Salicay no Miˈosiay Tamdaw

Pakayni miketon to sowal, samaanay ko sowal no Fangcalay Cudad?

▪ Miketon to sowal o kalimlaan cowa ko patelasay a sowal anca o mikiˈokay to mamidemak to cecay demak. O miketonay to sowal a tamdaw to cerid iraay ko Kawas a misawacay sanay cangra. O miketonan a sowal ngaˈayay o mihadakan a sowal, ngaˈayayho o mitilidan.

Miketon to sowal o mararaway sanay ko roma tamdaw, samanen mafanaˈay cangra na pasowalay ci Yis: “Aka miketon to sowal . . . ano hai i, ‘Hai’ han. Ano caay i, ‘Caay’ han ko sowal namo, ano pakinali ko sowal iso i, o nai palafoayto korira.” (Matay 5:33-37) Mafanaˈay ci Yis itini roma pakayraan misaaliay ko rikec ni Mosi to tamdaw miketon to sowal, hanaca o roma madimadiay sikawdan no Kawas na miketonay to sowal. (Satapangan 14:22, 23; Kasadakan 22:10, 11) Roma i, mafanaˈay ci Yis na miketonay to sowal ci Yihofa. (Hipray 6:13-17) Mihaenay aka miketon to sowal cowa ka saan ci Yis, ao aka patelas kita miketon to sowal sanay, anca pakayni i cowa ko kalimlaan a demak miketon to sowal. O mihadakan ita a sowal o tatooren a midemak, samanen makalimay ci Yihofa kitanan mitoor to mikiˈokan a midemak.

Ano ira ko tamdaw misaali tisowanan miketon to sowal, sasamaan ko pidemak hani? Salakat haratengen: O miketonan iso dademaken a demak, wa soˈlin malaˈosi iso han? Ano awaay ko pinang iso i, aka miketon to sowal. Sowal no Fangcalay Cudad: “Ano caay ko lalahcien iso ko niketonan a sowal i, o nika eca iso piketon to sowal ko ngaˈay.” (Patnakay 5:5) Roma i, songilaˈen miharateng konini a miketonan a sowal milingatay to safalod no Fangcalay Cudad, dotoc mitoor to mapahatatanamay no Fangcalay Cudad a makapahay falocoˈ no niyah a misaˈosi. Iraay ko maanan milingatay a safalod no Fangcalay Cudad hani?

O roma miketonan a sowal cowa pisafelit to araaw no Kawas. Tinakoen, ano mararamod ko Misawacayay Tamdaw ni Yihofa miketonay to sowal. O cifafahiyay ato cifaˈinayay itini ˈaˈayaw no Kawas ato ˈalomanay tamdaw mikiˈok to tatahadaˈoc a midipot ato mikangodo to ramod. (O roma raramod miketonan a sowal cowa ka lecad to misowalan itini, kawra kamayan cangra o itiniay i ˈaˈayaw no Kawas miketon to sowal.) Ikorto malo soˈlinay a mararamoday cangra, mikitini misatapang hakelong no kaˈorip o mamalacafay, tahadaˈoc cowa ko malaliyas. (Satapangan 2:24; 1 Korinto 7:39) Miketon to sowal ko mararamoday o matatodongay, o malecaday to araaw no Kawas.

O roma miketonan a sowal misafelitay to araaw no Kawas. O soˈlinay a Krisciyang cowa ko mamiketon to sowal miala to sapilood a lalosidan midipot to kitakit, anca miketon to sowal misawad to pihakelongan, ecato pidoko to Kawas, samanen mihaen o misafelitay to sarikec no Kawas. O Krisciyang ‘cowa ko noniya hekal,’ mansa caay ko mamicapid kita to lacongis ato lalood nonini a hekal.—Yohani 15:19; Isaya 2:4; Yakop 1:27.

O roma miketonan a sowal tano makapahay a falocoˈ misaˈosi to mamiketon to sowal hokira. Sanay ci Yis: ‘Oni Kaysa i, pafelien ci Kaysaan, ono Kawas a maamaan i, pafelien ko Kawas.’ (Luka 20:25) Latekay misaaliay kita mitoor tonini misowalan ni Yis a safalod, misongilaˈ mihapinang pakayni cecay demak mamiketon to sowal hokira.

Tinakoen, itini pisingsi to kika ato saaroˈan ko Krisciyang i, misaaliay to mamiketon to sowal madimadi to kitakit alatek. O hatiniay a piketon to sowal tora kitakit ano mikiˈokay to mamidemak to misafelitay to rikec no Kawas a demak, o mapahatatanamay no Fangcalay Cudad a makapahay falocoˈ ningra caay kakahi cingranan miketon to mahaenay a sowal. Kawra, o roma sifo makahiay to tamdaw mitoor to makapahay falocoˈ no niyah misalof to miketonan a sowal.

O maharekayto salofen a miketonan a sowal ikor, o hatiniay a miketonan a sowal no Krisciyang matatodongay to safalod no Loma 13:1 alatek, sanay ko sinael: ‘Mikowanay to kitakit, o dadofdofen no kahacecay tamdaw.’ O cecay Krisciyang saan ko harateng alatek, miketon to sowal midemak to misaalian no Kawas a demak cowa ko mararaway.

Ano masaali kiso itini piketon to sowal misaka dademak to cecay dafong anca cecay a kawing, o tatooren ko makapahay falocoˈ no niyah a misaˈosi. Nolitengan a Loma tamdaw ato Sisiya tamdaw misaka dademakay to fonos no niyah a miketon to sowal, tatodong i o milooday a kawas patadoay cangranan misawacay. Nolitengan a Kirisiya tamdaw ano miketon to sowal i, milayaˈay to cecay kamay, pasayra i kakarayan mitoroˈ, tatodong i itini i kaˈayaw no kawas iraay ko ˈinorong no niyah to mihadakan a sowal, samanen o mihadakan no niyah a sowal, ato midemakan mafanaˈay ko kawas maemin.

O tahapinangan no roma kitakit marariday dokoen no tamdaw, anca milingatay to mararaway a pihakelongan, o midokoay to Kawas a tamdaw cowa ko mamisaka dademak to mahaenay a dafong miketon to sowal. Kawra ano misaali ko hoing tisowanan miteli to kamay i fafekang no Fangcalay Cudad, miketon to sowal o sasoˈlin ko hasowal, sasamaan hani? Itini i mahaenay a pakayraan mamisaˈosi kiso miketon to sowal alatek, samanen masowalay no Fangcalay Cudad ko roma madimadiay midoko to Kawas a tamdaw itini piketon to sowal i, midemakay to pina a kawing. (Satapangan 24:2, 3, 9; 47:29-31) Haharatengen iso, ano miketon kiso to hatiniay a sowal, malecaday o itiniay ˈaˈayaw no Kawas mikiˈok to sasoˈlin ko sowal no niyah, toniya tatokian mamaharek to kiso a misaday, ano o maananto ko salicay no tao, o sasoˈliˈlin ko caˈof no miso.

Misaaretengay kita minengneng to kalalaˈed no niyah aci Yihofa, mihaenay ano ira ko misaaliay kitanan miketon to sowal, oha mamitolon kita hanaca misongilaˈ misimsim, misaˈosi to miketonan ita a sowal cowa ko mamisafelit to makapahay falocoˈ no niyah ato safalod no Fangcalay Cudad. Ano misaˈosiay kiso miketon to sowal, tatooren iso a midemak ko misowalan, milahci to mikiˈokan iso.—1 Pitiro 2:12.