“Caay ko Mamalasawad ko Sowal no Kawas”

1, 2. (1) Ano awa ko Fangcalay Cudad, wa masamaan ko kaˈorip ita hani? (2) O manan ko papadama kitanan madolo a cipinang to Fangcalay Cudad?

ANO awa ko Fangcalay Cudad, wa sasamaan ko kaˈorip ita hani? Wa awa ko pitiˈeran ita a sakayat, pakayni i Kawas, hakelong no ˈorip no tamdaw ato noikoran a maamaan a salicay, o aawa ko kahemekan a caˈof. Wa cowa ko mamafanaˈ kita to samaanay ko Kawas micada to tamdaw.

² Karahekeran i, cowa ko mamisiˈayaw kita to matiniay a pakayraan, samanen pafelian ni Yihofa ko tamdaw to Sowal Ningra i Fangcalay Cudad, o Sowal Ningra cowa ko mamalasawad. Tarokos ci Pitiro tano Isaya 40:8 a mitadtad to mamaterek tahadaˈoc ko Kimad no Kawas. (ˈOsien ko 1 Pitiro 1:24, 25.) Micekiw to Fangcalay Cudad ciepocay kitanan, ano tano kafanaˈan a sowal no mita a miˈosi i, mangalefay adihay ko epoc, hatiraay ko sowal no maolahay to Kimad no Kawas a ˈalomanay tamdaw. Pinaayto a soˈot a miheca, misaˈicelay ko tamdaw mihongyak to Fangcalay Cudad, mipatenak to Fangcalay Cudad, soˈliˈlin cowa ko madoloay koniya demak. Tona “mangalay ko Kawas to sakafanaˈaw no polong no tamdaw to soˈlinay a Sowal.” Saka, makalimay cangra mitoor to araaw no Kawas a mihaen to demak.​—1 Timoti 2:3, 4.

3. Itini toni lalakaw mamilengo to manan? (Nengnengen ko satapangan coka.)

³ Itini toni lalakaw, nengnengen ita i masamaanay a pakayraan materek ko Kimad no Kawas: (1) O nika falic no sowal; (2) o lingad no mirikecay mifiyoray to matenakayto kalosowal; (3) macongeday ko pihongyak to Fangcalay Cudad. Ano mafanaˈay kita to samaanay materek ko Fangcalay Cudad tahanini i, o mamangalef a misalimela to Kimad no Kawas, mamatongal ko kaolah to papitiliday to Fangcalay Cudad a Kawas ci Yihofaan, samanen o sakaciepoc no mita a pafeli to Fangcalay Cudad.​—Mika 4:2; Loma 15:4.

O NIKA FALIC NO SOWAL

4. (1) Mataˈlif ko toki, samaanay mafalic ko sowal? (2) O manan ko paihekalay to cowa pisakakinih ko Kawas to masasi romaromaay a sowal? Pakayni toninian samaanay ko harateng iso?

⁴ Mataˈlif ko toki, mafalicay ko sowal. O tatodong no sowal mafalicay. Alatek maˈaraw iso ko nika cakat a mafalic ko sowal no Amis. Ano o Hipray ato Krisiya a sowal no Fangcalay Cudad, adihayay ko nika falic. Mihaenay haw i, ira ko mahongyakay a Fangcalay Cudad, wangaˈ cipinang to Kimad no Kawas. Ano, oyato mafanaˈay to aniniay Hipray ato Krisiya sowal a tamdaw, misaaliay to hatiniay a mahongyakay Fangcalay Cudad. Soˈliˈlin, o roma tamdaw minanam tono kalitengay a Krisiya a sowal ngaˈ, cipinang to Fangcalay Cudad sanay, ˈarawhan cowa ka hatira.a Kahemekan i, nohatini, o mahaeminayto mahongyak a Fangcalay Cudad ato pinapina a cacudadan mataˈlifayto ko 3,200 a sasowalan. Mankora, mitokelay ci Yihofa to “kasakitakit itini i hekal, i kasafinacadan, i kasangasaw, i kasasi romaroma no sowal ato kasafinawlan” a tamdaw, cipinang to Fangcalay Cudad a milifok to epoc. (ˈOsien ko Paˈarawan 14:6.) Cowa pisakakinih to tamdaw ko Kawas, coko mamasemer kiso to sapiingidaw Cingranan saw?​—Dmak 10:34.

5. O Hongti Yakop Fangcalay Cudad hano masaka limelaan a mihongyakan?

⁵ O nika falic no sowal mifiyoray to pihongyak to Fangcalay Cudad. Isalakat mafanaˈayho ko tamdaw miˈosi, ikor cato ka ˈaloman ko mafanaˈay. Patinakoen kono Padaka a Fangcalay Cudad, Hongti Yakop Fangcalay Cudad no Padaka itiniay isaka 1611 miheca a tepangen, onini Fangcalay Cudad taˈangayay ko pifiyor to sowal no Padakab Nikawrira, itini toni Hongti Yakop Fangcalay Cudad, kinapinaay aca masadak ko ngangan no Kawas. Itini i Hipray Fangcalay Cudad, pinaay aca sinael masadak ko “Yihofa”, o adihayay a sinael tano “TAPANG” hananay mikotay to ngangan no Kawas. Ikor, ono Krisiya Fangcalay Cudad mahecaday tano “TAPANG” hananay mikotay to ngangan no Kawas, ano mahaenay i, isalakat iraayho ko ngangan no Kawas masadak i Faelohay a Katatelekan Cudad kira.

6. Misamaanay hano mahemek kita miˈosi to Fangcalay Cudad Faelohay hekal mihongyakan hani?

⁶ Halafinto ko toki, o adihayay a sowal itini i Hongti Yakop Fangcalay Cudad palidlid sanayto mataˈlif, o romaroma saˈayaˈayaw a mihongyakan mahaenay. Nikawrira, iraay nohatini kono aniniay sasowalan Fangcalay Cudad Faelohay hekal mihongyakan. Onini mihongyakan mahaeminayto mahongyak, anca o pinapina a cacudadan mataˈlifayto ko 150 a sasowalan, paihekalay koni ˈalomanay tamdaw nohatini ngaˈayay pakaˈosi tono niyah a sasowalan a Fangcalay Cudad Faelohay hekal mihongyakan. Onini mihongyakan kalasaka dademakan ko isekalay a sowal, madoloay masemer ko falocoˈ no tamdaw a miˈosi. (ˈOlic 119:97) Itini i Fangcalay Cudad Faelohay hekal mihongyakan mahaeminay masadak ko ngangan no Kawas.

MATENAKAYTO A KALOSOWAL

7, 8. (1) Tahinito isaka 3 hahekalan, o Yutaya a tamdaw misamaanay hano cowato ka fanaˈ to Hipray sowal? (2) O manan koya sano Krisiyaay sowal a 70 Tamdaw a Mihongyakan hananay?

⁷ Nolatekay o nika lingad no mirikecay, mifiyoray to matenakayto a kalosowal no tamdaw. Ano hatiraay, cipinangayto ko ˈalomanay tamdaw to Fangcalay Cudad han? Nengnengen ita ko cecay tinakoan, mamafanaˈ tora caˈof. Isalakatay a 39 lolod no Fangcalay Cudad, o Israil anca Yutaya tamdaw ko mitiliday, tona “mapatorod no Kawas i Yutaya a tamdaw ko Sowal Ningra.” (Loma 3:1, 2) Kawra, tahinito isaka 3 hahekalan, cowato ka fanaˈ to Hipray sowal ko Yutaya tamdaw. Misamaanay aki? Samanen mapadikayto ni Alicanta, miala ko adihayay kitakit misakakahad tono Krisiya a mikowanan. (Taniil 8:5-7, 20, 21) Macowatto ko nikowanan a kitakit, ono Krisiya a sowal malo kalosowal no ˈalomanay tamdaw, mahawpay ko icowacowaay a Yutaya tamdaw. Itiya ˈalomanay a Yutaya tamdaw tona o Krisiya aca sowal ko kafanaˈan, mamisamaan cipinang tono Hipray Fangcalay Cudad saw?

⁸ ˈAyaw i Yis to saka 250 miheca, ya saˈayaw 5 cudad no Fangcalay Cudad, mihongyakan nai Hipray palo Krisiya a sowal. Tangasa isaka 2 hahekalan to ˈayaw ni Yis, malaheciay a mahongyak ko polong a Hipray Fangcalay Cudad. Oniya mahongyakay, o 70 Tamdaw a Mihongyakan hananay. Onini i, o saka cecay sano Krisiyaay sowal a Hipray Fangcalay Cudad.

9. (1) Oya 70 Tamdaw Mihongyakan ato romaroma a mihongyakan, misamaanay mifiyor to miˈosiay to Fangcalay Cudad a tamdaw? (2) O manan ko tada kaolahan no tekedan iso a sinael?

⁹ Matepangto koni 70 Tamdaw a Mihongyakan i, o sano Krisiyaay ko sowal a Yutaya tamdaw ato romaroma, cipinangayto miˈosi to Hipray Fangcalay Cudad. Ngaˈay cangra tano nowina sowal a miˈosi to Kimad no Kawas, tada kalipahakan a demak! Ikor, misatapangto mihongyak to sano Siriya, Kotik ato Latin a kalosowal no tamdaw. Ano tano ka fanaˈan a nowina sowal a miˈosi to Fangcalay Cudad i, o mamatongal ko olah to Kimad no Kawas, mahaen kitanan aniniay a Krisciyang, ira ko tada kaolahan no tekedan a sinael. (ˈOsien ko ˈOlic 119:162-165.) Ano masamaanto mafalic ko kalosowal no tamdaw, o Kimad no Kawas o mamaterek.

MACONGEDAY KO PIHONGYAK TO FANGCALAY CUDAD

10. I lintad ni Yohani Wikelif, o ˈalomanay tamdaw misamaanay hano cowa ka dolo a milifok to epoc nai Fangcalay Cudad?

¹⁰ Iraay ko cecay a liyad, sapicongedaw ko cifadangalay tamdaw to kalo tamdaw a mafanaˈ to Fangcalay Cudad. Nikawrira, iraay ko moecelay tamdaw timoloay a misiˈayaw tora saconged. Patinakoen, ˈayaw no 600 miheca, ci Yohani Wikelif, ano cimacimato tamdaw oha mamafanaˈ to Kimad no Kawas a ciepoc sanay cingra. Kawra, itiya o kalo a tamdaw i Ingkelan awaay ko pakayraan a ira ko Fangcalay Cudad anca cipinang to lihaf no Fangcalay Cudad. Hano hatira saw? Samanen, o Fangcalay Cudad tano kamayan a mitilid, tada matekesay ko ˈaca, cowa pakaˈaca ko kalo a tamdaw. Hanaca, o ˈalomanay tamdaw itiya cowa ka fanaˈ miˈosi to tilid. Soˈlin tayniay i kiyokay a mitengil to piˈosi to Fangcalay Cudad, cowa ka cipinang cangra, samanen, sano Latinay a sowal ko miˈosian a Fangcalay Cudad. Itiya toya lintad, cowato ka fanaˈ ko kalo tamdaw to Latin a sowal. Hay, wa misamaan ko tamdaw pakatama to masimeday a odoˈ no Fangcalay Cudad hani?​—Taneng 2:1-5.

11. O mihongyakan ni Yohani Wikelif a Fangcalay Cudad, misamaanay a mifiyor to tamdaw?

¹¹ Isaka 1382 miheca, mihongyakan ni Yohani Wikelif a sano Padakaay a Fangcalay Cudad matepangayto, kalikiay a matenak i mihakelongay cingranan a tamdaw, cangra makalimay to sakafanaˈaw no kalo tamdaw to Fangcalay Cudad, saka pakaniyaroˈ niyaroˈay cangra miedef to Ingkelan. Miˈosian patengil ko tamdaw to pina sinael, ikor pafelian to tano kamayan mitilid a Fangcalay Cudad ko malitemohay tamdaw. Tona mihaen cangra a misaˈicel, makidatay ko hemek no tamdaw to Fangcalay Cudad.

12. Samaanay ko pinengneng no misasingsiay no kiyokay to nidemakan ni Wikelif?

¹² O misasingsiay no kiyokay itiya tada ˈintehay ci Wikelifan, ˈintehay to mihakelongay cingranan a tamdaw. Mipalakay ko kakeridan no kiyokay to mihakelongay ni Wikelif a tamdaw, mikilim to polong a mihongyakan ni Wikwlif a Fangcalay Cudad, mihaemin a mitodoh. Mapatayto ci Wikelif, o misiwatikay tamdaw hananay cingra pangangan, mikorkor to ˈokak ningra a mitodoh, folesaken i ˈalo ko ˈafo no okak ningra. Soˈliˈlin hatira, awaay ko pakayraan no kiyokay a miconged to makalimay miˈosi ato sakafanaˈaw to Fangcalay Cudad a tamdaw. Mikitiya a misatapang to pina a hahekalan a miheca, itini i Iwropa ato romaroma pala a tamdaw, toha saka ciepocaw no ˈalomanay tamdaw, mipadangay to mihongyakay ato mitepangay to Fangcalay Cudad a demak.

“TO SAKA CIEPOC ISO, PASIFANAˈEN AKO KISO”

13. Ano nengnengen ita milomal ko likisi no mihongyakay demak, wa pakasoˈlin to manan? Misamaanay mifiyor to pakasoˈlinay falocoˈ ita?

¹³ Oya 70 Tamdaw Mihongyakan, mihongyakan ni Wikelif a Fangcalay Cudad, Hongti Yakop Fangcalay Cudad, o nano mipatemeran no Kawas a mihongyakan, cowa ka saan kita anini. Nikawrira, ano nengnengen ita milomal ko likisi no pakayniay mihongyakay demak, o papasoˈlin kita: Mitooran ni Yihofa ko sakiˈok Ningra, mitafo a miterek to Kimad Ningra. Coko papaˈicel to falocoˈ ita, pakasoˈlin to mamalaˈosi ni Yihofa ko kihecod a mikiˈokan Ningra han?​—Yosuwa 23:14.

14. Misamaanay patangongol ko Kimad no Kawas to olah ita i Cingranan?

¹⁴ Cowa ko papaˈicel aca to falocoˈ ita, o mamatongal ko olah ci Yihofaan.c Haratengen hena, hano pafelien ni Yihofa ko tamdaw to Kimad Ningra hani? Hano mikiˈok ci Yihofa to tatafoen Ningra miterek ko Kimad Ningra hani? Samanen maolahay Cingra kitanan, pasifanaˈay kitanan, papilifok to epoc kitanan. (ˈOsien ko Isaya 48:17, 18.) Hatini ko nika olah ni Yihofa kitanan, o kakaolahen ita Cingra, dofdofen ko limoˈot Ningra.​—1 Yohani 4:19; 5:3.

15. Ilaenoay a lalakaw wa milengo to manan?

¹⁵ Tona misalimelaay kita to Kimad no Kawas, miharatengay to sapilayapaw to epoc naitira. Misamaan kita ngaˈ, malayap ko sataˈangayay a epoc nai Fangcalay Cudad hani? Ano mitosil kita i, sasamaanen ita papisinanot ko tamdaw to lihaf no Fangcalay Cudad hani? O mipasifanaˈay i kasakopang a salikaka, misamaan a misalalangi to Fangcalay Cudad a pakafanaˈ to tamdaw hani? Tora ilaenoay lalakaw, o papacaˈof toni salicay.