Pakayni i Coyoh, o Kakafanaˈen Iso a Demak

Makalimay ci Yihofa mafanaˈ kita to i kakarayanay a paro no lomaˈ Ningra. Onini a taˈangayay paro no lomaˈ ˈalomanay ko coyoh, ‘o wawawawa no Kawas’ hananay cangra. (Yopu 38:7) Pakayni i coyoh, samaanay ko sowal no Fangcalay Cudad? Samaanay ko pifiyor no coyoh to tamdamdaw? O polong a coyoh sahtoay o masalalomaˈay i taˈangayay a paro no lomaˈ no Kawas han?

1. O maanan ko coyoh hananay hani?

ˈAyaw no misangaˈ ci Yihofa to cikiw, isalakatayho misangaˈ to coyoh. O coyoh kalacafayay ci Yihofaan i kakarayan, o ˈadingo ko tatirengan nangra cowa ka ˈaraw no tamdaw. (Hipray 1:​14) O kaˈaloman no coyoh i, masapatepatekay masaˈofaˈofaday, cowa ka hahecahecad cangra. (Paˈarawan 5:​11) Cangra i, ‘milahciay to sowal ni [Yihofa], midofdofay to limoˈot Ningra.’ (ˈOlic 103:20) Itini nolitengan, nolatek miocoran ni Yihofa ko coyoh milasil to lihaf Ningra, miocoranho cangra mipadang ato milidong to finawlan Ningra. Anini, o coyoh mikayatay to Krisciyang mikilim to sakafanaˈaw to Kawas a tamdaw.

2. O cima ci Satan? O cima kora ilaenoay ningra a tatiihay coyoh?

O romaroma coyoh cowa ka madimadi ci Yihofaan. O sakacecay mitowakangay ci Yihofaan a coyoh i, ‘ci Akoma ci Satan hananay, mioratay to polong a tamdaw i hekal.’ (Paˈarawan 12:9) Mihalakaay ci Satan malo mikowanay, mansa mikayhiday to lalitengan ita mitowakang to Kawas. Ikor romaroma a coyoh mafiyoray ningra, mihakelong a mitowakang to Kawas. Ora mitowakangay a coyoh o tatiihay coyoh hananay. Milaplapanto ni Yihofa cangra nai kakarayan tayni fafekang no sera, salikorto i, o papalaˈafoen cangra.​—ˈOsien ko Paˈarawan 12:​9, 12.

3. Ci Satan ato ilaenoay ningra a tatiihay coyoh tano maanan a pakayraan miorat kitaanan?

Ci Satan ato tatiihay coyoh ningra misakadademakay to milingatay to misakawasay a demak miorat to tamdamdaw. ˈAlomanay tamdaw micawmaˈay to misakawasay, kawra cowa ka fanaˈ to cima ko miontingay ilalikor: O misakawasay hananay i, micawmaˈay cangra to tatiihay coyoh. Tinakoen, miˈedaway to fuˈis anca mipahantangay ko tamdaw, o roma tamdaw misalalicayay to misatangkiay, roma tamdaw tano misakawasay a pakayraan miadah to adada. Harateng no ˈalomanay tamdaw ngaˈayay masasowal to mapatayay a tamdaw sanay.a Onini a maemin sahtoay o sapisaˈfit ni Satan ato tatiihay coyoh. Mirikecay ci Yihofa kitaanan: ‘Aka paˈedaw misaali to sapadang, aka pilicay to misatangkiay.’ (Lifi 19:31) Mihaen ko sowal Ningra o sapidipotaw kitaanan. Ci Satan ato tatiihay coyoh o ˈada no Kawas, sapidokaˈaw kitaanan.

CALEPEN MIKADKAD

4. O coyoh mipadangay to tamdaw mafanaˈ ci Yihofaan

O coyoh no Kawas cowa ka patodicek sa mitosil to tamdaw, latekay mikayatay cangra to finawlan no Kawas mikilim to sakafanaˈaw to Kawas a tamdaw. ˈOsien ko Paˈarawan 14:​6, 7, ikor lengoen ko ilaenoay a salicay:

• Itini mitosilay a tayal, misamaanay hano misaali kita to sapadang no coyoh?

• O coyoh mikayatay tisowanan mikilim to sapitengilaw to kimad no Fangcalay Cudad a tamdaw. Mafanaˈ tonini, coko makowaday ko falocoˈ iso han? Misamaanay aki?

5. Aka a pitefing to misakawasay

Ci Satan ato ilaenoay ningra tatiihay coyoh o ˈada ni Yihofa, o ˈada no mita. ˈOsien ko Luka 9:​38-​42, ikor lengoen ko ilaenoay a salicay:

• Samaanay ko tatiihay coyoh to tamdaw hani?

Aka a picapid kita to maamaan milingatay to tatiihay coyoh a demak. ˈOsien ko Limoˈot 18:​10-​12, ikor lengoen ko ilaenoay a salicay:

• Misakadademakay ko tatiihay coyoh to maanan a demakan masasowal kitaanan, mifiyor kitaanan hani? Itini kitiraan iso a pala, marariday ko tamdaw midemak to maanan milingatay to misakawasay a demak hani?

• Micongeday ko Kawas to tamdaw micawmaˈ to misakawasay, matatodongay ko saali Ningra sanay kiso miharateng han? Misamaanay?

Nengnengen ko IKA, ikor lengoen ko ilaenoay a salicay:

IKA: “Micongangah ci Akomaan” (5:02)

• Oya misakadangan no wawa ni Palisa a kadang tatiihay sanay kiso miharateng han? Misamaanay?

• Mamisamaan ko demak ni Palisa wa ngaˈ caka makalisanga no tatiihay coyoh hani?

O soˈlinay a Krisciyang padadotocay micongangah to tatiihay coyoh. ˈOsien ko Dmak 19:19 ato 1 Korinto 10:21, ikor lengoen ko ilaenoay a salicay:

• Ano iraay ko pina milingatay to misakawasay a dafong iso, hano haeminen a mitodoh hani?

6. Milowid ci Satanan ato ilaenoay ningra tatiihay coyoh

Makowanay ni Satan ko tatiihay a coyoh, o madimadiay ci Yihofaan a coyoh mitengilay to pikerid no kakeridan no coyoh ci Mikail. O roma ngangan ni Yis ci Mikail hananay. Hakowaay ko ˈicel ni Mikail hani? ˈOsien ko Paˈarawan 12:​7-9, ikor lengoen ko ilaenoay a salicay:

• Cima ko taˈakayay ko ˈicel? Ci Mikail ato coyoh ningra ha, anca ci Satan ato tatiihay coyoh ningra ha?

• Miharateng kiso o nisawawaan ni Yis oha mamatalaw ci Satanan ato tatiihay a coyoh ningra han?

O ngangaˈay kiso pakalowid ci Satanan ato tatiihay a coyoh. ˈOsien ko Yakop 4:​7, ikor lengoen ko ilaenoay a salicay:

• Sasamaan kiso midipot to niyah eca ka madokaˈ ni Satan ato tatiihay a coyoh?

KALIMLAAN

Madimadiay ci Yihofaan a coyoh papadama kitaanan. Ci Satan ato tatiihay coyoh o ˈada ni Yihofa, misaka dademakan nangra ko milingatay to misakawasay a demak miorat to tamdaw.

Lomalen

• O coyoh ni Yihofa samaanay padama to tamdaw mafanaˈ ci Yihofaan?

• O cima ci Satan? Ilaenoay ningra a tatiihay a coyoh o cima hani?

• O harateng iso i, hano aka pitefing to maamaan milingatay to misakawasay a demak?

MALALITINGAY A LALAKAW

Nengnengen hena iraay ko maanan a wacay paihkalay, o ci Yis i, o kakeridan no coyoh ci Mikail.

“O Cima ko Kakeridan no Coyoh ci Mikail?” (Lalakaw no wangcan)

Ci Satan hananay i, cowa ko tatiihay falocoˈ anca tatiihay a capeling no tamdaw ko mitoroˈan, hano saan ko sowal hani?

“Soˈlinay Ira Ci Akoma i Hekal Han?” (Lalakaw no wangcan)

Nengnengen ko cecay fafahiyan samaanay miliyas to pifiyor no tatiihay a coyoh.

“Mahelaayto Ningra ko Araaw no Tamdaw Maˈorip” (Mikecolay, 1993/7/1)