O Ninifi niyaroˈ adihayay ko taˈangayay patirengan ato piharatengan a ˈotoc
Mafanaˈay Kiso Han?
Ikor no lintad ni Yona o Ninifi a niyaroˈ malifaay ko maanan?
MAEDENG i Kongyen 670 miheca, o Asiriya malo ciˈicelay a kitakit no hekal. Itini pitelian to katelangay likisi a kitiraan no Ikok a wangcan sanay: “O makowanay no Asiriya kaetip tangasaay Sayprus, kawali tangasaay i Irang, cecay liyad mahawpay ko Icip.” Sataˈangayay niyaroˈ no Asiriya o Ninifi, adihayay ko taˈangayay piharatengan a ˈotoc, makapahay a palosayan, makapahay lomaˈ no hongti ato taˈangayay tosokowan. Nolitengan a Ninifi matoˈtoˈay a tilid paihkalay, o Panipa no Asiriya malecaday o romaroma hongti no Asiriya panganganay to niyah o “Hongti no hekal” sanay. O Asiriya ato Ninifi a niyaroˈ tada ciˈicelay nengnengen tanektekay caka ngiyangi.
O ciˈicelay a Asiriya o sakakahaday ko pala a kitakit
Saˈodingaran no Asiriya i, paˈayaway ko pairasolay ni Yihofa ci Cifaniya saan: ‘Papalaˈafoen no Kawas ko Asiriya, pahorac to Ninifi, malecad o tafotafokan makedal.’ Roma i, mihaenay ko sowal no pairasolay ci Nahum: ‘Piˈafas to ekim ato tadaekim! . . . Maeminay maˈafas ko niyaroˈ, malahoracayto . . . Pakaˈaraway tisowanan a tamdaw miliyasay tisowanan, saan: ‘Malaˈafoayto ko Ninifi!’ (Cifaniya 2:13; Nahum 2:9, 10; 3:7) O pakatengilay tonini a sapairasol a tamdaw pasangaray pakasoˈlin, saan miharateng: ‘Hano mahaen hani? Ciˈicelay ko Asiriya hano malowid no roma kitakit hani?’
O Ninifi malo mahoracay awaayto ko tamdaw
Caay ka harateng a demak mifekadayto. Itini saikor no saka 7 hahekalan no Kongyen, o Papilon ato Mitiya tamdaw malacafayay milowid to Asiriya. Saikor, malahoracay ko Ninifi niyaroˈ, mapawanayto no tamdaw! Itini Pookawan no Niwyok mitepangan a lalakaw sanay: “Tahini tenok no hahekalan, masongilaˈayto malahorac konini a niyaroˈ, matahepoayto no tafok, deng mikitini i Fangcalay Cudad maˈosi no tamdaw ko pakayniay Ninifi a demak.” O lalakaw no mikakingkiway to nolitengan Fangcalay Cudad i wangcan sanay, tahini satapangan no saka 19 hahekalan, “aawaay ko mafanaˈay a tamdaw tonini a niyaroˈ no Asiriya soˈlinay materek hokira.” Kawra itini 1845 miheca, mikakingkiway to nolitengan ci Awseting Hengli Layyate misatapangay mikadkad to kitiraan no Ninifi, o masadakay a dafong misawacayay to ˈodingar no Ninifi i salakat.
Pakayniay i Ninifi a sapairasol matatodongay a malaˈosi, paˈicelay to pakasoˈlin ita to sapairasol no Fangcalay Cudad. Sowal no Fangcalay Cudad o polong a mirikecay saikor o mamalaˈafo a maemin, o mamalaˈosi konini a demak!—Taniil 2:44; Paˈarawan 19:15, 19-21.