minanamayho to Fangcalay Cudad a kapah tamdaw han? ˈAlomanay tamdaw micadaay to sinkalon, cowa pakasoˈlin to iraay ko Misangaˈay a Tatapangan, o harateng iso i, sapilecadaw cangranan han? Ano tahasiˈayaway kiso to hatiniay a saroero, iraay ko pina hapakayraan papaˈicel to pakasoˈlinay falocoˈ iso, padama tisowanan mitawmec to nika pakasoˈlin. Sanay ko sowal no Fangcalay Cudad, o sapafeli no Kawas tisowanan a inaneng a miharateng ‘mamidipot tisowanan.’ Ano sangaˈayen iso a misaka dademak ko inaneng a miharateng, ono hekal a harateng cowa ito ko mamipalak to pakasoˈlinay falocoˈ iso.—ˈOsien ko Taneng 2:10-12.
3 O tamdaw ano soˈlinay mafanaˈ to Kawas i, o ngangaˈay palahad to ciˈicelay a pakasoˈlin no falocoˈ. (1 Timoti 2:4) Mankora, mikingkiw to Fangcalay Cudad ato mitepangan a cudad i, hamaan a caloh han a miˈaraw, saharateratengen a miˈosi, saˈicelen cipinang tora miˈosian a lalakaw. (Matay 13:23) Adihayay ko wacay patalahkalay to o Misangaˈay Tatapangan ko Kawas, o Kimad no Kawas ko Fangcalay Cudad. Onini lalakaw mamilengo mikingkiw i, ano saharateratengen a misimsim sasamaan paˈicel to pakasoˈlin no falocoˈ no miso.—Hipray 11:1.
Odoˈ no Sinael
it-2-CH 1181 fiedac 2 fatac
Madimadiay
Saka madimadiaw ko tamdaw tahatolas, cowa ko ngangaˈay mitadiˈec to niyah a ˈicel, papairaen ningra ko tanektekay a pakasoˈlin ci Yihofaan, mamisarocod to falocoˈ pakasoˈlin to milidongay a ˈicel no Kawas wangaˈ. (ˈOlic 25:21) Mikiˈokay ko Kawas, ‘mamalo sapatada’ no madimadiay tamdaw Cingra, midipot to rakat nangra. (Taneng 2:6-8; 10:29; ˈOlic 41:12) O madimadiay tamdaw itini kihcod a demak makalimay milifok to sapakahemek ni Yihofa, ihkal ko patosokan, rihaday ko kaˈorip, masadafdaf ko rarakaten a lalan. (ˈOlic 26:1-3; Taneng 11:5; 28:18) Maˈaraw ni Yopu ko moecelay tamdaw mapaekel no tatiihay tamdaw a misemsem, hanaca marapot a matekop ato tatiihay tamdaw, tada maoratan nanay. Kawra mikiˈokay ci Yihofa, ihkalay Cingra mafanaˈ to kaˈorip no moecelay tamdaw, mikiˈok to tatahadaˈoc a materek ko hafay nangra, mamilayap cangra to dipayal, milifok to ngaˈayay minaroˈan. (Yopu 9:20-22; ˈOlic 37:18, 19, 37; 84:11; Taneng 28:10) O tinakoan ni Yopu paihkalay, madimadiay ko demak a tamdaw ikakaay to adihayay a hafay, o mahaenay a tamdaw tada masakalimlaan, citodongay to kakangodoen no tamdaw. (Taneng 19:1; 28:6) Madimadiay ko demak a tamdaw mapalemeday ko teloteloc nangra (Taneng 20:7), iraay ko miterekan no wama nangra a makapahay taˈarawan, pakayni i makapahay ngangan no wama milifok to ˈdil.