No Telangan a Cudad “Paselakanto”
1970 MIHECA, itini i kaetip no Mapatayay Riyar a Enketi, mikingkiway to litengan a tamdaw mahelaay ko mitodohan maˈongˈongay a cudad. Itiya mikorkoray cangra to kitiraan no kasaˈopoan no Yutaya, o kitiraan noniya sefi a niyaroˈ maedeng itini isaka 6 hahekalan matodoh. Pakidemay ko kapalak noniya cudad, cowato ka hapinang ko tilid, ano papaselaken i mamatongal ko kapalak. Kao ngaˈayay iraay ko inaneng no 3-D a misolap, hato ngaˈayay “paselaken” koniya cudad, ngaˈayayto maˈosi ita nohatini ko lalakaw noniya cudad.
O maanan ko matiliday noniya cudad hani? O satapangan no Lifi a pina sinael, oniya sinael iraay ko sepat no Hipray a ngangan no Kawas. Oniya sinael no Hipray maedeng itiniay isaka 1 tangasa saka 4 hahekalan a tiliden, midoedoay to Komolan masadak a matelangay a cudad. O mikingkiway ci Cie, itini i Sinpong no Yirusalim masowalay, itini i ˈayaw no mahela koniya cudad i Enketi, o saka tosa ko katelang a mitilidan itiniay isaka 10 hahekalan a mahela, oniya mitilidan maedeng 1,000 miheca ko kararaay. Miharateng ko mikingkiway, o mahelaay i Enketi a cudad paihkalay, soˈlin pinaayto patek miheca koniya cudad, kawra matatodongay ko lalakaw, hanaca cowa ka fiyor no mararaway a pitilid no tamdaw.