Mafanaˈay Kiso Han?

Tahacada ci Stifano to sapalak hano ngaˈay mitafo to rihaday hani?

TOMIRENGAY ci Stifano i ˈaˈayaw no Lomaocay a tamdaw, mariˈangay koniya tamdaw cingraanan. O Lomaocay saˈakawangay no Yutaya a hoing, oya 71 a tamdaw o sakakaay ilalomaˈ no Yutaya tamdaw. O palisopsopan ni Kayafas koniya pisawkit, ˈayaw nonini to pina a folad, o misawkitay to papatayen ci Yis a Lomaocay ci Kayafas ko misikayay. (Matay 26:57, 59; Dmak 6:8-12) Itini pisawkitan, iraay ko papina makaniway misawacay mieko ci Stifanoan, nikawrira pakaˈaraway ko itiraay tamdaw to “matiya o pising no coyoh ko pising [ni Stifano] a nengnengen”, tada macekiday cangra tonini.​—Dmak 6:13-15.

Tahasiˈayaw ci Stifano to hatiniay a pakayraan hano ngaˈayho mitafo to rihaday hani? Itini ˈayaw no papatayraen ci Stifano i Lomaocay i, micadaay cingra to sakayat no ciˈicelay a fangcalay saocor no Kawas, misarocod midemak to paikenan no salikaka a tayal. (Dmak 6:3-7) Tiya masawkit ci Stifanoan i, iraay ko fangcalay saocor i tireng ningra, padama cingranan a mitafo to rihaday, pakaharateng to adihayay a sinael. (Yohani 14:16) Mikitini i Dmak saka 7 fedengan, tiya timolo ci Stifano paˈading to niyah i, padamaay ko fangcalay saocor cingranan pakaharateng to 20 a sainael no Hipray Sowal a Fangcalay Cudad. (Yohani 14:26) Dotocto, itini i mapolosi maˈaraway ni Stifano tomirengay ci Yis i kawanan no Kawas, patongalay paˈicel to pakasoˈlin no falocoˈ ningra koninian.​—Dmak 7:54-56, 59, 60.

Alatek wa misiˈayaw kita to sapalak anca piroero no tao. (Yohani 15:20) Kawra, ano ceriden ita micekiw ko Fangcalay Cudad, misaˈicel a mitosil, wa macada ita ko sakayat no fangcalay saocor no Kawas, wa iraho ko ˈicel a misiˈayaw to sapalak no tao, mitafo to rihaday no falocoˈ.​—1 Pitiro 4:12-14.