Padamaay ci Yihofa Kitaanan Milahci to Mitosilay a Tayal

1. Ano mitosil kita i, tatahalifa to maanan? Kawra ngaˈay pakasoˈlin kita to maanan?

ANO mitosil kita i maedeng o tatahalifa to misafelitay, hanaca o mahaenay pisafelit mamalingad ko pakidem. (Taniil 11:44; 2 Timoti 3:12; Paˈarawan 16:21) Kawra ngaˈay pakasoˈlin kita o papadama ci Yihofa kitaanan. Misamaanay hani? Samanen nolitengan tahanini, ano samaanto a pasangar ko ˈinorong no sikawdan ni Yihofa, padamaan Ningra cangra milahci. Sapitadtadaw tonini, nengnengen ita ko nalifetan no cecay pairasolay. Ci Icikil cingra, milasilay cingra to lihaf no Kawas i maholiway i Papilon a Yutaya tamdaw.

2. (1) Samaanay ci Yihofa somowal to mitosilan ni Icikil a tamdaw hani? (Icikil 2:3-6) (2) Onini a lalakaw mamilengo to maanan?

² O mitosilan ni Icikil o masamaanay a tamdaw hani? Sanay ci Yihofa, ‘mitowakangay cangra,’ hanaca ‘ˈatekakay ko falocoˈ,’ o ‘pacoliay a finacadan.’ Malecaday o ceka cangra midokaˈ to tamdaw, malecaday o rarikah katalawan. Mansa kinapinapina ci Yihofa pasowal ci Icikilan ‘aka matalaw cangranan.’ (ˈOsien ko Icikil 2:3-6.) Ngaˈay ci Icikil milahci to mitosilay a tayal no niyah, samanen (1) minilnilan ni Yihofa cingra, (2) mitiˈeray cingra to fangcalay saocor matomes ko timolo, (3) mapahaleday no kimad no Kawas cingra. Oniya tolo lalangian itini mitosilay a tayal ni Icikil iraay ko manan sapadama hani? Anini sasamaan ci Yihofa tano malecaday a pakayraan padama kitaanan hani?

MINILNILAN NI YIHOFA CI ICIKIL

3. (1) O manan a sowal pakalalokay ci Icikilan? (2) Samaanay ci Yihofa mikiˈok to papadama Cingra ci Icikilan?

³ Pasowalan ni Yihofa ci Icikil: ‘Ocoren Ako kiso tayra i Israil tamdaw.’ (Icikil 2:3, 4) O sowal ni Yihofa maedeng pakalalokay ci Icikilan, misamaanay hani? Maharatengay ningra alatek, na somowalay ci Yihofa to malecaday a sowal tiya minilnil ci Mosian aci Isayaan malo pairasolay. (Kasadakan 3:10; Isaya 6:8) Mafanaˈayho ci Icikil to samaanan ni Yihofa padama koniya tatosaay pairasolay a miremo to masakenaay pasangaray. Mansa, tiya kinatosa ci Yihofa pasowal ci Icikilan ‘ocoren Ako kiso’ saan i, maedeng pakasoˈlinay ci Icikil to mamidama ci Yihofa cingranan. Roma i, itini Icikil a cudad, marariday maˈosi ita ‘iraay ko sowal ni Yihofa takowanan’ sanay. (Icikil 3:16) Kinapinaay ci Icikil pasowal ‘iraay aca ko sowal ni Yihofa takowanan.’ (Icikil 11:14) Mahapinangay, mafanaˈay ci Icikil to minilnilan ni Yihofa ko niyah. Cowa konini aca, o wama ni Icikil o saysi, marariday pasowal ci Icikilan alatek, tocerid pakalalokan ni Yihofa ko pairasolay no Niyah, mikiˈok to papadama cangranan. Tinakoen, na pasowalan ni Yihofa ci Isak, ci Yakop aci Yirimiya: ‘Kalacafay Kako tisowanan.’—Satapangan 26:24; 28:15; Yirimiya 1:8.

4. O manan mihinomay to falocoˈ a sowal maedeng paˈicelay ci Icikilan hani?

⁴ ˈAlomanay Israil tamdaw pakayni milasilan ni Icikil a lihaf samaanay ko piharateng hani? Sowal ni Yihofa: ‘Cowa ko mamitengil ko Israil tamdaw tisowanan, samanen cowa ka olah cangra mihakelong Takowanan.’ (Icikil 3:7) O sowal ni Yihofa maedeng parihadayay to falocoˈ ni Icikil. Manaˈay ko Israil tamdaw ci Icikilan, malecaday o manaˈayay ci Yihofaan. Caka ngaˈay ko waywayan nangra, o pasokiyaway ko pairasolay a tayal ni Icikil cowa ka saan. Mikiˈokay ci Yihofa ci Icikilan, ano malaˈosi to maemin ko milasilan ni Icikil sapisawkit a lihaf i, o Israil tamdaw ‘o mamafanaˈ iraay ko pairasolay ilalomaˈ nangra.’ (Icikil 2:5; 33:33) Onini a mihinomay to falocoˈ a sowal maedeng paˈicelay ci Icikilan, ngaˈay milahci to mitosilay a tayal ningra.

MINILNILAN NI YIHOFA KITA ANINI

5. Mikitini Isaya 44:8, mafanaˈ kita to manan wa irato ko timolo hani?

⁵ Anini minilnilan ni Yihofa kita, mafanaˈ tonini pairaay to timolo ita mitosil to tamdaw. Panganganen ni Yihofa kita to ‘misawacayay tamdaw’ Ningra, tada malikoay kita! (Isaya 43:10) Pasowalan ni Yihofa ci Icikil ‘aka matalaw cangranan,’ anini mahaenay ko sowal ni Yihofa kitaanan: ‘Aka matalaw kamo.’ Hano cowa ko mamatalaw to misafelitay kitaanan a tamdaw hani? Malecad ci Icikilan, o minilnilan ni Yihofa kita, iraay ko sadama ni Yihofa, mansa cowa ko mamatalaw kita.—ˈOsien ko Isaya 44:8.

6. (1) Samanay ci Yihofa mikiˈok, o papadama Cingra kitaanan? (2) Mafanaˈ to manan mamilifok kita to sahinom ato ˈicel hani?

⁶ Mikiˈokay ci Yihofa o mamidama Cingra kitaanan. Tinakoen, ˈayaw no somowal to ‘o misawacayay tamdaw Ako kamo’ sanay a sowal i, salakatay ci Yihofa mihadak to cecay sakiˈok, sanay: ‘Milakec kiso to nanom, wa kalacafayen Ako kiso. Milakec kiso to ˈalo, cowa ko mamaˈemek no nanom kiso. Mihawang kiso to namal i, cowa ko mamatodoh no namal kiso.’ (Isaya 43:2) Ano midemak to ˈinorong mitosil i, o tatahalifa kita to malecaday o cedas a sacara anca malecaday o namal a sapalifet. Kawra, ira ko sapadama ni Yihofa, wa ngaˈayho kita padadotoc a mitosil. (Isaya 41:13) Malecad to lintad ni Icikil, ˈalomanay tamdaw anini cowa pitengil to milasilan ita a lihaf. Haratengen ita, caka pitengil cangra, o pasokiyaway ko pisawacay ita ci Yihofaan cowa ka saan. Mitafo kita to madimadiay, padadotoc a mitosil, o mamahemek ci Yihofa. Mafanaˈ tonini mihinomay ato paˈicelay kitaanan. Sowal no tarokos ci Pawlo: ‘O kahacecay tamdaw wa mitoor to karoray no niyah milifok to sapalifon.’ (1 Korinto 3:8; 4:1, 2) Cecay fafahiyan salikaka halafinayto malo misakafahay, sanay cingra: “Mafanaˈ to papakayni mihadakan ita a palifon ci Yihofa kitaanan, tada lipahakay kako.”

MITIˈER CI ICIKIL TO FANGCALAY SAOCOR MATOMES KO TIMOLO

7. Ano tikolen ni Icikil miharateng ko maˈaraway no niyah a mapolosi i, maedeng iraay ko maanan a epoc cingranan? (Nengnengen ko papotalay coka.)

⁷ Maˈaraway ni Icikil taˈangayay ko ˈicel no fangcalay saocor no Kawas. Itini mapolosi, maˈaraway ningra cowa ko pikayat aca no fangcalay saocor to taˈangayay ko ˈicel a coyoh, ngaˈayayho parakat to taˈangayay kalileng no sapilood a paliding i kakarayan. (Icikil 1:20, 21) Samanay ko harateng ni Icikil hani? Mikangodoay ko falocoˈ ningra! Sanay cingra: ‘Maˈaraw ako mipitolosay i sera mitaˈong.’ (Icikil 1:28) Ano tikolen ni Icikil miharateng koniya kasapaan a mapolosi i, maedeng makowaday ko falocoˈ, pakasoˈlinay cingra mitadiˈec ko niyah to sadama no fangcalay saocor, o mamalahci ko mitosilay a tayal.

8-9. (1) O sapalimoˈot ni Yihofa iraay ko maanan a pifiyor ci Icikilan? (2) Samanay ci Yihofa mitongal paˈicel ci Icikilan, ho ngaˈay cingra midemak to pasangaray a ˈinorong hani?

⁸ Palimoˈotan ni Yihofa ci Icikil: ‘Wawa no tamdaw, ka tomireng, pasowalen Ako kiso.’ Maharek ci Yihofa pasowal tonini a sowal ikor, iraayto ko ˈicel ni Icikil, ngaˈayayto tomireng. Sanay ci Icikil: ‘Micomoday i tireng ako ko fangcalay saocor, patomireng takowanan.’ (Icikil 2:1, 2) Ikor, itini pidemak ni Icikil to ˈinorong i, misaka dademakan ni Yihofa ko kamay Ningra, oya fangcalay saocor Ningra, mikayat ci Icikilan. (Icikil 3:22; 8:1; 33:22; 37:1; 40:1 ato roma pihongyak.) O fangcalay saocor no Kawas patimoloay ci Icikilan midemak to ˈinorong, pasayra i ‘ˈatekakay ko katotong no fongoh’ ‘ˈatekakay ko falocoˈ’ a Israil tamdaw mitosil. (Icikil 3:7) Pasowalan ni Yihofa ci Icikil: ‘O laway nangra, o katotong no fongoh nangra hakowaay ko ˈatekak, hatiraen Ako paˈatekak ko laway iso, ato katotong no fongoh. Palecaden ako to fakeloh ko katotong no fongoh iso, ikakaho to fakeloh ko ˈatekak . . . aka matalaw kiso cangranan, aka pakayni i pising nangra a marawraw.’ (Icikil 3:8, 9) Malecaday o pasowalay ci Yihofa ci Icikilan: ‘Aka pakayni ka ˈatekak no Israil tamdaw a matoled, patanekteken Ako a paˈicel kiso.’

⁹ Ikor norira, miˈorongan no fangcalay saocor ci Icikil tayra roma pala, sanay ci Icikil: ‘O kamay ni Yihofa itini tireng ako mihadakay to taˈangayay sapadama.’ Mipalakay cingra to cecay lipay a toki cipinang a midotim to papilasilan ni Yihofa cingranan a lihaf. (Icikil 3:14, 15) Ikor, itini sakayat ni Yihofa tayraay cingra i cecay dafdaf. Itira, ‘micomoday ko fangcalay saocor i lalomaˈ [ningra].’ (Icikil 3:23, 24) Maharekayto ci Icikil misaday misatapang mitosil.

ANINI MITIˈERAY KITA TO FANGCALAY SAOCOR MATOMES KO TIMOLO

10. Sapilahciaw to mitosilay a tayal, misaaliay kita to maanan sapadama hani? Misamaanay?

¹⁰ Sapilahciaw to mitosilay a tayal, misaaliay kita to maanan sapadama hani? Sapacaˈofaw toniya salicay, haratengen ko mifekaday i tireng ni Icikil a demak. Itini ˈayaw no misatapang cingra to mitosilay a tayal i, pakaynian no Kawas i fangcalay saocor pafeli cingranan to mikiriwiˈay a timolo. Anini, malecad ci Icikilan, edengan mitiˈer kita to sadama no fangcalay saocor no Kawas, ngaˈ ngaˈay malahci ko mitosilay a tayal. Misamanay hani? Samanen mamilood ci Satan kitaanan, sapicongedaw kitaanan mitosil. (Paˈarawan 12:17) Mikitini pinengneng no tamdaw, cowa ko papakafilo kita ci Satanan. Kawra padadotoc kita misawacay ci Yihofaan, o papakalowid ci Satanan! (Paˈarawan 12:9-11) Hano mahaen ko sowal hani? Mirienang kita to mitosilay a tayal o paihkalay cowa ka mapadik no sapatalaw ni Satan ko niyah. O kahacecay a pitosil ita, o mipadikay ci Satanan. Soˈlin misiˈayaw to pakidemay pisafelit, kamayanho padadotoc kita a mitosil, misawacayay konini to maanan hani? Iraay ko fangcalay saocor midama kitaanan, milifokayho to pihayda ni Yihofa.—Matay 5:10-12; 1 Pitiro 4:14.

11. O fangcalay saocor wa ira ko manan sapadama kitaanan? Sasamaan ko pidemak ita, ngangaˈay padadotoc milifok to fangcalay saocor?

¹¹ Ci Yihofa itini sapatinako a tatodong paˈatekakay to laway ato katotong no fongoh ni Icikil. Mananamay ita ko maanan hani? Ano mitosil i, ano tahalifato to maanan pasangaray, o fangcalay saocor no Kawas o papadama kitaanan miremo. (2 Korinto 4:7-9) Samaan ko pidemak ita, o ngangaˈay padadotoc milifok to fangcalay saocor hani? O papadotoc kita a mitolon, hanaca pakasoˈlin to papacaˈofen ni Yihofa kita. Pasifanaˈan ni Yis ko nisawawaan ‘ka padotoc a micangacang, . . . padadotoc mikilim, . . . padadotoc mikongkong to fawahan,’ mihaen o papafeli ko Kawas to ‘fangcalay saocor i micangacangay Cingranan a tamdaw.’—Luka 11:9, 13; Dmak 1:14; 2:4.

MAPAHALEDAY NO KIMAD NO KAWAS CI ICIKIL

12. Mikitini Icikil 2:9–3:3, mikicowaay aira ko maloloday cudad hani? Matiliday ko maanan i fafekang?

¹² Matomes ko timolo ni Icikil cowa ko pitiˈer aca to fangcalay saocor no Kawas, mapahaledayho no kimad no Kawas. Itini mapolosi maˈaraway ningra ko cecay kamay mitatiway to maloloday iraay ko tilid a cudad. (ˈOsien ko Icikil 2:9–3:3.) Oniya maloloday cudad samaanay paˈicel to pakasoˈlin ni Icikil hani? Oniya maloloday cudad mikitiniay kamaroˈan no Kawas aira, pakaynian ni Yihofa i maˈaraway ni Icikil i saˈayaw o cecay noya sasepatay coyoh, pafeli cingranan toniya maloloday cudad alatek. (Icikil 1:8; 10:7, 20) I maloloday cudad matiliday ko kimad no Kawas, o sasawkit a lihaf ko lalakaw. O papasowalen ni Icikil koniya sowal i pacoliay a Israil tamdaw. Koˈedaway koniya lihaf, matomesay ko tosa fiedac no maloloday cudad.—Icikil 2:7.

13. Palimoˈotan ni Yihofa ci Icikil samaan ko pidemak? Hano o koesanay ko maloloday cudad hani?

¹³ Papikaenan ni Yihofa ci Icikil toya maloloday cudad, mitomes to tiyad. Mitooran ni Icikil ko limoˈot ni Yihofa a midemak, mieminan komaen koya maloloday cudad. O maanan ko tatodong nonini hani? O sasongilaˈen ni Icikil miˈicay ato miselip koniya lalasilen ningra a lihaf, ho tahira i falocoˈ ningra, mitemer to nafalocoˈan ningra. Dotoc, mifekaday ko caay ka harateng a demak, mahapinangay ni Icikil koya maloloday cudad ‘malecaday o ˈodal a koesan!’ (Icikil 3:3) Misamanay hani? Harateng ni Icikil, ngaˈay mitaypiyaw ci Yihofaan mihadak to sowal tada kalikoan a demak, pakoesanay to falocoˈ ningra konini. (ˈOlic 19:8-11) Tada miakoˈiday cingra nilnilen ni Yihofa cingra malo pairasolay.

14. O manan ko padamaay ci Icikilan maharek misaday, misatapang midemak to patorodan no Kawas cingranan a tayal?

¹⁴ Ikor, pasowalan ni Yihofa ci Icikil: ‘O kihcod nano sowal Ako tisowanan, songilaˈen iso a mitengil, naˈengen i falocoˈ.’ (Icikil 3:10) O tatodong ni Yihofa i, o sasongilaˈen ni Icikil miharateng ko sowal i maloloday cudad, hanaca misongilaˈ a misimsim. Pahaleday konini to pakasoˈlin ni Icikil, mifanaˈho cingranan o lalasilen no niyah i finawlan o ciˈicelay a lihaf. (Icikil 3:11) Nohatini, matomesay i falocoˈ ni Icikil ko kimad no Kawas, maharekayto misaday mitosil, tahira ka lahcian no patorodan no Kawas cingranan a tayal ko tolas.—Nengnengen ko ˈOlic 19:14.

ANINI MAPAHALEDAY NO KIMAD NO KAWAS KITA

15. Sapadadotocaw to mitosilay a tayal, ‘naˈengen i falocoˈ’ ita ko manan?

¹⁵ Sapadadotocaw to mitosilay a tayal, o papadotoc kita micada to sapahaled no kimad no Kawas, o kihcod nano kimad no Kawas kitaanan ‘naˈengen i falocoˈ.’ Anini, pakaynian ni Yihofa i Fangcalay Cudad pasowal kitaanan. Sapadotocaw makayat no Kimad no Kawas ko harateng, kaolahan ato nafalocoˈan no niyah, sasamaan ko pidemak ita hani?

16. Makalimay ci Yihofa kitaanan samaan ko pidemak? Sasamaan kita misongilaˈ miselip to Sowal Ningra?

¹⁶ Komaen kita to kakaenen hanaca misongilaˈ miˈicay, o mamapahaled ko tireng. Malecaday, minanam kita to Kimad no Kawas hanaca misongilaˈ midotim, o mamapahaled ko pakasoˈlin. O haharatengen ita ko pakayniay maloloday cudad a mapolosi, makalimay ci Yihofa kitaanan tano Sowal Ningra ‘mitomes i tiyad no [mita],’ tatodong i songilaˈen miˈicay ato miselip to sowal Ningra. Sakalaˈosiaw noniya patosokan, mamidemak kita to tolo a demak. Salakat, mitolon kita, maharek misaday to falocoˈ no niyah, ngaˈay miselip to harateng no Kawas. Ikor, misongilaˈ micekiw to pina sinael. Dotoc, paselaˈho kita, misongilaˈ miharateng to maˈosiay no niyah a lalakaw. Mihaen to demak iraay ko maanan a epoc hani? Adihay ko misimsiman ita, wa madolo miselip to Kimad no Kawas, paˈicel to pakasoˈlin no niyah.

17. Misongilaˈ kita midotim to maˈosiay i Fangcalay Cudad a lalakaw hano kalimlaan hani?

¹⁷ Micekiw to Fangcalay Cudad ato misongilaˈ a midotim hano kalimlaan hani? Samanen mihaen to demak cowa ko pipadama aca kitaanan anini ira ko ˈicel milasil to lihaf no Hongti Kitakit no Kawas, wa ngaˈayho padama kitaanan misaday to hanoikor, samanen cato ka halafin, o mamilasil kita i tamdaw to pakidemay sapisawkit a lihaf alatek. Roma i, miharateng kita to makapahay capeling ni Yihofa, o mamatongal ko kalawidang Cingranan. Mihaen, wa irato ko rihaday ato marenecay a falocoˈ no mita, sakoesan sato ko falocoˈ.— ˈOlic 119:103.

MISETEK TO FALOCOˈ TAHATOLAS KO PIHADIDI

18. Noikor wa mapacieci ko tamdamdaw mihayi to manan? Misamaanay?

¹⁸ Cowa kalecad ci Icikilan, cowa ko pairasolay kita. Kawra, misetek kita to falocoˈ padadotoc milasil to pakaynian ni Yihofa i Fangcalay Cudad pafeli to tamdaw a lihaf, tahira kalahcian no mitosilay a tayal ko tolas saan Cingra. Mihaen, ano mamisawkit ko Kawas noikor i, cowa ko ngangaˈay ko tamdaw pasowal to caayho pakatengil ko niyah to sapirikec, caay ka ngaˈay pasowal to malawaay no Kawas cangra. (Icikil 3:19; 18:23) Itiya wa mapacieci cangra mihayi, o milasilan ita a lihaf o mikitiniay i Kawas aira.

19. Samaan kita ngaˈ ngaˈay milifok to ˈicel milahci to mitosilay a tayal hani?

¹⁹ Samaan kita ngaˈay milifok to ˈicel milahci to mitosilay a tayal hani? Maharatengayho ko sakangaˈay ni Icikil milahci to tayal a tolo lalangian han? Malecad cingranan, ngaˈay kita padadotoc mitosil, samanen minilnilan ni Yihofa kita, mitiˈer to fangcalay saocor Ningra matomes ko timolo, hanaca micada to sapahaled no Sowal Ningra. Ira ko sapadama ni Yihofa, misetek kita to falocoˈ misarocod midemak to mitosilay a tayal, hanaca ‘tahatolas ko pihadidi.’—Matay 24:13.