Mafanaˈay Kiso Han?

Nolitengan a Israil hano ira ko nanaman milongoc to sapakotiya a payci?

ITINI nolitengan a Israil, ˈayaw no mararamod ko faˈinayan pafeliay to sapakotiya a payci i lomaˈ no fafahiyan. O sapakotiya ngaˈayay o payci, matekesay a dafong anca o pinaˈorip no lomaˈ, o faˈinayan ngaˈayho mihadak to ˈicel malo sapakotiya a payci. Tinakoen, saka cifafahiyaw ci Yakop ci Rakilan, makahiyay matayal saki wama ningra to pito a miheca. (Satapangan 29:17, 18, 20) Hano mamihadak to sapakotiya a payci hani?

O mikakingkiway to Fangcalay Cudad a tamdaw ci Kae Mayis sanay: “Itini no mawmahay a lintad, kalimlaan ko mihadakan a ˈicel matayal. Ano mikadafo ko fafahiyan a wawa ikorto cowa kangaˈay padama to paro no lomaˈ, mansa o sapakotiya a payci ngaˈayay miparo to malahdaway no paro no lomaˈ no fafahiyan.” O sapakotiya a payci ngaˈay micowat to olah ato mararid macacawmaˈ no tosa paro no lomaˈ. Mihaenay, ano tahalifa to pasangaray noikor, o tosa paro no lomaˈ wa ngaˈay madadama. O roma i, ano micada to sapakotiya a payci ko wama no fafahiyan, mitaypiway to mihayiayto cingra mararamod ko fafahiyan wawa, maharek misaday paiken to ˈinorong i kadafo midimokos to fafahiyan a wawa.

Pafeli to sapakotiya a payci cowa ko pacakayay to fafahiyan saan ko pinengneng. O cecay “Nolitengan a Kaˈorip Ato Nanaman” a cudad sanay: “Mitoor to nanaman, o paro no lomaˈ no faˈinayan papafeli to sapakotiya a payci anca sapakotiya a dafong i paro no lomaˈ no fafahiyan. Ano nengnengen i, ciraramod ko Israil tamdaw hato misasingdiay. Kawra, o sapakotiya a payci cowa ko sapicakay to fafahi a payci, ao sapatodong to paro no lomaˈ no fafahiyan.”

Anini iraay ko sapakotiya a payci a nanaman i roma pala. O Krisciyang a wama wina ano misaali to sapakotiya a payci i faˈinayan, o ‘mamakahi a micaˈi,’ aka pakidem ko misaalian. (Filipi 4:5; 1 Korinto 10:32, 33) Mihaenay, o paihkalay cangra to cowa ka ‘ˈanof to payci’ a tamdaw ko niyah. (2 Timoti 3:2) Ano pakidemay ko pisaali no Krisciyang a wama wina to sapakotiya a payci, o faˈinayan pakayni sapietanaw to adihayay sapakotiya wa minayar to kararamodan a romiˈad, anca mapacieci misawad to misakafahay a tayal mikilim to mieminay to toki a mawmah.

Itini roma kitakit, o sifo patirengay to milingatay to sapakotiya a payci a rikec, itiraay a Krisciyang oha mamidofdof. Misamanay hani? Samanen palimoˈotay ko Fangcalay Cudad to Krisciyang midofdof to ‘mikowanay to kitakit,’ o sarikec no kitakit ano cowa pisafelit to saali no Kawas, o mamidofdof ko Krisciyang.—Loma 13:1; Dmak 5:29.