Minokay i Nalacolan Matayal, Kadofahay ko Minaroˈan

ˈALOMANAY salikaka na malinahay tayra i Iwropa anca Padaka a maˈorip, ikor minokayay i nalacolan. Pakayni kaolah ci Yihofaan ato roma tamdaw, malinahay cangra i misaaliay to mitosilay a kilac matayal. (Matay 22:37-39) Kinafalahay cangra to maanan, milifokay to maanan sapalemed hani? Nengnengen ita ko tinakoan no kaetipan no Afrika Komayrong.

“MATATODONGAY ‘PIFOTINGAN’ A NGAˈAYAY PALA”

1988 miheca, cecay ci Awnisimo salikaka miliyasay to nalacolan i Komayrong, itini roma kitakita 14 miheca. Cecay romiˈad, matengilay ningra i saˈopo no kasakopang ko pakayniay mitosilay a sapatinako. Sanay ko mikimaday: “Ano ira ko tatosa malo widangay itini cowa kalecad a kitiraan mifoting, adihayay ko malepelay no cecay, oya cafay madeng o tatayra a mifoting, cowa ka hatira han?”

Matengil koniya sapatinako, misimsimay ci Awnisimo sapinokayaw i Komayrong, padama to itiraay a mitosilay “mifoting,” samanen ˈalomanay ko tamdaw makalimay minanam to Fangcalay Cudad. Kawra calemcemay cingra, halafinayto ko niyah miliyas to nalacolan, wa mananamho itira han? Orato, minokayay ci Awnisimo i Komayrong to 6 folad mihapinang to pakayraan. Ikorto 2012 miheca, minokayayto cingra i nalacolan.

Sowal ni Awnisimo: “Faedetay ko romiˈad i nalacolan, cangoˈotay ko sakaˈorip. Ano masaˈopo o pahal ko kamaroˈan, halafinayto kako caka maroˈ to mahaenay.” Matawaay cingra, sanay ko sowal: “Kawra, ano misamacay kako masaˈopo, cato ka tangoˈol to rihadayay a kasaˈopoan i salakat.”

Itini 2013 miheca ciraramod ci Awnisimo, ci Leetien ko fafahi ningra, ˈayaw no minokay cingra i Komayrong itiniay Frans maˈorip to 9 miheca. Fanekfekay cangra tatosa matayal saki Kawasan, milifokay to maanan sapalemed hani? Sanay ci Awnisimo: “Malacafayay kami mirienang to SKE, ikor tayraay i Pitil matayal. Lalomaˈ no cecay miheca, 20 ko micadaay to paputisem i kasakopang niyam. Tada o ngaˈayay ‘pifotingan’ a pala konini!” (Marko 1:17, 18) Sanay ci Leetien: “O malifokay ako sapalemed mataˈlifay ko maharatengay!”

MALECADAY O WAWA AKO CANGRA

Ci Cotis na itiniay i Padaka, itiya makalimay cingra mitongal to katayal saki Yihofaan. Sanay cingra: “Ano minokay kako i Komayrong milisoˈ to salawina i, misatapangay malalengo to Fangcalay Cudad i papina tamdaw. Ano miliyas tomangicay kako, tangoˈolay to pacekiwan.” Kawra, kamayan caka minokay ci Cotis i Komayrong, samanen ngaˈayay ko lifon ningra i Padaka, ngaˈayay sapaising to adadaay a wama. Kawra, pakasoˈlinay ci Cotis ci Yihofaan, ikor minokayayto cingra i Komayrong. Ihkalay ko sowal ningra tangoˈolay cingra to rihadayay a kaˈorip i roma kitakit, micangacangay ci Yihofaan miremo to kafalic. Mikitiniay cingra i mararamoday kasakilac kantok milifok to sapakalalok.

Tikolen miharateng, sanay ci Cotis: “Lalomaˈ no 3 miheca 4 ko mapadamaay ako a tamdaw malo Krisciyang, malecaday o wawa ako cangra. Tada lipahakay kako!” Ikor, misatapangay ci Cotis malo mikiriwiˈay misakafahay, nohatini cingra ato faˈinay ci Samokaste malo milisoˈay a kasakilac kantok. Samanayto ko wama ni Cotis hani? Mahelaay ni Cotis ato paro no lomaˈ ko roma kitakit a pipaisingan, makahiyay pacafay pasadak to sapaising a payci, hanaca malaˈosiyay ko pitokad.

MICADA TO SADIMOKOS NI YIHOFA

O cecay salikaka ci Fiktoe na itiniay Kanata maˈorip to cecay liyad. Itiya, itini Mikecolay maˈosiay ningra ko takaraway picudadan a lalakaw, papiharateng to niyah a pakayraan. Ikor misetekay ko falocoˈ ningra cowa to padotoc tayra takaraway picudadan, ao miriengto mieminay to toki pahatatanam to inaneng. Sowal ni Fiktoe: “Mihaen wa kaliki misatapang matayal kako, wa ngaˈay malaˈosi ko patosokan ako, malo misakafahay.” Ikor mararamod ci Fiktoe, malacafay to fafahi ci Karolin minokay tayra i Komayrong. Miˈaraw to Pitil cangra i, roma salikaka papiharatengay cangranan ngaˈay milinah tayra i Komayrong matayal hokira. Sowal ni Fiktoe: “Awaay ko lalangian niyam minaˈay, hanaca padotocay kantang ko kaˈorip niyam, sakalinahaw cowa ko pasangaray.” Soˈlin calemcemay ci Karolin to tireng no niyah, kawra misetekay to falocoˈ malinah cangra.

Ci Fiktoe aci Karolin malacafayay malo miceriday misakafah, ˈalomanay ko malitemohay maolahay to Fangcalay Cudad a tamdaw. Satapang aca, o coking sanay ko sakaˈorip nangra, cowa ka picokang. Ikor, matayalay cangra i Kanata to pina folad, mihaen ngaˈayto cangra i Komayrong a misakafah. Milifokay cangra to maanan sapalemed hani? Mirienangay cangra to SKE, malo mikiriwiˈay misakafahay, nohatini o patirengay to kasaˈopoan a sikawdan. Sanay ci Fiktoe: “Makahi kami mihawang, midemak to kafalic, telocto micadaay to sadimokos ni Yihofa.”

AWAAY KO MIKIKAKAAY TONI KO KALIPAHAK

2002 miheca, itini taykak no Towic micudad ci Aile maˈosiay ko “Kaemangay—Sasamaan Sakadademak To Kaˈorip No Miso?” a tancang, mapakalalokay misaˈosi to faelohay a patosokan. 2006 miheca, mirienagay cingra to MTS, ikor micudiyap manilnilay cingra tayra i kahofocan a Komayrong.

Itini Komayrong, mahelaay ni Aile ko cowa pihaemin to toki a tayal. Ikor iraay ko adihayay ko lifon a tayal mitahidangay cingranan, kawra calemcemay cingra to mamifiyor to mitosilay a tayal no niyah. Toniya tatokian, matahidangay ci Aile malo mikiriwiˈay misakafahay, tangsolay cingra micada. Sapitongalaw ko tawki to lifon ningra, cowa ka picada cingra, kamayan mipiliˈ malo mikiriwiˈay misakafahay. Ikor, ci raramoday ci Aile, fafahi ci Stefena halafinay i Frans maˈorip. O maanan a pasangaray ko malifaay ni Stefena i Komayrong hani?

Sowal ningra: “Iraay ko adada no tireng ako, caengetay ko tireng, kawra mahelaay ko sapiadah a pakayraan, idahiyayto ko tireng.” Padotocay cangra malo mikiriwiˈay misakafahay, milifokay to maanan a sapalemed hani? Sowal ni Aile: “Tayraay kami i Katay maraayay a pala mitosil, malitemohay ko ˈalomanay makalimay minanam to Fangcalay Cudad a tamdaw, tano tingwaan malalengo cangranan minanam to Fangcalay Cudad. Ikor, tatosaay a pacekiwan micadaayto paputisem, mapatirengayto ko cecay kapot.” Sowal ni Stefena: “Ngaˈay padama to tamdaw macakat, maˈaraw cangra patafang to tireng ci Yihofaan, awaay ko mikikakaay toni ko kalipahak! Itini kami adihayay ko mahaenay a nalifetan.” Nohatini, cangra mararamod o milisoˈay kasakilac kantok ko tayal.

SOˈLINAYTO O HADADEMAKEN ITA KONINI A DEMAK

Ci Cisaye itini Itali minanam tono ising a inaneng a tatokian micadaay to paputisem. Maˈaraw ningra ko pasifanaˈay cingranan a mararamoday misakafahay kantangay ko kaˈorip, mapakalalokay cingra, sapitongalaw to mitosilay a tayal. Mihaenay, ikor micudiyap ci Cisaye misatapangayto malo misakafahay.

Ci Cisaye sapinokayaw tayra i Komayrong sapitongalaw to tayal saki Yihofaan, kawra cisasaay cingra. Sowal ningra: “Wa misawad kako to fadangalan mikilomaˈ i Itali, ato miliyas to itiniay a paro no lomaˈ ato widang.” Soˈlin, itini 2016 miheca 5 folad, ci Cisaye kamayan minokay i Komayrong. Ikor, mararamoday cingra aci Ayos. Itini Komayrong fenpo painiay cangranan mararamod malinah tayra i Ayos a niyaroˈ, tada misaaliay to mitosilay itira.

Samanay ko kaˈorip itira hani? Sanay ci Cisaye: “Tocerid cecayay lipay awa ko tingki, adihayay tatokian cowa pisaka dademak kami to soci, samanen awaay ko sapiciwting a tingki. Mafanaˈayto kako tano kasoy a misaholo, mitalaay kami tahini dadaya caka ˈaloman ko tamdaw i, micikelohay kami to paliding, tano tinci a miladom.” O maanan ko padamaay cangranan miremo to sapalifet hani? Sanay ci Cisaye: “Pakayniyan ni Yihofa i fangcalay saocor a padama tamiyanan, madadamaayho kami. Roma i, pakalalokay ko paro no lomaˈ ato widang tamiyanan, latekay pafeliyay to payci padama tamiyanan.”

Minokay i Komayrong matayal, lipahakay ci Cisaye han? Sanay cingra: “Hatiraayto! Cowa ka makesem kako. Soˈlin ya minokay aca tahalifaay to pasangaray, matoleday no latekay. Kawra mananamto i, matatodongay ko kapinokay sanay kami miharateng, soˈlinayto o hadademaken niyam konini a demak. Mitadiˈec kami ci Yihofaan, matongalay ko kangaˈay no kalalaˈed Cingranan.” Ci Ayos aci Cisaye mirienangay to SKE, nohatini malo misaliyaday a mikiriwiˈay misakafahay cangra.

Saka adihayaw no mifotingan, cowa ka talaw ko mifotingay, makahiyay miremo to masakenaay pasangaray. Malecaday, sapadamaaw to maolahay to Kimad a tamdaw, minokay i nalacolan mitosil a salikaka makahiyay a kinafalah. Maharatengay ni Yihofa ko pakayniyay i ngangan Ningra mihadakan a olah no malalokay a salikaka, halo palemed cangranan. (Nihimiya 5:19; Hipray 6:10) Ano itiniyay kiso roma kitakit, misaaliay to adihayay mitosilay ko nalacolan iso, wa ngaˈay kiso minokay han? Ano pahawang kiso, madeng wa ira ko kadofahay a sapalemed tisowanan!—Taneng 10:22.