Mafanaˈay Kiso Han?
Isaka 1 Hahekalan a Kasaˈopoan: O kasaˈopoan no Yutaya isaka 1 hahekalan, itiniay i Kamola, kawali to sakaˈamis maedeng 10 kongli no Kalili. Onini coka mahapinangay ita kono litengan a kasaˈopoan.
O kasaˈopoan no Yutaya naicowaay ko kasadakan hani?
O “KASAˈOPOAN” hananay a tilid nai Krisiya a sowal, tatodong i, “o saˈopo” anca “malisopsop” sanay. Nano litenganho o kalisopsopan no Yutaya tamdaw a pinanaman ato pidokoan a kitiraan. O Fangcalay Cudad no Hipray Sowal, cowa pasomowal to “kasaˈopoan”, nikawrira o Fangcalay Cudad no Krisiya Sowal paihkal to iraayto ko kasaˈopoan a kitiraan, itini isaka 1 hahekalan.
O harateng no ˈalomanay mikingkiway, na malaholiw ko Yutaya tamdaw tayra i Papilon i, misatapangay cangra patireng to kasaˈopoan. Hakacudad no Yutaya (no Padaka) sanay a mitadtad: “Oya malaholiway tayra i Papilon a tamdaw, awaayto ko fangcalay sefi, masomaday ko falocoˈ nangra, misaaliay to sahinom, mansa malisopsopay cangra itiniay i Pahanhanan a Romiˈad, malacafay miˈosi to sinael alatek.” Mapasalatto cangra ikor, padotocayho a malacafay mitolon ato miˈosi to sinael. Ano icowato a pacarcar cangra, itiraay patireng to kasaˈopoan.
Saka 1 hahekalan, itini i salawac no Tenokay a Riyar, i taliyok no Israil ato ilalomaˈ no Israil, adihayayto ko kasaˈopoan, malo saˈopo ato picawmaˈan a kitiraan. O singsi no Hipray taykak i Yirusalim ci Li Raywen, sanay: “Ora kasaˈopoan o pinanaman, kakomaenan to fangcalay kakaenen, pisawkitan to demak, pakiyahoan a kitiraan, kalasaka dademakanho no mirikecay ato macacawmaˈay a demak. Sakakaay ono pidoyongan a demak.” Mansa mararid ci Yis mirienang to saˈopo itiya. (Marko 1:21; 6:2; Luka 4:16) Itiraay cingra pasifanaˈ pakalalok to tamdaw. Mapatirengto ko kasakopang no Krisciyang i, mahecad ci Yisan, marariday ci Pawlo pasifanaˈ to tamdaw itira. ˈAlomanay ko sakafanaˈaw to Kawas a tamdaw, tayra malisopsop, mihaenay ano tayra ci Pawlo ko cecay kitiraan, wa isalakat tayra i kasaˈopoan a mitosil.—Dmak 17:1, 2; 18:4.