Nolitengan a Israil Tamdaw Hano Mirienangay to Lalood, Kita Saan Cowa ka Pihaen?

ITINI Saka Tosa Lalood no Hekal a tatokian, o cecay sofitay no Naci pasayraay i Misawacayay Tamdaw ni Yihofa celiˈ sanay a pasowal: “O kahacecay namo ano cowa pilood mitowakang to Frans anca Ikok, kamo maemin o mamapatay!” Soˈlin cecay ˈopo marocekay ko sapilood a lalosidan a sofitay no Naci itatihiay mitala, kawra o kahacecay salikaka ita cowa ka pihayi. Tada timoloay cangra! Oniya tinakoan ihkalay mitadtad to pinengneng no Misawacayay Tamdaw ni Yihofa to lalood: Caay ko mamirienang kami toniya lalood no hekal, soˈlin micada to saroero ko kaˈorip, kamayan kami manaˈay itini kasasongtol a midama to malalooday.

Kawra, cowa ko polong misao Krisciyangay a tamdaw mihayiay tonini a pinengneng. O Krisciyang ngaˈay mirienang to lalood midipot to kitakit sanay ko harateng no ˈalomanay tamdaw, o mamihaen to demak. Sanay cangra somowal: “Nolitengan a Israil a tamdaw o finawlan no Kawas, malingaday cangra a milood, o aniniay a Krisciyang hano cowa ka ngaˈay mihaen to demak hani?” Sasamaan ko caˈof iso? Misiˈayaw to hatiniay a sasa, ngangaˈay kiso mitadtad o pakayraan nolitengan a Israil ato pakayraan no finawlan no Kawas anini taˈangayay ko kasasiroma. Nengnengen ita ko lima kasiromaan.

SAKA 1. ITINI NOLITENGAN, O FINAWLAN NO KAWAS MASALALOMAˈAY NO CECAY A KITAKIT

Itini nolitengan, misaˈopoan ni Yihofa ko finawlan Ningra, malo Israil a kitakit. Sanay Cingra itini polong a finacadan o Israil a tamdaw o mikiriwiˈay a hafay Ningra. (Kasadakan 19:5 ato roma pihongyak.) Pafelianho Ningra to cecay a pala cangra, patadoay cangranan misaˈosi to tolas no pala. Mihaenay, o Israil tamdaw mitengilay to sapalimoˈot no Kawas ano milood to roma kitakit i, cowa ka pidokaˈ to roma midokoay to Kawas a tamdaw.a

Anini, o midokoay ci Yihofaan a tamdaw mikitiniay i ‘polong kasakitakit kasafinacadan, kasangasaw, sasowalen.’ (Paˈarawan 7:9) Ano mirienang to lalood ko finawlan no Kawas, o mamapapatay alatek.

SAKA 2. PALIMOˈOTAY CI YIHOFA TO ISRAIL TAMDAW MILOOD

Itini nolitengan, o Israil tamdaw ihacowaay a tatokian ato o maan ko araaw a milood, o ci Yihofa ko misaˈosiay. Tinakoen, o Kanan a tamdaw midokoay to tatiihay coyoh, malafoay ko waywayan, mitodohayho to wawa no niyah patafang to makaniway kawas. Pakayni midemakan no niyah a tatiihay demak tatiihayto ko ngangan nangra, mansa palimoˈotay ci Yihofa to Israil tamdaw misayfang to Kanan a tamdaw, palaˈafo cangranan, mihaen ecato ka fiyor nangra ko Israil tamdaw midemak to tatiihay a demak. (Lifi 18:24, 25) Itini mikiˈokan sapafeli no Kawas a pala mikilomaˈ ko Israil tamdaw ikor, latekay palimoˈotayho ko Kawas cangranan milood to micomoday a ˈada. (2 Samuil 5:17-25) Kawra, cowa pihayi ci Yihofa to Israil tamdaw tano niyah a harateng milood. Ano haratengay sa cangra a midemak, ka adayayanto ko teloc.—Saˈosi 14:41-45; 2 Rayray 35:20-24.

Anini, cowa ka palimoˈot ci Yihofa to tamdaw milood. Milood ko tamdaw sahtoay mikitiniay misatekeday ko araaw, cowa pilingat to araaw no Kawas. Milood cangra sapiˈafasaw to pala alatek, milifok to hafay, anca micowat to mirikecay a harateng no niyah. Kawra, o roma tamdaw tano ngangan no Kawas milood, sapaˈadingaw to pihakelongan saan ko sowal, anca palaˈafo to ˈada no Kawas. O lalangian nangra matatodongay han? Cowa. Mamidipot ci Yihofa to finawlan Ningra ato palaˈafo to ˈada Ningra, itini noikor a Armakiton a lalood mamihaen ko demak Ningra. (Paˈarawan 16:14, 16) Itira tora lalood, o sofitay no Kawas edengan o kakarayan a coyoh ko palaˈosiay, itiniay i fafekang no sera a finawlan Ningra cowa ko mamirienang to lalood.—Paˈarawan 19:11-15.

SAKA 3. O ISRAIL TAMDAW COWA KO MAMIPATAY TO PAKASOˈLINAY TO KAWAS A TAMDAW

Mitakecan ni Lahap ko cecay matoˈasay a paro no lomaˈ, miliyas to malaˈafoay a Yiriko a niyaroˈ, iraayho ko romaroma paro no lomaˈ mihakelongay cingranan miliyas. — Na padamaan no Kawas ko Israil tamdaw milowid to Yiriko. Anini, o mamidama ko Kawas to cecay malalooday a kitakit han?

Itini nolitengan, o sofitay no Israil cowa ko mamipatay to pakasoˈlinay to Kawas a tamdaw. Edengan o misaˈosian no Kawas papalaˈafoen a tamdaw ko papatayen nangra. Nengnengen ko tosa tinakoan. Soˈlin palimoˈotay ci Yihofa to Israil tamdaw palaˈafo to Yiriko a niyaroˈ, kawra pakasoˈlinay ci Rahap ci Yihofaan, cowato kapatayen no Israil tamdaw cingra ato paro no lomaˈ ningra. (Yosuwa 2:9-16; 6:16, 17) Ikor, paihkalay to mangodoay falocoˈ ko Kipiyon a tamdaw ci Yihofaan, orato cowa to pilood ko Israil tamdaw to Kipiyon.—Yosuwa 9:3-9, 17-19.

Anini, malalooday a sofitay cowa ka pakayni i pakasoˈlin no cecay tamdaw to Kawas ecato pipatay cingranan. Roma i, tocerid ˈalomanay mapatayay i lalood o awaay ko raraw a kalo a tamdaw.

SAKA 4. MAMIDOFDOF KO ISRAIL TAMDAW TO PATIRENGAN NO KAWAS PAKAYNI I LALOOD A SARIKEC

Itini nolitengan, misaaliay ci Yihofa to sofitay no Israil ano malalood i midofdof to sakayat Ningra. Tinakoen, ˈayaw no milood to roma niyaroˈ, palimoˈotay ci Yihofa to Israil tamdaw isalakat ‘mihadak to sakadipayal a saali.’ (Limoˈot 20:10) Makalimay ci Yihofa to sofitay no Israil mitafo to kakorac no tireng no niyah ato pakopangan, mitoorho to mipatirengan Ningra a palinian no waywayan. (Limoˈot 23:9-14) Soˈlin taliyokay a finacadan ano malowid ko cecay pala ikor miˈodangay to itiraay a fafahiyan, kawra mikecengay ci Yihofa to Israil tamdaw mihaen to demak. Soˈlinay i, itini malowid no Israil tamdaw ko cecay niyaroˈ ikor, cowa ka ngaˈay tangsol misafafahi to malepelay a fafahiyan, mamitala to cecay folad ikor ngaˈ ngaˈay mihaen to demak cangra.—Limoˈot 21:10-13.

Anini, mataterekay ko adihayay kitakit to koksay a katatelekan, ano mifekad ko lalood mihayi to mamidofdof to pina sarikec. Soˈlin patireng toniya katatelekan sapidipotaw to finawlan, kawra ka adayayan i mirienangay to lalood a kitakit marariday misafelit toniya sarikec.

SAKA 5. MALACAFAYAY KO KAWAS TO ISRAIL TAMDAW MILOOD

Palimoˈotay ci Yosuwa to Israil tamdaw miowaw, palimoˈotayho to saysi mihoni to laepa, mapelalayto ko lowil no Yiriko. Kawra iraay ko miming a lowil cowa ka pelal, ilowilay a sasingalan iraay ko kahngangay a sasoˈot mitefadan. — Itini pilood no Israil tamdaw to Yiriko i cowa pipatay to paro no lomaˈ ni Rahap. Anini, malalood ko sofitay i cowa pipatay to pakasoˈlinay to Kawas a tamdaw han?

Itini nolitengan, midamaay ci Yihofa to Israil tamdaw, kinapinaay midemak to kafahkaˈan padama cangranan pakalowid milood. Tinakoen, samaanay ci Yihofa padama to Israil tamdaw pakalowid to Yiriko a niyaroˈ hani? Midofdofan no Israil tamdaw ko limoˈot ni Yihofa, ‘itini piloodan taˈangay ko ngiha miowaw, tangsolay mapelal ko lowil no Yiriko,’ telocto kantangay malowid ko Yiriko a niyaroˈ. (Yosuwa 6:20) Itini cecay a lalood samaanay ko Israil tamdaw pakalowid to Amori a tamdaw hani? ‘Ci Yihofa mikitini kakarayan patefad to taˈakayay masaˈikayay soeda miˈodis cangranan . . . O mapatayay no masaˈikayay soeda, ikakaay ko ˈaloman to tano fonosan no Israil tamdaw a mipatayan.’—Yosuwa 10:6-11.

Anini, cowato pidama ci Yihofa to malalooday a kitakit. O Hongti Kitakit Ningra ci Yis ko mikowanay, ‘cowa ko nonini a hekal.’ (Yohani 18:36) Soˈlinay i, polong a sifo makowanay ni Satan, o mariˈangay a lalood no hekal patalahkalay to tatiihay a capeling ningra.—Luka 4:5, 6; 1 Yohani 5:19.

MAOLAHAY TO DIPAYAL KO KRISCIYANG

Maherekayto kita mifolfol, o pakayraan ita anini taˈangayay ko kasasiroma to nolitengan a Israil. Kawra, o kaeca pirienang ita to lalood cowa ko pakayniay aca toniya kasasiroma, iraayho ko roma a lalangian. Tinakoen, paˈayaway ko Kawas itini salikoray romiˈad o micadaay to sapasifanaˈ Ningra a tamdaw cowato ko maminanam to lalood, mangalef cowa ko mamirienang to lalood. (Isaya 2:2-4) Roma i, sowal ni Kristo o nisawawaan ningra ‘cowa ko nonini a hekal,’ mihaenay cowa ko mamidama cangra to malalooday a kitakit.—Yohani 15:19.

Pakalalokayho ci Kristo to nisawawaan ningra midemak to roma a demak. Pasifanaˈan ningra ko nisawawaan mifalah to mikidatay to ˈinteh, mangolaway anca lalood a tatiihay waywayan. (Matay 5:21, 22) Roma i, pasifanaˈan ningra ko nisawawaan ‘micowat to dipayalay,’ hanaca maolah to ˈada nangra.—Matay 5:9, 44.

Wa samaan ko pidemak ita hani? Maedeng caay kakahi kita mirienang to lalood, kawra kemoday a falocoˈ ita iraay ko miming misaˈadaay a harateng to cecay a salikaka han? O mahaenay a waywayan mamikidat to kasasongtol ato kaliwasak no kasakopang alatek. O papadadotoc kita misaˈicel mifalah to mahaenay tatiihay a waywayan.—Yakop 4:1, 11.

Caay ko mamicapid kita to kasasongtol no kasakitakit. Masafelitay, o mamicowat kita to dipayalay, masasiolaolah. (Yohani 13:34, 35) Cato ka halafin, papairato ko Kawas to midaˈocay a dipayal, cowato ko aira ko lalood no hekal. Itini pitalaan tonini a romiˈad a tatokian, nanay misetek kita to falocoˈ mitafo to misatenokay a saaroˈan.—ˈOlic 46:9.

a Itini lalomaˈ no Israil na mifekaday ko lalood, kawra o hatiniay a lalood cowa ka olah ko Kawas ci Yihofa. (1 Hongti 12:24) Kawra, o roma a ngasaw no Israil kinapinaay cowa ka madimadi to Kawas, anca midemakay to pakidemay a raraw. Orato, mihayiay ko Kawas to roma ngasaw milood toniya ngasaw.—Kakitaan 20:3-35; 2 Rayray 13:3-18; 25:14-22; 28:1-8.